ޣައްޒާ ހިފުމަށް އިސްރާއީލުން ދެމުންދާ ހަމަލާތައް

އޮކްޓޯބަރ މަހުގެ 7 ވަނަ ދުވަހުން ފެށިގެން ކުރިޔަށްދާ ހަނގުރާމައިގައި މިހާތަނަށް 33 ނޫސްވެރިއެއް މަރާލާފައިވާކަމަށް މީޑިޔާ ވޮޗްޑޯގުން ބުނެފިއެވެ. އަދި 8 ނޫސްވެރިއަކަށް އެކިވަރުގެ ޒަޚަމްތައް ލިބިފައިވާއިރު 9 ނޫސްވެރިއެއް ގެއްލިފައިވާކަމަށް ނުވަތަ ހައްޔަރުކޮށްފައިވާކަމަށް ބެލެވޭކަމަށްވެސް ބުނެފައިވެއެވެ.

އިސްރާއީލުގެ އަސްކަރިއްޔާއިން ވަނީ ޣައްޒާގައި އެ ގައުމުގެ ނުވަ ސިފައިން ޝަހީދުކޮށްލާފައިވާ ކަމަށް ބުނެފަ އެވެ.

ފަލަސްތީނުގެ ޓެލެކޮމިއުނިކޭޝަން ކުންފުނި ޕަލްޓެލް އިން ބުނީ ޣައްޒާގައި އަނެއްކާވެސް މުވާސަލާތީ އަދި އިންޓަނެޓްގެ ހިދުމަތް ކަނޑާލާފައިވާ ކަމަށެވެ.

އިޒްރޭލުން ޖެނިންއަށް ދިން ވައިގެ ހަމަލާގައި ދެ މީހަކު ޝަހީދުވެފައިވާއިރު، ފާއިތުވި 24 ގަޑިއިރުގެ ތެރޭގައި އިސްރާއީލުން ހިފާފައިވާ ހުޅަނގު އައްސޭރީގައި ޝަހީދުވި ފަލަސްތީނުގެ މީހުންގެ އަދަދު ވަނީ 4 ށް އަރާފައެވެ.

އިސްރާއީލުން އެންމެ ފަހުން ޣައްޒާގެ ޚާން ޔުނިސްއަށް ދިން ވައިގެ ހަމަލާތަކުގައި މަރުވި މީހުންގެ އަދަދު 12 އަށް.

ކޮލަމްބިއާ އާއި ޗިލީއިން އިސްރާއީލަށް ކަނޑައަޅުއްވާފައި ހުންނަވާ ސަފީރު އަނބުރާ ގެންނައިރު، ޣައްޒާގައި މަރުވާ މީހުންގެ އަދަދު އިތުރުވަމުންދާތީ ބޮލީވިއާއިން ވަނީ އިސްރާއީލާ އެކު އޮތް ސިޔާސީ ގުޅުން ކަނޑާލާފައެވެ.

ޣައްޒާގެ ޖަބާލިއާ ރެފިއުޖީ ކޭމްޕަށް އިސްރާއީލުން ދިން ނުރައްކާތެރި ހަމަލާ އިންސާނީ އެހީދޭ ޖަމާއަތްތަކުން ކުށްވެރިކޮށް، ވަގުތުން ހަނގުރާމަ ހުއްޓާލުމަށް ގޮވާލާ ގޮވާލުންތައް އާކޮށްފި އެވެ.

ފަލަސްތީނުގެ ސިއްހަތާ ބެހޭ ވުޒާރާގެ ތަރުޖަމާނުގެ އެންމެ ފަހުގެ އިންޒާރު ވަނީ ދެއްވައިފައެވެ.

އިސްރާއީލުގެ އަސްކަރިއްޔާއިން ސޯޝަލް މީޑިއާގައި ކުރި ޕޯސްޓެއްގައި ބުނެފައިވަނީ އެގައުމުގެ ފައިޓާ ޖެޓްތަކުން ހިޒްބުﷲގެ އިންފްރާސްޓްރަކްޗާއަށް ހަމަލާދީފައިވާ ކަމަށާއި އޭގެ ތެރޭގައި "ލުބުނާނުގައި ހުރި ހަތިޔާރާއި ޕޯސްޓުތަކާއި ސައިޓްތައް" ހިމެނޭ ކަމަށެވެ.

ޣައްޒާގައި ހިނގަމުންދާ ހަނގުރާމައިގެ ތެރޭގައި އިސްރާއީލާއި ލުބްނާނުގެ ބޯޑަރު ހުރަސްކޮށް އިސްރާއީލު ސިފައިންނާއި ހިޒްބުاللهގެ ހަނގުރާމަވެރިން ބަޑީގެ ހަމަލާތައް ބަދަލުކޮށްފައިވާއިރު، ސަރަހައްދީ ހަމަނުޖެހުންތަކެއް އުފެދިދާނެ ކަމުގެ ބިރު ވަނީ ބޮޑުވެފައެވެ.

އިސްރާއީލުގެ ދިފާއީ ވަޒީރު ޔޯވް ގަލަންޓް ޓީވީ މެދުވެރިކޮށް ދެއްވި ތަގުރީރުގައި ވިދާޅުވީ ހަމާސް އަށް ދެ ގޮތެއް އެބައޮތް ކަމަށާއި އެއީ "ހަނގުރާމައިން މަރުވުން ނުވަތަ އެއްވެސް ޝަރުތެއް ނެތި އަމިއްލައަށް އަމާން ދިނުން" ކަމަށެވެ.

"ތިން ވަނަ ގޮތެއް ނެތް،" ޣައްޒާގެ "ބިންމަތީގައި ތިބި ހަނގުރާމަވެރިންނާއި ލީޑާޝިޕަށް" ގަލަންޓް ވިދާޅުވި އެވެ.

"އަޅުގަނޑުމެން އެމީހުންނާ ހަމައަށް ގޮސް، އަޅުގަނޑުމެންގެ މިޝަން ހާސިލްކުރާނަން، އެ ޖަމާޢަތް ނެތްކަން ކަށަވަރު ކުރާނަން،" "އަޅުގަނޑުމެންގެ ގްރައުންޑް އޮޕަރޭޝަން ކާމިޔާބު ކުރާނީ އަޅުގަނޑުމެންގެ ގައިދީން އެނބުރި ގައުމަށް ގެނައުމަށާއި ހަމާސްގެ ގާބިލުކަން ނައްތާލައިގެން." އޭނާ ވިދާޅުވި އެވެ.

އޭނާ މިހެން ވިދާޅުވެފައި މިވަނީ އިޒްރޭލުން އެންކްލޭވްގެ އެކި ސަރަހައްދުތަކަށް ހަމަލާދެމުން އަންނަ ދަނޑިވަޅެއްގައެވެ.

ހިފާފައިވާ ހުޅަނގު އައްސޭރީގެ ޖެނިން ރެފިއުޖީ ކޭމްޕަށް އިސްރާއީލުން ކޮންމެ ދުވަހަކު ވެސް ހަމަލާދިނުމަކީ އެންމެން ގުޅިގެން ދޭ އަދަބެއް ކަމަށާއި އެއީ ފަލަސްތީނުގެ ކިބައިން ބަދަލު ހިފުމުގެ ގޮތުން ކުރާ ކަމެއް ކަމަށް ކޭމްޕްގެ އޮފިޝަލަކު ވިދާޅުވެއްޖެ އެވެ.

ޖެނިން ރެފިއުޖީ ކޭމްޕަށް ހިދުމަތް ކުރުމުގައި މަޝްހޫރު ކޮމިޓީގެ މުގައްރިރު މުހައްމަދު އަލް ސަބްބާގް، 50، ވިދާޅުވި ގޮތުގައި އަސްކަރިއްޔާއިން އެ ކޭމްޕަށް ވަދެ މީހުން މަރާލައި ޒަހަމްކޮށްލަ އެވެ.

"އެމީހުން މިއަދު ފަލަސްތީނުގެ ހަތަރު މީހަކު ޝަހީދުކޮށްލީ، ދެން އިސްރާއީލުގެ ބުލްޑޯޒަރުން ގެތަކާއި ސާމާނުތައް ހާލުކުކޮށްލި. އެ މީހުން ވަނީ ކޭމްޕުގެ ދޮރާއި އައިކޮނިކް އާޗްޑް ގޭޓަކާއި ޖެނިން ސިޓީގެ ލޭންޑްމާކެއް ކަމަށްވާ "އަސް" ރައުންޑްއަބައުޓް ހަލާކުކޮށްލައިފަ،" ސަބްބާގް ވިދާޅުވި އެވެ.

މި ރައުންޑަބައުޓަކީ 2002 ވަނަ އަހަރު ކޭމްޕަށް އަރައިގަތް މީހުންގެ ރަމްޒެއް ކަމަށާއި އެއީ އެމްބިއުލާންސް ހިމެނޭ ގޮތަށް އޭރު ހަލާކުވި ވެހިކަލްތަކުގެ ސްކްރެޕްތަކުން ހަދާފައިވާ ރައުންޑެކެވެ.

އަދި އޮކްޓޯބަރު މަހުގެ 7 ވަނަ ދުވަހުން ފެށިގެން އެ ކޭމްޕުގައި ތިބި ފަލަސްތީނުގެ 11 މީހަކު ޝަހީދުކޮށް، 75 މީހުން ޒަޚަމްވެފައިވާ ކަމަށް އޭނާ ވިދާޅުވި އެވެ.

ފަލަސްތީނުގެ ސިއްހަތާ ބެހޭ ވުޒާރާއިން ބުނީ ހެބްރޮންގެ ބާބް އަލް ޒަވިޔާގައި އިސްރާއީލް ސިފައިން ދިން ބަޑީގެ ހަމަލާތަކެއްގައި 22 މީހަކަށް ޒަހަމްތަކެއް ލިބިފައިވާ ކަމަށާއި އޭގެ ތެރޭގައި ފަލަސްތީނުގެ މީހެއްގެ ބަނޑަށް ސީރިއަސް ޒަހަމްތަކެއް ލިބިފައިވާ ކަމަށެވެ.

ޖެނިން ސިޓީގައި ހަތަރު މީހަކު މަރުވެފައިވާއިރު، ހޯމަ ދުވަހު ޔައްޓާގައި އެކަކު ވަނީ މަރުވެފަ އެވެ.

ޣައްޒާ ސިޓީގެ ދެކުނުގައި އޮންނަ ސަލާހް އަދްދީން ސްޓްރީޓަށް އާމަރޑް ބުލްޑޯޒަރަކާއެކު ޓޭންކްތަކެއް ވަދެފައިވާ ކަމުގެ ޚަބަރުލިބުމުގެ މާނައަކީ، ހަމާސްގެ ދިފާއީ ސިޔާސަތުތަކާއި، އެމީހުންގެ ރައްދުދިނުމުގެ ޤާބިލުކަން ޓެސްޓް ކުރަން ނުވަތަ ދެނެގަތުމަށް އިސްރާއީލުން ފުރަތަމަ ފަހަރަށް ޑޭލައިޓް އާމަރޑް ރިކޮނިސެންސް ކުރިއަށް ގެންގޮސްފައިވާކަމެވެ.

އިޒްރޭލުގެ އަސްކަރިއްޔާއިން ޣައްޒާގެ ބައެއް ސަރަހައްދުތަކުގައި ހަރަކާތްތެރިވުން ދެމެހެއްޓުމަށް އެންމެ ޚަރަދު ކުޑަ ގޮތަކީ، އެސަރަހައްދުން ބަރު ހަތިޔާރާއި އެކު ވަދެގަތުން ކަމަށް ބެލެވެއެވެ.

އޭގެ ބަދަލުގައި ޣައްޒާ ސިޓީއަށް ހަމަލާދޭން ނިންމައިފިނަމަ، އެ ސިޓީގެ ސަރަހައްދަށް ވަދެ، އެ ސިޓީއަށް ވަނުމަށް އެކަށީގެންވާ ވަރަށް ސިފައިން ބޭނުންކުރަން ޖެހިދާނެ ކަމަށާއި، އެކަމުގެ ސަބަބުން ހަމާސްގެ ގިނަ ހަނގުރާމަވެރިން އެ ސިޓީއަށް ގެންދާނެ ކަމަށް އިޒްރޭލުން ދެކެއެވެ.

ފަހަތުން އަންނަ ކޮމްބައިންޑް އެޓޭކެއްގައި، އިރުމަތީ ފަރާތުން ހަތިޔާރު އެޅި ފައުޖުތަކާއި، ކަނޑުގެ ސިފައިންގެ ފައުޖުތައް ބޭނުން ކުރުން ކަމަށް ބެލެވިދާނެ އެވެ.

އެމެރިކާގެ ޚާރިޖީ ވުޒާރާގެ އެތެރޭގެ ލިޔުމެއްގައި ޣައްޒާގައި އެތައް ހާސް ބަޔަކު ލޮނުގަދަ އަދި ތަޣައްޔަރުވެފައިވާ ފެން ބޯންޖެހިފައިވާ ކަމުގެ ތަފްސީލް ދީފައިވާ ކަމަށް އިސްރާއީލުގެ ނޫހެއް ކަމަށްވާ ހާރެޓްޒް އިން ބުނެފިއެވެ.

ޣައްޒާގައި 52،000 އެއްހާ މާބަނޑު އަންހެނުންނާއި ހަ މަސް ނުފުރޭ 30،000 އަށް ވުރެ ގިނަ ތުއްތު ކުދިންނަށް ލޮނު ނުވަތަ ތަޣައްޔަރުވެފައިވާ ފެން ބޯން މަޖުބޫރުވެފައިވާ ކަމަށް ސްޓޭޓް ޑިޕާޓްމަންޓުން ރިޕޯޓްކޮށްފައިވާ ކަމަށް ހާރެޓްޒް ނޫހުގައި ބުނެފައިވެ އެވެ.

އިސްރާއީލުން ވަނީ ޣައްޒާގެ ރައްޔިތުންނަށް ފެން ހޯދުމަށް ބޭނުންވާ މުހިންމު ޚިދުމަތްތައް ކަނޑާލާފައެވެ.

ފެނުގެ ދަތިކަމުގެ ސަބަބުން ބަނޑުހައިހޫނުކަމާއި ކޮލެރާ ފަދަ ގައިންގަޔަށް އަރާ ބަލިތައް ޖެހުމުގެ ބިރު އެބައޮތް ކަމަށް ސިއްހީ ހިދުމަތްތެރިން ބުނެ އެވެ.

ޣައްޒާއަށް އިޒްރޭލުން މިހާރު ދެމުން ގެންދާ ވައިގެ ހަމަލާތަކުގައި 47 މިސްކިތަކާއި ހަތް ފައްޅިއެއް ހަލާކުވެފައިވާ ކަމަށް ޣައްޒާގެ ސަރުކާރުން ބުނެފިއެވެ.

ޣައްޒާގެ މީޑިއާ އޮފީހުން ބުނީ ފާއިތުވި ތިން ހަފުތާގެ ތެރޭގައި 203 ސްކޫލަކާއި ސަރުކާރުގެ 80 އޮފީހެއް ވެސް ހަލާކުވެފައިވާ ކަމަށެވެ.

އެ އޮފީހުގެ ޑިރެކްޓަރު ސަލާމާ މާރޫފްއާ ހަވާލާދީ އަލްޖަޒީރާ އަރަބިކް އިން ބުނީ ބޮމުގެ ހަމަލާތަކުގެ ސަބަބުން 220،000 ހައުސިން ޔުނިޓަށް ބޮޑެތި ގެއްލުންތަކެއް ލިބިފައިވާ ކަމަށާއި 32،000 އިމާރާތް މުޅިން ހަލާކުވެފައިވާ ކަމަށެވެ.

މީގެ ކުރިން ޣައްޒާގައި ހުންނަ ސަރުކާރުގެ މީޑިއާ އޮފީހުން ރިޕޯޓްކޮށްފައިވާ ގޮތުގައި އިސްރާއީލުގެ އަސްކަރިއްޔާއިން ވަނީ އޯތޮޑޮކްސް ކަލްޗަރަލް ސެންޓަރަކާއި ގެދޮރު ގެއްލިފައިވާ 1500 އަށް ވުރެ ގިނަ މީހުން ދިރިއުޅޭ ސްކޫލަކަށް ބޮން އަޅާނެ ކަމުގެ އިންޒާރު ދީފަ އެވެ.

އޮކްޓޯބަރު މަހުގެ ހަތްވަނަ ދުވަހުން ފެށިގެން ޣައްޒާގައި މިހާތަނަށް 8،000 އަށް ވުރެ ގިނަ މީހުން ޝަހީދުވެފައިވާއިރު އޭގެ ތެރޭގައި 3،000 އަށް ވުރެ ގިނަ ކުޑަކުދިންނާއި 2،000 އަށް ވުރެ ގިނަ އަންހެނުން ހިމެނެ އެވެ. އަދި 20،000 އަށް ވުރެ ގިނަ މީހުން ވަނީ ޒަހަމްވެފަ އެވެ.

އަލްޖަޒީރާއިން ނަގާފައިވާ ހާއްސަ ވީޑިއޯއަކުން ފެންނަ ގޮތުގައި އިސްރާއީލުން ދިން ވަރުގަދަ ބޮމުގެ ހަމަލާތަކަށް ފަހު ޣައްޒާގެ އުތުރުގެ ސިޓީއެއް ކަމަށްވާ ޖަބާލިއާ އަށް ބޮޑެތި ގެއްލުންތަކެއް ވަނީ ލިބިފަ އެވެ.

ޖަބާލިއާ ރެފިއުޖީ ކޭމްޕަކީ ޣައްޒާގެ އެންމެ އާބާދީ ބޮޑު އެއް ސަރަހައްދަށް ވާއިރު، އޮކްޓޯބަރު މަހުގެ 7 ވަނަ ދުވަހު އިސްރާއީލަށް ހަމާސް އިން ދިން ހަމަލާއަށް ފަހު އިޒްރޭލު ސިފައިން އަންނަނީ ތަކުރާރުކޮށް ބޮމުގެ ހަމަލާތައް ދެމުންނެވެ.

ފާއިތުވި ތިން ހަފުތާގެ ތެރޭގައި ޣައްޒާގެ އެކި ހިސާބުތަކުގައި 8،000 އަށް ވުރެ ގިނަ މީހުން މަރުވެ އެތައް ހާސް ބަޔަކު ޒަހަމްވެފައިވާ ކަމަށް އެ ސަރަހައްދުގެ ސިއްހަތާ ބެހޭ ވުޒާރާއިން ބުނެފި އެވެ.

ބައިނަލްއަޤުވާމީ މައްސަލަތަކުގައި ނުވަތަ ހަމަނުޖެހުންތަކުގައި، މިދިޔަ 4 އަހަރު ކުޑަކުދިން ނިޔާވި އަދަދަށް ވުރެ ގިނަ ކުދިން ޣައްޒާގައި ވަނީ ނިޔާވެފަ ކަމަށް މީޑިއާ ރިޕޯޓްތައް ބުނެފިއެވެ.

މީޑިއާތަކުން ރިޕޯޓްކޮށްފައިވާ ގޮތުން ފާއިތުވި 3 ހަފްތާގައި ޣައްޒާގައި ނިޔާވި ކުޑަކުދިންގެ އަދަދު 3000 އަށް ވުރެ އިތުރެވެ. ތަފާސްހިސާބުތަކަށް ބަލާ އިރު 2022ގައި 24 ޤައުމުން ޖުމްލަ 2985 ކުޑަކުދިން އެކި މައްސަލަތަކުގައި މަރުވެފައިވެއެވެ. 2021ގައި 2515 ކުދިން އަދި 2020ގައި 2674 ކުދިން ވަނީ މަރުވެފައެވެ. 2019ގައި 4019 ކުދިން މަރުވެފައިވާ އިރު މިއީ އެ އަހަރުތަކުގައި ދުނިޔޭގެ އެކި ކަންކޮޅުތަކުގައި ހިނގި ހަމަނުޖެހުންތަކުގައި ކުޑަކުދިން މަރުވި މީހުންގެ އަދަދުކަން ފާހަގަކޮށްލެވެއެވެ.

ލުބުނާނުގެ ހިޒްބުالله އިން ބުނީ ލުބުނާނުގެ އިރުދެކުނުން އިސްރާއީލުގެ ޑްރޯން އެއް ވައްޓާލީ ވައިގެ މަގުން ފޮނުވާލި މިސައިލަކުން ކަމަށާއި އެ ޑްރޯން ވައްޓާލާފައިވަނީ އިޒްރޭލުގެ ސަރަހައްދުގެ ތެރޭގައި ކަމަށެވެ.

ހިޒްބުالله އިން ބުނީ މި ޑްރޯން ވައްޓާލީ އިޒްރޭލުގެ ބޯޑަރާ ގާތްގަނޑަކަށް 5 ކިލޯމީޓަރު (3 މޭލު) ދުރުގައި އޮންނަ ކިއާމް ކައިރީގައި ކަމަށެވެ.

ލުބުނާނުގެ ސަލާމަތީ ދެ އޮފިޝަލަކު އެ އެޖެންސީއަށް މައުލޫމާތު ދިން ގޮތުގައި މިއީ ހިޒްބުالله ޖަމާއަތުން އިސްރާއީލުގެ ޑްރޯނެއް ވައްޓާލިކަން އިއުލާނުކުރި ފުރަތަމަ ފަހަރެވެ.

އިސްރާއީލުން ޣައްޒާއަށް ދިން ބޮމުގެ ހަމަލާތަކުގެ އެންމެ ފަހުގެ ޝިކާރައަކަށްވީ އުދޭ އަބޫ މޮހްސެން އެވެ.

އިސްރާއީލު ސިފައިން ޣައްޒާގައި ހިންގާ ޤަތުލް ޢާއްމުގެ ލިޔުންތަކާއި ޚަބަރުތައް ލިޔުއްވަމުން ގެންދަވާ ފަލަސްތީނުގެ ފޮޓޯ ޖާނަލިސްޓް ބެލާލް ޚާލިދު ވަނީ ކަފުންކޮށްފައިވާ ކުޑަކުއްޖެއްގެ ފޮޓޯއެއް ހިއްސާކޮށްފައެވެ.

"އުދޭ އަބީ މޮހްސެން، އޭނާގެ އުމުރަކީ އެއް ދުވަސް. އުފަންދުވަހުގެ ސެޓްފިކެޓް ނުދީ އެކުއްޖާއަށް ދޫކުރީ މަރުގެ ސެޓްފިކެޓް."

ޣައްޒާގެ 2.3 މިލިއަން މީހުންގެ ތެރެއިން ދެބައިކުޅަ އެއްބަޔަކީ ކުޑަކުދިންނެވެ. ޝަހީދުވި ފަލަސްތީނުގެ 7،000 އަށް ވުރެ ގިނަ މީހުންގެ ތެރެއިން ގާތްގަނޑަކަށް 40 ޕަސެންޓަކީ ކުޑަކުދިން ކަމަށްވާއިރު، އެތައް ސަތޭކަ ބަޔަކު ވަނީ ގެއްލިފައެވެ.

ފަލަސްތީނު ލިބަރޭޝަން އޯގަނައިޒޭޝަންގެ އެގްޒެކެޓިވް ކޮމިޓީގެ ސެކްރެޓަރީ ޖެނެރަލް ހުސައިން އަލް ޝެއިޚް ވަނީ ޖަރުމަނުގެ ސަފީރު ޑެއިކޭ ޕޮޓްޒެލްއާ ބައްދަލުކުރައްވާފައެވެ.

"ޣައްޒާގައި ހިނގަމުންދާ އިންސާނީ ކާރިސާ ހުއްޓުވުމަށާއި، ޣައްޒާއާ ދެކޮޅަށް މިހާރު ހިނގަމުންދާ ހަމަލާތައް ވަގުތުން ނިމުމަކަށް ގެނެވޭނެ ގޮތްތައް ހޯދުމާއި، އެ ސަރަހައްދުގެ ރައްޔިތުންނަށް އިންސާނީ އެހީތެރިކަން ފޯރުކޮށްދިނުމަށް ރައްކާތެރި މަގުތައް ފަހިކޮށްދިނުމާއި، ޒަޚަމްވި މީހުން ސަލާމަތްކޮށް ފަރުވާ ދިނުމަށް ޓަކައި ކޮރިޑޯތައް ރައްކާތެރިކުރަން ޖެހޭ ކަމަށް ވެސް ޝެއިހް ވިދާޅުވި އެވެ.

ޕޮޓްޒެލް އަކީ ޖަރުމަނުގެ ފެޑެރަލް ފޮރިން އޮފީހުގެ ކްރައިސިސް ޕްރިވެންޝަން، ސްޓެބިލައިޒޭޝަން، ޕީސްބިލްޑިން އަދި ހިއުމެނިޓޭރިއަން އެސިސްޓެންސްގެ ޑިރެކްޓަރ ޖެނެރަލް އެވެ.

އިސްރާއީލުން ހިފާފައިވާ ފަލަސްތީނުގެ ސަރަަހައްދުތަކުން 1000 އަށް ވުރެ ގިނަ މީހުން ހައްޔަރުކޮށްފިއެވެ.

މީޑިއާ ރިޕޯޓްތައް ބުނާ ގޮތުން ހައްޔަރުކޮށްފައި ވަނީ 1030 މީހުންނެވެ. މީގެ އިތުރުން ޣައްޒާގެ ހުޅަނގު އައްސޭރިން އިސްރާއިލް ސިފައިން 23 މީހުން ހައްޔަރުކޮށްފައިވެއެވެ. މި އަދަދު އިތުރުވުން އެކަށީގެންވާ ކަމަށް މީޑިއާ ރިޕޯޓްތައް ބުނެއެވެ. އިސްރާއ

ޣައްޒާގެ އިންސާނީ ހާލަތު ދަނީ ފެއިލްވަމުންކަމަށް އިންޓަރނޭޝަނަލް ކޮމިޓީ އޮފް ރެޑް ކްރޮސްގެ ރައީސް ވިދާޅުވެއްޖެއެވެ.

އޭނާ ވަނީ ވަގުތުން ވަގުތަށް ޣައްޒާ އަށް އިންސާނީ އެހީ ފޯރުކޮށްދިނުމަށް ގޮވާލާފައެވެ. އަދި ޣައްޒާގެ އިންސާނީ ހާލަތު އިންތިހާ އަށް ދަށްވެގެން ދިއުމަކީ ބަލައިގަންނަ ކަމެއް ނޫން ކަމަށް ވެސް ވަނީ ބުނެފައެވެ.

އިސްރާއީލުން ޣައްޒާ އަށް އެއްގަމުމަގުން ދޭ ހަމަލާތައް ފުޅާކުރާތީ ޣައްޒާގެ ދެކުނަށް ދާން އާންމުންނަށް އިސްރާއީލުގެ ޑިފެންސް ފޯސް އިން އަންގައިފިއެވެ.

ދެކުނުގެ ސަރަހައްދުތަކަށް ޣައްޒާގެ އާއްމުން ދިއުމަށް އިސްރާއީލްގެ އަސްކަރިއްޔާ އިން އެންގި ނަމަވެސް ހަމަލާދެމުންދާ އިރު ދެކުނުގެ ހިސާބުތަކަށް ވެސް އިސްރާއީލުން ދަނީ ހަމަލާދެމުންނެވެ. ހުކުރު ދުވަހުން ފެށިގެން ޣައްޒާގެ ބައެއް ސަރަހައްދުތަކުން ވަނީ ކަރަންޓާއި ފެނުގެ ޚިދުމަތް ވެސް އެއްކޮށް ކެނޑިފައެވެ.

އިސްރާއީލުން ޣައްޒާ އަށް އެއްގަމުމަގުން ދޭ ހަމަލާތައް ފުޅާކުރާތީ ޣައްޒާގެ ދެކުނަށް ދާން އާންމުންނަށް އިސްރާއީލުގެ ޑިފެންސް ފޯސް އިން އަންގައިފިއެވެ.

ދެކުނުގެ ސަރަހައްދުތަކަށް ޣައްޒާގެ އާއްމުން ދިއުމަށް އިސްރާއީލްގެ އަސްކަރިއްޔާ އިން އެންގި ނަމަވެސް ހަމަލާދެމުންދާ އިރު ދެކުނުގެ ހިސާބުތަކަށް ވެސް އިސްރާއީލުން ދަނީ ހަމަލާދެމުންނެވެ. ހުކުރު ދުވަހުން ފެށިގެން ޣައްޒާގެ ބައެއް ސަރަހައްދުތަކުން ވަނީ ކަރަންޓާއި ފެނުގެ ޚިދުމަތް ވެސް އެއްކޮށް ކެނޑިފައެވެ.

މިހާރު ހިނގަމުންދާ ހަމަނުޖެހުންތަކުގައި ފަލަސްތީނުގެ ހަނގުރާމަވެރި ޖަމާއަތެއް ކަމަށްވާ ހަމާސް ބަލިކުރުމަކީ އިސްރާއީލަށް އޮތް "ދެމިއޮތުމުގެ އިމްތިހާނެއް" ކަމަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވެއްޖެ އެވެ.

އޭއެފްޕީގެ ރިޕޯޓުގައި ވަނީ ބުދަ ދުވަހު ބޭރުގެ ސަފީރުންނާ އެކު ބޭއްވި ބްރީފިންގައި ނަތަންޔާހޫ ދެއްކެވި ވާހަކަތަކާ ހަވާލާ ދީފަ އެވެ.

"ހަމާސް ޖަމާއަތާއި އިސްލާމިކް ޖިހާދުގެ އަމާޒުތަކަށް ބޮން އެޅުމުގެ މަސައްކަތް ފުރިހަމަ ބާރާއި އެކު ކުރިއަށް ދާނެ ކަމަށް އޭނާ ވިދާޅުވި،" އޭއެފްޕީން ލިޔެފައިވެ އެވެ. ހަމާސްގެ ޓެރަރިޒަމްގެ ގާބިލްކަން ނިކަމެތިކޮށް، ހަނގުރާމަ ކުރުމުގައި ދެމިތިބުމުގެ ވިސްނުން ގެއްލުވާލަން މަސައްކަތް ކުރަމުން އަންނަ ކަމަށެވެ.

ޣައްޒާގައި ހަމާސް ޖަމާއަތާއި އެ ޖަމާއަތުގެ ބައިވެރިންނާ ދެކޮޅަށް ހިންގަމުންދާ އިސްރާއީލުގެ އަސްކަރީ ކެމްޕޭނަކީ އެ ގައުމުގެ ދެމިއޮތުމަށް ކުރާ ހަނގުރާމައެއްގެ ގޮތުގައި ނަތަންޔާހޫ ސިފަކުރެއްވި އެވެ.

އޭނާ މިހެން ވިދާޅުވެފައި މިވަނީ ދެ ހަފުތާއެއްހާ ދުވަސް ވަންދެން ހިނގި ހަމަނުޖެހުންތަކުގައި އެތައް ސަތޭކަ ބަޔަކު މަރުވެ، ހަނގުރާމަ ހުއްޓާލުމަށް ބައިނަލްއަގުވާމީ ފެންވަރުގައި ގޮވާލާ ގޮވާލުންތަކަށް ބާރު އެޅިތާ ދެ ހަފުތާއެއްހާ ދުވަސް ފަހުންނެވެ.

ހޮނިހިރު ދުވަހުގެ ރޭ ވެސް އިސްރާއީލުން މެދު ނުކެނޑި ބާރުގަދަ ހަމަލާތަކެއް ފަލަސްތީނަށް އަމާޒުކޮށްފައިވާ ކަމަށް މީޑިއާ ރިޕޯޓްތައް ބުނެފިއެވެ.

ސީއެންއެންގައި ރިޕޯޓްކޮށްފައިވާ ގޮތުން ހޮނިހިރު ދުވަހުގެ ރޭ ވެސް ޣައްޒާގެ އާއްމުންގެ އެތައް ބަޔަކު ހޭދަކުރީ ގާތްތިމާގެ މީހުން މަރުވުމުގެ ހިތާމައިގައެވެ. ވައިގެ މަގުން އިސްރާއީލުން ވަނީ ފަލަސްތީނުގެ ސަރަހައްދުތަކަށް ވަރުގަދަ ހަމަލާތަކެއް ދީފައެވެ.

ސީއެންއެންގެ ވީޑިއޯއަކުން އެނގޭ ގޮތުން މަރުވި މީހުންގެ ތެރޭގައި ކުޑަކުދިން ގިނަ އަދަދަކަށް ހިމެނެއެވެ. އަދި ޣައްޒާގެ އެތައް އާއްމުންނެއް ވަނީ ރޭގެ ހަމަލާތަކާއި ގުޅިގެން އަލް އަޤްސާ މާރޓީސް ހޮސްޕިޓަލް ކައިރިއަށް ޖަމާ ވާން ފަށާފައެވެ.

އިސްރާއީލުން ހައްޔަރުކޮށްފައިވާ މީހުން އަނބުރާ ގައުމަށް ގެންދިއުމާއި މެދު އިސްރާއީލުން އެކަށީގެންވާ އިޖާބައެއް ނުދޭތީ އެ ފަރާތްތަކުގެ އާއިލާތަކުން ކަންބޮޑުވުން ފާޅުކުރަން ފަށައިފިއެވެ.

އަދި ހައްޔަރުކޮށްފައިވާ މީހުން ބައިތިއްބާފައި ތިބި ސަރަހައްދުތަކަށް ވެސް އިސްރާއީލުން ހަމަލާދެމުންދާތީ އެކަމުގެ ކަންބޮޑުވުން އެ ފަރާތްތަކުން ވަނީ ފާޅުކޮށްފައެވެ. އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ ވާހަކަތަކުގައި ހަނގުރާމަވެރިން ބަދަލުކުރުމާއި މެދު ފެހި ސިގްނަލްއެއް ދީފައެއް ނުވެއެވެ. މީގެ ކުރިން ހަމާސް އިން ހައްޔަރު ކުރި މީހުން ދޫކޮށްލަން ހުށަހެޅި ނަމަވެސް އެކަމަށް ވެސް އިސްރާއީލުން އިޖާބަ ދީފައެއް ނުވެއެވެ.

ޣައްޒާގައި ތާށިވެފައި ތިބި ޢާއްމުންގެ އަދަދު 2 މިލިއަނަށް ވުރެ ގިނަ ކަމަށް އިންޓަރނޭޝަނަލް ކޮމިޓީ އޮފް ދަ ރެޑްކްރޮސް (އައިސީއާރްސީ) އިން ބުނެފިއެވެ. އައިސީއާރްސީ އިން ވަނީ މީހުންގެ ފުރާނަ ސަލާމަތްކުރުމަށްޓަކާ ވަގުތުން ހަރަކާތްތެރިވާން ޖެހޭ ކަމަށް ބުނެފައެވެ. އަދި ސިއްޙީ ފަރުވާ އާއި ފެނާއި ކަރަންޓު ވަގުތުން ވަގުތަށް އިއާދަކޮށްދިނުމަށް ވަނީ ގޮވާލާފައެެވެ.

އިސްރާއީލުން ތުރުކީގައި ތިބި އެ ޤައުމުގެ ޑިޕްލޮމެންޓުން އަނބުރާ ގެންދަން ފަށައިފިއެވެ.

މީޑިއާ ރިޕޯޓްތައް ބުނާ ގޮތުން އިސްރާއީލްގައި ތިބި ހުރިހާ ޑިޕްލޮމެޓިކް ސްޓާފުން ތުރުކީ އިން ވަނީ އަނބުރާ ޤައުމަށް ގެންދަން ފަށާފައެވެ. މިއީ އިސްރާއީލުން ޢައްޒާ އަށް ދެމުންދާ ހަމަލާތަކާއި ގުޅިގެން ތުރުކީ އިން އަޅާފައިވާ ފިޔަވަޅެކެވެ. އިސްރާއީލްގެ ފޮރިން މިނިސްޓަރ އެލީ ކޮހެން ވަނީ އެ ދެ ޤައުމުގެ ގުޅުން ރީއިވަލުއޭޓްކުރަން ޖެހޭ ކަމަށް ބުނެފައެވެ.

ޢައްޒާ ބޯޑަރ ކައިރިން ފައިޓަރ ޖެޓްގެ އަޑު އިވެމުންދާ ކަމަށް އެ ސަރަހައްދުގެ މަންޒަރުތައް ކަވަރކުރަމުންދާ ސީއެންއެންގެ ނޫސްވެރިއެއް ބުނެފިއެވެ. ސީއެންއެންގެ ނޫސްވެރިޔާ ނިކް ރޮބަރޓްސަން އާއި ހަވާލާދީ ސީއެންއެންގައި ރިޕޯޓްކޮށްފައިވާ ގޮތުން ޢައްޒާ އަށް ހަމަލާ ދެމުންދާ އަޑުފަތްގަނޑު އެ ސަރަހައްދުން ވަނީ އިވިފައެވެ. މިއީ މިދިޔަ ހަފްތާއެއްހާ ދުވަހުގެ ތެރޭގައި އިވުނު އެންމެ ބާރު އަޑުފަތްގަނޑުކަމަށް ވެސް އޭނާ ވަނީ ބުނެފައެވެ.

އިސްރާއީލާ އެކު ގައިދީން ބަދަލުކުރަން "ވަގުތުން" ތައްޔާރަށް ހުންނެވި ކަމަށް ޣައްޒާގައި ހުންނަވާ ހަމާސްގެ ވެރިޔާ ވިދާޅުވެއްޖެ ކަމަށް އޭއެފްޕީ އިން ރިޕޯޓްކޮށްފިއެވެ.

ޣައްޒާ ހަނގުރާމަ އަކީ ދިގު އަދި އުނދަގޫ ހަނގުރާމައަކަށް ވާނެ ކަމަށް އިސްރާއިލްގެ ހައްދުފަހަނަ އެޅި ބޮޑުވަޒީރު ނަތަންޔާހޫ ވިދާޅުވެއްޖެ ކަމަށް އޭއެފްޕީ އިން ދާދިދެންމެ ރިޕޯޓްކޮށްފިއެވެ.

ރަފާ ކްރޮސިންއަށް ހަގީގަތުގައި ވަނުމުގެ ކުރިން 100 ކިލޯމީޓަރު (62 މޭލު) ދުރުމިނުގައި އުޅަނދު މަޑުކޮށް ރަފާ ކްރޮސިންއަށް ދިއުމުގެ ކުރިން އިޒްރޭލުގެ ނިޓްޒާނާ ކްރޮސިންގައި ޓްރަކްތައް އިންސްޕެކްޓް ކުރަން ޖެހޭނެ ކަމަށާއި އެކަމުގެ ސަބަބުން އެހީ ލިބުން ވަރަށް ބޮޑަށް ލަސްވާ ކަމަށް މިސުރުގެ ޚާރުޖީ ވުޒާރާގެ ތަރުޖަމާނު ވިދާޅުވި އެވެ.

ހަމަނުޖެހުންތަކުގެ ކުރިން ގާތްގަނޑަކަށް 500 އެއްހާ އެހީދޭ ޓްރަކްތައް ޣައްޒާއަށް ކޮންމެ ދުވަހަކު އެތެރެވަމުން ދިޔައެވެ. ނަމަވެސް އޮކްޓޯބަރު މަހުގެ 7 ވަނަ ދުވަހު ހަމާސް އިން އިސްރާއީލަށް ދިން ހަމަލާއާއި އޭގެ ފަހުން އިސްރާއީލުން ޣައްޒާއަށް ދިން ބޮމުގެ ހަމަލާތަކަށްފަހު ދުވާލެއްގެ މައްޗަށް އެވްރެޖްކޮށް ވަދެފައިވަނީ އެންމެ 12 ޓްރަކް ކަމަށް ގުޓެރޭޒް ހުކުރު ދުވަހު ވަނީ ވިދާޅުވެފައެވެ.

އިސްރާއީލުގެ ޖަލުތަކުގައި ތިބި ފަލަސްތީނުގެ ހުރިހާ ރައްޔިތުން މިނިވަންކުރާނަމަ ހަމާސްގެ ބެލުމުގެ ދަށުގައި ތިބި އަސީރުން ދޫކޮށްލާނެކަމަށް އެޖަމާއަތުން ބުނެފިއެވެ.

ހަމާސް އިން މީގެކުރިންވެސް ބުނަމުން އައިސްފައިވަނީ މިހެންނެވެ. ނަމަވެސް މިހާތަނަށް 4 އަސީރުން މިނިވަންކޮށްފައިވާއިރު ހަމާސްއިން ބުނެފައިވަނީ 50 އަސީރުން އިސްރާއީލުން ދެމުންދާ ހަމަލާތަކުގައި މަރުވެފައިވާކަމަށެވެ.

އިސްރާއީލުން ޣައްޒާއަށް ދެމުންދާ ހަމަލާތައް ހުއްޓާލުމަށާއި ހަމާސް އާއެކު އަސީރުން މިނިވަންކުރުމުގެ ވާހަކަތައް ފެށުމަށް ގޮވާލާ ތެލް އަވީވުގައި މުޒާހަރާ ކުރަން ފަށައިފިއެވެ.

އިސްރާއީލުން ފަލަސްތީނަށް ދެމުންގެންދާ ހަމަލާތަކަކީ އެކި ސްޓޭޖްތަކަށް ބަހާލާފައިވާ ހަމަލާތަކެއްކަމަށާއި މިހާރު އިސްރާއީލުގެ އަސްކަރިއްޔާ އިން އެދަނީ ހަނގުރާމައިގެ ދެން އޮތް ސްޓޭޖަށް ކަމަށް އިސްރާއީލުގެ އަސްކަރިއްޔާގެ ޖެނެރަލް ސްޓާފު ބުނެފިއެވެ.

ޣައްޒާގެ އެތެރެއިން ލިބެމުންދާ ޚަބަރުތައް ވަރަށް ބޮޑަށް މަދުވެއްޖެއެވެ.

ޣައްޒާއަށް ރޭގައި އިސްރާއީލުން ދިން ހަމަލާތަކާއެކު މުވާސަލާތީ ގުޅުމާއި އިންޓަރނެޓްގެ ޚިދުމަތް ކެނޑިފައިވާއިރު ޣައްޒާގެ އެތެރޭގައި ހިނގާ އެއްވެސް ކަމެއް މިވަގުތު އެނގޭކަށް ނެތެވެ.

އިސްރާއީލުން ހުކުރު ދުވަހުގެ ރޭ ޣައްޒާއަށް އެއްގަމުމަގުންނާއި ވައިގެ މަގުން ދިން ހަމަލާތަކަކީ ޣައްޒާއަށް އެތެރެވުމަށް އިސްރާއީލު އަސްކަރިއްޔާއިން ކުރާ މަސައްކަތުގެ ފެށުންކަމަށް އެމެރިކާގެ އޮފިޝަލަކު ބުނެފިއެވެ.

އިސްރާއީލު އަސްކަރިއްޔާއިން ބުނެފައިވަނީ ޣައްޒާއަށް އެއްގަމު މަގުން އެރުމުގެ އޮޕަރޭޝަން ފުޅާކޮށްފައިވާކަމަށެވެ.

ޣައްޒާއަށް އިސްރާއީލުން ދެމުންދާ ވަރުގަދަ ހަމަލާތަކާއި މުއާމަލާތްކުރެވޭނެ ގޮތެއް ނެތުމުގެ ސަބަބުން ޣައްޒާގެ ރައްޔިތުންގެ މެދުގައި ވަރަށް ބޮޑު ހާސްކަމެއް އުފެދިފައިވާކަމަށް އަލްޖަޒީރާއިން ބުނެފިއެވެ.

އަލްޖަޒީރާގެ ކޮރަސްޕޮންޑެންޓް ބުނީ މީހުން ތިބީ ވަރަށް ބޮޑަށް ބިރު ގަނެފައިކަމަށާއި އެކި ތަންތަނުގައި މީހުން ތިބިއިރު ވާނުވާ ނޭންގޭތީ ވަރަށް ބޮޑަށް އާންމުން ހާސްވެފައިވާކަމަށެވެ.

އެކަކު އަނެކަކަށް ގުޅައިގެން މީހުންގެ ހާލަތު ހުރި ގޮތް ބެލޭނެ ގޮތެއް ނެތްކަމަށާއި ޒަޚަމްވެފައިވާ މީހުން އަތްދަނޑިމައްޗަށް ލައިގެން ހޮސްޕިޓަލަށް ގެންދާ މަންޒަރު ފެންނަމުންދާކަމަށް ރިޕޯޓަރ ބުނެފައިވެއެވެ.

ޣައްޒާގައި އިންސާނީ އެހީތެރިކަން ފޯރުކޮށްދިނުމަށް މަސައްކަތްކުރާ ގިނަ ޖަމާއަތްތަކުގެ މުވައްޒަފުންނާއި ގުޅުން ކެނޑިފައިވާކަމަށް އެޖަމާއަތްތަކުން ބުނެފިއެވެ.

އެގޮތުން ފަލަސްތީން ރެޑް ކްރެސެންޓް، ޑޮކްޓާސް ވިތައުޓް ބޯރޑަސް، އެކްޝަން އެއިޑް ޔޫކޭ ފަދަ ތަންތަނުން ވަނީ އެކަމުގެ ކަންބޮޑުވުން ފާޅުކޮށްފައެވެ.

އަނެއްކޮޅުން ޑަބްލިޔުއެޗްއޯގެ ޗީފް ޓެޑްރޯސްވެސް ވަނީ ޑަބްލިޔުއެޗްއޯގެ މުވައްޒަފުންނާއި ގުޅުން ކެނޑިފައިވާކަން ހާމަކޮށް ބަލި މީހުންގެ ރައްކާތެރިކަމާމެދު ކަންބޮޑުވުން ފާޅުކޮށްފައެވެ.

އަލްޖަޒީރާއިން ރިޕޯޓްކުރާ ގޮތުގައި ހަމާސްގެ އަލް ޤައްސާމް ބްރިގޭޑް އާއި އިސްރާއީލު ސިފައިންނާ ދެމެދު ވަރުގަދަ ހަމަލާ ބަދަލުކުރުންތަކެއް ތިން ސަރަހައްދެއްގައި އަންނަނީ ހިނގަމުންނެވެ.

މީގެކުޑަވަގުތުކޮޅެއް ކުރިން ހަމަލާތައް މެދުކެނޑުނުނަމަވެސް މިހާރު އަނެއްކާ ބޯޑަރު ސަރަަހައްދުގައި ވަރުގަދަ ހަމަލާތައް ދެމުންދާކަމަށް ބުނެފައިވެއެވެ.

އެގޮތުން ބޯޑަރު ސަރަހައްދުގައި އިސްރާއީލުން ވަރުގަދަ ހަމަލާތަކެއް ދެމުންދާކަމަށް ބުނެފައިވެއެވެ. ހަމާސްއާ ހަވާލާދީ ބުނެފައިވަނީ ބޯޑަރު ސަރަހައްދުގައި ތިން ދިމާލެއްގައި ހަމަލާތައް ކުރިޔަށްދާކަމަށެވެ. އެއީ އިރުމަތީ ސަރަހައްދާއި ޣައްޒާ ސިޓީގެ އިރުމައްޗާއި ޣައްޒާ ސްޓްރިޕްގެ އުތުރު ސަރަހައްދެވެ.

ހަމަލާތައް ވަރަށް ވަރުގަދަކަމަށްވެސް އަލްޖަޒީރާއިން ވަނީ ރިޕޯޓްކޮށްފައެވެ.

ހަނގުރާމަ ހުއްޓާލުމަށާއި ޖަލުގައި ތިބި މީހުން ދޫކޮށްލުމާއި ގުޅޭގޮތުން އިސްރާއީލާ އެކު އެއްވެސް މަޝްވަރާއެއް މިހާރު ކުރިޔަށްނުދާކަމަށް ހަމާސްގެ ސްޕޯކްސްމަން އުސާމާ ހަމްދާން ބުނެފިއެވެ.

އެފަދަ ވާހަކަތަކެއް ކުރިން ދެކެވުނު ކަމަށާއި ނަމަވެސް ޣައްޒާއަށް އިސްރާއީލުން ދޭ ހަމަލާތައް ވަރުގަދަވުމާއެކު މިހާރު ވާހަކަތައް ކުރިޔަށްނުދާކަމަށް ވަނީ ބުނެފައެވެ.

ހަމްދާން އިތުރަށް ބުނީ އިސްރާއީލުގެ ސިފައިންގެ ފައުޖުތައް އަންނަނީ ޣައްޒާގެ ބޯޑަރު ސަރަަހައްދާ އެކި ދިމަދިމާލުން ކައިރިވަމުންނެވެ.

އިސްރާއީލުން ދެމުންދާ ހަމަލާތައް މިރޭ ވަރުގަދަވެފައިވާއިރު އިސްރާއީލުގެ ދެކުނުގައި އޮންނަ ސިޓީއެއްކަމުގައިވާ އެޝްކެލޮން އަށް އަމާޒުކޮށް އަންނަ ރޮކެޓް ހަމާލަތަކުގެ ސަބަބުން ސައިރަންގެ އަޑު ގަދަވެފައިވާކަމަށް އެސިޓީގައި ހުންނަ ބީބީސީގެ ރިޕޯޓަރ ބުނެފިއެވެ.

ބީބީސީގައި ރިޕޯޓްކޮށްފައިވާ ގޮތުގައި އެހެން ރޭ ތަކާއި ޚިލާފަށް މިރޭ އެޝްކެލޮން އިން ހަނގުރާމަ މަތީ ބޯޓުތައް ދަތުރުކުރާ މިންވަރު ވަނީ އިތުރުވެފައެވެ. އަދި އެޝްކެލޮންގެ ހޮޓެލެއްގައި ތިބި އެތައް ސަތޭކަ ބަޔަކު ވަނީ އެތަނުން ހުސްކޮށް ރައްކާތެރި ހިސާބުތަކަށް ބަދަލުކޮށްފައިކަމަށް ބީބީސީން ރިޕޯޓްކޮށްފައިވެއެވެ.