މެދުއިރުމަތީ ހަނގުރާމަ

މިސްރުގެ ރައީސް އަބްދުލް ފައްތާހް އަލް-ސީސީ، އެމެރިކާގެ ސީއައިއޭގެ ޑިރެކްޓަރު ޖޯން ރެޓްކްލިފްއާ ބައްދަލުކުރެއްވުން

މިސްރުގެ ރައީސް އަބްދުލް ފައްތާހް އަލް-ސީސީ، އެމެރިކާގެ ސީއައިއޭގެ ޑިރެކްޓަރު ޖޯން ރެޓްކްލިފްއާ ބައްދަލުކުރައްވައި، ޣައްޒާގެ ހަނގުރާމަ ހުއްޓާލުމުގެ އެއްބަސްވުމުގެ ދެވަނަ މަރުހަލާ ތަންފީޒުކުރުމުގެ މުހިންމުކަމާ ގުޅޭގޮތުން މަޝްވަރާކުރައްވައިފި އެވެ.

މިސްރުގެ ރިޔާސީ އިދާރާއިން ނެރުނު ބަޔާނެއްގައި ރައީސް ސީސީ ވިދާޅުވީ، ޣައްޒާގައި ގާއިމުކޮށްފައިވާ ހަނގުރާމަ ހުއްޓާލުމުގެ އެއްބަސްވުން އިތުރަށް ވަރުގަދަކޮށް، އާންމު ރައްޔިތުން ހިމާޔަތްކުރުމަށާއި އެއްވެސް ހުރަހެއް ނެތި ޣައްޒާއަށް ބޭނުންވާ އިންސާނީ އެހީ ފޯރުކޮށްދިނުން ކަށަވަރުކުރުމަށްޓަކައި ދެން އަޅަންހުރި ފިޔަވަޅުތައް އެޅުމުގެ ވަގުތު ޖެހިފައިވާ ކަމަށެވެ. 

ޣައްޒާގެ ހަނގުރާމަ ހުއްޓާލުމުގެ އެއްބަސްވުމުގެ ދެވަނަ މަރުހަލާގައި، ޣައްޒާގައި ފަލަސްތީނުގެ އައު ސަރުކާރެއް ގާއިމުކުރުމުގެ އިތުރުން، އެ ސަރަހައްދަކީ ހަތިޔާރު ނެތް ތަނަކަށް ހަދައި، ޣައްޒާ އަލުން އާރާސްތުކުރުމުގެ މަސައްކަތް ފެށިގެންދާނެ އެވެ.

2025 ވަނަ އަހަރުގެ އޮކްޓޫބަރު މަހު ޣައްޒާއާ ގުޅޭގޮތުން ވެވުނު އެއްބަސްވުމަށް މަގުފަހިވި ހަނގުރާމަ ހުއްޓާލުމުގެ މަޝްވަރާތަކުގައި މިސްރުން ވަނީ މުހިންމު އިސް ދައުރެއް އަދާކޮށްފަ އެވެ.

އެމެރިކާގެ ސީއައިއޭ އާއި މިސްރުގެ ޖެނެރަލް އިންޓެލިޖެންސް ސަރވިސްއަކީ ސަލާމަތީ ކަންކަމާއި ޓެރަރިޒަމާ ދެކޮޅަށް ކުރާ މަސައްކަތްތަކުގެ އިތުރުން، ރޭވުންތެރިކަމާއެކު ހިންގާ ބައިނަލްއަގުވާމީ ކުށްތަކާ ދެކޮޅަށް މަސައްކަތް ކުރުމުގައި ގާތް ގުޅުމެއް ބާއްވަމުން އަންނަ ދެ އިދާރާ އެވެ.

އެމެރިކާގެ އަސްކަރީ މަރުކަޒުތައް ބޭނުންކޮށްގެން އީރާނަށް ދޭ ހަމަލާތައް އަލުން ފަށައިފިނަމަ، އެކަމުގައި އެމެރިކާއަށް އެހީތެރިވާ މެދުއިރުމަތީގެ ގައުމުތަކަކީ އެ ޖަރީމާގައި ބައިވެރިވާ ބައެއްގެ ގޮތުގައި ބަލާނެ ކަމުގެ އިންޒާރު އީރާނުގެ އަސްކަރީ މައި މަރުކަޒުން ދީފި އެވެ.

އީރާނުގެ ޚާތަމް އަލް-އަންބިޔާ މަރުކަޒުން ނެރުނު ބަޔާނެއްގައި ބުނެފައިވަނީ، އިސްރާއީލުން އޮޅުވާލައިގެންނާއި ރޭވުންތެރިކަމާއެކު ފެށި، އަދި މަކަރާއި ހީލަތުގެ ތެރެއިން ކުރިއަށްދާ ހަނގުރާމައިގައި އެމެރިކާއަށް ކުރިމަތިވަމުންދާ ނާކާމިޔާބީތައް ފޮރުވުމަށާއި، ދޮގު ކާމިޔާބީތަކެއް ދެއްކުމަށް އެ ގައުމުން މަސައްކަތް ކުރަމުންދާ ކަމަށް މައުލޫމާތު ލިބިފައިވާކަމަށާއި ސަރަހައްދީ ބައެއް ގައުމުތަކުގެ އެއްބާރުލުމާއެކު، ޔޫރަޕްގެ ގައުމެއްގައި ބޭއްވި ގުޅިފައިވާ ބައްދަލުވުމެއްގައި، އީރާނާ ދެކޮޅަށް އަލުން ފިޔަވަޅުތައް އެޅުމަށް އެމެރިކާއިން ނިންމާފައިވާކަމަށެވެ.

 އެހެންކަމުން ސަރަހައްދީ ގައުމުތަކުން އީރާނާ މެދު ގެންގުޅޭ ދެފުށް ފެންނަ ސިޔާސަތުތައް ދޫކޮށް، އެމެރިކާ އިން އީރާނާ ދެކޮޅަށް ހިންގާ އުދުވާނުގައި ބައިވެރިވެއްޖެނަމަ، އެއީ އެ ނުބައި އަމަލުގައި ބައިވެރިވުން ކަމަށް ބަލާނެ ކަމަށެވެ. އަދި އެފަދަ ހާލަތެއްގައި، އީރާނުގެ އަސްކަރިއްޔާއިން އެ ގައުމުތަކާ މެދު އެއްވެސް ވަރަކަށް ކެތްތެރިކަން އިސްކުރާނެ ކަމަށް އުންމީދުކޮށްގެން ނުވާނެ ކަމަށް ވެސް އެ ބަޔާނުގައި އިންޒާރު ދީފައިވެ އެވެ.

އީރާނުގެ މަޖިލީހުގެ ރައީސް މުޙައްމަދު ބާގިރު ގާލީބާފް، ހުރްމުޒް ކަނޑުއޮޅިއާ ގުޅޭގޮތުން ތެހެރާނުން ގެންގުޅޭ ސިޔާސަތު އަލުން ތަކުރާރު ކުރައްވައިފި އެވެ. މިދިޔަ ޖޫން މަހު ސޮއިކުރި ނަމަވެސް މިހާރު އަމަލުކުރުން ހުއްޓިފައިވާ ސުލްހައިގެ އެއްބަސްވުމުގެ ދަށުން އެމެރިކާއިން ފުރިހަމަކުރަންޖެހޭ ކަންކަން ފުރިހަމަކުރަންދެން އިގްތިސާދީ ގޮތުން މުހިންމު މި ކަނޑުއޮޅި ބަންދުކޮށްފައި އޮންނާނެ ކަމަށް އޭނާ ވިދާޅުވި އެވެ.

އީރާނުގެ މަޖިލީހުގައި ވާހަކަދައްކަވަމުން ގާލީބާފް އިތުރަށް ވިދާޅުވީ، އީރާނުން ބޭނުންވާ ކަންކަމާއި ޝަރުތުތައް މެދުވެރިން މެދުވެރިކޮށް އިދިކޮޅު ފަރާތްތަކަށް ވަރަށް ސާފުކޮށް އަންގާފައިވާނެ ކަމަށެވެ.

މީގެއިތުރުން، އޮޅުވާލުމާއި އެއްފަރާތުން ކަންކަން މަޖުބޫރުކުރުވުމުގެ ފުރުސަތު މިހާރު ބަންދުވެފައިވާކަން ދުޝްމަނުންނަށް ވަރަށް ރަނގަޅަށް އެނގޭނެ ކަމަށް އޭނާ ވިދާޅުވި އެވެ. އަދި އީރާނުން ހުށަހަޅާފައިވާ ޝަރުތުތައް ފުރިހަމަވެ، އީރާނުގެ ރައްޔިތުންގެ ގާނޫނީ ހައްގުތައް ބަލައިގަނެ، އެމެރިކާއިން ވެފައިވާ އިގުރާރުތައް ފުރިހަމަކުރަންދެން، ކުރިން އޮތް މަޝްވަރާތަކުގެ މޭޒަށް އެނބުރި ދިއުމެއް ނުވަތަ ހުރްމުޒް ކަނޑުއޮޅި ހުޅުވުމެއް ނޯންނާނެ ކަމަށްވެސް ގާލީބާފް ވިދާޅުވި އެވެ.

ގައުމުތަކުގެ ތެޔޮ ރައްކާކޮށްފައި ހުރި މިންވަރު ބަލައި، ސްޓްރެޓީޖިކް ރިޒާވްތަކުން ތެޔޮ ދޫކުރުމާ މެދު މަޝްވަރާކުރުމަށް، ކުރިއަށް އޮތް ހަފުތާތަކުގައި ޖީ7 ގެ ގައުމުތަކުގެ ހަކަތައާ ބެހޭ ބައްދަލުވުމެއް ބޭއްވެވުމަށް ފްރާންސްގެ ރައީސް އިމަނުއެލް މެކްރޮން ނިންމަވައިފި އެވެ.

ހަކަތައިގެ ދަތިކަމާ ގުޅިގެން މެކްރޮން ވަނީ ހުރްމުޒް ކަނޑުއޮޅި ބަންދުކުރުމާއި އީރާނަށް އަމާޒުކޮށް އެމެރިކާއާއި އިސްރާއީލުން ދެމުންދާ ހަމަލާތަކުގެ ސަބަބުން ތެލުގެ އަގުތައް ތާރީޚީ މިންވަރަކަށް އުފުލިފައިވާކަން ފާހަގަކުރައްވާފަ އެވެ. 

މެކްރޮން ވިދާޅުވީ މި ހަނގުރާމައަކީ ފަރަންސޭސިވިލާތުން އިޚްތިޔާރުކުރި ހަނގުރާމައެއް ނޫން ކަމަށެވެ. އަދި ކުރިއަށް އޮތް ކުރު މުއްދަތެއްގެ ތެރޭގައި އީރާނާއި އެމެރިކާއާ ދެމެދު އެއްބަސްވުމަކަށް އާދެވިދާނެ ކަމަށް ގަބޫލުނުކުރެއްވޭ ކަމަށާއި، ހުރްމުޒް ކަނޑުއޮޅި ހުޅުވުމުގެ ބާރު ފަރަންސޭސިވިލާތުގެ އަތްމަތީގައި ނެތް ކަމަށެވެ. 

ހަކަތައިގެ އަގުތައް އުފުލުމުގެ ސަބަބުން އިންފްލޭޝަން ވަރަށް ބޮޑަށް އިތުރުވަމުންދާތީ، ތެލުގެ އަގު ބޮޑުވުމާއި ސަޕްލައިއަށް ކުރިމަތިވެފައިވާ ހުރަސްތަކުގެ ސަބަބުން ކުރާ ނޭދެވޭ އަސަރުތައް ކުޑަކުރުމަށް ފްރާންސްގެ ސަރުކާރުން ދަނީ ފިޔަވަޅުތައް ވެސް އަޅަމުންނެވެ. އެގޮތުން ތެޔޮ ސާފުކުރާ މިންވަރު އިތުރުކުރުމަށާއި އުފެއްދުންތެރިކަން އެންމެ މަތީ މިންވަރެއްގައި ހިފެހެއްޓުމަށްޓަކައި މެއިންޓެނަންސް މަސައްކަތްތަކަށް ބަދަލު ގެނައުމުގެ ހުއްދަ ވެސް އެ ޤައުމުގެ ސަރުކާރުން މިހާރު ވަނީ ދީފަ އެވެ.

މީގެއިތުރުން މަސްވެރިންނާއި ދަނޑުވެރިންނާއި އިމާރާތްކުރުމުގެ ދާއިރާ އަދި އާންމު މަސައްކަތްތަކާ ބެހޭ ކުންފުނިތަކަށް ދެމުންދާ އެހީތެރިކަން މި އަހަރުގެ ނިޔަލަށް އިތުރުކުރުމަށް އެ ގައުމުގެ ބޮޑުވަޒީރު ވަނީ ވަޒީރުންގެ ކިބައިން އެދިވަޑައިގެންފަ އެވެ.

ފަލަސްތީނުގެ ރަސްމީ ނިއުސް އެޖެންސީ، "ވާފާ" އިން ރިޕޯޓްކޮށްފައިވާ ގޮތުގައި، އިސްރާއީލުން ހިފާފައިވާ ހުޅަނގު އައްސޭރީގެ ވާދީ އަލް-ޝާއިރު ސަރަހައްދުގައި މިއަދު ހެނދުނު އިސްރާއީލުގެ ވަޒަންވެރިން ދިން ހަމަލާއެއްގައި ފަލަސްތީނުގެ ދެ މީހަކު ވަނީ ޒަޚަމްވެފަ އެވެ.

ވާފާ ނިއުސް އެޖެންސީން ބުނި ގޮތުގައި، މި ހަމަލާގައި ޒަޚަމްވި މީހުންގެ ތެރެއިން އެކަކުގެ ފަލަމަސްގަނޑަށް ވަޅިން ހަމަލާދީފައިވާއިރު، އަނެއް މީހާގެ ބޯ ވަނީ ވަރަށް ބޮޑަށް ޒަޚަމްވެފަ އެވެ. ފަލަސްތީނުގެ ރެޑް ކްރެސެންޓުން ވަނީ މި ދެ މީހުންނަށް ބޭނުންވާ ސިއްހީ ފަރުވާ ފޯރުކޮށްދީފަ އެވެ.

މި ހަމަލާއަކީ ހޮނިހިރު ދުވަހު ހުޅަނގު އައްސޭރީގެ އެކި ސަރަހައްދުތަކުގައި އިސްރާއީލު ސިފައިން ހިންގި އަސްކަރީ ރޭޑްތަކާއި، މީހުން ހައްޔަރުކުރުމުގެ އަމަލުތަކުގެ އިތުރުން، އިސްރާއީލުގެ ވަޒަންވެރިން ފަލަސްތީނު ރައްޔިތުންނަށް އަމާޒުކޮށް ދެމުންދާ ހަމަލާތަކުގެ ތެރެއިން ހިނގި ހާދިސާއެކެވެ.

އެމެރިކާގެ ރައީސް ޑޮނަލްޑް ޓްރަމްޕް ހަފުތާ ބަންދު ހޭދަކުރެއްވުމަށް ކޭމްޕް ޑޭވިޑަށް ކުރެއްވި ދަތުރުފުޅު ކުރުކޮށްލެއްވުމަށްފަހު، އުންމީދުކުރި ވަގުތަށްވުރެ ކުރިން ވައިޓް ހައުސްއަށް އެނބުރި ވަޑައިގެންފި އެވެ.

ރައީސް ޓްރަމްޕްގެ ޕްލޭނަށް މި ބަދަލު ގެންނެވި ސަބަބެއް އެމެރިކާ ސަރުކާރުން ހާމަކޮށްފައެއް ނުވެ އެވެ. ތާވަލު ކުރެވިފައިވާ ގޮތުންނަމަ، ރައީސް ޓްރަމްޕް ކޭމްޕް ޑޭވިޑުން ފުރާވަޑައިގަންނަވަން އޮތީ އެ ގައުމުގެ ގަޑިން އާދީއްތަ ދުވަހުގެ ފަހުގެ ވަގުތެއްގަ އެވެ.

މޫސުމީ ހާލަތަށް އަންނަ ބަދަލުތަކާ ގުޅިގެން، ހަފުތާ ބަންދުގައި ރައީސް ކުރައްވާ ދަތުރުފުޅުތަކުގެ ތާވަލަށް ބަދަލު އައުމަކީ އާންމުކޮށް ހިނގާ ކަމެކެވެ. މޫސުމާ ބެހޭ އިދާރާތަކުން ލަފާކޮށްފައިވާ ގޮތުގައި، ފަރުބަދަަމަތީ ސަރަހައްދެއް ކަމަށްވާ ކޭމްޕް ޑޭވިޑަށް ބޯކޮށް ވާރޭވެހި، ގުގުރުމާއެކު ތޫފާނީ މޫސުމެއް ކުރިމަތިވާނެ އެވެ.

ރައީސް ޓްރަމްޕް އެނބުރި ވައިޓް ހައުސްއަށް ވަޑައިގެންފައި މިވަނީ، ސައުދީ އަރަބިއްޔާއާއި ޔަމަނުގެ ހޫޘީންނާ ދެމެދު އޮތް ހަމަނުޖެހުންތައް ވަރަށް ބޮޑަށް އިތުރުވެގެން ހިނގައިދާނެ ކަމަށް ބުނެ، މެދުއިރުމަތީގައި ތިބި އެމެރިކާގެ ރައްޔިތުން ސަމާލުވުމަށް އެމެރިކާގެ ސްޓޭޓް ޑިޕާޓްމަންޓުން އިންޒާރު ނެރެފައިވާ ދަނޑިވަޅެއްގަ އެވެ.

2026 ސެޕްޓެމްބަރު 19ގައި އެމެރިކާގެ ރައީސް ޑޮނަލްޑް ޓްރަމްޕް ވޮޝިންގޓަން ޑީސީގައި ހުންނަ ވައިޓް ހައުސްއަށް އެނބުރި ވަޑައިގަންނަވަނީ

އީރާނުގެ ރިވޮލިއުޝަނަރީ ގާޑް ކޯ (އައިއާރުޖީސީ) އާއި އެ ގައުމުގެ އަސްކަރިއްޔާ އަދި ސަލާމަތީ ބާރުތަކުން އެންމެ މަތީ އެލާޓް ލެވެލް ކަމަށްވާ "ކޯޑް 100" ނެރެފައިވާ ކަމަށް ރިޕޯޓްތައް ބުނެފި އެވެ. މި އެލާޓަކީ އީރާނަށް ކުއްލި ހަމަލާއެއް އަތުވެދާނެ ކަމަށް އެ ގައުމުގެ ކަމާބެހޭ ފަރާތްތަކަށް ގަބޫލުކުރެވޭ ހާލަތްތަކުގައި ނެރޭ އެލާޓެކެވެ.

އެމެރިކާގެ ރައީސް ޑޮނަލްޑް ޓްރަމްޕް ކޭމްޕް ޑޭވިޑްގައި ހޭދަކުރައްވަމުން ގެންދެވި ހަފުތާ ބަންދު ކުއްލި ގޮތަކަށް މެދުކަނޑާލެއްވުމަށްފަހު، އެއްވެސް ސަބަބެއް ހާމަކުރެއްވުމެއް ނެތި ހޮނިހިރު ދުވަހުގެރޭ ވަނީ ވައިޓް ހައުސްއަށް އެނބުރި ވަޑައިގެންފަ އެވެ. މީގެ އިތުރުން، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވެސް ވަނީ އޭނާ އެމެރިކާއަށް ކުރައްވަމުން ގެންދަވާ ދަތުރުފުޅު ކުރުކޮށްލައްވާފަ އެވެ. މި ވަގުތު ޓްރަމްޕާއި ނަތަންޔާހޫ ބައްދަލުކުރެއްވުމަށް އެއްވެސް ތާވަލެއް ހަމަޖެހިފައެއް ނުވެ އެވެ.

މި ހަމަނުޖެހުންތަކާ ގުޅިގެން މެދުއިރުމަތީގެ ގައުމުތަކުގައި ހުރި އެމެރިކާގެ އެމްބަސީތަކުން ވަނީ ސަލާމަތީ އިންޒާރުތައް ނެރެފަ އެވެ. މީގެ ތެރޭގައި އިރާގު، ބަހްރޭން، އޮމާން، ސައުދީ އަރަބިއްޔާ، ގަތަރު، ލުބުނާން، ކުވެއިތު އަދި އުރުދުން ހިމެނެ އެވެ. އެ އެމްބަސީތަކުން ވަނީ "ލަފާނުކުރެވޭ ފަދަ ހަމަނުޖެހުންތަކެއް" ހިނގައިދާނެ ކަމަށާއި، ފްލައިޓްތައް ކެންސަލްވުމާއި ވައިގެ ސަރަހައްދުތައް ބަންދުކުރުން އެކަށީގެންވާ ކަމަށް ބުނެ އިންޒާރު ދީފަ އެވެ. އެމެރިކާގެ ސްޓޭޓް ޑިޕާޓްމަންޓުން ބުނެފައިވަނީ މި މަސްލަހަތު ގޯސްވަމުންދާ ދިޔުން "ވަރަށް ހަލުވިކަމާއެކު އިތުރަށް ގޯސްވެގެންދިއުމުގެ ފުރުސަތު އެބައޮތް" ކަމަށެވެ.

އިނގިރޭސިވިލާތުގެ އާރް.އޭ.އެފް ފެއަރފޯޑުން އެމެރިކާގެ ބީ-1ބީ ލާންސަރ މަރުކާގެ ބޮންއަޅާ ބޯޓެއް ހޮނިހިރު ދުވަހުގެރޭ ފުރައިފި

އިނގިރޭސިވިލާތުގެ އާރް.އޭ.އެފް ފެއަރފޯޑުން އެމެރިކާގެ ބީ-1ބީ ލާންސަރ މަރުކާގެ ބޮންއަޅާ ބޯޓެއް ހޮނިހިރު ދުވަހުގެރޭ ފުރައިފި އެވެ. ފުލް އާފްޓަރބާނަރސް ބޭނުންކޮށްގެން މި ބޯޓު އުދުއްސާލާފައިވާއިރު، ބެލެވޭ ގޮތުގައި މި ބޯޓު ދަތުރުކުރަމުންދަނީ މެދުއިރުމައްޗަށެވެ.

ބޮންއަޅާ މި ބޯޓު އުދުއްސާލާއިރު ބޯޓުގެ ބާރުގަދަ އާފްޓަރބާނަރސްތައް ބޭނުންކުރުމަކީ، އެ ބޯޓުގައި ގިނަ އަދަދެއްގެ ހަތިޔާރު އުފުލަމުންދާކަން އަންގައިދޭ ނިޝާނެކެވެ.

މެދުއިރުމަތީގެ މަސްރަހު ނުތަނަވަސްވަމުންދާތީ، އެ ސަރަހައްދުގެ ގައުމުތަކުގައި ހުރި އެމެރިކާގެ އެމްބަސީތަކުގެ ސަލާމަތީ ކަންކަން ވަރުގަދަކުރުމަށް އެމެރިކާ ސަރުކާރުން މިހާރު ވަނީ އިންޒާރު ނެރެފަ އެވެ.

ބައެއް ރިޕޯޓުތައް ބުނާގޮތުން، ޔަމަނުގެ ހޫޘީން ސައުދީ އަރަބިއްޔާއަށް ދިން ހަމަލާތަކާ ގުޅިގެން، އެ ޖަމާއަތާ ދެކޮޅަށް އެމެރިކާއިން ވަރުގަދަ ހަމަލާތަކެއް ދޭން ފަށާފާނެ އެވެ.

އެމެރިކާގެ ހަމަލާތަކަށް ރައްދު ދިނުމުގެ ގޮތުން، އޭޝިއާ އާއި ޔޫރަޕް ގުޅުވައިދޭ މުހިންމު ކަނޑުގެ މަގެއް ކަމަށްވާ ބާބުލް މަންދަބް ކަނޑުއޮޅި ބަންދުކުރުމުގެ ފުރުސަތު ހޫޘީންނަށް އެބައޮތެވެ.

ސޫރިޔާގެ ދިިމިޝްގުގައި 13 ސެޕްޓެމްބަރު 2026 ބޭއްވި ނޫސްވެރިންގެ ބައްދަލުވުމެއްގައި، ތުރުކީގެ ޚާރިޖީ ވަޒީރު ހާކާން ފިދާން ބައިވެރިވެވަޑައިގަންނަވަނީ

ޔަމަނުގެ ހޫޘީން މެދުނުކެނޑި ދެމުންދާ ހަމަލާތަކާ ގުޅިގެން ސައުދީ އަރަބިއްޔާއަށް އަސްކަރީ އެހީތެރިކަން ބޭނުންވެދާނެ ކަމަށާއި، ޕާކިސްތާނު ވެސް ހިމެނޭ ތިން ގައުމުގެ ދިފާއީ އެއްބަސްވުމުގެ ދަށުން އެ އެހީތެރިކަން ފޯރުކޮށްދިނުމަށް ތުރުކީ އޮތީ ތައްޔާރަށް ކަމަށް އެ ގައުމުގެ ޚާރިޖީ ވަޒީރު ހާކާން ފިދާން ހޮނިހިރު ދުވަހު ވިދާޅުވެއްޖެ އެވެ.

"ސައުދީ އަރަބިއްޔާގެ ސަރަހައްދީ ނަޒާހަތްތެރިކަމާއި މިނިވަންކަމަށް ވަރަށް ނުރައްކާތެރި ހަމަލާތަކެއް އަމާޒުވަމުންދާކަން އަޅުގަނޑުމެންނަށް ފާހަގަކުރެވޭ. އަޅުގަނޑުމެންގެ އިއްތިހާދުގެ އެއްބަސްވުމުގެ ދަށުން މިކަމުގައި ސައުދީއާއެކު ސާބިތުކަމާއެކު މިތިބީ އެއްބައިވަންތަކަންމަތީގައި. ޚާއްސަކޮށް ފަންނީ ބައެއް ކަންކަމުގައި އެ ގައުމަށް އަސްކަރީ އެހީތެރިކަން ބޭނުންވެދާނެ. އެފަދަ އެހީތެރިކަން ފޯރުކޮށްދިނުމުގައި އަޅުގަނޑުމެންގެ އެއްވެސް މައްސަލައެއް ނެތް،" އެންޓީވީ ބްރޯޑްކާސްޓަރަށް ދެއްވި ބަސްދީގަތުމެއްގައި ފިދާން ވިދާޅުވި އެވެ.

ސައުދީ އަރަބިއްޔާއަށް އަމާޒުކޮށް ހޫޘީން ދެމުންދާ ހަމަލާތަކުގެ ބަދަލުހިފުމުގެ ގޮތުން، ޔަމަނުގެ ހޫޘީންނާ ދެކޮޅަށް ފުޅާދާއިރާއެއްގައި އަސްކަރީ އޮޕަރޭޝަނެއް ހިންގުމަށް މަޝްވަރާކޮށް، އެމެރިކާއިން ތައްޔާރުވަމުންދާކަމަށް ސީއެންއެން އިން ރިޕޯޓްކޮށްފި އެވެ. 

މީގެއިތުރުން ސައުދީ ސަރުކާރުގެ ކުރީގެ އެޑްވައިޒަރު ނަވާފް އުބައިދު އަލްޖަޒީރާ އަށް މައުލޫމާތު ދެއްވަމުން ވިދާޅުވީ، ހޫޘީންނާ ދެކޮޅަށް ތަރުތީބު ކުރެވިފައިވާ، ދެމެހެއްޓެނިވި، އަދި ވަރުގަދަ ވައިގެ ހަމަލާތަކެއް ދިނުމަށް ސައުދީ އަރަބިއްޔާއިން ތައްޔާރުވަމުންދާ ކަމަށެވެ. އަދި ސައުދީން އެމެރިކާގެ ކިބައިން އެދިފައިވަނީ މައިގަނޑު ގޮތެއްގައި ޖާސޫސީ މައުލޫމާތު ހޯދުމަށާއި ހަމަލާދޭނެ އަމާޒުތައް ކަނޑައެޅުމުގެ ދާއިރާއިންނެވެ.

"ސައުދީން އެމެރިކާގެ ކިބައިން އެދުނީ ހަތިޔާރަކަށް ނޫން، އިތުރު އަސްކަރީ ހަތިޔާރަކަށް އެ ގައުމަކުން ބޭނުމެއް ނުވޭ." އުބައިދު ވިދާޅުވި އެވެ. 

އޭނާ އިތުރަށް ވިދާޅުވީ، ސައުދީން ބޭނުންވަނީ ހަމަލާދޭނެ އަމާޒުތައް ދެނެގަތުމާއި އެ ތަންތަން ކަށަވަރުކުރުމުގެ އެހީތެރިކަން ކަމަށެވެ. އަދި މިފަދަ އަސްކަރީ ހަރަކާތެއް ދެމެހެއްޓުމަށްޓަކައި ބޭނުންވާ ބިމުގެ ޗާޓުތައް ދިރާސާކުރުމާއި، މެޕް ކުރުމުގެ އިތުރުން ފަންނީ އެހީތެރިކަން ބޭނުންވާކަން އޭނާ ފާހަގަކުރެއްވި އެވެ.

މީގެ އިތުރުން، މި ތައްޔާރީތަކުގެ ސަބަބުން މިހާރުވެސް އޮޕަރޭޝަންތައް ކުރިއަށްވުރެ ބޮޑަށް ވިލަރެސްކުރެވެން ފަށާފައިވާ ކަމަށް އޭނާ ވިދާޅުވިއެވެ. ސައުދީ އަރަބިއްޔާއާއި އެ ގައުމުގެ އިއްތިހާދީން ގުޅިގެން ހޫޘީންގެ ހަމަލާތަކަށް އަސްކަރީ ޖަވާބެއް ދިނުމަށް ތައްޔާރުވަމުންދާއިރު، ރިޔާޟް އޮތީ އެކަނިވެރިވެފައި ކަމަށް ބެލެވުނަސް ހަގީގަތަކީ އެއީ ނޫން ކަމަށް އޭނާ ވަނީ ވިދާޅުވެފަ އެވެ.

އަލްޖަޒީރާއާ ވާހަކަދައްކަވަމުން އޭނާ ވިދާޅުވީ، ހޫޘީންގެ އަމަލުތަކަށް އެކަށީގެންވާ ރައްދުދޭނެ ގޮތަކާ މެދު ގައުމުތަކުގެ މެދުގައި އިއްތިހާދެއް އުފެދެމުންދާ ކަމަށެވެ. މި ރައްދު ހަމަލާ ވަރަށް އަވަހަށް އަންނާނެ ކަމަށާއި މިއީ އެއްގަމާއި، ކަނޑާއި، ވައިގެ މަގުން ދެވޭ ވަށައިޖެހޭ ހަމަލާތަކަކަށް ވާނެ ކަމަށް އޭނާ ވިދާޅުވި އެވެ.

މި ދިރާސާވެރިޔާ ވިދާޅުވި ގޮތުގައި، ބައެއް ގައުމުތަކުން މިހާރު ވެސް ވަނީ ސައުދީ އަރަބިއްޔާއަށް ހަތިޔާރުގެ ނިޒާމުތައް ފޮނުވަން ފަށާފަ އެވެ. އަދި ރަތް ކަނޑަށް ހަނގުރާމަމަތީ ބޯޓުތައް ފޮނުވަމުންދާއިރު، މިކަމުގައި ތުރުކީއަކީ މުހިންމު ބައިވެރިއެއްގެ ގޮތުގައި އޭނާ ފާހަގަކުރެއްވި އެވެ. މީގެ އިތުރުން، މިސްރަކީ ވެސް ވަކި މިންވަރަކަށް މި އޮޕަރޭޝަނުގައި ބައިވެރިވެދާނެ ގައުމެއް ކަމަށް އޭނާ ވިދާޅުވި އެވެ. އަދި ސައުދީ އާއި ޔަމަން ގުޅޭ ބޯޑަރު ސަރަހައްދުގައި އިތުރު ސިފައިން ބައިތިއްބަމުންދާ ކަމަށް ވެސް އޭނާ ވިދާޅުވި އެވެ.

ތެޔޮ އުފުލާ ބޯޓަކާއި ޖެޓުތަކެއް: ހޫޘީންގެ އަމަލުތަކަށް އެކަށީގެންވާ ރައްދުދޭނެ ގޮތަކާ މެދު ގައުމުތަކުގެ މެދުގައި އިއްތިހާދެއް ދަނީ އުފެދެމުން، މި ރައްދު ހަމަލާ ވަރަށް އަވަހަށް އަންނާނެ، މިއީ އެއްގަމާއި، ކަނޑާއި، ވައިގެ މަގުން ދެވޭ ވަށައިޖެހޭ ހަމަލާތަކަކަށް ވާނެ: އަލްޖަޒީރާގެ ދިރާސާވެރިއެއް

ކަނޑުދަތުރުފަތުރުގެ ރައްކާތެރިކަން ކަށަވަރުކުރުމަށްޓަކައި، ރަތްކަނޑާއި، ގަލްފް އޮފް އަދަން އަދި ބާބުލް މަންދަބު ހިމެނޭ ސަރަހައްދު ހިމާޔަތްކުރުމާ ގުޅޭގޮތުން ގިނަ ގައުމުތަކެއް އެކުވެގެން އުފައްދާފައިވާ ކަނޑުގެ ސިފައިންގެ ކޯލިޝަނުގެ ބައްދަލުވުމެއް ސައުދީ އަރަބިއްޔާއިން ބާއްވައިފި އެވެ.

މި މަޝްވަރާތައް ކުރިއަށް މިދަނީ، އީރާނުގެ މަދަދުލިބޭ ހޫޘީ ހަނގުރާމަވެރިން ދެމުންދާ ހަމަލާތަކުގެ ސަބަބުން، ދުނިޔޭގެ ތެލުގެ ވިޔަފާރީގައި އެންމެ މުހިންމު އެއް މަގަށް ނުރައްކާ ކުރިމަތިވެފައިވާ ދަނޑިވަޅެއްގަ އެވެ.

މި ކޯލިޝަނުގައި ޕާކިސްތާނާއި، ތުރުކީ އަދި ގަތަރު ހިމެނޭހެން ޖުމްލަ 14 ގައުމެއް ބައިވެރިވެ އެވެ.

މި ބައިނަލްއަގުވާމީ ކަނޑުގެ ދިފާއީ ކޯލިޝަނަކީ، ބާބުލް މަންދަބާއި، ރަތްކަނޑު އަދި ގަލްފް އޮފް އަދަންގެ ކަނޑުގެ ސަލާމަތަށް ކުރިމަތިވަމުންދާ ގޮންޖެހުންތަކާއި ނުރައްކާތަކާ ދެކޮޅަށް ގުޅިގެން މަސައްކަތްކުރުމަށް އުފައްދާފައިވާ ކޯލިޝަނެކެވެ. މި ކޯލިޝަނުގެ މައިގަނޑު މަގުސަދަކީ ކަނޑުދަތުރުފަތުރުގެ މިނިވަންކަން ކަށަވަރުކުރުމާއި، ބައިނަލްއަގުވާމީ ވިޔަފާރި މަގުތަކާއި ހަކަތަ ފޯރުކޮށްދޭ މަގުތައް ހިމާޔަތްކުރުމުގެ އިތުރުން، އެ ސަރަހައްދުގައި އޮތް ބައިނަލްއަގުވާމީ މަސްލަހަތުތަކުގެ ރައްކާތެރިކަން ދެމެހެއްޓުމެވެ.

އީރާނާ ދެކޮޅަށް އެމެރިކާއިން ކުރަމުންދާ ހަނގުރާމައިގެ ސަބަބުން، ދުނިޔޭގެ ތެލުގެ އެކްސްޕޯޓުގެ 20 އިންސައްތަ ހިއްސާކުރާ ހުރްމުޒް ކަނޑުއޮޅީގެ ދަތުރުފަތުރަށް ވަނީ ބުރޫއަރާފަ އެވެ. ހަމައެއާއެކު، ޔަމަނުގައި ހޫޘީން ހޯދަމުންދާ ކުރިއެރުންތަކުގެ ސަބަބުން ބާބުލް މަންދަބު ކަނޑުއޮޅީގެ ސަލާމަތަށް ވެސް ވަނީ ބޮޑެތި ނޭދެވޭ އަސަރުތަކެއް ކޮށްފަ އެވެ.

ސައުދީ އަރަބިއްޔާއަށް އެހީތެރިކަން ފޯރުކޮށްދިނުމުގައި ކޮންމެ ފަދަ ހާލަތަކަށް ދާންޖެހުނު ކަމުގައިވިޔަސް އެކަން ކުރާނެ ކަމަށް ޕާކިސްތާނުން ބުނޭ

ޕާކިސްތާނުން މި އިންޒާރު ދީފައި މިވަނީ ޔަމަނުގެ ހޫޘީ ހަނގުރާމަވެރިންގެ ކިބައިން ސައުދީ އަރަބިއްޔާ ދިފާއުކުރުމަށް އެގައުމުން ވީ ވައުދާ އެކުގަ އެވެ.

ޕާކިސްތާނުގެ އަސްކަރީ ވެރިން ވިދާޅުވީ، ސައުދީ އަރަބިއްޔާއަށް އެހީތެރިކަން ފޯރުކޮށްދިނުމުގައި ކޮންމެ ފަދަ ހާލަތަކަށް ދާންޖެހުނު ކަމުގައިވިޔަސް އެކަން ކުރާނެ ކަމަށެވެ. މިއީ ނޭޓޯގެ އުސޫލުން އުފައްދާފައިވާ އަސްކަރީ އިއްތިހާދުގެ ބާނީ މެންބަރުންގެ ގޮތުގައި މިދިޔަ މަހު ދެ ގައުމުން ގުޅުނު ފަހުން، ޕާކިސްތާނުން އެ ގައުމުގެ އަސްކަރީ ބާރު ދެއްކި އެންމެ ވަރުގަދަ ފަހަރެވެ. 

ޕާކިސްތާނުގެ ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ، ސައުދީ އަރަބިއްޔާގެ ސަރަހައްދީ ނަޒާހަތްތެރިކަމަށް އުނިކަން އަންނަ ފަދަ ކޮންމެ ކަމަކީ ޕާކިސްތާނުން ނުހަނު ކަންބޮޑުވާ ކަމެއް ކަމަށެވެ. އަދި ސައުދީގެ މުގައްދަސް ބިންތަކަށް ނުރައްކަލެއް ކުރިމަތިވެއްޖެ ނަމަ، އެ ގައުމުގެ ދިފާއުގައި ޕާކިސްތާނުން ވަރުގަދަ ފިޔަވަޅުތަކެއް އަޅާނެ ކަމުގެ ޔަގީންކަން ވެސް އެ ބަޔާނުގައި ވަނީ ދީފަ އެވެ.

މި ނިންމުމަކީ ސައުދީ އަރަބިއްޔާ އިސްވެ އޮވެ ޔަމަނުގައި ހަރަކާތްތެރިވާ ކޯލިޝަން ފައުޖުތަކާ ގުޅުމަށް ޕާކިސްތާނުން ގެންގުޅޭ ސިޔާސަތަށް އައި ބޮޑު ބަދަލެއްގެ ގޮތުގައި މަސްރަހު ދިރާސާކުރާ ފަރާތްތަކުން ދެކެ އެވެ. މީގެ ކުރިން ޕާކިސްތާނުން މި ހަނގުރާމައިގައި އަމަލީގޮތުން ބައިވެރިވުމަށް ފަސްޖެހިފައިވީ ނަމަވެސް، ފަހަކަށް އައިސް ހޫޘީންގެ ފަރާތުން ސައުދީއަށް ދެމުންދާ ހަމަލާތައް އިތުރުވުމާ ގުޅިގެން ޕާކިސްތާނުގެ ރޫހު މިހާރު ވަނީ ބަދަލުވެފަ އެވެ.

ޕާކިސްތާނުގެ ބޮޑުވަޒީރުގެ އޮފީހުން ހާމަކޮށްފައިވާ ގޮތުގައި، ސައުދީ ރަސްގެފާނު ސަލްމާން ބިން އަބްދުލްއަޒީޒާ އެކު ބޭއްވި ފޯނު ކޯލެއްގައި، ސައުދީގެ ސަލާމަތާއި ރައްކާތެރިކަން ކަށަވަރުކުރުމަށް ޕާކިސްތާނުން ފުރިހަމަ އެއްބާރުލުން ދޭނެ ކަމަށް ވަނީ ވިދާޅުވެފަ އެވެ. މީގެ އިތުރުން، ޕާކިސްތާނުގެ އަސްކަރީ މަތީ ފަންތީގެ ވަފުދެއް ވަރަށް އަވަހަށް ސައުދީއަށް ޒިޔާރަތްކޮށް، ހާލަތު އިތުރަށް ދިރާސާކުރުމަށް ވެސް ވަނީ ހަމަޖެހިފަ އެވެ.

މި މައްސަލައިގައި ޕާކިސްތާނުގެ ގާނޫނު ހަދާ މަޖިލީހުގައި ވެސް ބަހުސް ކުރުމަށް ނިންމާފައިވާއިރު، ސަރުކާރުން މަސައްކަތް ކުރަމުންދަނީ ގައުމީ މަސްލަހަތާއި ސައުދީއާ އޮތް ގާތް ގުޅުމަށް ރިއާޔަތްކޮށް ގޮތްތަކެއް ނިންމުމަށެވެ. ޔަމަނުގެ ހޫޘީންނާ ދެކޮޅަށް ކުރާ ހަނގުރާމައިގައި ޕާކިސްތާނުން ބައިވެރިވެއްޖެ ނަމަ، މިއީ ސަރަހައްދީ ސިޔާސީ މަސްރަހަށް އަންނާނެ ބޮޑު ބަދަލަކަށް ވެގެންދާނެ އެވެ.

އީރާނުގެ އިސްލާމިކް ރިވޮލޫޝަނަރީ ގާޑް ކޯޕްސް (އައިއާރުޖީސީ) ގެ މާހިރުންތަކެއް ބާބުލް މަންދަބް ސަރަހައްދަށާއި، މުޚާ ބަނދަރާއި އެއާޕޯޓުގެ އިތުރުން މުޚާގެ އިރުމަތީގައި އޮންނަ ޖަބަލް އަލް-ނާރު ކޭމްޕަށް ޒިޔާރަތްކޮށްފި އެވެ.

ޔަމަނުގެ ހޫޘީ ހަނގުރާމަވެރިންގެ އަސްކަރީ ދެ މަސްދަރަކާ ހަވާލާދީ އޭއެފްޕީން ރިޕޯޓްކޮށްފައިވާ ގޮތުގައި، މުޚާ އާއި ބާބުލް މަންދަބް ފެންނަ ގޮތަށް ހުރި ފަރުބަދަތަކުގައި ބޮޑެތި ޓަނަލްތަކެއް ކޮނުމުގެ މަސައްކަތް އީރާނުގެ އެ މާހިރުން ވަނީ ބަލަހައްޓާފަ އެވެ. މީގެ އިތުރުން އެ ސަރަހައްދުގައި ހުރި ރާޑަރު ސިސްޓަމްތައް ބަލައި، އޭގެ ހާލަތު ވަޒަންކުރުމުގެ މަސައްކަތް ވެސް އެ ފަރާތްތަކުން ވަނީ ކޮށްފަ އެވެ.

ޚަބަރު ލިބޭ ގޮތުގައި އީރާނުގެ މި މާހިރުން އެ ސަރަހައްދުތަކަށް ގޮސްފައިވަނީ ހުދައިދާ މަގުންނެވެ. އަދި މިދިޔަ ބުރާސްފަތި ދުވަހާއި ހުކުރު ދުވަހާ ދެމެދު އެކި ވަގުތުތަކުގައި އެކި ސަރަހައްދުތަކަށް ވަކިވަކިން އެ މީހުން ޒިޔާރަތްކޮށްފައިވާ ކަމަށް ވެސް ރިޕޯޓްތައް ބުނެ އެވެ.

ޢަރަބިކަރައާއި އިރުމަތީ އެފްރިކާ ވަކިކޮށްދޭ އިސްތިރާތީޖީ ގޮތުން މުހިންމު ކަނޑުއޮޅިއެއް ކަމަށްވާ ބާބުލް މަންދަބުގެ ޔަމަނާވީ ފަޅީގައި، އެ ޤައުމުގެ މަސްވެރި އުޅަނދުފަހަރުތަކެއް ހަރަކާތްތެރިވަނީ

އީރާނުގެ ޚާރިޖީ ވަޒީރު އައްބާސް އަރަގްޗީ، ޕާކިސްތާނުގެ ދާޚިލީ ވަޒީރު މުއްސިން ނަގްވީ އާއެކު

ޕާކިސްތާނުގެ ދާޚިލީ ވަޒީރު މުހުސިން ނަގްވީ އަންނަ އާދީއްތަ ދުވަހު އީރާނަށް ރަސްމީ ދަތުރުފުޅެއް ކުރައްވާނެ ކަމަށް، އެ ގައުމުގެ ފޮރިން މިނިސްޓްރީގެ ތަރުޖަމާނު އިސްމާއީލް ބަގާއީ ދައުލަތުގެ މީޑިއާއަށް މައުލޫމާތު ދެއްވައިފި އެވެ.

ބަގާއީ ވިދާޅުވީ، ދާޚިލީ ވަޒީރު ނަގްވީ ތެހެރާނަށް ކުރައްވާ މި ދަތުރުފުޅުގައި މައިގަނޑު ގޮތެއްގައި މަޝްވަރާކުރައްވާނީ ދެ ގައުމުގެ ދެމެދުގައި އޮތް ގުޅުން އިތުރަށް ބަދަހިކުރުމާ ގުޅޭގޮތުން ކަމަށެވެ. އަދި މިހާރު ހިނގަމުންދާ ހަނގުރާމަ ހުއްޓުވުމަށް ކުރެވޭ މެދުވެރިއެއްގެ މަސައްކަތާ ގުޅޭ އެއްވެސް ޚާއްސަ މެސެޖެއް ބަދަލުކުރުމުގެ ރޭވުމެއް މި ދަތުރުފުޅުގެ ތެރެއިން ނެތް ކަމަށް ވެސް އޭނާ ވިދާޅުވި އެވެ.

ހުރްމުޒް ކަނޑުއޮޅިން އެއް ބިލިއަނަށްވުރެ ގިނަ ތެޔޮ ފީފާ އުފުލި އުޅަނދުފަހަރަށް އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ހިމާޔަތް ދީފައިވާ ކަމަށް ބުނާ ބުނުމަށް އީރާނުގެ އަސްކަރިއްޔާއިން އިންކާރުކޮށްފި އެވެ.

އީރާނުގެ ފާރްސް ނިއުސް އެޖެންސީން ރިޕޯޓްކޮށްފައިވާ ގޮތުގައި، އެ ގައުމުގެ ހަތިޔާރު އެޅި ސިފަައިގެ އިސް ތަރުޖަމާނު އަބުލްފަޒްލް ޝެކަރްޗީ ވިދާޅުވީ، އެމެރިކާގެ މި ދައުވާއަކީ އެމެރިކާ ސިފައިންގެ ރޫހު އާލާކުރުމަށާއި ހަނގުރާމައަށް ހިންގާ "ބޮޑެތި މާލީ އަދި އިންސާނީ ގެއްލުންތަކުގެ" ހަރަދުތައް ދިފާއުކުރުމަށް ހިންގާފައިވާ "ނާކާމިޔާބު ނަފްސާނީ އޮޕަރޭޝަނެއް" ކަމަށެވެ.

އެމެރިކާގެ ސެންޓްކޮމް އިން މީގެ ކުރިން ބުނެފައިވަނީ، ވޭތުވެދިޔަ ދެ މަސްދުވަހުގެ ތެރޭގައި ހުރްމުޒް ކަނޑުއޮޅިން އެއް ބިލިއަނަށްވުރެ ގިނަ ތެޔޮ ފީފާ އުފުލި އުޅަނދުފަހަރު ދަތުރުކުރިއިރު، އެމެރިކާއިން ސަލާމަތީ ކަންކަން ބަލަހައްޓާފައިވާ ކަމަށެވެ. އަދި ވިޔަފާރި މުދާ އުފުލާ 2،000 އަށްވުރެ ގިނަ އުޅަނދަށް ހިމާޔަތް ދީފައިވާނެ ކަމަށާއި، ކަނޑުގެ މައި މަގުތަކުގައި ވަޅުލާފައި ހުރި މައިންތައް ނައްތާލައި މަގު ސާފުކޮށްފައިވާނެ ކަމަށް ވެސް ސެންޓްކޮމް އިން ވަނީ ބުނެފަ އެވެ.

ހުރްމުޒް ކަނޑުއޮޅިއާއި އަރަބި ކަނޑު ގުޅުވައިދޭ ކަނޑުގެ ދަތުރުފަތުރުގެ މަގުތަކުން، އޮމާން ކަނޑުއޮޅި ތެރޭގައި ތެޔޮ ބޯޓުފަހަރާއި މުދާ އުފުލާ ބޯޓުފަހަރު ދަތުރުކުރަމުންދާ މަންޒަރު

ހަނގުރާމަ ހުއްޓާލުމަށް އީރާނުން ހުށަހަޅާ ޝަރުތުތައް ގަތަރު މެދުވެރިކޮށް އެމެރިކާއަށް އަންގާފައިވާ ކަމަށް އީރާނުގެ ސެކިއުރިޓީ ޗީފް މުހްސިން ރިޒާއީ އަލްޖަޒީރާއަށް ދެއްވި އިންޓަވިއުއެއްގައި ވިދާޅުވެއްޖެ އެވެ. 

ރިޒާއީ ވިދާޅުވި ގޮތުގައި އީރާނުން ހުށަހެޅި ޝަރުތުތަކުގެ ތެރޭގައި ހުރިހާ ފްރަންޓެއްގައި ކުރިއަށްދާ ހަނގުރާމަ ހުއްޓާލުމާއި، ހިފަހައްޓާފައިވާ އީރާނުގެ ފައިސާ ދޫކޮށްލުމުގެ އިތުރުން، އެމެރިކާއިން އީރާނުގެ ބަނދަރުތައް ބަންދުކޮށްފައި އޮތް އޮތުން ނިމުމަކަށް ގެނައުން ހިމެނެ އެވެ.

އަދި މި ޝަރުތުތަކާ ގުޅޭގޮތުން އެމެރިކާގެ ރައީސް ޑޮނަލްޑް ޓްރަމްޕްގެ ޖަވާބަކަށް ތެހެރާނުން އިންތިޒާރު ކުރަމުންދާ ކަމަށް ވެސް އޭނާ ވިދާޅުވި އެވެ.

މީގެ އިތުރުން، ސައުދީ އަރަބިއްޔާއާއި ހޫޘީންނާ ދެމެދު ހިނގަމުންދާ ހަމަނުޖެހުންތައް ނިމުމަކަށް ގެނައުމަށް އީރާނުން ވެސް ބޭނުންވާ ކަމަށް އޭނާ ވިދާޅުވި އެވެ.

އީރާނުގެ ސެކިއުރިޓީ ޗީފް މުހްސިން ރިޒާއީ

އަންނަ ހަފުތާގައި ނިއުޔޯކުގައި ބޭއްވުމަށް ހަމަޖެހިފައިވާ އދ. ގެ އާންމު މަޖިލީހުގެ ސަމިޓަށް ދިއުމަށް އީރާނުގެ ވަފުދަށް އެމެރިކާއިން ވިސާ ދީފައިވާކަން ކަށަވަރުވުމާ އެކު، އެ ސަމިޓުގައި ބައިވެރިވުމަކީ ތެހެރާނަށް ލިބިގެންވާ ހައްގެއް ކަމަށް އީރާނުގެ ފޮރިން މިނިސްޓްރީގެ ތަރުޖަމާނު އިސްމާއީލް ބަގާއީ ވިދާޅުވެއްޖެ އެވެ.

އީރާނުގެ ސްޓޫޑެންޓްސް ނިއުސް އެޖެންސީ އިން ރިޕޯޓްކޮށްފައިވާ ގޮތުގައި، ބަގާއީ ވިދާޅުވީ ނިއުޔޯކަށް ކުރާ ދަތުރަކީ އީރާނުގެ ޑިޕްލޮމޭޓުންނަށް އެހާ ޝައުގުވެރި ކަމެއް ނޫން ނަމަވެސް، އެއީ ދޫކޮށްލެވެން ނެތް މުހިންމު މައިދާނެއް ކަމަށެވެ.

ބަގާއީ އިތުރަށް ވިދާޅުވީ، އެ ބައްދަލުވުމުގައި އީރާނުގެ ރައްޔިތުންގެ ހައްގުތަކުގެ އަޑު ގަދަޔަށް އުފުލަންޖެހޭ ކަމަށެވެ. އަދި ނިއުޔޯކަށް ކުރާ މި ދަތުރަކީ އީރާނުގެ ބަލިކަށިކަން ދޭހަވާ ފަދަ އެއްވެސް އިޝާރާތެއް ދުޝްމަނުންނަށް ލިބޭނެ ދަތުރަކަށް ވެގެންނުވާނެ ކަމަށާއި، އޭގެ ބަދަލުގައި އެ ދަތުރުން ފެންނަންވާނީ އީރާނުގެ ހަގީގީ ބާރާއި ނުފޫޒު ކަމަށް ވެސް އޭނާ ވިދާޅުވި އެވެ.

އެމެރިކާއިން އީރާނުގައި ހަނގުރާމައިގެ ކުށްތައް ހިނގާފައިވާކަމުގެ ހެކި ލިބިފައިވާކަމަށް އދ. ގެ ރިޕޯޓެއްގައި ވަނީ ބުނެފައި

ޔަމަނުގެ ބައިނަލްއަގުވާމީ ގޮތުން ބަލައިގަނެފައިވާ ސަރުކާރުގެ އަސްކަރިއްޔާއިން ބުނި ގޮތުގައި، އެ ގައުމުގެ މާރިބްގެ ދެކުނުގައި އޮންނަ އަލް-ފުލައިހާން ސަރަހައްދަށް ވަދެގަންނަން ހޫޘީ ހަނގުރާމަވެރިން ކުރި މަސައްކަތެއް ސަރުކާރުގެ ސިފައިން ވަނީ ނާކާމިޔާބުކޮށްލާފަ އެވެ. މި ކުރިމަތިލުމުގައި ހޫޘީންގެ 12 ހަނގުރާމަވެރިއަކު ބަޑިޖަހައި މަރާލާފައިވާއިރު، އިތުރު ބަޔަކަށް އެކިވަރުގެ އަނިޔާތައް ލިބިފައިވާ ކަމަށް ވެސް އަސްކަރިއްޔާއިން މައުލޫމާތުދެ އެވެ.

ސައުދީ އަރަބިއްޔާގެ ރިޔާޟުގައި ހުންނަ ކިންގް ޚާލިދު އިންޓަނޭޝަނަލް އެއަރޕޯޓުގެ ތެޔޮ ރައްކާކުރާ ގުދަނަކުން ކަޅު ދުން އަރަމުންދަނީ، 19 ސެޕްޓެމްބަރު 2026

ޔަމަނުގެ ހޫޘީ ހަނގުރާމަވެރިން ސައުދީ އަރަބިއްޔާގެ ވެރިރަށް ރިޔާޟުގައި ހުރި "ނާޒުކު" ސަރަހައްދުތަކަކަށް ބެލިސްޓިކް މިސައިލާއި ޑްރޯން ބޭނުންކޮށްގެން ހަމަލާދީފައިވާ ކަމަށް އެ ޖަމާއަތުން ބުނެފި އެވެ. ހޫޘީންގެ ތަރުޖަމާނު އަމީން ހައްޔާން ނެރުއްވި ބަޔާނެއްގައި ވިދާޅުވީ، ރިޔާޟުގެ އިތުރުން ޔަންބޫގައި ހުންނަ ސައުދީ އަރަމްކޯގެ ތެޔޮ ރިފައީނަރީއަކަށް ވެސް ހަމަލާދީފައިވާ ކަމަށެވެ.

މި ހަމަލާތަކާ ގުޅޭ އެއްވެސް މައުލޫމާތެއް ސައުދީ އަރަބިއްޔާގެ ސަރުކާރުން އަދި ކަށަވަރުކޮށްދީފައެއް ނުވެ އެވެ.

ހުރްމުޒް ކަނޑުއޮޅި ހުރަސްކޮށް އަޅާ ޑޭޓާ ކޭބަލްތަކާ ގުޅޭ ކަންކަން ރެގިއުލޭޓް ކުރުމަށްޓަކައި، އީރާނުގެ އިސް އޮފިޝަލުން ހިމެނޭ ޚާއްސަ ކޮމިޓީއަކުން ގާނޫނީ މާއްދާއެއް ފާސްކޮށްފި އެވެ. އީރާނުގެ ސެމީ-އޮފިޝަލް ފާރްސް ނިއުސް އެޖެންސީން ރިޕޯޓްކޮށްފައިވާ ގޮތުގައި، މި ނިންމުމާއެކު ހުރްމުޒް ކަނޑުއޮޅި މެދުވެރިކޮށް ޑޭޓާ ކޭބަލްތައް އެޅުމުގެ ކުރިން އީރާނުގެ ސަރުކާރުގެ ހުއްދަ ހޯދުން މިހާރު ވަނީ ލާޒިމްކޮށްފަ އެވެ.

މި ނިންމުން ނިންމާފައިވަނީ އީރާނުގެ މިނިސްޓްރީ އޮފް އިންޓެލިޖެންސް އާއި މިނިސްޓްރީ އޮފް ޑިފެންސްގެ އިތުރުން ވައިސް ޕްރެޒިޑެންޓްގެ އޮފީސް ފޯރ ލީގަލް އެފެއާޒްގެ އިސް އޮފިޝަލުން ހިމެނޭ ޚާއްސަ ކޮމިޓީއަކުންނެވެ.

"އާޓިކަލް 10" ގެ ނަމުން ނަންދެވިފައިވާ މި ގާނޫނީ މާއްދާގެ ދަށުން، ހުރްމުޒް ކަނޑުއޮޅި ހުރަސްކޮށް ގެންދާ ޑޭޓާ ކޭބަލްތަކުގެ އިތުރުން، މުވާސަލާތީ ޚިދުމަތްތަކަށް ބޭނުންކުރާ އެހެނިހެން ވަސީލަތްތަކާއި ސާމާނުތައް ފޮނުވުމުގައި ވެސް އީރާނުގެ ހުއްދަ ހޯދަން ޖެހޭނެ ކަމަށް ފާރްސް ނިއުސް އެޖެންސީން ރިޕޯޓްކުރެ އެވެ.

މި ގާނޫނާ ގުޅޭ އިތުރު ތަފްސީލުތަކާއި އަމަލުކުރާނެ ގޮތުގެ އުސޫލުތައް، ކުރިއަށް އޮތް ތަނުގައި އާންމުކުރާ ގަވާއިދުތަކެއްގެ ތެރެއިން ސާފުވެގެންދާނެ ކަމަށް ބެލެވެ އެވެ.

ހުރްމުޒް ކަނޑުއޮޅީގައި ދަތުރުކުރުމުގެ މިނިވަންކަން އަލުން ގާއިމުކުރުމާ ބެހޭގޮތުން އޮމާން އާއި ޖަރުމަނުގެ ޚާރިޖީ ވަޒީރުން މަޝްވަރާކުރައްވައިފި އެވެ.

އޮމާންގެ ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ، އެ ގައުމުގެ ޚާރިޖީ ވަޒީރު ބަދުރު ބިން ހަމަދު އަލް ބުސައިދީ އާއި ޖަރުމަނުގެ ޚާރިޖީ ވަޒީރު ޔޯހަން ވަޑެފުލް ބޭއްވި މި ބައްދަލުވުމުގައި، މަސްރަހުގައި އުފެދިފައިވާ ނުތަނަވަސްކަން ކުޑަކުރުމަށާއި، ހަމަނުޖެހުންތައް އިތުރުވިޔަ ނުދިނުމަށް ކުރެވިދާނެ ކަންކަމާ ބެހޭގޮތުން ވާހަކަދައްކަވާފައިވާ ކަމަށެވެ. މީގެ އިތުރުން ސަރަހައްދީ ސަލާމަތާއި ރައްކާތެރިކަން އިތުރުކުރުމާ ގުޅޭގޮތުން ވެސް ދެ ބޭފުޅުން ވަނީ މަޝްވަރާ ކުރައްވާފަ އެވެ.

ހުރްމުޒް ކަނޑުއޮޅި މެދުވެރިކޮށް ކުރާ ވިޔަފާރި ދަތުރުފަތުރުތައް އަލުން އާންމު ހާލަތަކަށް ގެނައުމަށް ކުރަމުންދާ މަސައްކަތްތަކުގައި އޮމާނުން ދަނީ މުހިންމު މެދުވެރިއެއްގެ ދައުރު އަދާކުރަމުންނެވެ. މިގޮތުން، އީރާނުން އެ ސަރަހައްދުގެ ކަނޑުގެ ދަތުރުފަތުރަށް ހުރަސްތަކެއް ކުރިމަތިކުރުވާފައިވާ މި ދަނޑިވަޅުގައި، މުދާ އުފުލާ އުޅަނދުފަހަރަށް ވަގުތީ މަގުތަކެއް ހޯދައިދިނުމަށް އީރާނާއެކު ކުރިއަށްދާ މަޝްވަރާތަކުގައި ވެސް އޮމާނުން ދަނީ ބައިވެރިވަމުންނެވެ.

ސައުދީ އަރަބިއްޔާގެ ރިޔާޟުގައި ހުންނަ ކިންގް ޚާލިދު އިންޓަނޭޝަނަލް އެއަރޕޯޓުގެ ތެޔޮ ރައްކާކުރާ ގުދަނަކުން ކަޅު ދުން އަރަމުންދަނީ، 19 ސެޕްޓެމްބަރު 2026

ސައުދީ އަރަބިއްޔާގެ ރިޔާޟުގައި ހުންނަ ކިންގް ޚާލިދު އިންޓަނޭޝަނަލް އެއާޕޯޓަށް ޑްރޯން ބޭނުންކޮށްގެން ހަމަލާދީފައިވާ ކަމަށް ރޮއިޓާސްއިން ރިޕޯޓްކޮށްފި އެވެ.

އެ އެއަރޕޯޓުގެ ތެޔޮ ރައްކާކުރާ މައި ޓޭންކުތަކަށް ވަނީ ހަމަލާދީފަ އެވެ. އަދި އެ ސަރަހައްދުން ބޮޑު އަލިފާންގަނޑެއް އުފެދި، ކަޅު ދުމުގެ އަސަރު މުޅި އެއަރޕޯޓުގެ މައްޗަށް ފެތުރިފައިވާ ކަމަށް މައުލޫމާތު ލިބެ އެވެ. 

މި ހާދިސާއާ ގުޅޭގޮތުން ސައުދީ އަރަބިއްޔާގެ ރަސްމީ އިދާރާއަކުން މިހާތަނަށް އެއްވެސް ބަހެއް ބުނެފައެއް ނުވެ އެވެ.

ކަހްބޫބް ފަރުބަދަމަތީ ސަރަހައްދުގައި ހިނގަމުންދާ ކުރިމަތިލުންތަކުގައި ޔަމަނުގެ ސަރުކާރު ސިފައިން ބުނީ ހޫޘީންނަށް ބޮޑެތި ގެއްލުންތަކެއް ދީފައިވާ ކަމަށާއި އިސްތިރާތީޖީ ގޮތުން މުހިންމު އެ އުސްބިންތަކުގެ ކޮންޓްރޯލް ހޫޘީންގެ އަތްދަށަށް ދިޔަނުދީ ހިފަހައްޓާފައިވާ ކަމަށް

ޔަމަނުގެ ސަރުކާރުގެ ސިފައިން މަޣްރިބް ގަވަރުނަރޭޓްގެ ދެކުނުގައިވާ އުއްމު ރިޝް ކޭމްޕަށާއި އަގަބަތު މަލާހްގައި ހުރި ހޫޘީންގެ މަރުކަޒުތަކަށް އަމާޒުކޮށް ތިން ވައިގެ ހަމަލާއެއް ދީފި އެވެ.

ސަރުކާރު ސިފައިން ހަމަލާދިން މި ކޭމްޕާއި މަރުކަޒުތަކަކީ، ހޫޘީ ހަނގުރާމަވެރިންނަށް އެހީތެރިކަން ފޯރުކޮށްދޭ މަރުކަޒުތަކެއްގެ އިތުރުން، އެ ގައުމުގެ ދެކުނު ފްރަންޓުގައި ހޫޘީން ދަތުރުފަތުރު ކުރުމަށް ބޭނުންކުރާ މުހިންމު މަގުތަކެކެވެ.

ލަހެޖް ގަވަރުނަރޭޓްގެ ކަހްބޫބް ފަރުބަދަމަތީ ސަރަހައްދުގައި ހިނގަމުންދާ ކުރިމަތިލުންތަކަށް ބަލާއިރު، ޔަމަނުގެ ސަރުކާރު ސިފައިން ބުނީ ހޫޘީންނަށް ބޮޑެތި ގެއްލުންތަކެއް ދީފައިވާ ކަމަށާއި، އިސްތިރާތީޖީ ގޮތުން މުހިންމު އެ އުސްބިންތަކުގެ ކޮންޓްރޯލް ހޫޘީންގެ އަތްދަށަށް ދިޔަނުދީ ހިފަހައްޓާފައިވާ ކަމަށެވެ.

މި އުސްބިންތަކަކީ ބާބުލް މަންދަބް ކަނޑުއޮޅިއާއި އެ ސަރަހައްދުގެ ވަށައިގެންވާ ތަންތަން ސާފުކޮށް ފެންނަން އޮންނަ، އަސްކަރީ ގޮތުން ނުފޫޒުގަދަ ސަރަހައްދެކެވެ. އަދި މި އިސްތިރާތީޖީ އުސްބިންތައް ކޮންޓްރޯލް ނުކުރެވޭހާ ހިނދަކު، ބާބުލް މަންދަބް ކަނޑުއޮޅީގެ ފުރިހަމަ ކޮންޓްރޯލް އެއްވެސް ފަރާތަކަށް ނުލިބޭނެ އެވެ.

ޔަމަނުގެ ހޫޘީ ހަނގުރާމަވެރިންގެ ބާރުގެ ދަށުގައިވާ ސަރަހައްދުތަކަށް، ފާއިތުވި 24 ގަޑިއިރު ތެރޭގައި ސައުދީ އަރަބިއްޔާއިން 26 ހަމަލާއެއް ދީފައިވާ ކަމަށް އެ ޖަމާއަތުން ބުނެފި އެވެ. އޭއެފްޕީ ނިއުސް އެޖެންސީން ރިޕޯޓްކޮށްފައިވާ ގޮތުގައި، ޔަމަނުގެ ދާޚިލީ ހަނގުރާމަ ގޯސްވަމުންދާ މި ދަނޑިވަޅުގައި ދެ ފަރާތުގެ މެދުގައި ދަނީ ވަރުގަދަ ހަމަލާތަކެއް ބަދަލުކުރަމުންނެވެ.

ހޫޘީންގެ ބާރުގެ ދަށުގައިވާ ސަރަހައްދުތަކަށް އަމާޒުކޮށް ސައުދީން ދެމުންދާ ހަމަލާތަކާ ގުޅޭގޮތުން އެ ޖަމާއަތުން ހުކުރު ދުވަހު ބުނެފައިވަނީ، ހަމައެކަނި ފާއިތުވި ހަފުތާގެ ތެރޭގައި ވެސް ސައުދީން 300 އެއްހާ ހަމަލާ ދީފައިވާ ކަމަށެވެ. އޭއެފްޕީން ރިޕޯޓްކޮށްފައިވާ ގޮތުގައި މި ހަމަލާތައް އަމާޒުކޮށްފައިވަނީ ހޫޘީންގެ ކޮންޓްރޯލް އޮންނަ އެކި ސަރަހައްދުތަކުގައި ހުރި އެ ޖަމާއަތުގެ މަރުކަޒުތަކަށެވެ.

ސައުދީ އަރަބިއްޔާގެ އެހީތެރިކަމާއެކު ހަރަކާތްތެރިވާ ޔަމަނުގެ ސަރުކާރު ފައުޖުތަކުން ހުކުރު ދުވަހު ބުނެފައިވާ ގޮތުގައި، ތާއިޒް ޕްރޮވިންސްގެ އަލް-ވަޒީއިއްޔާ ޑިސްޓްރިކްޓުގައި ހިނގި ކުރިމަތިލުންތަކުގައި ހޫޘީންގެ 30 ހަނގުރާމަވެރިން މަރާލައި، 60 އަށްވުރެ ގިނަ މީހުން ވަނީ ޒަޚަމްކޮށްލާފަ އެވެ. މި ހަފުތާގެ ތެރޭގައި ޔަމަނުގެ އެކި ސަރަހައްދުތަކުގައި ހަނގުރާމަ ވަނީ ކުރިއަށްވުރެ ބޮޑަށް ވަރުގަދަވެފަ އެވެ.

އެމެރިކާ ސިފައިން މަރުވި އަދަދުތަކާ ގުޅޭގޮތުން ވޮޝިންގޓަން ޕޯސްޓުން ޝާއިއުކުރި ރިޕޯޓަކީ ކަނޑައެޅިގެން ދޮގެއް ކަމަށް އެމެރިކާގެ ޑިފެންސް ސެކްރެޓަރީ ވިދާޅުވެއްޖެ އެވެ. 

ވޮޝިންގޓަން ޕޯސްޓުގެ ރިޕޯޓުގައިވާ ގޮތުން، ފެބްރުއަރީ މަހުގެ 28 ވަނަ ދުވަހު އެމެރިކާއާއި އިސްރާއީލުން އީރާނާ އެކު ހަނގުރާމަ ފެށި ފަހުން، އެމެރިކާ ސިފައިންގެ ތެރެއިން މަދުވެގެން 22 މީހަކު ވަނީ މަރުވެފަ އެވެ. މިއީ ޕެންޓަގަންގެ އާންމު ޑޭޓާބޭސްގައި ހާމަކޮށްފައިވާ އަދަދަށްވުރެ ހަތަރު މީހުން އިތުރު އަދަދެއް ކަމަށް އެ ނޫހަށް މައުލޫމާތު ދިން ފަސް އޮފިޝަލަކު ބުނެފައިވެ އެވެ.

މީގެ އިތުރުން، ހަވަނަ އޮފިޝަލަކާ ހަވާލާދީ އެ ނޫހުން ރިޕޯޓުކޮށްފައިވާ ގޮތުގައި، ހަނގުރާމައިގައި އެމެރިކާ ސިފައިންގެ 23 މީހަކު މަރުވެފައިވާއިރު، އެ ސަރަހައްދުގައި މަސައްކަތްކުރާ އެމެރިކާގެ ތިން ކޮންޓްރެކްޓަރުން ވެސް ވަނީ މަރުވެފަ އެވެ. ސަރުކާރުން ހާމަނުކޮށް ހުރި މި މަރުތަކަކީ ސީދާ ހަނގުރާމައިގެ ކުރިމަތިލުންތަކުގައި ހިނގާފައިވާ މަރުތަކަކަށް ނުވި ނަމަވެސް، އެއީ މެދުއިރުމަތީގައި ހަމަނުޖެހުންތައް ހިނގަމުންދާ ދަނޑިވަޅެއްގައި އެ ސަރަހައްދުގައި ތިބި އެމެރިކާގެ މުވައްޒަފުންނަށް ދިމާވި ހާދިސާތަކެއް ކަމަށް އެ އޮފިޝަލު ބުނެފައިވެ އެވެ.

އެމެރިކާ ސަރުކާރުން މިކަން ދޮގުކޮށްފައި މިވަނީ، މެދުއިރުމަތީގައި ހުރި އެމެރިކާގެ އަސްކަރީ މަރުކަޒުތައް ސުންނާފަތިކޮށްލާފައިވާ ފޮޓޯތަކެއް ވެސް އެމެރިކާ ބައެއް ޚަބަރުފަތުރާ ވަސީލަތްތަކުން އާންމުކޮށްފައިވާ ދަނޑިވަޅެއްގަ އެވެ. 

އީރާނުން ދިން ހަމަލާއެއްގައި ކުވެއިތުގައި ހުރި އެމެރިކާގެ އަސްކަރީ ބިންގަރާސް މަރުކަޒެއް މުޅިން ސުންނާފަތިވެފައި

އީރާނާއެކު ކުރަމުންދާ ހަނގުރާމައިގައި އެމެރިކާގެ ހަތިޔާރުގެ ރަސްމީ ރިޒާވް މަދުވެފައިވާތީ، ބައެއް މުހިންމު ހަތިޔާރުތައް ފޯރުކޮށްދިނުން ފަސް އަހަރާ ހަމައަށް ލަސްވެދާނެކަމުގެ އިންޒާރު އެމެރިކާއިން އެގައުމުގެ ބައިވެރިންނަށް ދީފި ކަމަށް ބްލޫމްބާގް ނިއުސްއިން ހުކުރު ދުވަހު ރިޕޯޓްކޮށްފި އެވެ.

ބްލޫމްބާގްއިން އާންމުކުރި މަސްއޫލުވެރިންގެ މައުލޫމާތުތަކަށް ބަލާއިރު، ޔޫރަޕްގެ ބައެއް ގައުމުތަކަށް މިސައިލާއި ވައިގެ ދިފާއީ ނިޒާމުތައް ލިބުމުގައި މިހާރު ވަނީ ދަތިތަކާ ކުރިމަތިވެފަ އެވެ. މިގޮތުން، ދުރު ރާސްތާގެ "ޓޮމަހޯކް" މިސައިލާއި ބިމުން ވައިގެ ތެރެއަށް ފޮނުވާލާ "ޓައިފޯން" ލޯންޗަރުތައް ފޯރުކޮށްދިނުން އަވަސްކޮށްދިނުމަށް ޖަރުމަނުވިލާތުން އެމެރިކާގެ ކިބައިން އެދިފައިވީ ނަމަވެސް، ހިނގަމުންދާ ހަނގުރާމައިގެ ސަބަބުން އެމެރިކާގެ އަތުގައި ހުރި މިފަދަ ހަތިޔާރުގެ ސްޓޮކް ވަނީ ވަރަށް ބޮޑަށް މަދުވެފަ އެވެ.

ބްލޫމްބާގްގެ ރިޕޯޓުގައިވާ ގޮތުން، 2026 ފެބްރުއަރީ 28 އިން ޖޫން 30 އާ ދެމެދު އެމެރިކާއިން ވަނީ ހަތިޔާރު ހޯދުމަށް ގާތްގަނޑަކަށް 22.3 ބިލިއަން ޑޮލަރު ހޭދަކޮށްފަ އެވެ.

ނަމަވެސް އެމެރިކާގެ ރައީސް ޑޮނަލްޑް ޓްރަމްޕް ވަނީ ހަތިޔާރު މަދުވަމުންދާ ކަމަށް ބުނާ ރިޕޯޓުތަކަށް ތަކުރާރުކޮށް އިންކާރު ކުރައްވައި، އެމެރިކާގެ ހަތިޔާރުގެ ރިޒާވް ހުރީ "ހުސްނުވާނެ" މިންވަރަށް ކަމަށް ވިދާޅުވެފަ އެވެ. 

މެދުއިރުމަތީގައި ކުރިއަށްދިޔަ ފީލްޑް އާޓިލަރީ ތަމްރީނެއްގެ ތެރެއިން، އެމެރިކާގެ އާމީ ޕެރަޓްރޫޕަރުން "އެމް777 ހޮވިޓްޒާ" ބަޑިއަކުން 155 މިލިމީޓަރުގެ ވަޒަނެއް ފޮނުވާލަނީ

އަފްޣާނިސްތާނުގެ އާރާސްތުކުރުމުގެ މަސައްކަތްތަކުގައާއި އެ ގައުމުގެ ސުލްހަމަސަލަސްކަމާއި ހަމަޖެހުން ގާއިމުކުރުމަށް ސައުދީ އަރަބިއްޔާއިން އަދާކުރާ ދައުރަށް ތައުރީފުކުރައްވައި، ސައުދީއާއެކު އޮންނަ ގުޅުން އިތުރަށް ބަދަހިކުރަން އަފްޣާނިސްތާނުން ބޭނުންވާކަމަށް ތާލިބާން ސަރުކާރުގެ ތަރުޖަމާނު ޒަބީހުﷲ މުޖާހިދު ވިދާޅުވެއްޖެ އެވެ.

އަލް އަރަބިއްޔާއަށް ދެއްވި ހާއްސަ އިންޓަވިއުއެއްގައި ޒަބީހުﷲ މުޖާހިދު ވިދާޅުވީ، ތަހްރީކޭ ތާލިބާން ޕާކިސްތާން (ޓީޓީޕީ) އަށް އަފްޣާނިސްތާނުގެ ބިމުގައި ހަރަކާތްތެރިވުމުގެ ފުރުސަތު އެ ގައުމުގެ ސަރުކާރުން ނުދޭނެ ކަމަށެވެ. އަދި އަފްޣާނިސްތާނުން އެއްވެސް ހަތިޔާރު އެޅި ޖަމާއަތަކަށް ތާއީދު ނުކުރާނެ ކަމަށާއި، އެ ގައުމުގެ ފަސްގަނޑު ބޭނުންކޮށްގެން އެހެން ގައުމަކަށް ހަމަލާދިނުމުގެ ފުރުސަތު އެއްވެސް ފަރާތަކަށް ނޯންނާނެ ކަމަށްވެސް އޭނާ ވިދާޅުވި އެވެ.

ޕާކިސްތާނާއެކު އޮންނަ މަޝްވަރާތަކާއި އެއްބާރުލުން ދެމެހެއްޓުމަށް އަފްޣާނިސްތާނުން ބޭނުންވާކަން ފާހަގަކުރައްވައި، ދެ ގައުމުގެ ދެމެދުގައި ހުރި މައްސަލަތައް ހައްލުކުރުމުގައި ސައުދީ އަރަބިއްޔާއިން މިއަށްވުރެ ފުޅާ ދައުރެއް އަދާކުރުމަށް މަރުހަބާ ކިޔާނެ ކަމަށް ތަރުޖަމާނު ވިދާޅުވި އެވެ.

މީގެ އިތުރުން، އަމިއްލަ ނަފްސުގެ ދިފާއުގައި ކަމަށް ބުނެ ޕާކިސްތާނުން އަފްޣާނިސްތާނުގެ އިސްތިގުލާލަށް އަރައިގަނެފިނަމަ، އެކަމުން ދިފާއުވެ، ޕާކިސްތާނަށް "ވަރުގަދަ ރައްދެއް" ދޭނެ ކަމުގެ އިންޒާރު ޒަބީހުﷲ މުޖާހިދު ވަނީ ދެއްވާފަ އެވެ.

ސައުދީ އަރަބިއްޔާގެ ސިވިލް ޑިފެންސްއިން ބުނި ގޮތުގައި، އެ ގައުމުގެ ނޭޝަނަލް އާލީ ވޯނިންގ ޕްލެޓްފޯމް މެދުވެރިކޮށް ރިޔާޟް އަދި އަލް-ޚަރްޖު ސަރަހައްދަށް ވަނީ ނުރައްކަލުގެ އައު އިންޒާރުތަކެއް ނެރެފަ އެވެ. މިއީ ރޭގަނޑުގެ ވަގުތެއްގައި މި ދެ ސަރަހައްދަށް މިފަދަ އިންޒާރެއް ނެރުނު ދެވަނަ ފަހަރެވެ.

އެކްސްގައި ކުރި ވަކިވަކި ޕޯސްޓްތަކެއްގައި ސިވިލް ޑިފެންސްއިން ވަނީ، އެ އިދާރާއިން ދޭ އިރުޝާދުތަކަށް ބޯލެނބުމަށާއި ރައްކާތެރިކަމުގެ ފިޔަވަޅުތައް އެޅުމަށް އެ ސަރަހައްދުތަކުގެ ރައްޔިތުންނަށް އިލްތިމާސްކޮށްފަ އެވެ.

އެންމެ ފަހުން މި ނެރުނު އިންޒާރުތައް އައިސްފައިވަނީ، ރިޔާޟް އަދި އަލް-ޚަރްޖަށް ކުރިން ނެރުނު އިންޒާރުތައް އުވާލައި، ނުރައްކާ ފިލައިގޮސްފައިވާ ކަމަށް ކަމާބެހޭ ފަރާތްތަކުން ހާމަކޮށްފައި ވަނިކޮށެވެ.

މި ހަމަލާތަކުގައި މަރުވި ކުދިންގެ ޖަނާޒާގެ 2026 މާރިޗު 03 ގައި އިރާނުގެ މިނާބްގައި ވަނީ ބާއްވާފައި

އީރާނަށް ދިން ދެ ހަމަލާއެއްގައި އެމެރިކާއިން ހަނގުރާމައިގެ ކުށްތަކަށް އަރައިގަނެފައިވާ ކަމަށް ބެލެވޭ ކަމަށް އދ. އިން ވަނީ ކަނޑައަޅައިފި އެވެ. އދ. އިން އެކުލަވާލި ފެކްޓް ފައިންޑިން މިޝަނަކުން ނެރުނު ރިޕޯޓެއްގައި ބުނެފައިވަނީ، މިދިޔަ ފެބްރުއަރީ މަހު އީރާނުގެ މިނާބްގައި ހުންނަ ފްރައިމަރީ ސުކޫލަކަށާއި، ލާމެރްދުގައި ހުންނަ ކުޅިވަރު ކޮމްޕްލެކްސްއަކަށް އެމެރިކާއިން ދިން ދެ ހަމަލާއަކީ ހަނގުރާމައިގެ ކުށްތަކެއް ކަމަށް ބެލެވޭ ކަމަށެވެ.

އެ މިޝަނުން ހާމަކުރި ގޮތުގައި، އެމެރިކާއިން މި ހަމަލާތައް ދީފައިވަނީ އެއްވެސް ޒިންމާދާރުކަމެއް ނެތި ކަމަށް ގަބޫލުކުރެވޭ ފަދަ އެކަށީގެންވާ ސަބަބުތަކެއް އެބަހުއްޓެވެ. ތަހުގީގު ކުރި ފަރާތްތަކުން ބުނި ގޮތުގައި، މިނާބްގައި ހުރި ސުކޫލަކީ މަދަނީ ތަނެއްކަން ސާފުކޮށް އެނގެން އޮތް އިރުވެސް، އެއީ އަސްކަރީ އަމާޒެއްތޯ ކަށަވަރު ކުރުމަށް ވޮޝިންޓަނުން ކުރަންޖެހޭ އެއްވެސް މަސައްކަތެއް ކޮށްފައެއް ނުވެ އެވެ.

މިދިޔަ ފެބްރުއަރީ މަހުގެ 28 ވަނަ ދުވަހު އެ ސުކޫލަށް ދެ ފަހަރެއްގެ މަތިން ހަމަލާދީފައިވެ އެވެ. އެ ސަރަހައްދުގެ އޮފިޝަލުން ހާމަކުރި ގޮތުގައި މި ހަމަލާގައި 156 މީހުން މަރުވެފައިވާއިރު، އޭގެ ތެރޭގައި 120 ސުކޫލު ކުދިންނާއި 26 އަންހެން މުދައްރިސުން ހިމެނެ އެވެ. 

އދ. ގެ މި ހޯދުންތައް ވައިޓް ހައުސް އިން ވަނީ ބަލައިގަންނަން އިންކާރުކޮށްފަ އެވެ. އަދި އދ. ގެ މި ހޯދުންތައް ހާމަކުރިތާ 24 ގަޑިއިރު ނުވަނީސް، އދ. ގެ ހިއުމަން ރައިޓްސް ކައުންސިލުން އެމެރިކާ ވަނީ ރަސްމީކޮށް ވަކިވެފަ އެވެ. އެމެރިކާ ސަރުކާރުން އެ ކައުންސިލަށް ތުހުމަތުކޮށްފައިވަނީ، އެއީ "އެމެރިކާއާ ދެކޮޅު ވާހަކަތައް" ފެތުރުމަށް ހިތްވަރުދޭ އަދި އަމިއްލަ ރައްޔިތުންނަށް އަނިޔާވެރިވާ ކަމަށް ތުހުމަތުކުރެވޭ ސަރުކާރުތަކާ މެދު މާ ބޮޑަށް ދޫދޭ އިދާރާއެއްގެ ގޮތުގަ އެވެ.

އެމެރިކާއިން އީރާނާ ދެކޮޅަށް މިހާރުވެސް އަމަލުކުރަމުންދާ ފިޔަވަޅުތަކުގެ މުއްދަތު އިތުރުކޮށް، ރަޝިޔާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކާއި ޓެރިފްތައް އިތުރަށް ފުޅާކޮށް، އެކުލަވާލާފައިވާ "ލިންޑްސީ އޯ ގްރަހަމް ސެންކްޝަނިންގ ރަޝިޔާ އެންޑް އީރާން އެކްޓް 2026"  ހުކުރު ދުވަހު އެމެރިކާގެ ރައީސް ޑޮނަލްޑް ޓްރަމްޕް ތަސްދީގު ކުރައްވައިފި އެވެ. 

އީރާނާ ގުޅޭގޮތުން މި ގާނޫނުގައި ކަނޑައަޅާފައިވަނީ "އީރާން ސެންކްޝަންސް އެކްޓް" ގެ މުއްދަތު އިތުރު ފަސް އަހަރަށް ދަންމާލުމަށެވެ. މީގެ ސަބަބުން ތެހެރާނާ ދެކޮޅަށް އަޅާފައިވާ މުހިންމު ދަތިކުރުމުގެ ފިޔަވަޅުތައް 2031 ވަނަ އަހަރުގެ ނިޔަލަށް ދެމިއޮންނާނެ އެވެ. މި ގާނޫނުގެ ދަށުން އީރާނާ ދެކޮޅަށް އައު ފިޔަވަޅުތަކެއް ތައާރަފު ނުކުރި ނަމަވެސް، އީރާނުގެ ހަކަތައިގެ ދާއިރާއާ ގުޅުންހުރި މުއާމަލާތްތައް ކުރާ ބޭރުގެ ކުންފުނިތަކާއި ފަރުދުންނަށް އަމާޒުކޮށް ފިޔަވަޅު އެޅުމަށް ވޮޝިންޓަނަށް ލިބިދޭ ބާރުތައް މި ނިންމުމާއެކު ދެމިގެންދާނެ އެވެ.

މީގެ ތެރޭގައި އީރާނުގެ ޕެޓްރޯލިއަމް ގަތުމާއި އުފުލުމާއި އެކަމަށް ފައިސާ ހަރަދުކުރުން ނުވަތަ އިންޝުއަރެންސް ދިނުމުގައި ބައިވެރިވާ ވިޔަފާރިތަކުގެ އިތުރުން، ޕެޓްރޯލިއަމްގެ ބައެއް މަޝްރޫއުތަކަށް އިންވެސްޓްކުރާ ކުންފުނިތައް ވެސް ހިމެނެ އެވެ.

އީރާނުގެ ތެލުގެ އެންމެ ބޮޑު ކަސްޓަމަރަކީ ޗައިނާއެވެ. އެމެރިކާގެ ޓްރެޜަރީން ހާމަކޮށްފައިވާ ގޮތުގައި އީރާނުން ބޭރުކުރާ ތެލުގެ ގާތްގަނޑަކަށް 90 އިންސައްތަ ގަންނަނީ ޗައިނާއިންނެވެ. މީގެ އިތުރުން، އީރާނުގެ ޕެޓްރޯލިއަމް ވިއްކުމާއި އުފުލުމުގައި ބައިވެރިވާ ކަމަށް ތުހުމަތުކޮށް، ޔުނައިޓެޑް އަރަބް އެމިރޭޓްސް (ޔޫއޭއީ) އާއި ހޮންކޮންގް އަދި އިންޑިއާގައި ހިންގާ ތެޔޮ ބްރޯކަރުންނާއި ޝިޕިންގ ކުންފުނިތަކާއި ޓޭންކަރު އޮޕަރޭޓަރުންނަށް އަމާޒުކޮށް ވެސް އެމެރިކާއިން ވަނީ ދަތިކުރުމުގެ ފިޔަވަޅުތައް އަޅާފަ އެވެ.

މި ފިޔަވަޅުތަކުގެ ދަށުން އެމެރިކާގެ މާލީ އިދާރާތަކުގެ ހިދުމަތް ހޯދުމާއި، ޑޮލަރުން މުއާމަލާތް ކުރުން މަނާކުރުމުގެ އިތުރުން، އެމެރިކާގެ އިހުތިސާސްގެ ދަށުގައި ހުރި މުދަލާއި ފައިސާ ހިފެހެއްޓުން ފަދަ އަދަބުތައް ދެވިދާނެ އެވެ.

އެހެންކަމުން، މި ގާނޫނުގެ މުއްދަތު އިތުރުކުރުމާއެކު، އީރާނާއެކު މަނާ ވިޔަފާރީގެ މުއާމަލާތްތައް ކުރާ ބޭރުގެ ކުންފުނިތަކާއި މާލީ އިދާރާތަކަށް އެމެރިކާގެ "ސެކަންޑަރީ ސެންކްޝަންސް" ނުވަތަ ނުސީދާ ދަތިކުރުމުގެ ފިޔަވަޅުތަކުގެ ބިރު 2031 ވަނަ އަހަރާ ހަމައަށް އޮންނާނެ އެވެ.

އަންނަ ހަފުތާގައި ބޭއްވުމަށް ހަމަޖެހިފައިވާ އދ. ގެ އާންމު މަޖިލީހުގެ ހަވާސާގައި، ގަލްފް ގައުމުތަކުގެ ލީޑަރުންނާއެކު ބާއްވާ ގިނަ ގައުމުތައް ބައިވެރިވާ ބައްދަލުވުންތަކުގައި އެމެރިކާގެ ރައީސް ޑޮނަލްޑް ޓްރަމްޕް ބައިވެރިވެވަޑައިގަންނަވާނެ ކަމަށް، އެމެރިކާއިން އދ. އަށް ކަނޑައަޅުއްވާފައި ހުންނަވާ ސަފީރު މައިކް ވޯލްޓްޒް ވިދާޅުވެއްޖެ އެވެ.

ސަފީރު ވޯލްޓްޒް ވިދާޅުވި ގޮތުގައި، އދ. ގައި ޓްރަމްޕް ދެއްވާ ތަގުރީރުގައި، ބައިނަލްއަގުވާމީ ގޮތުން އުފެދިފައިވާ ހަމަނުޖެހުންތައް ހައްލުކުރުމަށް އެމަނިކުފާނުގެ ސަރުކާރުން ކުރަމުންދާ މަސައްކަތްތަކުގެ މައްޗަށް އަލިއަޅުއްވާލައްވާނެ އެވެ. އަދި މީގެ ކުރީގެ ސަރުކާރުތަކުން އިހުމާލުވެފައިވާ ކަމަށް ޓްރަމްޕްގެ ސަރުކާރުން ގަބޫލުކުރާ މުހިންމު މައްސަލަތަކާ ގުޅޭގޮތުން ވެސް މި ތަގުރީރުގައި ވާހަކަފުޅު ދައްކަވާނެ އެވެ.

މީގެ އިތުރުން، އީރާނުން ނިއުކްލިއަރ ހަތިޔާރު ހޯދުން ހުއްޓުވުމަށް ކުރަންޖެހޭ ކަންކަމާ ގުޅޭގޮތުން ޓްރަމްޕް މަޝްވަރާ ކުރައްވާނެ ކަމަށް ސަފީރު ވިދާޅުވި އެވެ. ހަމައެއާއެކު، ވޭތުވެދިޔަ އެއް އަހަރު ދުވަހުގެ ތެރޭގައި ހުޅަނގުގެ ގައުމުތަކުގެ މަސްލަހަތު ހިމެނޭ ސަރަހައްދުތަކުގައި އެމެރިކާއިން އެޅި ފިޔަވަޅުތަކާއި، ޣައްޒާގެ ސުލްހައަށްޓަކައި އެމަނިކުފާނުގެ ސަރުކާރުން އެކުލަވާލާފައިވާ 20 ނުކުތާގެ މައްޗަށް އެކުލެވޭ މަޝްރޫއަށް ލިބެމުންދާ ކުރިއެރުންތަކުގެ ތަފުސީލު ވެސް ޓްރަމްޕް ހިއްސާކުރައްވާނެ އެވެ.

އެމެރިކާގެ ރައީސް ޑޮނަލްޑް ޓްރަމްޕް އދ. ގެ އާންމު މަޖިލީހުގައި ތަގުރީރު ކުރައްވަނީ، 23 ސެޕްޓެމްބަރު 2025

ޔަމަނުގެ ހޫޘީ ހަނގުރާމަވެރިންގެ ގިނަ ބަޔަކު މަރާލައި، އެ މީހުން ބޭނުންކުރާ ހަނގުރާމަވެރި އުޅަނދުތަކެއް ސުންނާފަތިކޮށްލާފައިވާ ކަމަށް ޔަމަނުގެ ސަރުކާރު ސިފައިން ހާމަކޮށްފި އެވެ.

ޔަމަނުގެ ސަރުކާރު ސިފައިން ވަނީ އެކި ސަރަހައްދުތަކުގައި ހޫޘީ ހަނގުރާމަވެރިންނާއި އެ މީހުންގެ އުޅަނދުތަކަށް އަމާޒުކޮށް ދިން ހަމަލާތައް ފެންނަ ބައެއް ވީޑިއޯތައް އާންމުކޮށްފަ އެވެ.

މާރިބް ގަވަރުނަރޭޓްގެ ހުޅަނގު ސަރަހައްދުގައި ހަރަކާތްތެރިވާ ސަރުކާރު ސިފައިން ބުނި ގޮތުގައި، ހޫޘީންގެ ހަނގުރާމަވެރި ނުވަ އުޅަނދެއް ވަނީ ހަލާކުކޮށްލާފަ އެވެ. އަދި އެ އުޅަނދުތަކުގައި ތިބި ހުރިހާ ހަނގުރާމަވެރިން މި ހަމަލާތަކުގައި މަރުވެފައިވާ ކަމަށް ވެސް ސަރުކާރު ސިފައިން ބުނެފައިވެ އެވެ.

މީގެ އިތުރުން، މާރިބްގެ އުތުރު ސަރަހައްދުގައި ހޫޘީން ގާއިމުވެ ތިބި މަރުކަޒުތަކަށް ޑްރޯން ބޭނުންކޮށްގެން ވަރުގަދަ ހަމަލާތަކެއް ދީފައިވާ ކަމަށް ވެސް ފަހުން އާންމުކުރި މައުލޫމާތުތަކުގައި ސަރުކާރު ސިފައިން ވަނީ ހާމަކޮށްފަ އެވެ.

ޔަމަނުގެ އަސްކަރިއްޔާއިން ރިޕޯޓްކޮށްފައިވާ ގޮތުގައި، ކަހްބޫބްގައި ހުރި ސަރުކާރުގެ މަރުކަޒުތަކަށް ހޫޘީން ދޭން އުޅުނު ހަމަލާއެއް ވަނީ ނާކާމިޔާބުކޮށްލާފަ އެވެ. ތިން ގަޑިއިރަށްވުރެ ގިނަ އިރަށް ދެމިގެންދިޔަ މި ކުރިމަތިލުންތަކުގައި، ހޫޘީން ދިން ތިން ހަމަލާއެއް ފަހަތަށް ޖައްސައި، ހަމަލާދޭން އައި މީހުން ފަހާ ދުވެފައިވާ ކަމަށް ވެސް ޔަަމަނުގެ އަސްކަރިއްޔާއިން ބުނެފައިވެ އެވެ.

ޔަމަނުގެ ތާއިޒްގެ ސަރަހައްދުގައި ހިނގި ކުރިމަތިލުންތަކުގައި ހޫޘީންގެ 30 ހަނގުރާމަވެރިން މަރާލާފައިވާ ކަމަށް އެ ގައުމުގެ ސަރުކާރުގެ ފައުޖުތަކުން ބުނެފި އެވެ. ތާއިޒްގެ ހުޅަނގު ސަރަހައްދުތަކުގައި، ހާއްސަކޮށް އަލް-ވަޒީއިއްޔާ ޑިސްޓްރިކްޓާއި އަލް-ޛަރީފާ ކައުންޓަރާ ދިމާލުގައި ސަރުކާރުގެ ފައުޖުތަކާއި ހޫޘީންނާ ދެމެދު ހިނގި ވަރުގަދަ ކުރިމަތިލުންތަކުގައި ހޫޘީންގެ 30 މީހަކު މަރުވެ، އިތުރު 60 މީހަކު ވަނީ ޒަހަމްވެފަ އެވެ. ނަމަވެސް މި އަދަދުތަކަކީ މިނިވަން މުއައްސަސާއަކުން ކަށަވަރުކޮށްދީފައިވާ އަދަދުތަކެއް ނޫނެވެ.

މީގެ އިތުރުން، ތާއިޒްގެ އަލް-ޛިކްރާ ޖަންކްޝަނާއި، އަލް-ދަމްނާ އަދި އަލް-ރަހީދާ ސަރަހައްދުގައި ހުރި ހޫޘީންގެ މަރުކަޒުތަކަށް ވައިގެ މަގުން ހަމަލާދީފައިވާ ކަމަށް ވެސް ސަރުކާރުގެ ފައުޖުތަކުން ބުނެފައިވެ އެވެ.

މީގެ އިތުރުން މުޚާ ސަރަހައްދުގައި ހޫޘީންގެ ހަރަކާތްތަކާއި، އެ މީހުންނަށް ފޮނުވާ އެހީގެ ސާމާނާއި، އެ ސަރަހައްދަށް ވަދެވެން އޮންނަ މަގުތަކަށް އަމާޒުކޮށް ސަރުކާރުގެ ފައުޖުތަކުން ވަނީ ހަމަލާތަކެއް ދީފަ އެވެ. މިއީ ހޫޘީންނަށް ބޭނުންވާ ސާމާނު ފޯރުކޮށްދިނުން ހުއްޓުވައި، އައްސޭރިފަށުގެ ސަރަހައްދުތަކަށް އެ މީހުން ކުރިއެރުން ހޯދިޔަ ނުދިނުމަށްޓަކައި ދިން ހަމަލާތަކެއް ކަމަށް ޔަމަނުގެ ސަރުކާރުން ބުނެ އެވެ.

2026 ސެޕްޓެމްބަރު 18: "ޖަންފަދާ-ޔޭ-އީރާން" ކެމްޕޭނުގައި އަންހެނުން ވެސް ވަނީ ރަޖިސްޓްރީވެފައި

ތެހެރާންގެ މަޝްހޫރު އިންގިލާބު މައިދާނަށް އެތަށް ހާސް ބަޔަކު އެއްވެފައިވަނީ، އެ ގައުމުގެ ސަރުކާރަށް ތާއީދުކުރާކަން ހާމަކުރުމަށެވެ. 

ތެހެރާންގެ ގާޑް ޗީފް ހަސަން ހަސަންޒާދީ ވަނީ "ޖަންފަދާ-ޔޭ-އީރާން" ކެމްޕޭނުގައި 600،000 އަށްވުރެ ގިނަ ރައްޔިތުން ރަޖިސްޓްރީވެފައިވާކަމަށް ވިދާޅުވެފަ އެވެ. އަދި މިއަދަދު އެއް މިލިއަނަށް އަރާނެކަމަށް ބެލެވޭކަމަށް ވެސް އޭނާ ވަނީ ވިދާޅުވެފަ އެވެ.

މިއީ އީރާނުގެ ރައްޔިތުން ތިބީ އެކަތިގަނޑެއްގެ ގޮތުގައިކަމާއި ގައުމަށްޓަކައި ގުރުބާންވުމަށް ވެސް އެމީހުން ތައްޔާރަށް ތިބިކަން ދެއްކުމަށްޓަކައި އީރާނުން އިންތިޒާމުކުރި ބޮޑު ހަރަކާތެކެވެ.

މި ކެމްޕޭނުގެ ދަށުން އުފައްދާފައިވާ ޔުނިޓުތަކުގައި އަންހެނުންނާއި ފުރާވަރުގެ ކުދިން ވެސް ވަނީ ރަޖިސްޓްރީވެފަ އެވެ. އެހެންކަމުން، ގައުމަށް ދިމާވާ ކޮންމެ ނުރައްކާތެރި ހާލަތެއްގައި ނުވަތަ ހަނގުރާމައެއްގެ ވަގުތުގައި މި މީހުން ނެރެވޭނެ އެވެ. މި މީހުންނަށް ތަމްރީނު ދޭނީ އީރާނުގެ އިންޓީރިއާ މިނިސްޓްރީގެ ދަށުން ހިންގާ ބަސީޖް ފޯސްއިންނެވެ. މިއީ ރިޒާވް ސިފައިންގެ ޔުނިޓަކާ އެއްފަދަ ބައެކެވެ.

މި އެއްވުމުގައި ބައިވެރިވެވަޑައިގެން ވާހަކަފުޅު ދައްކަވަމުން އީރާންގެ ރައީސް މަސްއޫދު ޕެޒެޝްކިއާން ވިދާޅުވީ، މިއީ ގައުމީ އެއްބައިވަންތަކަން ދައްކުވައިދޭ ހަރަކާތެއް ކަމަށެވެ. މިއީ އީރާނަށް ހަމަލާދެމުންދާ އެމެރިކާއާއި އިސްރާއީލު ފަދަ ގައުމުތަކަށް ދޭ މެސެޖެއްގެ އިތުރުން، ކޮންމެ ފަދަ ނުރައްކާތެރި ހާލަތަކަށް ވެސް ރައްޔިތުން ތިބީ ތައްޔާރަށްކަން އީރާނުން ސާބިތުކޮށްދިނުމަށް ބޭއްވި ހަރަކާތެއް ކަމަށް ވެސް ރައީސް ޕެޒެޝްކިއާން ވިދާޅުވި އެވެ.

ހަނގުރާމަ ފެށުނު ފަހުން އީރާނުގެ ސަރުކާރަށް ތާއީދުކޮށް ބޭއްވި އެންމެ ބޮޑު މުޒާހަރާގައި، އެތައް ހާސް ބަޔަކު ވަނީ ތެހެރާނުގެ މަގުތަކަށް ނުކުމެފައި

ހަނގުރާމަ ފެށުނު ފަހުން އީރާނުގެ ސަރުކާރަށް ތާއީދުކޮށް ބޭއްވި އެންމެ ބޮޑު މުޒާހަރާގައި، އެތައް ހާސް ބަޔަކު ތެހެރާންގެ މަގުތަކަށް ނުކުމެ އެމީހުންގެ ވަރުގަދަ އަޒުމް ދައްކާލައިފި އެވެ.

ހުކުރު ދުވަހު ބޭއްވި މި ބޮޑު އެއްވުމުގައި، މިދިޔަ ފެބްރުއަރީ މަހު އެމެރިކާއާއި އިސްރާއީލުން އީރާނަށް ދިން ހަމަލާތަކަށްފަހު، ގައުމުގެ ދިފާއުގައި ހަތިޔާރު އުފުލުމަށް ތައްޔާރަށް ތިބިކަމުގެ ވައުދު އެތައް ހާސް ބަޔަކު ވަނީ އައުކޮށްފަ އެވެ.

އެމެރިކާއިން އީރާނުގެ ބަނދަރުތައް ބަންދުކޮށް، އިގްތިސާދީ ގޮތުން ދަތިކުރުމަށް އަޅާފައިވާ އައު ފިޔަވަޅުތަކުގެ ސަބަބުން ގައުމުގެ ހާލަތު ގޯސްވަމުންދިޔަ ނަމަވެސް، އީރާނު ސަރުކާރުން ދަނީ ރައްޔިތުން އެއްގަލަކަށް އަރުވައި، ގައުމީ އެއްބައިވަންތަކަން ވަރުގަދަކުރުމަށް މަސައްކަތް ކުރަމުންނެވެ.

"އީރާނަށްޓަކައި ފުރާނަ ގުރުބާންކުރާ މީހުން" ގެ ނަމުގައި ކުރިއަށްގެންދާ މި ހަރަކާތުގެ ބައިވެރިން އަސްކަރީ ޔުނީފޯމުގައި، ދިދަ ހިފައިގެން ތެހެރާންގެ މެދުތެރޭގެ މަގުތަކުގައި ހިނގާލުން ބޭއްވިއިރު، މަގުގެ ދެފަރާތުގައި ތިބި އާންމުން ދިޔައީ އެމީހުންނަށް ހިތްވަރުދެމުންނެވެ.

އެމެރިކާގެ ރައީސް ޑޮނަލްޑް ޓްރަމްޕް ނޫސްވެރިންނާ ބައްދަލުކުރައްވައި ވާހަކަފުޅު ދައްކަވަނީ

އީރާނާއެކު ކުރަމުންދާ ހަނގުރާމައަށް 7 މަސް ފުރެން ކައިރިވެފައިވާއިރު، ހަނގުރާމަ ނިމޭނެ ސީދާ ތާރީޚެއް ނޭނގޭތީ، އެ ގައުމު "ފުނޑުފުނޑުކޮށްލުމާ" މެދު ވިސްނަވަމުން ގެންދަވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ބުރާސްފަތި ދުވަހު "އެކްސިއޯސް" އަށް ދެއްވި ބަސްދީގަތުމެއްގައި ރައީސް ޓްރަމްޕް ވިދާޅުވީ، ކުރިއަށް އޮތީ ވަރަށް ބޮޑު ނިންމުމެއް ނިންމަންޖެހޭ ވަގުތެއް ކަމަށެވެ. އަދި އީރާނަށް އަރައިގަނެ އެ ގައުމު އެއްކޮށް ސުންނާފަތިކޮށްލާނީތޯ ނުވަތަ ނޫންތޯ ނިންމުމަކީ ބޮޑު ނިންމުމެއް ކަމަށާއި، އޭނާގެ ފަރާތުން ކޮންމެ ފަދަ ކަމެއް ވެސް ފެނިދާނެ ކަމަށް ޓްރަމްޕް ވިދާޅުވި އެވެ.

އީރާނާ ބެހޭގޮތުން ވާހަކަދައްކަވަމުން ޓްރަމްޕް މީގެ ކުރިން ވެސް ވަނީ ބިރުވެރި، ހަރުކަށި ބަސްމަގު ބޭނުންކުރައްވާފަ އެވެ. އެގޮތުން މިދިޔަ އޭޕްރީލް މަހު ޓްރޫތު ސޯޝަލްގައި ކުރެއްވި ޕޯސްޓެއްގައި، މުޅި ހަޟާރާތެއް "މިރޭ" ނެތިގެންދާނެ ކަމަށާއި، އެއީ ދުވަހަކު ވެސް އަނބުރާ އިއާދަނުކުރެވޭނެ ފަދަ ގޮތަކަށް ކަމަށް ޓްރަމްޕް ލިޔުއްވާފައިވެ އެވެ.

އީރާނުން ނިއުކްލިއަރ ހަތިޔާރު ހޯދުން ހުއްޓުވުމަށްޓަކައި މި ހަނގުރާމައަކީ ކޮންމެހެން ކުރަންޖެހޭ ކަމެއް ކަމަށް ޓްރަމްޕް ވިދާޅުވެ ފެއްޓެވި މި ހަނގުރާމަ ހަތަރު ހަފުތާ ނުވަތަ ފަސް ހަފުތާގެ ތެރޭގައި ނިމޭނެ ކަމަށް ޓްރަމްޕް ކުރިން ލަފާކުރެއްވި ނަމަވެސް، މިހާރު ހަނގުރާމަ އޮތީ އެއްވެސް ކޮޅެއްގައި ނުޖެހި ހުއްޓުމަކަށް އައިސްފަ އެވެ. 

މި ހަފުތާގައި ޓްރަމްޕް ވިދާޅުވީ އެމެރިކާއިން މިހާރު އުންމީދު ކުރަނީ ހަނގުރާމައިގެ ނިމުމަކާ ގާތްވެފައިވާ ކަމަށާއި، އެކަމާ ގުޅޭގޮތުން ތެހެރާނާ ސީދާ ވާހަކަދައްކަވާފައިވާ ކަމަށެވެ. އަދި ހަނގުރާމަ ނިމޭނީ ބޮޑަށް ބެލެވޭ ގޮތުގައި އެމެރިކާގެ މިޑްޓާމް އިންތިޚާބަށް ފަހުގައި ކަމަށާއި، އީރާނުން މަސައްކަތް ކުރަނީ އިންތިޚާބަށް ހުރަސްއެޅުމަށްޓަކައި ވީހާވެސް ގިނަ ދުވަހު ހަނގުރާމަ ދެމެހެއްޓުމަށް ކަމަށް ވެސް ޓްރަމްޕް ވިދާޅުވެފައިވެ އެވެ.

މި ހަނގުރާމައިގައި އެމެރިކާ ސިފައިންގެ 18 މީހަކު މަރުވެ، އެތައް ސަތޭކަ ބަޔަކު ޒަޚަމްވެފައިވާ ކަމަށް ޕެންޓަގަނުން ބުނެ އެވެ. އަދި  މިހާތަނަށް އީރާނުގެ 3،000 އަށްވުރެ ގިނަ މީހުން ވަނީ މަރުވެފަ އެވެ.

އެމެރިކާގެ ވައިގެ ސިފައިން ބޭނުންކުރާ، ރާޑާރުތަކަށް ނުފެންނަ ފަދަ ޒަމާނީ "އެފް-35 އޭ" މަރުކާގެ ސްޓެލްތު ފައިޓާ ޖެޓް

އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން، ސައުދީ އަރަބިއްޔާއަށް 48 އެފް-35 މަރުކާގެ ހަނގުރާމަމަތީ ބޯޓު ވިއްކުމުގެ ހުއްދައަކަށް އެ ގައުމުގެ ގާނޫނު ހަދާ މަޖިލީހުގައި އެދިއްޖެ އެވެ. ގާތްގަނޑަކަށް 24.3 ބިލިއަން ޑޮލަރުގެ މި މުއާމަލާތް ކުރިއަށް ގެންދިއުމަށް އެ ސަރުކާރުން މިހާރު ވަނީ ހުށަހަޅާފަ އެވެ.

މިކަމާ ގުޅިގެން އެމެރިކާގެ ސްޓޭޓް ޑިޕާޓްމަންޓުން ބުރާސްފަތި ދުވަހު ނެރުނު ބަޔާނެއްގައި ބުނެފައިވަނީ، މި ވިޔަފާރީގެ ސަބަބުން ގަލްފް ސަރަހައްދުގެ ސިޔާސީ ހަމަޖެހުމާއި އިގުތިސާދީ ކުރިއެރުމަށް މަސައްކަތްކުރާ، ނޭޓޯގައި ނުހިމެނޭ އެމެރިކާގެ މުހިންމު ބައިވެރިއެއްގެ ސަލާމަތީ ކަންކަން ވަރުގަދަވެގެންދާނެ ކަމަށެވެ. އަދި މިއީ އެމެރިކާގެ ބޭރުގެ ސިޔާސަތުތަކާއި ގައުމީ ސަލާމަތާ ގުޅޭ މަގުސަދުތަކަށް ލިބޭނެ ބޮޑު އެހީތެރިކަމެއްގެ ގޮތުގައި އެ ބަޔާނުގައި ފާހަގަކޮށްފައިވެ އެވެ.

އެމެރިކާގައި ހުންނަ ސައުދީ އަރަބިއްޔާގެ އެމްބަސީން ބުނެފައިވަނީ، މި މުއާމަލާތުން ރަމްޒުކޮށްދެނީ، ސައުދީ އާއި އެމެރިކާއާ ދެމެދު އޮތް ދިފާއީ އެއްބާރުލުން ކުރިއަރަމުންދާ މިންވަރާއި، ދެ ގައުމުގެ ދެމެދުގައި އޮތް ވަރުގަދަ އިސްތިރާތީޖީ ގުޅުން ކަމަށެވެ.

މިކަމާ ގުޅޭގޮތުން ސައުދީ އެމްބަސީން އެކްސްގައި ކުރި ޕޯސްޓެއްގައި ބުނެފައިވަނީ، ވޭތުވެދިޔަ އެތައް އަހަރެއްގެ ތެރޭގައި ސައުދީ އާއި އެމެރިކާއާ ދެމެދު އޮތް ސަލާމަތީ އެއްބާރުލުމުގެ ސަބަބުން ސަރަހައްދީ ހަމަޖެހުމަށް މަގުފަހިވެފައިވާ ކަމަށެވެ. އަދި މި ގުޅުމުގެ ސަބަބުން ދެ ގައުމުގެ ދިފާއީ ގާބިލުކަން އިތުރުވެ، ސަލާމަތީ ގޮތުން ދެ ގައުމުން އިސްކަންދޭ ކަންކަން ހާސިލުކުރުމަށް ބޮޑެތި ކުރިއެރުންތަކެއް ލިބިފައިވާ ކަމަށް ވެސް އެމްބަސީން ފާހަގަކޮށްފައިވެ އެވެ.

އެމެރިކާ އާއި އިސްރާއީލުން ދެމުންދާ ހަމަލާތަކުގެ ބަދަލުހިފުމުގެ ގޮތުން، ބަހްރައިންގެ މަނާމާގައި ހުންނަ އެމެރިކާގެ ކަނޑުގެ ސިފައިންގެ ފަސްވަނަ ފްލީޓްގެ މައި މަރުކަޒަށް އީރާނުން މިސައިލް ހަމަލާތަކެއް ދިނުމާ ގުޅިގެން، އެ ސަރަހައްދުން ދުން އަރަމުންދަނީ. މި ހަމަލާ އީރާނުން ދީފައިވަނީ 2026 ވަނަ އަހަރުގެ ފެބްރުއަރީ މަހުގެ 28 ވާ ހޮނިހިރު ދުވަހު

އެމެރިކާއާއި އީރާނާ ދެމެދު ހިނގަމުންދާ ހަނގުރާމައިގެ ސަބަބުން، އެ ހަނގުރާމައިގެ ފުރަތަމަ މަސްދުވަހުގެ ތެރޭގައި އެކަނިވެސް އަރަބި ގައުމުތަކުގެ އިގުތިސާދަށް ގާތްގަނޑަކަށް 150 ބިލިއަން ޑޮލަރުގެ ގެއްލުންވެފައިވާ ކަމަށް އދ. ގެ އިސް އޮފިޝަލަކު ވިދާޅުވެއްޖެ އެވެ.

އދ. ގެ އިކޮނޮމިކް އެންޑް ސޯޝަލް ކޮމިޝަން ފޯރ ވެސްޓަން އޭޝިއާ (އެސްކުވާ) ގެ އެގްޒެކެޓިވް ސެކްރެޓަރީ ރާނިއާ އަލް މަޝާތު ވިދާޅުވީ، މި ގެއްލުމަކީ އެ ސަރަހައްދުގެ ޖުމްލަ އުފެއްދުންތެރިކަމުގެ ނިސްބަތް ނުވަތަ ޖީޑީޕީގެ ގާތްގަނޑަކަށް 4 އިންސައްތަ ކަމަށެވެ.

ކަނޑުމަތީގެ ސަލާމަތާއި ރައްކާތެރިކަމާ ގުޅޭގޮތުން އދ. ގެ ސަލާމަތީ މަޖިލީހުގައި ބޭއްވި ނުރަސްމީ ބައްދަލުވުމެއްގައި ވާހަކަދައްކަވަމުން އަލް މަޝާތު ވިދާޅުވީ، ހުރްމުޒް ކަނޑުއޮޅިއާއި ބާބުލް މަންދަބް ކަނޑުއޮޅިން ދަތުރުފަތުރު ކުރުމަށް ކުރިމަތިވެފައިވާ ނުރައްކާތަކުގެ ސަބަބުން، ސަލާމަތީ ކަންކަމުގެ އިތުރުން ވިޔަފާރިއާއި އިގުތިސާދީ ހަމަޖެހުމާއި އަސާސީ މުދާ ހޯދުމަށް ބޮޑެތި ހުރަސްތަކެއް ކުރިމަތިވެފައިވާ ކަމަށެވެ.

އޭނާ ވިދާޅުވީ ދުނިޔޭގެ ކަނޑުމަގުން ކުރާ ތެލުގެ ވިޔަފާރީގެ 25 އިންސައްތަ އަދި ގުދުރަތީ ގޭހުގެ ވިޔަފާރީގެ 19 އިންސައްތަ ހިއްސާކުރަނީ ހުރްމުޒް ކަނޑުއޮޅިން ކުރާ ދަތުރުތަކެވެ. މީގެ އިތުރުން ގަލްފުގެ ގައުމުތަކަކީ އެމޯނިއާ، ގަސްކާނާ، ސަލްފާ އަދި އެލްމިނިއަމް ފަދަ ތަކެތި ދުނިޔެއަށް އެންމެ ގިނައިން ބޭރުކުރާ ގައުމުތަކެވެ.

މި ހަނގުރާމައިގެ ސަބަބުން އަރަބި ދުނިޔޭގެ އިންވެސްޓްމަންޓްތަކާއި އިގުތިސާދު ސިންދަފާތު ކުރުމަށް ކުރާ މަސައްކަތްތަކަށް މަޑުޖެހުމެއް އަތުވެދާނެ ކަމުގެ އިންޒާރު އަލް މަޝާތު ދެއްވި އެވެ. އަދި ހަނގުރާމަ އިތުރަށް ފުޅާވިޔަނުދީ ހުއްޓުވުމަށާއި، ކަނޑުމަގުން މިނިވަންކަމާއެކު ދަތުރުފަތުރު ކުރުމުގެ ފުރުސަތު ދެމެހެއްޓުމަށާއި، އަސާސީ ޚިދުމަތްތަކާއި މުދާ ފޯރުކޮށްދިނުމަށް ކުރިމަތިވެދާނެ އިތުރު ހުރަސްތަކަށް ސަރަހައްދީ ފެންވަރުގައި ތައްޔާރުވުމަށް އޭނާ ގޮވާލެއްވި އެވެ.

ހުރްމުޒް ކަނޑުއޮޅިން ދަތުރުކުރަމުންދާ ތެޔޮު ޓޭންކަރެއް

ދުނިޔޭގެ ބާޒާރުގައި ތެލުގެ އަގުތައް ކުރިން ހުރި މަތީ މިންވަރުން ގާތްގަނޑަކަށް 1 އިންސައްތަ ދަށަށް ގޮސްފި އެވެ. މިއީ ޖެހިޖެހިގެން ތެލުގެ އަގު ދަށަށް ދިޔަ ތިންވަނަ ދުވަސް ކަމުގައި ވީނަމަވެސް، ހުކުރު ދުވަހު ވެސް ސާފުނުކުރާ ތެޔޮ ފީފާއެއްގެ އަގު ހުރީ 100 ޑޮލަރަށްވުރެ މަތީގަ އެވެ. ތެލުގެ އަގުތަކަށް މި ބަދަލު އައިސްފައިވަނީ ސައުދީ އަރަބިއްޔާއާއި ޔަމަނުގެ ހޫޘީންނާ ދެމެދު ވައިގެ މަގުން ހަމަލާތައް ބަދަލުކުރަމުން ދިޔަ ނަމަވެސް، މެދުއިރުމަތީގެ ތެޔޮ ބައިނަލްއަގުވާމީ ބާޒާރަށް ފޯރުކޮށްދިނުމަށް އިތުރު މަގުތަކެއް ހޯދޭނެ ކަމުގެ އުންމީދު ބޮޑުވުމާ ގުޅިގެންނެވެ.

ހުކުރު ދުވަހުގައި ބްރެންޓް ކްރޫޑް ފިއުޗާސްގެ އަގު 1.01 ޑޮލަރު ނުވަތަ 1 އިންސައްތަ ދަށަށް ގޮސް، ފީފާއެއްގެ އަގު ވަނީ 103.77 ޑޮލަރަށް ތިރިވެފަ އެވެ. ހަމައެއާއެކު އެމެރިކާގެ ވެސްޓް ޓެކްސަސް އިންޓަމީޑިއޭޓް (ޑަބްލިއުޓީއައި) ފިއުޗާސްގެ އަގު 1.03 ޑޮލަރު ނުވަތަ 1 އިންސައްތަ ދަށަށް ގޮސް، ފީފާއެއްގެ އަގު ވަނީ 100.88 ޑޮލަރަށް ތިރިވެފަ އެވެ. ބުރާސްފަތި ދުވަހު ބާޒާރު ބަންދުވިއިރު ވެސް މި ދެ ބާވަތުގެ ތެލުގެ އަގު ވަނީ ގާތްގަނޑަކަށް 1 އިންސައްތަ ދަށަށް ގޮސްފަ އެވެ.