މެދުއިރުމަތީ ހަނގުރާމަ

އިންޓަރނޭޝަނަލް ކްރިމިނަލް ކޯޓު (އައިސީސީ) އިން އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ހައްޔަރުކުރުމަށް އަމުރު ނެރެފައި ވަނިކޮށް، ނަތަންޔާހޫ ދަތުރުކުރެއްވި ބޯޓަށް ފަރަންސޭސިވިލާތުގެ ވައިގެ ސަރަހައްދު ބޭނުންކުރުމުގެ ހުއްދަ ދިނުމާ ގުޅިގެން، އެ ގައުމުގެ ދެފުއް ދެގޮތް އުސޫލު ހާމަވެފައިވާކަމަށް އިންސާނީ ހައްގުތަކަށް މަސައްކަތްކުރާ ބައިނަލްއަގުވާމީ ޖަމިއްޔާ، އެމްނެސްޓީ އިންޓަނޭޝަނަލް އިން ބުނެފި އެވެ.

އެމްނެސްޓީން މިފަދައިން ތުހުމަތުކޮށްފައި މިވަނީ، ބައިނަލްއަގުވާމީ ގާނޫނުތަކަށް އިހުތިރާމްކުރުމަށް ފަރަންސޭސި ރައީސް އެމަނުއަލް މެކްރޯން ގޮވާލައްވާފައިވާ ދަނޑިވަޅެއްގަ އެވެ.

ނަމަވެސް ފަރަންސޭސި ޚާރިޖީ ވުޒާރާގެ ތަރުޖަމާނު ޕާސްކަލް ކޮންފަވްރޫ މިކަން ދިފާއުކުރައްވާ ވިދާޅުވީ، އދ. ގެ އާންމު މަޖިލީހުގައި ބައިވެރިވެވަޑައިގަތުމަށް ނަތަންޔާހޫ އެމެރިކާއަށް ކުރެއްވި ދަތުރުފުޅުގައި ފަރަންސޭސި ވައިގެ ސަރަހައްދު ބޭނުންކުރުމުގެ ހުއްދަ ދިނީ ބައިނަލްއަގުވާމީ ގާނޫނުތަކާ އެއްގޮތްވާ ގޮތުގެ މަތިން ކަމަށެވެ.

ހަނގުރާމައިގެ ކުށްތަކުގެ ތުހުމަތުގައި 2024 ވަނަ އަހަރު ނަތަންޔާހޫ ހައްޔަރުކުރުމަށް އައިސީސީން އަމުރު ނެރުމާ ގުޅިގެން، އޭނާއަށް ބައެއް ގައުމުތަކަށް ދަތުރުކުރުމަށް ވަނީ ހުރަސްތަކެއް ކުރިމަތިވެފަ އެވެ. ފަރަންސޭސިވިލާތަކީ އައިސީސީ އުފެއްދި ރޯމް ސްޓެޓިއުޓްގައި ސޮއިކޮށްފައިވާ ގައުމަކަށް ވުމުން، އެ ކޯޓުން ހޯދަން ބޭނުންވާ މީހަކު އެ ގައުމުގެ ބިމަށް އެތެރެވެއްޖެ ނަމަ، އެ މީހަކު ހައްޔަރުކޮށް ކޯޓަށް އެއްބާރުލުން ދިނުމުގެ ގާނޫނީ ޒިންމާ އެ ގައުމުގެ މައްޗަށް އޮވެ އެވެ.

ފްލައިޓްތައް ޓްރެކްކުރާ އެޕްލިކޭޝަނެއް ކަމަށްވާ "ފްލައިޓްރޭޑާ 24" އިން ދައްކާ ގޮތުގައި، ނަތަންޔާހޫ ދަތުރުކުރެއްވި ބޯޓު ވަނީ ގްރީސް، އިޓަލީ އަދި ފަރަންސޭސިވިލާތުގެ ވައިގެ ސަރަހައްދު ހުރަސްކޮށް ދަތުރުކޮށްފަ އެވެ.

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ، އެމެރިކާގެ ނިއުޔޯކް ސިޓީގައި ބާއްވާ އދ. ގެ 81 ވަނަ އާންމު މަޖިލީހުގައި ތަގުރީރު ކުރެއްވުމަށް ހަމަޖެހިފައިވާތީ، އެކަމާ ދެކޮޅަށް ގިނަ އަދަދެއްގެ ބަޔަކު އެއްވެ މުޒާހަރާ ކުރަން ފަށައިފި

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އދ. ގެ އާންމު މަޖިލީހުގައި ތަގުރީރު ކުރެއްވުމަށް ހަމަޖެހިފައިވާ ވަގުތާ ދިމާކޮށް، އެމެރިކާގެ ނިއުޔޯކްގައި ހުންނަ އދ. ގެ މައި މަރުކަޒު ކުރިމައްޗަށް ގިނަ އަދަދެއްގެ ބަޔަކު އެއްވެ މުޒާހަރާކުރަން ފަށައިފި އެވެ.

ޣައްޒާ އާއި ލުބުނާނަށް އިސްރާއީލުން ދެމުންދާ ހަމަލާތަކާ ދެކޮޅަށް އަޑުއުފުލުމަށް އެއްވި މި މުޒާހަރާގެ ބައިވެރިން ދަނީ، ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ގަތުލުއާންމު ވަގުތުން ހުއްޓާލުމަށާއި، އެމެރިކާއިން އިސްރާއީލަށް ހަތިޔާރު ފޯރުކޮށްދިނުން މެދުކަނޑާލުމަށް ގޮވާލަމުންނެވެ. މީގެ އިތުރުން، ނަތަންޔާހޫ އަކީ "ހަނގުރާމައިގެ ކުށްވެރިއެއް" ކަމަށާއި އޭނާ ހައްޔަރުކުރުމަށް ގޮވާލާ ބޯޑުތަކާއި ފަލަސްތީނުގެ ދިދަތައް މުޒާހަރާގެ ބައިވެރިން ދަނީ އުފުލަމުންނެވެ. 

މި މުޒާހަރާއާ ގުޅިގެން އދ. ގެ މައި މަރުކަޒު ހިމެނޭ ސަރަހައްދުގެ ސަލާމަތީ ކަންކަން ވަނީ ވަރަށް ބޮޑަށް ވަރުގަދަކޮށްފަ އެވެ. އަދި ނިއުޔޯކްގެ ފުލުހުން އެ ސަރަހައްދުގައި ހަރަކާތްތެރިވަމުންދާއިރު، މުޒާހަރާގެ ބައިވެރިން އދ. ގެ އިމާރާތާ ކައިރިވިޔަ ނުދިނުމަށްޓަކައި ވަނީ ހުރަސްތައް ޖަހާފަ އެވެ. އަދި މުޒާހަރާގެ ބައެއް ބައިވެރިން ހައްޔަރުކޮށްފައިވާ ކަމަށް ވެސް އަލްޖަޒީރާ އިން ރިޕޯޓުކުރެ އެވެ. 

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ، އެމެރިކާގެ ނިއުޔޯކް ސިޓީގައި ބާއްވާ އދ. ގެ 81 ވަނަ އާންމު މަޖިލީހުގައި ތަގުރީރު ކުރެއްވުމަށް ހަމަޖެހިފައިވާތީ، އެކަމާ ދެކޮޅަށް ގިނަ އަދަދެއްގެ ބަޔަކު އެއްވެ މުޒާހަރާކުރަނީ

އދ. ގެ ކޮންފަރެންސް އޮން ޓްރޭޑް އެންޑް ޑިވެލޮޕްމަންޓް (އަންކްޓާޑް) އިން ނެރުނު އެންމެ ފަހުގެ ރިޕޯޓުގައި ބުނެފައިވާ ގޮތުގައި، ޣައްޒާ އަލުން އާރާސްތުކޮށް ބިނާކުރުމަށް ގާތްގަނޑަކަށް 71.5 ބިލިއަން އެމެރިކާ ޑޮލަރު ބޭނުންވެ އެވެ. އިސްރާއީލުން ފަލަސްތީނުގެ ބިންތަކަށް ވެރިވެގަނެގެން އުޅޭތާ 59 އަހަރު ވެފައިވާއިރު، އޭގެ ސަބަބުން ފަލަސްތީނުގެ އިގުތިސާދަށް އޮތީ ނިޒާމީ ގޮތެއްގައި ހުރަސްތަކެއް ކުރިމަތިވެފައި ކަމަށާއި، މީގެ ސަބަބުން އުފެއްދުންތެރިކަން ދަށްވެ، ފަގީރުކަން އިތުރުވެ، އެހީއަށް ބަރޯސާވާން މަޖުބޫރުވެފައިވާ ކަމަށް އެ ރިޕޯޓުގައި ބަޔާންކޮށްފައިވެ އެވެ.

ޣައްޒާއަށް ލިބިފައިވާ ގެއްލުންތަކާއި އާރާސްތުކުރުމަށް ބޭނުންވާ ޚަރަދުގެ އެންމެ ބޮޑު ބައެއް ހިއްސާކުރަނީ ބޯހިޔާވަހިކަމުގެ ދާއިރާއިންނެވެ. މިހާރުގެ ހާލަތަށް ބަލާއިރު، ޣައްޒާގެ ހޮސްޕިޓަލުތަކާއި ކްލިނިކްތަކުގެ ދެބައިކުޅަ އެއްބަޔަށްވުރެ ގިނަ ތަންތަން ހުރީ ޚިދުމަތް ނުދެވޭ ފަދަ ހާލަތެއްގަ އެވެ. އަދި ދަނޑުވެރިކަން ކުރާ ބިންތަކުގެ ތެރެއިން ގެއްލުން ނުލިބި ބޭނުންކުރެވެން އޮތީ އެންމެ 1.5 އިންސައްތައަށްވުރެ ކުޑަ މިންވަރެކެވެ.

އދ. އިން ހާމަކޮށްފައިވާ ތަފާސްހިސާބުތަކަށް ބަލާއިރު، 2023 ވަނަ އަހަރުގެ އޮކްޓޫބަރު މަހު އިސްރާއީލުން ފެށި ހަނގުރާމައާ ގުޅިގެން، ޣައްޒާގެ އާބާދީގެ ގާތްގަނޑަކަށް 90 އިންސައްތަ މީހުން ވަނީ އެމީހުންގެ ގެދޮރު ދޫކޮށް ރަށުން ބޭރުވާން މަޖުބޫރުވެފައި

އީރާނާއެކު ވެފައިވާ އެއްބަސްވުމަށް އެމެރިކާއިން އަލުން އަމަލުކުރަން ފެށުމަށް ތާއީދުކުރައްވާ ކަމަށް ޗައިނާގެ ރައީސް ޝީ ޖިންޕިންގް، އެމެރިކާގެ ރައީސް ޑޮނަލްޑް ޓްރަމްޕްގެ އަރިހުގައި ވިދާޅުވެއްޖެ އެވެ.

ޗައިނާގެ ދައުލަތުގެ މީޑިއާ، ޒިންހުއާ ނިއުސް އެޖެންސީން ރިޕޯޓްކޮށްފައިވާ ގޮތުގައި ރައީސް ޝީ މިހެން ވިދާޅުވީ މިދިޔަ ޖޫން މަހު އެމެރިކާއާއި އީރާނާ ދެމެދު ސޮއިކުރި އެމްއޯޔޫގެ ދަށުން އެއްބަސްވި ކަންކަމަށް ދެ ގައުމުން އަލުން ރުޖޫއަވުމާ ގުޅޭގޮތުންނެވެ.

ޖޫން މަހު ސޮއިކުރި މި އެމްއޯޔޫގެ ދަށުން ދެ ގައުމުގެ ދެމެދުގައި ހިނގަމުންދިޔަ ހަމަލާ ބަދަލުކުރުންތައް ހުއްޓާލައި، ހުރްމުޒް ކަނޑުއޮޅި އަލުން ހުޅުވާލުމުގެ އިތުރުން، އެމެރިކާގެ ކަނޑުގެ ސިފައިން އީރާނާ ދެކޮޅަށް ކުރިއަށްގެންދިޔަ  ބަންދުކުރުންތައް ވަނީ އުވާލާފަ އެވެ. އަދި ދާއިމީ ސުލްހައަކަށް ވާސިލުވުމަށްޓަކައި މަޝްވަރާތައް ފެށުމަށް ވެސް އެ އެއްބަސްވުމުގައި ހިމެނެ އެވެ. ނަމަވެސް، ދެ ގައުމުގެ ދެމެދުގައި އަލުން ހަމަލާ ބަދަލުކުރަން ފެށުމާ ގުޅިގެން އެ އެއްބަސްވުން ވަނީ އުވިގެން ގޮސްފަ އެވެ.

އެ އެއްބަސްވުން އުވުނު ފަހުން، ދެ ގައުމުގެ ދެމެދުގައި ކުރިއަށްދާ މަޝްވަރާތައް ވަނީ މަރުތަޅު އެޅުވި، އެއްވެސް ކުރިއެރުމެއް ނުލިބި ހުއްޓިފަ އެވެ. އީރާނުގެ އެންމެ ބޮޑު ވިޔަފާރި ބައިވެރިޔާ ކަމަށްވާ ޗައިނާއަކީ، މި މައްސަލައިގައި ދެ ގައުމުގެ ދެމެދުގައި މެދުވެރިއެއްގެ ދައުރު އަދާކުރެވިދާނެ ގައުމެއްގެ ގޮތުގައި ބައިނަލްއަގުވާމީ މުޖުތަމައުން ދެކެ އެވެ.

ޗައިނާގެ ރައީސް ޝީ ޖިންގްޕިންގ އެމެރިކާގެ ރައީސް ޑޮނަލްޑް ޓްރަމްޕްއާ ސަލާމްކުރައްވަނީ

ސައުދީ އިސްވެ އޮންނަ ކޯލިޝަނުގެ ތަރުޖަމާނު ވިދާޅުވީ، ހޫޘީން ފޮނުވާލި މި 6 ބެލިސްޓިކް މިސައިލް ކޯލިޝަނުގެ ފައުޖުތަކުން ހުއްޓުވައި، ނައްތާލާފައިވާ ކަމަށެވެ.

މީގެ އިތުރުން ތަރުޖަމާނު ވިދާޅުވީ، ހޫޘީން ހިންގާ މިފަދަ އުދުވާންތަކާއި ގަވާއިދާ ޚިލާފު އަމަލުތަކަށް ވަރުގަދަ ރައްދެއް ދޭނެ ކަމަށެވެ.

މި ހާދިސާއާ ގުޅިގެން، ސައުދީ އަރަބިއްޔާގެ ސިވިލް ޑިފެންސްއިން ވަނީ މުގައްދަސް ސިޓީ ކަމަށްވާ މައްކާ އާއި، ތަބޫކް ޖިއްދާ އާއި ޔަންބޫގެ އިތުރުން ތާއިފަށް ނުރައްކަލުގެ އިންޒާރު ކުޑަވަގުތުކޮޅަކަށް ނެރެފަ އެވެ.

އެކަމަށް ހަފުތާއެއް ނުވަތަ މަހެއް ނުވަތަ ދެ މަސް ދުވަސް ނަގާނެ ކަމެއް ނޭންގޭ ނަމަވެސް، އީރާނުން ބަލި ގަބޫލުކޮށް އަމާންދޭނެކަން ކަށަވަރުކަމަށް އެމެރިކާގެ ޓްރެޜަރީ ސެކްރެޓަރީ ސްކޮޓް ބެސެންޓް ވިދާޅުވެއްޖެ އެވެ.

އީރާނަށް އިގުތިސާދީ ގޮތުން ނިމުމެއް ގެނައުމުގެ ނަމުގައި އެ ގައުމުގެ އޭވިއޭޝަން ދާއިރާއަށް ދަތިކުރުމުގެ އައު ފިޔަވަޅުތަކެއް އެމެރިކާއިން އެޅުމާ ގުޅިގެން ވާހަކަ ދައްކަވަމުން ބެސެންޓް ވިދާޅުވީ މި ފިޔަވަޅުތަކުގެ ސަބަބުން ނުކުމެދާނެ ތިން ނަތީޖާއެއްވާ ކަމަށެވެ. އެއީ އީރާނުގެ ސަރުކާރުގެ ތެރޭގައި ބައިބައިވުން އުފެދި އެއްބަޔަކު އަނެއްބަޔަކާ ދެކޮޅުވުން، ނުވަތަ އީރާނުގެ ރައްޔިތުން އެ ގައުމުގެ ސަރުކާރާ ދެކޮޅަށް ތެދުވުން، ނުވަތަ އީރާނުން އައު އެއްބަސްވުމެއް ގާއިމުކުރަން ބޭނުންވާނަމަ އެ އެއްބަސްވުމުގައިވާ ކަންކަމަށް ފުރިހަމައަށް އަމަލުކުރަން އެ މީހުންނަށް މަޖުބޫރުވުމެވެ.

މިފަހަރު އީރާނާއެކު އައު އެއްބަސްވުމެއް ގާއިމުކުރެވިއްޖެނަމަ، އެ އެއްބަސްވުމުގައިވާ ކަންކަމަށް އެ ގައުމުން ފުރިހަމައަށް ބޯލަނބާނެކަމުގެ ޔަގީންކަން ދެއްވާކަމަށް ވެސް ފޮކްސް ނިއުސްއަށް ދެއްވި އިންޓަވިއުއެއްގައި ބެސެންޓް ވިދާޅުވި އެވެ. 

އެމެރިކާގެ ޓްރެޜަރީ ސެކްރެޓަރީ ސްކޮޓް ބެސެންޓް

އީރާނުގެ ރޫހާނީ ލީޑަރު މުޖްތަބާ ޚާމަނާއީގެ އެޑްވައިޒަރު، މޭޖަރ ޖެނެރަލް ޔަހްޔާ ރަހީމް ސަފަވީއާ ހަވާލާދީ އެގައުމުގެ ފާރްސް އަދި ތަސްނީމް ނިއުސް އެޖެންސީން އާންމުކުރި ވީޑިއޯއެއްގައި އޭނާ ވިދާޅުވީ، ހުރްމުޒް ކަނޑުއޮޅި ދެން ދުވަހަކު ވެސް ކުރިން އޮތް ހާލަތަށް ރުޖޫއަ ނުވާނެ ކަމަށާއި، އެ ސަރަހައްދު ފުރިހަމައަށް ބަލަހައްޓައި ކޮންޓްރޯލް ކުރުމުގެ މަސައްކަތް އީރާނުން ކުރިއަށް ގެންދާނެ ކަމަށެވެ.

ސަފަވީ ވިދާޅުވި ގޮތުގައި، ހުރްމުޒް ކަނޑުއޮޅި ބެލެހެއްޓުމުގެ ނިޒާމަކާ ގުޅޭގޮތުން އީރާނާއި އޮމާނުން އެއްބަސްވުމަކަށް އައެވެ. ނަމަވެސް، އެމެރިކާއިން ވަނީ އެ އެއްބަސްވުމަށް ހުރަސްއަޅާފައި ކަމަށް އޭނާ ތުހުމަތު ކުރެއްވި އެވެ.

އޭނާ ވިދާޅުވީ، ގަލްފް ސަރަހައްދާއި ރަތްކަނޑު، އަދި ހުރްމުޒް ކަނޑުއޮޅިއާއި ބާބުލް މަންދަބު ކަނޑުއޮޅި އިސްތިރާތީޖީ ގޮތުން ގުޅާލުމަކީ ހަނގުރާމައިގެ މައިދާނަށް ބޮޑެތި ބަދަލުތަކެއް އަންނާނެ ކަމެއް ކަމަށެވެ.

އީރާނުގެ ދެކުނުގެ ބަންދަރު އައްބާސްގެ އައްސޭރިފަށުގައިވާ ހުރްމުޒް ކަނޑުއޮޅީގައި، މުދާ އުފުލާ ގިނަ އަދަދެއްގެ ބޯޓުފަހަރު ތާށިވެފައި އޮތް މަންޒަރު ފެންނަ ފޮޓޯއެއް - 01 ޖޫން 2026

އީރާނުގެ ތާއީދު އޮންނަ ޔަމަނުގެ ހޫޘީ ހަނގުރާމަވެރިން، ބާބުލް މަންދަބު ކަނޑުއޮޅީގެ ޑްރޯން މަންޒަރުތަކާއި ސައުދީ އަރަބިއްޔާގެ އަސްކަރީ މަރުކަޒުތަކާއި ހަތިޔާރުތަކުގެ ފޮޓޯތަކެއް އާންމުކޮށްފި އެވެ. ހޫޘީން ބުނާ ގޮތުގައި މި ތަކެއްޗާއި އަސްކަރީ މަރުކަޒުތަކަކީ ޔަމަނުގެ މުޚާ އަދި ޛުބާބް ސަރަހައްދުން އެ ޖަމާއަތުގެ ބާރުގެ ދަށަށް ގެނެސްފައިވާ ތަންތަނާއި ތަކެއްޗެވެ.

ސައުދީ އަރަބިއްޔާގެ ސިވިލް ޑިފެންސްއިން މައްކާ އާއި އެ ގައުމުގެ ހުޅަނގު އުތުރުގެ ސަރަހައްދެއް ކަމަށްވާ ތަބޫކާއި، ރަތްކަނޑުގެ އައްސޭރިފަށުގައިވާ ޖިއްދާއާއި ޔަންބޫގެ އިތުރުން ދެކުނުގެ ސަރަހައްދެއް ކަމަށްވާ ތާއިފަށް ކުރިމަތިވެދާނެ ނުރައްކާތަކަކަށް ސަމާލުވުމަށް ބާރުއަޅައި ގިނަ އިންޒާރުތަކެއް ނެރެފި އެވެ.

އިސްރާއީލުން ހިފާފައިވާ ފަލަސްތީނުގެ ބިންތަކަށް އެހީތެރިކަން ފޯރުކޮށްދިނުމަށްޓަކައި، އިތުރު 13.17 މިލިއަން އެމެރިކާ ޑޮލަރު ދިނުމަށް ނިންމާފައިވާކަން ނޯވޭ ސަރުކާރުން ހާމަކޮށްފި އެވެ. ރޮއިޓާސް ނިއުސް އެޖެންސީން ރިޕޯޓްކޮށްފައިވާ ގޮތުގައި، އދ. އާއި ވޯލްޑް ބޭންކް މެދުވެރިކޮށް ފޯރުކޮށްދޭ މި އެހީގެ ތެރޭގައި ފަލަސްތީނުގެ ސަރުކާރުގެ ބަޖެޓަށް ބޭނުންވާ މާލީ އެހީތެރިކަން ވެސް ހިމެނެ އެވެ.

ނޯވޭގެ ފޮރިން މިނިސްޓަރު އެސްޕެން ބާތު އެއިޑީ ނެރުއްވި ބަޔާނެއްގައި ވިދާޅުވީ، ފަލަސްތީނުގެ ރައްޔިތުންނަށް ބައިނަލްއަގުވާމީ އެހީތެރިކަން ބޭނުންވެފައިވާ މިންވަރު ކުރިއަށްވުރެ ބޮޑުވެފައިވާ ކަމަށެވެ. މީގެ އިތުރުން، އިސްރާއީލުން ހިފާފައިވާ ހުޅަނގު އައްސޭރީގައި ޔަހޫދީން ވަޒަންވެރިކުރުވުމަށް ހިންގާ ހަރަކާތްތަކަށް ފޮރިން މިނިސްޓަރު ވަނީ ވަރަށް ބޮޑަށް ފާޑުވިދާޅުވެފަ އެވެ.

ނޯވޭއަކީ 2024 ވަނަ އަހަރު ފަލަސްތީނަކީ މިނިވަން ދައުލަތެއްގެ ގޮތުގައި ރަސްމީކޮށް ބަލައިގަނެފައިވާ ގައުމެކެވެ. އަދި އެ ގައުމަކީ ފަލަސްތީނަށް އެހީތެރިކަން ފޯރުކޮށްދޭ ބައިނަލްއަގުވާމީ ގްރޫޕްގެ ރިޔާސަތު ބަލަހައްޓާ ގައުމު ވެސް މެ އެވެ.

ޣައްޒާގެ ދެކުނުގައި އޮންނަ ޚާން ޔޫނިސްގައި އެހީގެ ގޮތުގައި ފޯރުކޮށްދިން ކާނާގެ ސާމާނު ހޯދުމަށް އެއްވެ ތިބި ފަލަސްތީނުގެ ރައްޔިތުން، އެހީގެ ގޮތުގައި ލިބުނު ފުށް ބަސްތާތައް އުފުލަނީ

އީރާނުގެ އިގުތިސާދު އިނދަޖައްސާލުމަށް އެމެރިކާއިން އަޅަމުންދާ ފިޔަވަޅުތަކުގެ ތެރެއިން، އެ ގައުމުގެ އޭވިއޭޝަން ދާއިރާއަށް ދަތިކުރުމުގެ އައު ފިޔަވަޅުތަކެއް އެމެރިކާއިން އެޅުމާ ގުޅިގެން، އީރާނުގެ އެއާލައިންތަކުން ބައިނަލްއަގުވާމީ ބައެއް ދަތުރުތައް ބުދަ ދުވަހު ކެންސަލްކުރަން މަޖުބޫރުވެއްޖެ އެވެ.

ޖޯޖިއާ އަދި އަޒަރުބައިޖާނުން ވަނީ އީރާނަށް ކުރާ ދަތުރުތައް މެދުކަނޑާލާފައިވާކަން ރަސްމީކޮށް ކަށަވަރުކޮށްދީފަ އެވެ. މީގެ އިތުރުން، ތެހެރާންގައި ހުރި ޓްރެވަލް އޭޖެންޓަކު އޭއެފްޕީއަށް މައުލޫމާތު ދެމުން ބުނެފައިވަނީ ބަޣުދާދު، މަސްކަޓް އަދި ގަތަރަށް ކުރާ ދަތުރުތައް ވެސް ހުއްޓާލާފައިވާ ކަމަށެވެ. ނަމަވެސް ޗައިނާ ހިމެނޭހެން ބައެއް އެހެން މަންޒިލްތަކަށް އަދިވެސް ދަތުރުތައް ކުރަމުންދާ ކަމަށް އޭނާ ބުންޏެވެ.

އެމެރިކާގެ ޓްރެޜަރީ ސެކްރެޓަރީ ސްކޮޓް ބެސެންޓް މި އައު ފިޔަވަޅުތައް އިއުލާނު ކުރެއްވީ ހޯމަ ދުވަހު އެވެ. މިއީ ގާތްގަނޑަކަށް ހަތް މަސް ދުވަހަށް ދެމިގެން ގޮސްފައިވާ ހަނގުރާމައަށް ފަހު، އީރާނު ފިއްތާލުމަށްޓަކައި "އިގުތިސާދީ ގޮތުން ނިމުން ގެނައުމުގެ" ނަމުގައި ކުރިން ދީފައިވާ އިންޒާރުގެ ދަށުން އެޅި ފިޔަވަޅުތަކެއް ކަމަށް އޭނާ ވަނީ ވިދާޅުވެފަ އެވެ.  އަދި ބުދަ ދުވަހު އޭނާ ވިދާޅުވީ އީރާނުން ބޭރަށް ކުރާ ދަތުރުތަކުގެ ގާތްގަނޑަކަށް 80 ނުވަތަ 90 އިންސައްތަ މިހާރު ހުއްޓިފައިވާ ކަމަށެވެ. މީގެ އިތުރުން ބެސެންޓް ވިދާޅުވީ، އދ. ގައި ތިއްބެވި އީރާނުގެ މަންދޫބުން އެނބުރި ގައުމަށް ވަޑައިގަންނަވާނެ ގޮތަކާ މެދު ވެސް ސުވާލު އުފެދޭ ކަމަށެވެ.

އިރާގުގެ އިރުބިލްގައި ހުންނަ އީރާނުގެ މާހާން އެއާގެ އޮފީހެއްގައި މުވައްޒަފަކު މަސައްކަތް ކުރަނީ

ސައުދީ އަރަމްކޯގެ ތެލުގެ އުފެއްދުންތަކަށް އެއްވެސް ބުރޫއެއް އަރައިފިނަމަ، މަދު ދުވަސްކޮޅެއްގެ ތެރޭގައި އެކަން ހައްލުކޮށް، އަލުން އިއާދަކުރުމުގެ ގާބިލުކަން އެ ކުންފުންޏަށް ލިބިގެންވާ ކަމަށާއި، ތެޔޮ އެކްސްޕޯޓް ކުރުމަށް އިތުރު މަގުތައް ހޯދުމުގެ މަސައްކަތް މިހާރު ކުރަމުންދާ ކަމަށް އެ ކުންފުނީގެ ރައީސް އަދި ސީއީއޯ އަމީން ނާސިރު ވިދާޅުވެއްޖެ އެވެ. 

ސައުދީ އަރަބިއްޔާގެ ދައުލަތުގެ ތެޔޮ ކުންފުނިން މިހާރު ބޭނުންކުރާ މައިގަނޑު ތިން މަގުގެ އިތުރުން، ސާފުނުކުރާ ތެޔޮ ބޭރުކުރުމަށް ހަތަރުވަނަ އަދި ފަސްވަނަ މަގެއް ހޯދުމުގެ ދިރާސާތައް ކުރަމުންދާ ކަމަށް ޓޯކިޔޯގައި ހުންނަވައި އަމީން ނާސިރު ވިދާޅުވި އެވެ.

މީގެ އިތުރުން، ތެލުގެ ސަޕްލައިއަށް ކުރިމަތިވެދާނެ ހުރަސްތަކަށް ތައްޔާރުވުމުގެ ގާބިލުކަން އިތުރުކުރުމުގެ ގޮތުން، ޖަޕާން ހިމެނޭހެން ގައުމުން ބޭރުގައި ތެޔޮ ރައްކާކުރާ މިންވަރު އިތުރުކުރުމަށް އަރަމްކޯއިން ވިސްނަމުންދާ ކަމަށް ވެސް އޭނާ ވިދާޅުވި އެވެ.

އަރަމްކޯއަށް މިފަދަ ނިންމުންތަކެއް ނިންމަން ޖެހިފައިވަނީ، ޔަމަނުގެ ހޫޘީންގެ ފަރާތުން އެ ކުންފުންޏަށް އަމާޒުވާ ހަމަލާތައް އިތުރުވަމުންދާ ދަނޑިވަޅެއްގަ އެވެ. ހޫޘީން ދަނީ ރަތްކަނޑުގެ މުހިންމު މަގެއް ކަމަށްވާ ބާބުލް މަންދަބް ކަނޑުއޮޅިން ސައުދީގެ އުޅަނދުފަހަރު ދަތުރުކުރުމަށް ހުރަސްއަޅަމުންނެވެ. މީގެ އިތުރުން، އީރާނާ ދެކޮޅަށް އެމެރިކާ އާއި އިސްރާއީލުން ކުރަމުންދާ ހަނގުރާމައިގެ ސަބަބުން، ހުރްމުޒް ކަނޑުއޮޅި ވެސް އޮތީ ބޮޑު ބައެއް ބަންދުކުރެވިފަ އެވެ.

ސައުދީ އަރަމްކޯ

އެމެރިކާ އާއި އިސްރާއީލުން އީރާނަށް އިތުރު ހަމަލާއެއް ދީފިނަމަ، މި ހަނގުރާމަ އިންޑިއާ ކަނޑަށާއި އެއަށްވުރެ ދުރަށް ފުޅާކޮށްފާނެ ކަމުގެ އިންޒާރު، އީރާނުގެ ރޫހާނީ ލީޑަރު މުޖުތަބާ ޚާމަނާއީގެ މުޝީރަކު ދެއްވައިފި އެވެ.

އީރާނުގެ ފާރްސް ނިއުސް އޭޖެންސީން އާންމުކުރި ވީޑިއޯއެއްގައި މި އިންޒާރު ދެއްވީ މޭޖަރ ޖެނެރަލް ޔަހްޔާ ރަހީމް ސަފަވީ އެވެ.

ސަފަވީ ވިދާޅުވީ، މިހާރު ހިނގަމުންދާ ހަމަނުޖެހުންތައް ޕާޝިއަން ގަލްފާއި ހުރްމުޒް ކަނޑުއޮޅިން ފެށިގެން ރަތްކަނޑާ ހަމައަށް ފެތުރިފައިވާ ކަމަށެވެ. އަދި އިތުރު ހަމަލާތަކެއް ކުރިމަތިވެއްޖެނަމަ، އޭގެ ރައްދުގައި ހަނގުރާމައިގެ ކުރިމަގު އިންޑިއާ ކަނޑަށާއި ފަހަރުގައި އެއަށްވުރެ ވެސް ދުރަށް ފުޅާވެގެން ދިއުމަކީ އެކަށީގެންވާ ކަމެއް ކަމަށް އޭނާ ފާހަގަކުރެއްވި އެވެ.

ސަފަވީ އިތުރަށް ވިދާޅުވީ، އެމެރިކާއާއި އިސްރާއީލުން އަލުން ހަމަލާދޭން ފަށައިފިނަމަ، ކުރިމަތިވެދާނެ އެންމެ ގޯސް ހާލަތަކަށް އީރާނުގެ އަސްކަރިއްޔާއިން ރޭވުންތައް ތައްޔާރުކޮށްފައިވާ ކަމަށެވެ. އަދި ރަތްކަނޑާއި ބާބުލް މަންދަބު ކަނޑުއޮޅި މަރުކަޒުކޮށްގެން އައު ހަނގުރާމައިގެ މައިދާނެއް އެމެރިކާގެ ލޯމަތީގައި ހުޅުވިގެންދާނެ ކަމަށް ވެސް ސަފަވީ ވިދާޅުވި އެވެ.

އީރާނުގެ ރޫހާނީ ލީޑަރު މުޖުތަބާ ޚާމަނާއީގެ މުޝީރު މޭޖަރ ޖެނެރަލް ޔަހްޔާ ރަހީމް ސަފަވީ

މި ބަދަލާއެކު ބުރާސްފަތި ދުވަހު ބްރެންޓް ކްރޫޑް ފިއުޗާސްގެ އަގުން 94 ސެންޓް ނުވަތަ 0.9 އިންސައްތަ ދަށަށް ގޮސް، ފީފާއެއްގެ އަގު ވަނީ 102.13 ޑޮލަރަށް ވެއްޓިފަ އެވެ.

އެމެރިކާގެ ވެސްޓް ޓެކްސަސް އިންޓަމީޑިއޭޓް (ޑަބްލިއުޓީއައި) ކްރޫޑްގެ އަގުން 59 ސެންޓް ނުވަތަ 0.7 އިންސައްތަ ދަށަށް ގޮސް، މިހާރު ބާޒާރުގައި ފީފާއެއްގެ އަގު ހުރީ 91.56 ޑޮލަރުގަ އެވެ.

ތެލުގެ އަގުތަކަށް މި ބަދަލު އައިސްފައިވަނީ، އޭގެ ކުރީ ދުވަހު ތެލުގެ އަގު 4 އިންސައްތަ މައްޗަށް ގޮސްފައި ވަނިކޮށެވެ. އަގުތައް ދަށަށް ދާން ފެށީ އެމެރިކާއާއި އީރާނާ ދެމެދު އުފެދިފައިވާ ހަމަނުޖެހުންތައް ޚާރިޖީ މަޝްވަރާތަކުގެ ތެރެއިން ހައްލުކުރުމަށް އީރާނުން ތައްޔާރަށް އޮތްކަމަށް ބުނުމާ ގުޅިގެންނެވެ. ނަމަވެސް، މި މައްސަލަ ހައްލުކުރާނެ ގޮތަކާ މެދު ދެ ގައުމުގެ ދެމެދުގައި އަދިވެސް ބޮޑެތި ޚިޔާލުތަފާތުވުންތަކެއް ހުރިކަން ފާހަގަކުރެވެ އެވެ.

ބައިނަލްއަގުވާމީ ބާޒާރުގައި ތެލުގެ އަގުތައް ދަށަށް ހިނގައްޖެ

ސޫރިޔާގެ ރައީސް އަހުމަދު އަލް-ޝަރާ އދ. ގެ މެހެމާނުންގެ ފޮތުގައި ކީރިތި ޤުރުއާނުގެ ތައުބާ ސޫރަތުގެ 105 ވަނަ އާޔަތުގެ ފުރަތަމަ ބައި ވަނީ ލިޔުއްވާފަ އެވެ.

ތައުބާ ސޫރަތުގެ 105 ވަނަ އާޔަތުގެ މާނައަކީ، "ކަލޭގެފާނު ވިދާޅުވާށެވެ! ތިޔަބައިމީހުން އަމަލުކުރާށެވެ! ފަހެ، ﷲ އާއި، އެކަލާނގެ ރަސޫލާއާއި މުއުމިނުން ތިޔަބައިމީހުންގެ އަމަލުތައް ދެކެވޮޑިގެންވާނެތެވެ."

ސޫރިޔާގެ ރައީސް އަހުމަދު އަލް-ޝަރާ އދ. ގެ މެހެމާނުންގެ ފޮތުގައި ލޔުއްވީ ކީރިތި ޤުރުއާނުގެ ތައުބާ ސޫރަތުގެ 105 ވަނަ އާޔަތުގެ ފުރަތަމަ ބައި

ޔަމަނުގެ ސަރުކާރު ސިފައިންނާއި ހޫޘީ ހަނގުރާމަވެރިންނާ ދެމެދު ހިނގި ވަރުގަދަ ކުރިމަތިލުންތަކެއްގައި ހޫޘީންގެ 5 ހަނގުރާމަވެރިއަކު މަރުވެ، 20 މީހަކު ޒަޚަމްވެފައިވާ ކަމަށް މޭޖަރ ޖެނެރަލް އަބްދުލްއަޒީޒް އަލް މަޖީދީ ވިދާޅުވެއްޖެ އެވެ.

ސައުދީ އަރަބިއްޔާގެ އެހީތެރިކަން ލިބޭ ޔަމަނުގެ ސަރުކާރު ސިފައިން ބުނާ ގޮތުގައި، އީރާނަށް ތާއީދުކުރާ ހޫޘީ ހަނގުރާމަވެރިންނާ ދެމެދު ހިނގި ކުރިމަތިލުންތަކަށްފަހު، ހުޅަނގުގެ ތާއިޒް ގަވަރުނަރޭޓްގައި އޮންނަ އިސްތިރާތީޖީ ގޮތުން މުހިންމު ގަރުފާން ފަރުބަދައިގެ ފުރިހަމަ ކޮންޓްރޯލް މިހާރު ވަނީ އެ ފަރާތްތަކުގެ ދަށަށް ގެނެސްފަ އެވެ.  މި އުސް ބިން ހިފުމާއެކު، ސަރުކާރުގެ ސިފައިންނަށް އެ ސަރަހައްދުގެ އެހެން މަގާމުތަކަށް ނަޒަރު ހިންގައި، ހޫތީންގެ ހަރަކާތްތައް ހުއްޓުވުމަށް އިތުރު ފުރުސަތުތަކެއް ވަނީ ފަހިވެފަ އެވެ.

އެގޮތުން ގަރުފާން ފަރުބަދައިގެ ކޮންޓްރޯލް ލިބުމާއެކު، ތާއިޒް ގަވަރުނަރޭޓްގެ ދެކުނުގައިވާ އައްޝަމައިތައުން އަދި އަލް ވަޒީއާ ޑިސްޓްރިކްޓާ ދެމެދު އޮންނަ ވާދީތައް މޮނިޓަރ ކުރުމާއި، އެ ސަރަހައްދަށް ހަމަލާދިނުމުގެ ފުރިހަމަ ބާރު ޔަމަނުގެ ސަރުކާރު ސިފައިންނަށް ލިބިގެންދާނެ އެވެ.

ސަރުކާރު ސިފައިން މި ސަރަހައްދުގެ ކޮންޓްރޯލް ހޯދި ކަމަށް ބުނާ ދައުވާއާ ގުޅިގެން ހޫޘީންގެ ފަރާތުން އަދި ވަކި އެއްޗެއް ހާމަކޮށްފައެއް ނުވެ އެވެ.

ޔަމަނުގެ ސަރުކާރުގެ ސިފައިން އެގައުމުގެ ތާއިޒްގެ ހުޅަނގު ފްރަންޓްގައި ހޫތީ ހަނގުރާމަވެރިންނާ ދެކޮޅަށް ކުރަމުންދާ ހަނގުރާމައިގައި، މުހިންމު އުސް ބިމެއް ކަމަށްވާ މައުންޓް ގަރްފާން ހިފައި، އެ ސަރަހައްދުގެ ކޮންޓްރޯލް ހޯދައިފި، 23 ސެޕްޓެމްބަރު 2026

ޔަމަނުގެ ދެކުނާއި ހުޅަނގު ދެކުނުގެ މުހިންމު ޕްރޮވިންސްތައް ކަމަށްވާ އަދަން އާއި ތާއިޒް އަދި ލަހްޖް ގުޅުވައިދޭ މައި މަގާ ކައިރި ސަރަހައްދުތަކަށް އަތްގަދަކުރުމަށް ހޫޘީން ދިން ހަމަލާއަކާއި، އެ ސަރަހައްދަށް ވަދެގަތުމަށް ކުރި މަސައްކަތްތަކެއް ޔަމަނުގެ ސަރުކާރުގެ ސިފައިން ނާކާމިޔާބުކޮށްލާފައިވާ ކަމަށް އެ ގައުމުގެ ޑިފެންސް މިނިސްޓްރީން ބުނެފި އެވެ.

ޔަމަނުގެ ސަރުކާރުގެ ސިފައިންގެ ރަސްމީ ތަރުޖަމާނު ވިދާޅުވި ގޮތުގައި، ހޫޘީން ދިން މި ހަމަލާއާ ގުޅިގެން ދެފަރާތުގެ ދެމެދުގައި ވަރުގަދަ ކުރިމަތިލުންތަކެއް ހިނގާފައިވެ އެވެ. މި ކުރިމަތިލުންތަކުގެ ސަބަބުން ހަމަލާދިން ހޫޘީ ހަނގުރާމަވެރިންނަށް ފަހަތަށް ޖެހެން މަޖުބޫރުވި ކަމަށާއި، އެމީހުންގެ ފުރާނައަށާއި ހަނގުރާމަވެރި ވަސީލަތްތަކަށް ބޮޑެތި ގެއްލުންތަކެއް ލިބިފައިވާ ކަމަށް ވެސް ތަރުޖަމާނު ވިދާޅުވި އެވެ.

ޔަމަނުގެ ހުޅަނގުގައިވާ ތާއިޒްގެ ހުޅަނގު ފަރާތު ކަދާ ފްރަންޓްލައިންގައި ގާއިމުކޮށްފައިވާ ޗެކްޕޮއިންޓެއްގައި، ޕިކަޕެއްގެ ފަހަތުގައި ހަރުކޮށްފައިވާ ބަޑިއެއް ހިފައިގެން ހުރި ޔަމަން ސަރުކާރުގެ ސިފައިންގެ މީހަކު، 13 ސެޕްޓެމްބަރު 2026

އީރާނުގެ ރައީސް އދ. ގެ އާންމު މަޖިލީހުގައި ތަގުރީރު ކުރައްވަން ފެއްޓެވުމާއެކު، އެމެރިކާގެ މަންދޫބު ބައްދަލުވުން ދޫކުރައްވައި ނުކުމެވަޑައިގެންފި އެވެ.

އީރާނުގެ ރައީސް މަސްއޫދު ޕެޒެޝްކިއަން އދ. ގެ އާންމު މަޖިލީހުގައި ވާހަކަފުޅު ދައްކަވަން ފެއްޓެވި ވަގުތު، އެމެރިކާގެ ވަފުދުގެ އޮފިޝަލު ވަނީ އޭނާގެ ގޮނޑިން ތެދުވެވަޑައިގެން، ބްރީފްކޭސް ހިއްޕަވައި އަދި އައިނު ނަންގަވައިގެން މާލަމުން ނުކުމެވަޑައިގެންފަ އެވެ.

އީރާންގެ ރައީސް ތަގުރީރުކުރައްވަން ފެއްޓެވުމާއެކު އދ. ގެ އާންމު މަޖިލީހުގެ މާލަމުގައި އިންނެވި އެމެރިކާގެ ހަމައެކަނި މަންދޫބު، އޭނާގެ އައިނު ނަންގަވައި ބްރީފްކޭސް ހިއްޕަވައިގެން މާލަމުން ނުކުމެވަޑައިގެންފި

އެމެރިކާއިން އާންމުންގެ އުމްރާނީ ވަސީލަތްތަކަށް ހަމަލާދިން ނަމަވެސް، އީރާނުން މަސައްކަތް ކުރީ އަމިއްލަ ދިފާއުގައި ކަމަށް އީރާނުގެ ރައީސް މަސްއޫދު ޕެޒެޝްކިއަން ވިދާޅުވެއްޖެ އެވެ. އެމެރިކާގެ ހަމަލާތަކަށް އީރާނުން ރައްދު ދީފައިވާނެ ކަމަށް ފާހަގަކުރައްވަމުން ޕެޒެޝްކިއަން ވިދާޅުވީ، އީރާނުން އާންމު ރައްޔިތުން ދިރިއުޅޭ ސަރަހައްދުތަކަށް ހަމަލާދީފައި ނުވާނެ ކަމަށެވެ.

ޕެޒެޝްކިއަން ވިދާޅުވީ، އެމެރިކާއިން އަވަށްޓެރި ސަރަހައްދުތަކަށް ވަދެގަނެ، ބައިނަލްއަގުވާމީ ގާނޫނުތަކާ ޚިލާފަށް އީރާނުގެ ޔުނިވަރސިޓީތަކާއި ސިއްހީ މަރުކަޒުތަކާއި ސުކޫލުތަކާއި ހޮސްޕިޓަލްތަކުގެ އިތުރުން އުމްރާނީ ވަސީލަތްތަކަށް އަމާޒުކޮށް ހަމަލާދީފައިވާ ކަމަށެވެ. އަދި އީރާނަކީ "ޓެރަރިޒަމްގެ ޝިކާރައަކަށް ވެފައިވާ" ގައުމެއް ކަމަށާއި އެމެރިކާއިން އީރާނަށް ދެމުންދާ ޣައިރު ގާނޫނީ ހަމަލާތައް ކުށްވެރިކުރައްވާ ކަމަށެވެ. ޕެޒެޝްކިއަން ވިދާޅުވީ، އެމަނިކުފާނު ތަމްސީލުކުރައްވަނީ އެއްވެސް ގާނޫނީ އޮނިގަނޑެއް ނުވަތަ ސަބަބެއް ނެތި، އެ ގައުމުގެ އިހުތިރާމް ލިބިގެންވާ އެންމެ މަތީ ލީޑަރު އަވަހާރަކޮށްލާފައިވާ އީރާނެއް ކަމަށެވެ.

އަދި އެމެރިކާއިން އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން ހަމައެކަނި ގެއްލުން ލިބެނީ ފަގީރުންނާއި ނިކަމެތި އާންމު ރައްޔިތުންނަށް ކަމަށާއި މި ދަތިކުރުމުގެ ފިޔަވަޅުތަކުގެ އަމާޒަކީ ބަލިމީހުންނާއި ކުށެއް ނެތް މީހުންނާއި ފަގީރުންގެ އިތުރުން މުޖުތަމައުގައި އެންމެ ނިކަމެތިކޮށް އުޅޭ މީހުން ކަމަށެވެ. އެމެރިކާއިން މަސައްކަތް ކުރަނީ އެ ގައުމުގެ ނޭދެވޭ މަގުސަދުތައް ހާސިލުކުރުމަށްޓަކައި، ގައުމެއްގެ ރައްޔިތުން ގުރުބާންކުރަން ކަމަށް ވެސް ޕެޒެޝްކިއަން އިތުރަށް ވިދާޅުވި އެވެ.

ޕެޒެޝްކިއަންގެ ތަގުރީރު ނިންމަވާލެއްވީ އެމެރިކާގެ ރައީސް ޑޮނަލްޑް ޓްރަމްޕަށް މުޚާތަބު ކުރައްވަމުންނެވެ. އެގޮތުން އީރާނުގެ ރައީސް ވިދާޅުވީ، ދަތިކުރުމުގެ ފިޔަވަޅުތަކާއި ފިއްތުންތަކާއި ބިރުދެއްކުންތައް އިތުރުވި ނަމަވެސް، އީރާނުގެ ރައްޔިތުންގެ ސާބިތުކަން އިތުރުވާނެކަން ޓްރަމްޕް ދެނެވަޑައިގަންނަވަން ޖެހޭނެ ކަމަށެވެ.

އީރާނަކީ މަޝްވަރާ ކުރުމަށާއި ވާހަކަދެއްކުމަށް ތައްޔާރަށް އޮތް ގައުމެއް ނަމަވެސް، ބާރުގެ ބޭނުންކޮށްގެން ބިރުދެއްކުމުގެ ސިޔާސަތު ގަބޫލުނުކުރާނެ ކަމަށް ވިދާޅުވެ އެމަނިކުފާނުގެ ވާހަކަފުޅު ނިންމަވާލެއްވި އެވެ.

އެމެރިކާއިން މިނާބަށް ދިން ހަމަލާއެއްގައި މަރުވި އީރާނުގެ ސްކޫލް ދަރިވަރުންތަކެއްގެ ފޮޓޯއެއް ޕެޒެޝްކިއަން ހިފަހައްޓަވައިގެން ހުންނަވަނީ

އީރާނުން ނިއުކްލިއަރ ހަތިޔާރު އުފެއްދުމުގެ ވިސްނުމެއް ނުގެންގުޅޭ ކަމަށާއި، ނަމަވެސް ސުލްހަވެރި ބޭނުންތަކަށް ނިއުކްލިއަރ ޓެކްނޮލޮޖީ ބޭނުންކުރުމަކީ އެ ގައުމަށް ލިބިގެންވާ "އަސާސީ ހައްގެއް" ކަމަށް އީރާނުގެ ރައީސް މަސްއޫދު ޕެޒެޝްކިއަން އަނެއްކާ ވެސް ވިދާޅުވެއްޖެ އެވެ.

ރައީސް ޕެޒެޝްކިއަން ވިދާޅުވީ، ނިއުކްލިއަރ ހަތިޔާރު އުފެއްދުމަކީ އީރާނުގެ ސިޔާސަތެއް ނޫން ކަމަށާއި، ނަމަވެސް ސުލްހަވެރި ބޭނުންތަކަށް ނިއުކްލިއަރ ޓެކްނޮލޮޖީ ބޭނުންކުރުމުގައި އެއްވެސް ހުރަހެއް އޮވެގެން ނުވާނެ ކަމަށެވެ.

އިސްރާއީލުން ނިއުކްލިއަރ ހަތިޔާރު ގެންގުޅޭއިރު، އެ ގައުމުގެ ނިއުކްލިއަރ މަރުކަޒުތައް ބަލައި ފާސްކުރުމުގެ ފުރުސަތު ނުދޭކަން ފާހަގަކުރައްވައި ޕެޒެޝްކިއަން ވިދާޅުވީ، ނިއުކްލިއަރ ހަތިޔާރު ނުފެތުރުމާބެހޭ މުއާހަދާ (އެންޕީޓީ) ގައި އިސްރާއީލުން ސޮއިކޮށްފައި ނުވާއިރު، އެ ގައުމުގެ އަތުގައި ނިއުކްލިއަރ ހަތިޔާރު ހުރުމަކީ ބައިނަލްއަގުވާމީ މުޖުތަމައުގެ ދެފުށް ގެންގުޅޭ ސިޔާސަތު ހާމަވާ ކަމެއް ކަމަށެވެ. އަދި އިސްރާއީލަށް އެ ފުރުސަތު އޮތްއިރު، އީރާނުގެ މަރުކަޒުތައް ބަލައި ފާސްކުރުމަށް އިންސްޕެކްޓަރުން ފޮނުވަން ބާރުއަޅަނީ ކީއްވެތޯ އެމަނިކުފާނު ސުވާލު އުފެއްދެވި އެވެ.

މީގެ އިތުރުން ޕެޒެޝްކިއަން ވިދާޅުވީ، އިސްރާއީލުން މީހުން މަރަމުންދާއިރު، އީރާނާ ދެކޮޅަށް ދަތިކުރުމުގެ ފިޔަވަޅު އަޅައި އަދަބު ދެމުންދާ ކަމަށެވެ.  އަދި އީރާނުން މަޝްވަރާގެ މޭޒުދޮށުގައި އޮއްވައި ވެސް އެ ގައުމަށް ބޮން އަޅާފައިވާ ކަމަށް ވެސް އެމަނިކުފާނު ވިދާޅުވި އެވެ. 

އީރާނުގެ ރައީސް މަސްއޫދު ޕެޒެޝްކިއަން އދ. ގެ އާންމު މަޖިލީހުގައި ތަގުރީރު ކުރައްވަނީ

އީރާނުގެ އެންމެ ބޮޑު އެއް ބޭންކު ކަމަށްވާ ބޭންކް މެލީގެ ގޮފިތައް  ޔުނައިޓެޑް އަރަބް އެމިރޭޓްސް (ޔޫއޭއީ) ގައި ހިންގުން ޔޫއޭއީގެ މަރުކަޒީ ބޭންކުން މަނާކޮށްފި އެވެ.

ޔޫއޭއީގެ މަރުކަޒީ ބޭންކާ ހަވާލާދީ އެ ގައުމުގެ ރަސްމީ ނިއުސް އެޖެންސީން ރިޕޯޓްކޮށްފައިވާ ގޮތުގައި، މި ފިޔަވަޅު އަޅާފައިވަނީ ބޭންކް މެލީން އަމަލުކުރަންޖެހޭ ގަވާއިދުތަކާއި ގާނޫނުތަކުގެ އިތުރުން ސުޕަވައިޒަރީ ނިންމުންތަކާ ހިލާފުވެފައިވާތީ އެވެ.

ޔޫއޭއީން އަލަށް އެކުލަވާލި މި އުސޫލުގެ ދަށުން، ބޭންކް މެލީ އިރާންގެ ގޮފިތަކުން އީރާނަށް ފައިސާ ފޮނުވުމާއި، އީރާނުން ފައިސާ ބަލައިގަތުމުގެ އިތުރުން، ވިޔަފާރިއާ ގުޅުންހުރި މާލީ މުއާމަލާތްތައް ހިންގުން ވަނީ މަނާކޮށްފަ އެވެ.

އީރާނާ ދެކޮޅަށް އެމެރިކާއިން ކުރިއަށްގެންދާ އިގުތިސާދީ ދަތިކުރުމުގެ ފިޔަވަޅުތަކުގެ ތެރެއިން، މިދިޔަ އޮގަސްޓް މަހު އެމެރިކާގެ ޓްރެޜަރީ ޑިޕާޓްމަންޓުން ވެސް ވަނީ ބޭންކް މެލީއާ ގުޅުން އޮންނަ ފަރާތަކަށް ފިޔަވަޅު އަޅާފަ އެވެ.

އީރާނުގެ ބޭންކު މެލީ

ސޫރިޔާގެ އިސްތިގުލާލާއި ބައިނަލްއަގުވާމީ ގާނޫނުތަކާ ޚިލާފުވުމަށް ކުރާ ކޮންމެ މަސައްކަތެއް "ހުއްޓުވާނެ" ކަމަށް ރައީސް އަލް-ޝަރާ ވިދާޅުވެއްޖެ އެވެ.

އދ. ގެ ސަލާމަތީ މަޖިލީހުގެ 497 ވަނަ ގަރާރާ އެއްގޮތްވާ ގޮތުގެ މަތިން، ގޯލާން ހައިޓްސް އަބަދުވެސް ދެމިއޮންނާނީ ސޫރިޔާގެ ބިމެއްގެ ގޮތުގައި ކަމަށާއި، އެކަމަށް ހުރަސްއެޅުމަށް ކުރާ ކޮންމެ މަސައްކަތެއް "ނާކާމިޔާބު ކޮށްލާނެ" ކަމަށް ވެސް އެމަނިކުފާނު އިތުރަށް ވިދާޅުވި އެވެ.

ބައިނަލްއަގުވާމީ ގާނޫނުތަކަށް އިހުތިރާމްކުރާ ފަރާތްތަކަށާއި، ސަލާމަތީ މަޖިލީހުގެ 497 ވަނަ ގަރާރުގެ މާނަ އޮޅުވާލުމުން އެއްކިބާވި ފަރާތްތަކަށް ރައީސް އަލް-ޝަރާ ވަނީ ޝުކުރު އަދާކުރައްވާފަ އެވެ.

އިސްރާއީލުން ގޯލާން ހައިޓްސް ހިފާފައިވަނީ 1967 ވަނަ އަހަރު ކުރި ހަ ދުވަހުގެ ހަނގުރާމައަކަށް ފަހު އެވެ. 

އިސްރާއީލުން ހިފާފައިވާ ގޯލާން ހައިޓްސް އާއި ސީރިއާ ވަކިކޮށްދޭ ރައްކާތެރިކަމުގެ ސަރަހައްދުތަކަށް އެ ގައުމުގެ ސިފައިން ވަނީ އަތްގަދަކޮށްފައި، މީގެ ތެރޭގައި ޖަބަލް އަލް-ޝެއިޚް އާއި އެ ސަރަހައްދާ ކައިރީގައިވާ އަވަށްތައް ހިމެނޭއިރު، އިސްރާއީލުގެ ސިފައިން މިހާރު ވަނީ ސީރިއާގެ ވެރިރަށް ދިމިޝްގާ ދިމާލަށް މަދުވެގެން 11 މޭލަށް ކުރިއަށް ޖެހިލާފައި

އިސްރާއީލުން ސޫރިޔާއަށް މެދުނުކެނޑި ދެމުންދާ ހަމަލާތައް އެ ގައުމުގެ ރައީސް ކުށްވެރިކުރައްވައި ވިދާޅުވީ، މިހާތަނަށް އިސްރާއީލުން ވައިގެ މަގުން 500 ހަމަލާ ދީފައިވާ ކަމަށާއި، 1،200 އަށްވުރެ ގިނަ ފަހަރު ސޫރިޔާގެ ސަރަހައްދަށް ވަދެގަނެ، 300 މީހަކު ހައްޔަރުކޮށްފައިވާ ކަމަށެވެ.

ސޫރިޔާގެ ސަރަހައްދުތަކުން އިސްރާއީލުގެ ސިފައިން ފޭބުމަށާއި 1974 ވަނަ އަހަރުގެ އެއްބަސްވުމަށް އިސްރާއީލުން އިހުތިރާމް ކުރުމަށް ގޮވާލައްވަމުން އަލް-ޝަރާ ވިދާޅުވީ، އިސްރާއީލުން ބާރުގެ ބޭނުންކޮށްގެން ކަންކަން ނިންމުމަށް ކުރާ މަސައްކަތްތައް ގަބޫލުނުކުރައްވާނެ ކަމަށެވެ. އަދި ސަރަހައްދީ ސުލްހައާއި އަމާންކަން ގެއްލޭ ގޮތަށް އިސްރާއީލުން ހިންގާ އުދުވާނީ އަމަލުތައް ސޫރިޔާއިން ބަލައިނުގަންނާނެ ކަމަށް ވެސް އެމަނިކުފާނު ވިދާޅުވި އެވެ.

ނިއުޔޯކުގައި ހުންނަ އދ. ގެ މައި މަރުކަޒުގައި ކުރިއަށްދިޔަ، އދ. ގެ 81 ވަނަ އާންމު މަޖިލީހުގައި ސޫރިޔާގެ ރައީސް އަހުމަދު އަލް-ޝަރާ ވާހަކަފުޅު ދައްކަވަނީ

ޔަމަނުގެ ތާއިޒް އާއި ލަހްޖް ޕްރޮވިންސްގެ އިތުރުން ހުޅަނގު އައްސޭރި ގުޅުވައިދޭ މުހިންމު ސަރަހައްދުގެ ކޮންޓްރޯލް ހޯދުމަށްޓަކައި، އެ ގައުމުގެ ސަރުކާރު ފައުޖުތަކާއި ހޫޘީ ހަނގުރާމަވެރިންނާ ދެމެދު ވަރުގަދަ ކުރިމަތިލުންތަކެއް ދަނީ ހިނގަމުންނެވެ.

ޔަމަނުގެ "ނޭޝަނަލް ޝީލްޑް ބްރިގޭޑްސް" އިން ބުނި ގޮތުގައި،  ކަހްބޫބް ފަރުބަދަތަކުގެ މަތިން އުދުހެމުންދިޔަ ހޫޘީންގެ ތިން ޑްރޯންއެއް ވަނީ ބަޑިޖަހައި ވައްޓާލާފަ އެވެ. އެ ބްރިގޭޑުން ބުނީ، މި ޑްރޯންތައް ވައްޓާލާފައިވަނީ ސަރުކާރުގެ ސިފައިން ތިބި މަގާމުތަކަށް ނުވަތަ ހަމަލާދޭން އަމާޒުކުރި ތަންތަނަށް ފޯރުމުގެ ކުރިން ކަމަށެވެ.

ހަނގުރާމައިގެ ކުރީސަފުގައި ހަރަކާތްތެރިވާ "ސަަދަން ޖަޔަންޓްސް ބްރިގޭޑްސް" އިން މީގެ ކުރިން ބުނެފައިވަނީ، ހޫޘީން ވަރުގަދަކޮށްފައިވާ މަގާމުތަކަށާއި އެމީހުންނަށް ފޮނުވާ އިތުރު އެހީތަކަށް އަމާޒުކޮށް މެދުނުކެނޑި ހަމަލާދެމުންދާ ކަމަށެވެ.

މި ކުރިމަތިލުންތަކުން ހާމަވަނީ، ބާބުލް މަންދަބް ކަނޑުއޮޅި ފެންނަ ހިސާބުގައި އޮތް މި މުހިންމު ފަރުބަދަތަކުގެ ކޮންޓްރޯލް ހޯދައި، ކުރިއަށް ޖެހުމަށް ހޫޘީން ކުރަމުންދާ މަސައްކަތްތަކާއި ސަރުކާރު ފައުޖުތަކާ ދެމެދު އޮތް ނުތަނަވަސްކަން ބޮޑުވެފައިވާ މިންވަރެވެ. ސަރުކާރު ފައުޖުތަކުން ބުނާ ގޮތުގައި އެ ސަރަހައްދުގެ ބޮޑު ބައެއް މިހާރު ވަނީ ސަރުކާރުގެ ކޮންޓްރޯލްގެ ދަށަށް ގެނެސްފަ އެވެ. އަދި ހޫޘީންނަށް މިހާރު ކޮންޓްރޯލް ކުރެވެނީ އެ ސަރަހައްދުގެ ދެކުނު ފަރާތުގެ ވަރަށް ކުޑަ މަދު ހިސާބުތަކެއް ކަމަށް ވެސް ޔަމަނުގެ ސަރުކާރުން ބުނެ އެވެ.

ޔަމަނުގެ އަލް-ޖައުފް ގަވަރުނޭޓުގައި ވެސް ހޫޘީ ހަނގުރާމަވެރިންނާއި ޔަމަނުގެ ސަރުކާރުގެ ސިފައިންނާ ދެމެދު ވަރުގަދަ ކުރިމަތިލުންތަކެއް ދަނީ ހިނގަމުން

ޔަމަނުގެ ދާޚިލީ ހަނގުރާމައިގެ ތެރެއަށް ސައުދީ އަރަބިއްޔާއަށް ވާގިވެރިވުމުގެ ގޮތުން އެމެރިކާ ވަދެފިނަމަ، މެދުއިރުމަތީގައި ހުރި އެމެރިކާގެ މަރުކަޒުތަކަށް ހަމަލާދިނުމަށް ފަސްނުޖެހޭނެ ކަމަށް ހޫޘީ ހަނގުރާމަވެރި ޖަމާއަތުގެ އަސްކަރީ އޮފިޝަލް އާބިދު މުހައްމަދު އަލް-ޘައުރު އިންޒާރު ދީފި އެވެ.

ޔަމަނުގެ ވެރިރަށް ސަންޢާގައި އޭއެފްޕީ ނިއުސް އެޖެންސީއަށް ދެއްވި ބަސްދީގަތުމެއްގައި  އާބިދު މުހައްމަދު އަލް-ޘައުރު ވިދާޅުވީ، އެމެރިކާގެ އަސްކަރީ މަނަވަރުތައް ބޭނުންކޮށްގެން ޔަމަނަށް އަރައިގަންނަން އުޅެފިނަމަ ނުވަތަ ބާބުލް މަންދަބު ކަނޑުއޮޅީގެ ކޮންޓްރޯލް ހޯދަން މަސައްކަތް ކޮށްފިނަމަ، އެއީ އެމެރިކާ އާއި އެހެން ފަރާތްތަކަށް ވެސް އޮތް ރަތް ރޮނގެއް ކަމަށެވެ. އަދި އެފަދަ ކަމެއް ހިނގައިފިނަމަ އެ ޤައުމަކާ ދެކޮޅަށް ހަނގުރާމަ ކުރާނެ ކަމަށް ވެސް އޭނާ ވިދާޅުވި އެވެ.

އަލް-ޘައުރު އިތުރަށް ވިދާޅުވީ، ސައުދީ އަރަބިއްޔާއަށް ވައިގެ މަގުން އެހީތެރިކަން ފޯރުކޮށްދީގެން އެމެރިކާއިން ނުރައްކާތެރި ކުޅިވަރެއް ކުޅެން އުޅޭނަމަ، އެ ސަރަހައްދުގައި ހުރި އެމެރިކާގެ ކޮންމެ މަރުކަޒަކީ ހޫޘީންގެ އަމާޒުފަތްގަނޑެއްގެ ގޮތުގައި ބަލާނެ ކަމަށެވެ.

ހޫޘީން މި އިންޒާރު ދީފައިވަނީ، ނިމިދިޔަ ހަފުތާ ބަންދުގައި އެ ޖަމާއަތާ ދެކޮޅަށް ހަމަލާދިނުމަށް އެމެރިކާގެ ރައީސް ޑޮނަލްޑް ޓްރަމްޕް ނިންމެވި ނިންމެވުން ފަހު ވަގުތު ބާތިލްކުރެއްވި ކަމަށް މީޑިއާ ރިޕޯޓުތައް ބުނެފައިވާ ދަނޑިވަޅެއްގަ އެވެ. ނިއު ޔޯކް ޓައިމްސްއިން ރިޕޯޓުކޮށްފައިވާ ގޮތުގައި، އާދީއްތަ ދުވަހު ހޫޘީންނަށް ހަމަލާދިނުމަށް އެމެރިކާއިން ތައްޔާރުވި ނަމަވެސް، އެންމެ ފަހު ވަގުތު ވަނީ އެ ނިންމުން ބަދަލުކޮށްފަ އެވެ.

ޔަމަނުގެ ވެރިރަށް ސަންޢާގައި، ހަނގުރާމައިގެ މައިދާނުގައި މަރުވި ހޫޘީ ހަނގުރާމަވެރިއެއްގެ ޖަނާޒާގެ ތެރެއިން

އީރާން ސުންނާފަތިކޮށްލާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ދެއްވި އިންޒާރަކީ، އެމެރިކާގެ "ސްޓްރެޓީޖިކް ނުކުޅެދުންތެރިކަން" ހާމަވާ ކަމެއް ކަމަށް ބުނެ އީރާނުގެ އަސްކަރިއްޔާއިން އެ އިންޒާރުތަކަށް ރައްދުދީފި އެވެ. އަދި ހަނގުރާމައިގެ ކުރީގެ މަރުހަލާތަކަށްވުރެ މާ ވަރުގަދަ "ފަނާކުރަނިވި" ހަމަލާތަކަކުން ރައްދު ދިނުމަށް ތައްޔާރަށް އޮތް ކަމަށް ވެސް އީރާނުން ވަނީ އިންޒާރު ދީފަ އެވެ.

މެހެރު ނިއުސް އެޖެންސީން ރިޕޯޓްކޮށްފައިވާ ގޮތުގައި، އީރާނުގެ ޖެނެރަލް ސްޓާފުން ނެރުނު ބަޔާނެއްގައި ވަނީ، އދ. ގެ އާންމު މަޖިލީހުގެ ޕޯޑިއަމް ބޭނުންކުރައްވައިގެން އެމެރިކާގެ ރައީސް ޓްރަމްޕް މަސައްކަތް ކުރެއްވީ އީރާނާ ދެކޮޅަށް ހިންގާ "އުދުވާނުތައް" ދިފާއުކުރެއްވުމަށް ކަމަށް ތުހުމަތުކޮށްފަ އެވެ.

އެ ބަޔާނުގައި ބުނެފައިވަނީ، ޓްރަމްޕްގެ އެ ވާހަކަފުޅުތަކުން ހާމަވަނީ އީރާނުގެ ރައްޔިތުންނާ ދެކޮޅަށް އެމެރިކާއިން ހިންގާ އުދުވާނުތައް ކުރިއަށް ނުގެންދެވި، ސްޓްރެޓީޖިކް ގޮތުން އެ ގައުމު އޮތީ މަރުތަޅު އެޅިފައި ކަމަށެވެ. އަދި ޓްރަމްޕް ތަކުރާރުކޮށް ދެއްވަމުން ގެންދަވާ އިންޒާރުތަކަކީ ބާރުވެރިކަމުގެ ނިޝާނެއް ނޫން ކަމަށާއި، އެއީ އެމެރިކާގެ "ސްޓްރެޓީޖިކް ނުކުޅެދުންތެރިކަމާއި މާޔޫސްކަން" ދައްކުވައިދޭ ކަމެއް ކަމަށްވެސް އެ ބަޔާނުގައި ސިފަކޮށްފައިވެ އެވެ.

މީގެ އިތުރުން، އެމެރިކާ އާއި އިސްރާއީލަށް އަމާޒުކޮށް، ކުރިން ދީފައިވާ ހަމަލާތަކަށްވުރެ މާ ވަރުގަދަ އަދި ލަފާކުރަން ދަތި "ފަނާކުރަނިވި" ހަމަލާތަކެއް ދިނުމަށް އީރާނުގެ ހަތިޔާރު އެޅި ސިފައިން ތިބީ ފުރިހަމައަށް ތައްޔާރުވެގެން ކަމަށް ވެސް އެ ބަޔާނުގައި އިންޒާރު ދީފައިވެ އެވެ.

އީރާނުގެ އަސްކަރިއްޔާއިން ބުނީ އެމެރިކާއާއެކު ކުރިއަށްދާ މަޝްވަރާތައް އަނެއްކާވެސް ނާކާމިޔާބުވެއްޖެ ނަމަ، އެ ގައުމާ ދެކޮޅަށް އަލުން ހަނގުރާމައަށް ނުކުތުމަށް ތައްޔާރަށް އޮތް ކަމަށާއި އެ ގައުމުގެ އަސްކަރީ ގާބިލުކަން މިހާރު ވަނީ އިތުރަށް ވަރުގަދަކޮށް، ކުރިން ކުރިމަތިވި ގޮންޖެހުންތަކުން އަރައިގަނެ، ކޮންމެ ފަދަ ހާލަތަކަށް ވެސް ތައްޔާރުވެފައި ކަމަށް

ޔަމަނުގެ ތައީޒް ގަވަރނަރޭޓްގެ މުޚާ ސަރަހައްދުގައި "ހަނގުރާމަވެރި ހަރަކާތްތަކެއް" ހިންގަމުންދިޔަ، ހަތިޔާރު އެޅި ޖާސޫސީ ޑްރޯނެއް ވައްޓާލާފައިވާ ކަމަށް ހޫޘީ ހަނގުރާމަވެރިން ބުނެފި އެވެ.

ހޫޘީންގެ އަސްކަރީ ތަރުޖަމާނު ޔަހްޔާ ސަރީ ނެރުއްވި ކުރު ބަޔާނެއްގައި ވިދާޅުވީ، އެ ޑްރޯން ވައްޓާލާފައިވަނީ އެކަމަށް ހާއްސަ އެކަށީގެންވާ ހަތިޔާރެއް ބޭނުންކޮށްގެން ކަމަށެވެ.

މި ދުވަސްވަރު ހަނގުރާމައިގެ މައިދާނުގައި އިންސާނަކާ ނުލައި ދުއްވާ އުޅަނދުތައް ނުވަތަ ޑްރޯން ބޭނުންކުރާ މިންވަރު އިތުރުވެފައިވާ ކަމަށާއި، އަސްކަރީ މަރުކަޒުތަކަށް އަމާޒުކޮށް ޑްރޯން މެދުވެރިކޮށް ގޮވާތަކެތި އުކަމުންދާ ކަމަށް މަސްދަރުތަކުން އަންގާރަ ދުވަހު އަލްޖަޒީރާއަށް މައުލޫމާތު ދީފައިވެ އެވެ.

އީރާނާ ގުޅުން އޮންނަ ހޫޘީ ޖަމާއަތުން، ބައިނަލްއަގުވާމީ ގޮތުން ބަލައިގަންނަ ޔަމަނުގެ ސަރުކާރަށް ތާއީދުކުރާ ފައުޖުތަކާ ދެކޮޅަށް މި ސެޕްޓެމްބަރު މަހުގެ ކުރީކޮޅު ހިންގި އަސްކަރީ ހަރަކާތްތަކުގައި ބޮޑެތި ކުރިއެރުންތަކެއް ހޯދައި، ރަތްކަނޑުގެ އައްސޭރިފަށުގެ ސަރަހައްދުތަކުގެ ކޮންޓްރޯލް ވަރުގަދަކުރުމާ ގުޅިގެން، ޔަމަނުގެ މައްސަލައަށް ދުނިޔޭގެ ސަމާލުކަން އަނެއްކާ ވެސް ވަނީ ހުއްޓިފަ އެވެ.

ޔަމަނުގެ ލަހްޖު ގަވަރުނޭޓްގައި ހިމެނޭ ކަހްބޫބް ފަރުބަދަތަކަކީ، ރަތްކަނޑާއި އަދަން ކަނޑުއޮޅި ގުޅުވައިދޭ މައިގަނޑު ކަނޑުގެ މަގެއް ކަމަށްވާ ބާބުލް މަންދަބަށް ސީދާ ފެންނަ ގޮތަށް އޮތް، އިސްތިރާތީޖީ ގޮތުން ނުހަނު މުހިންމު ސަރަހައްދެއް

ތެހެރާންގެ ދެކުނުން 1،400 ކިލޯމީޓަރު (870 މޭލު) ދުރުގައި، އީރާނުގެ ޕާޝިއަން ގަލްފް އައްސޭރިފަށުގައި އޮންނަ އައްސަލޫޔޭގައި ތަރައްގީކުރަމުންދާ ސައުތު ޕާސް ގޭސް ފީލްޑުގެ 19 ވަނަ ފޭސްގެ މަސައްކަތް ކުރިއަށްދާ މަންޒަރެއް

މާރިޗު މަހު އިސްރާއީލުން ދިން ވައިގެ ހަމަލާތަކުގައި ބޮޑެތި ގެއްލުންތަކެއް ލިބުނު އީރާނުގެ ސައުތު ޕާސް ތެޔޮ ވަޅުގެ އުފެއްދުންތެރިކަމުގެ 50 އިންސައްތަ އަލުން އިއާދަކޮށްފައިވާ ކަމަށް އެ ގައުމުގެ ޑެޕިއުޓީ އޮއިލް މިނިސްޓަރު އަހުމަދު ޒަރާތުކާރު ވިދާޅުވެއްޖެ އެވެ.

އީރާނުގެ ފާރްސް ނިއުސް އެޖެންސީން ރިޕޯޓްކޮށްފައިވާ ގޮތުގައި، މި ސެޕްޓެމްބަރު މަސް ނިމުމުގެ ކުރިން އެ ތަނުގެ މަސައްކަތްތައް ފުރިހަމައަށް އިއާދަކޮށް، އާންމު ހާލަތަށް ގެނެވޭނެ ކަމަށް ބެލެވޭ ކަމަށް ޒަރާތުކާރު ވިދާޅުވި އެވެ.

އޭނާ އިތުރަށް ވިދާޅުވީ، ތެޔޮ ވަޅުގެ އުފެއްދުންތެރިކަން އިއާދަކުރުމަށް ކަނޑައެޅި ތާވަލާ އެއްގޮތަށް މަސައްކަތްތައް ކުރިއަށްދާ ކަމަށާއި، ފިނި މޫސުން ފެށުމުގެ ކުރިން ރޭވިފައިވާ ހުރިހާ މަސައްކަތްތަކެއް ނިންމާލެވޭނެ ކަމަށެވެ.

އޮގަސްޓް މަހުގެ ފަހުކޮޅު ޒަރާތުކާރު ވިދާޅުވެފައިވަނީ، އިސްރާއީލުގެ ހަމަލާގައި ގެއްލުން ލިބުނު މި މަރުކަޒުގެ އުފެއްދުންތެރިކަމުގެ ގާތްގަނޑަކަށް 40 އިންސައްތަ އެ ދުވަސްވަރު އަލުން ފަށާފައިވާ އެވެ.

ނިއުޔޯކުގައި ޖީސީސީގެ ގައުމުތަކުގެ ލީޑަރުންނާއެކު ބޭއްވި ބައްދަލުވުމެއްގައި ޓްރަމްޕް ވިދާޅުވީ، އެމެރިކާގެ އޮފިޝަލުންނާއި އީރާނުގެ ވަފުދާ ދެމެދު ބޭއްވުނު ބައްދަލުވުމަކީ "ވަރަށް ރަނގަޅު" ބައްދަލުވުމެއް ކަމަށެވެ.

މީގެ ކުރިން އދ. ގެ އާންމު މަޖިލީހުގައި ތަގުރީރު ކުރައްވަމުން ޓްރަމްޕް ވިދާޅުވީ، އެމެރިކާއާއެކު އެއްބަސްވުމަކަށް އައުން ނުވަތަ އިތުރު އަސްކަރީ ކުރިމަތިލުންތަކަކާ ކުރިމަތިލުން، މީގެ ތެރެއިން ގޮތެއް އިހުތިޔާރު ކުރުމުގެ ފުރުސަތު އީރާނަށް އެބައޮތް ކަމަށެވެ.

އެމެރިކާގެ މިޑްޓާމް އިންތިޚާބަށްފަހު، ވޮޝިންޓަނާއި ތެހެރާނާ ދެމެދު އެއްބަސްވުމަކަށް އާދެވޭނެ ކަމަށް ގަބޫލުކުރައްވާ ކަމަށް ވެސް ޓްރަމްޕް ވިދާޅުވި އެވެ.

އެމެރިކާގެ ރައީސް ޓްރަމްޕް މިފަދައިން ވިދާޅުވެފައިވަނީ ގަތަރު މެދުވެރިކޮށް އެމެރިކާއަށް ޝަރުތުތަކެއް ހުށަހަޅާފައިވާނެ ކަމަށް އީރާނުން ބުނެފައި ވަނިކޮށެވެ.

އީރާނުގެ ފޮރިން މިނިސްޓްރީގެ ތަރުޖަމާނު އިސްމާއީލް ބަގާއީ އެ ގައުމުގެ ދައުލަތުގެ މީޑިއާ "އިރްނާ" އަށް މައުލޫމާތު ދެއްވަމުން ވިދާޅުވެފައިވަނީ، ނިއުޔޯކުގައި ގަތަރު މެދުވެރިކޮށް އެމެރިކާއާއެކު މުއާމަލާތްތަކެއް ކޮށްފައިވާ ކަމަށެވެ. އީރާނުން ހުށަހެޅި ޝަރުތުތަކުގެ ތެރޭގައި ކަނޑުގެ މަގުން ހުރަސް އެޅުން ހުއްޓާލުމާއި އިގުތިސާދީ ހަނގުރާމަ ހުއްޓާލުމުގެ އިތުރުން، ހިފަހައްޓާފައިވާ އީރާނުގެ މާލީ އެސެޓްތައް ދޫކޮށްލުން ހިމެނޭ ކަމަށް ބަގާއީ ވިދާޅުވި އެވެ.

2026 ވަނަ އަހަރުގެ ސެޕްޓެމްބަރު މަހުގެ 22 ވީ އަންގާރަ ދުވަހު، އދ. ގެ މައި މަރުކަޒުގައި ބޭއްވި އދ. ގެ އާންމު މަޖިލީހުގެ 81 ވަނަ ސެޝަންގައި ތަގުރީރު ކުރެއްވުމަށްފަހު، އެމެރިކާގެ ރައީސް ޑޮނަލްޑް ޓްރަމްޕް އެނބުރި ވަޑައިގަންނަވަނީ

ބުދަ ދުވަހު އާންމުކުރި އުޅަނދުފަހަރުގެ ދަތުރުފަތުރާ ބެހޭ ވަގުތީ ތަފާސްހިސާބުތައް ދައްކާގޮތުން، އަންގާރަ ދުވަހު އެ ކަނޑުއޮޅިން ދަތުރުކޮށްފައިވަނީ މުދާ އުފުލާ އެންމެ ތިން އުޅަނދެވެ. މިއީ އޭގެ ކުރީ ދުވަހު ދަތުރުކުރި ހަތަރު އުޅަނދަށްވުރެ މަދު އަދަދެއްގެ އިތުރުން، ފާއިތުވި 10 ދުވަހުގެ އެވްރެޖް ކަމަށްވާ 15 އުޅަނދާ އަޅާބަލާއިރު ވެސް ބޮޑުތަނުން ދަށް އަދަދެކެވެ.

ރޮއިޓާސްއިން ހަވާލާދީފައިވާ މި ހިސާބުތަކަށް ބަދަލު އައުމަކީ އެކަށީގެންވާ ކަމެކެވެ. ސަބަބަކީ ބައެއް އުޅަނދުފަހަރު ދަތުރުކުރާއިރު، އާންމުކޮށް އެ އުޅަނދުތަކުގެ ޓްރާންސްޕޮންޑަރުތައް ނުވަތަ ލޮކޭޝަން އަންގައިދޭ އާލާތްތައް ނިއްވާލާފައި ބަހައްޓާތީ އެވެ.

އޮމާންގެ އައްސޭރިފަށުގައި ހުރްމުޒް ކަނޑުއޮޅީގައި އަޅާފައިވާ އުޅަނދުތަކެއް

ހުރްމުޒް ކަނޑުއޮޅިން އުޅަނދުފަހަރު ދަތުރުކުރުމުގެ ފުރުސަތު ފަހިކޮށްދިނުމަށްޓަކައި، ފަރަންސޭސިވިލާތުން މިހާރަށްވުރެ ބޮޑަށް އެ މަސައްކަތުގައި ބައިވެރިވުމަށް ތައްޔާރަށް އޮތް ކަމަށް އެ ގައުމުގެ ރައީސް އެމަނުއަލް މެކްރޮން ވިދާޅުވެއްޖެ އެވެ.

އޭބީސީ ނިއުސްއަށް ދެއްވި އިންޓަވިއުއެއްގައި މެކްރޮން ވިދާޅުވީ، އެއްވެސް ގައުމަކާ ކުރިމަތިލުމަކަށް ދާން ބޭނުންފުޅު ނުވާ ކަމަށާއި، ނަމަވެސް ހުރްމުޒް ކަނޑުއޮޅިން ދަތުރުފަތުރު ކުރުމުގެ ގާބިލުކަން ދެމެހެއްޓުމަށްޓަކައި ކުރަންޖެހޭ ކަންކަމުގައި އިތުރަށް ބައިވެރިވުމަށް ފަރަންސޭސިވިލާތް އޮތީ ތައްޔާރަށް ކަމަށެވެ.

 މެކްރޮން ވިދާޅުވީ، އެމެރިކާގެ ރައީސް ޑޮނަލްޑް ޓްރަމްޕާ ބައްދަލުކުރެއްވުމުގެ މައިގަނޑު މަގުސަދަކީ އިގުތިސާދީ ގޮތުން މުހިންމު އެ ކަނޑުއޮޅި ހުޅުވާލުމަށްޓަކައި އެކަށީގެންވާ އެއްބަސްވުމަކަށް އައުން ކަމަށާއި އަދި މިއީ ދުނިޔޭގެ ހަކަތައިގެ ބާޒާރަށް ކުރިމަތިވަމުންދާ ނުތަނަވަސްކަމަށް ހައްލެއް ހޯދުމަށް ކުރެވޭ މަސައްކަތެއް ކަމަށް ވެސް އޭނާ ފާހަގަކުރެއްވި އެވެ.

މީގެ އިތުރުން، އެމެރިކާއިން ހަނގުރާމައަކަށް ދިއުމަށް ނިންމި ނިންމުމަށް މެކްރޮން ވަނީ ފާޑުވިދާޅުވެފަ އެވެ. އޭނާ ވިދާޅުވީ ގައުމަކަށް ބޮން އަޅައިގެން އެ ގައުމެއްގެ ވެރިކަން ބަދަލުކުރުމަކީ ކުރެވޭނެ ކަމެއް ކަމަށް ގަބޫލުނުކުރައްވާ ކަމަށެވެ. އަދި އެއީ ކާމިޔާބުވާނެ ކަމެއް ނޫން ކަމަށާއި، ފާއިތުވި ދިހަވަރަކަށް އަހަރު ތެރޭގައި އެފަދަ ގޯސްތައް އެތައް ފަހަރަކު ހެދިފައިވާ ކަމަށް ވެސް މެކްރޮން ވިދާޅުވި އެވެ.

ކުރިން އެމެރިކާއަށް އެހީތެރިކަން ނުދިނުމަށް ނިންމި ނިންމުމާ ގުޅޭގޮތުން މެކްރޮން ވިދާޅުވީ، ބަޔަކު ކަމެއްގައި ބައިވެރިކުރަން ބޭނުންވާނަމަ، ހަނގުރާމައެއް ފެށުމުގެ ކުރިން އެ ބަޔަކާ މަޝްވަރާކޮށް ރޭވުންތައް ރާވަންޖެހޭނެ ކަމަށެވެ. އަދި އެ ހަނގުރާމައިގައި ބައިވެރިނުވާން ނިންމީ އެއީ އެންމެ ރަނގަޅު ގޮތް ކަމަށް ނުފެންނާތީ ކަމަށާއި، މިއަދު ވެސް ގަބޫލުކުރައްވަނީ އެއީ އެންމެ ރަނގަޅު އިހުތިޔާރު ނޫން ކަމަށް މެކްރޮން ވިދާޅުވި އެވެ.

ފްރާންސްގެ ރައީސް އިމަނުއެލް މެކްރޮން

އިސްރާއީލުން ސޫރިޔާއަށް ދެމުންދާ ހަމަލާތައް އަދިވެސް ހުއްޓާނުލާ ކުރިއަށްގެންދާ ކަމަށް ގަތަރުގެ އަމީރު، ޝައިޚް ތަމީމް ބިން ހަމަދު އައްޘާނީ ވިދާޅުވެއްޖެ އެވެ.

އދ. ގެ އާންމު މަޖިލީހުގައި ވާހަކަފުޅު ދައްކަވަމުން ގަތަރުގެ އަމީރު ވިދާޅުވީ، 1967 ވަނަ އަހަރުން ފެށިގެން އިސްރާއީލުން ހިފާފައިވާ ގޯލާން ހައިޓްސްގެ އިތުރުން، ސޫރިޔާގެ އިތުރު ސަރަހައްދުތަކަށް އިސްރާއީލުން އަތްގަދަކުރަމުންދާ ކަމަށެވެ. އަދި މިގޮތަށް އަމަލުކުރަމުންދަނީ ސޫރިޔާގައި އުފެދިފައިވާ ސިޔާސީ ނިޒާމާ މެދު އިސްރާއީލުން އަމިއްލައަށް ކުރާ ތުހުމަތުތަކެއް ފިޔަވައި، އެއްވެސް އަސާސެއް ނެތް ބަހަނާތަކެއް ދައްކަމުން ކަމަށް ވެސް އެމަނިކުފާނު ވިދާޅުވި އެވެ.

އިސްރާއީލުން އަމަލުކުރަމުންދަނީ އެ ސަރަހައްދުގެ ގައުމުތަކުގެ މައްޗަށް ބާރުފޯރުވައި، އެ ގައުމުތަކުގެ ބެލެނިވެރި ފަރާތަކީ އެއީ ކަމަށް ދެކިގެން ކަމަށް ވެސް ޝައިޚް ތަމީމް ވިދާޅުވި އެވެ.

މީގެއިތުރުން ގަލްފް ސަރަހައްދުގައި މިހާރު ހިނގަމުންދާ ހަމަނުޖެހުންތަކަކީ އެ ސަރަހައްދުގެ ތާރީޚުގައި ވެސް ކުރިމަތިވި އެންމެ ނުރައްކާތެރި އެއް މަރުހަލާކަމަށް ޝެއިޚް ތަމީމް ވަނީ ސިފަކުރައްވާފަ އެވެ. 

ޤަތަރުގެ އަމީރު، ޝައިޚް ތަމީމް ބިން ޙަމަދު އައްޘާނީ، އދ. ގެ 81 ވަނަ އާންމު މަޖިލީހުގައި ތަޤުރީރު ކުރައްވަނީ

ޔަމަނުގައި ހިނގަމުންދާ ހަމަނުޖެހުމާ ގުޅޭގޮތުން ވާހަކަދައްކަވަމުން އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވީ ސައުދީ އަރަބިއްޔާއާއެކު އެމެރިކާއިން ދިފާއީ އެއްބަސްވުމެއް ގާއިމުކޮށްފައިވާ ކަމަށާއި، އެ އެއްބަސްވުމުގެ ދަށުން އެމެރިކާއިން އުފުލަންޖެހޭ ޒިންމާތަކާއި އިންތިޒާމްތައް ފުރިހަމައަށް އަދާކުރުމަކީ އެމެރިކާގެ އަމާޒެއް ކަމަށެވެ. 

އަދި މި މައްސަލައަށް ހައްލެއް ހޯދުމަށް މިހާރު މަސައްކަތް ކުރަމުންދާކަން ފާހަގަކުރައްވައި ރޫބިއޯ އިތުރަށް ވިދާޅުވީ، ކަންތައްތައް ކޮންމެ ގޮތަކަށް ނިމިގެން ދިޔަ ނަމަވެސް، އެމެރިކާއިން އަބަދުވެސް އޮންނާނީ ސައުދީ އަރަބިއްޔާއާއެކު ކަމަށާއި އެ ގައުމަށް ފުރިހަމަ އެއްބާރުލުން ދޭނެ ކަމަށެވެ.

އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ

އީރާނުގެ މަތިންދާބޯޓުތައް އިރާގުގެ އެއާޕޯޓުތަކަށް ޖެއްސުން އަންގާރަދުވަހުގެ މެންދަމުން ފެށިގެން ހުއްޓާލުމަށް އެމެރިކާ އިން އަންގާފައިވާ ކަމަށް އަލްޖަޒީރާ އިން ރިޕޯޓުކޮށްފި އެވެ.

އިރާގުގެ އޮފިޝަލް ވިދާޅުވި ގޮތުގައި މި ނިންމުމަކީ އެމެރިކާއިން އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކަށް އަމަލުކުރުމުގެ ގޮތުން ނިންމި ނިންމުމެކެވެ.

އެ އޮފިޝަލް އިތުރަށް ވިދާޅުވީ، އީރާނުގެ މަތިންދާބޯޓުތަކަށް ގްރައުންޑް ސަރވިސް ފޯރުކޮށްދޭ ކުންފުނިތަކުން ވެސް، އަންގާރަ ދުވަހުން ފެށިގެން އެ ޚިދުމަތްތައް ދިނުން ހުއްޓާލާނެ ކަމަށެވެ.

އެމެރިކާގެ ޓްރެޜަރީ ސެކްރެޓަރީ ސްކޮޓް ބެސެންޓް ވަނީ ބުދަ ދުވަހުން ފެށިގެން ދުނިޔޭގެ އެކި ކަންކޮޅުތަކުގައި ހަރަކާތްތެރިވާ އީރާނުގެ ހުރިހާ އެއާލައިންތަކެއްގެ މަސައްކަތްތައް "ހުއްޓުވާލާނެ" ކަމަށް ވިދާޅުވެފަ އެވެ. ވައިޓް ހައުސްއިން މި ފިޔަވަޅުތައް އަޅަމުންދަނީ އީރާނުގެ އިގުތިސާދު އިނދަޖައްސާލައި، މިހާރު ކުރިއަށްދާ ހަނގުރާމަ ހުއްޓާލުމަށްޓަކައި އެ ގައުމުގެ ލީޑަރުންނަށް މަޖުބޫރުކޮށް، ބޮޑެތި ދޫތަކެއް ދިނުމަށް ބާރުއެޅުމުގެ މަގުސަދުގައި ކަމަށް ވެސް ބެސެންޓް ވަނީ ވިދާޅުވެފަ އެވެ.

އެމެރިކާގެ ޓްރެޜަރީ ސެކްރެޓަރީ ސްކޮޓް ބެސެންޓް

އދ. ގެ އާންމު މަޖިލީހުގައި ތަގުރީރުކުރައްވަމުން އުރުދުޣާން ވިދާޅުވީ، ހުޅަނގުގެ ގައުމުތަކުގައި އިސްލާމްދީނާ ދެކޮޅު ވިސްނުން ފެތުރެމުންދަނީ ނުރައްކާތެރި ވަބާއެއް ފެތުރޭ ފަދައިން ކަމަށެވެ.

އަދި ވޭތުވެދިޔަ އަހަރުތަކުގައި މުސްލިމް އަންހެނުންނާއި އަންހެން ކުދިންނަށް ކުރިމަތިވާ ތަފާތުކުރުންތައް އިތުރުވެފައިވާކަން ފާހަގަކުރައްވައި އުރުދުޣާން ވިދާޅުވީ، ބައެއް ގައުމުތަކުގެ ސުކޫލުތަކުގައި ބުރުގާ އެޅުން މަނާކުރުމަކީ އަންހެނުންގެ އެންމެ އަސާސީ ހައްގުތަކަށް ދެވޭ ހަމަލާއެއްގެ ގޮތުގައި ތުރުކީވިލާތުން ދެކޭ ކަމަށެވެ.

މީގެ އިތުރުން، ބޭރު ގައުމުތަކުގެ މީހުންނަށް ނަފުރަތު ކުރުމާއި ނަސްލީ ތަފާތުކުރުންތަކާ ދެކޮޅަށް ސާބިތުކަމާއެކު މަސައްކަތް ކުރަންޖެހޭ ކަމަށް ވެސް ރައީސް އުރުދުޣާން ވިދާޅުވި އެވެ.

ނިއު ޔޯކް ސިޓީގައި ހުންނަ އދ. ގެ މައި މަރުކަޒުގައި ބާއްވާ، އދ. ގެ އާންމު މަޖިލީހުގެ 81 ވަނަ ސެޝަނުގައި ތުރުކީވިލާތުގެ ރައީސް ރަޖަބް ތައްޔިބް އުރުދުޣާން ތަގުރީރު ކުރައްވަނީ

އދ. ގެ މައި މަރުކަޒު ހުންނަ ނިއުޔޯކުގައި ކުރިއަށްދާ އދ. ގެ އާންމު މަޖިލީހުގެ 81 ވަނަ ސެޝަނުގައި އުރުދުންގެ ރަސްގެފާނު އަބްދުﷲ ދެވަނަ ތަޤުރީރު ކުރައްވަނީ

އިސްރާއީލުން ހިންގަމުންދާ އަމަލުތަކާ މެދު ބައިނަލްއަގުވާމީ މުޖުތަމައުން ސިޔާސީ ގޮތުން އެއްވެސް ފިޔަވަޅެއް ނޭޅުމަކީ، އެކަމަށް ނުކުޅެދިގެން ވާކަމެއް ނޫން ކަމަށާއި، އެއީ ގަސްދުގައި ނިންމާފައިވާ ނިންމުމެއް ނުވަތަ "އިޚްތިޔާރެއް" ކަމަށް އުރުދުންގެ ރަސްގެފާނު އަބްދުﷲ ވިދާޅުވެއްޖެ އެވެ.  އދ. ގެ އާންމު މަޖިލީހުގައި ވާހަކަފުޅު ދައްކަވަމުން އުރުދުންގެ ރަސްގެފާނު ވިދާޅުވީ، އިސްރާއީލުގެ މިހާރުގެ ސަރުކާރުގެ ދަހިވެތިކަމަކީ މުޅި ސަރަހައްދަށް އޮތް ނުރައްކަލެއް ކަމަށެވެ. އަދި މިއަދު ސީރިޔާއިން ފެންނަމުންދަނީ އެކަމުގެ އިންޒާރުގެ ނިޝާންތަކެއް ކަމަށް ވެސް އެމަނިކުފާނު ފާހަގަކުރެއްވި އެވެ.

އިސްރާއީލުން ތަކުރާރުކޮށް އަވަށްޓެރި ޤައުމުތަކުގެ ސަރަހައްދުތަކަށް ވަދެގަނެ، ފުޅާވަމުންދާ އިސްތިއުމާރީ ސިޔާސަތުތަކާއި، ފެނުގެ ވަސީލަތްތައް ހިމެނޭހެން ބިމުގެ ހަޤީޤަތް ބަދަލުކޮށް އައު މަރުކަޒުތައް ގާއިމުކުރަމުންދާ މަންޒަރު ނުފެންނަކަމަށް ބައިނަލްއަޤުވާމީ މުޖުތަމައުން ހަދަމުންދާކަމަށް އެމަނިކުފާނު ވިދާޅުވި އެވެ. 

އަދި އިސްރާއީލުން މިހާރު މަސައްކަތް ކުރަމުންދަނީ ވަރަށް ބޮޑަށް ރާވައިގެން، ފިޔަވަޅަކަށްފަހު ފިޔަވަޅެއް ކުރިއަށް އަޅަމުން، އެމީހުންނަށް ދެވޭނީ ކިހާ ހިސާބަކަށްތޯ ބަލައި އިމްތިހާން ކުރަމުން ކަމަށާއި ބައިނަލްއަޤުވާމީ މުޖުތަމައުން މިކަންކަމަށް ފަރުވާކުޑަކޮށް މޫނު އަނބުރާލާ ކޮންމެ ފަހަރަކު، ބައިނަލްއަޤުވާމީ ބޯޑަރުތަކާއި ޤާނޫނީ އިމުން ބޭރަށް ވެސް އިތުރަށް ފިޔަވަޅު އެޅިދާނެކަން އިސްރާއީލަށް ދަނީ ދަސްވަމުން ކަމަށް ވެސް ރަސްގެފާނު އަބްދުﷲ ވިދާޅުވި އެވެ. 

އީރާން އިގުތިސާދީގޮތުން ފުރިހަމައަށް އެކަހެރިކުރުމަށް އެމެރިކާއިން ކުރަމުންދާ މަސައްކަތުގައި ބައިވެރިވުމަށް، ދުނިޔޭގެ ހުރިހާ ގައުމުތަކަށް އެމެރިކާގެ ރައީސް ޑޮނަލްޑް ޓްރަމްޕް ގޮވާލައްވައިފި އެވެ.

އދ. ގެ އާންމު މަޖިލީހުގައި ތަގުރީރުކުރައްވަމުން ޓްރަމްޕް ވިދާޅުވީ، ވިޔަފާރި ކުރާ މުދާ އުފުލާ ބޯޓުފަހަރަށް ދޭ ހަމަލާތައް ހުއްޓާލައި، ނިއުކްލިއާ ހަތިޔާރު އުފެއްދުމަށް ކުރާ މަސައްކަތްތައް ދޫކޮށްލައި، އަދި "ޓެރަރިޒަމަށް ދޭ އެހީތެރިކަން" އީރާނުން ހުއްޓާލަންދެން އެ ގައުމު އެކަހެރިކޮށް ބާއްވަންޖެހޭނެ ކަމަށެވެ.

"އެ ޓެރަރިސްޓް ސަރުކާރުން އެފަދަ ގޯސް އަމަލުތައް ހިންގަނީ އެއީ ވަރުގަދަ އަދި އިތުބާރު އޮތް ބަޔަކަށް ވާތީއެއް ނޫން. އެއީ އެމީހުން ބަލިކަށިވެ، ގޮތް ހުސްވެފައިވާތީ. އަހަރެމެން އެންމެން އެކަތިގަނޑަކަށް ވެއްޖެނަމަ، ފާއިތުވި 51 އަހަރު ދުނިޔެއަށް ކުރިމަތިވެފައިވާ އީރާނުގެ ޓެރަރިޒަމްގެ ބިރުވެރިކަމުން ސަލާމަތްވެފައިވާ ދުނިޔެއެއް ވަރަށް އަވަހަށް ފެނިގެންދާނެ." " ޓްރަމްޕް ވިދާޅުވި އެވެ.

އދ. ގެ އާންމު މަޖިލީހުގައި ތަގުރީރުކުރައްވަމުން ޓްރަމްޕް ވިދާޅުވީ، އެމެރިކާއާއި ވެނެޒުއޭލާއާ ދެމެދު ސޮއިކުރެވުނީ ތާރީޚުގައި ވެސް ގާއިމުކުރެވުނު ތެލުގެ އެންމެ ބޮޑު އެއްބަސްވުން ކަމަށެވެ. އަދި 65 ބިލިއަން ފީފާގެ ތެޔޮ ހިމެނޭ މި އެއްބަސްވުމުގެ ސަބަބުން އެމެރިކާއަށާއި ވެނެޒުއޭލާއަށް ބޮޑެތި ފައިދާތަކެއް ކުރާނެ ކަމަށާއި، މީގެ ސަބަބުން މުޅި ދުނިޔޭގައި ހަކަތައިގެ އަގުތައް ދަށްކުރުމަށް އެހީތެރިވެދޭނެ ކަމަށް ވެސް ޓްރަމްޕް ވިދާޅުވި އެވެ.

ދުނިޔޭގެ އެންމެ ބޮޑެތި ތެޔޮ ކުންފުނިތަކުން މިހާރު ވެނެޒުއޭލާއަށް އިންވެސްޓް ކުރަން ފަށާފައިވާކަން ފާހަގަކުރައްވަމުން، އެ ގައުމުން ފެންނަނީ ހައިރާންވާ ފަދަ ކުރިއެރުންތަކެއް ކަމަށް އެމެރިކާގެ ރައީސް އިތުރަށް ވިދާޅުވި އެވެ.

މީގެ އިތުރުން، އެމެރިކާއާއި ވެނެޒުއޭލާ ގުޅިގެން މަސައްކަތް ކުރުމުން، ދުނިޔޭގެ ތެލުގެ ރިޒާވްގެ 60 އިންސައްތައަށްވުރެ ބޮޑު ބައެއް އެ ދެ ގައުމުގެ ބާރުގެ ދަށުގައި އޮންނާނެ ކަމަށް ވެސް ޓްރަމްޕް ވިދާޅުވި އެވެ.

އދ. ގެ އާންމު މަޖިލީހުގެ ޖަލްސާ ފެށުމުގެ ގޮތުން ތަހުނިޔާ ވިދާޅުވުމަށްފަހު، ތުރުކީވިލާތުގެ ރައީސް ރަޖަބް ތައްޔިބް އުރުދުޣާން ވަނީ އެމެރިކާ ސަރުކާރުން ފަލަސްތީނުގެ ރައީސް މަހްމޫދު އައްބާސްގެ ވިސާ އެޕްލިކޭޝަން ބާތިލުކުރުމާ ގުޅިގެން އެމަނިކުފާނަށް އދ. ގެ އާންމު މަޖިލީހުގައި ބައިވެރިވެވަޑައިނުގެންނެވޭތީ، އެކަމާ ކަންބޮޑުވުން ފާޅުކުރައްވާފަ އެވެ. 

އުރުދުޣާން ވިދާޅުވީ ފަލަސްތީނުގެ އަޚުންނާއި އުޚުތުންނާ މެދު ހިންގާ މި ބޮޑު ބޭއިންސާފަކީ މުޅި އިންސާނިއްޔަތުގެ ކަރާމާތަށް ލިބޭ ވަރަށް ބޮޑު ހިތާމައެއް ކަމަށެވެ. އެގޮތުން އިސްރާއީލުން ހިފާފައިވާ ހުޅަނގު އައްސޭރީގައި، އެ ގައުމުގެ ވަޒަންވެރިން ހިންގަމުންދާ "ނާމާން އަދި އަނިޔާވެރި" އަމަލުތަކުގެ ސަބަބުން، އެ ސަރަހައްދު މިހާރު ތަހައްމަލު ކުރަމުންދަނީ ތާރީޚުގައި ވެސް ދެކެފައި ނުވާ ފަދަ ނުރައްކާތެރި ދުވަސްތަކެއް ކަމަށް އުރުދުޣާން ވިދާޅުވި އެވެ.

އުރުދުޣާން ވިދާޅުވީ، ފާއިތުވި ތިން އަހަރު ދުވަހުގެ ތެރޭގައި އިސްރާއީލުގެ އަސްކަރިއްޔާއިން ޣައްޒާގައި ހިންގި "ދައުލަތުގެ ޓެރަރިޒަމް" ގެ އަމަލުތަކުގައި މަދުވެގެން 74،000 މީހުން ޝަހީދުކޮށްލާފައިވާ ކަމަށެވެ. އަދި ޣައްޒާގެ ރައްޔިތުން އަދިވެސް ދަނީ އިސްރާއީލުގެ ހަމަލާތަކުގައި ސުންނާފަތިވެފައިވާ އިމާރާތްތަކުގެ ގައުކުނޑިތަކުގެ ދަށުން އެމީހުންގެ ލޯބިވާ އާއިލާގެ މެންބަރުން ހޯދަމުން ކަމަށާއި އަދި އެމީހުންގެ އަނބިފިރިންނާއި، ދަރިންނާއި، މައިންބަފައިންގެ ފުރާނަނެތް މަސްގަނޑުތައް އެ ތަންތަނުން ނެރެމުންދާ ކަމަށް ވެސް އެމަނިކުފާނު ފާހަގަކުރެއްވި އެވެ.

އުރުދުޣާން ވިދާޅުވީ، މިއަދު ޣައްޒާއަކީ ދުނިޔޭގައި ކުޑަކުދިން އެންމެ ގިނައިން ވަޅުލެވިފައިވާ ގަބުރުސްތާނުގެ އިތުރުން، ދުނިޔޭގައި އެންމެ ގިނަ އަދަދަކަށް ކުޑަކުދިންގެ ގުނަވަންތައް ބުރިކޮށްލަން ޖެހިފައިވާ ސަރަހައްދުކަމަށް ވިދާޅުވާން ޖެހިވަޑައިގަންނަވަނީ ނުހަނު ބޮޑު ހިތާމައަކާއެކު ކަމަށެވެ. މީގެ އިތުރުން، ޣައްޒާއަކީ މި ޒަމާނުގައި ފެންނަން އޮތް އިންސާނިއްޔަތާ ޚިލާފު "ކޮންސެންޓްރޭޝަން ކޭމްޕް" ކަމަށް ވެސް އެމަނިކުފާނު ވިދާޅުވި އެވެ.

އދ.ގެ އާންމު މަޖިލީހުގައި ރައީސް އުރުދުޣާން ތަގުރީރު ކުރައްވަން ފެއްޓެވުމާއެކު، އިސްރާއީލުގެ ވަފުދުން ވަނީ މަޖިލިސް ދޫކޮށް ނުކުމެފަ އެވެ.

އިސްރާއީލުން ޣައްޒާގައި ސުންނާފަތިކޮށްލާފައިވާ ގެތަކުގެ ކުނިބުނިތަކުގެ ދަށުން ފަލަސްތީނުގެ ގިނަ ބައެއްގެ ހަށިތައް 2026 ސެޕްޓެމްބަރު 5 ވީ ބުރާސްފަތި ދުވަހު ވަނީ ނެރެފައި

ޔަމަނުގެ ހުޅަނގު ދެކުނުގައި އޮންނަ ތާއިޒް ސިޓީގައި ބާރުގަދަ ގޮވުންތަކެއް ގޮވައި، އެ ސިޓީ ސިއްސުވާލާފައިވާ ކަމަށް އަލްޖަޒީރާ އިން ރިޕޯޓުކޮށްފި އެވެ.

މި ހާދިސާ ހިނގާފައި މިވަނީ، ތާއިޒްގެ ސަލާމަތީ ކަންކަން ވަރުގަދަކޮށް، އެ ސިޓީގެ އެލާޓް ލެވެލް މަތިކޮށްފައިވާ ކަމަށް އެ ސިޓީގެ ކަމާބެހޭ އިދާރާތަކުން އަންގާރަ ދުވަހުގެ ކުރީކޮޅު އިއުލާނުކޮށް، އިތުރު ސަލާމަތީ ފައުޖުތައް އެ ސަރަހައްދުގައި ހަރަކާތްތެރިވާން ފަށާފައި ވަނިކޮށެވެ.