މެދުއިރުމަތީ ހަނގުރާމަ

ހުރްމުޒް ކަނޑުއޮޅިން ބުރާސްފަތި ދުވަހު ދަތުރުކޮށްފައިވަނީ އެންމެ ހަތަރު މުދާ އުފުލާ ބޯޓު ކަމަށް ތަފާސްހިސާބުތަކުން ދައްކައިފި އެވެ.

ހުކުރު ދުވަހު އާންމުކުރި ވަގުތީ ތަފާސްހިސާބުތަކުން އެނގޭ ގޮތުގައި، ބުރާސްފަތި ދުވަހު އެ ކަނޑުއޮޅި ހުރަސްކުރި ބޯޓުފަހަރުގެ އަދަދު ވަނީ އޭގެ ކުރީ ދުވަހާ އަޅާބަލާއިރު ދަށްވެފަ އެވެ. ބުދަ ދުވަހު 6 ބޯޓު އެ ސަރަހައްދުން ދަތުރުކޮށްފައިވާއިރު، ފާއިތުވި 10 ދުވަހުގެ އެވްރެޖަށް ބަލާއިރު ދުވާލަކު ގާތްގަނޑަކަށް 16 ބޯޓު އެ ކަނޑުއޮޅި ހުރަސްކުރެ އެވެ.

މި ހިސާބުތަކުގައި، ދަތުރުކުރާ މަގު އޮޅުވާލުމަށްޓަކައި "އޮޓޮމެޓިކް އައިޑެންޓިފިކޭޝަން ސިސްޓަމް" (އޭއައިއެސް) ނުވަތަ ބޯޓު ދެނެގަންނަ ނިޒާމު ނިއްވާލައިގެން އެ ސަރަހައްދުން ދަތުރުކޮށްފައިވާ އެއްވެސް އުޅަނދެއް ހިމަނާފައެއް ނުވެ އެވެ.

ބާބުލް މަންދަބު ކަނޑުއޮޅިން ދަތުރުކުރާ އިޓަލީގެ ވިޔަފާރި އުޅަނދުފަހަރުގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި، އެ ސަރަހައްދަށް ހަނގުރާމަމަތީ މަނަވަރުތައް ފޮނުވުމަށް އިޓަލީން ނިންމައިފި އެވެ.

އިޓަލީގެ ޑިފެންސް މިނިސްޓަރު ގުއިޑޯ ކްރޮސެޓޯ ވިދާޅުވީ، މިކަމުގައި ވިލާތުގެ އިއްތިހާދު (އީޔޫ) އިން ގުޅިފައިވާ ނިންމުމެއް އިއުލާނުކުރަންދެން އިޓަލީން މަޑުނުކުރާނެ ކަމަށެވެ.

މިނިސްޓަރު ކްރޮސެޓޯ އިތުރަށް ވިދާޅުވީ، ކަނޑުއޮޅިން ދަތުރުކުރާ އުޅަނދުފަހަރު ހިމާޔަތްކުރުމުގެ ގާބިލުކަން އިޓަލީގެ އަސްކަރިއްޔާގައި އެބަހުރި ކަމަށެވެ. އަދި އެ ސަރަހައްދަކީ ދަތުރުފަތުރު ނުކުރެވޭ ފަދަ ނުރައްކާތެރި ތަނަކަށް ވެއްޖެނަމަ، އޭގެ ސަބަބުން ކުރިމަތިވާނެ އިގުތިސާދީ ގެއްލުންތައް އިންތިހާއަށް ބޮޑުވާނެ ކަމުގެ އިންޒާރު ވެސް އޭނާ ދެއްވި އެވެ.

ޔަމަނުގައި ހިނގަމުންދާ ހަނގުރާމަ ވަރުގަދަވެ، ހޫޘީން ދެމުންދާ ހަމަލާތަކުން ވިޔަފާރި އުޅަނދުފަހަރު ސަލާމަތްކުރުމަށް އެމެރިކާ އާއި ވިލާތުގެ އިއްތިހާދުން މިހާރު ވެސް އަސްކަރީ އޮޕަރޭޝަންތަކެއް ދަނީ ހިންގަމުންނެވެ. ނަމަވެސް، އެ ސަރަހައްދުގެ މަސްރަހު ގޯސްވަމުންދާތީ، އެ މަގުން ދަތުރުކުރާ އުޅަނދުފަހަރަށް ފުރިހަމަ ރައްކާތެރިކަން ކަށަވަރުކޮށްދިނުމުގައި މިހާތަނަށް ވަނީ ގޮންޖެހުންތަކާ ކުރިމަތިވެފަ އެވެ.

ރަތްކަނޑާއި އަދަން ކަނޑުއޮޅި އަދި އިންޑިއާ ކަނޑު ގުޅުވައިދޭ ބާބުލް މަންދަބު ކަނޑުއޮޅި ކައިރިން، ޔަމަނުގެ އައްސޭރިފަށުގައި ވިޔަފާރި އުޅަނދެއް ބަނދަރުކޮށްފައި އޮތް މަންޒަރު

ހުރްމުޒް ކަނޑުއޮޅީގައި ކުރިއަށްދާ އަސްކަރީ ހަރަކާތްތަކުގައި ދެކުނު ކޮރެއާއިން ބައިވެރިވެދާނެތީ އެކަމާ ދެކޮޅަށް އަޑުއުފުލުމަށްޓަކައި، 2026 ސެޕްޓެމްބަރު 9 ވީ ބުދަ ދުވަހު ސޯލްގައި ހުންނަ އެމެރިކާ އެމްބަސީ ކައިރިން ފެށިގެން އެ ގައުމުގެ ރިޔާސީ ގަނޑުވަރު ކަމަށްވާ "ބްލޫ ހައުސް" އާ ހަމައަށް ރައްޔިތުން ވަނީ މުޒާހަރާކޮށްފައި

އީރާނާއި އެމެރިކާއާ ދެމެދު ހިނގަމުންދާ ހަނގުރާމައިގައި ދެކުނު ކޮރެއާގެ ސިފައިން ބައިވެރިނުވާނެ ކަމަށް އެ ގައުމުން ހާމަކޮށްފި އެވެ.

ދެކުނު ކޮރެއާގެ ޚަބަރު ފަތުރާ އެޖެންސީއެއް ކަމަށްވާ "ޔޮންހަޕް" އިން ރިޕޯޓްކޮށްފައިވާ ގޮތުގައި، އެ ޤައުމުގެ ރައީސް ލީ ޖައޭ މިއުންގް ވިދާޅުވީ، އެ ޤައުމު އިތުރު ހަމަނުޖެހުމެއްގެ ތެރެއަށް ވެއްޓިދާނެ ފަދަ އެއްވެސް އަސްކަރީ ހަރަކާތެއްގައި ބައިވެރިވުމަށް އެ ޤައުމުގެ ސިފައިން ނުފޮނުވާނެ ކަމަށެވެ.  ރައީސް ލީ ވިދާޅުވީ، ދެކުނު ކޮރެއާގެ މުދާ އުފުލާ ބޯޓުފަހަރާއި ތެޔޮ އުފުލާ މަގުތަކުގެ ރައްކާތެރިކަން ކަށަވަރުކުރުމަށްޓަކައި ސަރުކާރުން އަޅަންޖެހޭ އެންމެ ކުޑަމިނުގެ ފިޔަވަޅުތައް އަޅާނެ ކަމަށެވެ.

ރައީސް ލީ މިފަދައިން ވިދާޅުވެފައި މިވަނީ، ހުރްމުޒް ކަނޑުއޮޅިއަށް އެ ގައުމުގެ ސިފައިން ފޮނުވުމާ ދެކޮޅަށް އާންމު ރައްޔިތުން އަޑުއުފުލައި، ފަހަކަށް އައިސް ބޮޑެތި މުޒާހަރާތަކެއް ކުރަމުންދާ ދަނޑިވަޅެއްގަ އެވެ.

އެ ޤައުމުގެ ރައްޔިތުން މުޒާހަރާތައް ފަށާފައިވަނީ އެމެރިކާއާއި އީރާނާ ދެމެދު ހިނގަމުންދާ ހަމަނުޖެހުންތަކުގައި ވޮޝިންޓަނަށް އެހީތެރިވުމަށް ދެކުނު ކޮރެއާއިން އިންކާރުކުރުމާ ގުޅިގެން، އެމެރިކާއާއި ދެކުނު ކޮރެއާ ގުޅިގެން ބާއްވާ އަސްކަރީ ތަމްރީނުތައް މަދުކުރުމަށް އެމެރިކާގެ ރައީސް ޑޮނަލްޑް ޓްރަމްޕް އޮގަސްޓް މަހު ނިންމެވި ނިންމެވުމާ އެކު، ހުރްމުޒް ކަނޑުއޮޅީގެ ސަލާމަތީ ކަންކަން ދިރާސާކުރުމަށްޓަކައި އިންސްޕެކްޝަން ޓީމެއް ވެސް އެ ސަރަހައްދަށް ފޮނުވައި މި ހަނގުރާމަ ތެރެއަށް ދެކުނު ކޮރެއާ ވަދެދާނެކަމަށް ޚަބަރުތައް ފެތުރުމާ އެކު އެވެ. 

އަންނަ ހަފުތާގައި ބޭއްވުމަށް ހަމަޖެހިފައިވާ އދ. ގެ އާންމު މަޖިލީހުގައި ފަލަސްތީނުގެ ރައީސް މަހްމޫދު އައްބާސް ވީޑިއޯ މެދުވެރިކޮށް ތަގުރީރު ކުރެއްވުމަށް ފުރުސަތު ދިނުމަށް އދ. އިން ނިންމި ނިންމުމަށް ފަލަސްތީނުގެ ފޮރިން މިނިސްޓްރީން މަރުހަބާ ކިޔައިފި އެވެ.

އދ. އިން މިގޮތަށް ނިންމާފައިވަނީ، ނިއުޔޯކަށް ދަތުރުކުރެއްވުމަށް ރައީސް އައްބާސް އެދިވަޑައިގަތުމުން އެމެރިކާއިން އަނެއްކާވެސް ވިސާ ދޫނުކުރުމާ ގުޅިގެންނެވެ.

މި ގަރާރު ފާސްކޮށްފައިވަނީ 152 ގައުމެއްގެ ތާއީދާއެކުގަ އެވެ. މި ގަރާރާ ދެކޮޅަށް ތިން ގައުމަކުން ވޯޓު ދީފައިވާއިރު، ހަތަރު ގައުމަކުން ވަނީ ވަކި ފަރާތަކަށް ވޯޓު ނުދީ ހިފަހައްޓާފަ އެވެ. މި ނިންމުމުގެ ދަށުން، އެމެރިކާއަށް ދަތުރުކުރުމަށް ހުރަސްތަކެއް ކުރިމަތިވާ ހާލަތްތަކުގައި، ކުރިއަށް އޮތް އެއް އަހަރު ދުވަހުގެ ތެރޭގައި ބާއްވާ އދ. ގެ ބައްދަލުވުންތަކާއި ކޮންފަރެންސްތަކުގައި ރައީސް އައްބާސް އާއި ފަލަސްތީނުގެ މަތީ ފަންތީގެ އޮފިޝަލުންނަށް ވީޑިއޯ މެދުވެރިކޮށް ބައިވެރިވެވަޑައިގެންނެވޭނެ އެވެ.

މިކަމާ ގުޅިގެން ފަލަސްތީނުގެ ފޮރިން މިނިސްޓްރީން ސޯޝަލް މީޑިއާގައި ކުރި ޕޯސްޓެއްގައި ބުނެފައިވަނީ، ޖުމްލަ 152 ގައުމަކުން މި ގަރާރަށް ތާއީދުކޮށް ވޯޓު ދިނުމަކީ، އދ. ގެ މައި މަރުކަޒާ ގުޅޭ އެއްބަސްވުންތަކާ (ހެޑްކުއާޓާސް އެގްރީމަންޓް) ކަނޑައެޅިގެން ޚިލާފަށް އެމެރިކާ ސަރުކާރުން ނިންމި ނިންމުން ބަލައިނުގަންނަކަން ހާމަވާ ކަމެއް ކަމަށެވެ.

އެމެރިކާގެ ސްޓޭޓް ޑިޕާޓްމަންޓުން ބުދަ ދުވަހު ބުނެފައިވަނީ، ފަލަސްތީން ލިބަރޭޝަން އޯގަނައިޒޭޝަން (ޕީއެލްއޯ) ގެ މެންބަރުންނަށާއި ފަލަސްތީން އޮތޯރިޓީގެ އޮފިޝަލުންނަށް ވިސާ ދޫނުކުރަން ނިންމީ، އެމެރިކާއަށް ވެފައިވާ އިގުރާރުތަކާ އެއްގޮތަށް އިސްލާހީ ބަދަލުތައް ގެނައުމަށް އެ ފަރާތްތަކުން ނުކުޅެދިފައިވާތީ އާއި، ސުލްހައިގެ މަސައްކަތްތަކަށް ހުރަސްއެޅޭ ފަދަ ހަރަކާތްތައް އެ ފަރާތްތަކުން ހިންގަމުންދާތީ ކަމަށެވެ.

އިސްރާއީލުގެ ވަޒަންވެރިން ފަލަސްތީނުގެ އުޅަނދުތަކަށް ހަމަލާދީ، ފަލަސްތީނުގެ އަވަށަކަށް ވަދެވެން އޮންނަ މަގެއް ބަންދުކޮށްފި ކަމަށް ވަފާ ނިއުސް އެޖެންސީން ރިޕޯޓުކޮށްފި އެވެ.

އިސްރާއީލުން ހިފާފައިވާ ހުޅަނގު އައްސޭރީގައި، އިސްރާއީލުގެ ވަޒަންވެރިން ފަލަސްތީނުގެ މުދަލަށް އަމާޒުކޮށް ސިލްސިލާ ހަމަލާތަކެއް ދީފައިވާ ކަމަށް ވަފާ ނިއުސް އެޖެންސީން ބުނެ އެވެ. އެގޮތުން ނާބްލުސް ކައިރީގައި އޮންނަ އަސީރާ އަޝް-ޝަމާލިއްޔާ އަވަށުގައި ފަލަސްތީނު ރައްޔިތުންގެ އުޅަނދުތަކަށް ގާ އުކައި ގެއްލުން ދީފައިވާއިރު، އުރުދުން ވާދީގެ އުތުރުގައި އޮންނަ ތޫބާސް ކައިރީގައިވާ ފަލަސްތީނުގެ އާބާދީއަކަށް ވަދެވެން އޮންނަ މަގަކަށް ގާ ފުންޏެއް ޖަހައި، އެ މަގު ވަނީ ބަންދުކޮށްފަ އެވެ.

އިންސާނީ ހައްގުތަކަށް މަސައްކަތްކުރާ ޖަމާއަތްތަކާއި އެ ސަރަހައްދުގެ ރައްޔިތުން ބުނާ ގޮތުގައި، ހިފާފައިވާ ހުޅަނގު އައްސޭރީގައި އިސްރާއީލުގެ ވަޒަންވެރިން ހިންގާ މިފަދަ ލާއިންސާނީ އަމަލުތަކަކީ ކޮންމެ ދުވަހަކު ހިނގާ އާންމު ކަމެކެވެ. ފަލަސްތީނު އޮތޯރިޓީގެ ސަރުކާރުގެ އިދާރާއެއް ކަމަށްވާ "ކޮލޮނައިޒޭޝަން އެންޑް ވޯލް ރެސިސްޓަންސް ކޮމިޝަން" އިން ހާމަކޮށްފައިވާ ތަފާސްހިސާބުތަކަށް ބަލާއިރު، ނިމިދިޔަ އޮގަސްޓް މަހު އެކަނިވެސް އިސްރާއީލުގެ ވަޒަންވެރިން ވަނީ ފަލަސްތީނުގެ ރައްޔިތުންނަށާއި، އެމީހުންގެ ބިންތަކާއި މުދަލަށް އަމާޒުކޮށް 2،030 ހަމަލާއެއް ދީފަ އެވެ.

ހުރްމުޒް ކަނޑުއޮޅިން "ގަވާއިދާ ހިލާފަށް" ދަތުރުކުރަން އުޅުނު ތެޔޮ ޓޭންކަރަކަށް ހަމަލާދީފައިވާނެ ކަމަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން ބުނެފި އެވެ.

އައި.އާރް.ޖީ.ސީ ގެ ކަނޑުގެ ސިފައިން ބުނި ގޮތުގައި، ޓޯގޯގެ ދިދަ ޖަހާފައިވާ މި އުޅަނދަށް ދިން ހަމަލާއާ ގުޅިގެން އޭގައި އަލިފާން ރޯވެ، ދަތުރުކުރަން ހުރަސް އެޅި ހުއްޓުމަކަށް އައިސްފައިވެ އެވެ. އަދި މި ޓޭންކަރު އެ ސަރަހައްދުން ދަތުރުކުރަން މަސައްކަތް ކުރީ އެމެރިކާގެ އަސްކަރިއްޔާއިން އެ ފަރާތަށް "ހިތްވަރުދީ، އޮޅުވާލުމުން" ކަމަށް ވެސް އީރާނުން ތުހުމަތުކުރެ އެވެ.

އީރާނުގެ އަސްކަރިއްޔާއިން ބުނީ، އިސްތިރާތީޖީ ގޮތުން މުހިންމު އެ ކަނޑުއޮޅީގެ ފުރިހަމަ ކޮންޓްރޯލް އެ ގައުމުގެ ސިފައިންގެ އަތްދަށުގައި އެބައޮތް ކަމަށާއި، އެއްވެސް "އުދުވާނީ" ފަރާތަކަށް އެ ސަރަހައްދުން ދަތުރުކުރުމުގެ ފުރުސަތު ނުދޭނެ ކަމަށެވެ.

އީރާނުގެ ރަސްމީ ނިއުސް އެޖެންސީ "އިރްނާ" މެދުވެރިކޮށް އާންމުކުރި ބަޔާނެއްގައި އައި.އާރް.ޖީ.ސީ އިން ވަނީ، ހުރްމުޒް ކަނޑުއޮޅިން ގަވާއިދާ ހިލާފަށް ދަތުރުކުރަން އުޅޭ އުޅަނދުފަހަރަށް ލިބޭނެ ހަމައެކަނި ނަތީޖާއަކީ އެ އުޅަނދެއް ހަލާކުވެގެން ދިއުން ކަމަށް ބުނެ އިންޒާރު ދީފަ އެވެ.

އިސްލާމީ މުގައްދަސް ބިނާތަކަށް، ހާއްސަކޮށް މައްކާއަށް އަމާޒުކޮށް ދޭ ކޮންމެ ހަމަލާއަކީ ކުށްވެރިކުރަންޖެހޭ ފިނޑި އަމަލެއް ކަމަށް އީރާނުގެ ފޮރިން މިނިސްޓްރީގެ ތަރުޖަމާނު އިސްމާއީލް ބަގާއީ ވިދާޅުވެއްޖެ އެވެ.

ބަގާއީ ވިދާޅުވީ، މައްކާއަށް އަމާޒުކޮށް ފޮނުވާލި ޑްރޯނެއް ހުއްޓުވާފައިވާ ކަމަށް ބުނެ ދައްކާ "ހަމައެކަނި ދައުވާއަކުން" އެއީ ހޫޘީން ކުރި ކަމެއް ކަމަށް ތުހުމަތު ނުކުރެވޭނެ ކަމަށެވެ.

އެކްސްގައި އާންމުކުރެއްވި މި ބަޔާން އޭނާ ނެރުއްވާފައިވަނީ، މިދިޔަ އަންގާރަ ދުވަހުގެރޭ ހޫޘީން މައްކާއަށް އަމާޒުކޮށް ފޮނުވާލި ޑްރޯނެއް ވައިގެ ތެރޭގައި ހުއްޓުވައި ގޮއްވާލާފައިވާ ކަމަށް ސައުދީ އަރަބިއްޔާއިން ބުނުމާ ގުޅިގެންނެވެ. ނަމަވެސް، ހޫޘީން ވަނީ ސައުދީގެ މި ތުހުމަތުތައް ދޮގުކޮށްފަ އެވެ.

ބަގާއީ ވިދާޅުވީ، އިސްލާމީ މުގައްދަސް ބިނާތަކާއި އެ ތަންތަނުގެ ސަލާމަތާއި ރައްކާތެރިކަމާ ގުޅޭ ކަންކަން ސިޔާސީ ނުކުރުމަށާއި، ފިތުނަ އުފައްދައި ސަރަހައްދީ ނުތަނަވަސްކަން އިތުރުކުރުމުގެ ވަސީލަތެއްގެ ގޮތުގައި އެކަންކަން ބޭނުންނުކުރުމަށް އީރާނުން ބާރުއަޅާ ކަމަށެވެ.

މީގެ އިތުރުން، އިސްލާމީ ގައުމުތަކުގެ މެދުގައި ބައިބައިވުން އުފެއްދުމަށާއި، އިސްރާއީލާއި އެމެރިކާއިން އެ ސަރަހައްދުގައި ހިންގަމުންދާ ޖަރީމާތަކުން އާންމު ރައްޔިތުންގެ ސަމާލުކަން އަނބުރާލުމަށްޓަކައި، ފާއިތުވި މަސްތަކުގައި އެ ސަރަހައްދުގައި 'ފޯލްސް ފްލޭގް' ނުވަތަ އޮޅުވާލައިގެން ގިނަ ކަންތައްތަކެއް ހިންގާފައިވާކަން ހަނދާން ނައްތާލައިގެން ނުވާނެ ކަމަށް ވެސް އޭނާ ވިދާޅުވި އެވެ.

ޕާކިސްތާނުގައި ޕެޓްރޯލް އަޅަން ކިޔުހަދައިގެން

އެމެރިކާއިން އީރާނާ ދެކޮޅަށް ކުރަމުންދާ ހަނގުރާމައިގެ ސަބަބުން ތެލުގެ އަގު އިންތިހާއަށް އުފުލެމުންދާތީ، ހަކަތަ އިގުތިސާދު ކުރުމަށްޓަކައި ޕާކިސްތާނު ސަރުކާރުން ހަރުކަށި ފިޔަވަޅުތަކެއް އަޅަން ނިންމައިފި އެވެ.

މިގޮތުން އެޅުމަށް ނިންމާފައިވާ ފިޔަވަޅުތަކުގެ ތެރޭގައި، ސަރުކާރުގެ ރަސްމީ ބޭނުންތަކަށް ބޭނުންކުރާ އުޅަނދުފަހަރަށް ދޫކުރާ ތެލުގެ މިންވަރު 50 އިންސައްތައަށް މަދުކުރުމާއި ދައުލަތުގެ މުއައްސަސާތަކަށް އަލަށް އުޅަނދުފަހަރު ގަތުން މަނާކުރުން ހިމެނެ އެވެ. މީގެ އިތުރުން، ކުރިއަށް އޮތް ތިން މަސްދުވަހުގެ ތެރޭގައި ސަރުކާރުގެ އިސް އޮފިޝަލުން ރަސްމީ ދަތުރުފަތުރުތަކުގައި ރާއްޖޭން ބޭރަށް ވަޑައިގަތުން ވެސް ވަނީ ކޮންޓްރޯލްކޮށްފަ އެވެ.

2026 ފެބްރުއަރީ 28 ގައި އެމެރިކާ އިން މިނާބުގައި ހުރި ސްކޫލަށް ބޮންއަޅާ 120 އަށްވުރެ ގިނަ ދަރިވަރުންނާއި 26 މުދައްރިސުން ވަނީ މަރާލާފައި

އީރާނުގައި ހިނގަމުންދާ ކަންކަން ބެލުމަށް އދ. އިން ކަނޑައަޅާފައިވާ ފެކްޓް-ފައިންޑިން މިޝަނުން ބުރާސްފަތި ދުވަހު ބުނީ، މިދިޔަ ފެބްރުއަރީ މަހު އީރާނުގެ ސްކޫލަކަށާއި ކުޅިވަރު ކުޅޭ މަރުކަޒަކަށް އެމެރިކާއިން ދިން ދެ ހަމަލާއަކީ ހަނގުރާމައިގެ ކުށްތަކެއް ކަމަށް ގަބޫލުކުރެވޭ ފަދަ އެކަށީގެންވާ ހެކި އެބަހުރި ކަމަށެވެ.

ޖެނީވާގައި އޮންނަ އދ. ގެ ހިއުމަން ރައިޓްސް ކައުންސިލަށް ހުށަހެޅުމަށް ތައްޔާރުކޮށްފައިވާ "އިންޑިޕެންޑެންޓް އިންޓަނޭޝަނަލް ފެކްޓް-ފައިންޑިން މިޝަން އޮން އީރާން" ގެ އައު ރިޕޯޓުގައި، މިދިޔަ ފެބްރުއަރީ މަހު ފެށުނު އީރާނު ހަނގުރާމައިގައި އެމެރިކާއިން އަމަލުކޮށްފައިވާ ގޮތާއި، މިދިޔަ ޑިސެމްބަރު މަހުގެ ފަހުކޮޅުން ފެށިގެން އީރާނުގެ އެކި ސަރަހައްދުތަކުގައި ކުރަމުންދާ މުޒާހަރާތަކާ ގުޅިގެން އެ ގައުމުގެ ސަރުކާރުން އިޖާބަދީފައިވާ ގޮތް ވަނީ ދިރާސާކޮށްފަ އެވެ.

އދ. ގެ މާހިރުން ވިދާޅުވި ގޮތުގައި، އީރާނުގެ މީނާބް ސިޓީގައި ހުންނަ އަންހެން ކުދިންގެ ސްކޫލަށް ދިން ހަމަލާގެ ޒިންމާ އުފުލަންޖެހެނީ އެމެރިކާގެ ސިފައިން ކަމަށް ގަބޫލުކުރެވޭ ފަދަ އެކަށީގެންވާ ސަބަބުތަކެއް ފެނިފައިވާ ކަމަށް ވަނީ ބުނެފަ އެވެ. އެ ހަމަލާގައި 150 އަށްވުރެ ގިނަ މީހުން މަރުވެފައިވާއިރު، އޭގެ ތެރޭގައި 120 އެއްހާ ސްކޫލް ކުދިން ހިމެނެ އެވެ.

އެ ރިޕޯޓުގައި ފާހަގަކޮށްފައިވާ ގޮތުގައި، އިސްލާމިކް ރިިވޮލިއުޝަނަރީ ގާޑް ކޯޕްސް (އައިއާރްޖީސީ) ގެ ނޭވަލް ކޮމްޕްލެކްސްއަކާ އިންވެގެން ހުރި އެ ސްކޫލާ ބެހޭ މައުލޫމާތު، އެމެރިކާގެ އަސްކަރީ އަމާޒުތައް ކަނޑައަޅާ ޑޭޓާބޭސްގައި އަދާހަމަކޮށްފައި ނުވުމާއި، އެއީ އަސްކަރީ އަމާޒެއްކަން ކަށަވަރުކުރުމުގައި އެމެރިކާ އިން އިހުމާލުވެފައިވާ މިންވަރަކީ ހަމައެކަނި ފަރުވާކުޑަކުރުމެއްގެ ގޮތުގައި ބެލެވެން ނެތް ކަމަށް ވަނީ ބުނެފަ އެވެ.

މީގެ އިތުރުން، އީރާނުގެ ލާމެރްދުގައި ހުންނަ ކުޅިވަރު މަރުކަޒަކަށް އެމެރިކާ އިން ދިން ހަމަލާއާ ގުޅޭގޮތުން ވެސް މި ރިޕޯޓުގައި ބުނެފައިވަނީ، އެ ހަމަލާގެ ސަބަބުން ކައިރީގައި ހުރި މީހުން ދިރިއުޅޭ އިމާރާތްތަކަށާއި ސްކޫލަކަށް ގެއްލުން ލިބި، އާންމުންގެ 22 މީހަކު މަރުވެ އެތަށް ބަޔަކު  ޒަޚަމްވި ކަމަށެވެ. އެހެންކަމުން، އެއީ އެއްވެސް ބެލުމެއް ނެތި ދީފައިވާ ހަމަލާއެއް ކަމަށާއި އެއީ ހަނގުރާމައިގެ ކުށެއް ކަމަށް އެ ރިޕޯޓުގައި ވަނީ ކަނޑައަޅާފަ އެވެ.

އީރާނުގެ އެހީތެރިކަމާއެކު ޔަމަނުގައި ހަރަކާތްތެރިވާ ހޫޘީންގެ ހަމަލާތައް ކޮންޓްރޯލް ކުރުމަށް އެހީތެރިވެދިނުމަށް، ޗައިނާއިން އީރާނުގެ ކިބައިން ސިއްރިއްޔާތުގައި އެދިފައިވާ ކަމަށް މިކަމުގެ މައުލޫމާތު ހުރި އީރާނުގެ މަސްދަރުތަކަކުން ހާމަކޮށްފި އެވެ.

ރޮއިޓާސް އިން ރިޕޯޓުކޮށްފައިވާ ގޮތުގައި ޗައިނާއިން މިފަދަ އެދުމެއް އީރާނަށް ހުށަހަޅާފައިވަނީ، ވޭތުވެދިޔަ ހަފުތާގައި ހޫޘީން ދިން ވަރުގަދަ އަސްކަރީ ހަމަލާތަކާ ގުޅިގެން ސައުދީ އަރަބިއްޔާއިން ބެއިޖިންގްގެ އެހީތެރިކަމަށް އެދުމުންނެވެ. ރަތްކަނޑުގެ އައްސޭރިފަށާއި ބާބުލް މަންދަބު ކަނޑުއޮޅީގެ ސަރަހައްދުތަކުގައި ހޫޘީން ހަލުވިކަމާއެކު ކުރިއަރަމުންދާތީ، ސައުދީގެ ތެޔޮ އެކްސްޕޯޓް ކުރުމަށާއި މުދާ އުފުލާ އުޅަނދުފަހަރަށް ނުރައްކާ ބޮޑުވުމާ ގުޅިގެން ރިޔާޟުން ވަނީ ޗައިނާގެ އެހީއަށް އެދިފަ އެވެ.

މި މައްސަލައިގައި މަސްލަހަތު ހިފެހެއްޓުމަށާއި މަޝްވަރާ ކުރުމަށާއި ކަނޑުދަތުރުފަތުރުގެ ރައްކާތެރިކަން އަލުން ގާއިމުކުރުމަށް ޗައިނާއިން ފާޅުގައި ގޮވާލާފައިވީ ނަމަވެސް، އީރާނަށް ފޮނުވި ސިއްރު މެސެޖުތައް މިއަށްވުރެ މާ ވަރުގަދަ ކަމަށް މަސްދަރުތަކުން ބުނެ އެވެ. ދުނިޔޭގެ ދެވަނައަށް އެންމެ ބޮޑު އިގުތިސާދު ކަމަށްވާ ޗައިނާއިން ބަރޯސާވާ ހަކަތައިގެ މަގުތަކަށް މި ހަމަނުޖެހުން ފެތުރިގެން ދިޔަ ނުދިނުމަށްޓަކައި، ހޫޘީންގެ މައްޗަށް އޮތް ނުފޫޒުގެ ބޭނުން އީރާނުން ހިފުމަށް ބެއިޖިންގްއިން ބޭނުންވެ އެވެ. ޗައިނާއިން އީރާނަށް މި މެސެޖު ދިން ގޮތެއް މަސްދަރުތަކުން ހާމަކޮށްފައިނުވެ އެވެ. އަދި އީރާނުގެ ޚާރިޖީ ވަޒީރު އައްބާސް އަރާގްޗީ ބުދަ ދުވަހު ޗައިނާއަށް ކުރެއްވި ޒިޔާރަތުގައި މި ވާހަކަ ދެކެވުނު ކަމެއް ސާފެއް ނޫނެވެ.

މަސްދަރުތަކުން ބުނާ ގޮތުގައި، މިކަމާ ގުޅިގެން ތެހެރާނުން ދިން ޖަވާބަކީ ސަރަހައްދީ ހަމަޖެހުމާއި ސުލްހަ ގާއިމުވެގެންދާނީ އީރާނާ ދެކޮޅަށް އެމެރިކާ އާއި އިސްރާއީލުން ކުރަމުންދާ ހަނގުރާމަ ހުއްޓާލުމުން ކަމަށެވެ. ހޫޘީންގެ މައްޗަށް އޮތް ނުފޫޒު ބޭނުން ނުކޮށްފިނަމަ، އީރާނަށް އިގުތިސާދީ ގޮތުން ފިއްތުންތައް ކުރިމަތިކުރާނެ ކަމުގެ އެއްވެސް އިންޒާރެއް ޗައިނާގެ އޮފިޝަލުން ދީފައި ނުވާ ކަމަށް އީރާނުގެ މަސްދަރުތަކުން ބުނެ އެވެ.

އޮމާންގެ އައްސޭރިފަށުގައި ހުރްމުޒް ކަނޑުއޮޅީގައި އަޅާފައިވާ އުޅަނދުތަކެއް

ބުރާސްފަތި ދުވަހު އާންމުކުރި އުޅަނދުފަހަރު ދަތުރުކުރާ ގޮތް ބަލާ ޕްރިލިމިނަރީ ޑޭޓާތަކުން ދައްކާ ގޮތުގައި، ހުރްމުޒް ކަނޑުއޮޅިން ބުދަ ދުވަހު ދަތުރުކުރި މުދާ އުފުލާ އުޅަނދުފަހަރުގެ އަދަދު ވަނީ ތިނަކަށް ދަށްވެފަ އެވެ. މިއީ އޭގެ ކުރީ ދުވަހު އެ ސަރަހައްދުން ދަތުރުކުރި 12 އުޅަނދާ އަޅާބަލާއިރު ބޮޑު ދަށްވުމެކެވެ. އަދި މިއީ ފާއިތުވި 10 ދުވަހުގެ އެވްރެޖް އަދަދު ކަމަށްވާ 17 އުޅަނދަށްވުރެ ވެސް ބޮޑުތަނުން ދަށް އަދަދެކެވެ.

މި ހިސާބުތަކުގައި، ފާހަގަވިޔަ ނުދިނުމަށްޓަކައި "އޮޓޮމެޓިކް އައިޑެންޓިފިކޭޝަން ސިސްޓަމް" (އޭއައިއެސް) ނިއްވާލައިގެން އެ ކަނޑުއޮޅި ހުރަސްކޮށްފައިވާ އެއްވެސް އުޅަނދެއް ނުހިމެނެ އެވެ.

ކްލެޕާގެ ޝިޕިންގ ޑޭޓާތަކުން ދައްކާ ގޮތުގައި، ބުދަ ދުވަހު ދަތުރުކުރި ތިން އުޅަނދުގެ ތެރެއިން ހުސްކޮށް އޮތް "ސުޕްރަމެކްސް" މުދާ އުފުލާ ބޯޓެއް އީރާނުގެ މަގުން ކަނޑުއޮޅިއަށް ވަދެފައިވާއިރު، ތެޔޮ އުފުލާ ހުސް ޓޭންކަރެއް ވަނީ ސިއްރު މަގަކުން ކަނޑުއޮޅިއަށް ވަދެފަ އެވެ.

މީގެ އިތުރުން، "ޕެނަމެކްސް" މަރުކާގެ ޓޭންކަރެއް ސިއްރު މަގަކުން އެ ކަނޑުއޮޅިން ބޭރުވެފައިވާ ކަމަށް ވެސް އެ ތަފާސްހިސާބުތަކުން ދައްކަ އެވެ.

ރަތްކަނޑުގެ ބާބުލް މަންދަބު ކަނޑުއޮޅިން ދަތުރުކުރި އުޅަނދުފަހަރުގެ އަދަދު ވެސް ބުދަ ދުވަހު ވަނީ 21 އަށް ދަށްވެފަ އެވެ. އޭގެ ކުރީ ދުވަހު އެ ކަނޑުއޮޅި ހުރަސްކޮށްފައިވަނީ 24 އުޅަނދެވެ.

އީރާންގެ ކުރީގެ ޑިޕްލޮމެޓް އައްބާސް ޚާމެޔާރު

އީރާނުން ސީދާ މަޝްވަރާތަކަށް އެދެމުންދާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ދެއްކެވި ވާހަކަފުޅުތައް، އީރާނުގެ ކުރީގެ ޑިޕްލޮމެޓް އައްބާސް ޚާމެޔާރު ދޮގުކުރައްވައިފި އެވެ.

އަލްޖަޒީރާއަށް ދެއްވި ބަސްދީގަތުމެއްގައި ޚާމެޔާރު ވިދާޅުވީ، ފާއިތުވި ހަފުތާތަކުގައި ކުރިއަށްދިޔަ މަސައްކަތްތަކުގެ ބޭރުން، އިތުރު އެއްވެސް މަސައްކަތެއް މިކަމުގައި ކުރެވިފައިވާ ކަމަށް ގަބޫލުފުޅު ނުކުރައްވާ ކަމަށެވެ.

އޭނާ ވިދާޅުވީ އީރާނުން ގުޅަމުންދާ ކަމަށާއި، ބައްދަލުވުމަކަށް އެދި އާދޭސްކުރަމުންދާ ކަމަށް ރައީސް ޓްރަމްޕް ދައްކަވަނީ ހަގީގަތާ ޚިލާފު ވާހަކަތަކެއް ކަމަށާއި އެ ވާހަކަތައް އެއްވެސް ފަރާތަކުން ގަބޫލުނުކުރާ ކަމަށެވެ. އަދި ކަންކަން ހިނގަމުންދަނީ އެމެރިކާއިން ބުނާ ގޮތަށް ނޫން ކަމަށް ވެސް އޭނާ ވިދާޅުވި އެވެ.

ޚާމެޔާރު ވިދާޅުވި ގޮތުގައި، އީރާނުގެ ޚާރިޖީ ހަރަކާތްތައް ބިނާވެފައިވަނީ ފާއިތުވި ހަފުތާތަކުގައި ވެސް ކަނޑައެޅިފައިވާ އުސޫލުތަކުގެ މައްޗަށެވެ. އެގޮތުން އީރާނުން މިހާރު އެންމެ ބޮޑު އިސްކަމެއް ދެނީ އައު މަޝްވަރާތަކެއް ފެށުމުގެ ބަދަލުގައި، މިހާރު ވެސް އެކުލަވާލެވިފައިވާ އިސްލާމްއާބާދު އެމްއޯޔޫގައިވާ ކަންކަން ތަންފީޒުކުރުމަށް ކަމަށް އޭނާ ވިދާޅުވި އެވެ.

އިސްލާމްއާބާދު އެމްއޯޔޫ އަކީ ޕާކިސްތާނުން މެދުވެރިއެއްގެ ދައުރު އަދާކޮށް، 2026 ވަނަ އަހަރުގެ ޖޫން މަހު އެމެރިކާއާއި އީރާނާ ދެމެދު ސޮއިކުރި 14 ނުކުތާގެ މައްޗަށް އެކުލެވޭ ވަގުތީ ސުލްހައިގެ އެއްބަސްވުމެކެވެ. މި އެއްބަސްވުމުގެ މައިގަނޑު މަގްސަދަކީ ދެ ގައުމުގެ ދެމެދުގައި އޮތް އަސްކަރީ ކުރިމަތިލުންތައް ހުއްޓާލުމާއި ކަނޑުދަތުރުފަތުރުގެ މުހިންމު މަގުތައް އަލުން ހުޅުވާލުމެވެ.

ޔަމަނުގެ ސަރުކާރުގެ ފައުޖުތަކާއި ހޫޘީންނާ ދެމެދު ބާބުލް މަންދަބް ކަނޑުއޮޅިއާއި އެ ސަރަހައްދުގެ އައްސޭރިފަށުގެ ރަށްތަކަށް ފެންނަ ގޮތަށް އޮންނަ ކަހްބޫބް ފަރުބަދަ ސަރަހައްދުގައި ވަރުގަދަ ކުރިމަތިލުންތަކެއް ހިނގަނީ

ޔަމަނުގެ ސަރުކާރުގެ ފައުޖުތަކާއި ހޫޘީ ހަނގުރާމަވެރިންނާ ދެމެދު، ބާބުލް މަންދަބް ކައިރީގައި އޮންނަ އިސްތިރާތީޖީ ގޮތުން މުހިންމު ކަހްބޫބް ފަރުބަދަތައް ހިމެނޭހެން އެކި ސަރަހައްދުތަކުގައި އަދިވެސް ވަރުގަދަ ކުރިމަތިލުންތަކެއް ދަނީ ހިނގަމުންނެވެ.

ތާއިޒުގައި ހުރި އަލްޖަޒީރާއިން ރިޕޯޓުކޮށްފައިވާ ގޮތުގައި، ޔަމަނު ސަރުކާރުގެ "ހޯމްލޭންޑް ޝީލްޑް" ފައުޖުތަކުން ވަނީ "ޖަޔަންޓްސް ބްރިގޭޑްސް" ގެ އެހީތެރިކަމާއެކު، ހޫޘީން އެ ސަރަހައްދަށް ވަދެގަނެ ދޭން އުޅުނު ވަރުގަދަ ހަމަލާއެއް ނާކާމިޔާބުކޮށްލާފަ އެވެ. މި ކުރިމަތިލުންތަކުގައި ހޫޘީންގެ ބައެއް ހަތިޔާރާއި އާލާތްތަކަށް ގެއްލުންދީ، އެ ޖަމާއަތުގެ ދެ މެންބަރަކު ހައްޔަރުކޮށް، ހޫޘީންގެ ޑްރޯނެއް ވައްޓާލާފައިވާ ކަމަށް ވެސް ރިޕޯޓުތައް ބުނެ އެވެ.

އީރާނުގެ ޚާރިޖީ ވަޒީރު އައްބާސް އަރަގްޗީ، ތުރުކީވިލާތުގެ ޚާރިޖީ ވަޒީރު ހަކާން ފިދާންއާ ފޯނުން ގުޅުއްވައި ސަރަޙައްދީ މަސްރަޙާ ގުޅޭގޮތުން މަޝްވަރާ ކުރައްވައިފި އެވެ. އީރާނުގެ ތަސްނީމް ނިއުސް އެޖެންސީން ރިޕޯޓްކޮށްފައިވާ ގޮތުގައި، އީރާނުގެ ޚާރިޖީ ވަޒީރު މި މަޝްވަރާތައް ކުރައްވާފައިވަނީ މިވަގުތު ޗައިނާގެ ބެއިޖިންގަށް ކުރައްވަމުން ގެންދަވާ ދަތުރުފުޅުގެ ތެރެއިންނެވެ.

އީރާނުގެ ސެމީ-އޮފިޝަލް ނިއުސް އެޖެންސީން ބުނި ގޮތުގައި، ބުދަ ދުވަހު ކުރިއަށްދިޔަ މި ފޯނު ކޯލުގައި ދެ ޤައުމުގެ ޚާރިޖީ ވަޒީރުން ވަނީ ސަރަޙައްދީ އެންމެ ފަހުގެ ކަންތައްތަކާ ގުޅޭގޮތުން ފުޅާ ދާއިރާއެއްގައި ޚިޔާލު ބަދަލުކުރައްވާފަ އެވެ.

ޔަމަނުގެ ހައްޖާ ޕްރޮވިންސްގެ އާބްސް ސިޓީއަށް ސައުދީ އިސްވެ އޮންނަ ކޯލިޝަނުން ދިން ވައިގެ ހަމަލާތަކެއްގައި އެކަކު މަރުވެ، އިތުރު މީހަކަށް އަނިޔާވެއްޖެ ކަމަށް ހޫޘީން ހިންގާ އަލް މަސީރާ ޓީވީން ރިޕޯޓްކޮށްފި އެވެ.

އެ ސަރަހައްދަށް އަމާޒުކޮށް ދިން މި ދެ ވައިގެ ހަމަލާގައި އެކަކު މަރުވެ، އެކަކަށް އަނިޔާވުމުގެ އިތުރުން، ހަތަރު ކާރެއް ބޭނުންނުކުރެވޭ ވަރަށް ހަލާކުވެ، އެ ސަރަހައްދުގައި ހުރި ގެއަކަށް ބޮޑެތި ގެއްލުންތަކެއް ވަނީ ލިބިފަ އެވެ.

އެމެރިކާގެ ރައީސް ޑޮނަލްޑް ޓްރަމްޕް

އީރާނާއެކު އެމެރިކާއިން ކުރަމުންދާ ހަނގުރާމަ ނިމުމަކާ ގާތްވެފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. ނޫސްވެރިންނާ ވާހަކަފުޅު ދައްކަވަމުން ރައީސް ޓްރަމްޕް ވިދާޅުވީ، އީރާނާއެކު އޮތް ހަމަނުޖެހުންތައް "އުންމީދުކުރާ ގޮތުން ނިމުމަކާ ދިމާލަށް" މިހާރު މިސްރާބު ޖަހާފައިވާ ކަމަށެވެ. މީގެ އިތުރުން، އީރާނުން އެމެރިކާއާއެކު އެއްބަސްވުމަކަށް އައުމަށް ވަރަށް ބޮޑަށް ބޭނުންވެފައިވާ ކަމަށް ވިދާޅުވާ ވިދާޅުވުން ޓްރަމްޕް ވަނީ އަނެއްކާ ވެސް ތަކުރާރު ކުރައްވާފަ އެވެ.

ފަހަކަށް އައިސް އީރާނުގެ ފަރާތުން އެއްވެސް ޚަބަރެއް ލިބިފައިވޭތޯ ނޫސްވެރިއަކު ސުވާލު ދެންނެވުމުން، ރައީސް ޓްރަމްޕް ވިދާޅުވީ އީރާނުގެ ފަރާތްތަކާ "ސީދާގޮތުން" ވާހަކަދައްކަވާފައިވާ ކަމަށެވެ.

ޓްރަމްޕް މިހެން ވިދާޅުވެފައިވަނީ އީރާނުން މެދުކެނޑުމެއް ނެތި ދެމުންދާ ހަމަލާތަކުގެ ސަބަބުން އެމެރިކާގެ އަސްކަރީ މަރުކަޒުތަކާއި މަނަވަރުތަކަށް ބޮޑެތި ގެއްލުންތަކެއް ލިބި، އަސްކަރީ ގާބިލުކަން ހުއްޓުމަކަށް އައުމުގެ ބިރު ބޮޑުވެ، ދިފާއީ ހަތިޔާރު ހުސްވުމާއި ލޮޖިސްޓިކްސްއަށް ކުރިމަތިވެފައިވާ ގޮންޖެހުންތަކުގެ ސަބަބުން، އީރާނާ ދެކޮޅަށް ދިގު މުއްދަތަކަށް ހަނގުރާމަ ކުރުމުގެ ގާބިލުކަން އެމެރިކާގައި ހުރިތޯ ސުވާލު އުފެދިފައިވާ ދަނޑިވަޅެއްގަ އެވެ. 

އެމެރިކާގެ އިތުބާރު ހޯދުމަށްޓަކައި އެ ގައުމުން އަމަލީ ފިޔަވަޅުތަކެއް އަޅަންޖެހޭނެ ކަމަށް އީރާނުގެ ސަލާމަތީ ކަންތައްތަކާ ބެހޭ އެންމެ އިސްވެރިޔާ މުހުސިން ރެޒާއީ ވިދާޅުވެއްޖެ އެވެ.

އީރާނުގެ ޕްރެސް ޓީވީން ރިޕޯޓްކޮށްފައިވާ ގޮތުގައި، އެ ގައުމުގެ ސުޕްރީމް ނޭޝަނަލް ސެކިއުރިޓީ ކައުންސިލްގެ ސެކްރެޓަރީ މުހުސިން ރެޒާއީ ވިދާޅުވީ، އީރާނުން އެމެރިކާއަށް އެއްވެސް މިންވަރަކަށް އިތުބާރު ނުކުރާ ކަމަށާއި، އެހެންކަމުން އިތުބާރު އުފެއްދުމަށްޓަކައި އެމެރިކާއިން އަމަލީ ގޮތުން މަސައްކަތްތަކެއް ދައްކަންޖެހޭނެ ކަމަށެވެ.

މީގެ އިތުރުން، އީރާނުން ކަނޑައަޅާފައިވާ ޝަރުތުތައް ފުރިހަމަނުވަނީސް އެމެރިކާއާއެކު އެއްވެސް މަޝްވަރާއެއްގައި ބައިވެރިނުވާނެ ކަމަށް ރެޒާއީ އަންގާރަ ދުވަހު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވެފައިވެ އެވެ.

އީރާނުން އެމެރިކާއާއެކު އެއްބަސްވުމަކަށް އަންނަން ބޭނުންވާ ކަމަށް ވިދާޅުވާ ވިދާޅުވުން އެމެރިކާގެ ރައީސް ޑޮނަލްޑް ޓްރަމްޕް ހޯމަ ދުވަހު ވަނީ އަލުން ތަކުރާރު ކުރައްވާފަ އެވެ. އަދި މިކަމުގައި އީރާނާއެކު މަޝްވަރާ ކުރާނީތޯ ނުވަތަ ނޫންތޯ ނިންމަވާނީ އަމިއްލަފުޅަށް ކަމަށްވެސް ޓްރަމްޕް އިތުރަށް ވިދާޅުވި އެވެ.

އިސްރާއީލާއި ހިޒްބުއްލާ އާ ދެމެދު މިދިޔަ އޭޕްރިލް މަހު ހަމަލާބަދަލުކުރުން ހުއްޓާލުމުގެ އެއްބަސްވުމެއް ގާއިމުކޮށްފައިވީ ނަމަވެސް، ލުބުނާނުގައި ކުރަމުންދާ ހަނގުރާމަ އަދި ނިމުމަކަށް ނާންނަ ކަމަށް އިސްރާއީލުގެ އަސްކަރީ މުޝީރު އިޔާލް ޒާމިރު ވިދާޅުވެއްޖެ އެވެ.

އޭނާ ވިދާޅުވީ އިސްރާއީލަށް ކުރިމަތިވާ ނުރައްކާތަކާ ދެކޮޅަށް މަސައްކަތް ކުރުމަށާއި، ހިޒްބުއްލާގެ ހަނގުރާމަވެރިން ފަހަތަށް ޖެއްސުމަށްޓަކައި، ލުބުނާނުގެ ސަރަހައްދުތަކުގެ "ވަރަށް ފުންމިނަށް" އިސްރާއީލުގެ ސިފައިން ވަދެ އަސްކަރީ އޮޕަރޭޝަންތައް ކުރިއަށް ގެންދާނެ ކަމަށެވެ.

ލުބުނާނާއި އިސްރާއީލު ގުޅޭ އުތުރުގެ ބޯޑަރު ސަރަހައްދަށް ކުރެއްވި ޒިޔާރަތެއްގައި ޒާމިރު ވިދާޅުވީ، އިސްރާއީލުގެ އަސްކަރިއްޔާއިން ވަނީ ހަނގުރާމައިގައި ބޮޑެތި ކާމިޔާބީތަކެއް ހޯދައި ހިޒްބުއްލާގެ ބާރުތައް ބަލިކަށިކޮށްލާފައި ކަމަށެވެ. ނަމަވެސް، ލިޓާނީ ކޯރުގެ ދެކުނުން ހިޒްބުއްލާގެ ހަނގުރާމަވެރިން އެއްކޮށް ބޭރުކޮށްލަން ބޭނުންވާނަމަ، ލުބުނާނުގެ ރަސްމީ ސިފައިންގެ އަސްކަރީ ގާބިލުކަން މިހާރަށްވުރެ ބޮޑަށް އިތުރުކުރަން ޖެހޭ ކަމަށް އޭނާ ފާހަގަކުރެއްވި އެވެ.

މީގެ އިތުރުން ޒާމިރު ވިދާޅުވީ، ހިޒްބުއްލާގެ ބާރުތައް އަލުން ވަރުގަދަކޮށް، އެ ޖަމާއަތުގެ ގާބިލުކަން އިތުރުކުރުމަށާއި، އެ ސަރަހައްދުގައި ޓެރަރިސްޓް އިންފްރާސްޓްރަކްޗަރ ނުވަތަ ހަނގުރާމަވެރި މަރުކަޒުތައް އަލުން ގާއިމުކުރުމުގެ ފުރުސަތު އިސްރާއީލުގެ އަސްކަރިއްޔާއިން ނުދޭނެ ކަމަށެވެ. އަދި ހަނގުރާމަ އަދި ނިމުމަކަށް ނާންނަ ކަމަށާއި، ކުރިއަށް އޮތް ތަނުގައި ވެސް ގޮންޖެހުންތަކެއް ހުރިކަން އޭނާ ފާހަގަކުރެއްވި އެވެ.

ވައްޓާލާފައިވާ ސައުދީ އަރަބިއްޔާގެ ވައިގެ ސިފައިންގެ އެފް-15 މަރުކާގެ ހަނގުރާމަމަތީ ބޯޓުގެ ބައިތަކާއެކު ހޫޘީ ހަނގުރާމަވެރިން ފޮޓޯއަށް ހުއްޓިލައިގެން ތިބޭ މަންޒަރު

ހޫޘީން ވައްޓާލި ސައުދީ އަރަބިއްޔާގެ ވައިގެ ސިފައިންގެ އެފް-15 އެސްއޭ މަރުކާގެ ހަނގުރާމަމަތީ ބޯޓުގެ ބައިތަކުގެ މަތީގައި ތިބެ ނަގާފައިވާ ފޮޓޯތަކެއް އާންމުވެއްޖެ އެވެ.

ޔަމަނުގެ މާރިބް ސަރަހައްދުގެ މަތިން ދަތުރުކުރަނިކޮށް ވައްޓާލި މި ބޯޓުގެ ނަންބަރު ކަމަށްވާ 5529 ވެސް އެ ފޮޓޯތަކުން ސާފުކޮށް ފެނެ އެވެ. މިއީ ހޫޘީންގެ ހަމަލާއެއްގައި ސައުދީގެ އެފް-15 މަރުކާގެ ބޯޓެއް އެއްކޮށް ވައްޓާލެވުނު ފުރަތަމަ ފަހަރެވެ. މި ބޯޓަކީ ގާތްގަނޑަކަށް 110 މިލިއަން އެމެރިކާ ޑޮލަރުގެ އަގުބޮޑު ބޯޓެކެވެ.

ސައުދީ އަރަބިއްޔާގެ އެންމެ ޒަމާނީ ހަނގުރާމަމަތީ ބޯޓު ހޫޘީންގެ ހަމަލާއެއްގައި މިވަނީ ބޭނުންނުކުރެވޭ ވަރަށް ހަލާކުވެފަ އެވެ. މި އެފް-15 އެސްއޭ މަރުކާގެ ބޯޓަކީ ދެ މީހުންނަށް ދަތުރުކުރެވޭ ބޯޓަކަށް ވުމުން، އޭގައި ތިބި ދެ ފަޅުވެރިން މަރުވުން ނުވަތަ ހޫޘީންގެ ބެލުމުގެ ދަށަށް ގެންގޮސް އަސީރުކޮށްފައިވުން އެކަށީގެންވެ އެވެ.

ހޫޘީންގެ އަސްކަރީ ތަރުޖަމާނު ޔަހްޔާ ސަރީ ވިދާޅުވީ މި ބޯޓު ވައްޓާލާފައިވަނީ އެ ގައުމުގައި އަމިއްލައަށް އުފައްދާފައިވާ، ބިމުން ވައިގެ ތެރެއަށް ފޮނުވާލާ މިސައިލެއް ބޭނުންކޮށްގެން ކަމަށެވެ. 

މި ހާދިސާއާ ގުޅިގެން ސައުދީ އަރަބިއްޔާއިން އަދި ރަސްމީކޮށް ބަހެއް ނުބުނެ އެވެ.

އީރާނުގެ ހަތިޔާރުއެޅި ފައުޖުތަކުގެ ޑެޕިއުޓީ ޗީފް އޮފް ސްޓާފް، ބްރިގޭޑިއާ ޖެނެރަލް ކިއުމާސް ހައިދަރީ ވިދާޅުވީ، ފަހަކަށް އައިސް ދިން ހަމަލާތަކުގައި އެމެރިކާގެ މަނަވަރުތަކަށް އީރާނުގެ ފައުޖުތަކުން ބޮޑެތި ގެއްލުންތަކެއް ދީފައިވާ ކަމަށެވެ. އަދި ދުޝްމަނުން ބޭނުންވި މަގުސަދުތައް ހާސިލްވިޔަނުދީ ހުއްޓުވުމުގައި އީރާނުން ކާމިޔާބު ހޯދާފައިވާކަން އޭނާ ފާހަގަކުރެއްވި އެވެ.

ބުދަ ދުވަހު ހައިދަރީ ވިދާޅުވީ، އީރާނުގެ ހަތިޔާރުއެޅި ފައުޖުތަކުން މިހާރު ހަނގުރާމައިގެ މިސްރާބު ކޮންޓްރޯލް ކުރަމުންދާ ކަމަށާއި، ދުޝްމަނުންނަށް މަޖުބޫރުވެފައިވަނީ އީރާނުގެ ހަރަކާތްތަކަށް ރައްދު ދިނުމުގެ މަގާމެއްގައި ތިބުމަށް ކަމަށެވެ.

"އީރާނުގެ ނިޒާމު ވައްޓާލުމުގެ ހުވަފެން ދެކެމުންދިޔަ ދުޝްމަނުން މިހާރު ހަނގުރާމައިގެ މައިދާނުގައި ތިބީ ވަރަށް ބަލިކަށި ހާލަތެއްގައި. އީރާނުގެ ގާބިލުކަމުގެ ސަބަބުން އެމެރިކާގެ ކަނޑުގެ ބާރުގެ ނާޒުކުކަން ވަނީ ހާމަވެފައި. "އެމެރިކާގެ އަސްކަރީ ގާބިލުކަމުގެ އެންމެ އުސްމިނަކީ އެ ގައުމުގެ ކަނޑުގެ ސިފައިންނާއި މަނަވަރުތައް. ތާރީޚަށް ބަލާއިރު، ދެވަނަ ބޮޑު ހަނގުރާމައިން ފެށިގެން މިއަދާ ހަމައަށް އެއްވެސް ބާރަކަށް އެމެރިކާގެ މަނަވަރަކަށް ނުވަތަ އެމީހުންގެ ކަނޑުގެ ބާރަށް ގޮންޖަހައެއް ނުލެވޭ. ނަމަވެސް މީގެ މަދު ރޭތަކެއް ކުރިން އަޅުގަނޑުމެންގެ މިސައިލްތަކުން އެމީހުންގެ ބަރު މަނަވަރުތަކަށާއި ފްރިގޭޓްތަކަށް އަމާޒުކޮށް ހަމަލާދީ، ބޮޑެތި ގެއްލުންތަކެއް ދިން މަންޒަރު ފެނިގެންދިޔަ" ހައިދަރީ ވިދާޅުވި އެވެ.

އީރާނުގެ ހަމަލާތަކުގެ ސަބަބުން އެމެރިކާގެ ފައުޖުތައް ހުރްމުޒް ކަނޑުއޮޅިއާ މަދުވެގެން 400 ކިލޯމީޓަރު ދުރަށް ޖެހެން މަޖުބޫރުވެފައިވާ ކަމަށް ވެސް އޭނާ ވިދާޅުވި އެވެ.

އީރާންގެ އަސްކަރީ މަނަވަރެއް

އީރާންގެ ޚާރިޖީ ވަޒީރު އައްބާސް އަރާގްޗީ

އީރާނުން އެ ގައުމުގެ މިނިވަންކަމާއި ސިޔާދަތު ދިފާއުކުރުމަށް ތައްޔާރަށް އޮތް ނަމަވެސް، މައްސަލަތަކަށް ޚާރިޖީ އަދި ސުލްހަވެރި ހައްލެއް ހޯދުމަށް މަރުހަބާ ކިޔާނެ ކަމަށް އެ ގައުމުގެ ޚާރިޖީ ވަޒީރު އައްބާސް އަރާގްޗީ ވިދާޅުވެއްޖެ އެވެ.

ޗައިނާގެ ވެރިރަށް ބެއިޖިންގްގައި އެ ގައުމުގެ ޚާރިޖީ ވަޒީރު ވަންގް ޔީއާ ބައްދަލުކުރައްވައި އަރާގްޗީ ވިދާޅުވީ، މެދުއިރުމަތީގެ މަސްރަހު ފިނިކޮށް ހަމަޖެހުން ގާއިމުކުރުމަށްޓަކައި އަވަށްޓެރި ގައުމުތަކާއެކު އީރާނުން މަޝްވަރާތައް ފަށާފައިވާ ކަމަށެވެ. އަދި އީރާނުން ބޭނުންވަނީ ސަރަހައްދީ ހަމަޖެހުން ގާއިމުކޮށް، އަވަށްޓެރި ގައުމުތަކާއެކު އެކުވެރި އަދި ސުލްހަވެރި ގުޅުމެއް ބޭއްވުމަށް ކަމަށްވެސް އޭނާ ވިދާޅުވި އެވެ.

އީރާނާއި އެމެރިކާއާ ދެމެދު އުފެދިފައިވާ ނުތަނަވަސްކަމުގެ ތެރެއިން، ހުރްމުޒް ކަނޑުއޮޅީގެ ސަލާމަތާއި ދަތުރުފަތުރުގެ ކަންކަމާ ގުޅޭގޮތުން މަޝްވަރާކުރުމަށް އީރާނާއި، އިރާޤުގެ އިތުރުން ގަލްފް ކޯޕަރޭޝަން ކައުންސިލް (ޖީސީސީ) ގެ ފަސް ގައުމަކުން އޮމާންގައި ބައްދަލުވުމެއް ބޭއްވުމަށް ކުރިން އޮތީ ތާވަލުކޮށްފަ އެވެ.

ނަމަވެސް، ޖީސީސީގެ ގައުމުތަކުގެ ތެރެއިން ހަމައެކަނި ބަހްރޭނުން ދެކޮޅު ހެދި މި ބައްދަލުވުން މިހާރު ވަނީ ފަސްކޮށްފަ އެވެ. އޮމާންގެ ޚާރިޖީ ވަޒީރު ބަދުރު ބިން ހަމަދު އަލް ބުސައިދީ ވިދާޅުވީ، މި ބައްދަލުވުން ފަސްކުރީ ހުރިހާ ގައުމުތަކެއްގެ މެދުގައި އެއްބަސްވުމަކަށް އައުމަށް ފުރުސަތު ދިނުމުގެ ގޮތުން ކަމަށެވެ.

ސްވިޑަންގައި ހުންނަ އީރާނުގެ އެމްބަސީގެ އޮފިޝަލަކު އެ ގައުމުން ބޭރުކޮށްލައިފި އެވެ.

ސްވިޑަންގެ ފޮރިން މިނިސްޓްރީން ބުނީ، އެ ގައުމުގައި ހުންނަވާ އީރާނުގެ ސަފީރު ހާޒިރުކޮށް، ސްޓޮކްހޯމްގައި ހުންނަ އީރާނު އެމްބަސީގެ އޮފިޝަލަކު ގައުމުން ފުރުވާލުމަށް އަންގާފައިވާ ކަމަށެވެ.

މި ނިންމުން ނިންމި ސަބަބެއް ކަމަށް އެ މިނިސްޓްރީން ބުނީ، ޑިޕްލޮމެޓިކް ގުޅުންތަކާ ބެހޭ "ވިއެނާ ކޮންވެންޝަން" އާ ހިލާފު އަމަލުތަކެއް އެ އޮފިޝަލް ހިންގާފައިވުމެވެ. ނަމަވެސް އެއީ ކޮން ކަހަލަ އަމަލުތަކެއް ކަމުގެ ތަފްސީލެއް އެ މިނިސްޓްރީން ހާމައެއް ނުކުރެ އެވެ.

ސްވިޑަންގެ ޖަސްޓިސް މިނިސްޓަރު ގަނާ ސްޓްރޮމާ އޭއެފްޕީ ނިއުސް އެޖެންސީއަށް މައުލޫމާތު ދެއްވަމުން ވިދާޅުވީ، އީރާނުގެ ސަރުކާރާ ދެކޮޅު ފަރާތްތަކަށާއި ސްވިޑަންގައި ހުރި ޔަހޫދީ އަދި އިސްރާއީލުގެ މަސްލަހަތު އޮތް ތަންތަނަށް އަމާޒުކޮށް، އެ ގައުމުގެ ސަލާމަތަށް ނުރައްކާވާ ފަދަ ހަރަކާތްތަކެއް އީރާނުން ހިންގާފައިވާ ކަމަށެވެ.

މީގެ އިތުރުން ސްޓްރޮމާ ވިދާޅުވީ، މިފަދަ ކަންކަން ކުރުމަށްޓަކައި ކުށްކުރާ ނެޓްވޯކްތަކުގެ ބޭނުން އީރާނުން ހިފާފައިވާ ކަމަށެވެ.

ޔަންބޫގައި ހުންނަ ޔަސްރިފު ތެޔޮ ރިފައިނަރީއަށް ހޫޘީން ދިން ހަމަލާ ފެންނަ ވީޑިއޯ އިން ނަގާފައިވާ ފޮޓޯއެއް

ޔަމަނުގެ ހޫޘީ ހަނގުރާމަވެރިން ސައުދީ އަރަބިއްޔާގެ ބަނދަރު ރަށެއް ކަމަށްވާ ޔަންބޫގައި ހުންނަ ތެޔޮ ރިފަރައިނަރީތަކަށާއި، ޚަމީސް މުޝައިތުގައި ހުންނަ ވައިގެ ސިފައިންގެ މަރުކަޒަށް އަމާޒުކޮށް ވަރުގަދަ ހަމަލާތަކެއް ދީފައިވާކަން އެ ޖަމާއަތުން ކަށަވަރުކޮށްދީފި އެވެ.

ހޫޘީން ބުނި ގޮތުގައި މި ހަމަލާތަކަކީ މި ހިނގާ ހަފުތާގެ ތެރޭގައި ސައުދީ އަރަބިއްޔާއިން އެ ޖަމާއަތުގެ މަރުކަޒުތަކަށް އަމާޒުކޮށް ފޮނުވާލި ގިނަ އަދަދެއްގެ މިސައިލް ހަމަލާތަކަށް ދިން ރައްދެކެވެ.

ހޫޘީންގެ އަސްކަރިއްޔާއިން ނެރުނު ބަޔާނެއްގައި ބުނެފައިވަނީ، ފުރަތަމަ ހަމަލާ އަމާޒުކުރީ ޔަންބޫގައި ހުންނަ ސައުދީ އަރަމްކޯގެ މަރުކަޒަށް ކަމަށެވެ. ގިނަ އަދަދެއްގެ ބެލިސްޓިކް މިސައިލާއި ޑްރޯން ބޭނުންކޮށްގެން ދިން މި ހަމަލާތައް އަމާޒަށް ސީދާ ވާސިލުވެފައިވާ ކަމަށާއި، މީގެ ސަބަބުން އެ ތަނުގައި ބޮޑެތި އަލިފާންގަނޑުތައް އުފެދި، ބޮޑެތި ގެއްލުންތަކެއް ލިބިފައިވާ ކަމަށް ވެސް އެ ބަޔާނުގައި ބުނެފައިވެ އެވެ.

މީގެ އިތުރުން، ދެވަނަ ހަމަލާ އަމާޒުކޮށްފައިވަނީ ޚަމީސް މުޝައިތު އެއަރބޭސްއަށް ކަމަށާއި، ގިނަ އަދަދެއްގެ ބެލިސްޓިކް މިސައިލް ބޭނުންކޮށްގެން ދިން މި ހަމަލާތައް ވެސް އަމާޒަށް ސީދާ ވާސިލުވެފައިވާ ކަމަށް ހޫޘީންގެ އަސްކަރިއްޔާއިން ވަނީ ހާމަކޮށްފަ އެވެ.

ވޭތުވެދިޔަ ހަފުތާގެ ތެރޭގައި ހޫޘީ ހަނގުރާމަވެރިން ވަނީ ޔަމަނުގެ ބޮޑެތި ސަރަހައްދުތަކެއް އެމީހުންގެ ބާރުގެ ދަށަށް ގެންގޮސްފައި

ޔަމަނުގެ ހުޅަނގު ސަރަހައްދުގައި ހޫޘީ ހަނގުރާމަވެރިންނާއި އެ ޤައުމުގެ ސަރުކާރުގެ ސިފައިންނާ ދެމެދު ކުރަމުންދާ ހަނގުރާމަ އިތުރަށް ވަރުގަދަވެއްޖެ އެވެ.

ސައުދީ އަރަބިއްޔާގެ އެހީތެރިކަން ލިބޭ ޔަމަނު ސަރުކާރުގެ ސިފައިންނާއި ހޫޘީންނާ ދެމެދު އެކި ސަރަހައްދުތަކުގައި މެދުކެނޑުމެއްނެތި ކުރިމަތިލުންތައް ހިނގަމުންދާ ކަމަށާއި، މި ހަމަލާތަކާ އެކު ވައިގެ މަގުން ވެސް ހަމަލާތައް ދެމުންދާ ކަމަށް އަސްކަރީ މަސްދަރުތަކުން ރިޕޯޓުކުރެ އެވެ.

މި ކުރިމަތިލުންތައް ފުރަތަމަ ފެށިފައިވަނީ އަލް-ބަލަޤްގެ އިރުމަތީ ސަރަހައްދުގަ އެވެ. އެ ސަރަހައްދުގައި ވަރުގަދަ ހަނގުރާމައެއް ހިނގާފައިވާއިރު، ހޫޘީ ސަރުކާރުގެ ސިފައިން ތިބި މަގާމުތަކަށް ހަމަލާދީފައިވާ ކަމަށާއި، ނަމަވެސް ސަރުކާރުގެ ސިފައިން އެ ހަމަލާތައް ނާކާމިޔާބުކޮށްލާފައިވާ ކަމަށް އަލްޖަޒީރާއަށް މައުލޫމާތު ދިން މަސްދަރުތަކުން ބުނެ އެވެ.

ޔަމަނު ސަރުކާރުގެ ސިފައިން ހާމަކުރި ގޮތުގައި، ހޫޘީންގެ އަމާޒަކީ ބާބުލް މަންދަބު ފެންނަ ހިސާބުގައި އޮންނަ އިސްތިރާތީޖީ ގޮތުން މުހިންމު ކަހްބޫބު ފަރުބަދަތަކަށް އަތްގަދަކުރުމެވެ. ބާބުލް މަންދަބު ކަނޑުއޮޅީގެ މެދުގައި އޮންނަ މައްޔޫން ރަށާއި، މުޚާ ސިޓީގެ ދެކުނުން އޮންނަ ޛުބާބު ޑިސްޓްރިކްޓް ހޫޘީންގެ ބާރުގެ ދަށަށް ގެންގޮސްފައިވާއިރު، ކަހްބޫބު ފަރުބަދަތައް ހިފުމަކީ އެމީހުންގެ އަސްކަރީ ބާރު އެ ސަރަހައްދުގައި އިތުރަށް ވަރުގަދަވެގެންދާނެ ކަމެކެވެ.

މިވަގުތު އެންމެ ބޮޑަށް ހަމަނުޖެހުން ބޮޑުވެފައިވާ ތާއިޒްގެ ދެކުނު ސަރަހައްދުތަކުގައި ވެސް، ހޫޘީން ދިން ވަރުގަދަ ހަމަލާތަކެއް ޔަމަނުގެ ސަރުކާރުގެ ސިފައިން ވަނީ ހުއްޓުވާފަ އެވެ.

ޔަމަނުގެ ހޫތީ ހަނގުރާމަވެރިން ޑްރޯން ބޭނުންކޮށްގެން މައްކާއަށް އަމާޒުކޮށް ދޭން އުޅުނު ހަމަލާ އެ ގައުމުގެ ފޮރިން މިނިސްޓްރީން ބުދަ ދުވަހު ކުށްވެރިކޮށްފި އެވެ.

ސައުދީ އަރަބިއްޔާގެ ވައިގެ ދިފާއީ ބާރުތަކުން ބުނި ގޮތުގައި، މައްކާގެ މުގައްދަސް ސަރަހައްދުގެ ވައިގެ ސަރަހައްދަށް އެ ޑްރޯން ވަނުމުގެ ކުރިން، ސިޓީގެ ދެކުނުން ވަނީ އެ އުޅަނދު ހުއްޓުވައި ގޮއްވާލާފަ އެވެ. ޔަމަނުގެ ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ، މިއީ ސައުދީ އަރަބިއްޔާގެ އިސްތިގުލާލަށް އަރައިގަތުމުގެ "ބޮޑު އުދުވާނެއް" ކަމަށާއި، އިސްލާމްދީނުގެ އެންމެ މުގައްދަސް ބިނާ ހުރި ސިޓީގެ ހުރުމަތް ކަނޑާލުމަށް ހިންގި އަމަލެއް ކަމަށެވެ. އަދި މިއީ މީގެ ކުރިންވެސް މައްކާއަށް އަމާޒުކޮށް ހޫތީން ދީފައިވާ ހަމަލާތަކާއި، އެ ޖަމާއަތުން ގެންގުޅޭ ދުޝްމަން ސިޔާސަތުގެ ކުރިއަށް އޮތް ބައެއްގެ ގޮތުގައި އެ މިނިސްޓްރީން ސިފަކުރި އެވެ.

މައްކާއަށް ހަމަލާދޭން އުޅުނު ކަމަށް ކުރެވޭ ތުހުމަތުތައް ހޫތީން ވަނީ ދޮގުކޮށްފަ އެވެ. އެ ޖަމާއަތުން ބުނެފައިވަނީ އެއީ "ފޫހިވާފަދަ ދޮގުތަކެއް" ކަމަށެވެ.

ޔަމަނުގެ ފޮރިން މިނިސްޓްރީން އިތުރަށް ބުނި ގޮތުގައި، ސައުދީގެ ސިޓީތަކަށާއި އުމްރާނީ ވަސީލަތްތަކަށް ދޭ ހަމަލާތައް ވަރުގަދަކުރުމުން ހާމަވަނީ، އީރާނުގެ އެހީތެރިކަމާއެކު އެ ޖަމާއަތުން ކުރިމަތިކުރާ ނުރައްކަލެވެ. އަދި މިއީ ޔަމަނަކީ ތެހެރާންގެ މަސްލަހަތުތަކަށް ޚިދުމަތްކުރާ ވަސީލަތަކަށް ހެދުމަށް ކުރާ މަސައްކަތުގެ ބައެއް ކަމަށްވެސް އެ މިނިސްޓްރީން ބުންޏެވެ.

ސައުދީ އަރަބިއްޔާއާއެކު ޔަމަނުން ސާބިތުކަމާއެކު އޮތްކަން ހާމަކުރަމުން، ބައިނަލްއަގުވާމީ ގާނޫނުތަކުގެ ދަށުން އެ ގައުމުގެ އިސްތިގުލާލާއި މުގައްދަސް ބިނާތައް ރައްކާތެރިކުރުމަށް ސައުދީން އަޅާ ފިޔަވަޅުތަކަށް ޔަމަނުން ވަނީ ތާއީދުކޮށްފަ އެވެ. މީގެ އިތުރުން، ހޫތީންގެ ޑްރޯން ހުއްޓުވުމުގައި ސައުދީ ވައިގެ ދިފާއީ ބާރުތަކުން ދެއްކި ހުށިޔާރުކަމަށް އެ މިނިސްޓްރީން ތައުރީފުކުރި އެވެ.

މި ހަމަލާތަކުގެ ޒިންމާ ހޫތީންނާއި އީރާނުން އުފުލަންޖެހޭނެ ކަމަށް ބުނެ، އަރަބި، އިސްލާމީ އަދި ބައިނަލްއަގުވާމީ މުޖުތަމައުން މިކަމާ ދެކޮޅަށް އެކުވެރިކަމާއެކު ތެދުވުމަށް ޔަމަނުން ވަނީ ގޮވާލާފަ އެވެ. މީގެ ތެރޭގައި ހޫތީންނަށް ހަތިޔާރު ފޯރުކޮށްދޭ މަގުތައް ބަންދުކުރުމާއި، އދ. ގެ ސަލާމަތީ މަޖިލީހުގެ ގަރާރުތައް ތަންފީޒުކުރުމުގެ އިތުރުން، މުޅި ޔަމަނުގައި ދައުލަތުގެ ބާރު ގާއިމުކުރުމަށްޓަކައި ބައިނަލްއަގުވާމީ ގޮތުން ބަލައިގެންފައިވާ ޔަމަނުގެ ސަރުކާރަށް އެހީތެރިކަން ފޯރުކޮށްދިނުން ހިމެނެ އެވެ.

ރޮއިޓާސް ނިއުސް އެޖެންސީން ރިޕޯޓްކޮށްފައިވާ ގޮތުގައި، ބާބުލް މަންދަބު ކަނޑުއޮޅިން މުދާ އުފުލާ އުޅަނދުފަހަރަށް ދަތުރުކުރެވޭނެ މަގު ހުޅުވާލާފައި ބޭއްވުމުގެ ބަދަލުގައި، ހޫޘީންގެ ބާރުގެ ދަށުގައިވާ ސަރަހައްދުތަކަށް ހަމަލާނުދިނުމަށާއި ސައުދީން ތާއީދުކުރާ ފައުޖުތަކަށް އެހީތެރިކަން ނުދިނުމަށް ޑޮނަލްޑް ޓްރަމްޕްގެ ސަރުކާރުން ހޫޘީންނާއެކު އެއްބަސްވުމެއް ގާއިމުކޮށްފި އެވެ.

މި އެއްބަސްވުން ގާއިމުކޮށްފައި މިވަނީ، ހޫޘީންނަށް ހަމަލާދިނުމަށް ސައުދީ އަރަބިއްޔާގެ ވަލީއަހުދު މުހައްމަދު ބިން ސަލްމާން އެދިވަޑައިގެންނެވި އެދިވަޑައިގަތުމަށް ޑޮނަލްޑް ޓްރަމްޕް އިންކާރު ކުރެއްވިތާ މަދު ދުވަސްކޮޅެއްގެ ތެރޭގަ އެވެ. އެމެރިކާގެ އަސްކަރީ ބާރުގެ ބޭނުންކޮށްގެން ހޫޘީންނަށް ހަމަލާދިނުމަށް އެދިވަޑައިގެން، ވަލީއަހުދު މުހައްމަދު ބިން ސަލްމާން ދެ ފަހަރެއްގެ މަތިން ޓްރަމްޕަށް ގުޅުއްވި ނަމަވެސް، ދެ ފަހަރުވެސް ޓްރަމްޕް ވަނީ އެކަމަށް ދެކޮޅު ހައްދަވާފަ އެވެ.

މި މަޝްވަރާތައް ބާއްވާފައިވަނީ އޮމާންގެ މަސްކަޓްގައި ހުންނަ އެމެރިކާގެ އެމްބަސީގަ އެވެ. މި ބައްދަލުވުމުގައި ބައިވެރިވި ހޫޘީންގެ ވަފުދުގައި، އެމެރިކާގެ ދަތިކުރުމުގެ ފިޔަވަޅުތައް އަޅާފައިވާ އިސް އޮފިޝަލެއް ކަމަށްވާ މުހައްމަދު އަބްދުއްސަލާމް ހިމެނިވަޑައިގަންނަވަ އެވެ. މި ބައްދަލުވުމުގައި ހޫޘީން އެމެރިކާގެ އޮފިޝަލުންނަށް ޔަގީންކަން ދީފައިވަނީ، އެމެރިކާގެ އުޅަނދުފަހަރަށް ހަމަލާދިނުމުގެ އެއްވެސް ގަސްތެއް އެ ޖަމާއަތުގެ ނެތް ކަމަށާއި، 2025 ވަނަ އަހަރުގެ ހަނގުރާމަ ހުއްޓާލުމުގެ އެއްބަސްވުމަށް އެ ފަރާތުން އިހުތިރާމް ކުރާނެ ކަމަށެވެ. ނަމަވެސް ސައުދީ އަރަބިއްޔާއަށް ނިސްބަތްވާ އުޅަނދުފަހަރު މި އިސްތިސްނާގެ ތެރޭގައި ނުހިމެނެ އެވެ.

މި ބައްދަލުވުން ބާއްވާފައި މިވަނީ، ސައުދީން ތާއީދުކުރާ ފައުޖުތައް ބަލިކުރުމަށްފަހު، ޔަމަނުގެ ރަތްކަނޑުގެ މުޅި އައްސޭރިފަށާއި ބާބުލް މަންދަބުގައި އޮންނަ ޕެރިމް އައިލެންޑް ހޫޘީންގެ ބާރުގެ ދަށަށް ގެނައިތާ މަދު ދުވަސްކޮޅެއްގެ ތެރޭގަ އެވެ.

ޔަމަނުގެ އަލް ޖައުފް ގަވަރުނޭޓުގައި ސައުދީ އަރަބިއްޔާއިން ތާއީދުކުރާ ފައުޖުތަކަށް އަމާޒުކޮށް، ހޫޘީ ހަނގުރާމަވެރިން ހަމަލާދޭ މަންޒަރު ފެންނަ ވީޑިއޯއަކުން ނަގާފައިވާ މި ފޮޓޯއިން ފެންނަނީ، އުޅަނދެއްގެ މަތީގައި ހުރެ ހޫޘީ ހަނގުރާމަވެރިއަކު ބަޑިޖަހަމުންދާ މަންޒަރު- 16 ސެޕްޓެމްބަރު 2026 / ހޫޘީ މިލިޓަރީ މީޑިޔާ

ޔަމަނުގެ ސަރުކާރުގެ ފައުޖުތަކުން ހޫޘީންގެ މަރުކަޒުތަކަށް ވަރުގަދަ ހަމަލާތަކެއް ދީފި އެވެ. ޔަމަނުގެ އިންފޮމޭޝަން މިނިސްޓްރީން ހާމަކޮށްފައިވާ ގޮތުގައި، އެ ގައުމުގެ ކޯލިޝަން ފައުޖުތަކުން އަމާޒުކޮށްފައިވަނީ ބާބުލް މަންދަބު ކަނޑުއޮޅީގެ އުތުރުގައި އޮންނަ ޛުބާބު ސަރަހައްދުގައި ހުރި ހޫޘީންގެ އަސްކަރީ މަރުކަޒުތަކަށެވެ.

ސަރުކާރުގެ ރަސްމީ ސޯޝަލް މީޑިއާ އެކައުންޓްތަކުގައި އާންމުކޮށްފައިވާ، ތާރީޚު އެނގެން ނެތް ވީޑިއޯތަކުން ފެންނަ ގޮތުގައި، ހޫޘީންގެ ބާރުގެ ދަށުގައިވާ ސަރަހައްދުތަކުގައި ހުރި އިމާރާތްތަކަށާއި އުމްރާނީ ވަސީލަތްތަކަށް މިސައިލް ހަމަލާތައް އަރާ މަންޒަރު ފެނެ އެވެ.

މީގެ އިތުރުން، ތާއިޒްގެ ހުޅަނގުން އޮންނަ އަލް-ކުޛާގައި ހަރަކާތްތެރިވަމުންދިޔަ ހޫޘީ ސިފައިންނަށް އަމާޒުކޮށް ވެސް ޔަމަނުގެ ފައުޖުތަކުން ހަމަލާދީފައިވާ ކަމަށް އެ ސަރަހައްދުގައި ހަރަކާތްތެރިވާ ރިޕޯޓަރުން މައުލޫމާތުދީފައިވާ ކަމަށް އަލްޖަޒީރާއިން ރިޕޯޓްކުރެ އެވެ.

ހުރްމުޒް ކަނޑުއޮޅިއާއި ބާބުލް މަންދަބު އަދި ސުއޭޒް ކެނަލްއަކީ ދުނިޔޭގެ ތެލާއި، ގޭސް އަދި ވިޔަފާރި މުދަލުގެ ގާތްގަނޑަކަށް ހަތަރުބައިކުޅަ އެއްބައި ދަތުރުކުރާ، ބައިނަލްއަގުވާމީ ގޮތުން އެންމެ މުހިންމު ތިން ކަނޑުގެ މަގު

ޔަމަނުގެ ހޫޘީންގެ މަންދޫބުންނާ އެމެރިކާ ސަރުކާރުގެ އިސް އޮފިޝަލުންތަކެއް މިދިޔަ ހަފުތާ ބަންދުގައި އޮމާންގައި ބައްދަލުކުރައްވާފައިވާ ކަމަށް، މިކަމުގެ މައުލޫމާތު ހުރި ފަސް މަސްދަރަކާ ހަވާލާދީ ރޮއިޓާސްއިން ރިޕޯޓުކޮށްފި އެވެ.

މި ބައްދަލުވުމުގައި، އެމެރިކާގެ އުޅަނދުފަހަރަށް ހަމަލާދިނުމުގެ އެއްވެސް ނިޔަތެއް ނެތް ކަމަށާއި، 2025 ވަނަ އަހަރަށް އެމެރިކާއާއެކު ވެފައިވާ ހަމަލާބަދަލުކުރުން ހުއްޓާލުމުގެ އެއްބަސްވުމަށް ފުރިހަމައަށް އިހުތިރާމްކުރާނެ ކަމުގެ ޔަގީންކަން ހޫޘީން ދީފައިވާ ކަމަށް ދެ މަސްދަރަކުން ބުނެފައިވެ އެވެ.

މައްކާގެ މުގައްދަސް ބިމަށް އަމާޒުކޮށް ޑްރޯން ހަމަލާއެއް ދޭން ހޫޘީން ކުރި މަސައްކަތް، ޕާކިސްތާނުގެ ބޮޑުވަޒީރު ޝެހްބާޒް ޝަރީފް ކުށްވެރިކުރައްވައިފި އެވެ. ޝެހްބާޒް ޝަރީފް މި ހަމަލާ ކުށްވެރިކުރައްވާފައި މިވަނީ، ޔަމަނުގައި ހަރަކާތްތެރިވާ ހޫޘީން ފޮނުވާލި ޑްރޯންއެއް މައްކާގެ ވައިގެ ސަރަހައްދަށް ވަނުމުގެ ކުރިން ދިފާއީ ނިޒާމުން ހަލާކުކޮށްލާފައިވާ ކަމަށް ސައުދީ އަރަބިއްޔާއިން ބުނެފައިވާ ދަނޑިވަޅެއްގަ އެވެ.

އެކްސްގައި ކުރެއްވި ޕޯސްޓެއްގައި ބޮޑުވަޒީރު ޝަރީފް ވިދާޅުވީ، ފިނޑި އަދި ނުބައި ނިޔަތެއްގައި ދޭން އުޅުނު މި ޑްރޯން ހަމަލާ އެންމެ ހަރުކަށި އިބާރާތުން ކުށްވެރިކުރައްވާ ކަމަށެވެ. ބޮޑުވަޒީރު ޝަރީފް ވަނީ މުޅި ސަރަހައްދުގައި ވެސް ހަމަޖެހުން ގާއިމުކުރުމަށްޓަކައި، ހުރިހާ ފަރާތްތަކަކުން ވެސް ކެތްތެރިކަން އިސްކުރުމަށް އަލުން ގޮވާލައްވާފަ އެވެ.

އެމެރިކާގެ ސެކްރެޓަރީ އޮފް ވޯ (ދިފާއީ ވަޒީރު) ޕީޓަރ ހެގްސެތު

އީރާނާ ދެކޮޅަށް އެމެރިކާއިން ކުރަމުންދާ ހަނގުރާމައާ ގުޅިގެން، އެ ގައުމުގެ ސެކެޓްރީ އޮފް ވޯ، ޕީޓަރ ހެގްސެތު މަގާމުން ވަކިކުރުމަށް ނުވަތަ އިމްޕީޗް ކުރުމަށް ވޯޓަށް އެހުމަށް، އެމެރިކާގެ ރެޕްރެޒެންޓޭޓިވް ތޯމަސް މާސީ ރިޕަބްލިކަން ޕާޓީގެ މެންބަރުންނަށް މަޖުބޫރު ކުރައްވައިފި އެވެ.

މި ހަނގުރާމައާ ގުޅޭގޮތުން އެންމެ ފަހުން ނެގި ހިޔާލު ހޯދުމުގެ ވޯޓަކުން ދައްކާ ގޮތުގައި، އީރާނާ ދެކޮޅަށް ކުރާ ހަނގުރާމައަށް ތާއީދުކުރަނީ އެމެރިކާގެ ރައްޔިތުންގެ ތެރެއިން ތިންބައިކުޅަ އެއްބަޔަށް ވުރެ މަދު ބައެކެވެ.

އީރާނާއި ކެރީބިއަން ސަރަހައްދުގައި ހިންގި ކަނޑުގެ އަސްކަރީ އޮޕަރޭޝަންތަކުގައި އަމަލުކުރި ގޮތާއި ގުޅިގެން، ހެގްސެތު އޭނާގެ މަގާމުގެ ހުވާޔާ ޚިލާފުވެވަޑައިގެންފައިވާ ކަމަށާއި، ޑިފެންސް މިނިސްޓްރީގެ ބާރުތަކުގެ ބޭނުން ނަހަމަ ގޮތުގައި ހިއްޕަވާފައިވާ ކަމަށް ބުނެ މާސީ ވަނީ  އޭނާއަށް ތުހުމަތުތަކެއް ކުރައްވާފަ އެވެ.

އީރާނުގެ ޚާރިޖީ ވަޒީރު އައްބާސް އަރާގްޗީ ޗައިނާގެ ވެރިރަށް ބެއިޖިންއަށް ވަޑައިގެން، އެ ގައުމުގެ ޚާރިޖީ ވަޒީރު ވަންގް ޔީއާ ބައްދަލުކުރައްވައިފި އެވެ. މި ބައްދަލުކުރެއްވުމުގައި ޗައިނާއިން ވަނީ އެމެރިކާއާއި އީރާނާ ދެމެދު އުފެދިފައިވާ ހަމަނުޖެހުންތައް އިތުރަށް ބޮޑުވިޔަނުދީ، ދެ ފަރާތުން ވެސް ފަހަތަށް ޖެހުމަށް ބާރުއަޅާފަ އެވެ.

ޗައިނާގެ ޚާރިޖީ ވަޒީރު ވަންގް ޔީއާ ހަވާލާދީ ނެރުނު ބަޔާނެއްގައި ވިދާޅުވެފައިވަނީ، ސަރަހައްދީ ނުތަނަވަސްކަން އިތުރަށް ގޯސްވެ، ޔަމަނާއި ރަތްކަނޑާ ހަމައަށް އެ ހަމަނުޖެހުންތައް ފެތުރިގެން ދިއުމަށް ޗައިނާއިން ބޭނުންނުވާ ކަމަށެވެ.

މީގެ އިތުރުން، އިސްލާމްއާބާދު އެމްއޯޔޫގެ ދަށުން އެއްބަސްވެފައިވާ ކަންކަމުގެ މައްޗަށް މަޝްވަރާގެ އޮނިގަނޑު އަލުން ބިނާކޮށް މާނަ ހުރި މަޝްވަރާތަކެއް ކުރުމަށް ޗައިނާ އިން ވަނީ ވޮޝިންގްޓަނަށާއި ތެހެރާނަށް އިލްތިމާސްކޮށްފަ އެވެ.

ޗައިނާއަކީ އީރާނުގެ އެންމެ ބޮޑު އިގުތިސާދީ ބައިވެރިޔާ ކަމަށްވާއިރު، އީރާނުން ބޭރުކުރާ ތެލުގެ ބޮޑު ބައެއް ގަންނަނީ ޗައިނާ އިންނެވެ.

އިސްލާމްއާބާދު އެމްއޯޔޫ އަކީ ޕާކިސްތާނުން މެދުވެރިއެއްގެ ދައުރު އަދާކޮށް، 2026 ވަނަ އަހަރުގެ ޖޫން މަހު އެމެރިކާއާއި އީރާނާ ދެމެދު ސޮއިކުރި 14 ނުކުތާގެ މައްޗަށް އެކުލެވޭ ވަގުތީ ސުލްހައިގެ އެއްބަސްވުމެކެވެ. މި އެއްބަސްވުމުގެ މައިގަނޑު މަގްސަދަކީ ދެ ގައުމުގެ ދެމެދުގައި އޮތް އަސްކަރީ ކުރިމަތިލުންތައް ހުއްޓާލުމާއި ކަނޑުދަތުރުފަތުރުގެ މުހިންމު މަގުތައް އަލުން ހުޅުވާލުމެވެ.

އިރާންގެ ފޮރިން މިނިސްޓަރު އަރާގްޗީ އާއި ޗައިނާގެ ފޮރިން މިނިސްޓަރު ވޭންގް

އީރާނުގެ ވައިގެ ސަރަހައްދަށް ވަން އެމެރިކާގެ އެމްކިއު-9 މަރުކާގެ ޑްރޯނެއް، އެ ގައުމުގެ ކުރިއަރާފައިވާ ވައިގެ ދިފާއީ ނިޒާމު ބޭނުންކޮށްގެން ހުއްޓުވައި، ގޮއްވާލާފައިވާ ކަމަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ބުނެފި އެވެ.

އީރާނުގެ ސެމީ އޮފިޝަލް ނިއުސް އެޖެންސީ، ތަސްނީމް އިން އާންމުކުރި އައިއާރުޖީސީގެ ބަޔާނެއްގައި ބުނެފައިވަނީ، އެމެރިކާގެ މި ޑްރޯން ބަޑިޖަހައި ވައްޓާލާފައިވަނީ ގިޝްމް އައިލެންޑްގެ މަތިން، އެ ގައުމުގެ ގަޑިން ދަންވަރު 2:29 ހާއިރު ކަމަށެވެ.

މައްކާ، ސައުދީ އަރަބިއްޔާ

މުސްލިމުންގެ މުގައްދަސް ބިިމެއް ކަމަށްވާ މައްކާއަށް އަމާޒުކޮށް އެއްވެސް ހަމަލާއެއް ދީފައިނުވާނެ ކަމަށް ބުނެ ހޫޘީން އެކަން ދޮގުކޮށްފި އެވެ.

ހޫޘީންގެ ސިޔާސީ ބިއުރޯގެ މެންބަރެއް ކަމަށްވާ ހިޒާމް އަލް-އަސަދު ވަނީ، ޑްރޯންއެއް ބޭނުންކޮށްގެން މައްކާއަށް ހަމަލާދޭން އުޅުނު ކަމަށް ބުނެ ރިޔާޟު އިން ކުރާ ތުހުމަތުތަކަކީ ކަނޑައެޅިގެން ދޮގެއްގެ ގޮތުގައި ސިފަކުރައްވާފަ އެވެ.

އެކްސްގައި ކުރެއްވި ޕޯސްޓެއްގައި އަލް-އަސަދު ވިދާޅުވީ، މާތްވެގެންވާ މައްކާއަށް ހަމަލާދޭން އުޅުނު ކަމަށް ބުނެ ދައްކާ ވާހަކަތަކަކީ މީގެ ކުރިން ވެސް ބޭނުންކޮށްފައިވާ، ފޫހިވާ ފަދަ ވިޔާނުދާ ދޮގުތަކެއް ކަމަށާއި، އެފަދަ ވާހަކަތަކަށް މިހާރު އެއްވެސް މީހަކު ނުހެއްލޭނެ ކަމަށެވެ.

ސައުދީ ކޯލިޝަނުން ނެރުނު ބަޔާނެއްގައި ބުނެފައިވަނީ، ރޭގަނޑު 21:50 ހާއިރު، މައްކާގެ ވައިގެ ސަރަހައްދަށް ވަންނަން އުޅުނު ޑްރޯންއެއް އެ ގައުމުގެ ވައިގެ ދިފާއީ ނިޒާމުން ހުއްޓުވައި ނައްތާލާފައިވާ ކަމަށެވެ.

އެ ބަޔާނުގައި އިތުރަށް ބުނެފައިވަނީ، މިއީ ޓެރަރިޒަމްގެ އަމަލެއް ކަމަށާއި، 27 ޖުލައި 2017 ގައި ބެލިސްޓިކް މިސައިލެއް ބޭނުންކޮށްގެން މައްކާއަށް ހަމަލާދޭން ކުރި ފުރަތަމަ މަސައްކަތަށް ފަހު، އެ ސިޓީއަށް އަމާޒުކޮށް ހަމަލާދޭން ކުރި ދެވަނަ މަސައްކަތް ކަމަށެވެ.

ސައުދީ އަރަބިއްޔާގެ ހަނގުރާމަ މަތީ ބޯޓެއް ވައްޓާލާފައިވާ ކަމަށް ބުނުމަށްފަހު، އެ ބޯޓުގެ ބައިތައް ހޯދުމަށް އައި ސައުދީގެ އެފް-15 މަރުކާގެ ދެ ބޯޓަކަށް ވެސް ހަމަލާދީފައިވާ ކަމަށް ހޫޘީން ބުނެފި އެވެ.

ހޫޘީންގެ އަސްކަރީ ތަރުޖަމާނު ޔަހްޔާ ސަރީ ވިދާޅުވީ މި ބޯޓު ވައްޓާލާފައިވަނީ އެ ގައުމުގައި އަމިއްލައަށް އުފައްދާފައިވާ، ބިމުން ވައިގެ ތެރެއަށް ފޮނުވާލާ މިސައިލެއް ބޭނުންކޮށްގެން ކަމަށެވެ.

މި ހަފުތާގެ މިހާތަނަށް ސައުދީގެ އަސްކަރީ މަތިންދާބޯޓުތަކުން ތައީޒް، ލަހްޖް، އަލް-ޖައުފް، ހައްޖާ، މާރިބް، ސާދާ އަދި އަލް-ބައިދާ އަށް އަމާޒުކޮށް 450 އަށްވުރެ ގިނަ ހަމަލާ ދީފައިވާ ކަމަށް ސަރީ ވިދާޅުވި އެވެ.

މީގެ އިތުރުން، މި ހަމަލާތަކުގައި އާންމު ރައްޔިތުންގެ ތެރެއިން ބަޔަކު މަރުވެ، އަނިޔާވެފައިވާ ކަމަށް ވެސް އޭނާ ވިދާޅުވި އެވެ.

ލިބެން ހުރި ހުރިހާ ވަސީލަތެއްގެ ބޭނުންކޮށްގެން، ގައުމުގެ ވައިގެ ސަރަހައްދާއި އިސްތިގުލާލަށް އަރައިގަންނަ ކޮންމެ ފަރާތަކުން ގައުމު ދިފާއުކުރުމުގައި ހޫޘީން ދެމިތިބޭނެ ކަމަށް ވެސް ސަރީ ވިދާޅުވި އެވެ.

ސައުދީ އަރަބިއްޔާގެ ވެރިރަށް ރިޔާދު މަތިން އެ ގައުމުގެ އެފް-15 މަރުކާގެ ހަނގުރާމަމަތީ ބޯޓުތަކެއް އުދުހެނީ

ސީބީއެސް އިން އާންމުކޮށްފައިވާ ފޮޓޯއެއް: މެދުއިރުމަތީގައި ހުރި އެމެރިކާގެ އަސްކަރީ މަރުކަޒުތަކަށާއި މުދާތަކަށް އިއާދަނުކުރެވޭ ފަދަ ބޮޑެތި ގެއްލުންތަކެއް ލިބިފައިވާކަން ހާމަވެއްޖެ

އީރާނުން ދިން މިސައިލް އަދި ޑްރޯން ހަމަލާތަކާ ގުޅިގެން، މެދުއިރުމަތީގެ އެކި ސަރަހައްދުތަކުގައި ގާއިމުކޮށްފައިވާ އެމެރިކާގެ އަސްކަރީ މަރުކަޒުތަކުގެ އިމާރާތްތަކަށާއި އުޅަނދުފަހަރަށް ބޮޑެތި ގެއްލުންތަކެއް ލިބިފައިވާކަން ސީބީއެސް ނިއުސްއަށް ލިބިފައިވާ ފޮޓޯތަކުން ހާމަވެއްޖެ އެވެ.

މި ހަމަލާތަކާ ގުޅޭގޮތުން އެ ސަރަހައްދުގައި ހަރަކާތްތެރިވާ އެމެރިކާ ސިފައިންގެ މީހަކު ސީބީއެސް ނިއުސްއަށް މައުލޫމާތު ދެމުން ބުނެފައިވަނީ، އެމެރިކާގެ އަސްކަރީ މަރުކަޒުތަކަށާއި މުދާތަކަށް އިއާދަނުކުރެވޭ ފަދަ ބޮޑެތި ގެއްލުންތަކެއް ލިބިފައިވާ ކަމަށާއި، ނަމަވެސް އެމެރިކާގެ ސަރުކާރުން މިކަމުގެ ތަފްސީލީ މައުލޫމާތު އާންމު ރައްޔިތުންނާ ހިއްސާކޮށްފައި ނުވާ ކަމަށެވެ.

އީރާނާއެކު ކުރަމުންދާ ހަނގުރާމަ ހުއްޓާލުމަށް ރައީސް ޑޮނަލްޑް ޓްރަމްޕް އަށް މަޖުބޫރުކުރާ ގަރާރެއް އެމެރިކާގެ ހައުސް އޮފް ރެޕްރެޒެންޓެޓިވްސްއިން އަންގާރަ ދުވަހު ފާސްކޮށްފި އެވެ. މިއީ ކުރިއަށް އޮތް މިޑްޓާމް އިންތިޚާބަށް މަދު ހަފުތާތަކެއް ބާކީ އޮއްވައި، ޓްރަމްޕްގެ ސަރުކާރުން މި ހަނގުރާމަ ކުރިއަށްގެންދާ ގޮތާމެދު ސިޔާސީ ގޮތުން ކުރިމަތިވި ވަރުގަދަ ނުރުހުމެކެވެ.

ޑިމޮކްރެޓުން އިސްވެ އޮވެ، ރިޕަބްލިކަން ޕާޓީގެ ބައެއް މެންބަރުންގެ ތާއީދާއެކު، އީރާނުން ސިފައިން ބޭލުމަށް ޓްރަމްޕަށް އަމުރުކޮށް ހައުސްއިން މިފަދަ ގަރާރެއް ފާސްކުރި މިއީ ތިންވަނަ ފަހަރެވެ. ނަމަވެސް، ނޮވެމްބަރު މަހުގެ އިންތިޚާބުގެ ކުރިން މަޖިލީހުން ނިންމާ އެންމެ ފަހު ނިންމުންތަކުގެ ތެރޭގައި މި ވޯޓު ހިމެނޭތީ، މިއީ މިހާތަނަށް ކުރެވުނު އެންމެ މުހިންމު މަސައްކަތް ކަމަށް ޑިމޮކްރެޓުން ބުނެ އެވެ.

މި ގަރާރަށް ރިޕަބްލިކަން ޕާޓީގެ ހަތް މެންބަރަކު ތާއީދުކޮށްފައިވާއިރު، މިއީ މީގެ ކުރިން ފާސްކުރި ދެ ގަރާރަށް އެ ޕާޓީން ލިބުނު ހަތަރު ވޯޓަށްވުރެ އިތުރު އަދަދެކެވެ.

އެމެރިކާގެ އާންމު ރައްޔިތުންގެ މެދުގައި ވެސް އީރާނުގެ ހަނގުރާމައާމެދު އޮތް ނުތަނަވަސްކަން ދަނީ އިތުރުވަމުންނެވެ. މިހާރު ޓްރަމްޕްގެ އަމިއްލަ ޕާޓީގެ މެންބަރުން ވެސް ހަނގުރާމައަށް އިތުރު ފަންޑު ދިނުމަށް ދަނީ އިންކާރު ކުރަމުންނެވެ. އެހެންކަމުން، ޕެންޓަގަންއިން އެދިފައިވާ ބިލިއަނުން ގުނާލެވޭ ޑޮލަރުގެ ބަޖެޓު، މިޑްޓާމް އިންތިޚާބު ނިމެންދެން މަޑުޖެހިފައި އޮންނާނެ ކަމަށް ބެލެވެ އެވެ.

އެމެރިކާ އިން އީރާނާ އެކު ކުރަމުންދާ ހަނގުރާމައިގައި އީރާނުން ސުންނާފަތިކޮށްލާފައިވާ އެމެރިކާގެ މެދުއިރުމަތީ ބޭސް އެއް

މައްކާއަށް ހޫޘީން ފޮނުވާލި ޑްރޯން ހަމަލާއެއް ވަނީ ނާކާމިޔާބުކޮށްލާފައި

ޔަމަނުގެ ހޫޘީން މައްކާއަށް އަމާޒުކޮށް ފޮނުވާލި ޑްރޯން ހަމަލާ ސައުދީ އިއްތިހާދުން ނާކާމިޔާބުކޮށްލާފައިވާއިރު، މިއީ އެ ސިޓީއަށް ހަމަލާދޭން މަސައްކަތްކުރި ދެވަނަ ފަހަރު. މި ހަމަލާއާ ގުޅިގެން ދެ ހަރަމްފުޅުގެ ސަލާމަތަށް ޓަކައި ވަރުގަދަ ފިޔަވަޅުތަކެއް އަޅާނެ ކަމުގެ އިންޒާރު ސައުދީން އިސްވެ އުފެއްދި އިއްތިހާދުން ވަނީ ދީފައި

އީރާނާ ދެކޮޅަށް އެމެރިކާއިން ކުރަމުންދާ ހަނގުރާމައިގެ ސަބަބުން، 2027 ވަނަ އަހަރުގެ ފުރަތަމަ ތިން މަސްދުވަހުގެ ތެރޭގައި އެމެރިކާގެ އިންފްލޭޝަން ނުވަތަ ތަކެތީގެ އަގުތައް 0.5 އިންސައްތައަށް އުފުލިގެންދާނެ ކަމަށް އެ ޤައުމުގެ ކޮންގްރެޝަނަލް ބަޖެޓް އޮފީހުން ލަފާކޮށްފި އެވެ.

ސިޔާސީ އެއްވެސް ފަރާތަކަށް ބުރަނުވާ، ބަޖެޓް ދިރާސާކުރާ އިދާރާއެއް ކަމަށްވާ ކޮންގްރެޝަނަލް ބަޖެޓް އޮފީހުން ހާމަކޮށްފައިވާ ގޮތުގައި، މިއަހަރުގެ ފެބްރުއަރީ މަހުގެ 28 ވަނަ ދުވަހު އެމެރިކާއިން އީރާނާ ދެކޮޅަށް ފެށި މި ހަނގުރާމައަށް މިހާތަނަށް 38 ބިލިއަން އެމެރިކާ ޑޮލަރު ވަނީ ހޭދަވެފަ އެވެ. އަދި ކުރިއަށް އޮތް ތަނުގައި މި ހަނގުރާމައަށް މަހަކު ގާތްގަނޑަކަށް 3 ބިލިއަން ޑޮލަރު އިތުރަށް ހޭދަވާނެ ކަމަށް ވެސް އެ އިދާރާއިން ލަފާކުރެ އެވެ.

ބަޖެޓް އޮފީހުން ބުނި ގޮތުގައި މި ހަނގުރާމައިގެ ޚަރަދުތައް މިހާ ބޮޑަށް އުފުލިގެން ގޮސްފައިވަނީ، އެމެރިކާގެ ހަތިޔާރުގެ ރަސްމީ ރިޒާވުން ގިނަ އަދަދެއްގެ ގޮވާތަކެއްޗާއި ވަޒަން ހަލުވިކަމާއެކު ބޭނުންކުރަން ޖެހުމާ ގުޅިގެންނެވެ. އަދި މިގޮތަށް ބޭނުންކުރެވުނު ހަތިޔާރުގެ ރިޒާވް އަލުން ފުރިހަމަކުރުމަށް ގާތްގަނޑަކަށް ފަސް އަހަރު ދުވަހުގެ މުއްދަތެއް ނަގާނެ ކަމަށްވެސް އެ އޮފީހުން އަންދާޒާކުރެ އެވެ.

މި ހަނގުރާމައިގެ ސަބަބުން އެމެރިކާގެ ހަތިޔާރުގެ ރިޒާވް ހުސްވަމުންދާއިރު، ހަކަތައިގެ އަގުތައް އިންތިހާއަށް އުފުލުމުގެ ސަބަބުން، ދުނިޔޭގެ އެހެން ސަރަހައްދެއްގައި ކުރިމަތިވެދާނެ ހަމަނުޖެހުމަކަށް އިޖާބަދިނުމުގެ ގާބިލުކަން އެމެރިކާގެ ކިބައިގައި ހުރިތޯ މިހާރު ވަނީ ސުވާލު އުފެދިފަ އެވެ. އަދި މީގެ ސަބަބުން މިހާރު ވެސް ދަތިތަކާ ކުރިމަތިވެފައިވާ އެމެރިކާގެ ފެޑަރަލް ބަޖެޓަށް އިތުރު ބުރައެއް ވަނީ ކުރިމަތިވެފަ އެވެ.

އިރާނާ ދެކޮޅަށް ހަނގުރާމަކުރުމަށް މެދުއިރުމަތީގައި ހަރަކާތްތެރިވާ އެމެރިކާ އަސްކަރިއްޔާ

ސައުދީ އަރަބިއްޔާގެ ޖީޒާން، އަބްހާ އަދި ޚަމީސް މުޝައިތުގައި ކުރިއާލާ އިންޒާރުދޭ ނިޒާމުތައް އެ ގައުމުގެ ސިވިލް ޑިފެންސުން ހަރަކާތްތެރިކޮށްފި އެވެ.

ސައުދީ އަރަބިއްޔާގެ ސިވިލް ޑިފެންސުން އެކްސްގައި ކުރި ޕޯސްޓެއްގައި ބުނެފައިވަނީ، އެގައުމުގެ ޖީޒާން، އަބްހާ އަދި ޚަމީސް މުޝައިތުގައި ދިރިއުޅޭ ރައްޔިތުންނަށް ކުރިމަތިވެދާނެ ނުރައްކަލަކުން ސަލާމަތްވުމަށްޓަކައި، ކުރިއާލާ އިންޒާރުދޭ ނިޒާމުތައް މިހާރު ހަރަކާތްތެރިކޮށްފައިވާ ކަމަށެވެ.

ޔަމަނުގައި ހަރަކާތްތެރިވާ ހޫޘީ ސަރުކާރުގެ ހަނގުރާމަވެރިން

ހޫޘީންގެ އަސްކަރީ ހަރަކާތްތަކަކީ ހަމައެކަނި ޔަމަނުގެ އެތެރޭގެ އަސްކަރީ މައްސަލައެއް ނޫން ކަމަށާއި މިހާރު އެއީ ގައުމީ އަދި ސަރަހައްދީ ސަލާމަތަށް އޮތް ނުރައްކަލެއް ކަމަށް ބައިނަލްއަޤްވާމީ ގޮތުން ބަލައިގަންނަ ޔަމަނުގެ ސަރުކާރުގެ ބޮޑުވަޒީރު ވިދާޅުވެއްޖެ އެވެ.  

ބޮޑުވަޒީރު ޝަޔާ މުހުސިން އަލް-ޒިންދާނީ ވަނީ އެ ގައުމުގެ ގާނޫނު ހަދާ މަޖިލީހުގެ ނައިބު ރައީސް މުހައްމަދު އަލް-ޝައްދާދީއާ އަދަނުގައި ބައްދަލުކުރައްވާފަ އެވެ. އަދި ހޫޘީން އިސްވެ ކުރިއަށްގެންދާ އަސްކަރީ ހަރަކާތްތަކާ ގުޅޭގޮތުން ވަނީ މަޝްވަރާ ކުރައްވާފަ އެވެ.  

މި ބައްދަލުކުރެއްވުމުގައި، ހޫޘީންގެ އަސްކަރީ ހަރަކާތްތައް ވަރުގަދަކުރަމުންދާ ދަނޑިވަޅެއްގައި، "ގައުމީ ސަފުތައް އެއްބައިވަންތަކޮށް، ދައުލަތުގެ މުއައްސަސާތަކުގެ ބަދަހިކަން އިތުރުކުރުމަށްޓަކައި" ސަރުކާރާއި ގާނޫނު ހަދާ މަޖިލީހާ ދެމެދު އޮންނަ ގުޅުން ވަރުގަދަކުރުމާ ގުޅޭގޮތުން ވަނީ ވާހަކަދައްކަވާފަ އެވެ. މީގެ އިތުރުން، އާންމު ރައްޔިތުންނާއި ގެދޮރު ގެއްލިފައިވާ މީހުންނާ ދެކޮޅަށް ހޫޘަިން ހިންގަމުންދާ ކަމަށް ތުހުމަތުކުރެވޭ ލާނުސާނީ އަމަލުތަކާ ގުޅޭގޮތުން ވެސް މި ބައްދަލުވުމުގައި މަޝްވަރާކުރެއްވި އެވެ.

ބޮޑުވަޒީރު އަލް-ޒިންދާނީ ވިދާޅުވި ގޮތުގައި، ހޫޘީންގެ އަސްކަރީ ހަރަކާތްތަކަކީ މިހާރު ހަމައެކަނި ގައުމުގެ އެތެރޭގެ އަސްކަރީ މައްސަލައެއް ނޫނެވެ. އަދި އެއީ ގައުމީ އަދި ސަރަހައްދީ ސަލާމަތަށް އޮތް "ޖުމްލަ ނުރައްކަލެއް" ކަމަށް އޭނާ ސިފަކުރެއްވި އެވެ. މި މޭރުމުން ވާހަކަދައްކަވަމުން އޭނާ ވަނީ، އީރާނުން އެ މިލިޝިއާއަށް "ސިސްޓަމެޓިކްކޮށް އެހީތެރިކަން ފޯރުކޮށްދޭ" ކަމަށާއި، ސަރަހައްދީ ސަލާމަތާއި ބައިނަލްއަގުވާމީ މަސްލަހަތުތަކަށް ނުރައްކާ ކުރުމަށްޓަކައި ޔަމަނުގެ ބިމާއި ކަނޑުގެ ސަރަހައްދު "ޕްލެޓްފޯމެއްގެ" ގޮތުގައި ބޭނުންކުރަމުންދާ ކަމަށް ވިދާޅުވެފަ އެވެ.

ސައުދީ އަރަބިއްޔާގެ ސަރަހައްދުތަކަށް ހޫޘީން ދެމުންދާ މިސައިލް އަދި ޑްރޯން ހަމަލާތަކަކީ، ޔަމަނުގެ ހުޅަނގު އައްސޭރީގައި ހިންގަމުންދާ އަސްކަރީ ހަރަކާތްތަކާ ވަކިކުރެވޭނެ ކަންކަން ނޫން ކަމަށް ބޮޑުވަޒީރު ވިދާޅުވި އެވެ. އަދި މި ދެ ކަމަކީ ވެސް ޔަމަނުގެ ބޭރަށް ފެތުރިފައިވާ، އީރާނުގެ އެހީތެރިކަމާއެކު ހިންގާ ފަނާކުރަނިވި މަޝްރޫއެއްގެ ބައެއްގެ ގޮތުގައި އޭނާ ސިފަކުރެއްވި އެވެ.