މެދުއިރުމަތީ ހަނގުރާމަ

ޔަމަނުގެ ހުޅަނގު ދެކުނުގައި އޮންނަ ތާއިޒް ސިޓީގައި ބާރުގަދަ ގޮވުންތަކެއް ގޮވައި، އެ ސިޓީ ސިއްސުވާލާފައިވާ ކަމަށް އަލްޖަޒީރާ އިން ރިޕޯޓުކޮށްފި އެވެ.

މި ހާދިސާ ހިނގާފައި މިވަނީ، ތާއިޒްގެ ސަލާމަތީ ކަންކަން ވަރުގަދަކޮށް، އެ ސިޓީގެ އެލާޓް ލެވެލް މަތިކޮށްފައިވާ ކަމަށް އެ ސިޓީގެ ކަމާބެހޭ އިދާރާތަކުން އަންގާރަ ދުވަހުގެ ކުރީކޮޅު އިއުލާނުކޮށް، އިތުރު ސަލާމަތީ ފައުޖުތައް އެ ސަރަހައްދުގައި ހަރަކާތްތެރިވާން ފަށާފައި ވަނިކޮށެވެ.

އދ.ގެ އާންމު މަޖިލީހުގެ ބައްދަލުވުމަށް ނިއުޔޯކަށް ވަޑައިގެން ތިއްބެވި އީރާނުގެ އިސް އޮފިޝަލުންނާ ބައްދަލުކުރެއްވުމަށް އެމެރިކާގެ ރައީސް ޑޮނަލްޑް ޓްރަމްޕް ޝައުގުވެރިކަން ފާޅުކުރައްވާފައިވާ ކަމަށް އެމެރިކާގެ މީޑިއާތަކުން ރިޕޯޓްކޮށްފި އެވެ.

އެމެރިކާގެ އޮފިޝަލަކާ ހަވާލާދީ ސީއެންއެން އިން ރިޕޯޓްކޮށްފައިވާ ގޮތުގައި، "މަސްލަހަތު ހުރި ގޮތަށް ކަންކަން ހަމަޖެހިއްޖެ ނަމަ"، މިހާރު ހިނގަމުންދާ ހަނގުރާމައާ ގުޅޭގޮތުން މަޝްވަރާކުރުމަށް ބައްދަލުވުމެއް އިންތިޒާމުކުރުމަށް ބޭނުންފުޅުވާކަން ޓްރަމްޕް ވަނީ އެމަނިކުފާނުގެ އޮފިޝަލުންނަށް އަންގަވާފަ އެވެ.

އެމެރިކާގެ މީޑިއާތަކުން ބުނާ ގޮތުގައި، މިފަދަ ބައްދަލުވުމެއް ބާއްވައިފި ނަމަ، ޓްރަމްޕްގެ އިސް އޮފިޝަލުން ވެސް އެ ބައްދަލުވުމުގައި ބައިވެރިވެވަޑައިގަންނަވާނެ އެވެ.

އީރާނުގެ ފޮރިން މިނިސްޓަރު އައްބާސް އަރަގްޗީ މިހާރު ނިއުޔޯކަށް ވަޑައިގެންފައިވާއިރު، އެ ގައުމުގެ ރައީސް މަސްއޫދު ޕެޒެޝްކިއާން ކުރިއަށް އޮތް މަދު ގަޑިއިރުތަކެއްގެ ތެރޭގައި ނިއުޔޯކަށް ވަޑައިގަންނަވާނެ ކަމަށް ބެލެވެ އެވެ.

ސައުދީ އަރަބިއްޔާގެ ރަސްގެފާނު ސަލްމާން ބިން އަބްދުލްއަޒީޒް، 2026 ވަނަ އަހަރުގެ ސެޕްޓެމްބަރު މަހުގެ 22 ވީ އަންގާރަ ދުވަހު ޖިއްދާގައި ބޭއްވި ވަޒީރުންގެ މަޖިލީހުގެ ބައްދަލުވުމުގެ ރިޔާސަތު ބަލަހައްޓަވަނީ

ޔަމަނުގެ ހޫޘީ ހަނގުރާމަވެރިން މައްކާއަށް އަމާޒުކޮށް ދޭން އުޅުނު ހަމަލާ، ސައުދީ އަރަބިއްޔާގެ ރަސްގެފާނު ސަލްމާން ބިން އަބްދުލްއަޒީޒް އަންގާރަ ދުވަހު ވަނީ ހަރުކަށި އިބާރާތުން ކުށްވެރިކުރައްވާފަ އެވެ. ރަސްގެފާނު މި އަމަލު ސިފަކުރެއްވީ އެއީ އިސްލާމީ މުގައްދަސް ބިނާތަކުގެ ހުރުމަތް ކެނޑުމުގެ ގޮތުން ހިންގި "ލަދުވެތި ޖަރީމާއެއް" ގެ ގޮތުގަ އެވެ.

ހޫޘީ ހަނގުރާމަވެރިން ތަކުރާރުކޮށް މުގައްދަސް ބިނާތަކުގެ ހުރުމަތް ކަނޑަމުންދާ ދިއުމަކީ، މުޅި ދުނިޔޭގެ މުސްލިމުންގެ ޝުއޫރުތަކާ ކުޅެލުން ކަމަށް ރަސްގެފާނު ވިދާޅުވި އެވެ.

މީގެ އިތުރުން، މުގައްދަސް ބިނާތަކަށާއި ހައްޖުވެރިންނަށް އަމާޒުކޮށްދޭ ހަމަލާތައް ހުއްޓުވުމުގައި ސައުދީ އަރަބިއްޔާގެ އަސްކަރީ ދާއިރާތަކުން އަދާކުރަމުންދާ މުހިންމު ދައުރަށް ރަސްގެފާނު ސަލްމާން ވަނީ ތައުރީފު ކުރައްވާފަ އެވެ.

އިސްރާއީލުން ފަލަސްތީނުގެ ބިންތަކުގައި ޣައިރު ގާނޫނީ ގޮތުން ހަދާފައިވާ އާބާދުވުންތަކުގައި އުފައްދާ މުދާ، ބެލްޖިއަމް އަދި ނެދަލޭންޑްސްގެ ބާޒާރުތަކަށް އެތެރެކުރުން ހުއްޓުވުމަށް އެ ދެ ގައުމުން ފިޔަވަޅު އަޅަން ފަށައިފި އެވެ.

ޔޫރަޕިއަން ޔޫނިއަން (އީޔޫ) އަށް ނިސްބަތްވާ މި ދެ ގައުމަކީ، އިސްރާއީލުގެ އާބާދުވުންތަކުގައި އުފައްދާ ތަކެތި އެތެރެކުރުން މަނާކުރުމަށް އަޔަލޭންޑް، ސްލޮވީނިއާ އަދި ސްޕެއިން ފަދަ ގައުމުތަކުން އަޅާފައިވާ ފިޔަވަޅުތަކާ ގުޅުނު އެންމެ ފަހުގެ ދެ ގައުމެވެ.

ޔޫރަޕިއަން ކޮމިޝަނުން ހާމަކޮށްފައިވާ ތަފާސްހިސާބުތަކަށް ބަލާއިރު، ޔޫރަޕިއަން ޔޫނިއަން (އީޔޫ) އަކީ އިސްރާއީލުގެ އެންމެ ބޮޑު ވިޔަފާރި ބައިވެރިޔާ އެވެ. އެގޮތުން 2025 ވަނަ އަހަރު އިސްރާއީލުން ކުރި މުދަލުގެ ވިޔަފާރީގެ 31.7 އިންސައްތަ ހިއްސާކުރަނީ އީޔޫއިންނެވެ. މިއީ ގާތްގަނޑަކަށް 50.4 ބިލިއަން އެމެރިކާ ޑޮލަރެވެ.

އީޔޫގެ ގައުމުތަކުގެ ތެރެއިން އިސްރާއީލާއެކު އެންމެ ފުޅާދާއިރާއެއްގައި ވިޔަފާރިކުރަނީ އަޔަރލޭންޑް، ނެދަލޭންޑްސް އަދި ޖަރުމަނުވިލާތުންނެވެ. ބައިނަލްއަގުވާމީ ގާނޫނުތަކުގެ ދަށުން، އިސްރާއީލުން ފަލަސްތީނުގެ ބިންތަކުގައި ހަދަމުންދާ އާބާދީތަކަކީ ޣައިރު ގާނޫނީ ބިނާތަކެކެވެ. ސަބަބަކީ، އިސްތިއުމާރުކޮށްގެން އުޅޭ ބާރަކުން އެ ގައުމެއްގެ އާބާދީ، ހިފާފައިވާ ސަރަހައްދުތަކަށް ބަދަލުކުރުން މަނާކުރާ ހަތަރުވަނަ ޖެނީވާ ކޮންވެންޝަނާ މި އާބާދީތައް ޚިލާފުވާތީ އެވެ.

ފަލަސްތީނަށް އިސްތިގުލާލީ މިނިވަންކަމެއް ހޯދައިދީ، ދާއިމީ ސުލްހައަކަށް މަގުފަހިކުރުމަށް 1993 ވަނަ އަހަރު ގާއިމުކުރި އޮސްލޯ އެކޯޑަށް އެތައް އަހަރެއް ވެފައިވީ ނަމަވެސް، އިސްރާއީލުގެ ޣައިރު ގާނޫނީ އާބާދީތައް ދަނީ ހުއްޓުމެއް ނެތް ގޮތެއްގައި ފުޅާވަމުންނެވެ. އޮސްލޯ އެކޯޑްގައި ސޮއިކުރި ދުވަސްވަރު، އިސްރާއީލުން ހިފާފައިވާ ސަރަހައްދުތަކުގައި ދިރިއުޅެމުންދިޔައީ ގާތްގަނޑަކަށް 270،000 ވަޒަންވެރިންނެވެ. ނަމަވެސް، މިއަދު އެ އަދަދު ވަނީ ދެގުނައަށްވުރެ ބޮޑުވެ، 600،000 އާއި 750،000 އާ ދެމެދުގެ އަދަދަކަށް އިތުރުވެފަ އެވެ. މިއީ އިސްރާއީލުގެ ޔަހޫދީ އާބާދީގެ ގާތްގަނޑަކަށް 10 އިންސައްތަ އެވެ. މި މީހުން ދިރިއުޅެމުންދަނީ ހިފާފައިވާ ހުޅަނގު އައްސޭރިއާއި އިރުމަތީ ގުދުސްގައި ގާއިމުކޮށްފައިވާ ގާތްގަނޑަކަށް 250 އަށްވުރެ ގިނަ ޣައިރު ގާނޫނީ އާބާދީތަކުގަ އެވެ.

ފަލަސްތީނުގެ އިސްތިއުމާރުކޮށްފައިވާ ބިންތަކުގައި އުފައްދާ އިސްރާއީލުގެ އުފެއްދުންތައް ބޭން ކުރުމަށް ގޮވާލައި، ހިފާފައިވާ ހުޅަނގު އައްސޭރީގެ ބެތްލެހެމްގެ ފާރެއްގައި ކުރަހާފައިވާ ބޯޑެއް

ޣައްޒާގެ "ސުލްހައިގެ" މަޝްރޫއުގެ ފުރަތަމަ މަރުހަލާގެ ދަށުން އިސްރާއީލުން ވެފައިވާ އިގުރާރުތަކަށް އަމަލުކުރުމަށާއި، އޭގެ ތެރޭގައި ހިމެނޭ "ވަގުތުން، ރައްކާތެރިކަމާއެކު އަދި އެއްވެސް ހުރަހެއް ނެތި" އިންސާނީ އެހީ ފޯރުކޮށްދިނުމުގެ ފުރުސަތު ދިނުމަށް މުސްލިމް 8 ގައުމެއްގެ ޚާރިޖީ ވަޒީރުން ގޮވާލައްވައިފި އެވެ.

ތުރުކީ، މިސްރު، އިންޑޮނޭޝިއާ، އުރުދުން، ޕާކިސްތާން، ގަތަރު، ސައުދީ އަރަބިއްޔާ އަދި ޔޫއޭއީގެ ޚާރިޖީ ވަޒީރުން ނެރުއްވި ގުޅިފައިވާ ބަޔާނެއްގައި، ޣައްޒާގައި އިންސާނީ ކަންތައްތައް އިންތިހާއަށް ގޯސްވަމުންދާތީ އެކަމާ މެދު ނުހަނު ކަންބޮޑުވުން ފާޅުކުރައްވާފައިވެ އެވެ. އަދި ހަމަލާ ބަދަލުކުރުން ހުއްޓާލާފައި އޮތް އޮތުން ދެމެހެއްޓުމަށާއި، އެއްބަސްވުމާ ޚިލާފަށް ހިންގާ ހުރިހާ އަމަލުތަކެއް ހުއްޓާލުމުގެ މުހިންމުކަން އެ ވަޒީރުން ވަނީ ފާހަގަކުރައްވާފަ އެވެ.

މީގެ އިތުރުން، ފަލަސްތީނުގެ ރައްޔިތުން އެމީހުންގެ ވަޒަނުން ބޭރުކޮށްލުމަށް ނުވަތަ މަޖުބޫރުން ހިޖުރަކުރުވުމަށް ކުރާ އެއްވެސް މަސައްކަތެއް ބަލައިނުގަންނާނެ ކަމަށާއި، އިސްރާއީލުން ހިފާފައިވާ ފަލަސްތީނުގެ ބިންތަކުގެ އިންތަކަށް ނުވަތަ އެ ބިންތަކުގެ އާބާދީގެ ތަރުތީބަށް ބަދަލު ގެނައުމަށް ކުރާ އެއްވެސް މަސައްކަތަކަށް އެ ގައުމުތަކުން ދެކޮޅު ހަދާކަން އެ ބަޔާނުގައި ތަކުރާރުކޮށްފައިވެ އެވެ.

އެ ވަޒީރުން ވަނީ މި މަޝްރޫއު ތަންފީޒުކުރުމުގައި އެމެރިކާއިން މެދުކެނޑުމެއް ނެތި ބައިވެރިވުމަށް ގޮވާލައްވާފަ އެވެ. އަދި މިނިވަން ފަލަސްތީނުގެ ދައުލަތެއް ގާއިމުކުރުމުގެ މަގުޗާޓާ އެއްގޮތަށް، ޣައްޒާއަކީ ފަލަސްތީނުގެ ބިމުގެ ވަކިނުކުރެވޭނެ ބައެއްގެ ގޮތުގައި އޮންނަންޖެހޭނެ ކަމަށް ވެސް އެ ބަޔާނުގައި ވިދާޅުވެފައިވެ އެވެ.

ޣައްޒާ އަށް އިސްރާއީލުން ދިން ވައިގެ ހަމަލާއެއްގައި ރޯވި އުޅަނދެއްގައި ހުރި އަލިފާންގަނޑު ނިއްވާލުމަށް ފަލަސްތީނުގެ ރައްޔިތުން މަސައްކަތް ކުރަނީ

އީރާނަށް ދިން ހަމަލާތަކަށްފަހު އެމެރިކާގެ ހަތިޔާރުގެ ރަސްމީ މިންވަރު ވަރަށް ބޮޑަށް މަދުވެފައިވާ ކަމަށް ބުނާ ފަރާތްތަކަކީ "ޚާއިނުން" ކަމަށް ސިފަކުރައްވައި، އެމެރިކާގެ ރައީސް ޑޮނަލްޑް ޓްރަމްޕް އެ ފަރާތްތަކަށް ވަރަށް ބޮޑަށް ފާޑުވިދާޅުވެއްޖެ އެވެ.

އީރާނާ ދެކޮޅަށް ކުރަމުންދާ ހަނގުރާމައަށް ގާތްގަނޑަކަށް ހަތް މަސް ދުވަސް ވެފައިވާއިރު، އެމެރިކާގެ އަސްކަރީ ހަތިޔާރުގެ ރަސްމީ މިންވަރު ވަރަށް ބޮޑަށް ހުސްވަމުންދާ ކަމަށް މީޑިއާތަކުން ރިޕޯޓްކުރުމާ ގުޅިގެން، ރައީސް ޓްރަމްޕް ވަނީ އެކަން ދޮގުކުރައްވައި އެ ރިޕޯޓްތައް ކުށްވެރިކުރައްވާފަ އެވެ.

ޓްރަމްޕްގެ އަމިއްލަފުޅު ސޯޝަލް މީޑިއާ ޕްލެޓްފޯމްގައި ކުރެއްވި ޕޯސްޓެއްގައި ވިދާޅުވީ، އެމެރިކާގެ ހަތިޔާރުގެ ރަސްމީ މިންވަރު މަދުވެފައިވާ ކަމަށް ބުނަން ބޭނުންވަނީ ފިނޑިންނާއި ޚާއިނުން ކަމަށާއި، އެއީ އެއްވެސް ހަގީގަތެއް އެކުލެވޭ ވާހަކައެއް ނޫން ކަމަށެވެ.

މީގެ އިތުރުން، އެމެރިކާގައި ބޭނުންކޮށް ހުސްނުކުރެވޭނެހާ ގިނަ އަދަދަކަށް ހަތިޔާރު އެބަހުރި ކަމަށާއި، އަދި މީގެ ކުރިން ދުވަހަކު ވެސް ހަތިޔާރު އުފައްދާފައި ނުވާ މިންވަރަށް މިހާރު ވެސް ހަތިޔާރު އުފައްދަމުންދާ ކަމަށް ޓްރަމްޕް ވިދާޅުވި އެވެ.

އީރާންއާ ކުރަމުންދާ ހަނގުރާމައާ ގުޅިގެން ރައީސް ޓްރަމްޕް ސޯޝަލް މީޑިޔާގައި ކުރައްވާފައިވާ ޕޯސްޓުތަކުގެ ކުރު ދިރާސާއެއް

އެމެރިކާއިން އީރާނަށް ކުރަމުންދާ އަސްކަރީ ފިއްތުންތައް ކުޑަކޮށް، އެ ގައުމުގެ ބަނދަރުތަކަށް އަޅާފައިވާ ދަތިކުރުމުގެ ފިޔަވަޅުތައް އުވާލައިފިނަމަ، ހުރްމުޒް ކަނޑުއޮޅި ހަތް ދުވަހުގެ ތެރޭގައި އަލުން ހުޅުވާލަން ތެހެރާނުން ތައްޔާރަށް އޮތް ކަމަށް ބުނެ ފެތުރެމުންދާ ޚަބަރުތައް އީރާނުގެ މަސްދަރުތަކުން ދޮގުކޮށްފި އެވެ.

މިކަން ހާމަކޮށްފައިވަނީ އީރާނުގެ ސަރުކާރާ ގުޅުން އޮންނަ ފާރްސް ނިއުސް އެޖެންސީންނެވެ.

މީގެ ކުރިން ރޮއިޓާސް އާއި ޖަޕާނުގެ ކިޔޯޑޯ ނިއުސް އެޖެންސީން، އީރާނުގެ އިސް އޮފިޝަލަކާ ހަވާލާދީ ވަކިވަކިން ރިޕޯޓްކޮށްފައިވަނީ، އެމެރިކާއިން އަސްކަރީ ފިއްތުންތައް ކުޑަކޮށް، ބަނދަރުތައް ބަންދުކޮށްފައި އޮތް އޮތުން ނިމުމަކަށް ގެނެސްފިނަމަ، ހުރްމުޒް ކަނޑުއޮޅި ހުޅުވާލުމަށް އީރާނުން ތައްޔާރަށް އޮތް ކަމަށެވެ.

މި ޚަބަރުތަކާ ގުޅިގެން ދުނިޔޭގެ ބާޒާރުގައި ތެލުގެ އަގު ދަށަށް ގޮސްފައިވާކަން ފާހަގަކުރަމުން ފާރްސް ނިއުސް އެޖެންސީން ބުނީ، މިފަދަ ވާހަކަތައް ފެތުރުމުގެ ސަބަބުން ތެލުގެ ބާޒާރަށް ކުރާނެ އަސަރުތަކާއި އޭގެ ނަތީޖާއާ މެދު އީރާނުގެ އޮފިޝަލުން މިހާރަށްވުރެ ބޮޑަށް ސަމާލުވާން ޖެހޭ ކަމަށް މަސްދަރުތަކުން އިންޒާރު ދީފައިވާ ކަމަށެވެ.

އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރްޖީސީ) ގެ ތަރުޖަމާނު ބްރިގޭޑިއަރ ޖެނެރަލް ހުސައިން މުހިއްބީ ވިދާޅުވީ، އައިއާރްޖީސީގެ ކަނޑުގެ ސިފައިންގެ އަތްދަށަށް ދިޔަ މި އުޅަނދުގައި ކުރިއަރާފައިވާ ޓެކްނޮލޮޖީ ހިމެނޭ ކަމަށާއި، އެ ޓެކްނޮލޮޖީ ބޭނުންކޮށްގެން އުޅަނދު ރިވާސް-އެންޖިނިއަރ ކުރުމުގެ މަސައްކަތް ފަށާނެ ކަމަށެވެ.

އީރާނުގެ ދައުލަތުގެ މީޑިއާތަކުން ރިޕޯޓްކޮށްފައިވާ ގޮތުގައި މުހިއްބީ ވިދާޅުވީ، އެމެރިކާ އާއި އިސްރާއީލުން ފަށާފައިވާ ގާތްގަނޑަކަށް ހަތް މަސް ދުވަސްވީ ހަނގުރާމައިގެ ތެރޭގައި އަތުލައިގަނެވުނު އަސްކަރީ އާލާތްތަކުގެ ތެރޭގައި، އިންސާނަކާ ނުލައި ދުއްވާ މި އުޅަނދު ހިމެނޭ ކަމަށެވެ. އަދި އެމެރިކާގެ އަސްކަރީ އަދި ދިފާއީ ސިނާއަތުގައި ބޭނުންކުރާ އެންމެ ޒަމާނީ ޓެކްނޮލޮޖީތައް އީރާނުގެ ކޮންޓްރޯލްގެ ދަށަށް އައިސްފައިވާކަން މި ހަނގުރާމައިން ސާބިތުވެފައިވާ ކަމަށް ވެސް އޭނާ ވިދާޅުވި އެވެ.

އަތުލައިގަނެފައިވާ މި އުޅަނދަކީ ދުރު ރާސްތާގެ ފާރަވެރިވުމުގެ މަސައްކަތްތަކަށާއި ކަނޑުއަޑީގެ އެހެނިހެން މިޝަންތަކަށް ފަރުމާކޮށްފައިވާ "ޑައިވް-އެލްޑީ" މޮޑެލްގެ އަމިއްލައަށް ދުއްވާ އުޅަނދެކެވެ. މިއީ އިންސާނެއްގެ އެހީތެރިކަމާ ނުލައި ގިނަ ދުވަސްތަކެއް ވަންދެން މަސައްކަތް ކުރުމަށް އުފައްދާފައިވާ އައު ޖީލުގެ އަސްކަރީ ޑްރޯންތަކުގެ ތެރޭގައި ހިމެނޭ އުޅަނދެކެވެ.

ރިވާސް އިންޖިނިއަރިންއަކީ، އުފައްދާފައިވާ ވަކި އުފެއްދުމެއް ނުވަތަ ނިޒާމެއް ބިނާކޮށްފައިވާ ގޮތާއި އެ މަސައްކަތްކުރާ ގޮތް ދެނެގަތުމަށްޓަކައި، އެ އެއްޗެއްގެ ފަހު ނަތީޖާއިން ފެށިގެން ފަހަތަށް ދިރާސާކޮށް ތަހުލީލުކުރުމެވެ.

"ޑައިވް-އެލްޑީ" މޮޑެލްގެ އަމިއްލައަށް ދުއްވާ ސަބްމެރީން ޑްރޯންއެއް

ހުރްމުޒް ކަނޑުއޮޅީގައި ދަތުރުފަތުރުކުރުމުގެ މިނިވަންކަން ކަށަވަރުކުރުމަށްޓަކައި، އިންޑިއާއާއެކު ގުޅިގެން މަސައްކަތްކުރުމަށް ފްރާންސް އިން ބޭނުންވާކަން އެ ގައުމުގެ ފޮރިން މިނިސްޓްރީން ހާމަކޮށްފި އެވެ.

ފްރާންސްގެ ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ، އެ ގައުމުގެ ފޮރިން މިނިސްޓަރު ޜޯން-ނޮއެލް ބަރޯ، އިންޑިއާގެ ފޮރިން މިނިސްޓަރު ސުބްރަމާނިއަމް ޖައިޝަންކަރާ ބައްދަލުކުރައްވާފައިވަނީ ނިއުޔޯކުގައި ކުރިއަށްދާ އދ. ގެ އާންމު މަޖިލީހުގެ ހަވާސާގަ އެވެ. 

ހުރްމުޒް ކަނޑުއޮޅިއާއި ބާބުލް މަންދަބް ސަރަހައްދުގައި ސަރަހައްދުތަކަކީ ޔޫރަޕާއި އޭޝިއާގެ ހަމަޖެހުމާއި ތަނަވަސްކަމަށް ނުހަނު މުހިންމު ސަރަހައްދުތަކަކަށް ވާތީ، މިކަމުގައި އިންޑިއާއިން ފްރާންސްއާ ގުޅިގެން މަސައްކަތް ކުރުމަށް މިނިސްޓަރު ބަރޯ ވަނީ ހުށަހަޅުއްވާފަ އެވެ. މީގެ އިތުރުން،  ފްރާންސްގެ ފޮރިން މިނިސްޓްރީގެ ބަޔާނުގައި އިތުރަށް ބުނެފައިވަނީ، ބައިނަލްއަގުވާމީ ގާނޫނުތަކަށް ބޯލެނބުމަށާއި، އިސްލާހުކުރެވިފައިވާ ހަރުދަނާ މަލްޓިލޭޓަރަލް ނިޒާމަކަށް ތާއީދުކުރުމުގައި ފްރާންސް އާއި އިންޑިއާއިން ދެމިއޮންނާނެކަމުގެ ޔަގީންކަން މި ބައްދަލުވުމުގައި ދެ މިނިސްޓަރުން ތަކުރާރުކުރެއްވި ކަމަށެވެ.

ފްރާންސްގެ ފޮރިން މިނިސްޓަރު ޜޯން-ނޮއެލް ބަރޯ އަދި އިންޑިއާގެ ފޮރިން މިނިސްޓަރު ސުބްރަމާނިއަމް ޖައިޝަންކަރު - ފައިލް ފޮޓޯ

ޔަމަނުގެ ސަރުކާރުގެ ފައުޖުތަކާއި ހޫޘީންނާ ދެމެދު އަލް-ޖައުފް އަދި މާރިބް ޕްރޮވިންސްގައި ވަރުގަދަ ކުރިމަތިލުންތަކެއް ހިނގަމުންދާއިރު، ދެ ފަރާތުން ދަނީ އެކަކު އަނެކަކަށް އަމާޒުކޮށް ބޮޑުބަޑީގެ ހަމަލާތައް ބަދަލުކުރަމުންނެވެ.

ހަނގުރާމަ ވަރުގަދަވުމާ ގުޅިގެން، ރައްކާތެރިކަން ހޯދުމަށްޓަކައި 3،000 އަށްވުރެ ގިނަ މީހުން މިހާތަނަށް މާރިބަށް ގޮސްފައިވާ ކަމަށް ރެކޯޑުތަކުން ދައްކަ އެވެ.

2026 ވަނަ އަހަރުގެ ސެޕްޓެމްބަރު މަހުގެ 21 ވަނަ ދުވަހު، ތާއިޒް ޕްރޮވިންސްގައި ގާއިމުކޮށްފައިވާ ކޭމްޕެއްގައި، ހަނގުރާމައިގެ ސަބަބުން ހާލުގައި ޖެހިފައިވާ އަންހެނުންނާއި ކުޑަކުދިން ކާބޯތަކެތި ބޭނުންކުރަނީ

އދ. ގެ އާންމު މަޖިލީހުގައި ބައިވެރިވެވަޑައިގަތުމަށް ފުރާވަޑައިގަތުމުގެ ކުރިން އީރާންގެ ރައީސް މަސްއޫދު ޕެޒެޝްކިއާން ވިދާޅުވީ، އެމެރިކާއާއި އިސްރާއީލުގެ އަތްމަތީގައި ހުރި ޒަމާނީ ވަސީލަތްތަކާއި، ޓެކްނޮލޮޖީ އަދި އާޓިފިޝަލް އިންޓެލިޖެންސް ބޭނުންކޮށްގެން ބޭނުން ޖަރީމާތައް ހިންގަމުންދާ ކަމަށެވެ. އަދި އެފަދަ ލާއިންސާނީ އަމަލުތައް ހިންގަމުންދާއިރު ވެސް، އެއީ ޓެރަރިސްޓުންނާ ދެކޮޅަށް ކުރާ މަސައްކަތެއް ކަމަށް އެ ގައުމުތަކުން ދައުވާކުރާ ކަމަށް އޭނާ ވިދާޅުވި އެވެ.

"މިނާބްގައި ތިބި އަޅުގަނޑުމެންގެ ކުށެއް ނެތް ސްކޫލް ކުދިންނަކީ ޓެރަރިސްޓުންތޯ؟ ލާމެރްދުގައި ތިބި މީހުންނަކީ ޓެރަރިސްޓުންތޯ؟ އެމީހުން ބުނަނީ ހަމަލާދެނީ ޓެރަރިސްޓުންނަށް ކަމަށް. އެކަމަކު އެމީހުން ހަމަލާދެނީ އާންމުންގެ ގެދޮރަށާއި ހޮސްޕިޓަލްތަކަށާއި އެ ނޫން ވެސް އާންމު ހިދުމަތްތައްދޭ ތަންތަނަށް. އެމީހުންގެ މައްސަލައަކީ ހަމަ ހަގީގަތުގައި ވެސް ޓެރަރިސްޓުންތޯ؟" ޕެޒެޝްކިއާން ސުވާލު އުފެއްދެވި އެވެ.

ޣައްޒާގައި އިސްރާއީލުން ހިންގަމުންދާ ނަސްލު ނައްތާލުމުގެ ހަނގުރާމައާ ގުޅޭގޮތުން ވެސް ޕެޒެޝްކިއާން ވާހަކަދެއްކެވި އެވެ.

މިގޮތުން ޣައްޒާގެ އަންހެނުންނާއި ކުޑަކުދިން އަދި އުމުރުން ދުވަސްވީ މީހުންނަށް ކާބޯތަކެއްޗާއި ފެން ލިބުމަށް ހުރި މަގުތައް އިސްރާއީލުން ބަންދުކޮށްފައިވާކަން އޭނާ ފާހަގަކުރެއްވި އެވެ. އަދި އިންސާނީ ހައްގުތައް ހިމާޔަތްކުރާ ކަމަށް ދައުވާކުރަމުން މިފަދަ ލާއިންސާނީ އަމަލުތައް ހިންގުމަކީ ނުހަނު ލަދުވެތި ކަމެއް ކަމަށް ވެސް އީރާނުގެ ރައީސް ވިދާޅުވި އެވެ.

ޣައްޒާގެ މެދުތެރޭގައި އޮންނަ ބުރައިޖް ރެފިއުޖީ ކޭމްޕުގައި ހުރި ކެފޭއަކަށް އިސްރާއީލުގެ ޑްރޯން ހަމަލާއެއް އަމާޒުވުމާ ގުޅިގެން، އެ ސަރަހައްދުގައި ހުރި ލޭގެ ކަރަދުތަކެއްގެ ކައިރިން އަންހެނަކު ހިނގާފައި ދަނީ

ޗައިނާއިން މިހެން ބުނެފައިވަނީ އެމެރިކާގެ ޓްރެޜަރީ ސެކްރެޓަރީ ސްކޮޓް ބެސެންޓް، އީރާނާ ދެކޮޅަށް ހަރުކަށި ފިޔަވަޅުތަކެއް އަޅާނެކަމުގެ އިންޒާރު ދެއްވިތާ އެއް ދުވަސް ފަހުންނެވެ.

އީރާނުގެ ސަރުކާރަށް އިގުތިސާދީ ގޮތުން ފިއްތުންތައް ކުރިމަތިކުރުމަށް ޑޮނަލްޑް ޓްރަމްޕްގެ ސަރުކާރުން ކުރަމުންދާ މަސައްކަތްތަކުގެ ދަށުން، އެމެރިކާގެ ދަތިކުރުމުގެ ފިޔަވަޅުތަކުގެ ސަބަބުން ކުރިއަށް އޮތް މަދު ދުވަސްކޮޅެއްގެ ތެރޭގައި މުޅި ދުނިޔޭގައި ހަރަކާތްތެރިވާ އީރާނުގެ ހުރިހާ އެއާލައިންތަކެއްގެ މަސައްކަތް ހުއްޓުމަކަށް އަންނާނެ ކަމަށް ބެސެންޓް ހޯމަ ދުވަހު ސީއެންބީސީއަށް ދެއްވި އިންޓަވިއުއެއްގައި ވިދާޅުވި އެވެ.

ޗައިނާގެ ފޮރިން މިނިސްޓްރީގެ ތަރުޖަމާނު ގުއޯ ޖިއާކުން ނޫސްވެރިންގެ ބައްދަލުވުމެއްގައި ވާހަކަދައްކަވަމުން ވިދާޅުވީ، ބައިނަލްއަގުވާމީ ގާނޫނުތަކާ ޚިލާފަށް އަދި އދ. ގެ ސަލާމަތީ މަޖިލީހުގެ ހުއްދައެއް ނެތި، ގައުމަކުން އިސްނަގައިގެން އަމިއްލައަށް އަޅާ ޣައިރު ގާނޫނީ ދަތިކުރުމުގެ ފިޔަވަޅުތަކާ ޗައިނާއިން އަބަދުވެސް ދެކޮޅު ހަދާ ކަމަށެވެ.

ޗައިނާއިން މި ފާޑުކިޔުންތައް އަމާޒުކޮށްފައި މިވަނީ، އެމެރިކާގެ ރައީސް ޑޮނަލްޑް ޓްރަމްޕާއި ޗައިނާގެ ރައީސް ޝީ ޖިންޕިންގް އަންނަ ބުރާސްފަތި ދުވަހު އެމެރިކާގައި ބައްދަލުކުރެއްވުމަށް ހަމަޖެހިފައި ވަނިކޮށެވެ.

އީރާނުގެ މަހާން އެއަރ

އީރާނުގެ ދައުލަތުގެ މީޑިއާތަކުން ރިޕޯޓްކޮށްފައިވާ ގޮތުގައި، އދ. ގެ އާންމު މަޖިލީހުގައި ބައިވެރިވެވަޑައިގަތުމަށް ފުރާވަޑައިގަތުމުގެ ކުރިން ދެއްކެވި ވާހަކަފުޅުގައި ޕެޒެޝްކިއާން ވިދާޅުވީ، އީރާނުގެ ރައްޔިތުންނަށް ކުރިމަތިވެފައިވާ ތަފާތު ތަކުލީފުތަކާއި، ހިންގާފައިވާ ޖަރީމާތަކުގެ އިތުރުން، އުފެދިފައިވާ އިތުބާރު ނެތްކަމުގެ މައްސަލަތައް އދ. ގެ މަޖިލީހުގައި ފާހަގަކުރައްވާނެ ކަމަށެވެ.

އީރާނުގެ ރައީސް ވިދާޅުވި ގޮތުގައި، އެކި ފަހަރު މަތިން މަޝްވަރާގެ މޭޒަށް ގޮސް އެއްބަސްވުންތަކުގައި ސޮއިކޮށްފައިވީ ނަމަވެސް، އެ ވައުދުތަކަށް އަމަލުނުކޮށް ލިޔެފައިވާ އެއްބަސްވުންތަކާ ޚިލާފުވި މަންޒަރު މުޅި ދުނިޔެއަށް ވަނީ ފެނިފަ އެވެ.

"ބާރުގެ ބޭނުންކޮށްގެން ރައްޔިތުން ކިޔަމަންކޮށް، ބޯލަނބުވައެއް ނުލެވޭނެ. ޣައްޒާ، ފަލަސްތީން، ސޫރިޔާ، ޔަމަން އަދި އީރާނުގެ އިތުރުން އެހެނިހެން ތަންތަނުގައި ހިނގަމުންދާ ކަންކަމަކީ މިއަދު މުޅި ދުނިޔޭގެ ރައްޔިތުން އަމިއްލަ ލޮލުން ދެކެމުންދާ ހަގީގަތްތަކެއް،" ޕެޒެޝްކިއާން އިތުރަށް ވިދާޅުވި އެވެ.

މީގެއިތުރުން އޭނާ ވިދާޅުވީ، ދުޝްމަނުން އީރާނުގެ ރައްޔިތުން ކިޔަމަންކުރުވުމަށްޓަކައި ކުރެވެން ހުރި ހުރިހާ މަސައްކަތެއް ކުރަމުންދާ ކަމަށެވެ. އަދި އަސްކަރީ ގޮތުން އެމީހުން ބޭނުންވި މަގްސަދުތައް ހާސިލުނުވުމުން، މިހާރު މަސައްކަތް ކުރަމުންދަނީ އެހެނިހެން ވަސީލަތްތައް މެދުވެރިކޮށް ކަމަށް ވެސް ވިދާޅުވި އެވެ.

އީރާނުގެ ރައީސް ވިދާޅުވި ގޮތުގައި، ދުޝްމަނުން ދަނީ އެއްގަމާއި ވައިގެ މަގުތައް ބަންދުކޮށް، ގައުމުގެ އެތެރޭގައި ބައިބައިވުން އުފެއްދުމަށް މަސައްކަތް ކުރަމުންނެވެ. އަދި މީޑިއާތަކާއި އެކި ނަސްލުތަކުގެ މީހުން ބޭނުންކޮށްގެން، ގައުމުގެ ނާޒުކު ދަނޑިވަޅުތަކުގެ ނާޖާއިޒު ފައިދާ ނަގައި، އެތެރެއިން ގައުމު ބަލިކަށިކޮށްލުމަށްފަހު އީރާނު ކިޔަމަންކުރުވުމަށް އެ ފަރާތްތަކުން މަސައްކަތް ކުރަމުންދާ ކަމަށް ވެސް އޭނާ ވިދާޅުވި އެވެ.

އީރާނުގެ ވެރިރަށް ތެހެރާންގައި 2026 ވަނަ އަހަރުގެ ފެބްރުއަރީ މަހުގެ 11 ވީ ބުދަ ދުވަހު ބޭއްވި އެ ގައުމުގެ އިސްލާމީ އިންގިލާބަށް 47 އަހަރު ފުރުމުގެ މުނާސަބަތުގައި ބޭއްވި ރަސްމިއްޔާތުގައި، އީރާނުގެ ރައީސް މަސްއޫދު ޕެޒެޝްކިއާން ވާހަކަފުޅު ދައްކަވަނީ

އދ. އަށް އޮތް އިތުބާރު ގެއްލިފައިވާ ކަމަށް އީރާނުގެ ޚާރިޖީ ވަޒީރު އައްބާސް އަރާގްޗީ ވިދާޅުވެއްޖެ އެވެ. އީރާނުގެ ޚާރިޖީ ވަޒީރު މިހެން ވިދާޅުވީ އަންގާރަ ދުވަހު ފެށުމަށް ހަމަޖެހިފައިވާ އދ. ގެ އާންމު މަޖިލީހުގައި ބައިވެރިވެވަޑައިގަތުމަށް ނިއުޔޯކަށް ވަޑައިގެން، އެމަނިކުފާނުގެ ޓެލެގްރާމް ޗެނަލް މެދުވެރިކޮށް ދެއްވި ބަޔާނެއްގަ އެވެ.

އަރާގްޗީ ވިދާޅުވީ، މި ދަތުރުފުޅަކީ އެމެރިކާ އާއި ޒަޔަނިސްޓް އިސްރާއީލުން އީރާނާ ދެކޮޅަށް ފަށާފައިވާ ފިނޑި ހަނގުރާމައާއި، އޭގެ ފަހުން ހިނގަމުންދާ ކަންތައްތަކުގެ ތެރެއިން، ހަގީގަތުގައި ހަނގުރާމައިގެ ހާލަތެއްގެ ތެރޭގައި ކުރައްވާ ދަތުރުފުޅެއް ކަމަށެވެ.

"އަޅުގަނޑުމެންގެ އެންމެ ބޮޑު މަގުސަދަކީ، ބައިނަލްއަގުވާމީ މި ބޮޑު މަންސަ ބޭނުންކޮށްގެން އީރާނުގެ ރައްޔިތުންގެ ގާނޫނީ ހައްގުތަކާއި މަސްލަހަތު ދިފާއުކުރުން،" ޚާރިޖީ ވަޒީރު އިތުރަށް ވިދާޅުވި އެވެ.

އަރާގްޗީ ވިދާޅުވީ އެމެރިކާއިން އީރާނުގައި ހިންގި ގަތުލުއާންމުގައި މިނާބުގައި ހުރި ސްކޫލަށް ދިން ހަމަލާގައި މަރާލި ދަރިވަރުންނާއި ޓީޗަރުންގެ ވާހަކަ މުޅި ދުނިޔެއަށް ހާމަކުރައްވާނެ ކަމަށެވެ. 

ދުނިޔޭގެ ސުލްހައާއި ސަލާމަތްތެރިކަން ދެމެހެއްޓުމުގައި އދ. ނުކުޅެދިފައިވާތީ، އެ އިދާރާއަށް އޮތް އިތުބާރާއި ގަދަރު ގެއްލިފައިވާ ކަމަށް އަރާގްޗީ ވިދާޅުވި އެވެ. އަދި އދ. ގެ އާންމު މަޖިލީހުގެ މިއަހަރުގެ ޝިއާރު "އިތުބާރު އަލުން އިއާދަކުރުން" އިން  ދޭހަވަނީ ބައިނަލްއަގުވާމީ ސުލްހައާއި ސަލާމަތް ދެމެހެއްޓުމުގައި އދ. ނުކުޅެދުމުގެ ސަބަބުން، އެ އިދާރާއަށް އޮތް އިތުބާރު ކުޑަވެ ނުވަތަ މުޅިން ފޮހެވިގެން ގޮސްފައިވާކަން މުޅި ދުނިޔެ ގަބޫލުކުރާ ކަމެވެ.

"ބައެއް ގައުމުތަކުން ބައިނަލްއަގުވާމީ މުއައްސަސާތަކާއި، ބައިނަލްއަގުވާމީ ގާނޫނުތަކާއި، އިންސާނިއްޔަތުގެ ކަރާމާތަށް ވެސް ބެލުމެއް ނެތް. އެ ގައުމުތަކާއި އެ ގައުމުތަކުގެ ބައިވެރިންނަކީ ގާނޫނަށްވުރެ މަތީގައި ތިބި ބައެއް ކަމަށް ދެކި، އަދަބެއް ލިބިދާނެ ކަމުގެ ބިރެއް ނެތި އަމަލުކުރުމުގެ ހައްގު އަމިއްލައަށް ވަނީ ނަގައިގަނެފައި،" އޭނާ ވިދާޅުވި އެވެ.

އީރާނުގެ ޚާރިޖީ ވަޒީރުގެ ބަޔާން ނިންމަވާލައްވަމުން ވިދާޅުވީ، ޒަޔަނިސްޓް އިސްރާއީލު ފަދަ މުޖުރިމު ދައުލަތަކަށް ބޭނުންހާ ޖަރީމާއެއް ހިންގުމުގެ ފުރުސަތު ދީފައިވާއިރު، އިންސާނީ ހައްގުތަކާއި ބައިނަލްއަގުވާމީ ގާނޫނުތަކުގެ ދިފާއުގައި ވާހަކަދައްކާ ހުޅަނގުގެ ގައުމުތަކާއި ޔޫރަޕްގެ ގައުމުތައް ތިބީ ހަނު ކަމަށެވެ.

އީރާންގެ ޚާރިޖީ ވަޒީރު އައްބާސް އަރާގްޗީ

ތެޔޮ ލިބުމުގައި ދިމާވެފައިވާ ދަތިތަކުގެ ޒިންމާ އެމެރިކާއިން އުފުލަންޖެހޭނެ ކަމަށް ވިދާޅުވެ، އީރާނުގެ ޚާރިޖީ ވުޒާރާގެ ތަރުޖަމާނު އިސްމާއީލް ބަގާއީ އެމެރިކާއަށް ވަރަށް ބޮޑަށް ފާޑުވިދާޅުވެއްޖެ އެވެ.

ތެލުގެ އަގު އުފުލެމުންދާ މައްސަލައިގައި ތެހެރާނަށް އިނގިލި ދިއްކުރާ އެމެރިކާގެ އޮފިޝަލުންނަށް ރައްދު ދެއްވަމުން ބަގާއީ ވިދާޅުވީ، މި ހަނގުރާމަ ފެށީ ކޮން ބައެއްކަން ހަނދާން ނެތޭހާ ކުރު މުއްދަތެއް އަދި ފާއިތުނުވާ ކަމަށެވެ.

އެކްސްގައި ކުރެއްވި ޕޯސްޓެއްގައި ބަގާއީ ވިދާޅުވީ، މިހާރު ކުރިމަތިވެފައިވާ ތެލުގެ ދަތިކަމަކީ އެމެރިކާއިން އުފެއްދި މައްސަލައެއް ކަމަށެވެ. އަދި މިކަމުގެ ސަބަބުން ހުޒްމުޒް ކަނޑުއޮޅި ބަންދުކުރަން ޖެހި، ވިޔަފާރި އުޅަނދުފަހަރުގެ ދަތުރުފަތުރަށް ބޮޑެތި ހުރަސްތަކެއް ކުރިމަތިވެފައިވާކަން އޭނާ ފާހަގަކުރެއްވި އެވެ.

މީގެ އިތުރުން، ބަގާއީ ވަނީ ބައިނަލްއަގުވާމީ ގާނޫނުތަކާ ޚިލާފަށް އެމެރިކާއިން އަމިއްލައަށް އިސްވެ ފެށި ހަނގުރާމައެއްގެ ޝިކާރައަކަށްވި ގައުމެއްގެ ބޮލުގައި އިލްޒާމް އެޅުވުމަކީ، އެއީ އިސްތިރާތީޖީ ގޮތުން ހޯދި ކާމިޔާބީއެއްތޯ ނުވަތަ އެއީ ނުވަތަ މޮޔަ ސިޔާސަތުތަކެއްގެ ނަތީޖާތޯ ސުވާލު އުފައްދަވާފަ އެވެ. އަދި މިއީ މުޅިން އަލަށް ބޭނުންކުރާ އުކުޅެއް ނޫން ކަމަށާއި މީގެ ކުރިން 1939 ވަނަ އަހަރު، ހިޓްލަރު ޕޮލެންޑަށް އަރައިގަތް ހާދިސާގައި ވެސް އޭނާ ވަނީ އެއީ އަމިއްލަ ދިފާއުގައި ކުރި ކަމެއްގެ ގޮތުގައި ސިފަކޮށްފައި ކަމަށް ބަގާއީ ވިދާޅުވި އެވެ.

އެެމެރިކާގެ ނައިބު ރައީސް ޖޭޑީ ވޭންސް މީޑިއާއަށް ވިދާޅުވީ، އެމެރިކާގެ ގިނަ ރައްޔިތުންގެ ހިތުގައި މިހާރު އުފެދިފައިވާ ސުވާލަކީ ތެލުގެ އަގު މިހާ ބޮޑަށް އުފުލެން މެދުވެރިވީ ކީއްވެގެންތޯ ކަމަށެވެ. އޭނާ ފާހަގަކުރެއްވި ގޮތުގައި ތެލުގެ އަގު ބޮޑުވަނީ، އީރާނުން ވިޔަފާރި އުޅަނދުފަހަރަށް އަމާޒުކޮށް މިސައިލާއި ޑްރޯން ހަމަލާތައް މެދުނުކެނޑި ދެމުންދާތީ އެވެ.

މިއީ އަސާސީ ގޮތުން ބަލާއިރު އީރާނާ ގުޅިފައިވާ މައްސަލައެއް ކަމަށް ވެސް ވޭންސް ވިދާޅުވި އެވެ.

ވޭންސް މިފަދައިން ވިދާޅުވެފައިވާއިރު، އެމެރިކާއާއި އިސްރާއީލުން ގުޅިގެން އީރާނަށް ބޮން އަޅަން ފެށީ 28 ފެބްރުއަރީ 2026 ގަ އެވެ. އަދި އެ ހަފުތާއިން ފެށިގެން ތެލުގެ އަގު ވަނީ 30 އިންސައްތައަށް އުފުލިފަ އެވެ. އަދި އީރާނުން ހުރްމުޒް ކަނޑުއޮޅި ބަންދުކުރީ އެ ޤައުމުގެ އެންމެ މަތީ ލީޑަރު އަވަހާރަކޮށްލުމާ ގުޅިގެންނެވެ. 

އެމެރިކާގައި ކުރިއަށް އޮތް މިޑްޓާމް އިންތިޚާބު ކައިރިވަމުން އަންނަނިކޮށް، އެމެރިކާގެ ރައީސް ޑޮނަލްޑް ޓްރަމްޕްގެ މަގުބޫލުކަން، އެމަނިކުފާނުގެ ވެރިކަމުގެ ދެ ދައުރުގައި ވެސް ފުރަތަމަ ފަހަރަށް 30 އިންސައްތައަށް ވުރެ ދަށަށް ހޯމަ ދުވަހު ވަނީ ވެއްޓިފަ އެވެ. 

އެގޮތުން ތެލާއި ކާބޯތަކެތީގެ އަގުތައް އުފުލެމުންދާތީ، އެމެރިކާގެ އިގުތިސާދު ދަނީ ގޯސްވަމުން ކަމަށް އެމެރިކާގެ ރައްޔިތުން ދަނީ ބުނަމުންނެވެ. އަދި އިގުތިސާދީ މި ދަތިތަކަކީ ކުރީގެ ސަރުކާރުގެ ސަބަބުން ދިމާވެފައިވާ ކަންތައްތަކެއް ކަމަށް ޓްރަމްޕްގެ ސަރުކާރުން ބުނަމުންދިޔަ ނަމަވެސް، އެ ޤައުމުގެ އާންމުންގެ ބޮޑު ބަޔަކު އެކަން ގަބޫލެއް ނުކުރެ އެވެ.

އެމެރިކާގެ ނައިބު ރައީސް ޖޭޑީ ވޭންސް

އީރާނާއެކު ކުރަމުންދާ ހަނގުރާމައިގެ ސަބަބުން އެމެރިކާގެ އާއިލާތަކަށް އުފުލަންޖެހިފައިވާ މާލީ ބުރަ ބޮޑުވަމުންދާތީ، އެމެރިކާގެ ސެނެޓަރ މާކް ވާނަރ، ރައީސް ޑޮނަލްޑް ޓްރަމްޕްގެ ސަރުކާރަށް ވަރަށް ބޮޑަށް ފާޑުވިދާޅުވެއްޖެ އެވެ.

އެމެރިކާގެ ވަރޖިނިއާ ސްޓޭޓަށް ނިސްބަތްވާ ޑިމޮކްރެޓިކް ޕާޓީގެ ސެނެޓަރ ވާނަރ މިފަދައިން ވިދާޅުވީ އީރާނާއި އެމެރިކާއާ ދެމެދު ހިނގަމުންދާ ހަމަނުޖެހުންތަކާ ގުޅިގެންނެވެ.

އެކްސްގައި ކުރެއްވި ޕޯސްޓެއްގައި ވާނަރ ވިދާޅުވީ، އީރާނާއެކު ކުރާ ހަނގުރާމަ ދެމިގެންދާނީ އެންމެ 6 ހަފުތާއަށް ކަމަށް ޓްރަމްޕް ކުރިން ވިދާޅުވެފައިވާ ކަމަށެވެ.

ނަމަވެސް، ހަނގުރާމައަށް 6 މަހަށްވުރެ ގިނަ ދުވަސް ވެފައިވާއިރު ވެސް ހަމަނުޖެހުންތައް އަދިވެސް ކުރިއަށްދާކަން ވާނަރ ފާހަގަކުރެއްވި އެވެ. މީގެ އިތުރުން، މި ހަނގުރާމައިގެ ސަބަބުން ޕެޓްރޯލާއި ޑީސަލަށް އެމެރިކާގެ ރައްޔިތުން އިތުރު 100 ބިލިއަން ޑޮލަރު ޚަރަދުކުރަން ޖެހިފައިވާ ކަމަށާއި، އަދި ކާބޯތަކެއްޗާއި މޯގޭޖް ފަދަ ޒަރޫރީ ބޭނުންތަކަށް މަދުވެގެން އިތުރު 60 ބިލިއަން ޑޮލަރު އަތުން ބޭރުވެފައިވާ ކަމަށްވެސް އޭނާ ވިދާޅުވި އެވެ.

ދުނިޔޭގެ ކުރިއަރާފައިވާ އިގުތިސާދުތައް ހިމެނޭ ޖީ7 ގެ ގައުމުތަކުގެ ޚާރިޖީ ވަޒީރުން ވަނީ، ޔަމަނުގެ ހޫޘީ ހަނގުރާމަވެރިންނަށް އީރާނުން ފޯރުކޮށްދޭ އަސްކަރީ އެހީތެރިކަން ހުއްޓާލުމަށް ގޮވާލައްވާފަ އެވެ. އެ ވަޒީރުން ވިދާޅުވީ އީރާނުން ފޯރުކޮށްދޭ މިފަދަ އެހީތެރިކަމަކީ ބައިނަލްއަގުވާމީ ވިޔަފާރިއާއި ދުނިޔޭގެ ހަމަޖެހުން ނުރައްކަލުގެ ތެރެއަށް ވައްޓާލާ، މަސްރަހު އިތުރަށް ގޯސްވެގެންދާނެ ނުރައްކާތެރި އަމަލެއް ކަމަށެވެ.

އދ. ގެ އާންމު މަޖިލީހުގެ ހަވާސާގައި ބޭއްވި ބައްދަލުވުމަކަށްފަހު، އިނގިރޭސިވިލާތް، ކެނެޑާ، ފްރާންސް، ޖަރުމަނުވިލާތް، އިޓަލީ، ޖަޕާން އަދި އެމެރިކާގެ ޚާރިޖީ ވަޒީރުން ނެރުއްވި ބަޔާނެއްގައި، ހޫޘީން ޔަމަނުގެ އެކި ސަރަހައްދުތަކަށާއި ސައުދީ އަރަބިއްޔާއަށް ދެމުންދާ ހަމަލާތައް ވަނީ ކުށްވެރިކުރައްވާފަ އެވެ.

އެ ވަޒީރުންގެ ބަޔާނުގައި ވިދާޅުވެފައިވަނީ، ހޫޘީން ކުރިއަށްގެންދާ ހުރިހާ އަސްކަރީ ހަރަކާތްތަކާއި، އާންމު މުދާ އުފުލާ ބޯޓުފަހަރަށް ދެމުންދާ ހަމަލާތަކާއި އިންޒާރުތައް ވަގުތުން ހުއްޓާލުމަށް ގޮވާލާ ކަމަށެވެ. އަދި އިޚްލާސްތެރިކަމާއެކު ސިޔާސީ މަޝްވަރާތަކުގެ ތެރެއަށް ހޫޘީން އެނބުރި އައުމަށް ވެސް އެ ބަޔާނުގައި ބާރުއަޅުއްވާފައިވެ އެވެ.

ޖީ7 އަކީ ދުނިޔޭގެ ސިނާއީ ގޮތުން އެންމެ ކުރިއަރާފައިވާ ޑިމޮކްރެޓިކް ގައުމުތައް ހިމެނޭ ނުރަސްމީ އިއްތިހާދެކެވެ. މި އިއްތިހާދުން ކޮންމެ އަހަރަކުވެސް ބައްދަލުވުންތައް ބާއްވަނީ ދުނިޔޭގެ ސިޔާސަތުތަކާއި އިގުތިސާދީ ރައްކާތެރިކަމުގެ އިތުރުން ބައިނަލްއަގުވާމީ ގޮތުން ކަންބޮޑުވުން ހުރި މުހިންމު މައްސަލަތަކާ ގުޅޭގޮތުން މަޝްވަރާކުރުމަށެވެ.

ހަނގުރާމައިގެ ކުށްތަކާ ގުޅޭ ތަހުގީގުތަކަށް ހުރަސްއެޅުމަށް އެމެރިކާގެ ރައީސް ޑޮނަލްޑް ޓްރަމްޕާއި ސެކްރެޓަރީ އޮފް ސްޓޭޓް މާކޯ ރޫބިއޯ ކުރައްވަމުން ގެންދަވާ މަސައްކަތްތަކާ ގުޅިގެން، އެ ދެ ބޭފުޅުންނާ ދެކޮޅަށް ދަތިކުރުމުގެ ފިޔަވަޅު އެޅުމަށް އެމެރިކާގެ މޭރީލޭންޑްގެ ޑިމޮކްރެޓިކް ސެނެޓަރު ކްރިސް ވެން ހޮލެން، ވިލާތުގެ ގައުމުތަކަށާއި ބައިނަލްއަގުވާމީ ޖިނާއީ ކޯޓު (އައިސީސީ) ގެ މެންބަރު ގައުމުތަކަށް ގޮވާލައްވައިފި އެވެ.

ސޯޝަލް މީޑިއާގައި ކުރެއްވި ޕޯސްޓެއްގައި ވެން ހޮލެން ވިދާޅުވީ، އައިސީސީގެ މަސައްކަތްތަކަށް ހުރަސްއަޅައި އެ ކޯޓުގެ ބާރު ކަނޑުވާލުމަށް އެމެރިކާގެ ވެރިން މަސައްކަތް ކުރައްވާތީ، އެ ކޯޓުގެ މުއާހަދާގައި ސޮއިކޮށްފައިވާ ގައުމުތަކުން އެމެރިކާގެ ލީޑަރޝިޕާ ދެކޮޅަށް ފިޔަވަޅު އަޅަންޖެހޭ ކަމަށެވެ.

"ވިލާތުގެ ގައުމުތަކާއި އައިސީސީގެ މުއާހަދާގައި ސޮއިކޮށްފައިވާ އެހެން ގައުމުތަކުގެ އަމިއްލަ އިއްޒަތެއް އޮތް ނަމަ، ނަތަންޔާހޫ ހިންގާފައިވާ ހަނގުރާމައިގެ ކުށްތަކުގެ ތަހުގީގަށް ހުރަސްއަޅާތީ ރޫބިއޯ އާއި ޓްރަމްޕާ ދެކޮޅަށް ދަތިކުރުމުގެ ފިޔަވަޅު އަޅަންޖެހޭނެ،" ވެން ހޮލެން ލިޔުއްވާފައިވެ އެވެ.

ވެން ހޮލެން މިފަދައިން ވިދާޅުވެފައި މިވަނީ، ބައިނަލްއަގުވާމީ މުއާމަލާތްތަކުން އައިސީސީ މަހުރޫމްކޮށް، އެ ކޯޓާ ދެކޮޅަށް މާލީ ގޮތުން ވަރުގަދަ ފިޔަވަޅުތަކެއް އެޅުމަށް ވައިޓް ހައުސްއިން ތައްޔާރުވަމުންދާ ކަމަށް މީޑިއާ ރިޕޯޓުތައް ބުނެފައިވާ ދަނޑިވަޅެއްގަ އެވެ.

އެމެރިކާއާއި އީރާނާ ދެމެދު މަޝްވަރާތަކެއް ކުރެވިދާނެ ކަމުގެ އުންމީދު ބޮޑުވުމާއެކު، ވިދިވިދިގެން ފަސް ދުވަހު ތެލުގެ އަގު ދަށަށް ދިއުމަށްފަހު އަނެއްކާ ވެސް އަގުތައް އުފުލެން ފަށައިފި އެވެ.

ތެލުގެ އަގުތަކަށް މި ބަދަލު އައިސްފައިވަނީ، ހުރްމުޒް ކަނޑުއޮޅި މެދުވެރިކޮށް ތެޔޮ އުފުލާ މިންވަރު އިތުރުވެފައިވާ ދަނޑިވަޅެއްގަ އެވެ. އަދި އދ. ގެ އާންމު މަޖިލީހުގެ ހަވާސާގައި އެމެރިކާއާއި އީރާނާ ދެމެދު ބޭއްވިދާނެ މަޝްވަރާތަކަށް ވިޔަފާރިވެރިން ފާރަވެރިވަމުންދާ ވެސް ދަނޑިވަޅެއްގަ އެވެ.

ރޮއިޓާސް ނިއުސް އެޖެންސީން ރިޕޯޓްކޮށްފައިވާ ގޮތުގައި، އަންގާރަ ދުވަހުގެ ހެނދުނުގެ މުއާމަލާތްތަކުގައި ނޮވެމްބަރު މަހު ސަޕްލައިކުރުމަށް ހަމަޖެހިފައިވާ ބްރެންޓް ކްރޫޑް ފިއުޗާސްގެ އަގު ވަނީ 1.14 ޑޮލަރު ނުވަތަ 1.1 އިންސައްތަ އުފުލިފަ އެވެ. މިއާއެކު ބްރެންޓް ކްރޫޑް ފީފާއެއްގެ އަގު މިހާރު ހުރީ 101.48 ޑޮލަރު ގައެވެ.

މީގެ އިތުރުން، އަންގާރަ ދުވަހުގެ ނިޔަލަށް މުއްދަތު ހަމަވާ އެމެރިކާގެ ވެސްޓް ޓެކްސަސް އިންޓަމީޑިއޭޓް (ޑަބްލިއުޓީއައި) ކްރޫޑްގެ އޮކްޓޯބަރު މަހުގެ ކޮންޓްރެކްޓްތަކުގެ އަގު ވެސް ވަނީ 87 ސެންޓު ނުވަތަ 0.9 އިންސައްތަ އުފުލިފަ އެވެ. މި ބަދަލާއެކު ޑަބްލިއުޓީއައި ކްރޫޑް ފީފާއެއްގެ އަގު ވަނީ 96.65 ޑޮލަރަށް އަރާފަ އެވެ.

އެމެރިކާއިން ދަތިކުރުމުގެ ފިޔަވަޅު އަޅާނެކަމުގެ އިންޒާރު ދީފައިވީ ނަމަވެސް، އިރާގުގެ ނަޖަފަށް ކުރާ ދަތުރުތައް މެދުކަނޑާނުލައި ކުރިއަށް ގެންދާނެ ކަމަށް އިރާން އެއަރ އިން އިއުލާނުކޮށްފި އެވެ.

އިރާނުގެ ގައުމީ އެއާލައިނުން ބުނި ގޮތުގައި އެ ގައުމުގެ ތެހެރާން، މަޝްހަދު އަދި އިސްފަހާން އިން ނަޖަފަށް ކުރާ ދަތުރުތައް ހުއްޓުމެއް ނެތި ކުރިއަށްދާނެ އެވެ.

އިރާން އެއަރގެ ޕަބްލިކް ރިލޭޝަންސް ޑިޕާޓްމަންޓުން ބުނީ، އެމެރިކާގެ ދަތިކުރުމުގެ ފިޔަވަޅުތަކުގެ ބިރު އޮތް ނަމަވެސް، އެ އެއާލައިނުގެ ދަތުރުތައް ކުރިއަށްދާނީ ކުރިން ވެސް ތާވަލުކުރެވިފައިވާ ގޮތަށް ކަމަށެވެ.

އިރާނުން މިކަން ހާމަކޮށްފައި މިވަނީ، ބުދަ ދުވަހުން ފެށިގެން އިރާނުގެ އެއާލައިންތަކަށް ބައިނަލްއަގުވާމީ ދަތުރުތައް ކުރުން ހުއްޓުމަކަށް އަތުވެދާނެ ކަމަށް އެމެރިކާގެ ޓްރެޜަރީ ސެކްރެޓަރީ ސްކޮޓް ބެސެންޓް ވިދާޅުވެފައި ވަނިކޮށެވެ. އެމެރިކާ ސަރުކާރުން ވަނީ އިރާނުގެ އެއާލައިންތަކަށް ޚިދުމަތްދޭ ބޭރުގެ ކުންފުނިތަކާ ދެކޮޅަށް "ސެކަންޑަރީ ސެންކްޝަންސް" ނުވަތަ ދަތިކުރުމުގެ އިތުރު ފިޔަވަޅުތައް އަޅާނެ ކަމުގެ އިންޒާރު ދީފަ އެވެ.

ޔަމަނުގެ ސަރުކާރުގެ ފައުޖުތަކުން ހާމަކޮށްފައިވާ ގޮތުގައި، އެ ގައުމުގެ ހުޅަނގު ދެކުނުގައި އޮންނަ ތާއިޒް ސަރަހައްދުގައި ހޫޘީން ދުއްވަމުންދިޔަ ޑްރޯން ވައްޓާލާފައިވަނީ ބަޑިޖަހައިގެންނެވެ.

ސޯޝަލް މީޑިއާގައި އާންމުކުރި ބަޔާނެއްގައި ޔަމަނުގެ ހަތިޔާރު އެޅި ފައުޖުތަކުން ބުނީ، ޖާސޫސް ކުރުމަށް ބޭނުންކުރާ މި އުޅަނދު ވައްޓާލާފައިވަނީ ތާއިޒް ގަވަރްނޮރޭޓްގެ އަލް-ކަދާ ކުރިމަތިލުންތައް ހިނގަމުންދާ ސަރަހައްދުން ކަމަށެވެ.

ސައުދީ އަރަބިއްޔާގެ އެހީތެރިކަން ލިބޭ ޔަމަނުގެ ސަރުކާރުގެ ސިފައިންގެ އަތްދަށުން އިތުރު ސަރަހައްދުތައް ހިފުމަށް ހޫޘީ ހަނގުރާމަވެރިން މަސައްކަތް ކުރަމުންދާއިރު، ތާއިޒްގައި ދަނީ ވަރުގަދަ ކުރިމަތިލުންތަކެއް ހިނގަމުންނެވެ. މި ހަމަލާތަކުގައި ދެ ފަރާތުން ވެސް މީހުން މަރުވެ، އަނިޔާވެފައިވާ ކަމަށް ރިޕޯޓުތައް ބުނެ އެވެ.

ތާއިޒް ސިޓީގެ ހުޅަނގުން އޮންނަ އަލް-ކަދާގައި މިހާރު ކުރިއަށްދާ ހަނގުރާމައިގެ ތެރެއިން، އަސްކަރީ ޓޭންކެއް ކުރިއަށްދަނީ

އީރާނުގެ ރައީސް މަސްއޫދު ޕެޒެޝްކިއަން އދ. ގެ އާންމު މަޖިލީހުގައި ބައިވެރިވެވަޑައިގަތުމަށް އެމެރިކާއަށް ކުރައްވާ ދަތުރުފުޅުގައި، އެމަނިކުފާނުގެ މީޑިއާ ޓީމަށް ވިސާ ދިނުމަށް އެމެރިކާ ސަރުކާރުން އިންކާރުކޮށްފި ކަމަށް އީރާނުން ބުނެފި އެވެ. އީރާނުގެ ރައީސްގެ އޮފީހުގެ ޕަބްލިކް ރިލޭޝަންސް ޑައިރެކްޓަރު ހަބީބް އައްބާސީއާ ހަވާލާދީ ތަސްނީމް ނިއުސް އެޖެންސީން ރިޕޯޓްކޮށްފައިވާ ގޮތުގައި، ވިސާ ހޯދުމަށް ތަކުރާރުކޮށް އެދި، ކަމާބެހޭ ލިޔެކިޔުންތައް ހުށަހަޅާފައިވީ ނަމަވެސް، އދ. ގެ އާންމު މަޖިލީހުގެ ބައްދަލުވުންތައް ކަވަރުކުރުމަށް ދާންޖެހޭ މީޑިއާ ޓީމުގެ މެންބަރުންނަށް އެމެރިކާ ސަރުކާރުން ވިސާ ދޫކޮށްފައެއް ނުވެ އެވެ.

އެމެރިކާއިން ވިސާ ނުދޭން ނިންމި ނިންމުމާ ގުޅޭގޮތުން އައްބާސީ ވިދާޅުވީ، މިއީ އީރާނުގެ ރައީސްގެ އަޑާއި އީރާނުން ދުނިޔެއަށް އިއްވަން ބޭނުންވާ ވާހަކަތައް ބައިނަލްއަގުވާމީ މުޖުތަމައަށް ފޯރުކޮށްދިނުމަށް ހުރަސްއެޅުމަށް އެމެރިކާއިން ކުރި މަސައްކަތެއް ކަމަށެވެ.

ޔަމަނުގެ ތާއިޒް ޕްރޮވިންސްގެ ހައިފާން ޑިސްޓްރިކްޓަށް، ސައުދީ އަރަބިއްޔާ އިސްވެ އޮންނަ ކޯލިޝަނުގެ މަތިންދާބޯޓުތަކުން ހަމަލާތަކެއް ދީފައިވާ ކަމަށް ހޫޘީން ހިންގާ އަލް-މަސީރާ ޓީވީން ރިޕޯޓުކޮށްފި އެވެ.

ސައުދީ ކޯލިޝަނުން މި ވައިގެ ހަމަލާތައް ދީފައިވަނީ، ޔަމަނުގެ ހުޅަނގު ސަރަހައްދުގައި ހޫޘީން ބާރުގަދަކޮށް، ރަތްކަނޑުގެ އައްސޭރިފަށުގެ ބޮޑު ބައެއް އެ ގްރޫޕުގެ ބާރުގެ ދަށަށް ގެނައުމަށްފަހު، ބާބުލް މަންދަބް ކަނޑުއޮޅިއާ އިންވެގެންވާ ސަރަހައްދުތަކަށް ކުރިއަރަމުންދާ ދަނޑިވަޅެއްގަ އެވެ.

އދ. އިން ހާމަކޮށްފައިވާ ގޮތުގައި، މި މަސް ފެށުނީއްސުރެ ޔަމަނުގައި ކުރިއަށްދާ ހަމަނުޖެހުންތަކާއި ހަނގުރާމައިގެ ސަބަބުން، މަދުވެގެން 125،000 މީހުން ވަނީ އެމީހުންގެ ގެދޮރު ދޫކޮށް ރައްކާތެރި ހިސާބުތަކަށް ހިޖުރަކޮށްފަ އެވެ.

ޔުނައިޓެޑް ކިންގްޑަމް މެރިޓައިމް ޓްރޭޑް އޮޕަރޭޝަންސް (ޔޫކޭއެމްޓީއޯ) އިން ރިޕޯޓްކޮށްފައިވާ ގޮތުގައި، މި ހާދިސާ ހިނގާފައިވަނީ ތެޔޮ އުފުލާ ބޯޓަކަށް ހުރްމުޒް ކަނޑުއޮޅިން އެތެރެއަށް ވަންނަން ދަތުރުކުރަނިކޮށް، ކޮން އެއްޗެއްކަން ނޭނގޭ އުޅަނދަކުން ދިން ހަމަލާއަކާ ގުޅިގެންނެވެ.

މި ހަމަލާއާ ގުޅިގެން އެ ބޯޓުގެ ދެ ފަޅުވެރިއަކަށް ކުދި އަނިޔާތަކެއް ލިބިފައިވާކަމަށް އަސްކަރީ އިދާރާތަކުން  ޔޫކޭއެމްޓީއޯ އަށް ވަނީ މައުލޫމާތު ދީފަ އެވެ. އަދި މިހާރު އެ ބޯޓު ކުރިއަށް އޮތް ބަނދަރަށް ދިއުމަށް ދަތުރުކުރަމުންދާ ކަމަށް ރިޕޯޓްތައް ބުނެ އެވެ.

އެ އިދާރާއިން ނެރުނު ބަޔާނެއްގައި ބުނެފައިވަނީ، އެ ސަރަހައްދުން ދަތުރުކުރާ އުޅަނދުފަހަރުން ސަމާލުވުމަށާއި އެއްވެސް ކަހަލަ ޝައްކުކުރެވޭ ކަމެއް ފާހަގަކުރެވިއްޖެނަމަ ލަސްނުކޮށް ޔޫކޭއެމްޓީއޯ އަށް ރިޕޯޓުކުރުމަށް އިލްތިމާސްކުރާ ކަމަށެވެ.

އީރާނާ ދެކޮޅަށް އެމެރިކާއާއި އިސްރާއީލުން ކުރަމުންދާ ހަނގުރާމައިގެ ސަބަބުން ދުނިޔޭގެ ހަކަތައިގެ ބާޒާރަށް ބުރޫއަރާފައިވާތީ، މިއަހަރުގެ ފަހު ކުއާޓަރުގައި ޔޫރަޕުގެ ގައުމުތަކަށް ބޭނުންވާ މަތިންދާބޯޓަށް ބޭނުންވާ ތެޔޮ ނުވަތަ ޖެޓް ފިއުލް ލިބުމުގައި ބޮޑު ދަތިތަކަކާ ކުރިމަތިލާން ޖެހިދާނެ ކަމަށް ރޮއިޓާސްއިން ރިޕޯޓްކޮށްފި އެވެ.

ކޮންސަލްޓެންސީ ފާމެއް ކަމަށްވާ "އެނަޖީ އެސްޕެކްޓްސް" އިން އާންމުކޮށްފައިވާ ތަފާސްހިސާބުތަކާ ހަވާލާދީ އެ އެޖެންސީން ބުނެފައިވަނީ، މިއަހަރުގެ ފަހު ތިން މަސްދުވަހުގެ ތެރޭގައި ޔޫރަޕުގެ ގައުމުތަކަށް ދުވާލަކު 510،000 ފީފާގެ ޖެޓް ފިއުލް މަދުވާނެ ކަމަށް ބެލެވޭ ކަމަށެވެ. މިއާ ހިލާފަށް، އެމެރިކާގައި ދުވާލަކު 18،000 ފީފާ އަދި އޭޝިއާ ޕެސިފިކް ސަރަހައްދުގައި ދުވާލަކު 419،000 ފީފާގެ ތެޔޮ ބޭނުންވާ މިންވަރަށްވުރެ އިތުރަށް ހުންނާނެ ކަމަށް ލަފާކުރެވެ އެވެ.

ޔޫރަޕަށް ބޭނުންވާ ތެޔޮ ހޯދުމަށްޓަކައި ދެކުނު ކޮރެއާއިން އެ ސަރަހައްދަށް އެކްސްޕޯޓްކުރާ ޖެޓް ފިއުލްގެ މިންވަރު އިތުރުކޮށްފައިވީ ނަމަވެސް، ތެލުގެ ދަތިކަން ކުރިމަތިވާނެ ކަމަށް ވަނީ ބެލެވިފަ އެވެ. ކޮމޯޑިޓީޒް އިންޓެލިޖެންސް ފާމެއް ކަމަށްވާ "ކެޕްލާ" އިން ހާމަކޮށްފައިވާ ގޮތުގައި، މި ސެޕްޓެމްބަރު މަހުގެ މިހާތަނަށް ދެކުނު ކޮރެއާއިން ޔޫރަޕަށް ދުވާލަކު 129،000 ފީފާގެ ޖެޓް ފިއުލް އެތެރެކޮށްފައިވެ އެވެ. މިއީ 2022 ވަނަ އަހަރުގެ އޮކްޓޫބަރު މަހަށްފަހު އެ ގައުމުން ޔޫރަޕަށް އެންމެ ގިނައިން ތެޔޮ އެކްސްޕޯޓްކުރި މިންވަރެވެ.

މި ހަނގުރާމައިގެ ސަބަބުން ޔޫރަޕަށް ބޭރުން އެތެރެކުރާ ޖެޓް ފިއުލްގެ ގާތްގަނޑަކަށް ދެބައިކުޅަ އެއްބައި ވަނީ މެދުކެނޑިފަ އެވެ.

ހަނގުރާމައިގެ ސަބަބުން މިއަހަރުގެ ފަހު ކުއާޓަރުގައި ޔޫރަޕުގެ ގައުމުތަކަށް ބޭނުންވާ ޖެޓް ފިއުލް ލިބުމުގައި ބޮޑު ދަތިތަކަކާ ކުރިމަތިލާން ޖެހިދާނެ

އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރްޖީސީ) އިން ބުނި ގޮތުގައި، ހުރްމުޒް ކަނޑުއޮޅި މަތިން ދަތުރުކުރަމުންދިޔަ އެމެރިކާގެ އެމްކިއު-1 މަރުކާގެ ޑްރޯނެއް އެ ޖަމާއަތުން ވަނީ ހުއްޓުވައި، ގޮއްވާލާފަ އެވެ.

އީރާނުގެ ނޫސް އެޖެންސީތަކުން އާންމުކޮށްފައިވާ އައިއާރްޖީސީގެ ބަޔާނެއްގައި ބުނެފައިވަނީ، އެމެރިކާއިން ކުރިން ބޭނުންކުރުން ހުއްޓާލާފައިވާ އެމްކިއު-1 މަރުކާގެ ޑްރޯންތައް އަލުން ބޭނުންކުރަން ފަށާފައިވަނީ، އެއަށްވުރެ ކުރިއަރާފައިވާ އެމްކިއު-9 މަރުކާގެ ގިނަ ޑްރޯންތަކެއް ހަމަލާތަކުގައި ސުންނާފަތިކޮށްލާފައިވުމާ ގުޅިގެން އެމެރިކާއަށް މަޖުބޫރުވެގެން ކަމަށެވެ.

އައިއާރްޖީސީ އިން އިތުރަށް ބުނެފައިވަނީ، އެ ޖަމާއަތުގެ އައު ވައިގެ ދިފާއީ ނިޒާމު ބޭނުންކޮށްގެން އެމެރިކާގެ މި ދެ ބާވަތުގެ ޑްރޯންތައް ވެސް ވަރަށް ފުޅާދާއިރާއެއްގައި ހޯދައި، ހަމަލާދެމުންދާ ކަމަށެވެ.

އެމެރިކާގެ އެއަރ ފޯސް އިން އެމްކިއު-1 ޕްރެޑޭޓަރ މަރުކާގެ ޑްރޯންތައް ބޭނުންކުރުން ރަސްމީކޮށް ހުއްޓާލާފައިވަނީ 2018 ވަނަ އަހަރުގަ އެވެ.

އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން އައު ހަތިޔާރުތަކެއް ތައާރަފުކުރަން ތައްޔާރުވަމުންދާ ކަމަށާއި، އެ ހަތިޔާރުތަކުގެ ގާބިލުކަން ފެނި މުޅި ދުނިޔެ ހައިރާންވާނެ ކަމަށް ބުނެފި އެވެ.

އައިއާރުޖީސީގެ ތަރުޖަމާނު ބްރިގޭޑިއަރ ޖެނެރަލް ހުސައިން މުހިއްބީ ވިދާޅުވީ، އެމެރިކާއިން އީރާނަށް އަލުން ހަމަލާ ދޭން ފަށައިފި ނަމަ، އީރާނުގެ ދިފާއީ އަދި ރައްދު ހަމަލާދިނުމުގެ އޮޕަރޭޝަންތަކަށް "ބޮޑެތި ބަދަލުތަކެއް" އަންނާނެ ކަމަށެވެ.

"އަލްއާލަމް" ނިއުސް ނެޓްވޯކަށް ދެއްވި އިންޓަވިއުއެއްގައި މުހިއްބީ ވިދާޅުވީ، މި ބަދަލުތަކުގެ ތެރޭގައި ހަނގުރާމަ ކުރާ ސަރަހައްދުތަކާއި ބޭނުންކުރާ ހަތިޔާރާއި އަސްކަރީ ވަސީލަތްތަކަށް އަންނަ ބަދަލުތައް ހިމެނޭ ކަމަށެވެ. އަދި އިތުރު ގާބިލުކަން ލިބިފައިވާ އައު ހަތިޔާރުތައް ހަނގުރާމައިގެ މައިދާނަށް ނެރޭނެ ކަމަށާއި، އެކަމުގެ ސަބަބުން މުޅި ދުނިޔެ އަންތަރީސްވާނެ ކަމަށް ވެސް އޭނާ ވިދާޅުވި އެވެ.

މީގެ އިތުރުން މުހިއްބީ ވިދާޅުވީ، އީރާނުން އަމާޒުކުރާ ތަންތަން ކުރިން ހަމަލާދިން ތަންތަނާ ތަފާތުވާނެ ކަމަށެވެ. އަދި މިހާތަނަށް ހަމަލާދީފައިނުވާ އައު އަމާޒުތަކެއް މިހާރު ކަނޑައަޅާފައިވާ ކަމަށް ވެސް އޭނާ ވިދާޅުވި އެވެ.

އައިއާރުޖީސީގެ ތަރުޖަމާނު ބްރިގޭޑިއަރ ޖެނެރަލް ހުސައިން މުހިއްބީ

ޔަމަނުގެ އުތުރާއި ހުޅަނގުގެ ސަރަހައްދުތަކަށް ފެތުރިފައިވާ އެކި ފްރަންޓްލައިންތަކުގައި، ހަނގުރާމަމަތީ ބޯޓުފަހަރާއި ޑްރޯންގެ އެހީތެރިކަމާއެކު އެ ޤައުމުގެ ސަރުކާރުގެ ސިފައިން ދަނީ އަސްކަރީ އޮޕަރޭޝަންތައް ހިންގަމުންނެވެ.

މި ހަނގުރާމައިގެ އެންމެ ފާހަގަކޮށްލެވޭ އަދި އެންމެ ވަރުގަދަ ކުރިމަތިލުންތަކެއް ހިނގަމުންދަނީ، ތާއިޒްގެ ހުޅަނގު ފަރާތުން ފެށިގެން ލަހްޖްއާ ހަމައަށް ދެމިގެން ގޮސްފައިވާ ފަރުބަދަަމަތީ ސަރަހައްދުތައް ހިމެނޭ ހުޅަނގު އައްސޭރީގެ ފްރަންޓްލައިންގަ އެވެ.

މި ސަރަހައްދުގައި ކުރިއަށްދާ ހަނގުރާމަ އިންތިހާއަށް ވަރުގަދަވެފައިވާއިރު، އިސްތިރާތީޖީ ގޮތުން މުހިންމު އެ ސަރަހައްދުގެ ކޮންޓްރޯލް ހޯދުމަށް ހޫޘީން ފާއިތުވި ދުވަސްތަކުގައި ދެމުންދާ ހަމަލާތައް ހުއްޓުވުމަށް ސަރުކާރުގެ ސިފައިން ދަނީ ވަރުގަދައަށް ހޫޘީންނާ ކުރިމަތިލަމުންނެވެ.

މި ސަރަހައްދަކީ ފަރުބަދަތަކުން ވަށާލެވިފައިވާ ތަނަކަށް ވުމުން، ހުޅަނގު އައްސޭރިއާއި ބާބުލް މަންދަބް އަދި މުޚާގެ އިތުރުން، އެތެރެވަރިން ތާއިޒް ގަވަރުނަރޭޓާއި އެ ސަރަހައްދުގެ ރަށްފުށުގެ ސަރަހައްދުތަކަށް ވެސް މި ފަރުބަދަތަކުގެ ސަބަބުން ރައްކާތެރިކަން ލިބިދެ އެވެ.

ޔަމަނުގެ އެތެރެވަރީގެ ސަރަހައްދުތަކުގައި ވެސް ހިނގަމުންދާ ހަނގުރާމައިގައި އެއްވެސް ފަރާތަކަށް ފާހަގަކޮށްލެވޭ ފަދަ ކުރިއެރުމެއް ލިބެމުން ނުދެ އެވެ. އަދި އެ ފަރުބަދަމަތީ ސަރަހައްދަކީ އިސްތިރާތީޖީ ގޮތުން އިންތިހާއަށް ގޮންޖެހުންތައް ބޮޑު ސަރަހައްދަކަށް ވުމުން، އެއްވެސް ލަޝްކަރަކަށް ކުރިއެރުމެއް ލިބިފައިނުވާކަމަށް ރިޕޯޓުކޮށްފައިވެ އެވެ.  

ޔަމަނުގައި ހިނގަމުންދާ ހަނގުރާމައިގައި އެޤައުމުގެ ސަރުކާރުގެ ސިފައިންނާއި ހޫޘީންގެ ބާރުގެ ދަށުގައިވާ ސަރަހައްދުތައް

ޝިޕިންގް ޑޭޓާތަކާ ހަވާލާދީ ރޮއިޓާސް ނިއުސް އެޖެންސީން ރިޕޯޓްކޮށްފައިވާ ގޮތުގައި، މިދިޔަ ހޮނިހިރު އަދި އާދިއްތަ ދުވަހު ހުރްމުޒް ކަނޑުއޮޅިން ދަތުރުކޮށްފައިވަނީ މުދާ އުފުލާ ޖުމްލަ 12 އުޅަނދެވެ.

މިއީ އޭގެ ކުރީ ހަފުތާ ބަންދުގައި އެ ސަރަހައްދުން ދަތުރުކުރި 35 އުޅަނދާ އަޅާބަލާއިރު ގާތްގަނޑަކަށް ތިންބައިކުޅަ ދެބައި ދަށް އަދަދެކެވެ.

އިރާނުގެ ޕާލިމަންޓުގެ ރައީސް މުހައްމަދު ބާގިރު ގާލީބާފް އާދިއްތަ ދުވަހު ވިދާޅުވީ، މިދިޔަ ޖޫން މަހު ސޮއިކުރި ވަގުތީ ސުލްހައިގެ އެއްބަސްވުމުގެ ދަށުން އެމެރިކާއިން އަދާކުރަންޖެހޭ ޒިންމާތައް ފުރިހަމަކުރަންދެން ހުރްމުޒް ކަނޑުއޮޅި ބަންދުކޮށްފައި އޮންނާނެ ކަމަށެވެ.

މީގެ އިތުރުން އެމެރިކާއިން ދަނީ އިރާނުގެ ދެކުނުގެ ބަނދަރުތައް ހިސާރުކުރުމުގެ މަސައްކަތް ވެސް މެދުކެނޑުމެއްނެތި ކުރަމުންނެވެ.

ޔުނައިޓެޑް ކިންގްޑަމް މެރިޓައިމް ޓްރޭޑް އޮޕަރޭޝަންސް (ޔޫކޭއެމްޓީއޯ) އެޖެންސީން މީގެ ކުރިން ބުނެފައިވަނީ، އެ ކަނޑުއޮޅީގައި އޮތް ނުރައްކަލުގެ މިންވަރު އަދިވެސް އޮތީ ވަރަށް މަތީގައި ކަމަށެވެ. އަދި ވޭތުވެދިޔަ ތިން ދުވަހުގެ ތެރޭގައި އެ ސަރަހައްދުން ދަތުރުކުރި އުޅަނދުފަހަރަށް މަދުވެގެން ތިން ހަމަލާއެއް ދީފައިވާކަމަށް ވެސް އެ އިދާރާއިން ރިޕޯޓްކޮށްފައިވެ އެވެ.

އީރާނުގެ ބަންދަރު އައްބާސް ސަރަހައްދުގައި ހުރްމުޒް ކަނޑުއޮޅީގައި، 2026 އޮގަސްޓް 10 ވަނަ ދުވަހު ބައެއް އުޅަނދުފަހަރު ބަނދަރުކޮށްފައި އޮތް މަންޒަރު

އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން ބައިނަލްއަގުވާމީ ޖިނާއީ ކޯޓު (އައިސީސީ) ގެ މުޅި މުއައްސަސާއާ ދެކޮޅަށް ދަތިކުރުމުގެ ފިޔަވަޅުތަކެއް ތައްޔާރުކޮށްފައިވާ ކަމަށާއި، އެކަން ވަރަށް އަވަހަށް އިއުލާނު ކުރުމަށް ރާވަމުންދާ ކަމަށް ރޮއިޓާސް ނިއުސް އެޖެންސީން ރިޕޯޓުކޮށްފި އެވެ.

މި މައުލޫމާތު ރޮއިޓާސްއަށް ދީފައިވަނީ މިކަމުގެ މައުލޫމާތު އެނގޭ ދެ މަސްދަރަކުންނެވެ.

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ހިމެނޭހެން އެ ގައުމުގެ އިސްވެރިން ހައްޔަރުކުރުމަށް އައިސީސީން ނެރެފައިވާ އަމުރުތައް ބާތިލުކުރުމަށް އެމެރިކާއިން ބޭނުންވެ އެވެ. އެމެރިކާއިން މިހާރު ވެސް ވަނީ އެ ކޯޓުގެ ބައެއް ފަނޑިޔާރުންނާއި ޕްރޮސިކިއުޓަރުންނާ ދެކޮޅަށް ދަތިކުރުމުގެ ފިޔަވަޅުތައް އަޅާފަ އެވެ.

މުޅި މުއައްސަސާއަށާއި އެ ކޯޓާ އެކު މަސައްކަތްކުރާ އިދާރާތަކަށް އަމާޒުކޮށް އަޅާ މި ފިޔަވަޅުތަކުގެ ސަބަބުން ކޯޓުގެ މަސައްކަތްތަކަށް ބޮޑެތި ހުރަސްތަކެއް ކުރިމަތިވާނެ އެވެ. އައިސީސީގެ ރެޖިސްޓްރާ އަދި ރައީސް އިންޒާރު ދެއްވާފައިވާ ގޮތުގައި، މި ފިޔަވަޅުތަކުގެ ސަބަބުން އައިޓީ ޚިދުމަތްތަކާއި އިންޝުއަރެންސް ހޯދުމާއި، ތަހުގީގު ކުރާ ފަރާތްތައް ވަޒީފާއަށް އައްޔަނުކުރުމުގެ އިތުރުން، އެމެރިކާގެ އެތައް މުވައްޒަފުންނަކަށް މުސާރަ ދިނުން ފަދަ ދުވަހުން ދުވަހަށް ކުރަންޖެހޭ މާލީ މުއާމަލާތްތަކަށް ބުރޫއަރާނެ އެވެ.

ނެދަލެންޑުގެ ހޭގުގައި ހުންނަ އިންޓަރނޭޝަނަލް ކްރިމިނަލް ކޯޓު، (އައިސީސީ)

ހުރްމުޒް ކަނޑުއޮޅި މަތިން އުދުހެމުންދިޔަ ޑްރޯނެއް ވައްޓާލާފައިވާ ކަމަށް އީރާނުން ބުނެފި އެވެ.

އީރާނުގެ ފާރްސް ނިއުސް އެޖެންސީން ރިޕޯޓްކޮށްފައިވާ ގޮތުގައި، އެ ގައުމުގެ އަސްކަރިއްޔާއިން ވަނީ ހުރްމުޒް ކަނޑުއޮޅި މަތިން ދަތުރުކުރަމުންދިޔަ ޑްރޯނަކަށް ބަޑިޖަހައި ވައްޓާލާފަ އެވެ.

ބައެއް ނޫސްތަކުން ރިޕޯޓުކޮށްފައިވަނީ އީރާނުން ބަޑިޖަހާ ވައްޓާލީ އިސްރާއީލުގެ "އޯބިޓަރ" މަރުކާގެ ޑްރޯނެއް ކަމަށެވެ. 

ޖުމްލަ 420،000 ސިފައިންގެ މައްޗަށް އެކުލެވިގެންވާ އީރާނުގެ އަސްކަރިއްޔާގެ އެއްގަމު ސިފައިންގެ ބޮޑު ފައުޖެއް މިހާރު އެ ގައުމުގެ ބޯޑަރުތަކަށް ފޮނުވާފައިވާ ކަމަށް އެ ގައުމުގެ ފާރްސް ނިއުސް އެޖެންސީން ރިޕޯޓްކޮށްފި

ޖުމްލަ 420،000 ސިފައިންގެ މައްޗަށް އެކުލެވިގެންވާ އީރާނުގެ އަސްކަރިއްޔާގެ އެއްގަމު ސިފައިންގެ ބޮޑު ފައުޖެއް މިހާރު އެ ގައުމުގެ ބޯޑަރުތަކަށް ފޮނުވާފައިވާ ކަމަށް އެ ގައުމުގެ ފާރްސް ނިއުސް އެޖެންސީން ރިޕޯޓްކޮށްފި އެވެ.

މީގެ ތެރޭގައި ޚާއްސަ ފައުޖުތަކާއި، ކުއްލި ހާލަތްތަކުގައި ހަރަކާތްތެރިވާ ރެޕިޑް ރެސްޕޮންސް ޔުނިޓްތަކުގެ އިތުރުން، މެކަނައިޒްޑް އަދި އާޓިލަރީ ޔުނިޓްތައް ހިމެނޭހެން ގިނަ އަދަދެއްގެ ސިފައިން ޚާއްސަކޮށް އޮމާން ކަނޑުއޮޅީގައި އޮންނަ މަކްރާން އައްސޭރިފަށަށް މިހާރު ވަނީ ޖަމާކޮށްފަ އެވެ.

އީރާނުން މިފަދަ ފިޔަވަޅެއް އަޅާފައި މިވަނީ، އެމެރިކާގެ އެއްގަމު ސިފައިން އެ ގައުމުގެ ދެކުނުގެ އައްސޭރިފަށުގެ ސިޓީތައް މެދުވެރިކޮށް އީރާނަށް އަރައިގަނެފާނެ ކަމަށް ބެލެވޭ ދަނޑިވަޅެއްގަ އެވެ. މީގެ އިތުރުން، އީރާނާއެކު ކުރަމުންދާ ހަނގުރާމައިގައި ވަރަށް މުހިންމު ނިންމުމެއް ނިންމަވަން ޖެހިވަޑައިގަންނަވާ ކަމަށާއި، ހަނގުރާމައިގެ މިސްރާބު ބަދަލުވާނެ ފަދަ މުހިންމު ދަނޑިވަޅަކަށް މިހާރު އާދެވިފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުރާސްފަތި ދުވަހު ވިދާޅުވުމާ ގުޅިގެން މަސްރަހު ވަނީ އިތުރަށް ހޫނުވެފަ އެވެ.

އީރާނުގެ އަސްކަރިއްޔާއިން ވަނީ ހޮނިހިރު ދުވަހުގެ ރޭގެ ވަގުތެއްގައި އެ ގައުމުގެ ހަތިޔާރު އެޅި ހުރިހާ ފައުޖުތަކެއް އެންމެ މަތީ އެލާޓް ލެވެލް ކަމަށްވާ "ކޯޑް 100" އަށް ގެނެސްފަ އެވެ. މި އެލާޓް ނެރިފައިވަނީ ޔޫރަޕްގެ ގައުމެއްގައި ބޭއްވި ގުޅިފައިވާ ބައްދަލުވުމެއްގައި، އީރާނާ ދެކޮޅަށް އަލުން ފިޔަވަޅުތައް އެޅުމަށް އެމެރިކާއިން ނިންމާފައިވާ ކަމުގެ ޚަބަރު ލިބިފައިވާ ކަމަށް އީރާންގެ އަސްކަރިއްޔާއިން ހާމަކުރުމަށް ފަހު އެވެ. 

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އާއި އޭނާގެ އަނބިމީހާ ސާރާ ނަތަންޔާހޫ، އިސްރާއީލުން ހިފާފައިވާ އިރުމަތީ ގުދުސްގެ އޯލްޑް ސިޓީ އާއި މަސްޖިދުލް އަޤްސާގެ ބިމުގެ އަޑީގައި ހަދާފައިވާ ބިންގަރާސްތަކެއްގެ ތެރޭގައި ހިނގާފައިދާ މަންޒަރު ފެންނަ ވީޑިއޯއެއް އާންމުކޮށްފި އެވެ. 

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ މުސްލިމުންގެ މުޤައްދަސް ބިމަށް ވަނުމާ ގުޅިގެން ހަމާސް ޖަމާއަތުން ވަނީ އެކަން ކުށްވެރިކޮށްފަ އެވެ. ހަމާސްގެ ޓެލެގްރާމް ޗެނަލް މެދުވެރިކޮށް ނެރުނު ބަޔާނެއްގައި ބުނެފައިވަނީ، އިސްރާއީލުގެ ބޮޑުވަޒީރު ބަރަކާތްތެރި އަލްއަޤްސާ މިސްކިތާއި އަލްބުރާޤް ފާރުގެ އަޑީގައިވާ ބިންގަރާސްތަކާއި ކޮނެފައިވާ ސަރަހައްދުތަކަށް ވަނުމަކީ އަދި އެތަނުގައި ހުރެ ދިން ހަރުކަށި ބަޔާންތަކަކީ، އެ މިސްކިތުގެ އަމިއްލަވަންތަކަމަށާއި ގަދަރަށް އަރައިގަތުމަށް ހިންގި ވަރަށް ބޮޑު އިހާނެތި އަމަލެއް ކަމަށެވެ.

ހަމާސްއިން އިތުރަށް ބުނެފައިވަނީ، އަލްއަޤްސާ މިސްކިތުގެ ގޯތިތެރެއާއި ނަމާދުކުރާ ހޯލްތަކާއި ފާރުތަކާއި އަދި ދޮރުތައް ހިމެނޭހެން މުޅި މިސްކިތަކީ ހަމައެކަނި މުސްލިމުންގެ މިސްކިތެއްގެ ގޮތުގައި ދެމިއޮންނާނެ ތަނެއް ކަމަށެވެ.

މީގެއިތުރުން، މިއީ ކަނޑައެޅިގެން އެނގެން އޮތް ހަގީގަތެއް ކަމަށާއި، އިސްރާއީލުން އެތަން ކޮނުމާއި އެތަނަށް ވަދެގަތުމާއި ޔަހޫދީންގެ ދީނީ ރަސްމިއްޔާތުތައް ބޭއްވުމުގެ އިތުރުން އެތަނުގެ ތާރީޚު ބަދަލުކުރަން ކުރާ އެއްވެސް މަސައްކަތަކަށް އެ މިސްކިތުގެ އަސްލު އަމިއްލަވަންތަކަން ބަދަލު ނުކުރެވޭނެ ކަމަށެވެ. އަދި އެތަނުގެ ނިޝާންތައް ފޮހެލުމަށް ކުރާ މަސައްކަތްތައް ކާމިޔާބު ނުވާނެ ކަމަށް ވެސް ހަމާސްގެ ބަޔާނުގައިވެ އެވެ.

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އާއި އޭނާގެ އަނބިމީހާ ސާރާ، އިސްރާއީލުން ހިފާފައިވާ އިރުމަތީ ގުދުސްގެ އޯލްޑް ސިޓީ އާއި މަސްޖިދުލް އަޤްސާގެ ބިމުގެ އަޑީގައި ހަދާފައިވާ ބިންގަރާސްތަކެއްގެ ތެރޭގައި

ޔަމަނުގެ ބައިނަލްއަގުވާމީ ގޮތުން ބަލައިގަންނަ ސަރުކާރަށް ވަފާތެރި ފައުޖުތަކުން ބުނި ގޮތުގައި، އެ ގައުމުގެ އަލް-ބައިދާ ގަވަރުނަރޭޓުގައި ތިބި ހޫޘީންގެ މުހިންމު މަރުކަޒަކަށާއި އެ މީހުން ބޭނުންކުރާ އަސްކަރީ ސާމާނުތަކަށް ވަނީ ވަރުގަދަ ހަމަލާތަކެއް ދީފަ އެވެ.

އެކްސްގައި ސަރުކާރުގެ ފައުޖުތަކުން އާންމުކޮށްފައިވާ ވީޑިއޯއަކުން ފެންނަ ގޮތުގައި، ޔަމަނުގެ މެދުތެރޭގެ ސަރަހައްދުތަކުގައި ހުރި ހޫޘީންގެ އަމާޒުތަކަށް ހަނގުރާމަމަތީ ބޯޓަކުން ދަނީ ހަމަލާދެމުންނެވެ.

ޔަމަނުގައި ދިހަ ހާހަށްވުރެ ގިނަ މީހުން މަރުވި 8 އަހަރުވީ ދާޚިލީ ހަނގުރާމަ، 2022 ވަނަ އަހަރު އދ. މެދުވެރިވެގެން އެކުލަވާލި ސުލްހައިގެ އެއްބަސްވުމަކާއެކު މެދުކަނޑާލި ފަހުން، އެ ގައުމުގައި މިހާރު ކުރިއަށްދަނީ އެންމެ ނުރައްކާތެރި އަދި ވަރުގަދަ ކުރިމަތިލުންތަކެވެ.

ގަތަރުގެ ބޮޑުވަޒީރު ޝެއިޚް މުޙައްމަދު ބިން ޖާސިމް އަލްޘާނީ ވިދާޅުވީ، އެއްވެސް ޤައުމަކަށް އަނެއް ޤައުމެއްގެ މައްޗަށް ނުރައްކަލެއް ކުރިމަތިނުކުރެވޭނެ ފަދަ މާހައުލެއް ގާއިމުކުރުމަށްޓަކައި، މެދުއިރުމަތީގައި އުފެދިފައިވާ ދެބަސްވުންތަކުގެ އަސްލު ނައްތާލަންޖެހޭ ކަމަށެވެ. އެމަނިކުފާނު މިހެން ވިދާޅުވީ އެމެރިކާ އާއި އިސްރާއީލުން އީރާނާ ދެކޮޅަށް ކުރަމުންދާ ހަނގުރާމައިގެ ސަބަބުން ގަލްފު ސަރަހައްދަށް އައިސްފައިވާ ބޮޑު ލޮޅުމާ ގުޅޭގޮތުން ވާހަކަފުޅު ދައްކަވަމުންނެވެ.

ބްލޫމްބާގް އާއި ގަތަރުގެ މިނިސްޓްރީ އޮފް ކޮމާސް އެންޑް އިންޑަސްޓްރީ ގުޅިގެން ބޭއްވި އިގުތިސާދީ ފޯރަމެއްގައި ވާހަކަފުޅު ދައްކަވަމުން ގަތަރުގެ ބޮޑުވަޒީރު ވިދާޅުވީ، ފާއިތުވި މަސްތަކުގައި އެ ސަރަހައްދަށް ކުރިމަތިވެފައިވަނީ ބާރުގަދަ "ބިންހެލުމެއް" ފަދަ ހާލަތެއް ކަމަށެވެ. އަދި މީގެ ސަބަބުން ސަރަހައްދީ ސަލާމަތާއި ހަމަޖެހުމާ މެދު ކުރެވޭ އުންމީދުތައް ވަނީ ވަރަށް ބޮޑު އިމްތިހާނެއްގެ ކުރިމަތީގައި ކަމަށް ވެސް އެމަނިކުފާނު ފާހަގަކުރެއްވި އެވެ.

ގަތަރުގެ ޚާރިޖީ ވަޒީރުގެ މަގާމު ވެސް ފުރުއްވަމުން ގެންދަވާ ޝެއިޚު މުހައްމަދު ވިދާޅުވީ، ގައުމުތަކުގެ މެދުގައި އުފެދޭ މައްސަލަތައް ހައްލުކުރުމަށް މެދުވެރިއެއްގެ ދައުރު އަދާކުރުމުގައާއި، އިތުބާރު ހުރި ގޮތެއްގައި ހަކަތަ ފޯރުކޮށްދިނުމުގައި ގަތަރަކީ އަބަދުވެސް ސާބިތުކަމާއެކު ދެމިއޮންނާނެ ބައިވެރިއެއް ކަމަށެވެ. މީގެ އިތުރުން، ސަރަހައްދީ ހަމަޖެހުން ގާއިމުކުރުމަށްޓަކައި ގަތަރުން ޑިޕްލޮމެޓިކް ގޮތުން ގިނަ މަސައްކަތްތަކެއް ކުރަމުންދާކަން ވެސް ފާހަގަކުރެއްވި އެވެ. 

ޝެއިޚް މުހައްމަދު މިފަދައިން ވިދާޅުވެފައި މިވަނީ، އެމެރިކާއާއި އިސްރާއީލުން އީރާނާ ދެކޮޅަށް ފަށާފައިވާ ހަނގުރާމަ ހުއްޓާލުމަށްޓަކައި އީރާނުން ހުށަހެޅި ހަތް ނުކުތާގެ މައްޗަށް އެކުލެވޭ ލިސްޓެއް، ގަތަރު މެދުވެރިކޮށް ވޮޝިންޓަނަށް ހުށަހަޅާފައިވާ ކަމަށް އީރާނުގެ އޮފިޝަލަކު އަލްޖަޒީރާއަށް މައުލޫމާތު ދީފައިވާ ދަނޑިވަޅެއްގަ އެވެ. މި ހަނގުރާމައަށް މިހާރު ވަނީ ގާތްގަނޑަކަށް ހަތް މަސް ދުވަސް ވެފަ އެވެ.

ގަތަރުގެ ބޮޑުވަޒީރު ޝެއިޚް މުޙައްމަދު ބިން ޖާސިމް އަލްޘާނީ

އީރާނާއެކު ހިނގަމުންދާ ހަމަނުޖެހުންތަކާ ގުޅޭގޮތުން އެމެރިކާގެ ރައީސް ޑޮނަލްޑް ޓްރަމްޕް "ފޮކްސް ނިއުސް" އަށް ދެއްވި އިންޓަވިއުއެއްގައި ވިދާޅުވީ އީރާނާ މެދު އަމަލުކުރެވެން އޮތް ހަމައެކަނި ގޮތްތަކަކީ، އެ ގައުމު އެއްކޮށް ފުނޑުފުނޑުކޮށްލުން ނުވަތަ އިގުތިސާދީ ގޮތުން އެ ގައުމު އިނދަޖައްސާލުން ނޫންނަމަ އެއްބަސްވުމަކަށް އައުން ކަމަށެވެ.

ޓްރަމްޕް ވިދާޅުވީ އީރާނަށް އޮތް އެންމެ ރަނގަޅު ގޮތަކީ އަދަބުވެރިކަމާއެކު އުޅުން ކަމަށެވެ. އަދި މި ހަފުތާގައި ބާއްވާ އދ. ގެ އާންމު މަޖިލީހުގެ ހަވާސާގައި އީރާނުގެ ރައީސް މަސްއޫދު ޕެޒެޝްކިއާންއާ ބައްދަލުކުރެއްވުމުގެ ފުރުސަތު އެބައޮތް ކަމަށް ވެސް ޓްރަމްޕް ވިދާޅުވި އެވެ.

މީގެއިތުރުން މެދުއިރުމަތީގެ ސަރަހައްދުގައި ތިބި އެމެރިކާގެ ރައްޔިތުންނަށް ސަލާމަތީ އިންޒާރުތައް ނެރެފައިވީ ނަމަވެސް، މިހަފްތާއާއި އެހެން ހަފްތާތަކާ އެއްވެސް ތަފާތެއް ނެތް ކަމަށް ޓްރަމްޕް ވިދާޅުވި އެވެ.

އަދި އެމެރިކާއިން ހޫތީންނާ މެދުނުކެނޑި ގުޅުން ބާއްވަމުންދާ ކަމަށާއި، އެމެރިކާއާ ދެކޮޅަށް ހަނގުރާމަ ނުކުރުމަށް ހޫޘީން އެއްބަސްވެފައިވާ ކަމަށް ވެސް ޓްރަމްޕް ވިދާޅުވި އެވެ.

ޓްރަމްޕް އިތުރަށް ވިދާޅުވީ އީރާނުގެ ބައެއް އިސްވެރިން "މީދާތަކެއް ފަދައިން ފިލައިގެން" އުޅޭ ކަމަށާއި، އެ ގައުމުގައި އެއްބަސްވުމަކަށް އާދެވޭ ފަދަ ގާބިލު އެއްވެސް މީހަކު ހޯދުމަކީ މިހާރު މުސްތަހީލު ކަމެއް ކަމަށެވެ. 

އިޓަލީގެ އެފް-2000 ޔޫރޯފައިޓަރ މަރުކާގެ ބޯޓެއް

އިޓަލީގެ ހަނގުރާމަމަތީ ބޯޓަކަށް އަމާޒުކޮށް ދާދިފަހުން ދިން ހަމަލާއަކާ ގުޅޭގޮތުންނާއި، އިޓަލީއާ ދެކޮޅަށް ހަނގުރާމައެއް ނުކުރާކަމަށް ހޫޘީން ބުނެފައިވާ ބުނުމާ ގުޅޭގޮތުން އިޓަލީގެ ނޫހަކުން ކުރި ސުވާލަކަށް ޖަވާބު ދެއްވަމުން އެ ގައުމުގެ ފޮރިން މިނިސްޓަރު އެންޓޯނިއޯ ތަޖާނީ ވިދާޅުވީ، އިޓަލީން އެއްވެސް ބަޔަކާ ދެކޮޅަށް ހަނގުރާމައެއް ކުރަމުން ނުދާ ކަމަށެވެ.

ތަޖާނީ މިހެން ވިދާޅުވެފައި މިވަނީ، ސައުދީ އަރަބިއްޔާގެ ތާއިފް އެއަރބޭސްއަށް ހޫޘީން ދިން ހަމަލާއެއްގައި، އެ އެއަރބޭސްގެ ބިމުގައި އޮތް އިޓަލީގެ އެފް-2000 ޔޫރޯފައިޓަރ މަރުކާގެ ބޯޓަކަށް ގެއްލުންތަކެއް ލިބިފައިވާ ކަމަށް ރިޕޯޓްތައް ބުނެފައިވާ ދަނޑިވަޅެއްގަ އެވެ.

ނަމަވެސް، އިސްތިރާތީޖީ ގޮތުން މުހިންމު އެ ކަނޑުގެ ސަރަހައްދުން ދަތުރުކުރާ މުދާ އުފުލާ ބޯޓުފަހަރު ހިމާޔަތްކުރުމަށް ޔޫރަޕިއަން ޔޫނިއަން (އީޔޫ) އިން ކުރިއަށްގެންދާ އަސްކަރީ މިޝަންކަމުގައިވާ "އެސްޕައިޑްސް" އިތުރަށް ވަރުގަދަކުރުމަށް އޭނާ ވަނީ ގޮވާލައްވާފަ އެވެ.

ޔޫރަޕުގެ "އެސްޕައިޑްސް" މިޝަނަކީ ރަތްކަނޑާއި ބާބުލް މަންދަބު ހުރަސްކޮށް ދަތުރުކުރާ މުދާ އުފުލާ ބޯޓުފަހަރަށް ހޫޘީންގެ ފަރާތުން ކުރިމަތިވެދާނެ ހަމަލާތަކުން ދިފާއުވުމަށް އުފައްދާފައިވާ މިޝަނެކެވެ. ރަތްކަނޑުގެ ހާލަތު އިތުރަށް ގޯސްވަމުންދާތީ، އިޓަލީން އެ މިޝަނަށް ދޭ އެއްބާރުލުން ކުރިއަށް ގެންދާނެ ކަމަށާއި، އީޔޫ އިން އެ މިޝަން އައުކޮށް، އިތުރަށް ވަރުގަދަކުރުމަށް ތަޖާނީ ވަނީ ގޮވާލައްވާފަ އެވެ.

ތަޖާނީ އިތުރަށް ވިދާޅުވީ، ރަތްކަނޑަކީ އިޓަލީގެ އިސްތިރާތީޖީ މަސްލަހަތާ ވަރަށް ބޮޑަށް ގުޅިފައިވާ ސަރަހައްދެއް ކަމަށެވެ. އެގޮތުން އިޓަލީގެ ކަނޑުމަގުގެ މުދާ އުފުލުމުގެ ވިޔަފާރީގެ 40 އިންސައްތަ އަދި އޭޝިއާގެ ގައުމުތަކަށް އެގައުމުން އެކްސްޕޯޓްކުރާ މުދަލުގެ 60 އިންސައްތަ ދަތުރުކުރަނީ ރަތްކަނޑު ހުރަސްކޮށް ކަމަށް އޭނާ ފާހަގަކުރެއްވި އެވެ.

އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލްގެ ސެކްރެޓަރީ މުހްސިން ރެޒާއީ އަލްޖަޒީރާ އަށް އިންޓަވިއު ދެއްވަނީ

އީރާންގެ އެންމެ އިސް ޤައުމީ ސަލާމަތީ އިދާރާ ކަމަށްވާ، ސުޕްރީމް ނޭޝަނަލް ސެކިއުރިޓީ ކައުންސިލްގެ ސެކްރެޓަރީ މުހްސިން ރެޒާއީ ވިދާޅުވީ، އަރަބި ގައުމުތަކުގެ އިސްވެރިންނާ އޭނާ ކުރައްވަން ބޭނުންފުޅުވާ ސުވާލަކީ، އީރާނުން އިސްރާއީލާ ދެކޮޅަށް ތެދުވެ ހިފަހައްޓާފައި ނުވިނަމަ އަދި އީރާނުން އަމާންދޭން މަޖުބޫރުވި ނަމަ، މިއަދު އިސްރާއީލުން ސައުދީ އަރަބިއްޔާއަށް ހަމަލާ ނުދޭނެތޯ އެވެ؟ އިސްރާއީލުގެ ސިފައިން ދިމިޝްގާ ހަމައަށް ފޫއަޅުވާލައި ނުދާނެތޯ އެވެ؟ އަދި އިސްރާއީލުން އިރާޤަށް ހަމަލާ ނުދޭނެތޯ އެވެ؟

އީރާނުން މިކަމުގައި ގިނަ އަދަދެއްގެ މީހުން ގުރުބާންވެ، ޝަހީދުވެފައިވާކަން ފާހަގަކުރައްވައި ރެޒާއީ ވިދާޅުވީ، އީރާނުން މި ދިފާއުކުރަނީ އަރަބި ގައުމުތައް ކަމަށެވެ. އީރާނުން އެމެރިކާ އާއި އިސްރާއީލު ބަލިކޮށްފައި ނުވިނަމަ، އަދި އީރާނުގެ މައްޗަށް އެމީހުންނަށް ކުރި ލިބުނު ކަމުގެ އިހުސާސް ކުރެވުނު ނަމަ، މެދުއިރުމަތީގައި އެމީހުންނާ ދެކޮޅަށް ތެދުވާނެ އެއްވެސް ފަރާތެއް ނުހުންނާނެ ކަމަށް އޭނާ ވިދާޅުވި އެވެ.

އީރާނުން މިކަމަށް ހުރަސް ނޭޅިނަމަ، އިސްރާއީލުން ހުރިހާ އަރަބި ގައުމުތަކަކަށް ހަމަލާދީ އިސްތިއުމާރު ކުރާނެ ކަމަށާއި، އެމެރިކާއިން އެކަމަށް ފުރިހަމައަށް އެއްބާރުލުން ދޭނެ ކަމަށް ވެސް ރެޒާއީ ވިދާޅުވި އެވެ. އީރާނުން އިސްރާއީލާ ދެކޮޅަށް ތެދުވީ އަމިއްލަ ގައުމުގެ ދިފާއުގައި ކަމަށް ވީނަމަވެސް، އެ ދިފާއީ މަސައްކަތުގެ ފައިދާ މުޅި އަރަބި ދުނިޔެއަށް ކުރަމުންދާ ކަމަށް އޭނާ ފާހަގަކުރެއްވި އެވެ.

ރެޒާއީ އިތުރަށް ވިދާޅުވީ، އެމެރިކާގެ ރައީސް ޑޮނަލްޑް ޓްރަމްޕަށް އީރާނުގެ ބާރު ވަރަށް ބޮޑަށް އޮޅިވަޑައިގެންފައިވާ ކަމަށެވެ.

އެގޮތުން އެމެރިކާއިން އީރާނާ ދެކޮޅަށް ކުރާ ހަނގުރާމައަކީ ބުއްދިވެރި ހަމަތަކެއްގެ މައްޗަށް ބިނާވެފައިވާ ހަނގުރާމައެއް ކަމަށް މިއަދު އެއްވެސް ފަރާތަކުން ގަބޫލެއް ނުކުރާ ކަމަށާއި އެންމެން ވެސް އެ ހަނގުރާމަ ސިފަކުރަނީ މޮޔަ އަމަލެއްގެ ގޮތުގައި ކަމަށް އޭނާ ވިދާޅުވި އެވެ. 

އެމެރިކާގެ އަސްކަރީ، އިގުތިސާދީ އަދި ސިޔާސީ ފިޔަވަޅުތަކަކީ އެއްވެސް ވަރަކަށް ކަންކަން ވަޒަންކުރުމަށްފަހު ނުވަތަ ސައްހަ ހިސާބުތަކެއްގެ މައްޗަށް ބިނާކޮށް އަޅާފައިވާ ފިޔަވަޅުތަކެއް ނޫން ކަމަށާއި އެ ހުރިހާ ކަމެއް ވެސް ކޮށްފައިވަނީ އިސްރާއީލާއި  ނަތަންޔާހޫގެ އަމިއްލަ އެދުމާއި ބާރުއެޅުމުގެ މަތިން ކަމަށް ވެސް ރެޒާއީ ވިދާޅުވި އެވެ.

މިސްރުގެ ރައީސް އަބްދުލް ފައްތާހް އަލް-ސީސީ، އެމެރިކާގެ ސީއައިއޭގެ ޑިރެކްޓަރު ޖޯން ރެޓްކްލިފްއާ ބައްދަލުކުރެއްވުން

މިސްރުގެ ރައީސް އަބްދުލް ފައްތާހް އަލް-ސީސީ، އެމެރިކާގެ ސީއައިއޭގެ ޑިރެކްޓަރު ޖޯން ރެޓްކްލިފްއާ ބައްދަލުކުރައްވައި، ޣައްޒާގެ ހަނގުރާމަ ހުއްޓާލުމުގެ އެއްބަސްވުމުގެ ދެވަނަ މަރުހަލާ ތަންފީޒުކުރުމުގެ މުހިންމުކަމާ ގުޅޭގޮތުން މަޝްވަރާކުރައްވައިފި އެވެ.

މިސްރުގެ ރިޔާސީ އިދާރާއިން ނެރުނު ބަޔާނެއްގައި ރައީސް ސީސީ ވިދާޅުވީ، ޣައްޒާގައި ގާއިމުކޮށްފައިވާ ހަނގުރާމަ ހުއްޓާލުމުގެ އެއްބަސްވުން އިތުރަށް ވަރުގަދަކޮށް، އާންމު ރައްޔިތުން ހިމާޔަތްކުރުމަށާއި އެއްވެސް ހުރަހެއް ނެތި ޣައްޒާއަށް ބޭނުންވާ އިންސާނީ އެހީ ފޯރުކޮށްދިނުން ކަށަވަރުކުރުމަށްޓަކައި ދެން އަޅަންހުރި ފިޔަވަޅުތައް އެޅުމުގެ ވަގުތު ޖެހިފައިވާ ކަމަށެވެ. 

ޣައްޒާގެ ހަނގުރާމަ ހުއްޓާލުމުގެ އެއްބަސްވުމުގެ ދެވަނަ މަރުހަލާގައި، ޣައްޒާގައި ފަލަސްތީނުގެ އައު ސަރުކާރެއް ގާއިމުކުރުމުގެ އިތުރުން، އެ ސަރަހައްދަކީ ހަތިޔާރު ނެތް ތަނަކަށް ހަދައި، ޣައްޒާ އަލުން އާރާސްތުކުރުމުގެ މަސައްކަތް ފެށިގެންދާނެ އެވެ.

2025 ވަނަ އަހަރުގެ އޮކްޓޫބަރު މަހު ޣައްޒާއާ ގުޅޭގޮތުން ވެވުނު އެއްބަސްވުމަށް މަގުފަހިވި ހަނގުރާމަ ހުއްޓާލުމުގެ މަޝްވަރާތަކުގައި މިސްރުން ވަނީ މުހިންމު އިސް ދައުރެއް އަދާކޮށްފަ އެވެ.

އެމެރިކާގެ ސީއައިއޭ އާއި މިސްރުގެ ޖެނެރަލް އިންޓެލިޖެންސް ސަރވިސްއަކީ ސަލާމަތީ ކަންކަމާއި ޓެރަރިޒަމާ ދެކޮޅަށް ކުރާ މަސައްކަތްތަކުގެ އިތުރުން، ރޭވުންތެރިކަމާއެކު ހިންގާ ބައިނަލްއަގުވާމީ ކުށްތަކާ ދެކޮޅަށް މަސައްކަތް ކުރުމުގައި ގާތް ގުޅުމެއް ބާއްވަމުން އަންނަ ދެ އިދާރާ އެވެ.