މެދުއިރުމަތީ ހަނގުރާމަ

ހުރްމުޒް ކަނޑުއޮޅިން ދަތުރުކުރާ އުޅަނދުފަހަރަށް ކޮންމެ ދުވަހަކު ވެސް ހަމަލާދެމުންދާ ކަމަށާއި، ނަމަވެސް އެމެރިކާއިން އެކަމަށް އެއްވެސް ރައްދެއް ނުދޭ ކަމަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރްޖީސީ) އިން ބުނެފި އެވެ. 

އިއާރްޖީސީގެ ތަރުޖަމާނު ހުސައިން މުހިއްބީ ވިދާޅުވީ، ހުރްމުޒް ކަނޑުއޮޅީގައި ކޮންމެ ދުވަހަކު ވެސް "އަސްކަރީ ކުރިމަތިލުންތަކެއް" ހިނގަމުންދާ ކަމަށެވެ.

މުހިއްބީ ވިދާޅުވީ، އެ ސަރަހައްދުން ދަތުރުކުރާ ކުދި އުޅަނދުފަހަރަށް ހަމަލާދީ، އެ ތަކެތި ހުރަސްކުރުން ހުއްޓުވާތާ މިހާރު ގިނަ ދުވަސްތަކެއް ވެފައިވާ ކަމަށެވެ. އަދި މިގޮތަށް އީރާނުން އަމަލުކުރަމުންދާއިރު ވެސް، އެމެރިކާއިން އެއްވެސް ރައްދެއް ނުދޭކަން އޭނާ ފާހަގަކުރެއްވި އެވެ.

އިނގިރޭސިވިލާތުގެ މެރިޓައިމް ޓްރޭޑް އޮޕަރޭޝަންސް އެޖެންސީން ބުނި ގޮތުގައި، ދުނިޔޭގެ ވިޔަފާރީގައި މުހިންމު ދައުރެއް އަދާކުރާ މި ކަނޑުގެ ސަރަހައްދުން ދަތުރުކުރި މަދުވެގެން ތިން އުޅަނދަކަށް އަންގާރަ ދުވަހު ވަނީ ހަމަލާދީފަ އެވެ.

ހުރްމުޒް ކަނޑުއޮޅިން ދަތުރުކުރަމުންދިޔަ އުޅަނދަކާ އީރާނުގެ އަސްކަރިއްޔާގެ ސްޕީޑްބޯޓެއް ކައިރިކުރަނީ

އީރާނު ސަރުކާރުގެ ތަރުޖަމާނު ފާތިމާ މުހާޖިރާނީ ވިދާޅުވީ، މިހާރު ހިނގަމުންދާ ހަނގުރާމައިގެ ސަބަބުން ކުރިމަތިވެފައިވާ "މަރުތަޅު ނައްޓުވާލުމަށް" ކުރަމުންދާ ހާރިޖީ މަސައްކަތްތަކުގެ ތެރެއިން، އެމެރިކާގެ ހުށަހެޅުމެއް އެ ގައުމަށް މިހާރު ލިބިފައިވާ ކަމަށެވެ.

އެކްސްގައި ކުރެއްވި ޕޯސްޓެއްގައި މުހާޖިރާނީ ވިދާޅުވީ، ބުދަ ދުވަހު ބޭއްވި ކެބިނެޓް ބައްދަލުވުމެއްގައި، އެމެރިކާގެ ފަރާތުން އެ ހުށަހެޅުން ލިބިފައިވާކަން އީރާނުގެ ހާރިޖީ ވަޒީރު އައްބާސް އަރާގްޗީ ކަށަވަރުކޮށްދެއްވާފައިވާ ކަމަށެވެ. ނަމަވެސް، އެމެރިކާގެ ޖަވާބާ ގުޅޭ އިތުރު ތަފްސީލެއް އޭނާ ހާމަކުރައްވާފައެއް ނުވެ އެވެ.

މި ކެބިނެޓް ބައްދަލުވުމުގައި އަރާގްޗީ ވަނީ ވިލާތުގެ ގައުމުތަކާއި ގަލްފުގެ ގައުމުތަކުގެ ލީޑަރުންނާއެކު ބޭއްވި ބައްދަލުވުންތަކުގެ މައުލޫމާތާއި، ހުރްމުޒް ކަނޑުއޮޅި އަލުން ހުޅުވާލުމަށްޓަކައި އީރާނުން އެމެރިކާއަށް ހުށަހެޅި ޝަރުތުތަކުގެ ތަފްސީލުތައް ހިމެނެ އެވެ.

އީރާން ސަރުކާރުގެ ތަރުޖަމާނު ފާތިމާ މުހާޖިރާނީ

ހަނގުރާމައިގެ ސަބަބުން ސުންނާފަތިވެފައިވާ ޣައްޒާގެ އެކި ސަރަހައްދުތަކަށް އިސްރާއީލު ސިފައިން ދެމުންދާ ހަމަލާތަކުގައި، "ސުލްހައިގެ އެއްބަސްވުމެއް" އޮތް ކަމަށް ބުނި ނަމަވެސް، ފަލަސްތީނުގެ 6 މީހަކު ޒަޚަމްކޮށްލައިފި އެވެ.

ޣައްޒާގެ ދެކުނުގައި ހުރި ހިޔާވަހިކަން ހޯދާ މަރުކަޒަކަށް އިސްރާއީލުގެ ޑްރޯން ބޭނުންކޮށްގެން ދިން ހަމަލާއެއްގައި ހަތަރު މީހަކު ވަނީ ޒަޚަމްވެފަ އެވެ. މީގެ ތެރޭގައި ދެ ކުޑަކުދިން ހިމެނޭއިރު، އެކަކުގެ ހާލު ސީރިއަސް ކަމަށް ރިޕޯޓުތައް ބުނެ އެވެ.

މީގެ އިތުރުން، ޣައްޒާގެ މެދުތެރޭގައި ހިމެނޭ ދީރުލް ބަލަހްގެ އިރުދެކުނު ސަރަހައްދުގައި އިސްރާއީލު ސިފައިން ދިން ހަމަލާތަކެއްގައި ފަލަސްތީނުގެ އިތުރު ދެ މީހަކު ވަނީ ވަރަށް ބޮޑަށް ޒަޚަމްވެފަ އެވެ.

އިސްރާއީލުން ހަތިޔާރު ހަރުކޮށްގެން ބޭނުންކުރާ "ކުއަޑްކޮޕްޓަރ" މަރުކާގެ ޑްރޯނެއް

އައިއެސްއާ ދެކޮޅަށް ކުރިއަށްގެންދާ "އޮޕަރޭޝަން އިންހެރެންޓް ރިޒޯލްވް" ގެ މައި މަރުކަޒު އުރުދުންއަށް ބަދަލުކޮށްފައިވާ ކަމަށް އެމެރިކާގެ އަސްކަރިއްޔާގެ ސެންޓްރަލް ކޮމާންޑް (ސެންޓްކޮމް) އިން ބުނެފި އެވެ. ސެންޓްކޮމް އިން މިކަން ހާމަކުރީ އިރާޤުގައި ކުރިއަށްދިޔަ މި މިޝަން އެ ގައުމުން ބޭލުމަށްފަހު، އުރުދުންގައި ތިބެގެން މި އޮޕަރޭޝަންގެ މަސައްކަތްތައް މެދުނުކެނޑި ކުރިއަށްދާނެކަން ކަށަވަރުކޮށްދެމުންނެވެ.

ސެންޓްކޮމްގެ ކޮމާންޑަރު ބްރެޑް ކޫޕާ ވިދާޅުވީ، އިރާޤުގެ ސަލާމަތާއި ރައްކާތެރިކަމުގެ ފުރިހަމަ ޒިންމާ އެ ގައުމުގެ ސަރުކާރާއި ރައްޔިތުންނާ ހަވާލުކުރުމަށްފަހު އެމެރިކާ ސިފައިން އެ ޤައުމުން ފޭބި ނަމަވެސް، އެ ސަރަހައްދުގެ އެކި ގައުމުތަކުގައި ގާއިމުވެތިބި އެމެރިކާ އަދި އިއްތިހާދުގެ ފައުޖުތައް އޮތީ ތައްޔާރީ ހާލަތެއްގައި ކަމަށެވެ. އަދި އައިއެސް ޖަމާއަތުގެ ފަރާތުން ކުރިމަތިވެދާނެ ކޮންމެ ނުރައްކަލަކަށް ރައްދުދިނުމަށް އެމެރިކާގެ ފައުޖުތަކުން އަބަދު ވެސް ތައްޔާރަށް ތިބޭނެ ކަމަށް އޭނާ ވިދާޅުވި އެވެ.

އިރާޤުގެ ނަޖަފްގައި އެމެރިކާގެ އަސްކަރީ އުޅަނދެއް ފޯރިމަރަނީ-27 އޮގަސްޓް 2004

ޔޫކޭ މެރިޓައިމް ޓްރޭޑް އޮޕަރޭޝަންސް ޔޫކޭއެމްޓީއޯ އިން ބުނީ، ހުރްމުޒް ކަނޑުއޮޅިން ދަތުރުކުރި ބައެއް އުޅަނދުތަކަށް ހަމަލާތަކެއް ދީފައިވާ ކަމުގެ ރިޕޯޓްތަކެއް، ކޮންމެވެސް ވަރެއްގެ މެދުކެނޑުމަކަށްފަހު އެ އެޖެންސީއަށް ލިބިފައިވާ ކަމަށެވެ.

އަންގާރަ ދުވަހު އެ ސަރަހައްދުން ދަތުރުކުރި އުޅަނދުތަކަށް ދިން ހަމަލާތަކާ ގުޅޭ ތިން ރިޕޯޓެއް ޔޫކޭއެމްޓީއޯ އިން ވަނީ ވަކިވަކިން ނެރެފަ އެވެ. މީގެ ތެރޭގައި ހިމެނެނީ ކޮމްޕްރެސްޑް ނެޗުރަލް ގޭސް (އެލްއެންޖީ) އުފުލާ ޓޭންކަރަކާއި ސާފުނުކުރާ ތެޔޮ އުފުލާ ޓޭންކަރެކެވެ. އެ އެޖެންސީން ބުނި ގޮތުގައި މި އުޅަނދުތަކަށް ހަމަލާދީފައިވަނީ ކޮން އެއްޗެއްކަން ނޭނގޭ އާލާތްތަކަކުން ކަމަށާއި، ކަމާބެހޭ ފަރާތްތަކުން މިހާރު ދަނީ މި މައްސަލަ އިތުރަށް ތަހުގީގު ކުރަމުންދާ ކަމަށެވެ.

އެމެރިކާ އިން އީރާނާ ދެކޮޅަށް ކުރަމުންދާ ހަނގުރާމައިގައި އެ ގައުމުގެ ހާލަތު ވަރަށް ބޮޑަށް ގޯސްވެފައިވާ ކަމަށާއި ނަމަވެސް އީރާނުން މިހާރުން މިހާރަށް "އަމާންދީފާނެ" ކަމާމެދު ޝައްކު އުފެދޭ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

އަންގާރަ ދުވަހު ޓްރަމްޕް ވިދާޅުވީ، އެމެރިކާއިން އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން އެ ގައުމުގެ އިގުތިސާދުގެ މައިނާރު ކަމަށްވާ ތެޔޮ އެކްސްޕޯޓް ކުރުން ހުއްޓުމަކަށް އައިސްފައިވާ ކަމަށާއި މި ހަނގުރާމައިގެ ސަބަބުން ކުރިމަތިވެފައިވާ އިގުތިސާދީ ދަތިތަކުގެ ސަބަބުން އީރާނުގެ ރައްޔިތުންގެ ދިރިއުޅުމަށް ބޮޑެތި ގޮންޖެހުންތަކެއް ކުރިމަތިވެފައިވާ ކަމަށެވެ.

މި ހަނގުރާމައާ ގުޅިގެން ދުނިޔޭގެ ބާޒާރުގައި ތެލުގެ އަގު އުފުލެމުންދާއިރު، މިއީ އަންނަ ނޮވެމްބަރު މަހު ބާއްވާ އެމެރިކާގެ މިޑްޓާމް އިންތިޚާބާ ކުރިމަތިލާއިރު، ޓްރަމްޕްގެ ރިޕަބްލިކަން ޕާޓީއަށް ކުރިމަތިވެފައިވާ ބޮޑު މައްސަލައެކެވެ.

އެމެރިކާގެ ފިއްތުންތަކަށް އީރާނުން ދުވަހަކު ވެސް ކިޔަމަން ނުވާނެ ކަމަށް އެ ގައުމުގެ ރައީސް ޕެޒެޝްކިއާން ގެންދަވަނީ ތަކުރާރުކޮށް ވިދާޅުވަމުންނެވެ.

އީރާނުން މިހާރުން މިހާރަށް އަމާން ދީފާނެ ކަމާމެދު ޝައްކު އުފެދޭކަމަށް ޓްރަމްޕް ވިދާޅުވެއްޖެ

އީރާނާއެކު އޮތް ކުރަމުންދާ ހަނގުރާމަ "ވަރަށް އަވަހަށް" ނިމުމަކަށް އަންނާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވުމާ ގުޅިގެން، ދުނިޔޭގެ ބާޒާރުގައި ތެލުގެ އަގުތައް ވަރަށް ބޮޑަށް ދަށަށް ހިނގައްޖެ އެވެ.

ޓްރަމްޕް ވިދާޅުވެފައިވަނީ، އީރާނަށް އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން، އެ ޤައުމުގެ ހާލަތު މިހާރު އޮތީ ވަރަށް ބޮޑަށް ގޯސްވެފައި ކަމަށެވެ. އަދި އީރާނާއެކު ކުރަމުންދާ ހަނގުރާމަ ވަރަށް އަވަހަށް ނިމުމަކަށް އަންނާނެ ކަމަށާއި އީރާނަށް ނިއުކްލިއަރ ހަތިޔާރު ނުލިބޭނެ ކަމަށް އަދި، އެމެރިކާއިން އީރާނާ ދެކޮޅަށް ފިޔަވަޅުތައް އެޅުމުގެ ކުރިން ތެލުގެ އަގުތައް ހުރި މިންވަރަށް، ކުރިއަށް އޮތް ތަނުގައި އަގުތައް ދަށަށް ދާނެ ކަމަށް ވެސް ޓްރަމްޕް ވިދާޅުވެފައިވެ އެވެ.

އެމެރިކާގެ ރައީސް ޑޮނަލްޑް ޓްރަމްޕް

ކްލެޕަރގެ ތަފާސްހިސާބުތަކުން ދައްކާ ގޮތުގައި، ހުރްމުޒް ކަނޑުއޮޅި ހުރަސްކުރާ އުޅަނދުފަހަރަށް ދޭ ހަމަލާތައް ވަރުގަދަކޮށްފައިވާ ކަމަށް އީރާނުން ބުނަމުންދިޔަ ނަމަވެސް، ވޭތުވެދިޔަ ހަފުތާގައި އެ ސަރަހައްދުން ދުވާލަކު އެވްރެޖްކޮށް 13.2 މިލިއަން ފީފާގެ ތެޔޮ ވަނީ އުފުލާފަ އެވެ. މިއީ ހަނގުރާމަ ފެށުމުގެ ކުރިން އެ ސަރަހައްދުން ތެޔޮ އުފުލި މިންވަރާ އަޅާބަލާއިރު ގާތްގަނޑަކަށް 71 އިންސައްތަ އިތުރު އަދަދެކެވެ.

ސެޕްޓެމްބަރު މަހުގެ 24 އިން 27 އަށް ކަށަވަރުކުރެވިފައިވާ ތެޔޮ އުފުލި މިންވަރަށް ބަލާއިރު، ދުވާލަކު 6.5 މިލިއަނާއި 12.6 މިލިއަން ފީފާއާ ދެމެދުގެ އަދަދަކަށް ބޮޑެތި ބަދަލުތަކެއް އައިސްފައިވާކަން ފާހަގަކުރެވެ އެވެ. އެންމެ ފަހުގެ ދުވަސްތަކުގެ ހިސާބުތަކަކީ އަދި ވަގުތީ ހިސާބުތަކެއް ކަމަށްވުމާއެކު، އިތުރު ޝިޕްމަންޓްތައް ކަށަވަރުވަމުންދާ ވަރަކަށް މި އަދަދުތައް މައްޗަށް ދިއުން އެކަށީގެންވެ އެވެ.

ހުރްމުޒް ކަނޑުއޮޅިން ތެޔޮ އުފުލާ މިންވަރު އިތުރުވެފައި މިވަނީ، ހަތް ދުވަހުގެ ތެރޭގައި އެ ކަނޑުއޮޅި ފުރިހަމައަށް ހުޅުވާލުމަށް އީރާނުން ހުށަހަޅާފައިވާ ހުށަހެޅުމާ ގުޅޭގޮތުން މަޝްވަރާތައް ކުރިއަށްދާ ދަނޑިވަޅެއްގަ އެވެ.

ހުރްމުޒް ކަނޑުއޮޅި ހުރަސްކުރަން ބޭނުންވާ ހުރިހާ އުޅަނދުފަހަރަކުން، އީރާނުގެ ލާރަކް އައިލެންޑް ކައިރިން އެ ގައުމުގެ ކަނޑުގެ ސަރަހައްދުގެ ތެރެއިން ކަނޑައަޅާފައިވާ ހާއްސަ މަގަކުން ދަތުރުކުރުމަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރްޖީސީ) އިން ވަނީ އަންގާފައި

އީރާނުން އެމެރިކާއާ ދެކޮޅަށް ކުރި އަސްކަރީ ކެމްޕޭނުގައި އެމެރިކާ ނާކާމިޔާބުވެފައިވާ ކަމަށާއި، އެމެރިކާގެ ސިފައިން މެދުއިރުމަތިން ފައިބަންޖެހޭ ކަމަށް އައިއާރްޖީސީގެ ތަރުޖަމާނު ބްރިގޭޑިއަރ ޖެނެރަލް ހުސައިން މުހިއްބީ ވިދާޅުވެއްޖެ އެވެ. އޭނާ ވިދާޅުވީ އެމެރިކާގެ ރައްޔިތުންނަށް ހަގީގަތް ހާމަކޮށްދޭން ޖެހޭ ކަމަށެވެ.

މުހިއްބީ ވިދާޅުވީ، އެމެރިކާގެ އަސްލު ބޭނުމަކީ އީރާނުގެ ރައްޔިތުންގެ މުއްސަނދިކަމާއި ވަސީލަތްތައް ފޭރުން ކަމަށެވެ. އަދި އީރާނު ބައިބައިކޮށް، އެމެރިކާގެ ބާރުގެ ދަށުގައި އޮންނަ އިސްތިއުމާރީ ދައުލަތަކަށް އީރާނު ބަދަލުކުރުމަކީ އެމެރިކާގެ އަމާޒެއް ކަމަށް އޭނާ ތުހުމަތު ކުރެއްވި އެވެ. މީގެ އިތުރުން، އީރާނުން ނިއުކްލިއަރ ހަތިޔާރު އުފެއްދުމަށް މަސައްކަތް ނުކުރާކަން އެމެރިކާއަށް ވެސް ރަނގަޅަށް އެނގޭނެ ކަމަށް އޭނާ ވިދާޅުވި އެވެ.

އޭނާ ވިދާޅުވީ، އެމެރިކާގެ ރައީސް ޑޮނަލްޑް ޓްރަމްޕް އަކީ ބޮޑު ދޮގުވެރިއެއް ކަމަށެވެ. 

މެދުއިރުމަތީގައި ހުރި އެމެރިކާގެ އަސްކަރީ މަރުކަޒުތަކަށް ހަނގުރާމައިގެ ތެރޭގައި އަމިއްލަ ނަފްސު ދިފާއު ނުކުރެވުނު ކަމަށާއި، އޭގެ ތެރެއިން ގިނަ ތަންތަނަކީ މިހާރު އެއްވެސް ބޭނުމެއް ނުކުރެވޭ ވަރަށް ހަލާކުވެފައިވާ ތަންތަން ކަމަށް އޭނާ ފާހަގަކުރެއްވި އެވެ. އަދި އެ ތަންތަން އަލުން ބިނާކުރުމަކީ އެމެރިކާއަށް އިގުތިސާދީ ގޮތުން ބަލާއިރު ފައިދާހުރި ކަމެއް ނޫން ކަމަށް ވެސް ވިދާޅުވި އެވެ.

ދުނިޔޭގައި ހުރި އެންމެ ޒަމާނީ ޓެކްނޮލޮޖީ ބޭނުންކޮށްގެން އީރާނުން ދަނީ މެދުނުކެނޑި އައު ހަތިޔާރުތައް ފަރުމާކޮށް، މިހާރު ހުރި ވަސީލަތްތައް އަޕްގްރޭޑްކޮށް، ދިފާއީ ނިޒާމުތައް ފުޅާދާއިރާއެއްގައި އުފައްދަމުން ކަމަށާއި ހަނގުރާމައިގެ މައިދާނަށް އެ ނެރޭނެ ކަމަށް މުހިއްބީ ވިދާޅުވި އެވެ.

ތެހެރާންގައި ބޭއްވި ނޫސްވެރިންގެ ބައްދަލުވުމެއްގައި، އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) ގެ ހުސައިން މުހިއްބީ ވާހަކަދައްކަވަނީ

އިސްރާއީލުން ހިފާފައިވާ ހުޅަނގު އައްސޭރީގެ ހެބްރޯންގައި ހުންނަ އިބްރާހީމް މިސްކިތުގެ ހުރުމަތް ކަނޑާލުމަށްޓަކައި އެތައް ސަތޭކަ ވަޒަންވެރިންނާއެކު، އިސްރާއީލުގެ ރައްބީންނާއި އެ ގައުމުގެ ނޭޝަނަލް ސެކިއުރިޓީ މިނިސްޓަރު ބެން-ގްވީރު ވެސް އަންގާރަ ދުވަހު ވަނީ މިސްކިތަށް ވަދެފަ އެވެ. މިއީ މިފަދަ އަމަލުތައް މަނާކޮށް އެތައް އަހަރެއް ކުރިން ވެފައިވާ އެއްބަސްވުމާ ޚިލާފަށް ހިންގި އަމަލެކެވެ.

ހަމާސްގެ އޮފިޝަލް އަބްދުއްރަހްމާން ޝަދީދު މި ހާދިސާ ސިފަކުރެއްވީ، ފަލަސްތީނުގެ މުގައްދަސް ބިނާތަކާ ދެކޮޅަށް އިސްރާއީލުން ކުރަމުންދާ ހަނގުރާމައިގެ ތެރެއިން ހިންގި "އާ ހަމަނުޖެހުމެއްގެ" ގޮތުގަ އެވެ. އަދި މިއީ ދުނިޔޭގެ އެކި ކަންކޮޅުތަކުގައި ތިބި އެތައް މިލިއަން މުސްލިމުންގެ އިހުސާސްތަކަށް ދިން ހަމަލާއެއްގެ ގޮތުގައި ވެސް އޭނާ ސިފަކުރެއްވި އެވެ. އަދި އިސްރާއީލުގެ މިފަދަ އަމަލުތަކުގެ ސަބަބުން ފަލަސްތީނުގެ ރައްޔިތުންގެ ހިތްތަކުގައި މުގައްދަސް ބިނާތަކަށް އޮތް ލޯބި އިތުރުވެ، ރުޅިވެރިކަން ބޮޑުވުން ނޫން ކަމެއް ނުވާނެ ކަމަށް ޝަދީދު އިތުރަށް ވިދާޅުވި އެވެ.

އިސްރާއީލުން ހިފާފައިވާ ހުޅަނގު އައްސޭރީގެ ހެބްރޯންގެ ކުރީގެ ސިޓީގައި ހުންނަ މަސްޖިދުލް އިބްރާހީމް

އީރާނުގެ ވެރިން އެމެރިކާއަށް ވެފައިވާ އެއްބަސްވުންތަކަށް އިހުތިރާމްކުރާނަމަ، އެ ގައުމާއެކު އެއްބަސްވުމަކަށް އައުމުގެ ފުރުސަތު އަދިވެސް އެބައޮތް ކަމަށް އެމެރިކާގެ ނައިބު ރައީސް ޖޭޑީ ވެންސް ވިދާޅުވެއްޖެ އެވެ.

ވެންސް ވިދާޅުވީ، އީރާނުން ރަނގަޅަށް އަމަލުކުރާނަމަ އެ ގައުމާއެކު އެއްބަސްވުމަކަށް އާދެވޭނެ މާހައުލެއް އޮތްކަން ރައީސް ޑޮނަލްޑް ޓްރަމްޕް ސާފުކޮށްދެއްވާފައިވާ ކަމަށެވެ.

މީގެ އިތުރުން ވެންސް ވިދާޅުވީ، އީރާނުން އެމެރިކާއަށް ވެފައިވާ ވައުދުތައް ފުރިހަމަކުރަން ޖެހޭނެ ކަމަށެވެ. އަދި ކުރިއަށް އޮތް މަސްތަކުގައި އެމެރިކާގެ ސިޔާސަތު ބިނާވާނީ ހަމައެކަނި ދައްކާ ވާހަކަތަކުގެ މައްޗަށް ނޫން ކަމަށާއި، އަމަލުން ދައްކާ ކަންކަމުގެ މައްޗަށް ބިނާކޮށް މަޝްވަރާކުރުމުގެ އަސާސީ އުސޫލުގެ މައްޗަށް ކަމަށް ވެސް ވޭންސް ވިދާޅުވި އެވެ.

އެމެރިކާގެ ނައިބު ރައީސް ޖޭޑީ ވޭންސް

އިރާޤުގެ އެއަރލައިންތަކަށް އެމެރިކާއިން އަޅާފައިވާ ދަތިކުރުމުގެ ފިޔަވަޅުތަކުން އިސްތިސްނާއެއް ލިބުމާ ގުޅިގެން، އަންނަ އޮކްޓޫބަރު މަހުން ފެށިގެން އެ ގައުމުގެ ގައުމީ އެއަރލައިން ކަމަށްވާ "އިރާޤީ އެއަރވޭސް" އިން އީރާނަށް ކުރާ ދަތުރުތައް ރަސްމީކޮށް އަލުން ފެށުމަށް ނިންމައިފި އެވެ. 

އީރާނާއި އިރާޤާ ދެމެދު ކުރާ ހުރިހާ ވައިގެ ދަތުރުފަތުރުތަކެއް މެދުކަނޑާލުމަށް ނިންމި ނިންމުން ކުށްވެރިކޮށް، ހޯމަ ދުވަހުގެ ކުރީކޮޅު އެ ގައުމުގެ އެކި ސަރަހައްދުތަކުގައި އާންމު ރައްޔިތުން ނުކުމެ ބޮޑެތި މުޒާހަރާތަކެއް ކުރުމާއެކު، އިރާޤުގެ ނަޖަފް އާއި އީރާނުގެ އެކި އެއާޕޯޓްތަކާ ދެމެދު ކުރާ ދަތުރުތައް ހޯމަ ދުވަހުން ފެށިގެން އިރާޤީ އެއަރވޭސް އިން ވަނީ ފަށާފަ އެވެ.

އީރާނުގައި ހުންނަވާ އިރާޤުގެ ސަފީރު ވިދާޅުވީ، އީރާނާ އެކު ކުރާ ވައިގެ ދަތުރުފަތުރު ހުއްޓާލުމަށް އިރާޤު ސަރުކާރުން އެއްވެސް ނިންމުމެއް ނިންމާފައި ނުވި ނަމަވެސް، ދަތުރުތައް މެދުކެނޑުނީ އެމެރިކާގެ ދަތިކުރުމުގެ ފިޔަވަޅުތަކުގެ ބިރަށްޓަކައި، ބޭރުގެ ގްރައުންޑް-ހޭންޑްލިން ކުންފުނިތަކުން ޚިދުމަތް ދިނުމަށް އިންކާރު ކުރުމާ ގުޅިގެން ކަމަށެވެ. 

އިރާގުގެ ބަޣުދާދު ސަރުކާރުން އީރާނާއި އެ ގައުމާ ދެމެދު ކުރާ ހުރިހާ ވައިގެ ދަތުރުފަތުރުތަކެއް މެދުކަނޑާލުމަށް ނިންމި ނިންމުން ކުށްވެރިކޮށް، ހޯމަ ދުވަހުގެ ކުރީކޮޅު އެ ގައުމުގެ އެކި ސަރަހައްދުތަކުގައި އާންމު ރައްޔިތުން ނުކުމެ ބޮޑެތި މުޒާހަރާތަކެއް ވަނީ ކޮށްފައި

ހުރްމުޒް ކަނޑުއޮޅި ހުރަސްކުރަމުންދިޔަ އުޅަނދަކަށް ހޯމަ ދުވަހުގެ އިރުއޮއްސުނު ވަގުތު އެއްޗަކުން ހަމަލާދިނުމުގެ ސަބަބުން އެ އުޅަނދުގައި އަލިފާން ރޯވެފައިވާ ކަމަށް، ޔުނައިޓެޑް ކިންގްޑަމް މެރިޓައިމް ޓްރޭޑް އޮޕަރޭޝަންސް (ޔޫކޭއެމްޓީއޯ) އިން ބުނެފި އެވެ.

ޔޫކޭއެމްޓީއޯ އިން ހާމަކުރި ގޮތުގައި، އުޅަނދުގައި ރޯވި އަލިފާންގަނޑު މިހާރު ވަނީ ނިއްވާލާފަ އެވެ. އަދި އުޅަނދުގެ ފަޅުވެރިންގެ ހާލު ރަނގަޅު ކަމަށާއި، އެ އުޅަނދު މިހާރު ދަތުރު ކުރަމުންދާ ކަމަށް ވެސް އެ އިދާރާއިން ބުނެ އެވެ. މި ހާދިސާގައި އުޅަނދަށް ލިބުނު ގެއްލުންތައް ވަޒަންކުރުމުގެ މަސައްކަތް އަދި ދަނީ ކުރިއަށެވެ.

މި ހާދިސާގެ މައުލޫމާތު ލިބިފައިވަނީ ތިންވަނަ ފަރާތަކުން ކަމަށް އެ އެޖެންސީން ބުނެފައިވެ އެވެ. އަދި ކަމާބެހޭ ފަރާތްތަކުން މި މައްސަލަ ތަހުގީގު ކުރަމުންދާތީ، އެ ސަރަހައްދުން ދަތުރުކުރާ އެހެން އުޅަނދުފަހަރުތަކުން ސަމާލުވުމަށް ޔޫކޭއެމްޓީއޯ އިން ވަނީ އިލްތިމާސްކޮށްފަ އެވެ.

ޔުނައިޓެޑް ކިންގްޑަމް މެރިޓައިމް ޓްރޭޑް އޮޕަރޭޝަންސް (ޔޫކޭއެމްޓީއޯ) އިން ހާމަކޮށްފައިވާ ގޮތުގައި، ހުރްމުޒް ކަނޑުއޮޅިން ދަތުރުކުރަމުންދިޔަ މުދާ އުފުލާ ބޯޓަކަށް ވަނީ ގޮތް ނޭންގޭ އެއްޗަކުން ހަމަލާއެއް ދީފައި. 2026 ސެޕްޓެމްބަރު 28 ވީ ހޯމަ ދުވަހުގެ އިރުއޮއްސުނު ވަގުތު ހިނގި މި ހާދިސާގެ މައުލޫމާތު އެ އިދާރާއަށް ލިބިފައިވަނީ ކޮންމެވެސް ވަރެއްގެ ލަސްވުމަކަށް ފަހުގައި

އެމެރިކާއިން އީރާނަށް ހަމަލާއެއް ދީ، އީރާނުގެ ސަލާމަތާއި ރައްކާތެރިކަން ކަށަވަރު ނުކުރެވޭނަމަ، އެ ސަރަހައްދުގެ އެއްވެސް އުމްރާނީ ވަސީލަތަކީ ހަމަލާތަކުން ރައްކާތެރިވެގެންވާ ތަންތަން ނޫން ކަމަށާއި އީރާނަށް މިނިވަންކަމާއެކު ތެޔޮ ނުވިއްކޭނަމަ، ގަލްފުގެ އެއްވެސް ގައުމަކަށް އެ ގައުމުތަކުގެ ތެޔޮ ނުވިއްކޭނެކަމަށް އީރާނުގެ މަޖިލީހުގެ ރައީސް އަދި އެ ޤައުމުގެ އިސް މަޝްވަރާވެރިޔާގެ މަގާމު ވެސް ފުރުއްވާ މުހައްމަދު ބާގިރު ޤާލީބާފް ވަނީ ވިދާޅުވެފަ އެވެ. 

ގަތަރުން ވަނީ ޤާލިބާފްގެ މި ވާހަކަފުޅު ކުށްވެރިކޮށްފަ އެވެ.  ގަތަރުގެ ފޮރިން މިނިސްޓްރީގެ ތަރުޖަމާނު ވިދާޅުވީ، "އެއްވެސް ފަރާތަކުން" އުމްރާނީ ވަސީލަތްތަކަށް އަމާޒުކޮށް ހަމަލާދިނުމަކީ ބަލައިގަނެވޭނެ ކަމެއް ނޫން ކަމަށެވެ. އަދި ގަލްފުގެ ގައުމުތަކަކީ މި ހަނގުރާމައިގެ ބައިވެރިންނަށް ވުމަށް އިހުތިޔާރުކުރި ގައުމުތަކެއް ނޫން ކަމަށާއި، ސަރަހައްދުގެ ގައުމުތަކަށް ދޭ ހަމަލާތައް އީރާނުން ހުއްޓާލަންޖެހޭ ކަމަށެވެ. އަދި ގަތަރަށް އަމާޒުކޮށް އިންޒާރުތައް ލިބެމުންދިޔަ ނަމަވެސް، ސަރަހައްދީ ސުލްހަ ގާއިމުކުރުމަށް ކުރާ މަސައްކަތް އެ ގައުމުން ހުއްޓާނުލާނެ ކަމަށް ވެސް އޭނާ ވިދާޅުވި އެވެ.

އީރާނުގެ މަޖިލީހުގެ ރައީސް އަދި އެ ޤައުމުގެ އިސް މަޝްވަރާވެރިޔާގެ މަގާމު ވެސް ފުރުއްވާ މުހައްމަދު ބާގިރު ޤާލީބާފް

ރަޝިޔާގެ ރިޔާސީ ގަނޑުވަރު، ކްރެމްލިންގެ ތަރުޖަމާނު ޑިމިޓްރީ ޕެސްކޯވް ވިދާޅުވީ، އީރާނުން އެ މުއާހަދާއިން ވަކިވާން ރަޝިޔާ އިން ބޭނުން ނުވާ ކަމަށެވެ. އަދި އީރާނަކީ އެ އެއްބަސްވުމުގައި ސޮއިކޮށްފައިވާ ގައުމެއްގެ ގޮތުގައި ދެމިއޮންނާނެ ކަމަށް ރަޝިޔާއިން އުންމީދުކުރާ ކަމަށް ވެސް އޭނާ ވިދާޅުވި އެވެ. 

އޭނާ މިހެން ވިދާޅުވީ ބައިނަލްއަގުވާމީ ނިއުކްލިއަރ އެއްބަސްވުމުން އީރާން ވަކިވެދާނެ ކަމަށް އެ ގައުމުގެ އިސް އޮފިޝަލުން ދެއްވާފައިވާ ބަޔާންތަކާ ގުޅިގެންނެވެ. މި މުއާހަދާގެ ދަށުން، ނިއުކްލިއަރ ހަތިޔާރު އުފެއްދުމާއި ނުވަތަ އެފަދަ ހަތިޔާރު ހޯދުމަކީ އީރާނަށް މަނާކަމެކެވެ.

ރަޝިޔާއާއި އީރާނަކީ އިސްތިރާތީޖީ ކޯޕަރޭޝަން އެގްރީމަންޓެއް ނުވަތަ އިސްތިރާތީޖީ ގުޅުންތަކާ ބެހޭ އެއްބަސްވުމެއްގެ ދަށުން ވަރަށް ގާތް ގުޅުމެއް ބާއްވަމުން އަންނަ ދެ ގައުމެވެ.

ރަޝިޔާގެ ރައީސް ވްލަޑިމިއަރ ޕޫޓިން، އީރާނުގެ ރައީސް މަސްއޫދު ޕެޒެޝްކިއާންއާ އެކު

އިސްރާއީލުން ޣައްޒާގައި ހިންގަމުންދާ ގަތުލުއާންމުގައި އެ ސަރަހައްދުގެ ގިނަ އަދަދެއްގެ ގެދޮރު ސުންނާފަތިކޮށްލާފައިވާތީ، ޣައްޒާގެ ގިނަ ފަލަސްތީނު ރައްޔިތުން މިހާރު ދިރިއުޅެމުންދަނީ ފޭލިގެތަކުގައާއި ހަލާކުވެފައިވާ އިމާރާތްތަކުގައި

ޣައްޒާގެ ސަރުކާރުގެ މީޑިއާ އޮފީހުން ނެރުނު ބަޔާނެއްގައި ބުނެފައިވަނީ، އިސްރާއީލުން ޣައްޒާގައި ހިންގަމުންދާ ހަނގުރާމައިގެ ސަބަބުން ގެދޮރު ގެއްލިފައިވާ ދެ މިލިއަނަށްވުރެ ގިނަ މީހުންނަށް، ފިނި މޫސުމުގެ ގަދަ ފިންޏާއި ވިއްސާރައިގެ ސަބަބުން ބޮޑެތި ނުރައްކާތަކަކާ ކުރިމަތިލާން ޖެހިފައިވާ ކަމަށެވެ. އަދި މިހާރު ވެސް ގިނަ ބަޔަކު ދިރިއުޅެމުންދާ ވަގުތީ ފޭލިގެތަކަކީ ފިނި މޫސުމުގެ މޫސުމީ ބަދަލުތަކަށް ކެތްކުރެވޭނެ ފަދަ ވަސީލަތްތަކެއް ނޫންކަން އެ އޮފީހުން ފާހަގަކޮށްފައިވެ އެވެ.

މީގެ އިތުރުން، ޣައްޒާގެ އުތުރުގައި އިސްރާއީލުން ދެމުންދާ ހަމަލާތަކުގެ ސަބަބުން ކާބޯތަކެއްޗާއި ބޭހާއި އަދި ހިޔާވަހިކަން ހޯދުމަށް ބޭނުންވާ ސާމާނު ލިބުން ދަތިވެފައިވާކަމަށް ބުނެފަ އެވެ.

ޣައްޒާގެ މީޑިއާ އޮފީހުން ވަނީ އިސްރާއީލުން ޣައްޒާއަށް އަޅާފައިވާ ހުރަސްތައް ނައްތާލުމަށާއި، ފިނި މޫސުމާ ކުރިމަތިލުމަށް ބޭނުންވާ ޒަރޫރީ ސާމާނު އެ ސަރަހައްދަށް ވެއްދުމުގެ ހުއްދަ ދިނުމަށް ބާރުއެޅުމަށް ބައިނަލްއަގުވާމީ މުޖުތަމައަށް ގޮވާލާފަ އެވެ. އެހެން ނޫންނަމަ، ފިނި މޫސުމުގެ ތެރޭގައި އެތައް ހާސް ބައެއްގެ ފުރާނަ ގެއްލިގެން ހިނގައިދާނެ ކަމުގެ ބިރު އެބައޮތް ކަމަށް އިންޒާރު ދީފައިވެ އެވެ.

ގަތަރުގެ ފޮރިން މިނިސްޓްރީގެ ތަރުޖަމާނު މާޖިދު އަލް އަންސާރީ

ގަތަރުގެ ފޮރިން މިނިސްޓްރީގެ ތަރުޖަމާނު މާޖިދު އަލް އަންސާރީ ވިދާޅުވީ އީރާނާއި އެމެރިކާއާ ދެމެދު މެދުވެރިއެއްގެ ދައުރު އަދާކުރަމުންދާ ގަތަރާއި އެހެނިހެން ގައުމުތަކުން އަދިވެސް ދަނީ ދެ ގައުމުގެ މެދުގައި މެސެޖުތައް ބަދަލުކުރަމުން ކަމަށާއި އެ މަސައްކަތްތައް މެދުނުކެނޑި ކުރިއަށް ގެންދާނެ ކަމަށެވެ.

އީރާނާ ދެކޮޅަށް އެމެރިކާއާއި އިސްރާއީލުން ކުރަމުންދާ ހަނގުރާމައިގެ ސަބަބުން ދުނިޔޭގެ އިގުތިސާދަށް ބޮޑެތި ގެއްލުންތަކެއް ލިބެމުންދާއިރު، ކުރިއަށް އޮތް ފިނި މޫސުމުގައި ހަކަތަ ފޯރުކޮށްދޭ އުޅަނދުފަހަރުގެ ދަތުރުތައް ބޮޑުތަނުން ހުއްޓުމަކަށް އައުމުން ހާލަތު އިތުރަށް ގޯސްވާނެ ކަމަށް ވެސް އޭނާ ވިދާޅުވި އެވެ. 

އިރާޤުގައި ހުރި އެމެރިކާގެ އެންމެ ފަހު އަސްކަރީ މަރުކަޒުތަކުން، މި އަންނަ ބުދަ ދުވަހުގެ ނިޔަލަށް އެ ގައުމުގެ ސިފައިން ފޭބުމަށް ވަނީ ހަމަޖެހިފަ އެވެ.

މި ނިންމުމަކީ 2024 ވަނަ އަހަރު އެމެރިކާގެ ރައީސް ޖޯ ބައިޑަންގެ ސަރުކާރުގައި އެއްބަސްވެ، ޑޮނަލްޑް ޓްރަމްޕްގެ ސަރުކާރުން މިހާރު ތަންފީޒުކުރަމުންދާ ނިންމުމެކެވެ. 

އިރާޤުގެ ސަލާމަތީ މާހިރުން ވިދާޅުވާ ގޮތުގައި، މި ނިންމުމުގެ ސަބަބުން އީރާނާއި އެ ގައުމުގެ ބާރުގަދަ ބައިވެރިންނަށް އިރާޤުގެ ތެރޭގައި އެއްވެސް ހުރަހެއް ނެތި ހަރަކާތްތެރިވުމުގެ ފުރުސަތު ލިބިގެންދާނެ އެވެ.

އެމެރިކާ ސިފައިން 2003 ވަނަ އަހަރު އިރާޤަށް އަރައިގަތީ ސުންނީ މުސްލިމް ލީޑަރު ސައްދާމް ހުސައިންގެ ވެރިކަން ވައްޓާލުމަށެވެ. އޭގެ ފަހުން އެމެރިކާއިން އެ ގައުމު އިސްތިއުމާރުކޮށް، ޝީޢީން އިސްވެ ތިބޭ ސަރުކާރެއް ގާއިމުކޮށް، ގިނަ އަހަރުތަކެއް ވަންދެން ހަނގުރާމަ ކުރުމަށްފަހު 2011 ވަނަ އަހަރުގެ ނިޔަލަށް އެ ގައުމުން ފޭބި އެވެ.  އަދި މި ހަނގުރާމައިގައި އެމެރިކާގެ 4،500 ސިފައިން މަރުވި އެވެ. 

ނަމަވެސް، އޭގެ ތިން އަހަރު ވެސް ނުވަނީސް، 2014 އިން 2017 އަށް ހިނގި ބޮޑު ހަނގުރާމައިގައި އިސްލާމިކް ސްޓޭޓް ބަލިކުރުމަށް އިރާޤު ސިފައިންނަށް އެހީތެރިވުމަށް އެމެރިކާ ސިފައިން އަލުން އެ ގައުމަށް އެނބުރި ދިޔަ އެވެ. 

އިރާޤުގެ ފަލޫޖާގެ މަގަކުން ދަތުރުކުރާ އުޅަނދުތަކެއް - 26 ސެޕްޓެމްބަރު 2026

ޔަމަނުގެ ހޫޘީ ހަނގުރާމަވެރިން މި މަހުގެ ކުރީކޮޅު ދިން ހަމަލާތަކާ ގުޅިގެން މެދުކަނޑާލާފައި އޮތް ސައުދީ އަރަބިއްޔާގެ "އީސްޓް-ވެސްޓް ޕައިޕްލައިން" ގެ އޮޕަރޭޝަންތައް އަލުން ފަށައި، ރަތްކަނޑުގެ އައްސޭރީގައި އޮންނަ ޔަންބޫ ބަނދަރުން ތެޔޮ ބަރުކުރުމުގެ މަސައްކަތް އެ ގައުމުން އަލުން ފަށައިފި އެވެ.

ޔަންބޫ ބަނދަރުން ތެޔޮ ބަރުކުރުމުގެ މަސައްކަތް އަލުން ފެށުމާއެކު، މެދުއިރުމަތިން ބޭރުކުރާ ސާފުނުކުރާ ތެލުގެ މިންވަރު އިތުރުވެގެންދާނެ އެވެ. އިސްރާއީލާއި އެމެރިކާ ގުޅިގެން އީރާނާ ދެކޮޅަށް ކުރަމުންދާ ހަނގުރާމައިގެ ސަބަބުން، ދުނިޔޭގެ ތެލުގެ ސަޕްލައިގެ ފަސްބައިކުޅަ އެއްބައި އުފުލާ ހުރްމުޒް ކަނޑުއޮޅިން ތެޔޮ ބޭރުކުރުމަށް ވަނީ ބޮޑެތި ހުރަސްތަކެއް ކުރިމަތިވެފަ އެވެ.

މިދިޔަ ހޯމަ ދުވަހު ނެރުނު ރިޕޯޓެއްގައި ބުނެފައިވާ ގޮތުގައި، ހަމަލާ ދިނުމުގެ ކުރިން ޔަންބޫ ބަނދަރުން ދުވާލަކު ބޭރުކުރަމުންދިޔަ 5.5 މިލިއަން ފީފާ ތެލުގެ މިންވަރަށް އުފެއްދުންތެރިކަން އަލުން ރުޖޫއަވުމަށް އަދި މަހެއްހާ ދުވަސް ނަގާނެ އެވެ.

ޔޫރަޕިއަން ސްޕޭސް އެޖެންސީގެ ސެޓެލައިޓްތަކުން 27 ސެޕްޓެމްބަރު 2026 ގައި ރަތްކަނޑުގެ ސަރަހައްދުން ނަގާފައިވާ ފޮޓޯތަކުން ފެންނަ ގޮތުގައި، ސައުދީ އަރަބިއްޔާގެ ޔަންބޫ އަދި އަލް މުއައްޖިޒް ބަނދަރުން ގާތްގަނޑަކަށް 10 މިލިއަން ފީފާގެ ސާފުނުކުރާ ތެޔޮ ބޯޓުފަހަރަށް ބަރުކުރަމުންދޭ

އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވަނީ ސައުދީ އަރަބިއްޔާގެ ފޮރިން މިނިސްޓަރު ޕްރިންސް ފައިސަލް ބިން ފަރްހާން އަލް ސައުދުއާ ބައްދަލުކުރައްވާފަ އެވެ.

މި ބައްދަލުވުމާ ގުޅޭ ރަސްމީ ތަފްސީލެއް ދެ ގައުމުން އަދި ހާމަކޮށްފައި ނުވި ނަމަވެސް، ދެ ބޭފުޅުންގެ މެދުގައި ކުރިއަށްދިޔަ މި މަޝްވަރާތަކުގައި ސަލާމަތީ ކަންކަމާ ގުޅޭ ފުޅާ ދާއިރާއެއްގައި ވާހަކަދެކެވިފައިވާކަން ވަނީ އެނގިފަ އެވެ. އޭގެ ތެރޭގައި ގަލްފް ސަރަހައްދުގެ ދިފާއީ ކަންކަމުގައި ގުޅުން ބަދަހިކުރުމާއި، ހުރްމުޒް ކަނޑުއޮޅީގެ ކަނޑުގެ ސަލާމަތާއި ރައްކާތެރިކަން ކަށަވަރުކުރުން ހިމެނެ އެވެ.

މި ބައްދަލުވުން ބާއްވާފައި މިވަނީ، ހޫޘީންނާ ދެކޮޅަށް ކުރާ މަސައްކަތްތަކާ ބެހޭގޮތުން މަޝްވަރާކުރެއްވުމަށް މެދުއިރުމަތީގައި ހަރަކާތްތެރިވާ އެމެރިކާ އަސްކަރިއްޔާގެ އެންމެ އިސް ކޮމާންޑަރު އެޑްމިރަލް ބްރެޑް ކޫޕާ، މި މަހުގެ ކުރީކޮޅު ސައުދީ އަރަބިއްޔާއަށް ކުރެއްވި ޒިޔާރަތަށް ފަހުގަ އެވެ. 

އެމެރިކާ ސަރުކާރުގެ އިސް އޮފިޝަލަކު މައުލޫމާތު ދެއްވި ގޮތުގައި، ބޭނުން ޖެހިއްޖެ ހާލަތެއްގައި ސައުދީ އަރަބިއްޔާއާއެކު ވެފައިވާ ދިފާއީ އެއްބަސްވުމަށް އެމެރިކާ އަސްކަރިއްޔާއިން ފުރިހަމައަށް އަމަލުކުރާނެ އެވެ. އަދި އެމެރިކާއިން ވެފައިވާ ވައުދުތަކާ އެއްގޮތަށް ދެމިއޮންނާނެކަން އެ އޮފިޝަލް ވަނީ ފާހަގަކުރައްވާފަ އެވެ.

އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ، ސައުދީ އަރަބިއްޔާގެ ފޮރިން މިނިސްޓަރު ޕްރިންސް ފައިސަލް ބިން ފަރްހާން އަލް ސައުދުއާ ވޮޝިންގްޓަންގައި ބައްދަލުކުރައްވަނީ- 28 ސެޕްޓެމްބަރު 2026

ދުނިޔޭގެ ބާޒާރުގައި ސާފުނުކުރާ ތެލުގެ އަގު ވިދިވިދިގެން ދެވަނަ ދުވަހަކަށް އުފުލެމުންދާއިރު، ބްރެންޓް ކްރޫޑް ފިއުޗާސްގެ އަގު ވަނީ 63 ސެންޓް ނުވަތަ 0.6 އިންސައްތަ މައްޗަށް ގޮސްފަ އެވެ. މިއާއެކު ބްރެންޓް ކްރޫޑް ފީފާއެއްގެ އަގު މިހާރު ހުރީ 105.91 ޑޮލަރުގަ އެވެ.

މީގެ އިތުރުން އެމެރިކާގެ ވެސްޓް ޓެކްސަސް އިންޓަމީޑިއޭޓް (ޑަބްލިއުޓީއައި) ކްރޫޑްގެ އަގު 72 ސެންޓް ނުވަތަ 0.8 އިންސައްތަ މައްޗަށް ގޮސް، ފީފާއެއްގެ އަގު ވަނީ 93.32 ޑޮލަރަށް އުފުލިފަ އެވެ.

ރޮއިޓާސްއިން ރިޕޯޓްކޮށްފައިވާ ގޮތުގައި ތެލުގެ އަގު މިގޮތަށް އުފުލިފައިވަނީ، މެދުއިރުމަތީގެ ސަރަހައްދުން ތެޔޮ އެކްސްޕޯޓްކުރާ މިންވަރު އިތުރުވަމުންދާކަމުގެ ނިޝާންތައް ފެންނަން ހުރި ނަމަވެސް، އީރާނާ ދެކޮޅަށް އެމެރިކާއިން ކުރަމުންދާ ހަނގުރާމައިގެ ސަބަބުން ތެޔޮ ސަޕްލައި ކުރުމަށް ބުރޫއަރާފާނެތީ އުފެދިފައިވާ ކަންބޮޑުވުންތަކާ ގުޅިގެންނެވެ.

ސޫރިޔާގެ ބަނިޔާސްގައި ހުންނަ ތެޔޮ ޓާމިނަލަށް އިރާގުން ފޮނުވި ތެޔޮ، ފީފާއަކަށް އަޅަނީ

އިސްރާއީލުން ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ގަތުލުއާންމަށް ތިން އަހަރު ފުރެން ގާތްވެފައިވަނިކޮށް، އިސްރާއީލުގެ ސިފައިން ޣައްޒާ އަށް ދީފައިވާ ބޮޑެތި ގެއްލުންތައް ހާމަވާ އައު ސެޓެލައިޓް ފޮޓޯތަކެއް ގޫގުލް އާރތު އިން އާންމުކޮށްފި އެވެ. ގޫގުލް އިން އަައުކުރި މި ފޮޓޯތަކުން، އިސްރާއީލުގެ ހަމަލާތަކުގެ ސަބަބުން ޣައްޒާގެ ބޮޑު ސަރަހައްދެއް ސުންނާފަތިވެފައިވާ މިންވަރު ވަރަށް ސާފުކޮށް ފެންނަން އެބަހުއްޓެވެ.

އިސްރާއީލުން ހިންގާ ގަތުލުއާންމުގައި 7 އޮކްޓޫބަރު 2023 އިން 28 ސެޕްޓެމްބަރު 2026 އާ ހަމައަށް، ފަލަސްތީނުގެ މަދުވެގެން 74,022 މީހުން ވަނީ ޝަހީދުކޮށްލާފަ އެވެ. މީގެ އިތުރުން، އިމާރާތްތަކުގެ ބައިތަކުގެ ދަށުވެފައިވާ އެތައް ހާސް ބަޔަކު އަދިވެސް ނުފެނި އެބަތިއްބެވެ.

މި މުއްދަތުގެ ތެރޭގައި ފަލަސްތީނުގެ މަދުވެގެން 175,098 މީހުން ޒަޚަމްވެފައިވާއިރު، މީގެ ތެރެއިން ގިނަ ބަޔަކަށް ވަނީ އުމުރަށް ނުކުޅެދުންތެރިކަން ކުރިމަތިވާ ފަދަ ބޮޑެތި އަނިޔާތަކެއް ލިބިފަ އެވެ. މިއީ ޣައްޒާގެ އާބާދީގެ ކޮންމެ 13 މީހަކުން އެކަކަށް ލިބިފައިވާ އަނިޔާއެކެވެ.

އޮކްޓޫބަރު 10 ގައި އިއުލާނުކުރި "ހަނގުރާމަ ހުއްޓާލުމުގެ" އެއްބަސްވުމަށް ފަހު ވެސް، ފަލަސްތީނުގެ 1,421 މީހުން ވަނީ ޝަހީދުކޮށްލާފަ އެވެ. އަދި މި މުއްދަތުގައި އިތުރު 4,983 ފަލަސްތީނު ރައްޔިތުން ވަނީ ޒަޚަމްވެފަ އެވެ.

އީރާނުގެ ޚާރިޖީ ވަޒީރު އައްބާސް އަރާގްޗީ ވިދާޅުވީ، ނިއުޔޯކުގައި ގަތަރުގެ މެދުވެރިން މެދުވެރިކޮށް އެމެރިކާއާއެކު ނުސީދާ އިތުރު މަޝްވަރާތަކެއް ކުރިއަށް ގެންގޮސްފައިވާ ކަމަށާއި، އަންގާރަ ދުވަހުގެ ނިޔަލަށް ވޮޝިންޓަނުގެ ރަސްމީ ޖަވާބެއް "އުންމީދީ ގޮތަކަށް" ލިބޭނެ ކަމަށް ބެލެވޭ ކަމަށެވެ.

މިހާރު އުފެދިފައިވާ ނުތަނަވަސްކަން ހައްލުކޮށް، ކަނޑުގެ މުހިންމު ދަތުރުފަތުރުގެ މަގުތައް އަލުން ހުޅުވާލުމަށްޓަކައި، ވަކި ޝަރުތުތަކެއްގެ މަތިން އީރާނުން އިންސާފުވެރި އަދި ބުއްދިވެރި ހުށަހެޅުމެއް ހުށަހަޅާފައިވާނެ ކަމަށް އޭނާ ތަކުރާރުކޮށް ވިދާޅުވި އެވެ. އަދި އެންމެ ފަހުން ބޭއްވި ބައްދަލުވުމުގައި ގަތަރުގެ މެދުވެރިން ވަނީ ދެ ފަރާތުގެ ދެމެދުގައި ހުރި ހިޔާލުތަފާތުވުންތައް ކުޑަކޮށް، އީރާނުގެ ހުށަހެޅުންތައް ތަންފީޒުކުރުމަށް މަގުފަހިކުރުމަށްޓަކައި އައު ހިޔާލުތަކެއް ހުށަހަޅާފައިވާ ކަމަށާއި އަދި މި ހިޔާލުތަކާ މެދު ގޮތެއް ނިންމުމަށް މިހާރު ވޮޝިންޓަނަށް ފޮނުވާފައިވާ ކަމަށް ވެސް އަރާގްޗީ ވިދާޅުވި އެވެ. 

"ގަތަރާއި ޕާކިސްތާނުގެ މެދުވެރިން މެދުވެރިކޮށް މިފަދަ މުއާމަލާތްތަކާއި މެސެޖުތައް އަބަދުވެސް ބަދަލުކުރެވެމުންދޭ. ނަމަވެސް މިހާރު އީރާނުން ހުށަހަޅާފައިވާ ހުށަހެޅުމާއެކު، މި މަރުހަލާ މިވަނީ ކުރިއަށްވުރެ ސީރިއަސް މިސްރާބަކަށް ބަދަލުވެފައި،" އޭނާ އިތުރަށް ވިދާޅުވި އެވެ.

އީރާނުގެ ފޮރިން މިނިސްޓަރު އައްބާސް އަރާގްޗީ، ހުކުރު ދުވަހު ނިއުޔޯކް ސިޓީގައި ހުންނަ އދ. ގެ މައި މަރުކަޒުގައި ބޭއްވި ނޫސްވެރިންގެ ބައްދަލުވުމެއްގައި މީޑިއާތަކާ ވާހަކަދައްކަވަނީ

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ، ޔުނައިޓެޑް އަރަބް އެމިރޭޓްސް (ޔޫއޭއީ) އަށް ވަޑައިގެން އެ ގައުމުގެ ރައީސް މުހައްމަދު ބިން ޒައިދު އަލް ނަހްޔާންއާ އާދީއްތަ ދުވަހު ބައްދަލުކުރައްވާފައިވާ ކަމަށް ޔޫއޭއީގެ ރަސްމީ ނިއުސް އެޖެންސީ ވާމް އިން ކަށަވަރުކޮށްދީފި އެވެ.

މި ބައްދަލުކުރެއްވުމުގައި ދެ ގައުމުގެ ދެމެދުގައި އޮތް ގުޅުމާ ގުޅޭގޮތުންނާއި އެ ގުޅުން އިތުރަށް ހަރުދަނާކޮށް ކުރިއެރުވޭނެ ގޮތްތަކާ ބެހޭގޮތުން ދެ ބޭފުޅުން މަޝްވަރާ ކުރައްވާފައިވާކަމަށް ރިޕޯޓުކޮށްފައިވެ އެވެ. 

މީގެއިތުރުން ނަތަންޔާހޫ އާއި އެމަނިކުފާނުގެ އަނބިކަނބަލުން، ޔޫއޭއީ އަށް ވަޑައިގެންނެވީ އެ ޤައުމުގެ ރައީސް ޝައިޚް މުހައްމަދު ބިން ޒައިދު ދެއްވި ދައުވަތަކަށް ކަމަށް ނަތަންޔާހޫގެ އޮފީހުން ވަނީ ބުނެފަ އެވެ. އަދި މި ދަތުރުގައި އިސްރާއީލުގެ ނޭޝަނަލް ސެކިއުރިޓީ ކައުންސިލްގެ ވެރިޔާއާއި މޮސާޑްގެ ވެރިޔާއާއި މިލިޓަރީ ސެކްރެޓަރީގެ އިތުރުން ފޮރިން ޕޮލިސީ އެޑްވައިޒަރު ބައިވެރިވެވަޑައިގެންނެވި އެވެ. 

ފާއިތުވި 24 ގަޑިއިރު ތެރޭގައި ޔަމަނުގެ އެކި ސަރަހައްދުތަކުގައި ހުރި ހޫޘީ ހަނގުރާމަވެރިންގެ އަސްކަރީ އަމާޒުތަކަށް 361 ހަމަލާ ދީފައިވާ ކަމަށް އެ ގައުމުގެ ސަރުކާރުގެ ސިފައިން ބުނެފި އެވެ.

ޔަމަނުގެ ސަރުކާރުގެ ސިފައިން ނެރުނު ބަޔާނެއްގައި ބުނެފައިވަނީ، މި ހަމަލާތަކުގައި ހޫޘީންގެ 476 މީހުން މަރުވެ ނުވަތަ ޒަޚަމްވެފައިވާ ކަމަށެވެ. މީގެ އިތުރުން، ހޫޘީ ހަނގުރާމަވެރިން ބޭނުންކުރާ ކޮންޓްރޯލް ސެންޓަރުތަކާއި ހަތިޔާރު ގުދަންތަކުގެ އިތުރުން ގިނަ އަދަދެއްގެ އުޅަނދުފަހަރު މި ހަމަލާތަކުގައި ސުންނާފަތިކޮށްލާފައިވާ ކަމަށް ވެސް އެ ބަޔާނުގައި ބުނެފައިވެ އެވެ.

ޔަމަނުގެ އަލް-ހަޒްމް ކައިރީގައި ޔަމަނު ސަރުކާރުގެ ސިފައިން ޓޭންކެއް ބޭނުންކޮށްގެން ހޫޘީންނަށް ހަމަލާދެނީ- 9 ސެޕްޓެމްބަރު 2026

އީރާނުގެ ޚާރިޖީ ވަޒީރު އައްބާސް އަރާގްޗީ އާއި އެ ގައުމުގެ ވަފުދުގެ ބޭފުޅުން، އެމެރިކާއާއެކު ކުރިއަށްދާ މަޝްވަރާތަކުގައި މެދުވެރިއެއްގެ ދައުރު އަދާކުރާ ފަރާތްތަކާ ހޯމަ ދުވަހުގެ ހެނދުނުގެ ވަގުތެއްގައި ބައްދަލުކުރައްވާނެ ކަމަށް އީރާނުގެ އައިއެސްއެންއޭ (އިސްނާ) ނިއުސް އެޖެންސީން ރިޕޯޓުކޮށްފި އެވެ.

ގަތަރުގެ ވަފުދެއް މިހާރު އެމެރިކާގައި ހަރަކާތްތެރިވަމުންދާއިރު، އީރާނަށް ކުރިމަތިވެފައިވާ އިގުތިސާދީ ދަތިތަކަށް ލުޔެއް ހޯދުމުގެ ބަދަލުގައި ހުރްމުޒް ކަނޑުއޮޅި އަލުން ހުޅުވާލުމަށް އީރާނުގެ ހުށަހެޅުން، މިދިޔަ ހަފުތާގައި އެ ވަފުދުން ވަނީ އެމެރިކާގެ އޮފިޝަލުންނަށް ހިއްސާކޮށްފަ އެވެ.

މެދުވެރިންގެ ޓީމާއި އީރާނުގެ ވަފުދުން ބާއްވާ މި ބައްދަލުވުމުގައި، މިހާރުގެ ހާލަތާ ގުޅޭގޮތުން ހުށަހަޅާފައިވާ އެންމެ ފަހުގެ ހުށަހެޅުންތަކާއި ދެ ފަރާތުގެ ވިސްނުންތަކާ ބެހޭގޮތުން މަޝްވަރާކުރާނެ އެވެ. ނަމަވެސް މި ދަތުރުގެ ތެރެއިން އެމެރިކާއާއެކު ސީދާ ގޮތެއްގައި އެއްވެސް މަޝްވަރާއެއް ބޭއްވުމަށް ރޭވިފައެއް ނުވެ އެވެ.

އީރާންގެ ފޮރިން މިނިސްޓަރު އައްބާސް އަރާގްޗީ އާއި ޤަތަރުގެ ބޮޑު ވަޒީރު އަދި ފޮރިން މިނިސްޓަރު ޝައިޚް މުހައްމަދު ބިން އަބްދުއް ރަހްމާން އަލް ޘާނީ މީގެ ކުރިން ބޭއްވި ބައްދަލުވުމެއްގެ ތެރެއިން

މި މުޒާހަރާތައް ކުރިއަށް މި ދަނީ، އިސްރާއީލުން ހިފާފައިވާ ހުޅަނގު އައްސޭރީގެ ޣައިރު ގާނޫނީ އާބާދީތަކުން އުފައްދާ އެއްވެސް ބާވަތެއްގެ މުދަލެއް ނެދަލެންޑްސްއަށް އެތެރެކުރުން މަނާކުރުމަށް އެ ގައުމުގެ ކަމާބެހޭ އިދާރާތަކުން ނިންމައި، އެ ނިންމުން ތަންފީޒުކުރަން ފަށާފައިވާ ދަނޑިވަޅެއްގަ އެވެ. ނަމަވެސް އެ ޤައުމުގެ ރައްޔިތުން ގޮވާލަމުންދަނީ އިސްރާއީލާ ދެކޮޅަށް އަދިވެސް އިތުރު ހަރުކަށި ފިޔަވަޅު އެޅުމަށެވެ. 

އިސްރާއީލާ ދެކޮޅަށް މިހާރަށްވުރެ ހަރުކަށި ފިޔަވަޅުތަކެއް އެޅުމަށް ގޮވާލައި، ނެދަލެންޑްސްގައި މުޒާހަރާކުރަނީ

އިނގިރޭސިވިލާތުގައި ހުންނަ އީރާން އެމްބަސީ އިން ސޯޝަލް މީޑިއާގައި އާންމުކުރި ބަޔާނެއްގައި ބުނެފައިވަނީ، އިނގިރޭސިވިލާތުގެ އާރްއޭއެފް ފެއަރފޯލްޑް މަރުކަޒު ކައިރީގައި އާދިއްތަ ދުވަހު ހިނގި ހާދިސާއާ އީރާނާ ގުޅުވައިގެން، އިނގިރޭސި ބައެއް ފަރާތްތަކުންނާއި މީޑިއާތަކުން ފަތުރަމުންދަނީ އެއްވެސް އަސާސެއް ނެތް، ދޮގު ވާހަކަތަކެއް ކަމަށެވެ.

މީގެ އިތުރުން، މީޑިއާތަކުން ފަތުރަމުންދާ އޮޅުވާލުންތަކުންނާއި ގެއްލުންދެނިވި ވާހަކަތަކުން، އީރާނާއި އެ ގައުމުގެ ރައްޔިތުންގެ ހައްގުތަކާއި މަސްލަހަތު ހިމާޔަތްކުރުމަށްޓަކައި ގާނޫނީ ފިޔަވަޅު އަޅާނެ ކަމުގެ އިންޒާރު ވެސް އެމްބަސީން ވަނީ ދީފަ އެވެ.

އިނގިރޭސިވިލާތުގެ ކައުންޓަރ ޓެރަރިޒަމް ފުލުހުންނާ ހަވާލާދީ ރިޕޯޓުކޮށްފައިވާ ގޮތުގައި، މި ހާދިސާއާ ގުޅިގެން އުމުރުން 20 އަހަރުގެ ފަސް ފިރިހެނަކު ވަނީ ހައްޔަރުކޮށްފަ އެވެ. ހައްޔަރުކުރި ފަސް މީހުންނަކީ ވެސް އިނގިރޭސިވިލާތުގެ ރައްޔިތުންނެވެ.

މި މަހުގެ ކުރީކޮޅު އިސްރާއީލުގެ ނޫހެއް ކަމަށްވާ "ހާރެޓްޒް" އިން ޝާއިއުކުރި ރިޕޯޓުގައި ބުނެފައިވަނީ، ޣައްޒާގައި މިހާރު ހިންގަމުންދާ ގަތުލުއާންމަށް މަގުފަހިވި 2023 އޮކްޓޯބަރު 7 ގެ ހަމަލާގެ ކުޑަދުވަސްކޮޅެއް ކުރިން، ހަމާސްއިން ދޭން އުޅޭ ހަމަލާއެއްގެ އިންޒާރު ޔުނައިޓެޑް އެރަބް އެމިރޭޓްސް (ޔޫއޭއީ)ގެ ރައީސް މުހައްމަދު ބިން ޒައިދު އަލް ނަހްޔާން އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އަށް ދެއްވި ކަމަށެވެ.

އެސޯސިއޭޓެޑް ޕްރެސް (އޭޕީ) އިން ރިޕޯޓުކޮށްފައިވާ ގޮތުގައި، އިސްރާއީލުގެ ބޮޑުވަޒީރު ވަނީ މިދިޔަ އާދިއްތަ ދުވަހު ޔޫއޭއީގެ ރައީސާ ބައްދަލުކުރައްވާފަ އެވެ. އަދި މި ރިޕޯޓުތައް ދޮގުކޮށްދިނުމަށް، ނަތަންޔާހޫ ޔޫއޭއީއަށް ކުރެއްވި މި ދަތުރުފުޅުގެ މައުލޫމާތު ލިބިފައިވާ ނަން ހާމަނުކުރާ މަސްދަރުތަކާ ހަވާލާދީ އޭޕީން އިން ބުނެ އެވެ. 

މިކަމާ ގުޅޭގޮތުން ޔޫއޭއީގެ ފޮރިން މިނިސްޓްރީން ވަކި އެއްޗެއް ބުނަން އިންކާރުކުރި ނަމަވެސް، އެ މިނިސްޓްރީން ބުނީ އިސްރާއީލާއެކު ސީދާ އަދި ހުޅުވާލެވިފައިވާ މުއާމަލާތްތަކެއް ކުރަމުންދާ ކަމަށާއި، ގުޅުންހުރި ހުރިހާ ޖާސޫސީ މައުލޫމާތެއް ހިއްސާކުރަމުންދާ ކަމަށެވެ. އޭޕީން ރިޕޯޓުކުރި މި ވާހަކަތަކާ ގުޅިގެން ނަތަންޔާހޫގެ އޮފީހުން މިހާތަނަށް އެއްވެސް އެއްޗެއް ބުނެފައެއް ނުވެ އެވެ.

ޔުނައިޓެޑް އަރަބް އެމިރޭޓްސް (ޔޫއޭއީ) ގެ ރައީސް މުޙައްމަދު ބިން ޒައިދު އަލް ނަޙްޔާން އާއި އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ

ހުރްމުޒް ކަނޑުއޮޅީގެ ފުރިހަމަ ކޮންޓްރޯލް އީރާނުގެ ރިވޮލިއުޝަނަރީ ގާޑުންގެ އަތްދަށުގައި އޮތް ކަމަށް އެ ގައުމުގެ އަސްކަރިއްޔާގެ އިސް ކޮމާންޑަރަކު ވިދާޅުވި ވާހަކަތަކަށް އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ރައްދު ދީފި އެވެ. 

އެ ވާހަކަތައް ދޮގުކުރަމުން ސެންޓްކޮމް އިން ބުނީ، އެމެރިކާގެ ސިފައިން އީރާނުގެ މަނަވަރުތައް ފައްތާލާފައިވާތީ އީރާނުގެ ކަނޑުގެ ސިފައިންގެ ފައުޖެއް މިހާރު ނެތް ކަމަށެވެ.

މީގެއިތުރުން ވޭތުވެދިޔަ މަސްތަކުގެ ތެރޭގައި އެއް ބިލިއަނަށްވުރެ ގިނަ ތެޔޮ ފީފާ އެ ކަނޑުއޮޅިން ދަތުރުކޮށްފައިވާ ކަމަށާއި މިއީ އިސްތިރާތީޖީ ގޮތުން މުހިންމު އެ ކަނޑުއޮޅީގެ ކޮންޓްރޯލް އީރާނުގެ އަތްދަށުގައި ނެތްކަމުގެ ހެއްކެއް ކަމަށް ވެސް ސެންޓްކޮމް އިން ބުނެފައިވެ އެވެ. 

އީރާނުގެ އަސްކަރިއްޔާގެ ޗީފް އޮފް ސްޓާފް އެޑްމިރަލް ހަބީބުﷲ ސައްޔާރީ ވިދާޅުވީ، އެމެރިކާއާއި އިސްރާއީލުން ކޮންމެފަދަ ވާހަކަތަކެއް ފެތުރި ނަމަވެސް، ހަގީގަތަކީ ހުރްމުޒް ކަނޑުއޮޅި އޮތީ އީރާނުގެ ފުރިހަމަ ކޮންޓްރޯލްގެ ދަށުގައި ކަމަށެވެ.

އޭނާ ވިދާޅުވީ، އޮމާން ކަނޑުގެ އުތުރު ސަރަހައްދާއި ހުރްމުޒް ކަނޑުއޮޅީގެ އިރުމަތީ ސަރަހައްދުގައި އީރާނުން ވަރަށް ސާބިތުކަމާއެކު ހަރަކާތްތެރިވަމުންދާ ކަމަށާއި، އެއްވެސް ފަރާތަކަށް އެ ސަރަހައްދު ހުރަސްކުރުމުގެ ފުރުސަތު ނުދޭނެ ކަމަށެވެ.

މީގެއިތުރުން ހުރްމުޒް ކަނޑުއޮޅީގެ ހުޅަނގު ފަރާތާއި، ކަނޑުއޮޅި ހިމެނޭ ސަރަހައްދުގެ އިތުރުން ޕާޝިއަން ގަލްފް އޮތީ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) ގެ ކަނޑުގެ ސިފައިންގެ ފުރިހަމަ ބާރުގެ ދަށުގައި ކަމަށާއި އަދި ހުރްމުޒް ކަނޑުއޮޅީގެ އިރުމަތީ ސަރަހައްދާއި އިންޑިއާ ކަނޑުގެ އުތުރު ސަރަހައްދު ބަލަހައްޓަމުންދަނީ ވެސް އީރާނުގެ ކަނޑުގެ ސިފައިން ކަމަށް ވެސް ސައްޔާރީ ވިދާޅުވި އެވެ. 

އޮމާންގެ މުސަންދަމް ސަރަހައްދުން ފެންނަ ގޮތުގައި، ހުރްމުޒް ކަނޑުއޮޅި ކައިރީގައި ބައެއް އުޅަނދުފަހަރު ދަތުރުކުރަނީ

ޔޫރަޕިއަން ޔޫނިއަން (އީޔޫ) ގެ ޚާރިޖީ ސިޔާސަތާ ބެހޭ އެންމެ އިސްވެރިޔާ ކާޖާ ކަލަސް ވިދާޅުވީ، ރަތްކަނޑުން ދަތުރުކުރާ އުޅަނދުފަހަރުގެ ސަލާމަތާއި ރައްކާތެރިކަން ކަށަވަރުކުރުމަށް "އެސްޕައިޑްސް" ގެ ނަމުގައި ހިންގާ ބައިނަލްއަގުވާމީ ކަނޑުގެ މިޝަނަށް އިތުރު މަނަވަރުތައް ބޭނުންވާ ކަމަށެވެ. އެގޮތުން މި މިޝަނަށް އިތުރު އެހީތެރިކަން ފޯރުކޮށްދިނުމަށް މެންބަރު ގައުމުތަކުގައި އެދެމުންދާ ނަމަވެސް، މިހާތަނަށް އެއްވެސް ގައުމަކުން އެކަމަށް ރަސްމީކޮށް އިޖާބަދީ، ވަކި އެއްބަސްވުމަކަށް އައިސްފައިނުވާ ކަމަށެވެ. 

ޔަމަނުގެ ހޫޘީ ހަނގުރާމަވެރިން ރަތްކަނޑުން ދަތުރުކުރާ މުދާ އުފުލާ ބޯޓުފަހަރަށް ދެމުންދާ ހަމަލާތަކުން ސަލާމަތްކުރުމަށްޓަކައި، އީޔޫއިން މި ކަނޑުގެ މިޝަން ފަށާފައިވަނީ 2024 ވަނަ އަހަރުގެ ފެބްރުއަރީ މަހުގަ އެވެ. މި މިޝަންގެ ދަށުން ރަތްކަނޑާއި، އަދަން ކަނޑުއޮޅި އަދި އެ ސަރަހައްދުގެ ވަށައިގެންވާ ކަނޑުގެ ސަރަހައްދުތަކަށް ޔޫރަޕްގެ މަނަވަރުތަކާއި ވައިގެ މަގުން ދުރާލާ އިންޒާރުދޭ ނިޒާމުތައް ވަނީ ފޮނުވާފަ އެވެ.

މި މަހުގެ ކުރީކޮޅު ހޫތީން ހޯދި ބޮޑެތި ކުރިއެރުންތަކާއެކު، އެ ޖަމާއަތުގެ ހަނގުރާމަވެރިން މިހާރު ތިބީ އެފްރިކާގެ އައްސޭރިފަށާ އެންމެ 20 ކިލޯމީޓަރު ކައިރީގަ އެވެ. މީގެ އިތުރުން، ރަތްކަނޑުގެ ކަނޑުގެ ދަތުރުފަތުރުގައި އިސްތިރާތީޖީ ގޮތުން ނުހަނު މުހިންމު ސަރަހައްދެއް ކަމަށްވާ ބާބުލް މަންދަބް ކަނޑުއޮޅީގެ ފުރިހަމަ ކޮންޓްރޯލް މިހާރު އޮތީ ހޫޘީންގެ އަތްދަށުގަ އެވެ.

ޔަމަނުގެ ހޫޘީން އެ ގައުމުގެ މުޚާ ބަނދަރު ހިފައި، ބާބުލް މަންދަބު ކަނޑުއޮޅި ވެސް ވަނީ އެ ޖަމާއަތުގެ ބާރުގެ ދަށަށް ގެންގޮސްފައި

ހަނގުރާމައިގެ ސަބަބުން ސުންނާފަތިވެފައިވާ ޣައްޒާއަށް ފާއިތުވި 24 ގަޑިއިރުގެ ތެރޭގައި އިސްރާއީލުން ދިން ހަމަލާތަކުގައި ހަތަރު މީހުން މަރުވެ، 24 މީހުން ޒަޚަމްވެއްޖެ އެވެ.

ޣައްޒާގެ ސިއްހަތާ ބެހޭ ވުޒާރާއިން ހާމަކޮށްފައިވާ ގޮތުގައި، މިދިޔަ އޮކްޓޫބަރު މަހު "ސުލްހައިގެ އެއްބަސްވުމެއް" ގާއިމުކުރި ފަހުން މިހާތަނަށް 1،421 މީހުން މަރުވެ، 4،983 މީހުން ވަނީ ޒަޚަމްވެފަ އެވެ.

އިސްރާއީލުން ޣައްޒާގެ ރައްޔިތުން ނައްތާލުމަށް 2023 ވަނަ އަހަރުގެ އޮކްޓޫބަރު މަހު ފެށި ލާއިންސާނީ ހަނގުރާމައިގައި، މިހާތަނަށް ފަލަސްތީނުގެ މަދުވެގެން 74،022 މީހުން މަރާލާފައިވާއިރު، 175،980 މީހުން ވަނީ ޒަޚަމްކޮށްލާފަ އެވެ.

އިސްރާއީލުން ދިން ހަމަލާއެއްގައި ޝަހީދުވި އުމުރުން އެންމެ 8 އަހަރުގެ އަންހެން ކުއްޖެއްގެ ކަށުނަމާދު ކުރަނީ

އީރާނުގެ ބޭރު ފައިސާގެ މިނިވަން ބާޒާރުގެ ރޭޓުތައް ބަލަހައްޓާ ވެބްސައިޓުން ހާމަކޮށްފައިވާ ގޮތުގައި، އެ ގައުމުގެ މިނިވަން ބާޒާރުގައި އެމެރިކާ ޑޮލަރެއްގެ އަގު މިހާރު ވަނީ ރެކޯޑް މިންވަރެއް ކަމަށްވާ 2.3 މިލިއަން ރިއާލަށް އަރާފަ އެވެ.

އީރާނުގެ ފައިސާގެ އަގު މިހާ ބޮޑަށް ވެއްޓިފައި މިވަނީ، ބައިނަލްއަގުވާމީ އިގުތިސާދުން ތެހެރާން އެކަހެރިކުރުމަށް އަމާޒުކޮށް "އޮޕަރޭޝަން އިކޮނޮމިކް އައުޓްކާސްޓް" ގެ ނަމުގައި އެމެރިކާއިން އަލަށް އެޅި ދަތިކުރުމުގެ ފިޔަވަޅުތަކާއެކު، އެ ގައުމުގެ އިގުތިސާދަށް ބޮޑެތި ގޮންޖެހުންތަކެއް ކުރިމަތިވެފައިވާ ދަނޑިވަޅެއްގަ އެވެ.

އީރާނުގެ އަހަރީ އިންފްލޭޝަން ރޭޓް މިހާރު ވަނީ 61.4 އިންސައްތައަށް އަރާފަ އެވެ. ރަސްމީ ތަފާސްހިސާބުތަކުން ދައްކާ ގޮތުގައި، ވޭތުވެދިޔަ އަހަރާ އަޅާބަލާއިރު އެ ގައުމުގައި ކާބޯތަކެތީގެ އަގުތައް ވަނީ 128.1 އިންސައްތައަށް އުފުލިފަ އެވެ.

އެމެރިކާ އިސްވެ އޮވެ، ގިނަ ޤައުމުތަކުން އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކަށް އެތައް އަހަރެއް ވެފައިވާއިރު، އެ ފިޔަވަޅުތަކުގެ ސަބަބުން އެ ގައުމުގެ އިގުތިސާދު ވަނީ ވަރަށް ބޮޑަށް އިނދަޖެހިފައި

އެމެރިކާއިން އީރާނުގެ ވައިގެ ދަތުރުފަތުރުގެ ދާއިރާއަށް އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން ފްލައިޓްތައް ކެންސަލް ކުރަން ޖެހުމާ ގުޅިގެން، އެ މައްސަލަ އީރާނުން އދ. ގެ ވައިގެ ދަތުރުފަތުރާ ބެހޭ އިދާރާ ކަމަށްވާ އިންޓަނޭޝަނަލް ސިވިލް އޭވިއޭޝަން އޯގަނައިޒޭޝަން (އައިކާއޯ) އަށް ހުށަހަޅައިފި އެވެ.

ކެނެޑާގެ މޮންޓްރިއަލްގައި މަރުކަޒުވެފައިވާ އައިކާއޯއަކީ މަދަނީ ވައިގެ ދަތުރުފަތުރުގެ މިންގަނޑުތައް ކަނޑައަޅައި، އެ ދާއިރާ ރެގިއުލޭޓް ކުރާ އދ. ގެ އިދާރާ އެވެ.

އީރާނުގެ ސިވިލް އޭވިއޭޝަންގެ އިސްވެރިޔާ އަބޫޒަރު ޝިރޫދީ ވިދާޅުވީ، ވައިގެ ދަތުރުފަތުރުގެ ސިނާއަތުގެ ގާނޫނީ ހައްގުތައް ހިމާޔަތްކުރުމަށާއި އެމެރިކާއިން އަޅާފައިވާ ޣައިރު ގާނޫނީ ހުރަސްތަކާ ދެކޮޅަށް މަސައްކަތް ކުރުމަށްޓަކައި، އީރާނުގެ ފޮރިން މިނިސްޓްރީއާ ގުޅިގެން، ނެދަލޭންޑްސްގެ ދަ ހޭގްގައި ހުންނަ ބައިނަލްއަގުވާމީ ކޯޓް އޮފް ޖަސްޓިސް (އައިސީޖޭ) އަށް ވެސް މި މައްސަލަ މިހާރު ހުށަހަޅާފައިވާ ކަމަށެވެ.

ފްރެންކްފަރޓުގެ އެއާޕޯޓެއްގައި އީރާން އެއާގެ އެއާބަސް 330-200 މަރުކާގެ މަތިންދާބޯޓެއް ޖައްސަނީ

އީރާނުގެ ރޫހާނީ ލީޑަރު މުޖުތަބާ ޚާމަނާއީ ވިދާޅުވީ، އީރާނުގެ ދެކުނުގެ ކަނޑުގެ ސަރަހައްދުތަކުން "ދުޝްމަނުން" ފަހަތަށް ޖައްސައި، މިހާރު އެ ފަރާތްތައް އަރަބި ކަނޑާ ހަމައަށް ފޮނުވާލުމަށް އީރާނުގެ އަސްކަރިއްޔާއަށް ކާމިޔާބުވެފައިވާ ކަމަށެވެ.

ޚާމަނާއީ ވިދާޅުވީ، އީރާނުގެ ހިތްވަރުގަދަ މުޖާހިދުންނާއި ހުރްމުޒް ކަނޑުއޮޅީގެ ފާރަވެރިންގެ ފަރާތުން ލިބުނު ވަރުގަދަ ހަމަލާތަކުގެ ސަބަބުން، އަރަބި ކަނޑުން ބޭރަށް ނުކުންނަން ދުޝްމަނުންނަށް މިހާރު ނުކެރޭ ކަމަށެވެ.

މީގެ އިތުރުން ޚާމަނާއީ ވިދާޅުވީ، ދުޝްމަނުން އީރާނުގެ ސަރަހައްދަށް ވަނުމަށް މަސައްކަތް ކުރި ކޮންމެ ފަހަރަކު އެ މީހުންނަށް ލިބުނީ ބޮޑެތި ގެއްލުންތަކެއް ކަމަށެވެ. އަދި އަރަބި ކަނޑުގެ ސަރަހައްދުން ވެސް ދުޝްމަނުންގެ އެއްވެސް ނިޝާނެއް ނެތް ގޮތަށް އެ ސަރަހައްދު ސާފުކޮށްލާނެ ވަގުތު ވަރަށް އަވަހަށް އަންނާނެ ކަމަށް ވެސް އޭނާ ވިދާޅުވި އެވެ.

އީރާނުގެ ރޫހާނީ ލީޑަރު މުޖުތަބާ ޚާމަނާއީގެ ފޮޓޯފުޅު ހިމެނޭ ބެނާއެއްގެ ކައިރީގައި، އެ ގައުމުގެ މިސައިލްތަކެއް

އެމެރިކާގެ ނިއުޔޯކް ސިޓީގައި ބޭއްވި އދ. ގެ އާންމު މަޖިލީހުގެ 81 ވަނަ ސެޝަނުގައި ބައިވެރިވެވަޑައިގަތުމަށްޓަކައި، ސައުދީ އަރަބިއްޔާގެ ޚާރިޖީ ވަޒީރު ޕްރިންސް ފައިސަލް ބިން ފަރްހާން އަލް-ސައުދު. 22 ސެޕްޓެމްބަރު 2026

ސައުދީ އަރަބިއްޔާގެ ޚާރިޖީ ވަޒީރު ޕްރިންސް ފައިސަލް ބިން ފަރްހާން، އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯއާ ބައްދަލުކުރެއްވުމަށް ހޯމަ ދުވަހު ވޮޝިންޓަނަށް ވަޑައިގެންފި އެވެ. މި ދަތުރުފުޅަކީ ސައުދީ އަރަބިއްޔާއާއި ޔަމަނުގެ ހޫޘީންނާ ދެމެދު ހަމަލާ ބަދަލުކުރުންތައް އިތުރުވެފައިވާ ދަނޑިވަޅެއްގައި ކުރައްވާ ދަތުރުފުޅެކެވެ.

މި ބައްދަލުވުމުގައި ދެ ގައުމުގެ ދެމެދުގައި އޮތް ގުޅުން އިތުރަށް ބަދަހިކުރުމާ ގުޅޭގޮތުންނާއި، ސަރަހައްދީ އަދި ބައިނަލްއަގުވާމީ މުހިންމު ކަންތައްތަކާ ބެހޭގޮތުން ދެ ބޭފުޅުން މަޝްވަރާ ކުރައްވާނެ އެވެ.

ހޫޘީންނާ ދެކޮޅަށް އެމެރިކާގެ އަސްކަރީ އެހީތެރިކަމަށް ސައުދީ ވަލީއަހުދު މުހައްމަދު ބިން ސަލްމާން މި ސެޕްޓެމްބަރުމަހުގެ ކުރީކޮޅު އެދިވަޑައިގެންފައިވެ އެވެ. ނަމަވެސް، ހޫޘީންނަށް އަމާޒުކޮށް ހަމަލާތައް ދިނުމަށް އެމެރިކާއިން އިންކާރުކޮށްފައިވާ ކަމަށާއި، ޖާސޫސީ މައުލޫމާތާއި ހަމަލާދޭނެ އަމާޒުތައް ދެނެގަތުމުގައި އެހީތެރިކަން ފޯރުކޮށްދިނުމަށް އެމެރިކާއިން އެއްބަސްވެފައިވާ ކަމަށް މަސްދަރުތަކާ ހަވާލާދީ ރޮއިޓާސް އިން ރިޕޯޓުކުރެ އެވެ. 

އެމެރިކާގެ ކަނޑުގެ އަސްކަރިއްޔާއިން އީރާނުގެ ދެކުނު ބަނދަރުތަކަށް ވަދެ ނުކުމެވޭ މަގުތައް ބަންދުކުރުމާ ގުޅިގެން، މުދާ އެތެރެކުރުމަށް ބުރޫއަރައި، ތުރުކީ ބޯޑަރުގައި އެތައް ހަފުތާއެއް ވަންދެން މުދާ އުފުލާ ލޮރީތައް ތާށިވެފައި އޮތުމުން، އީރާނުން އެއްގަމު މަގުން ވިޔަފާރިކުރުމަށް އިސްކަންދޭން ފަށައިފި އެވެ.

އީރާނުގެ ދެކުނު ބަނދަރުތަކަށް ވަނުމަށް ހުރި ހުރަސްތަކުގެ ސަބަބުން މުދާ އެތެރެކުރުމަށް ދަތިތަކާ ކުރިމަތިވަމުންދާތީ، އެ ގައުމުން މިހާރު ދަނީ ކަނޑުގެ މަގުތަކުގެ ބަދަލުގައި އެއްގަމު ބޯޑަރުތައް މެދުވެރިކޮށް ވިޔަފާރިކުރުން އިތުރުކުރަމުންނެވެ.

މި ބަދަލާ ގުޅިގެން އަވަށްޓެރި ގައުމުތަކާ ގުޅޭ ބޯޑަރުތަކަށް ވަނީ ބާރުބޮޑުވެފަ އެވެ. ވަކިން ހާއްސަކޮށް ތުރުކީއާ ގުޅޭ މައި ބޯޑަރު ސަރަހައްދުގައި މުދާ އުފުލާ ލޮރީތަކުގެ ކިއޫތައް މިހާރު އެތައް ކިލޯމީޓަރަކަށް ދެމިގެން ގޮސްފައިވާއިރު، މުދާ އުފުލުމުގައި ދިމާވާ ލަސްތައް އެތައް ދުވަހަކަށް ނުވަތަ ހަފުތާތަކަކަށް ދަނީ ދިގުލަމުންނެވެ.

ތުރުކީވިލާތުގެ އިރުމަތީގައިވާ އަގްރީ ޕްރޮވިންސްގައި ހުންނަ، އީރާނާއި ތުރުކީ ގުޅޭ ގުރްބުލަކް ބޯޑަރު ހުރަސްކުރުމަށްޓަކައި ގިނަ އަދަދެއްގެ ލޮރީތައް ކިއޫ ހަދާފައި

މީގެ ދެ ހަފުތާ ކުރިން ހުރްމުޒް ކަނޑުއޮޅިން ދަތުރުކުރި އެމެރިކާގެ ކޮންޓްރެކްޓް އުޅަނދަކަށް އީރާނުން ދިން ކްރޫޒް މިސައިލް ހަމަލާއެއްގައި، އެ އުޅަނދުގައި ތިބި އެމެރިކާގެ ކަނޑުގެ ސިފައިންގެ 8 މީހަކު ޒަޚަމްވެފައިވާ ކަމަށް އެމެރިކާގެ ތިން އޮފިޝަލަކާ ހަވާލާދީ އެންބީސީ ނިއުސް އިން ރިޕޯޓްކޮށްފި އެވެ.

މި ހަމަލާގައި އެ ސިފައިންނަށް ދުމުގެ އަސަރުކޮށްފައިވާއިރު، ސިކުނޑިއަށް ސީރިއަސް އަނިޔާތަކެއް ލިބިފައިވުން އެކަށީގެންވާ ކަމަށް އޮފިޝަލުން ވިދާޅުވެފައިވެ އެވެ.

މި ހަމަލާ ދިން ވަގުތު އެމެރިކާގެ ކަނޑުގެ ސިފައިން ތިބީ އެމެރިކާގެ އަސްކަރީ މަނަވަރެއްގެ ބަދަލުގައި، އެމެރިކާ ސަރުކާރުން ކޮންޓްރެކްޓް އުސޫލުން ބޭނުންކުރާ އަމިއްލަ ކުންފުންޏެއްގެ ވިޔަފާރި އުޅަނދެއްގަ އެވެ. އީރާނުން ދިން މި ހަމަލާގެ މައުލޫމާތު މީގެ ކުރިން އެއްވެސް އިދާރާއަކުން ހާމަކޮށްފައެއް ނުވެ އެވެ.

އެމެރިކާގެ ދިފާއީ ވުޒާރާ، ޕެންޓަގަންއިން މި ހަފުތާގައި ވަނީ ހަމަލާތަކުގައި ޒަޚަމްވާ ސިފައިންގެ ރަސްމީ ދަފުތަރަށް، މި ހަމަލާގައި އަނިޔާވި 8 ކަނޑުގެ ސިފައިންގެ މައުލޫމާތު ސިއްރިއްޔާތުގައި އިތުރުކޮށްފަ އެވެ.

ޔޫއެސް މެރިންސްގެ 31 ވަނަ މެރިން އެކްސްޕެޑިޝަނަރީ ޔުނިޓުގެ ސިފައިންނާއި ފަޅުވެރިން ގުޅިގެން، އީރާނާ ދެކޮޅަށް ހިންގާ ދަތިކުރުމުގެ އޮޕަރޭޝަންތަކަށް އެހީތެރިކަން ފޯރުކޮށްދެނީ- ފައިލް ފޮޓޯ

އިނގިރޭސިވިލާތުގެ ފުލުހުން ބުނި ގޮތުގައި، މިދިޔަ އާދީއްތަ ދުވަހުގެ ފަތިހުގެ ވަގުތެއްގައި، ޝައްކުކުރެވޭ ތިން އުޅަނދެއް އާރްއޭއެފް ފެއަރފޯޑް އެއަރބޭސް ދިމާލަށް ދަތުރުކުރާ ކަމުގެ ރިޕޯޓު ލިބުމާ ގުޅިގެން، ހަތިޔާރު އެޅި ފުލުހުން ވަނީ އެ އުޅަނދުތައް ހުއްޓުވައި ތުހުމަތުކުރެވޭ ފަސް މީހުން ހައްޔަރުކޮށްފަ އެވެ.

އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، ހައްޔަރުކުރި މީހުން ރޭވީ "ބޮޑު ގެއްލުމެއް" ދިނުމަށް ކަމަށާއި، އިނގިރޭސިވިލާތާއި އެމެރިކާގެ ކަމާބެހޭ އިދާރާތަކުން ގުޅިގެން މި މައްސަލަ ތަހުގީގު ކުރަމުންދާ ކަމަށެވެ. 

ފެއަރފޯޑް އެއަރބޭސްއަކީ ގިނަ ދުވަސްތަކެއް ވަންދެން އެމެރިކާ އާއި ނޭޓޯގެ ފައުޖުތަކުން ބޭނުންކުރަމުން އަންނަ ތަނެކެވެ. މިދިޔަ މާރޗު މަހުން ފެށިގެން އެމެރިކާއިން އެ މަރުކަޒު ބޭނުންކުރަމުންދަނީ އީރާނަށް ހަމަލާދިނުމަށެވެ. އަދި ހުރްމުޒް ކަނޑުއޮޅިން ދަތުރުކުރާ އުޅަނދުތަކަށް އަމާޒުކޮށް އީރާނުން ފޮނުވާ މިސައިލްތައް ހުންނަ ސަރަހައްދުތަކަށް ހަމަލާދިނުމަށް، އެ ބޭސްގައި އޮންނަ އެމެރިކާގެ ބޮންއަޅާ ބޯޓުތަކަށް އިނގިރޭސި ސަރުކާރުން ވަނީ ހުއްދަ ދީފަ އެވެ.

އިނގިރޭސިވިލާތުގެ ފެއަރފޯޑްގައި ހުންނަ، އެމެރިކާގެ އެއަރ ފޯސް ސިފައިން ތިބޭ އާރްއޭއެފް ފެއަރފޯޑް އެއަރބޭސް ކައިރީގައި އޮންނަ މަގެއް ފުލުހަކު ބަންދުކުރަނީ