ނިންމުން 2026

މާލެ ޖަމާލުއްދީން ސްކޫލްގައި ބެހެއްޓިފައިވާ ފުވައްމުލަކު އުތުރު، ދަނޑިމަގު އަވަށާއި ދިގުވާނޑު އަވަށުގެ ވޯޓު ފޮށީގެ ވޯޓު ޓެލީކުރުން ކުރިއަށް ނުގޮސް ވާ ކަމަށް އެ ފޮށީގެ މޮނިޓަރަކު ވަނީ ރާއްޖެ އެމްވީ އަށް މައުލޫމާތު ދީފަ އެވެ. އެ ވޯޓު ފޮށި 5 ޖެހި އިރު ބަންދު ކުރި ނަމަވެސް ޓެލީ ނުކުރެވޭ ކަމަށް އޭނާ ވަނީ ބުނެފަ އެވެ. އެ ވޯޓު ފޮށި ނުގުނިގެން އުޅެނީ ސިސްޓަމްގެ މައްސަލަ އަކުން ކަމަށް އިލެކްޝަންސް ކޮމިޝަނުން ވަނީ ބުނެފަ އެވެ.

އެ ވޯޓު ފޮށި ބަހައްޓާފައި ހުރީ ޖަމާލުއްދީން ސްކޫލްގަ އެވެ. ދެ ދާއިރާ އެއްގެ ވޯޓުތައް އެއް ފޮށްޓަކަށް ލުމުން މައްސަލަ ދިމާވި ކަމަށް ވެސް އޮފިޝަލް ވިދާޅުވި އެވެ. މި މައްސަލަ ހައްލުކުރުމަށް އެކަށީގެންވާ ސަމާލުކަމެއް އީސީ އިން ނުދޭ ކަމަށް އެ އޮފިޝަލް ވިދާޅުވި އެވެ. 

ރައްޔިތުން މިއަދު މިވަނީ ސަރުކާރުގެ ސިޔާސަތުތަކަށް ނޫނެކޭ ބުނެފަ ކަމަށް ކުރީގެ ރައީސް އިބްރާހިމް މުހައްމަދު ސޯލިހް ވިދާޅުވެއްޖެ އެވެ.

އެކްސްގައި ކުރެއްވި ޕޯސްޓެއްގައި ރައީސް ސޯލިހު ވިދާޅުވީ   ރައްޔިތުން މި އަދު އެބުނީ ސަރުކާރު ކުރިއަށްދާ މިސްރާބު ބަދަލުކުރަން ޖެހިއްޖެ ވާހަކަ ކަމަށެވެ. އަދި ސަރުކާރުން ލަސްނުކޮށް ކުރަންވީ ކަމަކީ ރައްޔިތުންގެ އަޑު އަހައި ރައްޔިތުން އެދޭގޮތަށް ސިޔާސަތުތަކަށް ބަދަލު ގެނައުން ކަމަށް ވެސް އެ މަނިކުފާނު ވިދާޅުވި އެވެ. 

ހޮނިހިރު ދުވަހު ބޭއްވި ކައުންސިލް އަދި ޑަބްލިއުޑީސީ އިންތިޚާބު ކާމިޔާބު ކުރި އިންތިޚާބީ މޭޔަރުން، ކައުންސިލު ރައީސުންް، ޑަބްލިއުޑީސީގެ ރައީސުން އަދި އިންތިޚާބު ކާމިޔާބު ކުރެއްވި ހުރިހާ ކެންޑިޑޭޓުންނަށް ކުރީގެ ރައީސް އި ސޯލިހު މަރުޚަބާ ވިދާޅުވި އެވެ. އަދި އެމްޑީޕީގެ ކެންޑިޑޭޓުންނަށް ވޯޓު ދެއްވި ހުރިހާ ރައްޔިތުންނަށް އެ މަނިކުފާނު ވަނީ ޝުކުރު އަދާކުރައްވާފަ އެވެ.

ހޮނިހިރު ދުވަހު ބާއްވާފައިވާ ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބު އަދި ރައްޔިތުންގެ ޚިޔާލު ހޯދުމުގެ ޢާންމު ވޯޓުގެ އިންތިޚާބުން، އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އަށް ލިބުނު ކާމިޔާބީ ފާހަގަކުރުން އާޓިފިޝަލް ބީޗްގައި ކުރިއަށް ދަނީ އެވެ. 

ފެނިގެންދިޔައީ މުޅި ރާއްޖެ އަލުން ރަން ރީނދޫވި މަންޒަރު ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެ އެވެ. ޝާހިދު އެފަދައިން ވިދާޅުވީ ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބު އަދި ރައްޔިތުންގެ ޚިޔާލު ހޯދުމުގެ ޢާންމު ވޯޓުގައި އެމްޑީޕީ އިން އެކްސްގައި ކުރެއްވި ޕޯސްޓެއްގަ އެވެ.

އިންތިޚާބުގެ ނަތީޖާ އިޙްތިރާމާއެކު ބަލައިގަންނަ ކަމަށް ރައީސް ޑރ.މުހައްމަދު މުއިއްޒު ވިދާޅުވެއްޖެ އެވެ.

އެކްސްގައި ހިއްސާކުރެއްވި ޕޯސްޓެއްގައި ހޮނިހިރު ދުވަހު ބޭއްވުނު ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބު އަދި ރައްޔިތުންގެ ޚިޔާލު ހޯދުމުގެ ޢާންމު ވޯޓުގެ ނަތީޖާ ގަބޫލުކުރައްވާކަން އެ މަނިކުފާނު ވަނީ ހާމަކުރައްވާފަ އެވެ.

 ކުރިމަތިވި ގޮންޖެހުންތަކުން އަރައިގަނެ އެމްޑީޕީގެ ލީޑަރޝިޕް އެކަތިގަނޑަކަށްވެ ކުރެއްވި ނަމޫނާ މަސައްކަތުގެ ސަބަބުން މިއަދު ބޭއްވި އިންތިޚާބުގައި ލިބުނީ ފުރިހަމަ ކާމިޔާބީ އެއް ކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެ އެވެ. އިންތިޚާބު ކާމިޔާބު ކުރި ކެނޑިޑޭޓުންނަށް މަރުޚަބާ ދަންނަވާ އެކްސްގައި ހިއްސާކުރެއްވި ޕޯސްޓެއްގައި ފައިސަލް ވަނީ  މި އިންތިޚާބަށް ނުފޫޒު ފޯރުވަން ސަރުކާރުން ކުރި އެންމެހާ ކަންތަކާއި އެކުވެސް އިންތިޚާބު ކާމިޔާބު ކުރެވިފައިވާތީ އެކަމާއި މެދު އުފާފާޅުކުރައްވާފަ އެވެ. 

 މިހާރު ސިޓީތަކުގެ މޭޔަރުކަން ކުރަމުންދާ މޭޔަރުންގެ ތަޖުރިބާ ބަލައިގަނެ  ލޯކަލް ކައުންސިލް އިންތިޚާބުގައި އެ ކެނޑިޑޭޓުންނަށް ސީޓީތަކުން އާނއެކޭ ބުނެފި އެވެ. ވަގުތީ ނަތީޖާ އިން ދައްކާ ގޮތުން ސިޓީތަކުގެ މޭޔަރުކަން ހޯއްދަވާފައިވާ ގޮތަށް ބަލާ ނަމަ އައްޑޫގެ މޭޔަރ ކަމަށް އަލީ ނިޒާރު، މާލޭގެ މޭޔަރ ކަމަށް އާދަމް އާޒިމް، ތިނަދޫގެ މޭޔަރ  ކަމަށް ސައުދު އަލީ، ކުޅުދުއްފުށީ މޭޔަ ކަމަށް މުހައްމަދު އާތިފް، ފުވައްމުލައް މޭޔަރ ކަމަށް އިސްމާއީލް ރަފީގް ވަނީ ހޮވިފަ އެވެ.

ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު އަދި ރައްޔިތުންގެ ޚިޔާލު ހޯދުމުގެ ޢާންމު ވޯޓު 2026 ގެ ވޯޓުގައި އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ހޯދި ކާމިޔާބީގެ އަސްލަކީ އެމްޑީޕީގެ ހިތްވަރުގަދަ މެމްބަރުން ކަމަށް އެމްޑީޕީގެ ކުރީގެ ޗެއަރޕަރަސަން ފައްޔާޒް އިސްމާއިލް ވިދާޅުވެއްޖެ އެވެ.

އޭނާ އެފަދައިން ވިދާޅުވީ އޭނާ އެކްސްގައި ހިއްސާކުރެއްވި ޕޯސްޓެއްގަ އެވެ. އެ ޕޯސްޓުގައި އިންތިޚާބު ކާމިޔާބުކުރެއްވި  އެމްޑީޕީގެ ކައުންސިލަރުންނާއި، ޑަބްލިއުޑީސީ މެންބަރުންނަށް ފައްޔާޒް ވަނީ މަރުޚަބާ ކިޔާފަ އެވެ.

ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލުމަށް ފެނޭތޯ ނުވަތަ ނޫންތޯ ބެލުމަށް ނެގި ވޯޓުގެ ވަގުތީ ނަތީޖާ ދައްކާ ގޮތުން ގިނަ އާއްމުންނަށް އިންތިޚާބުތައް އެއްކޮށްލާކަށް ނުފެނެ އެވެ. ދެ އިންތިހާބު އެއްކޮށްލަން ނުފެންނަ ކަމަށް ބުނެފައިވާ މީހުންގެ އިންސައްތަ ހުުރީ 70 އަށް ވުރެ މަތީގަ އެވެ. 

ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު އަދި ރައްޔިތުންގެ ޚިޔާލު ހޯދުމުގެ ޢާންމު ވޯޓު 2026 ގެ ވޯޓު ގުނުމުގެ މަސައްކަތްތައް މިވަގުތު ކުރިއަށް ދާއިރު، ދިމިޤްރާޠީ އުޞޫލުން ރައްޔިތުން ބައިވެރިވެ ނިންމި ނިންމުން ބަލައިގަތުމަސް ހިއުމަން ރައިޓްސް ކޮމިޝަނުން އިލްތިމާސްކޮށްފި އެވެ. އިންތިހާބުގެ ނަތީޖާއަށް އިޙްތިރާމުރުމަށް ވެސް އެ ކޮމިޝަނުން އެދިފައިވެ އެވެ.

ލޯކަލް ކައުންސިލް އަދި ޑަބްލިއުޑީސީ އާއި ރެފަރެންޑަމް ވޯޓު އިދިކޮޅު އެމްޑީޕީ އިން ކާމިޔާބުކުރުމާއި ގުޅިގެން، ދެން އެންމެ ރީތި ގޮތަކީ ސަރުކާރު އިސްތިއުފާ ދިނުން ކަމަށް ރައްޔިތުންގެ މަޖިލީހުގެ މެމްބަރު ޑރ.އަހުމަދު ޝަމްހީދު ވިދާޅުވެއްޖެ އެވެ. ޝަމްހީދު އެފަދައިން ވިދާޅުވީ އެކްސްގައި އޭނާ ކުރެއްވި ޕޯސްޓެއްގަ އެވެ.

މާލޭގެ މޭޔަރކަމުގެ މަޤާމު ދިފާއުކުރެއްވި އާދަމް އާޒިމް އަށް އެ މަޤާމަށް ވާދަކުރެއްވި އިސްމާއިލް ޒަރިޔަންދު މަރުޚަބާ ވިދާޅުވެއްޖެ އެވެ.

ޒަރިޔަންދު އެކްސްގައި ކުރެއްވި ޕޯސްޓެއްގައި ވިދާޅުވީ އުންމީދަކީ މާލޭގެ ރައްޔިތުންނަށް ކޮރަޕްޝަން ނެތް، ދިރިއުޅެން ހަގީގަތުގައި ވެސް ފަސޭހަ މާލެ އެއް ލިބުން ކަމަށެވެ.

މިއަދު ނެގި ވޯޓުގައި އެމްޑީޕީ އިން ވަރަށް ބޮޑުތަނުން ސަރުކާރު ބަލިވެފައިވާ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

ރައީސް ނަޝީދު އެފަދައިން ވިދާޅުވީ އެ މަނިކުފާނު ކުރެއްވި އެކްސްގައި ކުރެއްވި ޕޯސްޓެއްގަ އެވެ. ހުރިހާ ސިޓީއަކާއި ގިނަ ރަށްތައް އަދި ފެންނަ ނުފެންނަ ވޯޓްގައި ބޮޑުތަނުން ސަރުކާރަށް ނޫނެކޭ ބުނެފައިވާ ކަމަށް ނަޝީދު ވިދާޅުވި އެވެ. ކުރީގެ ރައީސް ނަޝީދު ވަނީ ވޯޓުދެއްވި ހުރިހާ ބޭފުޅުންނަށް ޝުކުރުއަދާކުރައްވާފަ އެވެ.

ފެންނަ ނުފެންނަ ވޯޓުގެ ވަގުތީ ނަތީޖާ އިއުލާން ކުރެވެންދެން ވޯޓުލާ މަރުކަޒު ދޫކޮށް ނުދިއުމަށާއި، އުފާފާޅު ކުރުމުގެ ހަރަކާތްތައް މިވަގުތަށް މަޑުޖައްސާލުމަށް ޕާޓީގެ މެންބަރުންގެ އަރިހުން އެމްޑީޕީގެ ޗެއަރޕާސަން ވަނީ އެދިވަޑައިގެންފައި.

ވަގުތީ ނަތީޖާ ދައްކާ ގޮތުން ފުވައްމުލަކުގެ މޭޔަރުކަމުގެ ރޭހުގައި ކުރީގައި އުޅުއްވަނީ އިސްމާއިލް ރަފީގު އެވެ.

ހޮނިހިރު ދުވަހު ފުލުހުން ބުނީ، އިންތިޚާބުގެ ކަންކަން ކުރިއަށް ދިޔައިރު ސަލާމަތީ ގޮތުން ފާހަގަކުރެވޭ ފަދަ ބޮޑު ކަމެއް ހިނގާފައި ނުވާ ކަމަށެވެ. އަދި އިންތިޚާބާ ގުޅުންހުރި އެއްވެސް މައްސަލައެއްގައި ފުލުހުންގެ ބެލުމުގެ ދަށަށް ގެނެވުނު އެއްވެސް މީހަކު މިވަގުތު ބަންދުގައި ނެތް ކަަމަށެވެ. 

މީގެ އިތުރުން އާއްމު ވޯޓުލުން ކުރިއަށްދިޔައިރު މާލެއާއި އަތޮޅުތަކުގެ ރައްޔިތުންގެ ފަރާތުން ލިބުނު ފުރިހަމަ އެއްބާރުލުން ފުލުހުންގެ ފަރާތުން ފާހަގަކޮށް ޝުކުރު އަދާކޮށްފައިވޭ. 

މިހާތަނަށް ލިބިފަިއވާ ނަތީޖާއިން ދައްކާ ގޮތުން މާލޭގެ މޭޔަރުގެ އިންތިހާބުގައި ކުރި ހޯއްދަވާފައި ވަނީ މިހާރުގެ މޭޔަރ އަދި އެމްޑީިޕީގެ  މޭޔަރު ކެނޑިޑޭޓް އާދަމް އާޒިމް އެވެ.

ކުޅުއްދުއްފުށީ ސިޓީގެ މޭޔަރކަމުގެ ރޭހުގައި މިހާތަނަށް ލިބުނު ނަތީޖާ އިން ދައްކާ ގޮތުން ކުރީގައި އުޅުއްވަނީ މިހާރުގެ ވެސް މޭޔަރ އަދި އެމްޑީޕީގެ ކެނޑިޑޭޓް މުހައްމަދު އާތިފް އެވެ. އޭމާ އަށް 1400 ވޯޓަށް ވުރެ ގިނަ ވޯޓު ލިބިފައިވާ އިރު އޭނާ އާއި ވާދަކުރައްވާ  އިބްރާހިމް ހަސަން އަށް ލިބިވަޑައިގަންނަވާފައި ވަނީ 680 ވޯޓެވެ.

ރިފެރެންޑަމް ވޯޓުގެ ވަގުތީ ނަތީޖާތައް ލިބެމުންދާއިރު، މިހާތަނަށް ގިނަ ބަޔަކު ވޯޓު ދީފައިވަނީ މައި ދެ އިންތިޚާބު އެއްކޮށްލަން ނުފެންނަ ކަމަށް. މިހާތަނަށް ގުނާފައިވާ 1،330 އެއްހާ ވޯޓުގެ ތެރެއިން 67 ޕަސެންޓު މީހުން ދެ އިންތިހާބު އެއް ދުވަހެއްގައި ބާއްވަން ތާއީދެއް ނުކުރޭ.

މިއަދު ކުރިއަށް ދިޔަ އިންތިޚާބުގައި ބެހެއްޓި 588 ފޮށީގެ ތެރެއިން ވޯޓްލުން ނިންމާ ބަންދުކުރެވިފައި ވަނީ 575 ފޮށި ކަމަށް އިލެކްޝަންސް ކޮމިޝަނުން ވަނީ ހާމަކޮށްފަ އެވެ. އަދި 13 ފޮށްޓެއްގެ ވޯޓުލުން ކުރިއަށް ދާ ކަމަށް އެ ކޮމިޝަނުން ބުނެފައިވޭ

މަޖީދީއްޔާ ސްކޫލްގައި ބަހައްޓާފައި ވާ ހެންވޭރު ހުޅަނގު ދާއިރާގެ ވޯޓް ފޮށީގެ ބާތިލް ވޯޓްތައް ގުނާ ގޮތާއި މެދު ޚިޔާލުތަފާތުވެ ހަމަނުޖެހުންތަކެއް ހިނގައިފި އެވެ. މި ހަމަނުޖެހުންތަކުގެ ސަބަބުން އެ ފޮށީގެ ވޯޓު ގުނުން ވަނީ ހުއްޓިފަ އެވެ.

ރިޔާސީ އިންތިޚާބާއި މަޖިލިސް އިންތިޚާބާއި އެއްކޮށްލުމާއި މެދު ނެގި ރެފަރެންޑަމް ވޯޓުގައި ހެންވޭރު އުތުރު ދާއިރާގެ 2 ނަމްބަރު ވޯޓު ފޮށްޓަށް ވޯޓުލީ ފަރާތްތަކުން އިންތިޚާބު އެއްކޮށްލަން ނޫނެކޭ ބުނެފި އެވެ.

ހެންވޭރު އުތުރު-2 ނަމްބަރު ވޯޓު ފޮށްޓަށް ވޯޓުލީ 340 މީހުންނެވެ. އޭގެ ތެރެއިން 66 މީހުން އިންތިޚާބުތައް އެއްކޮށްލަން އާއެކޭ ބުނި އިރު ނޫނެކޭ ބުނެފައި ވަނީ 185 މީހުންނެވެ.

ދެ އިންތިޚާބު އެއްކޮށްލުމަށް ގަލޮޅު ދެކުނު-4 ނަމްބަރު ވޯޓް ފޮށްޓަށް ވޯޓު ލީ ފަރާތްތަކުން ނޫނެކޭ ބުނެފި އެވެ. އެ ވޯޓު ފޮށްޓަށް ވޯޓުލާފައިވާ ގޮތަށް ބަލާ އިރު ރެފަރަންޑަމް ވޯޓުގައި ވޯޓުލާފައި ވަނީ ޖުމްލަ 304 މީހުންނެވެ. އޭގެ ތެރެއިން 224 މީހުން ނޫނެކޭ ބުނި އިރު އާނއެކޭ ބުނަފައި ވަނީ 78 މީހުންނެވެ. އެ ފޮށްޓަށް 2 ބާތިލް ވޯޓު ލާފައި ވެ އެވެ.

‎މިއަދު ކުރިއަށްދިޔަ ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު އަދި ރައްޔިތުންގެ ޚިޔާލު ހޯދުމުގެ ޢާންމު ވޯޓު ހަވީރު 5:00 އާއި ހަމައަށް ނިމިފައި ވާ އިރު، މިހާތަނަށް ބަންދުކުރެވިފައިވަނީ ޖުމްލަ 588 ފޮށީގެ ތެރެއިން 512 ފޮށްޓެވެ.

ބައެއް ދާއިރާތަކުގައި ވޯޓު ގުނުމުގެ މަސައްކަތް ފަށާފައިވާ އިރު، ބައެއް ދާއިރާތަކުގެ ވޯޓު ގުނުން ވަނީ ލަސްކޮށްފަ އެވެ. 

ހއ.ހޯރަފުށި މާކެ-2 ނަމްބަރު ވޯޓު ފޮށީގެ ކިއު ބަންދުކޮށްފި އެވެ. މި ވޯޓު ފޮށީގެ ވޯޓުލުން 17:10 އަށް ނިންމާ 17:40ގައި ވޯޓު ގުނުމަށް ވަނީ ތައްޔާރު ވެފައެވެ.

ހއ އަތޮޅު މަލެ-8 ނަމްބަރު ވޯޓު ފޮށީގެ ކިއު ބަންދުކޮށްފި އެވެ.

ކައުންސިލް އިންތިޚާބާއި ޑަބްލިއުޑީސީ އަދި ރެފަރެންޑަމް ވޯޓުގެ، ކުޅުދުއްފުށި އުތުރު ދާއިރާގެ މާލޭގެ ވޯޓު ފޮށި،  B9-1.1 ވޯޓު ފޮށި ބަންދުކޮށްފި އެވެ.

 އެ ވޯޓު ފޮށްޓަށް ވޯޓުލުމުގެ ހައްގު ލިބިގެން ވަނީ ޖުމްލަ 530 މީހުންނަށެވެ. އެ ވޯޓު ފޮށީގެ ވޯޓުލުން ބަންދުކުރިމާއި ހިސާބަށް ވޯޓުލާފައި ވަނީ 440 މީހުންނެވެ. އެއީ 196 ފިރިހެނުންނާއި 244 އަންހެނުންނެވެ. އެ ވޯޓު ފޮށްޓަށް ވޯޓުލުމުގެ ހައްގު ލިބިގެންވާ މީހުންގެ ތެރެއިން ވޯޓު ނުލަނީ 90 މީހުންނެވެ.

މިހާރު ކުރިއަށް ދާ އިންތިޚާބުގައި މ.ދިއްގަރުގައި މިހާތަނަށް 386 މީހުން ވޯޓުލައިފި އެވެ.  އޭގެ ތެރެގައި ހިމެނެނީ 196 އަންހެނުންނާއި 191 ފިރިހެނުންނެވެ.

ވޯޓުލުން ކުރިއަށް ދާއިރު ސިއްރުކަން ކަށަވަރު ނުވާ ކަމަށް ބުނެ އާއްމުން ދަނީ އަދިވެސް ބައެއް ވޯޓު ފޮށިތައް ކައިރީގައި ޝަކުވާ ކުރަމުންނެވެ. 

ވޯޓުލުމުގެ ވަގުތު ހަވީރު 5:00 ޖެހުމާ ހަމައަށް އިތުރު ކުރުމަށް ނިންމާފައިވާކަން އިލެކްޝަންސް ކޮމިޝަނުން ހާމަކޮށްފި އެވެ.

ރިން އީސީ އިން ވަނީ ވޯޓުލުމުގެ ވަގުތު އިތުރު ނުކުރާނެ ކަމަށް ބުނެފަ އެވެ. އެހެންނަމަވެސް، އިލެކްޝަންސް ކޮމިޝަނުން ބުނީ  ވޯޓުލުމުގެ ވަގުތު އިތުރުކޮށްފައި ވަނީ ހޫނުގަދަވުމުގެ ސަބަބުން، ކިއުދިގުވެ ގިނަބަޔަކަށް ވޯޓުލުމަށް ދަތިވުމާއި ގުޅިގެން ކަމަށެވެ. ކު މި އިންތިޚާބުގެ ވޯޓު ގުނުން ފަށްޓާނީ ވޯޓު ފޮށިތައް ބަންދުކުރާތާ 30 މިނެޓް ފަހުންނެވެ.

އިންތިހާބުގެ ވޯޓުލުން ފެށިގެން ކުރިއަށްދާއިރު ވޯޓުލުމަށް ބެހެއްޓިފައިވާ ފޮށިތަކުގެ ތެރެއިން ވޯޓުލާ މަރުކަޒުތަކުގެ ތެރެއިން 26 ވޯޓުލާ ފޮށިތަކުގެ ވޯޓުގެ ސިއްރުކަން ކަށަވަރުކުރުމށް އެކަށީގެންވާ ހަރުދަނާ ފިޔަވަޅުތަކެއް އެޅިފައިވާ ކަމުގެ ރިޕޯޓްތައް ލިބިފައިވޭ. ވޯޓުލާ މަރުކަރުގެ އިންތިޒާމްތައް ހަމަޖެހިފައ ހުރި ގޮތުން ވޯޓުގެ ސިއްރުކަން ގެއްލިދާނެކަމަށް ފެންނަ މަރުކަޒުތައް އެ ޖަމިއްޔާއިން ވަރަށް ގާތުން އޮބްޒާވް ކުރަމުންދާ ކަމަށް ޓްރާންސްޕޭރެންސީ އިން ބުނެފައިވޭ. 

މިހާރު ކުރިއަށް ދާ ކައުންސިލް އިންތިޚާބާއި، ޑަބްލިއުޑީސީ އެމްޑީޕީގެ ރައީސް އަބްދުﷲ ޝާހިދު ވޯޓުލައްވައިފި އެވެ. އެ މަނިކުފާނު ވޯޓުލައްވާފައި ވަނީ މަޖީދިއްޔާ ސްކޫލްގައި ބަހައްޓާފައިވާ މެދު ހެންވޭރު ދާއިރާގެ ވޯޓުފޮށްޓަށެވެ.

މިއަދު ކުރިއަށްދާ ކައުންސިލް، ޑަބްލިއުޑީސީ އަދި ރެފަރެންޑަމް ވޯޓުގައި ކުރީގެ ނައިބު ރައީސް ފައިސަލް ނަސީމް ވޯޓުލައްވައިފި އެވެ.

ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބާއި ރިޔާސީ އިންތިހާބާއި ރައްޔިތުންގެ މަޖިލިސް އިންތިހާބު އެއް ދުވަހެއްގައި ބާއްވަން ފެނޭތޯ ނުވަތަ ނޫންތޯ ބެލުމަށް ކުރިއަށް ގެންދާ އިންތިޚާބުގެ ދެ ގަޑި އިރު ހޭދަ ވީ އިރު ވޯޓުލާފައި ވަނީ  41،000 މީހުންނެވެ.

މިއީ ނިސްބަތުން ބަލާ ނަމަ، ވޯޓުލީ މީހުންގެ %13.96 މީހުންނެވެ. ވޯޓު ނުލާ 253،714 މީހުން ތިބި އިރު އެއީ %86.04 މީހުންނެވެ.

ނުބައި ވޯޓު ކަރުދާހެއް ދެވުމުން ގދ.އަތޮޅު މާލެ-2 ނަމްބަރު ވޯޓު ފޮށީގެ ވޯޓުލުން ބައިގަޑި އިރަށް މެދުކެނޑިއްޖެ އެވެ. 

ރާއްޖެ އެމްވީ އަށް އެ ވޯޓު ފޮށީގެ ވެރިޔާ މައުލޫމާތު ދިން ގޮތުގައި ވޯޓު ކަރުދާސްކޮޅު ދޫކުރި އިރު ލޯކަލް ކައުންސިލް އިންތިޚާބުގެ ދެ ކަރުދާސްކޮޅު އެކަކަށް ދޫކުރެވުމާއި ގުޅިގެންނެވެ. އޭގެ ސަބަބުން އެ މައްސަލަ ދިމާވި މީހާ އަށް ޑަބްލިއުޑީސީ އިންތިޚާބުގައި ވޯޓުލެވިފަ އެއް ނުވެ އެވެ. އަލުން ވޯޓުލުން ފަށާފައި ވަނީ 11:30 ހައިރު މައްސަލަ ހައްލުކުރުމަށް ފަހު އެވެ.