ޣައްޒާ ހިފުމަށް އިސްރާއީލުން ދެމުންދާ ހަމަލާތައް

އިސްރާއީލުގެ ބައެއް ޓޭންކަރުތައް ޣައްޒާ ތެރެއަށް ވަދެފައިވާކަމަށް ނިއު ޔޯރކްޓައިމްސް އާ ވާހަކަދައްކަމުން އިސްރާއީލުގެ އަސްކަރިއްޔާގެ ސްޕޯކްސްމަން ބުނެފިއެވެ.

ހަމަލާތައް މިރޭ ވަރުގަދަކޮށްފައިވާއިރު އިސްރާއީލުގެ އަސްކަރިއްޔާގެ ފައުޖުތައް ޣައްޒާއަށް އެއްގަމު މަގުން ވަދެފައިވާކަމަށް އިސްރާއީލުން ބުނިނަމަވެސް މިއީ އެއްގަމު މަގުން އެރުމަށް އިސްރާއީލުން ހިންގާ އޮޕަރޭޝަންގެ ފެށުންކަމަށް ސްޕޯކްސްމަން ނުބުނާކަމަށް ރިޕޯޓްތައް ބުނެއެވެ.

ނިއު ޔޯރކް ޓައިމްސް ގައި ބުނެފައިވަނީ އިސްރާއީލުގެ ސިފައިންގެ ފައުޖުތަކާއި ޓޭންކުތައް އިއްޔެއިން ފެށިގެން ޣައްޒާގެ އެތެރޭގައި ތިބިކަމަށެވެ.

ހަމާސް އިން މިރޭ ބުނެފައިވަނީ ޣައްޒާގެ އުތުރުގެ ދެ ސަރަހައްދެއްގައި އިސްރާއީލުގެ އަސްކަރިއްޔާ އާ ދެމެދު ވަރުގަދަ ހަމަލާ ބަދަލުކުރުންތަކެއް ކުރިޔަށްދާކަމަށެވެ.

އިސްރާއީލުން ޣައްޒާގެ އެތެރެއަށް ވަދެގަތުމަށް ކުރަމުންދާ މަސައްކަތްތައް ނާކާމިޔާބުކޮށްލުމަށް ހަމާސްގެ އަލް ޤައްސާމް ބްރިގޭޑާއި ފަލަސްތީނުގެ ހުރިހާ ފައުޖުތައް އޮތީ ތައްޔާރަށްކަމަށް ހަމާސްގެ ސިޔާސީ އޮފިޝަލެއް ކަމުގައިވާ އިއްޒަތު އަލް-ރާޝިގް ބުނެފިއެވެ.

އިއްޒަތު ނެރުނު ބަޔާނެއްގައި ބުނެފައިވަނީ ހަމާސްގެ އަސްކަރީ ގޮފި އޮތީ އިސްރާއީލުގެ ހަމަލާތަކަށް ރައްދުދިނުމަށް ވަރުގަދަ އަށް ތައްޔާރުވެގެންނެވެ. އަދި ނަތަންޔާހޫ އާއި އޭނާގެ ފައުޖުތަކަށް އެމީހުން ހާސިލުކުރަން ބޭނުންވާ ކަންކަން ހާސިލުނުވާނެކަމަށްވެސް ބުނެފައިވެއެވެ.

އަދި އިސްރާއީލުން މެދުކެނޑުމެއްނެތި ޣައްޒާއަށް ހަމަލާދެމުންދާއިރު ފޯނާއި އިންޓަރނެޓްގެ ޚިދުމަތް މެދެކނޑާލާ، ފެނާއި ކާނާއި ތެޔޮ އެތެރެކުރުން ހުއްޓުވާފައި އޮތްއޮތުމަކީ ހުޅަނގުން ވާގިވެރިވެގެން އިސްރާއީލުން ހިންގާ ހަނގުރާމައިގެ ޖަރީމާކަމަށްވެސް ބުނެފައިވެއެވެ.

އިސްރާއީލުން ޣައްޒާއަށް މެދު ކެނޑުމެއްނެތި ހަމަލާތައް ދެމުންދާއިރު ގިނަ ހަމަލާތަކެއް ޣައްޒާގައި ހުންނަ އަލް-ޝިފާ ހޮސްޕިޓަލާއި އިންޑޮނޭޝިއަން ހޮސްޕިޓަލް އަދި ބްރެއިޖް ރެފިޔުޖީ ކޭމްޕާ ކައިރި ހިސާބުތަކަށް އަމާޒުކުރަމުންދާކަމަށް އަލް ޖަޒީރާއިން ރިޕޯޓްކޮށްފިއެވެ.

މުޅި ޣައްޒާއިން މުވާސަލާތީ ޚިދުމަތް މެދުކެނޑިފައިވާއިރު ހަމަލާތަކުގައި ޒަޚަމްވާ މީހުންނަށް އެމަރޖެންސީ ޚިދުމަތް ހޯދުމަށް ގުޅޭނެ ގޮތެއް ވަނީ ނެތިފައެވެ.

ޣައްޒާގެ މިހާރުގެ ހާލަތާމެދު ވަރަށް ބޮޑަށް ކަންބޮޑުވާކަމަށް އިންޓަރނޭޝަނަލް މެޑިކަލް ޗެރިޓީ ޑޮކްޓާސް ވިތައުޓް ބޯޑަރސް އިން ބުނެފިއެވެ.

އެޖަމާއަތުން ކޮށްފައިވާ ޕޯސްޓެއްގައި ބުނެފައިވަނީ ޣައްޒާގައި ހަރަކާތެރިވާ ސްޓާފުންނާ ގުޅުން ކެނޑިފައިވާކަމަށެވެ. އަދި ބަލި މީހުންނާއި މެޑިކަލް ސްޓާފުންނާއި އަލް ޝިފާ ހޮސްޕިޓަލުގައި ބޯހިޔާވަހިކަން ހޯދަމުންދާ އެތައް ހާސް އާއިލާއެއްގެ ރައްކާތެރިކަމާމެދު ކަންބޮޑުވާކަމަށެވެ. މީގެއިތުރުން ޣައްޒާގެ އާންމު ރައްޔިތުންނާއި ސްޓާފުންނާއި ސިއްހީ ޚިދުމަތްތެރިންނަށް ރައްކާތެރިކަން ދިނުމަށް ވަނީ ގޮވާލާފައެވެ.

ލުބުނާންގައި ތިބި އެމެރިކާގެ ރައްޔިތުން މިހާރުން މިހާރަށް ލުބުނާން ދޫކޮށްދާން ލުބުނާންގައި ހުންނަ އެމެރިކާގެ އެމްބަސީން އަންގައިފިއެވެ.

އިސްރާއީލުން ޣައްޒާއަށް ހަމަލާދެމުންދާއިރު ލުބުނާންގައި ހަރަކާތްތެރިވާ ހިޒްބުﷲ ޖަމާއަތާއި އިސްރާއީލާ ދެމެދުވެސް ހަމަލާ ބަދަލުކުރުންތައް ވަނީ ކުރިޔަށްދާން ފަށާފައެވެ. އަދި އެކަން ވަނީ ފުޅާވާން ފަށާފައެވެ.

އެކަމާއި ގުޅިގެން އެމެރިކާގެ ސަރުކާރުން ވަނީ ހާލަތު އިތުރަށް ގޯސްވެ ކޮމާޝަލް ފްލައިޓް ތައް އޮޕަރޭޓްނުކުރެވޭ ވަރަށް ހާލަތު ގޯސްނުވަނީސް ވީ އެންމެ އަވަހަކަށް ލުބުނާން ދޫކޮށްދިޔުމަށް އަންގާފައެވެ.

އިސްރާއީލުގެ އަސްކަރިއްޔާގެ ސްޕޯކްސްޕާސަން އޭބީސީ ނިއުސް އާ ވާހަކަދައްކަމުން ބުނީ މިރޭގެ ހަމަލާތަކަކީ ޣައްޒާއަށް އެއްގަމު މަގުން ހަމަލާދިނުމަށް ކަންކަން ފަސޭހަކުރުމަށް ކުރިޔަށްގެންދާ ހަމަލާތަކެއްކަމަށެވެ.

އެގޮތުން ހަމާސްގެ ހަނގުރާމަވެރިން ތިބޭ ތަންތަނާއި ހަނގުރާމަވެރިން އިސްރާއީލުގެ ހަރަކާތްތައް ދެނެގަންނަ ތަންތަން އަމާޒުކޮށް މިރޭގެ ހަމަލާތައް ދީފައިވާކަމަށް ބުނެފައިވެއެވެ. އަދި އެއްގަމު މަގުން އަރާއިރު ފަސޭހައިން އެއޮޕަރޭޝަން ކުރިޔަށްގެންދިޔުމަށް މަގުފަހިކުރުމަށް ނުރައްކާ ދިމާވާނެ ދިމަދިމާ ނައްތާލުމަށް ކުރިޔަށްގެންދާ ހަމަލާތަކެއްކަމަށްވެސް ބުނެފައިވެއެވެ.

ހަނގުރާމަ ހުއްޓާލާ އިންސާނީ އެހީތެރިކަން ފޯރުކޮށްދިނުމަށް ގޮވާލާ އދ ން މިރޭ ފާސްކުރި ގަރާރަށް ހަމާސް އާއި ފަލަސްތީނިއަން އޮތޯރިޓީން މަރުހަބާ ކިޔައިފިއެވެ.

ހަމާސް އިން ނެރުނު ބަޔާނުގައި ބުނެފައިވަނީ ގަރާރުގައި ބުނެފައިވާ ގޮތަށް ވަގުތުން އަމަލުކޮށް ތެލާއި އިންސާނީ އެހީތެރިކަން ޣައްޒާއަށް ފޯރުކޮށްދިނުމަށް ގޮވާލާކަމަށެވެ.

ފަލަސްތީނިއަން އޮތޯރިޓީން ބުނީ އިސްރާއީލުގެ އަނިޔާވެރިކަން އިތުރު ލެވެލް އަކަށް ގޮސްފައިވާކަމަށާއި ބައިނަލްއަގްވާމީ މުޖުތަމައުން އިސްރާއީލުގެ އަނިޔާވެރިކަމާއި ދެކޮޅު ހަދާފައިވާކަމަށެވެ.

ޔުނިސެފްގެ ޗީފް ކެތެރިން ރަސަލް އެކްސްގައި ކުރި ޕޯސްޓެއްގައި ބުނެފައިވަނީ ޣައްޒާގައި ތިބި އެޖަމިއްޔާގެ ސްޓާފުންނާ ގުޅުންކެނޑިފައިވާކަމަށެވެ.

އަދި ޣައްޒާގައި ދިރިއުޅޭ 1 މިލިއަން ކުޑަކުދިންގެ ސަލާމަތާއި ރައްކާތެރިކަމާމެދު ވަނީ ކަންބޮޑުވުން ފާޅުކޮށްފައެވެ.

އަލްޖަޒީރާއިން ރިޕޯޓްކުރާ ގޮތުގައި އިސްރާއީލުގެ އަސްކަރީ ހަރަކާތްތައް ޣައްޒާގެ އުތުރުގައި މިވަގުތު ވަނީ މަދުވެފައެވެ.

ވައިގެ މަގުން ޣައްޒާގެ އުތުރަށް ދޭ ހަމަލާތައް އިސްރާއީލުން ވަނީ ވަރުގަދަކޮށްފައެވެ. ނަމަވެސް މިއީ އިސްރާއީލުން ޣައްޒާއަށް އެއްގަމު މަގުން އެރުމަށްވާ ތައްޔާރީތަކެއްގެ ގޮތުގައި ނުބެލެވޭކަމަށް ޣައްޒާގައި ހުރި ރިޕޯޓަރާއި ހަވާލާދީ އަލްޖަޒީރާއިން ވަނީ ރިޕޯޓްކޮށްފައެވެ.

ނަމަވެސް އަދި އިސްރާއީލުން ކުރަން އުޅޭކަމެއް ނޭންގޭކަމަށާއި އެކަން ދެނެގަންނަން ވަގުތުނަގާނެކަމަށް ވަނީ ބުނެފައެވެ.

އިސްރާއީލުގެ ވަރުގަދަ ހަމަލާތަކެއް މިރޭ ޣައްޒާއަށް ދެ ގަޑިއިރަށްވުރެ ގިނައިރު ވަންދެން ވަނީ ދީފައެވެ. އަދި މުޅި ޣައްޒާއިން މޯބައިލް ފޯނާއި އިންޓަރނެޓްގެ ޚިދުމަތް ވަނީ މެދުކެނޑިފައެވެ.

އިސްރާއީލުގެ އަސްކަރިއްޔާއިން ޣައްޒާގައި ހަރަކާތްތެރިވާ ރޮއިޓަރސް އާއި އޭއެފްޕީގެ ނޫސްވެރިންނަށް ރައްކާތެރިކަން ދޭނެކަމުގެ ޔަގީންކަންނުދެވޭނެކަމަށް ބުނެފިއެވެ.

އިސްރާއީލުން ވަރުގަދަ ވައިގެ ހަމަލާތަކެއް ޣައްޒާއަށް ދެމުންދާއިރު އެއްގަމު މަގުން ބޮޑު އޮޕަރޭޝަނެއް ކުރިޔަށް ގެންދިޔުމަށް ރާވަމުންދާކަމަށް އިސްރާއީލު އަސްކަރިއްޔާއިން ވަނީ ބުނެފައެވެ. އެއާގުޅިގެން އިސްރާއީލު އަސްކަރިއްޔާއިން ރޮއިޓަރސް އަށް ފޮނުވާފައިވާ ސިޓީގައި ބުނެފައިވަނީ އެ މީޑިޔާ އޯގަނައިޒޭޝަންގެ މުވައްޒަފުންނަށް ސަލާމަތާއި ރައްކާތެރިކަން ދެވޭނެކަމުގެ ޔަގީންކަން ނުދެވޭނެކަމަށާއި ނަމަވެސް ސަލާމަތާއި ރައްކާތެރިކަމުގެ ފިޔަވަޅުތައް ވަރުގަދަކުރުމަށް ވަނީ އެދިފައެވެ.

އޮކްޓޯބަރ މަހުގެ 7 ވަނަ ދުވަހުގެ ފަހުން މިހާތަނަށް 29 ނޫސްވެރިއަކު ވަނީ ހަމަލާތަކުގައި މަރުވެފައެވެ. އޭގެތެރޭގައި ރޮއިޓަރސްގެ ނޫސްވެރިއެއްކަމުގައިވާ އިސާމް އަބްދުﷲވެސް ހިމެނެއެވެ.

އިސްރާއީލުގެ ހަމަލާތައް އަމާޒުކުރަމުންދަނީ ހަމައެކަނި ނޫސްވެރިންނަކަށް ނޫނެވެ. އެމީހުންގެ އާއިލާތަކަށް އަމާޒުކޮށްވެސް އަންނަނީ ހަމަލާދެމުންނެވެ.

ހަމާސްގެ އަސްކަރީ ވިިންގު، ބައްސާމް ބްރިގޭޑްސް އިން ބުނާގޮތުގައި ޣައްޒާގެ އުތުރަށް އިސްރާއީލުން އެއްގަމު މަގުން އަރަން ކުރާ މަސައްކަތް ވަނީ ނާކާމިޔާބުކޮށްލާފައެވެ. އެސަރަހައްދުގައި ވަރުގަދަ ހަމަލާބަދަލުކުރުންތަކެއް ކުރިޔަށްދާކަމަށް ހަމާސް އިން ބުނެއެވެ.

ހަމާސްގެ ސީނިއަރ އޮފިޝަލް އޮސާމާ ހަމްދާން ބުނީ އިސްރާއީލުން މަސައްކަތްކުރަމުންދަނީ ޚިޔާލީ ނަސްރެއް ހޯދުމަށް އެމަންޒަރު ދެއްކުމަށްކަމަށެވެ. އަދި މުޅި ޣައްޒާއިން ފޯނާއި އިންޓަރނެޓްގެ ޚިދުމަތް ކަނޑާލީ އިސްރާއީލުން ޣައްޒާއަށް ހިންގަމުންދާ ލާއިންސާނީ އަމަލުރައް ދުނިޔެއަށް ފޮރުވާ ޖަވާބުދާރީކުރެވޭނެ ހުރިހާ ގޮތްތަކެއް ބަންދުކުރުމަށްކަމަށްވެސް ހަމްދާން ބުންޏެވެ.

އިސްރާއީލުން ޣައްޒާއަށް ދެމުންދާ ހަމަލާތައް ހުއްޓާލާ އިންސާނީ އެހީތެރިކަން ފޯރުކޮށްދިނުމަށް ގޮވާލާ ގަރާރެއް އަދ ން ފާސްކޮށްފިއެވެ. އުރުދުން އިން ހުށަހެޅި މިގަރާރު ފާސްވެފައިވަނީ 120 ވޯޓުންނެވެ. ގަރާރާ ދެކޮޅަށް 14 ގައުމަކުން ވޯޓު ދީފައިވާއިރު އެއްވެސް ކޮޅަކަށް ވޯޓު ނުދޭތިބީ 45 ގައުމެވެ.

މިގަރާރުގައި ގޮވާލާފައިވަނީ ހަނގުރާމަ ހުއްޓާލާ ވީއެންމެ އަވަހަކަށް އިންސާނީ އެހީ ޣައްޒާއަށް ފޯރުކޮށްދިނުމަށެވެ. އެގޮތުން ފެނާއި ކާނާއި ތެޔޮ އެތެރެކުރުމަށްވެސް ގޮވާލާފައިވެއެވެ. ތެޔޮ ޣައްޒާއަށް އެތެރެކުރުން އިސްރާއީލުން ވަނީ މަނާކޮށްފައެވެ.

ގަރާރާ ދެކޮޅަށް ވޯޓު ދިން ގައުމުތަކުގެ ތެރޭގައި ހިމެނެނީ އެމެރިކާ، އިސްރާއީލު، އޮސްޓްރިއާ، ކްރޮއޭޝިޔާ، ޗެކް ރިޕަބްލިކް، ގުއާޓަމާލާ، ހަންގޭރީ، މާރޝަލް އައިލެންޑްސް، ޕެރަގުއޭ، ޓޮންގޯ އެވެ.

އެއްވެސް ކޮޅަކަށް ވޯޓުނުދޭ ގައުމުތަކުގެ ތެރޭގައި ޖަރމަނީ، އިނގިރޭސިވިލާތް އަދި ކެނެޑާ ހިމެނެއެވެ.

އިސްރާއީލުން ޣައްޒާއަށް ވަރުގަދަ ހަމަލާތަކެއް ދެމުންދާއިރު މުޅި ޣައްޒާއިން މޯބައިލާއި އިންޓަރނެޓްގެ ޚިދުމަތް މެދުކެނޑިއްޖެއެވެ. އިސްރާއީލުގެ ހަމަލާތައް މިރޭ ވަނީ ވަރަށް ވަރުގަދަކޮށްފައެވެ.