މެދުއިރުމަތީ ހަނގުރާމަ

އިސްރާއީލުގެ ކެބިނެޓަށް އަލުން އިންތިޚާބުވެއްޖެނަމަ، ފަލަސްތީނުގެ އަސީރުން މަރައި، ފަލަސްތީނު ރައްޔިތުން އެ ގައުމުން ބޭރުކޮށްލާނެ ކަމަށް ބުނެ އިސްރާއީލުގެ ހަރުކަށި ފިކުރުގެ ނޭޝަނަލް ސެކިއުރިޓީ މިނިސްޓަރު އިތަމާރު ބެން-ގްވީރު އިންޒާރު ދީފި އެވެ. ބެން-ގްވީރު ވަނީ ފަލަސްތީނުގެ އަސީރަކަށް އިންޒާރުދޭ މަންޒަރު ފެންނަ ވީޑިއޯއެއް އާންމުކޮށް، ކުރިއަށް އޮތް އިންތިޚާބަށްފަހު އޭނާއަށް ޑިފެންސް މިނިސްޓަރުކަން ލިބިއްޖެނަމަ އެފަދަ ގައިދީން މަރާލާނެ ކަމަށް ވައުދުވެފަ އެވެ.

އެކްސްގައި އާންމުކޮށްފައިވާ އެ ވީޑިއޯއިން ފެންނަނީ، ފަލަސްތީނުގެ އަސީރެއް ކަމަށްވާ ހަސަން ސަލާމާ އޮތް ގޮޅިއަށް ބެން-ގްވީރު ވަދެ، "އަހަރެން ބޭނުމީ ކަލޭ މަރާލަން" ކަމަށް ބުނެ އޭނާއާ ކުރިމަތިލާ މަންޒަރެވެ.

ހަސަން ސަލާމާއަކީ 1990 ގެ އަހަރުތަކުގައި ދިން ބޮމުގެ ހަމަލާތަކަކާ ގުޅިގެން ކުށް ސާބިތުވެ، 1996 ވަނަ އަހަރުން ފެށިގެން އިސްރާއީލުގެ ޖަލުތަކުގައި އުމުރު ދުވަހުގެ އެތަށް ޖަލު ހުކުމެއް ތަންފީޒު ކުރަމުންދާ މީހެކެވެ. ބެން-ގްވީރު އާންމުކުރި ވީޑިއޯގައި ސަލާމާއަށް ދީފައިވާ "މަރުގެ އިންޒާރު" ހަމާސް ޖަމާއަތުން ވަނީ މީގެ ކުރިން ކުށްވެރިކޮށްފަ އެވެ.

އިސްރާއީލުގެ ހަރުކަށި ފިކުރުގެ ނޭޝަނަލް ސެކިއުރިޓީ މިނިސްޓަރު އިތަމާރު ބެން-ގްވީރު

އެމެރިކާއިން އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކާއެކު ވެސް، އެ ގައުމުގެ މައި އެއާޕޯޓުގެ އޮޕަރޭޝަންތައް މެދުކެނޑުމެއް ނެތި ކުރިއަށްދާ ކަމަށް ތެހެރާންގެ އިމާމް ޚުމައިނީ އިންޓަނޭޝަނަލް އެއާޕޯޓުގެ ސީއީއޯ ރާމިން ކާޝެފް-އަޒަރު ވިދާޅުވެއްޖެ އެވެ. 

ކާޝެފް-އަޒަރު ވިދާޅުވީ، އެ އެއާޕޯޓުން ބައިނަލްއަގުވާމީ 30 އަށްވުރެ ގިނަ މަންޒިލަށް މިހާރު ވެސް ދަތުރުތައް ކުރަމުންދާ ކަމަށެވެ. އަދި އެމެރިކާގެ ފިޔަވަޅުތަކަށް އަމަލުކުރަން ފެށި ސެޕްޓެމްބަރު މަހުގެ 23 ވަނަ ދުވަހު އެކަނިވެސް، އެއްވެސް މައްސަލައެއް ނުޖެހި 60 ފްލައިޓެއްގެ އޮޕަރޭޝަންތައް ކުރިއަށް ގެންގޮސްފައިވާ ކަމަށެވެ.

މި ފިޔަވަޅުތަކާ ގުޅިގެން އޮމާން އާއި ޔުނައިޓެޑް އަރަބް އެމިރޭޓްސް (ޔޫއޭއީ) އިން މިހާރު ވަނީ އީރާނުގެ ފްލައިޓްތައް މެދުކަނޑާލާފަ އެވެ. މީގެ އިތުރުން އިރާޤުގެ ހަތަރު އެއާޕޯޓަކުން ވެސް ވަނީ އީރާނުގެ ދަތުރުތައް ހުއްޓާލާފަ އެވެ. ނަމަވެސް، އީރާނުގެ އެއާލައިންތަކުން އަދިވެސް ޗައިނާ އާއި ރަޝިއާ ފަދަ ގައުމުތަކަށް ދަތުރުތައް ކުރަމުންދެ އެވެ.

އީރާނުގެ ގައުމީ އެއަރލައިން، އީރާން އެއަރ

ލުބުނާނުގެ ހިޒްބުﷲ ޖަމާއަތުގެ ލީޑަރު ހަސަން ނަސްރުﷲ އަވަހާރަކޮށްލިތާ ދެ އަހަރު ފުރުން އެ ގައުމުގެ ރައްޔިތުން ފާހަގަކުރަމުންދާއިރު، އިސްރާއީލުން ހިންގި އެ އަމަލު އީރާނުގެ ފޮރިން މިނިސްޓްރީން ހަރުކަށި އިބާރާތުން ކުށްވެރިކޮށްފި އެވެ.

އީރާނުގެ ފޮރިން މިނިސްޓްރީން ނެރުނު ބަޔާނެއްގައި ވަނީ، ނަސްރުﷲ އަވަހާރަކޮށްލުމަކީ "ނުބައިވެގެންވާ އަދި މާފުނުކުރެވޭނެ ފަދަ ޖަރީމާއެއް" ކަމަށް ސިފަކޮށްފަ އެވެ. އަދި އެކަމުގެ ޒިންމާ އުފުލަންޖެހޭ ފަރާތްތަކަށް ހައްގު އަދަބު ދިނުމަށް ދުނިޔޭގެ ހުރިހާ ގައުމުތަކަށް އީރާނުން ވަނީ ގޮވާލާފަ އެވެ.

ހަސަން ނަސްރުﷲ އަވަހާރަކޮށްލާފައިވަނީ 2024 ވަނަ އަހަރުގެ ސެޕްޓެމްބަރު މަހުގެ 27 ވަނަ ދުވަހު، ލުބުނާނުގެ ވެރިރަށް ބޭރޫތުގެ ދެކުނު ސަރަހައްދަށް އިސްރާއީލުން ދިން ވައިގެ ހަމަލާތަކެއްގަ އެވެ.

އިސްރާއީލުން ދިން ހަމަލާއެއްގައި އަވަހާރަކޮށްލާފައިވާ ހިޒްބުﷲގެ ކުރީގެ ލީޑަރު ހަސަން ނަސްރުﷲ އާއި ހާޝިމް ސަފީއްދީންގެ ބޮޑު ފޮޓޯއެއްގެ ދަށުގައި، އެ ޖަމާއަތަށް ތާއީދުކުރާ މީހުން އިށީނދެގެން

ހަނގުރާމަ ހުއްޓާލުމަށާއި ހުރްމުޒް ކަނޑުއޮޅި އަލުން ހުޅުވާލުމަށް އީރާނުން ހުށަހެޅި ހުށަހެޅުންތަކަށް އެމެރިކާގެ ރައީސް ޑޮނަލްޑް ޓްރަމްޕް އިންކާރު ކުރެއްވުމާ ގުޅިގެން، އޭޝިއާގެ ބާޒާރުތަކުގައި ތެލުގެ އަގު އަނެއްކާ ވެސް އުފުލެން ފަށައިފި އެވެ.

ރޮއިޓާސްއިން ރިޕޯޓްކޮށްފައިވާ ގޮތުގައި، ބްރެންޓް ކުރޫޑް ފިއުޗާސްގެ އަގު ވަނީ 1 އިންސައްތައަށްވުރެ މައްޗަށް ގޮސް، ފީފާއެއްގެ އަގު 105.64 ޑޮލަރަށް އުފުލިފަ އެވެ. މީގެ އިތުރުން، އެމެރިކާގެ ވެސްޓް ޓެކްސަސް އިންޓަމީޑިއޭޓް (ޑަބްލިއުޓީއައި) ކުރޫޑްގެ އަގުވެސް ބައި އިންސައްތައަށްވުރެ މައްޗަށް ގޮސް، ފީފާއެއްގެ އަގު ވަނީ 93.11 ޑޮލަރަށް އަރާފަ އެވެ.

އިންޑިއާގެ މަހާރާޝްތުރާ ސްޓޭޓްގެ ނަވީ މުމްބާއީގައި ހުންނަ، ޖަވާހަރްލާލް ނެހުރޫ ޕޯޓް ޓްރަސްޓް (ޖޭއެންޕީޓީ) އިން ހިންގާ އިންޑިއަން އޮއިލް ކޯޕަރޭޝަންގެ މަރުކަޒެއްގައި ހުރި ތެޔޮ ރައްކާކުރާ ޓޭންކުތަކެއް

އެކްސްގައި ކުރެއްވި ޕޯސްޓެއްގައި އީރާނުގެ ޚާރިޖީ ވަޒީރު އައްބާސް އަރާގްޗީ ވިދާޅުވީ، "ރައީސް ޕެޒެޝްކިއަން އާއި އަޅުގަނޑު ނިއުޔޯކަށް އައީ ހަނގުރާމައެއް އިސްތިހާރު ކުރާކަށް ނޫނެވެ. އަޅުގަނޑުމެން އައީ ސުލްހަ ގާއިމުކުރުމަށެވެ." އަދި "ކަން މިހެން އޮތް ނަމަވެސް، ކޮންމެ ފަދަ އުދުވާނަކާ ކުރިމަތިލާން ޖެހުނު ކަމުގައި ވިޔަސް، އެއީ ދުނިޔެ ނެތިދާފަދަ ބޮޑު ހަނގުރާމައަކަށް ވީ ނަމަވެސް، އީރާން އޮންނާނީ ސާބިތުކަމާއެކު" ކަމަށް އޭނާ ވިދާޅުވި އެވެ.

"ހަމައެއާއެކު، ހަގީގީ ޑިޕްލޮމެސީއަކަށް އަޅުގަނޑުމެން މިތިބީ ތައްޔާރަށެވެ."

އެމެރިކާގެ ރައީސް ޑޮނަލްޑް ޓްރަމްޕް ވިދާޅުވި ގޮތުގައި، ހުކުރު ދުވަހުގެ ރޭގެ ވަގުތެއްގައި އެމެރިކާއިން ވަނީ ހުރްމުޒް ކަނޑުއޮޅި މެދުވެރިކޮށް ރެކޯޑް މިންވަރަކަށް ތެޔޮ އުފުލާފަ އެވެ. އަދި މި މިންވަރަކީ ހަނގުރާމައިގެ ކުރިން އުފުލި މިންވަރަށް ވުރެ ވެސް އިތުރު އަދަދެއް ކަމަށް ޓްރަމްޕް ފާހަގަކުރެއްވި އެވެ.

ޗިކާގޯގައި ނޫސްވެރިންނާ ވާހަކަފުޅު ދައްކަވަމުން ޓްރަމްޕް ވިދާޅުވީ، އީރާނުން ދޫދީ، މިހާރު ހިނގަމުންދާ ހަނގުރާމަ ނިމުމަކަށް އައުމާއެކު ތެލުގެ އަގުތައް ދަށްވާނެ ކަމަށެވެ. އަދި ވަރަށް އަވަހަށް ހަނގުރާމަ ނިމުމަކަށް އަންނާނެ ކަމަށް ވެސް ޓްރަމްޕް ވިދާޅުވި އެވެ.

ހޮނިހިރު ދުވަހު ޓްރަމްޕް ވަނީ، ހަމަނުޖެހުންތައް ހުއްޓާލުމަށާއި އިގުތިސާދީ ގޮތުން މުހިންމު ހުރްމުޒް ކަނޑުއޮޅި އަލުން ހުޅުވާލުމަށް އަމާޒުކޮށް އީރާނުން ހުށަހެޅި ސުލްހައިގެ މަގުޗާޓަށް އިންކާރު ކުރައްވާފަ އެވެ.

އެމެރިކާގެ ރައީސް ޑޮނަލްޑް ޓްރަމްޕް

ހުރްމުޒް ކަނޑުއޮޅީގައި ޖާސޫސީ މަސައްކަތްތަކެއް ކުރަމުންދިޔަ އެމެރިކާގެ ޒަމާނީ ޑްރޯނެއް އަތުލައިގަނެފައިވާ ކަމަށް ބުނެ އީރާނުގެ ރިވޮލިއުޝަނަރީ ގާޑްސް (އައިއާރްޖީސީ) އިން ދެއްކި ވާހަކަތައް އެމެރިކާގެ އަސްކަރިއްޔާއިން ދޮގުކޮށްފި އެވެ.

އެމެރިކާގެ ސެންޓްރަލް ކޮމާންޑް (ސެންޓްކޮމް) ގެ ތަރުޖަމާނު ކެޕްޓަން ޓިމް ހޯކިންސް އަލްޖަޒީރާއަށް މައުލޫމާތު ދެއްވަމުން ވިދާޅުވީ، އެމެރިކާގެ އަސްކަރީ އޮޕަރޭޝަންތަކުގައި ބޭނުންކުރާ ހުރިހާ ޑްރޯންތަކެއް މިހާރު ވެސް ހުރީ އެމެރިކާގެ ފުރިހަމަ ކޮންޓްރޯލްގެ ދަށުގައި ކަމަށެވެ. އަދި އީރާނުގެ މި ދައުވާއަކީ އެ ގައުމުން "އުންމީދު ކެނޑިފައިވާ މިންވަރު ހާމަވާ" ކަމެއްގެ ގޮތުގައި އޭނާ ސިފަކުރެއްވި އެވެ.

މީގެ ކުރިން އީރާނުގެ ރިވޮލިއުޝަނަރީ ގާޑްސްގެ ކަނޑުގެ ސިފައިން ބުނެފައިވަނީ، އެމެރިކާގެ "ރީމަސް 600" މޮޑެލްގެ ޒަމާނީ ސަބްމާސިބަލް އުޅަނދެއް އެ ފަރާތްތަކުގެ ބެލުމުގެ ދަށަށް ގެނެސްފައިވާ ކަމަށެވެ. އަދި އެ އުޅަނދުގައި ހުރި މައުލޫމާތުތައް ނެގުމަށްޓަކައި އައިއާރްޖީސީގެ ޚާއްސަ މާހިރުން މިހާރު މަސައްކަތް ކުރަމުންދާ ކަމަށް ވެސް އީރާނުން ބުނެފައިވެ އެވެ.

އީރާނުގެ ފާރްސް ނިއުސް އެޖެންސީން ރިޕޯޓްކޮށްފައިވާ ގޮތުގައި، މިއީ މިހާރު ހިނގަމުންދާ ހަނގުރާމައިގައި ކަނޑުދަތުރުފަތުރަށް އަމާޒުކޮށް ދިން އެންމެ ވަރުގަދަ ހަމަލާތަކެވެ. މިގޮތުން ހޮނިހިރު ދުވަހުގެ ރޭގެ ވަގުތެއްގައި 7 އުޅަނދަކަށް ހަމަލާދީފައިވާއިރު، ހުކުރު ދުވަހުގެރޭ 12 އުޅަނދަކަށް ވަނީ ހަމަލާދީފަ އެވެ.

އީރާނުން ބުނާ ގޮތުގައި މި އުޅަނދުތަކަށް ހަމަލާދީފައިވަނީ، އެމެރިކާގެ ތާއީދާއެކު އޮމާންގެ ދެކުނުން ހަދާފައިވާ ކޮރިޑޯ ނުވަތަ "ހުއްދަނޫން" މަގުތަކުން ދަތުރުކުރުމާ ގުޅިގެންނެވެ. އަދި އީރާނުގެ ހުއްދަނެތި އެ ސަރަހައްދުން ދަތުރުކުރާ ކޮންމެ އުޅަނދަކަށް އެ ގައުމުގެ ހަތިޔާރު އެޅި ސިފައިންގެ ފަރާތުން ރައްދު ހަމަލާދޭނެ ކަމުގެ އިންޒާރު ވެސް އެ ގައުމުން ވަނީ ދީފަ އެވެ.

މި ހަމަލާތައް ދިން ދެ ރޭގެ ތެރޭގައި އީރާނުން ވަނީ އެ ކޮރިޑޯގައި ކަނޑު އަޑީގެ މައިން ވަޅުލާފަ އެވެ. މީގެ އިތުރުން، ކަނޑު އަޑީގައި ހުންނަ މައިން ހޯދުމަށް އެމެރިކާއިން ބޭނުންކުރާ ދެވަނަ ޑްރޯންއެއް ވެސް އީރާނުގެ ސިފައިން ވަނީ އެ ސަރަހައްދުން އަތުލައިގެންފަ އެވެ.

ހުރްމުޒް ކަނޑުއޮޅިން އެމެރިކާގެ ކަނޑުއަޑީގެ ޑްރޯނެއް އަތުލައިގަނެފައިވާ ކަމަށް އީރާނުގެ ރިވޮލިއުޝަނަރީ ގާޑްސް (އައިއާރްޖީސީ) އިން ބުނެފި އެވެ.

އީރާނުގެ ދައުލަތުގެ މީޑިއާތަކުން ރިޕޯޓްކޮށްފައިވާ ގޮތުގައި،  މިއީ "ރީމަސް 600" މޮޑެލްގެ، ފެނުއަޑީގައި ދަތުރުކުރާ ކުރިއަރާފައިވާ އުޅަނދެކެވެ. އަދި މި އުޅަނދުގައި ހުރި މައުލޫމާތުތައް ނެގުމަށްޓަކައި، މިހާރު އެ ގައުމުގެ އަސްކަރީ މާހިރުންގެ ބެލުމުގެ ދަށަށް އެ އުޅަނދު ގެންގޮސްފައިވާ ކަމަށް ވެސް އީރާނުން ބުނެ އެވެ.

އީރާނުގެ ފާރްސް ނިއުސް އެޖެންސީން ނެރުނު އައިއާރްޖީސީގެ ބަޔާނެއްގައި ބުނެފައިވަނީ، އެމެރިކާގެ އަސްކަރިއްޔާ އަށް ނިސްބަތްވާ މި ޑްރޯން އަތުލައިގަތީ ޖާސޫސީ މައުލޫމާތު އެއްކުރުމަށް ހުރްމުޒް ކަނޑުއޮޅީގައި ހަރަކާތްތެރިވަމުން ދަނިކޮށް ކަމަށެވެ. މި އުޅަނދު އަތުލައިގަތީ އީރާނުގެ ކަނޑުގެ ސިފައިންނާއި، އިންޓެލިޖެންސް އަދި އިލެކްޓްރޯނިކް ވޯ ފެއަރ ގުޅިގެން ހިންގި ވަރަށް ބޮޑު އަދި ކާމިޔާބު އޮޕަރޭޝަނެއްގައި ކަމަށް ވެސް އެ ބަޔާނުގައި ފާހަގަކޮށްފައިވެ އެވެ.

އީރާނުގެ ފޮރިން މިނިސްޓަރު އައްބާސް އަރާގްޗީ ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، އެ ގައުމުން ހުށަހަޅާފައިވާ ޝަރުތުތައް ވަރަށް ސާފު ކަމަށާއި، ހުރްމުޒް ކަނޑުއޮޅި އަލުން ހުޅުވާލުމުގެ އެއްވެސް ފިޔަވަޅެއް އެޅޭނީ އެ ޝަރުތުތައް ފުރިހަމަވުމުން ކަމަށެވެ. އަދި އެމެރިކާއިން މިކަމަށް އެއްބަސްވެއްޖެނަމަ، ދެފަރާތުން އެއްބަސްވާ ކަންކަމާ ގުޅޭގޮތުން ފުޅާ ދާއިރާއެއްގައި މަޝްވަރާތައް ފެށިދާނެ ކަމަށް ވެސް އޭނާ ވިދާޅުވި އެވެ.

މީގެ ތެރޭގައި އީރާނުގެ ނިއުކްލިއަރ ޕްރޮގްރާމާ ގުޅޭ މަޝްވަރާތައް ހިމެނުމުގެ ފުރުސަތު އެބައޮތެވެ. އީރާނުން ދުވަހަކު ވެސް ނިއުކްލިއަރ ބޮމެއް އުފައްދައިގެން ނުވާނެ ކަމަށް ޓްރަމްޕް ވިދާޅުވެފައިވާއިރު، އީރާނުގެ ރައީސް ވިދާޅުވެފައިވަނީ އީރާނުން ނިއުކްލިއަރ ބޮމެއް އުފައްދަން ބޭނުން ނުވާ ކަމަށެވެ. ނަމަވެސް އީރާނުގެ ހައްގުތަކުގެ ތެރޭގައި ހިމެނޭ ޔުރޭނިއަމް މުއްސަނދިކުރުމާއި، މަތީ މިންވަރަކަށް މުއްސަނދިކޮށްފައިވާ ޔުރޭނިއަމް ގައުމުން ބޭރަށް ފޮނުވުން ފަދަ ކަންކަމުގައި އެއްވެސް އުސޫލަކަށް ބަދަލެއް ނުގެންނަވާނެ ކަމަށް ވަނީ ވިދާޅުވެފަ އެވެ. 

އީރާނުގެ ހުށަހެޅުން ގަބޫލުނުކުރައްވާނެ ކަމަށް ހޮނިހިރު ދުވަހު ވިދާޅުވަމުން ރައީސް ޓްރަމްޕް ވަނީ، އިގުތިސާދީ ގޮތުން މުހިންމު ހުރްމުޒް ކަނޑުއޮޅިއާ ގުޅޭގޮތުން އެއްބަސްވުމަކަށް އައުމަށް އީރާނުން ބާރުއަޅަނީ އެ ގައުމު ވަރަށް ބޮޑަށް ނާކާމިޔާބީއާ ކުރިމަތިލާންޖެހި، ނިކަމެތިވެފައިވާތީ ކަމަށެވެ. 

ޓްރަމްޕް މިފަދަ މޭރުމަކުން ވާހަކަފުޅު ދެއްކެވި ނަމަވެސް، އީރާނާއި އެމެރިކާއާ ދެމެދު މެދުވެރިއެއްގެ ދައުރު އަދާކުރާ ފަރާތްތަކުން، އީރާނުގެ ހުށަހެޅުން އެމެރިކާއިން ރަސްމީކޮށް ބޭރުކޮށްލިކަން އަދި އަންގާފައި ނުވާ ކަމަށް މިނިސްޓަރު އަރާގްޗީ ވިދާޅުވި އެވެ.

އީރާނުގެ ތެހެރާންގައި ބޭއްވި ހިނގާލުމެއްގެ ތެރެއިން، އެ ގައުމުގެ އަންހެނަކު އަޑުއުފުލަނީ - 25 ސެޕްޓެމްބަރު 2026

އީރާނާއެކު އައު ހަނގުރާމައެއް އެމެރިކާއިން ފަށައިފިނަމަ، އިންޑިއާ ކަނޑުގައި ހުރި އެމެރިކާގެ މަނަވަރުތަކަށް ހަމަލާދޭނެ ކަމުގެ އިންޒާރު، އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) ގެ ކަނޑުގެ ސިފައިން ދީފި އެވެ.

އައިއާރުޖީސީ ނޭވީގެ ސިޔާސީ ކަންކަމާ ބެހޭ ނައިބު އަލީ މުހައްމަދީ ވިދާޅުވީ، ދެ ގައުމުގެ ދެމެދުގައި އިތުރު ހަނގުރާމައެއް ފެށިއްޖެނަމަ، އެއްވެސް ޝައްކެއްނެތް ގޮތުގައި އިންޑިއާ ކަނޑުގައި ހުރި އެމެރިކާގެ މަނަވަރުތަކަށާއި ހަނގުރާމަމަތީ އުޅަނދުތަކަށް ހަމަލާދީ، އެ ތަކެތި ސުންނާފަތިކޮށްލާނެ ކަމަށެވެ.

މިކަމާ ގުޅިގެން އީރާނުގެ ސެކިއުރިޓީ ކައުންސިލްގެ ސެކްރެޓަރީ މުހްސިން ރެޒާއީ ވެސް ވިދާޅުވެފައިވަނީ އިންޑިޔާ ކަންޑުގައިވާ އެމެރިކާގެ އަސްކަރީ މަނަވަރުތަކަށް ހަމަލާދިނުމުގެ ގާބިލުކަން އީރާނުން ތަރައްގީކޮށްފައިވާކަމަށާއި އީރާނުން އުފައްދާ ހައިޕަރސޮނިކް މިސައިލްތަކުގެ ދުވެލި "މާކް 6 އިން މާކް 10 އަށް" ހަލުވިކޮށްފައިވާ ކަމަށެވެ. މީގެ އިތުރުން، އެ ގައުމުގެ އިލެކްޓްރޯނިކް ހަނގުރާމައިގެ ނިޒާމުތައް ތަރައްގީކޮށް، ވައިގެ ދިފާއީ ނިޒާމުތައް ވަރުގަދަކޮށްފައިވާ ކަމަށާއި އެކަށީގެންވާ ވަގުތު ޖެހުމުން ބޭނުންކުރާނެ އިތުރު ފިޔަވަޅުތައް ވެސް އެބަހުރި ކަމަށެވެ.

އިންޑިޔާ ކަނޑުގައި ދަތުރުކުރަމުންދާ އެމެރިކާގެ އަސްކަރީ މަނަވަރުތަކެއް

އިނގިރޭސިވިލާތުގެ ލިވަޕޫލްގައި 27 ސެޕްޓެމްބަރު 2026 ގައި ބާއްވާ ލޭބަރ ޕާޓީގެ ކޮންފަރެންސް ފެށުމުގެ އެއް ދުވަސް ކުރިން، އެ ސިޓީގައި ކުރިއަށްދިޔަ މުޒާހަރާގެ ބައިވެރިން

"އިސްރާއީލަށް ހަތިޔާރު ފޯރުކޮށްދިނުން ހުއްޓާލުމަށް" ގޮވާލައި، ފަލަސްތީނަށް ތާއީދުކުރާ ގިނަ އަދަދެއްގެ ބަޔަކު އިނގިރޭސިވިލާތުގެ ލިވަޕޫލްގައި ކުރިއަށްދާ ލޭބަރ ޕާޓީގެ އަހަރީ ކޮންފަރެންސް ސަރަހައްދުގައި މުޒާހަރާކޮށްފި އެވެ. މި މުޒާހަރާގެ ބައިވެރިން ވަނީ އިނގިރޭސިވިލާތުން އިސްރާއީލަށް ހަތިޔާރު ވިއްކުން ހުއްޓާލުމަށާއި، އެ ގައުމާ ދެކޮޅަށް ދަތިކުރުމުގެ ފިޔަވަޅުތައް އެޅުމަށް ބާރުއަޅައި އަޑުއުފުލާފަ އެވެ.

މި މުޒާހަރާ ކުރިއަށް މިދަނީ އިސްރާއީލުން ފަލަސްތީނުގެ ބިންތަކުގައި ހަދާފައިވާ އާބާދުތަކާ ދެކޮޅަށް ލޭބަރ ޕާޓީގެ ސަރުކާރުން ދަތިކުރުމުގެ ފިޔަވަޅުތަކެއް އަޅާފައިވާ ދަނޑިވަޅެއްގަ އެވެ. ނަމަވެސް، މުޒާހަރާގެ ބައިވެރިން ބުނަމުންދަނީ ސަރުކާރުން މިހާރު އަޅާފައިވާ ފިޔަވަޅުތަކަކީ އެކަށީގެންވާ މިންވަރަށްވުރެ މާ ކުޑަ ފިޔަވަޅުތަކެއް ކަމަށެވެ.

އީރާނަށް ދޭ ކޮންމެ ހަމަލާއަކަށް އަސްކަރީ އައު އީޖާދުތަކާއި އަދި ހީނުކުރާ ފަދަ "ސަޕްރައިޒްތަކަކުން" ރައްދުދޭނެ ކަމުގެ އިންޒާރު އެ ގައުމުގެ ހަތިޔާރު އެޅި ފައުޖުތަކުގެ ތަރުޖަމާނު ބްރިގޭޑިއާ ޖެނެރަލް އަބުލްފަޒްލް ޝެކަރްޗީ ދެއްވައިފި އެވެ.

ދައުލަތުގެ މީޑިއާއަށް މައުލޫމާތު ދެއްވަމުން ޝެކަރްޗީ ވިދާޅުވީ، އީރާނުގެ އަސްކަރިއްޔާއިން މިހާރު އިސްކަންދެނީ "އެސިމެޓްރިކް ވޯ ފެއަރ" ނުވަތަ ނިސްބަތުން ކުދި އަދި ވަރުގަދަ އުކުޅުތަކަށް ބިނާވާ ހަނގުރާމައިގެ އުސޫލުތަކަށް ކަމަށާއި، އަދި އެ ގައުމުން މިހާރު ބޮޑަށް ބަރޯސާވަނީ އަމިއްލަ ގައުމުގައި އުފައްދާ ދިފާއީ އާލާތްތަކަށް ކަމަށެވެ. މީގެ އިތުރުން، އެމެރިކާ އާއި އިސްރާއީލާއެކު ކުރިން ހިނގާފައިވާ ކުރިމަތިލުންތަކާ އަޅާބަލާއިރު، އީރާނުގެ އަސްކަރީ ގާބިލުކަން މިހާރު މާ ވަރުގަދަވެފައިވާ ކަމަށް އޭނާ ފާހަގަކުރެއްވި އެވެ.

ޝެކަރްޗީ ވިދާޅުވި ގޮތުގައި އީރާނުގެ ހަތިޔާރު އެޅި ފައުޖުތައް މިހާރު އޮތީ ވަރަށް ވަރުގަދަ އަދި ތައްޔާރީ ހާލަތެއްގަ އެވެ.

އީރާނަށް ދޭ ކޮންމެ ހަމަލާއަކަށް އަސްކަރީ އައު އީޖާދުތަކާއި އަދި ހީނުކުރާ ފަދަ "ސަޕްރައިޒްތަކަކުން" ރައްދުދޭނެ ކަމުގެ އިންޒާރު އެ ގައުމުގެ ހަތިޔާރު އެޅި ފައުޖުތަކުން ދީފި

ޔަމަނުގައި ހަރަކާތްތެރިވާ ހޫޘީ ހަނގުރާމަވެރިންނާއި ޔަމަނުގެ ސަރުކާރުގެ ސިފައިންނާ ދެމެދު ކުރަމުންދާ ހަނގުރާމަ ވަރުގަދަވެއްޖެ އެވެ.

މިގޮތުން ޔަމަނުގެ ތާއިޒް، ލަހްޖް، މާރިބް އަދި އަލް ޖައުފް ފަދަ ސަރަހައްދުތަކުގައި ދެފަރާތުގެ މެދުގައި ވަރުގަދަ ކުރިމަތިލުންތަކެއް ހިނގަމުންދާ ކަމަށް ރިޕޯޓުތައް ބުނެ އެވެ.

އިސްތިރާތީޖީ ގޮތުން މުހިންމު ބާބުލް މަންދަބް ކައިރީގައި މިހާރު ހިނގަމުންދާ ކުރިމަތިލުންތައް ދަނީ ދުވަހެއް ދުވަހަކަށް ފުޅާވެ ވަރުގަދަވަމުންނެވެ. 

އީރާނުގެ ދިފާއީ ގާބިލުކަމާއި ހަތިޔާރު އުފެއްދުމުގެ ފެންވަރު ދެނެގަތުމަށް އެހެން ގައުމުތަކަށް ހުރަސްއެޅުމުގެ ގޮތުން، އެ ގައުމުގެ އަސްކަރިއްޔާގެ ބައެއް މުހިންމު ވަސީލަތްތައް ބިމުގެ އަޑީގައި ހަދާފައިވާ އިންފްރާސްޓްރަކްޗާތަކަށް ބަދަލުކޮށްފައިވާ ކަމަށް އެ ގައުމުގެ ޑިފެންސް މިނިސްޓްރީގެ ތަރުޖަމާނު ރިޒާ ތަލާއީ-ނިކް ވިދާޅުވެއްޖެ އެވެ.

ތަލާއީ-ނިކް ވިދާޅުވީ އީރާނާ ދެކޮޅަށް އެމެރިކާއިން ކުރަމުންދާ ހަނގުރާމައިގައި އެ ގައުމުގެ އެއްވެސް އިސްތިރާތީޖީ މަގުސަދެއް ހާސިލުވެފައިނުވާ ކަމަށެވެ. މީގެ ތެރޭގައި ސަރަހައްދީ ގޮތުން އީރާނަށް އޮތް މުހިންމު މަގާމަށް ގެއްލުން ދިނުމަށް އެމެރިކާއިން ކުރި މަސައްކަތް ނާކާމިޔާބުވެފައިވާ ކަމަށާއި، އޭގެ ބަދަލުގައި އީރާނުން ވަނީ ދުޝްމަނުންނަށް ބޮޑެތި ގެއްލުންތަކެއް ކުރިމަތިކުރުވާފައި ކަމަށް އޭނާ ވިދާޅުވި އެވެ.

އީރާނުގެ އަސްކަރީ ހަތިޔާރު ބަހައްޓާ ބިންގަރާހެއް- ފައިލް ފޮޓޯ

ހުރްމުޒް ކަނޑުއޮޅި އަލުން ހުޅުވާލުމާއި ނިއުކްލިއަރ ހަތިޔާރާ ގުޅޭ މަޝްވަރާތައް އަލުން ފެށުމަށް އީރާނުން ހުށަހެޅި 7 ދުވަހުގެ މަގުޗާޓު ރަސްމީކޮށް ބޭރުކޮށްލާފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވަނީ އިއުލާނު ކުރައްވާފަ އެވެ. ޓްރަމްޕް ވިދާޅުވީ އީރާނާއެކު ކުރިން ވެފައިވާ އެއްބަސްވުމުގެ ދަށުން ކަންކަން ކުރިއަށް ގެންދިއުމަކީ ދެން އެއްގޮތަކަށް ވެސް ކުރެވޭނެ ކަމެއް ނޫން ކަމަށް މަޝްވަރާތަކުގައި ބައިވެރިވާ އެމެރިކާގެ ޓީމަށް އަންގަވާފައިވާ ކަމަށެވެ.

ޓްރަމްޕް ވިދާޅުވީ، އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލައިފިނަމަ، އެ ގައުމަށް ބޭނުންވާ ގޮތަށް ކަންކަން އަނބުރާލުމުގެ ފުރުސަތު ލިބިގެންދާނެ ކަމަށެވެ. އަދި ކުރިމަގުގައި އެއްބަސްވުމަކަށް އާދެވުނު ނަމަވެސް، އެއްބަސްވުމުގެ ދަށުން އެމެރިކާއިން އެއްވެސް ފިޔަވަޅެއް އެޅުމުގެ ކުރިން އީރާނުން އަމަލީ ގޮތުން ފިޔަވަޅުތަކެއް އަޅަންޖެހޭނެ ކަމަށެވެ. 

އެހެންކަމުން، އެމެރިކާއިން ފުރަތަމަ ފިޔަވަޅު އަޅަންދެން އީރާނުން އެއްވެސް ކަމެއް ނުކުރާނެ ކަމަށް އެ ގައުމުން ބުނަމުންދާއިރު، ޓްރަމްޕް ވިދާޅުވަމުން ގެންދަވަނީ އީރާނުން ފުރަތަމަ ފިޔަވަޅު ނާޅަނީސް އެއްވެސް އެއްބަސްވުމެއް ގާއިމުނުކުރެވޭނެ ކަމަށެވެ.

ހަނގުރާމަ ހުއްޓާލުމަށް އީރާނުން ހުށަހެޅި 7 ދުވަހުގެ މަގު ޗާޓެއް ބަލައިނުގަންނަވާކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ކެމްޕޭން ދަތުރުފުޅެއްގައި ޓެނެސީއަށް ވަޑައިގަތުމަށްޓަކައި ވައިޓް ހައުސްއިން ނުކުމެވަޑައިގެން ހެލިކޮޕްޓަރާ ދިމާއަށް ވަޑައިގަންނަވަމުން، ރައީސް ޑޮނަލްޑް ޓްރަމްޕް ވަނީ މަޑުކުރައްވައި ނޫސްވެރިންނާ ވާހަކަދައްކަވާފަ އެވެ. އެމަނިކުފާނު ވިދާޅުވީ އީރާނުން ހުށަހެޅި ހުށަހެޅުންތައް ގަބޫލުނުކުރައްވައި ބޭރުކޮށްލައްވާފައިވާ ކަމަށެވެ.

ޤަތަރު މެދުވެރިކޮށް ހުށަހެޅި މި މަގުޗާޓުގައި ޝަރުތުކޮށްފައިވަނީ އީރާނުގެ ބަނދަރުތަކަށް އެމެރިކާއިން އަޅާފައިވާ ކަނޑުގެ ހިސާރު އުވާލުމަށާއި، އީރާނުގެ ތެޔޮ ވިއްކުމަށް އަޅާފައިވާ ދަތިކުރުމުގެ ފިޔަވަޅުތަކަށް ލުއިދިނުމަށާއި، ފްރީޒްކޮށްފައިވާ އީރާނުގެ މުދަލާއި ފައިސާގެ ތެރެއިން ގާތްގަނޑަކަށް 12 ބިލިއަން ޑޮލަރު ދޫކޮށްލަންށެވެ. މީގެ އިތުރުން، ލުބުނާނާއި ޔަމަނު ހިމެނޭހެން މުޅި ސަރަހައްދުގައި ހަނގުރާމަ ހުއްޓާލުމަށް އެމެރިކާއިން ބާރުއެޅުމަށެވެ. 

މިއާ އެކު، އީރާނާ ދެކޮޅަށް ފުރިހަމަ ފެންވަރުގެ ހަނގުރާމައެއް އަލުން ފެށުމަށް އެމެރިކާއިން މިހާރު އޮތީ ވަރަށް ގާތުގައި ކަމަށް މަސްރަހު ދިރާސާކުރާ ފަރާތްތަކުން ބުނެ އެވެ. 

އެމެރިކާގެ ރައީސް ޑޮނަލްޑް ޓްރަމްޕް

އީރާނުގެ އެއަރލައިންތަކަށް އެމެރިކާއިން އަޅާފައިވާ ފިޔަވަޅުތަކުން އިރާޤުގެ ބައެއް އެއާޕޯޓްތައް އިސްތިސްނާ ކުރުމާ ގުޅޭގޮތުން، އިރާޤު ސަރުކާރުން އެމެރިކާއާއެކު މަޝްވަރާކުރަމުންދާ ކަމަށް އިރާޤުގެ ބޮޑުވަޒީރު އަލީ އަލް-ޒައިދީގެ މީޑިއާ އޮފީހުން ސޯޝަލް މީޑިއާގައި އާންމުކުރި ބަޔާނެއްގައި ބުނެފި އެވެ.

މި އިސްތިސްނާގެ ދަށުން އިންސާނީ އެހީތެރިކަމާއި ތައުލީމީ ބޭނުންތަކާއި ދީނީ ގޮތުން ކުރާ ދަތުރުތަކުގެ އިތުރުން ބޭސްފަރުވާއަށް ކުރާ ދަތުރުތައް އަލުން ފެށުމުގެ ހުއްދަ ދިނުމަށް ދަނީ މަޝްވަރާކުރެވެމުންނެވެ. 

އީރާނުގެ އެއަރލައިންތަކާއެކު މުއާމަލާތްކުރާ ބައިނަލްއަގުވާމީ ކުންފުނިތަކާ ދެކޮޅަށް އެމެރިކާއިން އޭވިއޭޝަން ދާއިރާގެ އައު ދަތިކުރުމުގެ ފިޔަވަޅުތަކެއް އިއުލާނުކުރިތާ މަދު ދުވަސްކޮޅެއްގެ ތެރޭގައި، އިރާޤުގެ ހަތަރު އެއާޕޯޓަކުން އީރާނަށް ކުރާ ހުރިހާ ދަތުރުތަކެއް ހުކުރު ދުވަހުން ފެށިގެން ވަނީ މެދުކަނޑާލާފަ އެވެ.

ހަނގުރާމަ ހުއްޓާލުމަށް އީރާނުން ވަނީ 7 ދުވަހުގެ މަގު ޗާޓެއް ހުށަހަޅާފަ އެވެ. 

އީރާނުގެ ޚާރިޖީ ވަޒީރު އައްބާސް އަރަގްޗީ ވިދާޅުވީ މިހާރު ގޮތެއް ނިންމުން އޮތީ އެމެރިކާގެ އަތްމަތީގައި ކަމަށާއި މަޖުބޫރުކުރުމާއި އިންޒާރުދިނުމާއި ބިރުދެއްކުމަކަށް އީރާނުން ބޯނުލަނބާނެ ކަމަށެވެ. އަދި ފިއްތުންތަކުގެ ކުރިމަތީގައި އީރާނުގެ އިސްތިގުލާލީ ހައްގުތައް ދޫކޮށްލައި އަމާންނުދޭނެ ކަމަށް ވެސް އޭނާ ވިދާޅުވި އެވެ. 

އިތުރަށް ވިދާޅުވުމަށް: 

Raajje.mv

ހަނގުރާމަ ހުއްޓާލަން އީރާނުން ހަތް ދުވަހުގެ މަގުޗާޓެއް ހުށަހަޅައިފި، އެމެރިކާއިން އެއްބަސްވެދާނެތަ؟

ނަމަވެސް، މި މައްސަލައާ ގުޅުންހުރި އެމެރިކާގެ އޮފިޝަލުންނާ ހަވާލާދީ ދަ ވޯލް ސްޓްރީޓް ޖާނަލް އިން ރިޕޯޓްކޮށްފައިވާ ގޮތުގައި، އެމެރިކާގެ ރައީސް ޓްރަމްޕް ވަނީ މި ހުށަހެޅުން ބޭރުކޮށްލައްވާފަ އެވެ. މީގެ އިތުރުން، އެމެރިކާގެ ރައީސް ވަނީ އޭނާގެ އަމިއްލަ ސޯޝަލް މީޑިއާ ޕްލެޓްފޯމް ކަމަށްވާ "ޓްރޫތް ސޯޝަލް" ގައި ޗާޓެއް ހިއްސާކުރައްވާފަ އެވެ. އެ ޗާޓުގައި ހުރްމުޒް ކަނޑުއޮޅި ފާހަގަކޮށް، އެއީ "ޓްރަމްޕް ކަނޑުއޮޅި" ކަމަށް ވަނީ ލިޔުއްވާފަ އެވެ.

ޓްރޫތް ސޯޝަލްގައި ހުރްމުޒް ކަނޑުއޮޅި ފާހަގަކުރައްވާ "ޓްރަމްޕް ކަނޑުއޮޅި" ކަމަށް ރައީސް ޓްރަމްޕް ލިޔުއްވާފައިވާ ޕޯސްޓު

އީރާނުގެ ފޮރިން މިނިސްޓަރު އައްބާސް އަރަގްޗީ ވިދާޅުވީ، އީރާނުން ނިއުކްލިއަރ ހަތިޔާރު އުފެއްދުމާ ދާދި ގާތުގައިވާ ކަމަށް ބުނެ ކުރާ ތުހުމަތަކީ ކަނޑައެޅިގެން ބޮޑު ދޮގެއް ކަމަށާއި، މިއީ އެންމެ ފުރަތަމަ 2003 ވަނަ އަހަރު އިސްރާއީލުން އުފަންކުރުވި ދޮގު ވާހަކައެއް ކަމަށެވެ. އަދި އެ ދުވަހުން ފެށިގެން އެމެރިކާއާއި ވިލާތުގެ ގައުމުތަކުން ގެންދަނީ އެއްވެސް އުނި އިތުރެއް ނެތި އެ ވާހަކަތައް ތަކުރާރުކުރަމުން ކަމަށް ވެސް އޭނާ ވިދާޅުވި އެވެ.

އީރާނަކީ 1970 ވަނަ އަހަރުން ފެށިގެން ނިއުކްލިއަރ ހަތިޔާރު ފެތުރުން ހުއްޓުވުމާ ބެހޭ މުއާހަދާ (އެންޕީޓީ) އަށް ފުރިހަމައަށް އަމަލުކުރަމުންދާ ގައުމެއް ކަމަށާއި، އެތައް އަހަރުތަކެއް ވަންދެން ބައިނަލްއަގުވާމީ އެޓޮމިކް ހަކަތައާ ބެހޭ އެޖެންސީ (އައިއޭއީއޭ) ގެ ވަރުގަދަ މޮނިޓަރިންގެ ދަށުގައި އީރާނުގެ މަސައްކަތްތައް ކުރިއަށްދާކަން މިނިސްޓަރު ފާހަގަކުރެއްވި އެވެ.

އައިއޭއީއޭގެ ރައްކާތެރިކަމުގެ ދަށުގައި ހުރި އީރާނުގެ ސުލްހަވެރި ނިއުކްލިއަރ މަރުކަޒުތަކަށް ހަމަލާދެމުން، ނިއުކްލިއަރ ހަތިޔާރު ފެތުރުން ހުއްޓުވުމަށް މަސައްކަތްކުރާ ކަމަށް ބުނެ އެމެރިކާއަށް ދެއްކޭނެ އެއްވެސް ހަމަޖެހޭ ދަލީލެއް ނެތް ކަމަށް ވެސް އަރަގްޗީ ވިދާޅުވި އެވެ.

އީރާނުގެ ރައީސް މަސްއޫދު ޕެޒެޝްކިއާންއާ ބައްދަލުކުރެއްވުމަށް ފަހު ދެއްކެވި ވާހަކަފުޅުގައި އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭސް ވިދާޅުވީ  އޭނާގެ ވަޒަންކުރުންތަކަށް ބަލާއިރު އީރާނުން ނިއުކްލިއަރ ހަތިޔާރު ހޯދުމަށް މަސައްކަތް ކުރަމުން ނުދާ ކަމަށެވެ. އަދި ކުރިއަށް އޮތް މެދުއިރުމަތީގެ ދަތުރުފުޅުގައި، ސަރަހައްދުގެ ގައުމުތަކުން މި މައްސަލައިގައި ޑިޕްލޮމެޓިކް މަގުން ހައްލު ހޯދުމަށް ބާރުއެޅުމަށް ގަސްދުކުރައްވާ ކަމަށް ގުޓަރޭސް ވިދާޅުވެފައިވެ އެވެ. 

ގުޓަރޭސްއާއެކު ބޭއްވެވި މި ބައްދަލުކުރެއްވުމުގައި ވާހަކަފުޅު ދައްކަވަމުން ރައީސް ޕެޒެޝްކިއާން ވިދާޅުވެފައިވަނީ، އީރާނުން ނިއުކްލިއަރ ހަތިޔާރު އުފައްދަން އުޅޭ ކަމަށް ބުނެ ދެކެވޭ ވާހަކަތަކަކީ އެއްވެސް އަސާސެއް ނެތް، ހަގީގަތާ ޚިލާފު ދޮގު ވާހަކަތަކެއް ކަމަށެވެ. އަދި އީރާނުގެ އަމާޒަކީ ސުލްހަވެރި ބޭނުންތަކަށް ނިއުކްލިއަރ އިލްމާއި ޓެކްނޮލޮޖީ ހޯދައި، އޭގެ މަންފާ ލިބިގަތުން ކަމަށާއި، ނިއުކްލިއަރ ހަތިޔާރު އުފެއްދުމުގެ އެއްވެސް ވިސްނުމެއް އެ ގައުމުގެ ނެތް ކަމަށް ޕެޒެޝްކިއާން ވިދާޅުވި އެވެ. މީގެ އިތުރުން، އީރާނުން ނިއުކްލިއަރ މަޝްވަރާތަކުން ވަކިވެފައި ނުވާނެ ކަމަށާއި ނަމަވެސް، ޚާރިޖީ ގުޅުންތަކުގެ ތެރެއިން ކަންކަން ހައްލުކުރުމަށް އެމެރިކާއިން ތަކުރާރުކޮށް ނާކާމިޔާބުވެފައިވާތީ، އެ ގައުމަށް މިހާރު އިތުބާރު ނުކުރެވޭ ކަމަށް އޭނާ ފާހަގަކުރެއްވި އެވެ.

އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭސް އާއި އީރާނުގެ ރައީސް މަސްއޫދު ޕެޒެޝްކިއާން

މައްކާ ދިފާއީ އެއްބަސްވުމުގައި ހިމެނޭ ގައުމަކަށް ދޭ ހަމަލާއަކާ ގުޅިގެން އަޅާނެ ފިޔަވަޅެއް ނިންމާނީ، ހަމަލާ އަމާޒުވި ގައުމަކުން އެދޭ ކަންކަމަށާއި އެ ގައުމަކަށް ބޭނުންވާ ކަންކަމަށް ބެލުމަށްފަހު ކަމަށް ތުރުކީވިލާތުގެ ރައީސް ރަޖަބް ތައްޔިބް އުރުދުޣާން ވިދާޅުވެއްޖެ އެވެ.

އެމެރިކާގެ ނޫސް މަޖައްލާއެއް ކަމަށްވާ "ނިއުސްވީކް" އަށް ދެއްވި އިންޓަވިއުއެއްގައި އުރުދުޣާން ވިދާޅުވީ، އެ އެއްބަސްވުމުގައި ހިމެނޭ ގައުމުތަކަށް ދޭ އެހީތެރިކަމުގެ ތެރޭގައި ޖާސޫސީ މައުލޫމާތު ހިއްސާކުރުމާއި، ލޮޖިސްޓިކް އެހީތެރިކަން ފޯރުކޮށްދިނުން ނުވަތަ ހަތިޔާރުގެ އެހީތެރިކަން ފޯރުކޮށްދިނުން ހިމެނިދާނެ ކަމަށެވެ.

މީގެ އިތުރުން، ކުރިމަތިވާ ނުރައްކަލުގެ ކުޑަބޮޑުމިނަށް ބަލައި، މިއަށްވުރެ ފުޅާދާއިރާއެއްގައި އަސްކަރީ އެހީތެރިކަން ފޯރުކޮށްދިނުމާ މެދު ވެސް ވިސްނިދާނެ ކަމަށް ތުރުކީގެ ރައީސް ވިދާޅުވި އެވެ.

ސައުދީ އަރަބިއްޔާ، ތުރުކީވިލާތް އަދި ޕާކިސްތާނުން މިދިޔަ އޮގަސްޓް މަހު މައްކާގައި ވަނީ ދިފާއީ އެއްބަސްވުމެއްގައި ސޮއިކޮށްފަ އެވެ. ޔަމަނުގެ ދާޚިލީ ހަނގުރާމަ އިތުރަށް ވަރުގަދަވަމުންދާ ދަނޑިވަޅެއްގައި، ފާއިތުވި ހަފުތާތަކުގައި އީރާނުގެ މަދަދުލިބޭ ހޫޘީންގެ ފަރާތުން ސައުދީ އަރަބިއްޔާއަށް އަމާޒުކޮށް މިސައިލާއި ޑްރޯން ހަމަލާތަކެއް ވަނީ ދީފަ އެވެ. އުރުދުޣާން ވިދާޅުވީ އިރާޤު، ޔަމަން ނުވަތަ އެ ނޫން ވެސް ސަރަހައްދެއްގައި ހިނގާ ކޮންމެ ހާދިސާއަކާ ގުޅިގެން، އަމަލީ ގޮތުން އަސްކަރީ ރައްދު ހަމަލާއެއް ދޭނެ ގޮތުގެ ތަފުސީލީ މަންޒަރެއް މި ވަގުތު ކުރަހާލުމަކީ އެންމެ ރަނގަޅު ގޮތް ނޫން ކަމަށެވެ.

ޔަމަނުގެ ލީޑަރޝިޕް ކައުންސިލްގެ ރައީސް ރަޝާދު އަލް-އަލީމީ، އެ ގައުމުގެ ހަތިޔާރު އެޅި ސިފައިންގެ ލަޝްކަރާ ގުޅި، ހަނގުރާމައަށް ތައްޔާރުވުމަށް ޔަމަނުގެ ރައްޔިތުންނަށް ގޮވާލައްވައިފި އެވެ.

މީގެ އިތުރުން، ހޫޘީ ޖަމާއަތް ދޫކޮށް ވަކިވާ ހަނގުރާމަވެރިންނާއި އެ ޖަމާއަތާ ގުޅުން އޮންނަ ފަރާތްތަކަށް އާންމު މައާފެއް ދެއްވާނެކަމަށް ވެސް އަލް-އަލީމީ ވަނީ އިއުލާނު ކުރައްވާފަ އެވެ.

ވީޑިއޯ މެދުވެރިކޮށް ދެއްވި ބަޔާނެއްގައި އަލް-އަލީމީ ވިދާޅުވީ، ހޫޘީ ހަނގުރާމަވެރި ޖަމާއަތް ދޫކޮށް، އެ ޖަމާއަތާއެކު ހަނގުރާމަކުރުން ހުއްޓާލާ ކޮންމެ މީހަކަށްމެ ފުރިހަމަ އާންމު މައާފެއް ދެއްވާނެ ކަމަށެވެ.

ޔަމަނުގެ ހަތިޔާރުއެޅި ސިފައިން

އީރާނު ސަރުކާރަށް މާލީ ގޮތުން އެހީތެރިކަން ލިބޭ ހުރިހާ މަގުތަކެއް އެމެރިކާއިން ދާނީ ބަންދުކުރަމުން ކަމަށް އެމެރިކާގެ ސްޓޭޓް ޑިޕާޓްމަންޓުގެ ތަރުޖަމާނު ޕިގޮޓް އަލްޖަޒީރާއަށް ވިދާޅުވެއްޖެ އެވެ. ޕިގޮޓް ފާހަގަކުރެއްވި ގޮތުގައި، އީރާނު ސަރުކާރަށް ނިއުކްލިއަރ ހަތިޔާރެއް ހޯދުމުގެ ފުރުސަތު ނުދިނުމަކީ ރައީސް ޑޮނަލްޑް ޓްރަމްޕްގެ އެންމެ މުހިންމު އަމާޒެވެ. އަދި އެ އަމާޒަށް ވާސިލުވުމަށް ޓްރަމްޕް ސާބިތުކަމާއެކު ހުންނެވި ކަމަށް ވެސް އޭނާ ވިދާޅުވި އެވެ.

"މި މައްސަލައިގައި ހުރިހާ ބާރެއް އޮތީ ރައީސް ޓްރަމްޕްގެ އަތްޕުޅުގައި،" އަލްޖަޒީރާއާ ވާހަކަދައްކަވަމުން ޕިގޮޓް ވިދާޅުވި އެވެ.

ޕިގޮޓް އިތުރަށް ވިދާޅުވީ، ހުރްމުޒް ކަނޑުއޮޅިން ދަތުރުކުރާ ތެލުގެ މިންވަރު ދުވަހުން ދުވަހަށް އިތުރުވަމުންދާ ކަމަށެވެ. އަދި އީރާނާ ދެކޮޅަށް އެމެރިކާއިން ހިންގަމުންދާ އިގުތިސާދީ ފިޔަވަޅުތަކުގެ ސަބަބުން، އެ ގައުމުގެ ސަރުކާރަށް މާލީ ގޮތުން މަންފާ ލިބޭ މައިގަނޑު ވަސީލަތްތައް ކަނޑާލަމުންދާ ކަމަށް ވެސް އޭނާ ވިދާޅުވި އެވެ.

އީރާނާއެކު ހިނގަމުންދާ ހަނގުރާމައިގެ މަޝްވަރާތައް ޗައިނާގެ ރައީސް ޝީ ޖިންޕިންއާ އެކު ކުރައްވާފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. ހުރްމުޒް ކަނޑުއޮޅި އަލުން ހުޅުވާލުމުގައި ކުރިއެރުންތަކެއް ލިބިދާނެތޯ ނޫސްވެރިން ސުވާލުކުރުމުން، ހުކުރު ދުވަހު ޓްރަމްޕް ވިދާޅުވީ، އެކަމުގައި ވަރަށް ރަނގަޅު ނަތީޖާއެއް ފެންނާނެ ކަމަށް ގަބޫލުފުޅު ކުރައްވާ ކަމަށެވެ.

ޗައިނާ އިން އީރާނަށް އެހީތެރިވެ، ހުރްމުޒް ކަނޑުއޮޅި ބަންދުކުރުމަށް މަސައްކަތް ކުރަމުންދަނީތޯ ސުވާލުކުރުމުން، ޗައިނާގައި ހުންނަވާ އެމެރިކާގެ ސަފީރު ޑޭވިޑް ޕާޑިއު ސީއެންބީސީ އަށް ހުކުރު ދުވަހު ވިދާޅުވީ، އެކަމުގައި ޗައިނާގެ "ނުސީދާ އެހީތެރިކަމެއް" ލިބެމުންދާ ކަމަށެވެ. މީގެ އިތުރުން ޕާޑިއު ވިދާޅުވީ، އީރާނަށް ޗައިނާ އިން އެހީތެރިކަން ފޯރުކޮށްދިނުމަކީ ބަލައިގަނެވޭނެ ކަމެއް ނޫން ކަމަށް ރައީސް ޓްރަމްޕް، ރައީސް ޝީ ޖިންޕިންއަށް ވަރަށް ސާފުކޮށް އަންގަވާފައިވާ ކަމަށެވެ.

ޗައިނާގެ ގްރޫޕްތަކުން ފޯރުކޮށްދޭ ސެޓެލައިޓް ފޮޓޯތަކާއި އިންޓެލިޖެންސް މައުލޫމާތުގެ އެހީގައި، ހުރްމުޒް ކަނޑުއޮޅިން ދަތުރުކުރާ އުޅަނދުފަހަރަށް ބިރުދެއްކުމަށާއި، މެދުއިރުމަތީގައި ހުރި އެމެރިކާގެ އަސްކަރީ މަރުކަޒުތަކަށް އަމާޒުކޮށްގެން ވަރުގަދަ ހަމަލާތަކެއް ދިނުމަށް އީރާނަށް މަގުފަހިވެފައިވާ ކަމަށް އެމެރިކާގެ އިންޓެލިޖެންސް ރިޕޯޓުތަކުން ދައްކާފައިވާކަމަށާއި މިކަމުގެ ސަބަބުން ވޭތުވެދިޔަ މަސްތަކުގެ ތެރޭގައި އީރާނުން ހަމަލާދޭން ބޭނުންވާ އަމާޒުތައް ދެނެގަތުމުގެ ގާބިލުކަން ވަނީ ވަރަށް ބޮޑަށް އިތުރުވެފައިވާކަމަށް ސީއެންއެން އިން ވަނީ ރިޕޯޓުކޮށްފަ އެވެ. މީގެއިތުރުން އެމެރިކާއިން އީރާނުގެ އޭވިއޭޝަން ދާއިރާއަށް އެޅި ދަތިކުރުމުގެ ފިޔަވަޅު ބަލައިނުގަންނާނެކަމަށް ބުނެ އެކަމަށް އަމަލުކުރުމަށް ޗައިނާއިން ވަނީ ފާޅުގައި ދެކޮޅު ހަދާފަ އެވެ.

ޗައިނާގެ ރައީސް ޝީ ޖިންޕިންއާ އެކު އެމެރިކާގެ ރައީސް ޑޮނަލްޑް ޓްރަމްޕް

އީރާނާ މެދު އެމެރިކާއިން ގެންގުޅޭ ސިޔާސަތުތަކާއި މަގުސަދުތަކަށް އެއްވެސް ބަދަލެއް ނާންނަކަމަށް އެމެރިކާގެ ސްޓޭޓް ޑިޕާޓްމަންޓުގެ ތަރުޖަމާނު ޓޮމީ ޕިގޮޓް އަލްޖަޒީރާއަށް ވިދާޅުވެއްޖެ އެވެ. ޕިގޮޓް މިހެން ވިދާޅުވީ، މެދުއިރުމަތީގެ ހަމަނުޖެހުންތައް ނިމުމަކަށް ގެނައުމަށް އީރާނުން ހުށަހެޅުންތަކެއް ހުށަހަޅާފައިވާ ކަމަށް ދެކެވޭ ވާހަކަތަކާ ގުޅިގެން އަލްޖަޒީރާއަށް ދެއްވި ބަސްދީގަތުމެއްގަ އެވެ.

އީރާނުން ހުށަހެޅި ކަމަށް ބުނާ މި ހުށަހެޅުންތަކާ މެދު ވޮޝިންޓަނުން ދެކޭގޮތާ ބެހޭގޮތުން ސުވާލު ދެންނެވުމުން ޕިގޮޓް ވިދާޅުވީ، އީރާނާއެކު ވެވޭ ކޮންމެ އެއްބަސްވުމަކީ ވެސް އެ ގައުމުން އަމަލީ ގޮތުން އަޅާ ފިޔަވަޅުތަކުގެ މައްޗަށް ބިނާވެފައިވާ އެއްބަސްވުމަކަށް ވާންޖެހޭނެ ކަމަށެވެ.

މީގެ އިތުރުން ޕިގޮޓް ވިދާޅުވީ، އަސާސީ ގޮތުން އެމެރިކާއިން ކަނޑައަޅާފައިވާ ޝަރުތުތަކާއި މަގުސަދުތައް އީރާނުގެ ސަރުކާރަށް ވަރަށް ސާފުކޮށް ބަޔާންކޮށްދީފައިވާނެ ކަމަށާއި، އެ ކަންކަމަށް އެއްވެސް ބަދަލެއް އައިސްފައި ނުވާ ކަމަށެވެ.

އެމެރިކާގެ ސްޓޭޓް ޑިޕާޓްމަންޓުގެ ތަރުޖަމާނު ޓޮމީ ޕިގޮޓް

ޔަމަނުގެ ލަހިޖް ޕްރޮވިންސްގައި ހިމެނޭ އިސްތިރާތީޖީ ގޮތުން މުހިންމު ޖަބަލް ނޫމާން އާއި ދާރުލް ކާފިރު ސަރަހައްދު، އެ ގައުމުގެ ސަރުކާރަށް ވަފާތެރި ފައުޖުތަކުން ހިފާފައިވާކަން އިއުލާނުކޮށްފި އެވެ.

ޔަމަނުގެ ސަރުކާރު ފައުޖުތަކުން ނެރުނު ބަޔާނެއްގައި ބުނެފައިވަނީ، ލަހިޖް ޕްރޮވިންސްގެ ދެކުނުގައި އޮންނަ އަލް-ވަޒީއިއްޔާ އަދި އަލް-މަދާރިބާ ޑިސްޓްރިކްޓްތައް ރީތިކޮށް ފެންނަން އޮންނަ ޖަބަލް ނޫމާން ފަރުބަދަ އާއި ދާރުލް ކާފިރު ސަރަހައްދު ހިފުމަށް ރޭގަނޑުގެ ވަގުތެއްގައި ކުއްލި އަސްކަރީ އޮޕަރޭޝަނެއް ފެށި ކަމަށެވެ.

މި އޮޕަރޭޝަން ކުރިއަށް ގެންގޮސްފައިވަނީ ވަރަށް ބޮޑަށް ރޭވިގެން، ދުޝްމަނުންގެ ސަފުތަކުގެ ތެރެއަށް ވަދެގަނެ އެ ސަރަހައްދު ވަށާލައިގެން ކަމަށާއި، ހުކުރު ދުވަހުގެ ހެނދުނުގެ ވަގުތެއްގައި ސަރުކާރުގެ ފައުޖުތަކުން އެ ސަރަހައްދުގައި ހުރި މަގާމުތަކަށް ކުރިއަރާފައިވާ ކަމަށް އެ ބަޔާނުގައި ބުނެފައިވެ އެވެ.

މި ކުރިމަތިލުންތަކާ ގުޅިގެން ހޫޘީ ހަނގުރާމަވެރިންނަށް ވަނީ އެ ސަރަހައްދު ދޫކޮށް ފަހަތަށް ޖެހެން މަޖުބޫރުވެ ފަހަތަށް ޖެހުނުއިރު، އެމީހުންގެ ބައެއް މީހުން މަރުވެފައިވާ ކަމަށާއި، ގިނަ އަދަދެއްގެ ހަތިޔާރާއި ވަޒަން އެ ސަރަހައްދަށް ދޫކޮށްލާފައިވާ ކަމަށް ވެސް ޔަމަނުގެ ސަރުކާރު ފައުޖުތަކުން މައުލޫމާތުދެ އެވެ.

ސަންޢާ، ޔަމަން: 10 ސެޕްޓެމްބަރު 2026، ޔަމަންގެ ސަންޢާގައި ކުރިއަށްދިޔަ އަސްކަރީ ހަރަކާތްތަކަށް ތައްޔާރުވުމުގެ ކެމްޕޭނެއްގެ ތެރެއިން، އެ ގައުމުގެ ހަތިޔާރު އެޅި ފައުޖުތަކުން ހިނގާލުމެއް ބާއްވަނީ

އީރާނުގެ ސިވިލް އޭވިއޭޝަން އޮތޯރިޓީން ހާމަކޮށްފައިވާ ގޮތުގައި، އިތުރު އެންގުމެއް އަންގަންދެން އިރާޤަށް ކުރާ ފްލައިޓްތަކުގެ ޓިކެޓް ވިއްކުން މިހާރު ވަނީ މެދުކަނޑާލާފަ އެވެ.

މި ނިންމުން ނިންމާފައިވަނީ، ހުކުރު ދުވަހުން ފެށިގެން އިރާޤުގެ ނަޖަފަށް ކުރާ ދަތުރުތައް މެދުކަނޑާލުމަށް ނިންމި ނިންމުމާ ގުޅިގެން ކަމަށާއި އިރާޤުގެ އުރުބީލް އަދި ސުލައިމާނިއްޔާ އެއާޕޯޓުން ވެސް އީރާނުގެ ފްލައިޓްތަކުގެ ދަތުރުތައް މެދުކަނޑާލާފައިވާތީ ކަމަށް ބެލެވެ އެވެ.

ތަސްނީމް ނޫސް އެޖެންސީން ރިޕޯޓްކޮށްފައިވާ ގޮތުގައި، ދެ ގައުމުގެ އެއާޕޯޓްތަކުގައި ފަސިންޖަރުން ތިބުމާއެކު، އީރާނުގެ ބޯޑަރު ސަރަހައްދުގައިވާ އެއާޕޯޓްތަކަށް ކުރާ އެތެރޭގެ އުދުހުންތައް އިތުރުކޮށް، ފަސިންޖަރުން އުފުލުމުގެ އިންތިޒާމްތައް ހަމަޖެއްސުމަށް އެއާލައިންތަކަށް މިހާރު ވަނީ އަންގާފަ އެވެ.

އީރާނުގެ މަދަނީ އެއާލައިންތަކުގެ މުޅި ފްލީޓް ދުނިޔޭގެ އެކި ކަންކޮޅުތަކުގައި ގްރައުންޑް ކުރުމުގެ މަގުސަދުގައި، ސެޕްޓެމްބަރު މަހުގެ 23 ވަނަ ދުވަހުގެ ފަހުން އީރާނުގެ އެއާލައިންތަކާއެކު ވިޔަފާރީގެ މުއާމަލާތްކުރާ ބައިނަލްއަގުވާމީ ކޮންމެ ކުންފުންޏަކާ ދެކޮޅަށް ދަތިކުރުމުގެ ފިޔަވަޅު އަޅާނެ ކަމަށް އެމެރިކާއިން މީގެ ކުރިން ވަނީ އިއުލާނުކޮށްފަ އެވެ.

ފްރެންކްފަރޓުގެ އެއާޕޯޓެއްގައި އީރާން އެއާގެ އެއާބަސް 330-200 މަރުކާގެ މަތިންދާބޯޓެއް ޖައްސަނީ- ފައިލް ފޮޓޯ

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އދ. ގެ އާންމު މަޖިލީހުގައި ތަގުރީރު ކުރެއްވުމުގެ ކުރިން، ނިއުޔޯކްގައި ހުންނަ އދ. ގެ މައި މަރުކަޒު ކުރިމަތީގައި މުޒާހަރާކުރި 100 އެއްހާ މީހުން އެ ސިޓީގެ ފުލުހުން ވަނީ ހައްޔަރުކޮށްފަ އެވެ. ހައްޔަރުކުރި މީހުންގެ ތެރޭގައި މަޝްހޫރު ފިލްމީ ތަރިން ކަމަށްވާ ސޫޒަން ސަރަންޑަން އާއި ހެނާ އައިންބައިންޑާ ވެސް ހިމެނެ އެވެ.

މުޒާހަރާގެ ބައިވެރިން ވަނީ އދ. އަށް ވަދެވެން ހުންނަ މަގުތައް ބަންދުކޮށްފަ އެވެ. މީގެ އިތުރުން އދ. ގެ މަރުކަޒު ވަށައިގެންވާ އެކި ސަރަހައްދުތަކަށް ވެސް މުޒާހަރާގެ ބައިވެރިން ޖަމާވި އެވެ. މުޒާހަރާގެ ބައިވެރިން ބުނީ އެ ހަރަކާތުގެ ބޭނުމަކީ ބެންޖަމިން ނަތަންޔާހޫއަށް އެ ސިޓީން މަރުހަބާ ނުކިޔާކަން އަންގައިދީ، ވަރުގަދަ މެސެޖެއް ދިނުމެވެ. އަދި ހަނގުރާމައިގެ ކުށްވެރިއަކަށް އދ. އިން މަރުހަބާ ކިޔަމުންދާ ކަމަށް ބުނެ އެ އިދާރާއަށް ވަނީ ފާޑުކިޔާފަ އެވެ.

އިސްރާއީލުގެ ދައުލަތުގެ މީޑިއާ "ކާން" އިން ރިޕޯޓްކޮށްފައިވާ ގޮތުގައި، ނަތަންޔާހޫ ނިއުޔޯކަށް ވަޑައިގެންނެވި ދުވަހު، އދ. ގައި ތަގުރީރު ކުރެއްވުމަށްފަހު ވަގުތުން ވަނީ އެނބުރި ގައުމަށް ވަޑައިގަތުމަށް ފުރާވަޑައިގެންފަ އެވެ. އިސްރާއީލުގެ މީޑިއާތަކުން ބުނާ ގޮތުގައި ނަތަންޔާހޫގެ މި ދަތުރުފުޅު ކުރުކޮށްލެއްވީ ސަލާމަތީ ސަބަބުތަކަށްޓަކަ އެވެ.

އދ. ގެ އާންމު މަޖިލީހުގައި ނަތަންޔާހޫ ތަގުރީރުކުރައްވާތީ މުޒާހަރާކުރި ފިލްމީތަރި ސޫޒަން ސަރަންޑަން ވެސް ވަނީ ހައްޔަރުކޮށްފައި

އީރާނުގެ އަސްކަރީ ގާބިލުކަން ހުރި ގޮތުގެ ސަބަބުން، އެމެރިކާގެ އަސްކަރީ އުސޫލުތަކަށް ބަދަލު ގެންނަން މަޖުބޫރުވެފައިވާ ކަމަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) ގެ އިންޓެލިޖެންސް ޔުނިޓުން ބުނެފި އެވެ.

އެ ޔުނިޓުން ބުނި ގޮތުގައި، އީރާނުގެ އަސްކަރީ ބާރުގެ ސަބަބުން އެމެރިކާގެ ސިފައިން އެކި ސަރަހައްދުތަކަށް ބަހާލުމާއި، އަސްކަރީ ސާމާނުތައް ދުރު ހިސާބުތަކަށް ބަދަލުކުރުމުގެ އިތުރުން، ސިއްރު އަދި ބިމުގެ އަޑީގައި އަސްކަރީ މަރުކަޒުތައް ގާއިމުކުރުމަށް އެމެރިކާއަށް ވަނީ މަޖުބޫރުވެފަ އެވެ.

އައިއާރުޖީސީ އިން ނެރުނު ބަޔާނެއްގައި ބުނެފައިވަނީ، އީރާނުގެ ރައްޔިތުންގެ ކެރުމާއި ސާބިތުކަމުގެ އިތުރުން، އެ ގައުމުގެ ޖިއޮގްރަފީގެ ބޭނުން ހިކުމަތްތެރިކަމާއެކު ހިފުމުގެ ސަބަބުން، ވޮޝިންޓަނުން ގެންގުޅޭ އާންމު އަސްކަރީ ސިޔާސަތުތަކަކީ ހަރަދު ބޮޑު އަދި ނަތީޖާ ނުނެރެވޭ އުސޫލުތަކަކަށް ވެފައިވާ ކަމަށެވެ.

އެމެރިކާގެ ސެންޓްރަލް ކޮމާންޑް (ސެންޓްކޮމް) ގެ އަސްކަރީ މަރުކަޒުތައް ހުސްކޮށް އުވާލުމާއި، އުރުދުން ފަދަ ރައްކާތެރި ފަހަތުގެ ސަރަހައްދުތަކަށް ސިފައިން ބަދަލުކުރުމާއި، އެމެރިކާ ސިފައިންނަށް ލިބެމުންދާ ގެއްލުންތަކުގެ އިތުރުން، އިންޓެލިޖެންސް އަދި އަސްކަރީ ވަސީލަތްތައް ދުރު ހިސާބުތަކަށް ގެންދިއުމުގެ ސަބަބުން އެމެރިކާއަށް ބޮޑެތި ހަރަދުތަކެއް ކުރަން ޖެހިފައިވާ ކަމަށް އެ ބަޔާނުގައި ފާހަގަކޮށްފައިވެ އެވެ. އަދި އެމެރިކާގެ އަސްކަރީ ހަރަކާތްތައް ސިއްރުކޮށް، ބިމުގެ އަޑީގައި މަރުކަޒުތައް ހަދަން ޖެހުމަކީ ވެސް މިކަމުގެ ހެއްކެއް ކަމަށް އައިއާރުޖީސީ އިން ބުނެ އެވެ.

އައިއާރުޖީސީ އިން އިތުރަށް ބުނެފައިވަނީ، މި ބަދަލުތަކުން ހާމަވަނީ އީރާނާ ކައިރި ސަރަހައްދުތަކުގައި އެމެރިކާގެ އަސްކަރީ މަރުކަޒުތައް ފާޅުކަން ބޮޑު ގޮތެއްގައި ދެމެހެއްޓުމަށް ކުރިމަތިވަމުންދާ ގޮންޖެހުންތައް އިތުރުވަމުންދާ މިންވަރު ކަމަށެވެ.

އެމެރިކާ އިން އީރާނާ އެކު ކުރަމުންދާ ހަނގުރާމައިގައި އީރާނުން ސުންނާފަތިކޮށްލާފައިވާ އެމެރިކާގެ މެދުއިރުމަތީ ބޭސް އެއް

ފާއިތުވި އޮގަސްޓް މަހު ފަރަންސޭސިވިލާތުގެ ވެރިރަށް ޕެރިހުގައި، އެ ގައުމުގެ ރައީސް އެމަނުއެލް މެކްރޮން ސައުދީ އަރަބިއްޔާގެ ވަލީއަހުދު މުހައްމަދު ބިން ސަލްމާނަށް މަރުހަބާ ވިދާޅުވަނީ

އެމެރިކާއިން އީރާނާއެކު ކުރަމުންދާ ހަނގުރާމައިގެ ނުފޫޒު ކުޑަކުރުމަށް ފަރަންސޭސިވިލާތުން ކުރަމުންދާ އަސްކަރީ މަސައްކަތްތައް އިތުރުކުރުމުގެ ގޮތުން، ސައުދީ އަރަބިއްޔާގެ ރަތްކަނޑުގެ އައްސޭރިފަށުގައި އޮންނަ ޔަންބޫގައި ހުންނަ ތެޔޮ ސާފުކުރާ ކާރުޚާނާއަކާއި ސާފުނުކުރާ ތެޔޮ އުފުލާ ހޮޅިލައިން ރައްކާތެރިކުރުމަށް އެހީތެރިވުމަށް އެ ގައުމަށް ސިފައިން ފޮނުވުމަށް ނިންމާފައިވާ ކަމަށް ފަރަންސޭސި ރައީސް އެމަނުއެލް މެކްރޮން ބުރާސްފަތި ދުވަހު ވިދާޅުވެއްޖެ އެވެ.

ބުރާސްފަތި ދުވަހު ދެއްވި ޓީވީ އިންޓަވިއުއެއްގައި މެކްރޮން ވިދާޅުވީ، ޔަންބޫގައި ހުރި މި މުހިންމު ބިނާތައް ހިމާޔަތްކުރުމަށްޓަކައި ފަރަންސޭސި އަސްކަރީ ވަސީލަތްތައް ކަމަށްވާ ސިފައިންނާއި، ރޭޑާ ސިސްޓަމްތަކުގެ އިތުރުން ދިފާއީ ނިޒާމުތައް އެ ސަރަހައްދަށް ފޮނުވާނެ ކަމަށެވެ. ނަމަވެސް، ފަރަންސޭސިވިލާތުން އެއްވެސް ހަނގުރާމައެއްގެ ތެރެއަށް ވަންނަން ބޭނުންނުވާކަން ފާހަގަކުރައްވަމުން މެކްރޮން ވިދާޅުވީ، މި ނިންމުމަކީ ސައުދީ ސަރުކާރާއެކު މަޝްވަރާކޮށް ފައިނަލްކޮށްފައިވާ ނިންމުމެއް ކަމަށެވެ.

މިކަމާ ގުޅޭގޮތުން ފަރަންސޭސި ރައީސްގެ އޮފީހުން ނެރުނު ބަޔާނެއްގައި ބުނެފައިވަނީ، ސައުދީ އަރަބިއްޔާގެ އިގްތިސާދީ މުހިންމު ބިނާތަކަށް ދެވޭ ހަމަލާތަކަކީ ބައިނަލްއަގުވާމީ ހަކަތައިގެ ބާޒާރަށް އޮތް ނުރައްކަލެއް ކަމަށެވެ.  އެގޮތުން ސައުދީ އަރަބިއްޔާގެ ތެޔޮ މަރުކަޒުތަކަށް އަމާޒުކޮށް ޔަމަނުގެ ހޫޘީ ހަނގުރާމަވެރިން ދެމުންދާ ޑްރޯން އަދި މިސައިލް ހަމަލާތައް ފަހަކަށް އައިސް ވަނީ އިތުރުވެފަ އެވެ. މި ހަމަލާތަކުގެ ސަބަބުން ދުނިޔޭގެ ބާޒާރުގައި ތެލުގެ އަގަށް ބޮޑެތި ބަދަލުތަކެއް އައުމުގެ ބިރު އޮތްކަން މުހައްލިލުން ފާހަގަކުރެ އެވެ.

ފަރަންސޭސިވިލާތުން މި ފޮނުވާ އަސްކަރީ އެހީތެރިކަމުގެ ތެރޭގައި، ވައިގެ މަގުން ދޭ ހަމަލާތަކުން ދިފާއުވުމަށް ބޭނުންކުރާ ޒަމާނީ ރޭޑާ ނިޒާމުތަކާއި، އެހެނިހެން ދިފާއީ ވަސީލަތްތައް ހިމެނޭނެ ކަމަށް ރިޕޯޓުތައް ބުނެ އެވެ. މިއީ މެދުއިރުމަތީގެ ހަމަޖެހުން ގާއިމުކުރުމަށް ބައިނަލްއަގުވާމީ ފެންވަރުގައި ކުރެވެމުންދާ މަސައްކަތުގެ ބައެއްގެ ގޮތުގައި ފަރަންސޭސި ސަރުކާރުން ސިފަކުރެ އެވެ.

މައްކާ ޖޮއިންޓް ޑިފެންސް އެގްރީމަންޓުގެ ދަށުން ސައުދީ އަރަބިއްޔާއަށް އެހީތެރިކަން ފޯރުކޮށްދެވޭނެ ގޮތްތަކާ ބެހޭގޮތުން މަޝްވަރާކުރުމަށްޓަކައި، ސައުދީ އަރަބިއްޔާ އާއި ތުރުކީވިލާތް އަދި ޕާކިސްތާނުގެ އަސްކަރީ އިސްވެރިންގެ ކުއްލި ބައްދަލުވުމެއް ބޭއްވުމަށް އެ ގައުމުތަކުން ނިންމައިފި އެވެ.

މި ތިން ގައުމުގެ މެދުގައި ދިފާއީ ގޮތުން ގުޅުން ބަދަހިކުރުމަށާއި، ކުރިމަތިވެދާނެ ހަމަލާތަކުން ދިފާއުވުމަށް ގުޅިގެން މަސައްކަތްކުރުމަށްޓަކައި "މައްކާ ޖޮއިންޓް ޑިފެންސް އެގްރީމަންޓް" ގައި ސޮއިކޮށްފައިވަނީ މިއަހަރުގެ އޮގަސްޓް މަހުގެ 7 ވަނަ ދުވަހު އެވެ.

މި އެއްބަސްވުމުގައިވާ ގޮތުން، އެއްބަސްވުމުގައި ބައިވެރިވާ ތިން ގައުމުގެ ތެރެއިން ކޮންމެ ގައުމަކަށް ދެވޭ ހަމަލާއަކީ ވެސް، ތިން ގައުމަށް ގުޅިގެން ދެވޭ ހަމަލާއެއްގެ ގޮތުގައި ބެލެވޭނެ އެވެ.

މި އެއްބަސްވުމަށް އަމަލުކުރުމަށްޓަކައި ބޭނުންވާ އުސޫލުތައް އެކުލަވާލުމުގެ މަސައްކަތް މިހާރު ވަނީ ފަށާފަ އެވެ. އެގޮތުން، އޮގަސްޓް މަހުގެ 31 ވަނަ ދުވަހު އިސްތަންބޫލްގައި ބޭއްވި "ސްޓްރެޓީޖިކް ޕޮލިޓިކަލް އެންޑް ޑިފެންސް ކޮމިޓީ" ގެ ފުރަތަމަ ބައްދަލުވުމުގައި ތިން ގައުމުގެ ފޮރިން މިނިސްޓަރުންނާއި، ޑިފެންސް މިނިސްޓަރުންގެ އިތުރުން އަސްކަރީ އިސްވެރިން ވަނީ ބައިވެރިވެފަ އެވެ. މި ބައްދަލުވުމުގައި ސައުދީ އަރަބިއްޔާގައި މިކަމަށް ޚާއްސަ ސެކްރެޓޭރިއަޓެއް ގާއިމުކުރުމަށާއި އަސްކަރީ ގުޅުން އިތުރަށް ވަރުގަދަކުރުމަށް ވަނީ އެއްބަސްވެފަ އެވެ.

މި ތިން ގައުމުން ޑިޕްލޮމެޓިކް ފެންވަރުގައި މިފަދަ ފިޔަވަޅުތަކެއް އަޅަން ފަށާފައި މިވަނީ، ޔަމަނުން ސައުދީ އަރަބިއްޔާއަށް އަމާޒުކޮށް ދޭ ހަމަލާތައް އަލުން އިތުރުވެފައިވާ ދަނޑިވަޅެއްގަ އެވެ.

މިދިޔަ ބުރާސްފަތި ދުވަހު ޔަމަނުން ސައުދީގެ ތާއިފް އަދި ޔަންބޫއަށް އަމާޒުކޮށް ފޮނުވާލި ބެލިސްޓިކް ހަ މިސައިލެއް، އެ ގައުމުގެ އެއަރ ޑިފެންސް ސިސްޓަމްތަކުން ވައްޓާލާފައިވާ ކަމަށް ސައުދީ ސަރުކާރުން ވަނީ ހާމަކޮށްފަ އެވެ.

ސައުދީ އަރަބިއްޔާގެ މައްކާގައި 2026 ވަނަ އަހަރުގެ އޮގަސްޓް މަހުގެ 7 ވަނަ ދުވަހު ބޭއްވި ރަސްމިއްޔާތެއްގައި، ތުރުކީވިލާތުގެ ރައީސް ތައްޔިބު އުރުދުޛާން އާއި، ސައުދީ އަރަބިއްޔާގެ ވަލީއަހުދު މުހައްމަދު ބިން ސަލްމާން އަދި ޕާކިސްތާނުގެ ބޮޑުވަޒީރު ޝެހްބާޒް ޝަރީފް ގުޅިފައިވާ ދިފާއީ އެއްބަސްވުމުގެ ސޮއިކުރެއްވުމަށްފަހު ފޮޓޯއަކަށް ހުއްޓިވަޑައިގެން

ޔަންބޫގައި ހުންނަ އަރަމްކޯ ތެޔޮ ކާރުޚާނާތަކަށާއި ވެރިރަށް ރިޔާޟްގައި ހުރި ނާޒުކު މުހިންމު ސަރަހައްދަކަށް ބެލިސްޓިކް މިސައިލާއި ކްރޫޒް މިސައިލް އަދި ޑްރޯން ބޭނުންކޮށްގެން ހަމަލާދީފައިވާނެ ކަމަށް ހޫޘީން އިއުލާނުކޮށްފި އެވެ. ހޫޘީން ހާމަކުރި ގޮތުގައި، އެ ޖަމާއަތުން ވަނީ ސައުދީ އަރަބިއްޔާގެ އެކި ސަރަހައްދުތަކުގައި ހުރި އަސްކަރީ މަރުކަޒުތަކަށް އަމާޒުކޮށް ހަމަލާތަކެއް ދީފަ އެވެ. މިގޮތުން ޖީޒާންގެ އަލް-ތުވާލް ސަރަހައްދަށާއި، އަލް-ދަޣާރީރު ކޭމްޕުގައި ހުރި މިސައިލް އުދުއްސާ މަރުކަޒުތަކަށް ވެސް ހަމަލާދީފައިވާ ކަމަށް އެ ޖަމާއަތުން ބުނެ އެވެ.

އިރާނުގެ ދެކުނުގެ ސަރަހައްދުތަކުން ހުރްމުޒް ކަނޑުއޮޅިން ދަތުރުކުރަމުންދާ އުޅަނދުފަހަރަށް އަމާޒުކޮށް، އެ ގައުމުން ކްރޫޒް މިސައިލާއި ޑްރޯން ހަމަލާތަކެއް ދެންމެ ދީފި އެވެ. ފުރަތަމަ ލިބެމުންދާ ރިޕޯޓްތަކަށް ބަލާއިރު، މި ހަމަލާތަކާ ގުޅިގެން ހުރްމުޒް ކަނޑުއޮޅި ސަރަހައްދުން ބާރުގަދަ ތިން ގޮވުމެއްގެ އަޑު ވަނީ އިވިފަ އެވެ.

މި ހަމަލާތައް އަމާޒުކޮށްފައިވަނީ އެމެރިކާގެ އެހީތެރިކަމާއެކު އޮމާންގެ ދެކުނު މަގުން މިވަގުތު ދަތުރުކުރަމުންދާ، އެމެރިކާގެ އަސްކަރީ ހިމާޔަތް ލިބިފައިވާ ތެޔޮ ޓޭންކަރުތަކަކަށް ކަމަށް ބެލެވޭކަމަށް ޚަބަރުތަކުގައި ވަނީ ރިޕޯޓު ކުރެވިފަ އެވެ.

ސަލާމަތާއި ރައްކާތެރިކަން ކަށަވަރުކުރުމަށްޓަކައި، ބައިނަލްއަގުވާމީ ގާނޫނުތަކުގެ މައްޗަށް ބިނާވެފައިވާ "ޓޫ-ސްޓޭޓް ސޮލިއުޝަން" ނުވަތަ ދެ ދައުލަތް އުފެއްދުމުގެ ހައްލު ތަންފީޒުކުރުމަށް ފަލަސްތީނުގެ ރައީސް މަހްމޫދު އައްބާސް ބައިނަލްއަގުވާމީ މުޖުތަމައަށް ގޮވާލައްވައިފި އެވެ.

ވީޑިއޯ މެދުވެރިކޮށް އދ. ގެ އާންމު މަޖިލީހަށް ދެއްވި ތަގުރީރުގައި ރައީސް އައްބާސް ވިދާޅުވީ، މި ހައްލު ތަންފީޒުކުރުމުގެ މަސައްކަތް ފެށެނީ ފަލަސްތީނުގެ ދައުލަތް އުފައްދަންޖެހޭ ބިންތައް ހިމާޔަތްކުރުމާއި، އެ ބިމުގައި ދިރިއުޅޭ ރައްޔިތުން ރައްކާތެރިކުރުމުން ކަމަށެވެ. އަދި އިސްރާއީލުގެ ދައުލަތާ އެކު ފަލަސްތީނުގެ ރައްޔިތުންނަށް ދިރިއުޅެވިދާނެ ކަމަށް ވެސް އެމަނިކުފާނު އިތުރަށް ވިދާޅުވި އެވެ.

ކުރިއަށް އޮތް ކޮންމެ އިންތިގާލީ މަރުހަލާއެއްގެ ނަތީޖާއަކަށް ވާންޖެހޭނީ، ޣައްޒާ އާއި އިސްރާއީލުން ހިފާފައިވާ ހުޅަނގު އައްސޭރި އެއްކޮށްލައި، އެއް ގާނޫނީ ހަތިޔާރު އެޅި ބާރެއްގެ ދަށުން ހިނގާ ފަލަސްތީނުގެ އެއް ދައުލަތެއްގެ ގޮތުގައި ގާއިމުވުން ކަމަށް އައްބާސް ވިދާޅުވި އެވެ.

ފަލަސްތީނުގެ ދާޚިލީ ކަންކަމާ ގުޅޭގޮތުން ވާހަކަފުޅު ދައްކަވަމުން ރައީސް އައްބާސް ވިދާޅުވީ، އިންތިޚާބު ބޭއްވޭނެކަމާމެދު ޝައްކުތަކެއް ހުރި ނަމަވެސް، އަންނަ ނޮވެމްބަރު މަހުގެ 28 ވަނަ ދުވަހު ގާނޫނު ހަދާ މަޖިލީހުގެ އިންތިޚާބު ބޭއްވުމަށް ފަލަސްތީނުގެ ސަރުކާރުން ނިންމާފައިވާ ކަމަށެވެ. މިއީ ފާއިތުވި 20 އަހަރު ދުވަހުގެ ތެރޭގައި ބާއްވާ މިފަދަ ފުރަތަމަ އިންތިޚާބެވެ.

2005 އާއި 2006 ވަނަ އަހަރު ހަމާސް ޖަމާއަތުން ޣައްޒާގެ ކޮންޓްރޯލް ނެގި ފަހުން، ފަލަސްތީނުގައި ގާނޫނު ހަދާ މަޖިލީހުގެ ނުވަތަ ރިޔާސީ އިންތިޚާބެއް ބާއްވާފައެއް ނުވެ އެވެ.

އައްބާސް ވިދާޅުވީ ރައްޔިތުންނާއި ބައިނަލްއަގުވާމީ މުޖުތަމައަށް ވީ ވައުދާ އެއްގޮތަށް ފަލަސްތީނުން ގައުމީ އިސްލާހީ ޕްރޮގްރާމް  ފުރިހަމަކޮށްފައިވާ ކަމަށެވެ. 

ފަލަސްތީނުގެ ވަފުދަކަށް އެމެރިކާއިން ވިސާ ދިނުމަށް އިންކާރުކުރުމާ ގުޅިގެން، ޖެހިޖެހިގެން ދެވަނަ އަހަރަށް އދ. ގެ އާންމު މަޖިލީހުގައި އައްބާސް ތަގުރީރު ކުރެއްވީ ރާމަﷲ ގައި ހުންނަ އެމަނިކުފާނުގެ އޮފީހުގައި ކުރިން ރެކޯޑުކޮށްފައިވާ ވީޑިއޯ މެދުވެރިކޮށެވެ. މި ތަގުރީރު އާންމު މަޖިލީހުގައި އިއްވާފައިވަނީ ބުރާސްފަތި ދުވަހު އެވެ.

ރައީސް އައްބާސް ވިދާޅުވީ ފަލަސްތީނުގެ ރައްޔިތުން މިހާރު ތަހައްމަލު ކުރަމުންދަނީ އެ ގައުމުގެ ތާރީޚުގައި ދިމާވި އެންމެ ނުރައްކާތެރި ދުވަސްތައް ކަމަށެވެ. މިގޮތުން މީހުން މެރުމާއި، ތަންތަން ސުންނާފަތިކުރުމާއި، ބަނޑަށްޖެއްސުމާއި، ވަޒަނުން ބޭރުކޮށްލުމަށް ކުރާ މަސައްކަތްތަކުގެ އިތުރުން، މީގެ ކުރިން ދުވަހަކު ވެސް ފެނިފައިނުވާ ފަދަ އިންސާނީ ކާރިސާއެއް އުފަންކުރުވި ނަސްލު ނައްތާލުމުގެ ހަނގުރާމައެއް އިސްރާއީލުން ކުރަމުންދާކަން އެމަނިކުފާނު ފާހަގަކުރެއްވި އެވެ.

ރައީސް އައްބާސް ވިދާޅުވީ، އިސްރާއީލުން ގެންގުޅޭ ހަރުކަށި ސިޔާސަތުތަކުގެ ސަބަބުން ފަލަސްތީނުގެ ރައްޔިތުންގެ ދިރިތިބުމަށް ބޮޑެތި ނުރައްކާތަކެއް ކުރިމަތިވެފައިވާ ކަމަށެވެ. އަދި އިސްރާއީލުން ހިންގަމުންދާ ލާއިންސާނީ އަމަލުތަކަކީ ފަލަސްތީނުގެ ވަޒަނުން އެ ގައުމުގެ ރައްޔިތުން ބޭރުކޮށްލުމަށް ހިންގާ ނުބައި ރޭވުމެއްގެ ބައެއްގެ ގޮތުގައި އެމަނިކުފާނު ސިފަކުރެއްވި އެވެ.

މީގެ އިތުރުން، ބައިނަލްއަގުވާމީ މުޖުތަމައުން އިސްރާއީލުގެ އަމަލުތައް ހުއްޓުވުމަށް އެދެވޭ ފިޔަވަޅުތަކެއް އަޅަމުން ނުދާކަން ފާހަގަކުރައްވައި، އައްބާސް ވަނީ އެކަމާ މެދު ކަންބޮޑުވުން ފާޅުކުރައްވާފަ އެވެ. އެމަނިކުފާނު ވިދާޅުވީ ފަލަސްތީނުގެ ބިންތަކަށް ވެރިވެގަނެ، އިސްރާއީލުން ހިންގަމުންދާ އިސްތިއުމާރީ ސިޔާސަތުތަކުގެ ސަބަބުން ސަރަހައްދީ ސުލްހައަށް އޮތް ފުރުސަތުތައް ހަނިވަމުންދާ ކަމަށެވެ.

ރައީސް އައްބާސްގެ ތަގުރީރުގައި، ފަލަސްތީނަށް މިނިވަން ދައުލަތެއް ކަށަވަރުކޮށްދިނުމަށާއި، އިސްރާއީލުން ހިންގާ ޖަރީމާތަކަށް ޒިންމާދާރުކުރުވުމަށް ބައިނަލްއަގުވާމީ މުޖުތަމައަށް ވަނީ ގޮވާލައްވާފަ އެވެ.

އދ. ގެ އާންމު މަޖިލީހުގައި އައްބާސް ތަގުރީރު ކުރެއްވީ ރާމަﷲ ގައި ހުންނަ އެމަނިކުފާނުގެ އޮފީހުގައި ކުރިން ރެކޯޑުކޮށްފައިވާ ވީޑިއޯ މެދުވެރިކޮށް

އދ. ގެ އާންމު މަޖިލީހުގައި ތަގުރީރުކުރައްވަމުން ނަތަންޔާހޫ ވިދާޅުވީ، ޓްރަމްޕް ދައްކަވައިދެއްވި ހިތްވަރުގަދަ ލީޑަރޝިޕަށްޓަކައި އޭނާ އަށް ޝުކުރު އަދާކުރައްވާ ކަމަށެވެ. އަދި އެމެރިކާ އާއި އިސްރާއީލުގެ އިތުރުން މުޅި ދުނިޔެއަށް ކުރިމަތިވެފައި އޮތް ބޮޑު ނުރައްކަލަކާ ޓްރަމްޕް ވަނީ ވަރަށް ކެރިގެން ކުރިމަތިލައްވާފައި ކަމަށް ވެސް އޭނާ ވިދާޅުވި އެވެ.

އެގޮތުން އެމެރިކާއާ ގުޅިގެން އިސްރާއީލުން އީރާނުގެ އަސްކަރިއްޔާ "ފުނޑުފުނޑުކޮށްލާފައިވާ" ކަމަށާއި އީރާނުގެ އެއްގަމު ސިފައިންނާއި ކަނޑުގެ ސިފައިންނާއި ވައިގެ ސިފައިންގެ އިތުރުން އެ ގައުމުގެ ނިއުކްލިއަރ މަރުކަޒުތައް ސުންނާފަތިކޮށްލާފައިވާ ކަމަށް ވިދާޅުވި އެވެ.

މީގެ އިތުރުން ނަތަންޔާހޫ ވިދާޅުވީ، ހަމާސް، ހިޒްބުالله، ހޫޘީން، އީރާން، އަދި އިރާޤާއި ސީރިއާގެ އިތުރުން ފަލަސްތީނުގެ ހަނގުރާމަވެރި ޖަމާއަތްތަކާ ދެކޮޅަށް އިސްރާއީލުން މިހާރު ހަތް ދިމާލަކުން ހަނގުރާމަ ކުރަމުންދާ ކަމަށެވެ.

މީގެއިތުރުން ނަތަންޔާހޫ ވިދާޅުވީ، އީރާނުން އެޓަމިކް ބޮމާއި ނިއުކްލިއަރ ހަތިޔާރު އުފެއްދުން ހުއްޓުވުމަށް އޭނާ އަޒުމް ކަނޑައަޅުއްވާފައިވާ ކަމަށެވެ. އަދި އީރާނުން މަސައްކަތް ކުރަނީ އިސްރާއީލު ސުންނާފަތިކޮށްލުމަށާއި މުޅި ދުނިޔެއަށް ނުރައްކާވާނެ ފަދަ ނިއުކްލިއަރ ހަތިޔާރު އުފެއްދުމަށް ކަމަށް ވެސް ނަތަންޔާހޫ ތުހުމަތު ކުރެއްވި އެވެ.

ނަމަވެސް އީރާނުން އެ ގައުމުގެ ނިއުކްލިއަރ ޕްރޮގްރާމާ ގުޅޭގޮތުން ތަކުރާރުކޮށް ބުނަމުންދަނީ، އެ ގައުމުން ނިއުކްލިއަރ ހަތިޔާރު އުފައްދާފައި ނުވާނެ ކަމަށެވެ. މީގެ އިތުރުން ބައިނަލްއަގުވާމީ ނިއުކްލިއަރ ހަކަތައާ ބެހޭ އިދާރާ (އައިއޭއީއޭ) އިން ވެސް ވަނީ އީރާނުން ނިއުކްލިއަރ ހަތިޔާރު އުފައްދާކަމުގެ އެއްވެސް ހެއްކެއް ފެންނަން ނެތް ކަމަށް ހާމަކޮށްފަ އެވެ.

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އދ. ގެ އާންމު މަޖިލީހުގައި ތަގުރީރުކުރައްވަނީ

އދ. ގެ އާންމު މަޖިލީހުގައި ތަގުރީރުކުރެއްވުމަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ސްޓޭޖަށް އަރައިވަޑައިގަތުމާއެކު، ދުނިޔޭގެ އެތައް ޤައުމެއް ތަމްސީލުކުރާ ގިނަ އަދަދެއްގެ ވަފުދުތަކުން މަޖިލިސް ކުރާ މާލަން ދޫކޮށް ނުކުމެއްޖެ އެވެ. 

 އީރާނުގެ ފްލައިޓްތައް ޖެއްސުމުގެ ހުއްދަދޭ ގައުމުތަކަށް އަދަބު ދޭނެ ކަމުގެ އިންޒާރު އެމެރިކާއިން ދީފައިވާއިރު، ޗައިނާއިން މިކަމަށް އަމަލުކުރާނެތޯ  އޭއެފްޕީގެ ރިޕޯޓަރަކު ވަނީ  ޗައިނާގެ ފޮރިން މިނިސްޓްރީގެ ތަރުޖަމާނަށް ސުވާލެއް ދަންނަވާފަ އެވެ. 

މި ސުވާލުގެ ޖަވާބުގައި އޭނާ ވިދާޅުވީ، މިކަމުގައި ޗައިނާގެ ސިޔާސަތަކީ ބަދަލުވުމެއް ނެތް ސާފު ސިޔާސަތެއް ކަމަށާއި ބައިނަލްއަގުވާމީ ގާނޫނުތަކުގެ އެއްވެސް އަސާސެއް ނެތް، އަދި އދ. ގެ ސަލާމަތީ މަޖިލީހުގެ ހުއްދައެއް ނެތި، ގައުމަކުން އަމިއްލައަށް އިސްނަގައިގެން ޣައިރު ގާނޫނީ ގޮތެއްގައި އަޅާ ދަތިކުރުމުގެ ފިޔަވަޅުތަކާ ދެކޮޅަށް ޗައިނާ އިން ސާބިތުކަމާއެކު ތިބޭނެކަމުގެ ޔަގީންކަން އަރުވާ ކަމަށެވެ.

އެމެރިކާ އާއި އީރާނުގެ މަޝްވަރާވެރިން ހަނގުރާމަ ހުއްޓާލުމަށްޓަކައި މަރުހަލާތަކަކަށް ބަހާލައިގެން ކުރިއަށްދާނެ މަގުތަކެއް ހޯދަމުންދާ ކަމަށް ބުނެ ރޮއިޓާސްއިން ފެތުރި ރިޕޯޓު އީރާނުން ސީދާގޮތެއްގައި ދޮގުކޮށްފި އެވެ.

އީރާނުގެ ދައުލަތުގެ މީޑިއާގެ ނޫސްވެރިޔާ މުހައްމަދު ގާދިރީއާ ހަވާލާދީ ބުނެފައިވަނީ، އެ ރިޕޯޓަކީ "ދޮގު" ރިޕޯޓެއް ކަމަށާއި، އޭގެ ބޭނުމަކީ "ތެލުގެ އަގު ކޮންޓްރޯލް ކުރުން" ކަމަށެވެ. އަދި މިވަގުތު އެއްވެސް ކަހަލަ މަޝްވަރާއެއް ކުރިއަށް ނުދާ ކަމަށް ވެސް އޭނާ ބުނެފައިވެ އެވެ.

ގާދިރީ އިތުރަށް ހާމަކުރި ގޮތުގައި މިކަމުގައި އީރާނުން ގެންގުޅޭ ސިޔާސަތަށް އެއްވެސް ބަދަލެއް ނާދެ އެވެ. އަދި އީރާނުގެ ފުރިހަމަ ކޮންޓްރޯލްގެ ދަށުން ހުރްމުޒް ކަނޑުއޮޅި ހުޅުވާލުމަށްޓަކައި، އެމެރިކާއިން ކަނޑައެޅިފައިވާ ޝަރުތުތައް ކޮންމެ ފިޔަވަޅަކުން ފިޔަވަޅަކަށް ފުރިހަމަކުރަންޖެހޭނެ ކަމަށް ވެސް އޭނާ ބުންޏެވެ.

ހުރްމުޒް ކަނޑުއޮޅި