އައްޑޫ ސިޓީ ކައުންސިލްގެ އިދާރާ އިން ދެމުންދާ ޚިދުމަތްތައް އޮންލައިންކޮށް ދޭން ނިންމައިފިއެވެ.

އައްޑޫ ސިޓީ ކައުންސިލްގެ އިދާރާ އިން ނެރުނު ނޫސްބަޔާނެއްގައި ބުނެފައި ވަނީ ކޮވިޑް-19 އާ ގުޅިގެން، ޞިއްހީ ގޮތުން ބަލަންޖެހޭ ކަންކަން ބެލުމަށް ހެލްތް ޕްރޮޓެކްޝަން އެޖެންސީގެ އެންގުމަށް އައްޑޫ ސިޓީ މޮނިޓަރިންގއަށް ލާފައިވާތީ އާއި މިވަގުތު އައްޑޫގައި ކޮމިއުނިޓީ ސްޕްރެޑެއް އޮތުމުން، ކައުންސިލްގެ އިދާރާއާއި އަވަށު އޮފީސްތަކުން އާންމުންނަށް ދެމުންގެންދާ ބައެއް ޚިދުމަތްތައް ދިނުމަށް ދަތިތަކާ ކުރިމަތިލާންޖެހިފައިވާ ކަމަށެވެ.

މިވަގުތު އައްޑޫ ސިޓީ ކައުންސިލްގެ އިދާރާއާއި އަވަށު އޮފީސްތަކުން އޮންލައިންކޮށް ރައްޔިތުންނަށް ދެވެންހުރި ޚިދުމަތްތައް ފާހަގަކޮށް، އެ ޚިދުމަތްތައް ލިބޭނެ އިންތިޒާމް ހަމަޖައްސާފައިވާ ކަމަށާއި އައްޑޫ ސިޓީ ކައުންސިލްގެ އިދާރާގެ ވެބްސައިޓުންނާއި ކައުންސިލްގެ ފޭސްބުކް ޕޭޖުން އޮންލައިންކޮށް އެއިދާރާއާއި އަވަށު އޮފީސްތަކުން ދެވޭނެ ޚިދުމަތްތައް ފެންނާނެ ކަމަށް ކައުންސިލުން ބުނެއެވެ. މީގެ އިތުރުން ކައުންސިލްގެ އިދާރާއިން އިދާރީގޮތުން ކުރަންޖެހޭ މަސައްކަތްތައް ހުއްޓުމެއްނެތި ކުރަމުންގެންދާނެ ކަމަށް އައްޑޫ ކައުންސިލުން ބުނެއެވެ.

އައްޑޫ ސިޓީ ކައުންސިލުން މިގޮތަށް ނިންމާފައިވާއިރު، އެޗްޕީއޭ އިން ވަނީ އެސިޓީގައި ފަތިހު 04:00ން ހަވީރު 04:00ށް ކާފިއު އިއުލާނުކޮށްފައެވެ. އައްޑޫ އިން ކޮވިޑަށް ޕޮޒިޓިވްވި މީހުންގެ އަދަދު 223ށް އަރާފައިވާއިރު، މިވަގުތު އެސިޓީގައި 176 މީހުން ދަނީ ކޮވިޑަށް ފަރުވާހޯދަމުންނެވެ. އޭގެ ތެރެއިން ފަސް މީހުންނަށް ފަރުވާދެމުން ދަނީ ހޮސްޕިޓަލުގައެވެ.