ޣައްޒާ ހިފުމަށް އިސްރާއީލުން ދެމުންދާ ހަމަލާތައް

އޮކްޓޯބަރ މަހުގެ 7 ވަނަ ދުވަހު ހަމާސް އިން އިސްރާއީލަށް އަމާޒުކޮށް ދިން ކުއްލި ހަމަލާގައި މަރުވި މީހުންނަކީ 1200 ކަމަށް އިސްރާއީލު ފޮރިން މިނިސްޓްރީން ބުނެފިއެވެ.

އިސްރާއީލު ފޮރިން މިނިސްޓްރީން ބުނީ އަދަދުތައް އަލުން ބެލިއިރު 200 މީހުން މަދުވެފައިވާކަމަށެވެ. އަދަދު ދަށްވެފައިވަނީ ބެލިބެލުންތަކުން އެމީހުންނަކީ ހަމާސްގެ ހަނގުރާމަވެރިންކަމަށް ބެލެވޭތީކަމަށް ވަނީ ބުނެފައެވެ. ކުރިން އިސްރާއީލުން ބުނެފައިވަނީ އޮކްޓޯބަރ މަހުގެ 7 ވަނަ ދުވަހު މަރުވެފައިވަނީ 1400 މީހުން ކަމަށެވެ.

އިސްރާއީލު އަސްކަރިއްޔާއިން ވަނީ އައް ޝިފާ ހޮސްޕިޓަލަށް އަމާޒުކޮށް ހަމަލާތައް ދޭން ފަށާފައެވެ. ޣައްޒާގެ އިންޓީރިއަރ މިނިސްޓްރީން ބުނާ ގޮތުގައި 24 ގަޑިއިރު ތެރޭގައި އެ ހޮސްޕިޓަލަށް އަމާޒުކޮށް އިސްރާއީލުން ފަސް ފަހަރެއްގެ މަތިން ވަނީ ހަމަލާދީފައެވެ.

އައްޝިފާ ހޮސްޕިޓަލު އިސްރާއީލު އަސްކަރިއްޔާއިން ހިސާރުކޮށްފައި އޮންނަތާ 24 ގަޑިއިރުވާން ދާއިރު މިހާރުވެސް އެހޮސްޕިޓަލުގެ ވަށައިގެންވާ ސަރަހައްދަށް އަމާޒުކޮށް އިސްރާއީލު އަސްކަރިއްޔާއިން ހަމަލާދެމުންދާކަމަށް ޣައްޒާގެ ހެލްތު މިނިސްޓްރީން ބުނެފިއެވެ.

އެގޮތުން ސްނައިޕަރުން މިހާރުވެސް ހަމަލާތައް ދެމުންދާކަމަށާއި ހޮސްޕިޓަލަށް އެއްވެސް މީހަކަށް ނުވަދެވޭއިރު ހޮސްޕިޓަލުގައި ތިބި އެއްވެސް މީހަކަށް ބޭރަކަށް ނުނިކުމެވެއެވެ.

ޣައްޒާގެ އާބަން ސަރަޙައްދުތަކުގައި ހިނގަމުންދާ ހަމަނުޖެހުންތައް ވަނީ ނާޒުކު ދަރަޖައަކަށް ގޮސްފައި ކަމަށާއި، އިސްރާއީލުގެ ހަނގުރާމަވެރިން މިރޭވެސް ޣައްޒާގެ މެދުތެރެއަށް ބޮންއަޅަމުން ދާކަމަށް އަލްޖަޒީރާއިން ބުނެފިއެވެ.

އަލްޖަޒީރާގެ ރިޕޯޓަރުން ބުނީ އިސްރާއީލްގެ ހަނގުރާމަވެރިން މިހާރު ތިބީ ތެލް އަލް ހަވާ އަވަށުގައި، އަލް ޝާތީ ރެފިއުޖީ ކޭމްޕްކައިރީގައި ކަމަށެވެ. އަދި ޣައްޒާގެ އިރުމަތީ ސަރަހައްދުތަކަށާއި، ޣައްޒާގެ މެދުތެރެއަށާއި، ޣައްޒާގެ މައި މަރުކަޒުތަކަށް ބޮން އަޅަމުން ދާކަމަށް ރިޕޯޓަރުން ދަނީ ބުނަމުންނެވެ. އިސްރާއީލްގެ އިތުރު ހަނގުރާމަވެރިން އައްޝިފާ ހޮސްޕިޓަލާ އެންމެ ކިލޯމީޓަރެއްހާ ކައިރިއަށް ޖަމާވެފައިވާ ކަމަށްވެސް ބުނެފައިވެ އެވެ.

ފަލަސްތީނަށް އެހީގެ ތަކެތި ފޯރުކޮށްދިނުމާއި ބެހޭގޮތުން މަޝްވަރާ ކުރެއްވުމަށް ގަތަރުގެ އަމީރު މިސްރަށް ދަތުރުފުޅެއް ކުރައްވައިފިއެވެ.

ޝައިޚް ތަމީމް ބިން ހަމަދު އަލްޘާނީ މިއަދު ހެނދުނު ގަތަރުން ފުރާވަޑައިގެން މިސްރުގެ ވެރިރަށް ގާހިރާއަށް ވަނީ ވަޑައިގެންފައެވެ.

އަމީރުގެ އަރިހުގައި ގަތަރުގެ ބޮޑުވަޒީރު އަދި ފޮރިން މިނިސްޓަރު ޝެއިހް މުހައްމަދު ބިން އަބްދުއްރަހްމާން ބިން ޖާސިމް އަލް ޘާނީ އާއި ރަސްމީ ވަފުދެއް ބައިވެރިވެވަޑައިގަންނަވާ ކަމަށް ސަރުކާރުގެ ވެބްސައިޓުން ނެރުނު ބަޔާނެއްގައި ބުނެފައިވެ އެވެ.

ފާއިތުވި 24 ގަޑިއިރު ތެރޭގައި ޣައްޒާއިން 243ށް ވުރެ ގިނަ މީހުންގެ ފުރާނަ ގެއްލިފައިވާކަމަށް އދ ން ބުނެފިއެވެ.

މީގެއިތުރުން ހުޅަނގު އައްސޭރިން 19 މީހެއްގެ ފުރާނަ ގެއްލިފައިވެއެވެ. މީގެއިތުރުން ބުރާސްފަތި ދުވަހު 50،000 މީހުން ޣައްޒާގެ ދެކުނަށް ބަދަލު ވެފައިވާކަމަށް އދން ވަނީ ބުނެފައެވެ.

ޣައްޒާގެ މައި ހޮސްޕިޓަލު އައް ޝިފާ ހޮސްޕިޓަލަށް އަމާޒުކޮށް އިސްރާއީލުން ހަމަލާތަކެއް ދީފިއެވެ. މިހަމަލާ އަމާޒުކޮށްފައިވަނީ ހޮސްޕިޓަލުގެ ބޭރުގައި އޮންނަ ހުސް ބަޔަށެވެ. މިހަމަލާގައި ޒަޚަމްވި މީހުންނާއި މީހަކު މަރުވެފައިވޭތޯ އަންނަނީ ބަލަމުންނެވެ.

ބުރާސްފަތި ދުވަހު ކުރިޔަށްދިޔަ ހަމަލާ ބަދަލުކުރުންތަކުގެ ތެރޭގައި އިސްރާއީލު ސިފައިންގެ މީހެއް މަރުވެފައިވާކަމަށް އިސްރާއީލު އަސްކަރިއްޔާއިން ބުނެފިއެވެ.

މިއާއެކު އެއްގަމު މަގުން ޣައްޒާއަށް އެރުމަށް އިސްރާއީލުން ކުރިޔަށްގެންދާ އޮޕަރޭޝަންގައި މަރުވި މީހުންގެ އަދަދު ވަނީ 35ށް އަރާފައެވެ.

މީގެއިތުރުން ހަމާސްގެ އަތްދަށުގައި ހުރި އިސްރާއީލު ސިފައިންގެ މީހަކުވެސް މަރުވެފައިވާކަމަށް އިސްރާއީލުން ވަނީ ބުނެފައެވެ. މިއީ ކުރިން އިސްރާއީލުން ގެއްލިފައިވާކަމަށް ބުނެފައިވާ މީހެކެވެ. އެމީހާ މަރުވެފައިވާކަން ހަމާސް އިން ވަނީ ކުރިން ހާމަކޮށްފައެވެ. އޮކްޓޯބަރ 7 ވަނަ ދުވަހުން ފެށިގެން ހަމާސް އިން ދެމުންދާ ހަމަލާތަކުގައި މަރުވި އިސްރާއީލު ސިފައިންގެ މީހުންގެ އަދަދު މިހާރު ވަނީ 354ށް އަރާފައެވެ.

ކުރިޔަށް އޮތް ދެ ހަފްތާތެރޭގައި ޣައްޒާގެ 5500 އަންހެނުން ވިހާނެކަމަށް އދން ބުނެފިއެވެ.

އދ ން މިކަން ހާމަކޮށްފައިމިވަނީ ޣައްޒާގެ އެތައް ހޮސްޕިޓަލަކަށް ތެޔޮ ނުލިބުމުގެ ސަބަބުންނާއި ހަމަލާތަކުގެ ސަބަބުން ބަންދުކުރަން މަޖުބޫރުވެފައިވާ ދަނޑިވަޅެއްގައެވެ. އދ ން ބުނާގޮތުގައި ޣައްޒާގައި މާބަނޑު 50،000 މީހުން އެބަތިއްބެވެ.

ކޮންމެ ދުވަހަކު 180 އަންހެނުން ވިހާއިރު މިއީ އެއްވެސް ގޮތަކަށް އަންހެނުންނަށް ރައްކާތެރި ހާލަތެއްނޫންކަމަށް އދން ބުނެއެވެ. ހޮސްޕިޓަލްތަކަށް ބޭނުންވާވަރަށް ބޭސް ނުލިބޭއިރު ކާނާ އާއި ފެން ބޭނުންވާ ވަރަށް ނުލިބެއެވެ.

ޔަމަނުގެ ހޫޘީން އިސްރާއީލުގެ އެކި ތަންތަނަށް އަމާޒުކޮށް އޭގެ ތެރޭގައި އިސްރާއީލުގެ އަސްކަރީ ތަންތަންވެސް ހިމެނޭގޮތުން ބެލެސްޓިކް މިސައިލް ފޮނުވާލާފައިވާކަމަށް އެޖަމާއަތުން ބުނެފިއެވެ.

ފަލަސްތީނުގެ ހެލްތު މިނިސްޓްރީން ބުނާގޮތުގައި ޣައްޒާގެ ބްލަޑް ބޭންކަށް އަމާޒުކޮށް އިސްރާއީލުން ދިން ހަމަލާއާ ގުޅިގެން ބްލަޑް ބޭންކުގެ ޚިދުމަތް ވަނީ މެދުކެނޑިފައެވެ.

ހުޅަނގު އައްސޭރީގައި އިސްރާއީލުން ކުރިޔަށްގެންދާ އޮޕަރޭޝަންގައި އަނިޔާލިބުނު މީހަކަށް އެހީވުމަށް ދިޔަ ޕަލަސްތީން ރެޑް ކްރެސެންޓް ގެ އެމްބިޔުލަންސަކަށް އިސްރާއީލުން ހަމަލާދީފިއެވެ.

އެމްބިޔުލަންސަށް ޖެނިން ރެފިޔުޖީ ކޭމްޕަށް ނުވަދެވޭގޮތަށް ބަންދުކޮށްފައިވާކަމަށް ރެޑް ކްރެސެންޓުން ބުނެއެވެ.

އިސްރާއީލުން ޣައްޒާއަށް ދެމުންދާ ހަމަލާތަކުގައި ހަމާސްގެ އަތްދަށުގައި ހުރި އިސްރާއީލު ސިފައިންގެ މީހެއް މަރުވެފައިވާކަމަށާއި އިތުރު މީހަކަށް އެކިވަރުގެ ޒަޚަމް ލިބިފައިވާކަމަށް ބައްސާމް ބްރިގޭޑުން ބުނެފިއެވެ.

އިސްރާއީލުން ހުޅަނގު އައްސޭރީގައި ކުރިޔަށްގެންދާ ރެއިޑްގައި މަރާލި މީހުންގެ އަދަދު 18ށް އަރައިފިއެވެ. ޖެނިން ރެފިޔުޖީ ކޭމްޕްގައި ކުރިޔަށްގެންދާ ރެއިޑްގައި ބުރާސްފަތި ދުވަހު 14 މީހުން ގެ ފުރާނަ ގެއްލިގެންދިޔައެވެ.

ޣައްޒާއަށް އިސްރާއީލުން މެދުކެނޑުމެއްނެތި ދެމުންދާ ހަމަލާތައް ތިން ދުވަހަށް މެދުކަނޑާލަން ހުށަހެޅި ކަމަށާއި ނަމަވެސް އެކަމާއި އިސްރާއީލުގެ ބޮޑުވަޒީރު ބެންޔަމިން ނަތަންޔާހޫ ދެކޮޅު ހެދިކަމަށް އެމެރިކާގެ ރައީސް ޖޯ ބައިޑަން ބުނެފިއެވެ.

އެއީ ހަމާސްގެ އަތްދަށުގައި ތިބި އަސީރުން މިނިވަންކުރުމަށް ފުރުސަތު ފަހިކުރުމަށްކަމަށް ބައިޑަން ބުްނޏެވެ.

ހަމާސްގެ އޮފިޝަލެއް ބުނެފައިވަނީ މަޝްވަރާތައް އަދިވެސް ކުރިޔަށްދާކަމަށާއި ނަމަވެސް އަދިވެސް އިސްރާއީލާއެކު އެއްބަސްވުމަކާ ހަމައަށް އާދެވިފައިނުވާކަމަށެވެ.

ކުޑަކުދިންނަށް ފަރުވާ ދޭ މައި ހޮސްޕިޓަލު އަލް ނަސްރު ހޮސްޕިޓަލު ހަމަލާތަކާއި ތެޔޮ ނެތުމުގެ ސަބަބުން ބަންދުކޮށްފިއެވެ.

މިހޮސްޕިޓަލުން އަލަށް ވިހާ ކުޑަކުދިންނަށް ކުޑަކުދިންނަށް ފަރުވާދެއެވެ.

ހޮސްޕިޓަލަށް ވަންނަ ދިމާލަށް ގިނަ ހަމަލާތަކެއް ވަނީ އަމާޒުކޮށްފައެވެ. ހޮސްޕިޓަލުން ދޭންޖެހޭ ޚިދުމަތްތައް ދޭނެ ތެޔޮ ނެތުމުން ސަބަބުން ހޮސްޕިޓަލު ބަންދުކޮށްފައިވާކަމަށް އެހޮސްޕިޓަލުން ބުނެއެވެ.

ހަމާސްގެ އަތްދަށުގައި ތިބި އަސީރުންގެ ތެރެއިން އުމުރުން ދުވަސްވީ އަންހެނަކާއި ކުޑަ ފިރިހެން ކުއްޖެއް ދޫކޮށްލާކަން އެޖަމާއަތުން ހާމަކޮށްފިއެވެ. ހަމާސްއިން ބުނީ ދެ މީހުން ދޫކޮށްލަނީ އިންސާނިއްޔަތަށްޓަކައިކަމަށެވެ.

މި ދެ އަސީރުން ދޫކޮށްލާނީ ހަމަލާތައް ދިނުން މެދުކަނޑާލުމުންނެވެ.

ޣައްޒާއަށް އިސްރާއީލުން ދެމުންދާ ހަމަލާތައް ކޮންމެ ދުވަހަކު ހަތަރު ގަޑިއިރަށް މެދުކަނޑާލުމުގެ ތިން ގަޑިއިރު ކުރިން އެކަން އަންގާނެކަމަށް ވައިޓް ހައުސްއިން ބުނެފިއެވެ.

މި ހަތަރު ގަޑިއިރު ތެރޭގައި އިންސާނީ އެހީތެރިކަން ޣައްޒާއަށް އެތެރެކުރުމުގެ ފުރުސަތު ލިބިގެންދާއިރު ޣައްޒާގެ އުތުރުގައި ދިރިއުޅޭ ރައްޔިތުން ދެކުނަށް ބަދަލުވާން ފުރުސަތު ލިބޭނެއެވެ. މިވަގުތުގެ ތެރޭގައި އިސްރާއީލުގެ އަސްކަރިއްޔާގެ އެއްވެސް ހަރަކާތެއް އެސަރަހައްދުގައި ކުރިޔަށްނުދާނެއެވެ. އަދި ހަމާސްގެ ބެލުމުގެ ދަށުގައި ތިބި އަސީރުން މިނިވަންކުރުމުގެ ކަންކަންވެސް ކުރިޔަށްދާނެއެވެ.

މީގެއިތުރުން ދުވާލަކު 150 ޓްރަކްގެ އެހީގެ ތަކެތި ޣައްޒާއަށް އެތެރެކުރުމަށް ވަނީ އަމާޒު ހިފާފައެވެ.

އިސްރާއީލު އަސްކަރިއްޔާއިން ޣައްޒާއަށް މެދުކެނޑުމެއްނެތި ދެމުން އަންނަ ހަމަލާތައް ކޮންމެ ދުވަހަކުވެސް 4 ގަޑިއިރަށް މެދުކަނޑާލުމަށް އިސްރާއީލުން އެއްބަސްވެފައިވާކަމަށް ވައިޓް ހައުސްއިން ބުނެފިއެވެ.

މިވަގުތަކީ ޣައްޒާގެ އުތުރުގައި އުޅޭ ރައްޔިތުން ދެކުނަށް ބަދަލުވާން ލިބޭ ވަގުތެވެ. މިވަގުތު ފެށޭނީ މިއަދުން ފެށިގެންކަމަށް ވައިޓް ހައުސްއިން ބުނެއެވެ.

ޖެނިން ރެފިއުޖީ ކޭމްޕްގައި އިސްރާއީލުގެ ސްނައިޕަރުން ހަނގުރާމަވެރިން ހޯދމުގެ ނަމުގައި ހަރަކާތްތެރިވާން ފަށައިފި އެވެ.

ޖެނިން ރެފިއުޖީ ކޭމްޕްގެ މަސްދަރުތަކުން އަލްޖަޒީރާއަށް މައުލޫމާތު ދެމުން ބުނީ އިސްރާއީލު ސިފައިން ގެންދަނީ ސްނައިޕަރ ޕޮޒިޝަންތައް ނަގަމުން ކަމަށެވެ.

ބައެއް ސަރަހައްދުތަކުގައި އަސްކަރިއްޔާއިން ދަނީ ގޭގެއަށް ވަދެ ހަތިޔާރު އެޅި ހަނގުރާމަވެރިން ހޯދަމުގެ ނަމުގައި ޢާއްމު ރައްޔިތުންގެ ގެދޮރުގެ ޙުރުމަތް ކަނޑަމުންނެވެ. އެމީހުން ގެންދަނީ ގޭގޭގެ ތެރެއިން ފެންނަ ޒުވާނުންނަށް ބަޑިޖަހައި މަރަމުންނެވެ.

ފަލަސްތީނުގެ ސިއްހަތާ ބެހޭ ވުޒާރާއިން ބުނީ މިހާރު ކުރިއަށްދާ މި ހަމަލާގައި ފަލަސްތީނުގެ ހަތް މީހަކު ޝަހީދުވެފައިވާ ކަމަށެވެ.

ފަލަސްތީނުގެ ހުޅަނގު އައްސޭރި އާއި ޣައްޒާގައި ހަރަކާތްތެރިވާ އިންސާނީ ހައްގުތަކަށް މަސައްކަތްކުރާ އިސް ތިން ޖަމިއްޔާއަކުން އިންޓަނޭޝަނަލް ކްރިމިނަލް ކޯޓް (އައިސީސީ) އަށް މައްސަލަ ހުށަހަޅައިފި އެވެ.

އަލް ހައްގާއި އަލް މެޒާން އަދި ފަލަސްތީނުގެ އިންސާނީ ހައްގުތަކާ ބެހޭ މަރުކަޒުގެ ފަރާތުން ހުށަހެޅި ދައުވާގައި ވަނީ ޣައްޒާގައި އިސްރާއީލުން ހިންގާ އަމަލުތަކަކީ ހަނގުރާމައިގެ ޖަރީމާތަކެއް ކަމަށް ބުނެ، ރައީސް ހަރްޒޯގާއި ބޮޑުވަޒީރު ނަތަންޔާހޫ އަދި ޑިފެންސް މިނިސްޓަރު ގަލަންޓް ހިމެނޭ ގޮތަށް އިސްރާއީލުގެ އޮފިޝަލުން ހައްޔަރު ކުރުމުގެ އަމުރެއް ނެރުމަށް ގޮވާލާފަ އެވެ.

ޣައްޒާގެ އުތުރުގައި ދިރިއުޅޭ އެތައް ހާސް ރައްޔިތުންނެއް ފުރާނަ ސަލާމަތްކުރުމަށް ފައިމަގުން ޣައްޒާގެ ދެކުނަށް ބަދަލުވާން ފަށައިފިއެވެ.

ހަމާސްގެ އަތްދަށުގައި ތިބި އަސީރުންގެ ތެރެއިން 10 އާއި 15 ދެމެދުގެ އަސީރުން މިނިވަންކުރުމާއި ގުޅޭ މަޝްވަރާތައް އިސްރާއީލާއި ހަމާސް އާ ދެމެދު ކުރިޔަށްދާކަމަށް ރޮއިޓަރސް އާއި އޭއެފްޕީން ބުނެފިއެވެ.

ޣައްޒާގެ މައި ހޮސްޕިޓަލު ކަމުގައިވާ އަލް ޝިފާ ހޮސްޕިޓަލަށް ކޮންމެހެން ބޭނުންވާ ސިއްހީ ސާމާނު ފޯރުކޮށްދެވިފައިވާކަމަށް ޑަބްލިޔުއެޗްއޯ އާއި ޔޫއެން އެޖެންސީ ފޮރ ފަލަސްތީނިއަން ރެފިޔުޖީ ކޭމްޕުން ބުނެފިއެވެ.

ދެ ފަރާތުން ނެރެފައިވާ ބަޔާނުގައި ބުނެފައިވަނީ މިއީ ހަނގުރާމަ ފެށުނު ފަހުން އެހޮސްޕިޓަލަށް ސިއްހީ އެހީ ފޯރުކޮށްދިން ދެވަނަ ފަހަރުކަމަށެވެ. ނަމަވެސް އަދިވެސް ބޭނުންވާވަރާ ގާތަށްވެސް ތަކެތި ފޯރުކޮށްދެވިފައިނުވާކަމަށް ބުނެއެވެ.

މިހާރު ހިނގަމުންދާ ހަނގުރާމަ ނިމުމުން ޣައްޒާގެ ކޮންޓްރޯލް ފަލަސްތީނިއަން އޮތޯރިޓީ (ޕީއޭ) އާ ހަވާލުކުރުމަށް އެމެރިކާއިން ބޭނުންވާކަން އެމެރިކާގެ އޮފިޝަލެއް ހާމަކޮށްފިއެވެ.

ޣައްޒާގެ ކޮންޓްރޯލް ހަމާސްގެ އަތްދަށުގައި އޮންނައިރު ޣައްޒާ ޕީއޭގެ ދަށަށް ދާން ގިނަ ރައްޔިތުން ދެކޮޅެވެ. ޕީއޭ އިން މިހާރުވެސް ހުޅަނގު އައްސޭރި ކޮންޓްރޯލްކުރަމުން އަންނައިރު އެތަނުގައި އިސްރާއީލުން އަންނަނީ ޤާނޫނާ ޚިލާފު އެތައް ކަމެއް ކުރަމުންނެވެ. އެތައް ބަޔަކު ވަޒަންވެރިކުރުވަމުން އަންނައިރު ޕީއޭގެ ބާރެއް ހުޅަނގު އައްސޭރީގައި ނެތްކަމަށް ފަލަސްތީނުގެ ރައްޔިތުން ދެކެއެވެ.

އަލް ޖަޒީރާއިން ރިޕޯޓްކޮށްފައިވާ ގޮތުގައި އިސްރާއީލުން ވައިގެ މަގުން ވަރުގަދަ ހަމަލާތަކެއް ޣައްޒާގެ ދެކުނަށް ދެމުން އަންނަތާ ގަޑިއިރަކަށްވުރެ ގިނައިން ވަނީ ވެފައެވެ.

ހަމަލާތައް ދެމުން އަންނަނީ ޚާން ޔޫނުސް އަށެވެ. ޚާން ޔޫނުސްގައި މީހުން ދިރިއުޅެމުން އަންނަ ދެ އިމާރާތަެއް ވަނީ އެއްކޮށް ބިމާ ހަމަވެފައެވެ.

މީގެއިތުރުން ޣައްޒާގެ މެދާއި އުތުރަށްވެސް އިސްރާއީލުން ވައިގެ މަގުން ހަމަލާތައް މިހާރުވެސް ދެމުން އަންނަކަމަށް އަލްޖަޒީރާގެ ރިޕޯޓަރު ބުނެއެވެ.

ޣައްޒާގައި ހުންނަ އަލް-ޤުދުސް ހޮސްޕިޓަލުގައި ތެޔޮ ނެތުމުގެ ސަބަބުން ހޮސްޕިޓަލުން ދޭ މުހިންމު ޚިދުމަތްތައް މެދުކަނޑާލައިފިއެވެ.

މިހަފްތާގެ އާދިއްތަ ދުވަހުން ފެށިގެން އިސްރާއީލުން އަންނަނީ ކޮންމެ ދުވަހަކު އެ ހޮސްޕިޓަލަށް އަމާޒުކޮށް ހަމަލާތައް ދެމުންނެވެ. ފަލަސްތީން ރެޑް ކްރެސެންޓް ސޮސައިޓީން ހިންގަމުން އަންނަ މި ހޮސްޕިޓަލުން ބުނާ ގޮތުގައި ތެޔޮ ނެތުމުގެ ސަބަބުން މުހިންމު އޮޕަރޭޝަންތައް ކުރުން ހުއްޓާލަން މަޖުބޫރުވެފައިވާކަމަށާއި ކުރިޔަށް އޮތް ދުވަސްތަކުގައި ކޮންމެހެން ދޭން ޖެހޭ ޚިދުމަތް ދިނުމަށް ތެޔޮ ބޭނުންކުރުން ވަކި މިންވަރެއްގައި ބެހެއްޓުމަށް އެނިންމުން ނިންމަންޖެހިފައިވާކަމަށެވެ.

މިހާރުވެސް ހޮސްޕިޓަލުގައި ބޭނުންކުރާ މައި ޖެނެރޭޓަރ ވަނީ ނިއްވާލާފައެވެ. ކޮންމެހެން ދޭންޖެހޭ އަސާސީ ޚިދުމަތްތައް ދިނުމަށްޓަކައި ކުޑަ ޖަނެރޭޓަރުގެ ބޭނުންކުރާއިރު ކަރަންޓު ދެނީ ދެ ގަޑިއިރަށެވެ. އެއީ ހޮސްޕިޓަލުގައި އެޑްމިޓްކޮށްފައި ތިބި ބަލި މީހުންނަށާއި ހޮސްޕިޓަލުން ބޯހިޔާވަހިކަން ހޯދަމުން އަންނަ 14،000 އެއްހާ މީހުންނަށެވެ. ހޮސްޕިޓަލުގެ ސަރޖިކަލް ވޯރޑް ބަންދުކޮށްފައިވާއިރު އޮކްސިޖަން އުފައްދާ ޕްލާންޓްވެސް ވަނީ ބަންދުކޮށްފައެވެ.

އިސްރާއީލުގެ ބްލޮކްޑައުން ކުރިއަށް ދާއިރު، ބޭރު ދުނިޔެއާ މުއާމަލާތް ކުރުމަކީ ޣައްޒާގެ ރައްޔިތުންނަށް ވަރަށް ބޮޑަށް އުނދަގޫ ކަމަކަށް ވެއްޖެ އެވެ.

އެއް ގޮންޖެހުމަކީ ކަރަންޓާއި ތެޔޮ ނެތި މޯބައިލް ފޯނު ޗާޖު ކުރެވޭނެ ގޮތްތައް ހޯދުމެވެ.

ކާރުގެ ބެޓެރީތަކަށް ގުޅައިގެން ފޯނު ޗާޖު ކުރެވޭ ސްޓޭޝަންތަކަށް ދިއުމަށް ބައެއް މީހުން ދަނީ ދިގު ރާސްތާއެއްގައި ހިނގަމުންނެވެ.

އެފަދަ ދަތިޙާލަތުގައި ތިބި ޣައްޒާގެ ނިކަމެތި ރައްޔިތުންގެ ކަންބޮޑުވުންތައް ދުވަހެއް ދުވަހަކަށް ދަނީ އިތުރުވަމުންނެވެ.

ޣައްޒާގެ އައްޝިފާ ހޮސްޕިޓަލަށް އަނެއްކާވެސް ބޮން އަޅާފައިވާއިރު، އެސަރަޙައްދުގައި ހުރި ބައެއް ތަކެތީގައި އަލިފާން ރޯވެފައިވާ މަންޒަރު ފެންނަ ކަމަށް އަލްޖަޒީރާ އަރަބި ރިޕޯޓްތައް ބުނެފިއެވެ.

އައްޝިފާ ހޮސްޕިޓަލަކީ ވަށާލާފައިވާ އެންކްލޭވްގެ އެންމެ ބޮޑު މެޑިކަލް ފެސިލިޓީ ކަމަށްވާއިރު، އެ ހޮސްޕިޓަލަކީ މިހާރު އިސްރާއީލުގެ ބޮމުން ހިމާޔަތް ހޯދަމުން އަންނަ އެތައް ހާސް ބަޔަކު ދިރިއުޅެމުން އަންނަ ހޮސްޕިޓަލެކެވެ.

ތެލާއި ފެނާއި ބޭހުގެ ދަތިކަމުގެ ސަބަބުން މިހާރުވެސް ހަލާކުވާން ކައިރިވެފައިވާ އެ ހޮސްޕިޓަލުގެ ސޯލާ ޕެނަލް ސިސްޓަމަށް ވެސް މިދިޔަ އަންގާރަ ދުވަހު އިސްރާއީލު ސިފައިން ވަނީ ހަމަލާދީފަ އެވެ.

އައްޝިފާ ކައިރީގައި އޮންނަ ސަރަހައްދުގައި ވެސް އާދީއްތަ ދުވަހު ވަނީ ވަރަށް ވަރުގަދަ ހަމަލާތައް ދީފަ އެވެ.

އިސްރާއީލުން ބުނީ ހަމާސްގެ މައި މަރުކަޒު ހުންނަނީ އައްޝިފާގެ ދަށުގައި ކަމަށެވެ. ނަމަވެސް މިއީ ފަލަސްތީނުގެ ކަމާބެހޭ ފަރާތްތަކާއި އިންސާނީ ހިދުމަތްތެރިން ދޮގުކުރާ ވާހަކަ އެކެވެ.

އައްޝިފާ ހުސްކުރުމަށް އިސްރާއީލުން އެދުމުން ހޮސްޕިޓަލުގެ މުވައްޒަފުން ވަނީ ބަލި މީހުން ގެންދިއުމަކީ ނާދިރު ކަމެއް ކަމަށް ބުނެ އެކަމަށް ދެކޮޅު ހަދާފައެވެ.

ފަލަސްތީނުގެ އިސް އޮފިޝަލް ހުސައިން އަލް ޝެއިހް ވިދާޅުވީ ޣައްޒާގައި ހިނގަމުންދާ ހަނގުރާމައާއި އެ ސަރަހައްދުގައި ހިނގަމުންދާ ކަންކަމާ ބެހޭ ގޮތުން ރަޝިއާގެ ޚާރިޖީ ވަޒީރު ސަރްގޭ ލަވްރޯފްއާ ފޯނުން ވާހަކަ ދައްކަވާފައިވާ ކަމަށެވެ.

ފަލަސްޠީނުގެ ލިބަރޭޝަން އޯގަނައިޒޭޝަންގެ ސެކްރެޓަރީ ޖެނެރަލް އަލްޝައިޚް އެކްސްގައި ލިޔުއްވާފައިވާ ގޮތުގައި، ހުރިހާ ފަރާތަކުން ވެސް އާންމުންނަށް ގެއްލުން ނުދިނުމަށާއި، ވަގުތުން ހަނގުރާމަ ހުއްޓާލުމާއި، ރައްކާތެރި ކޮރިޑޯތައް ހުޅުވުމާއި، ފަލަސްތީނުގެ ރައްޔިތުން އެމީހުންގެ ވަޒަނުން ބޭރުނުކުރުމުގެ މައްޗަށް ލަވްރޯފްއާއި އެކު މަޝްވަރާ ކުރެއްވިކަން ކަށަވަރުކޮށްދީފައިވެއެވެ.

އަދި ބައިނަލްއަގްވާމީ ގާނޫނުގެ މައްޗަށް ބިނާވެފައިވާ ސިޔާސީ ހައްލަކީ މި ހަމަނުޖެހުން ނިމުމަކަށް ގެނައުމަށް އޮތް ހަމައެކަނި މަގެއް" ކަމަށް ދެ ބޭފުޅުން ވެސް އެއްބަސްވެވަޑައިގަންނަވާ ކަމަށާއި އަދި މި ގުޅިފައިވާ ލަނޑުދަނޑިތައް ހާސިލްކުރުމަށް ބައިނަލްއަގުވާމީ ފެންވަރުގައި "ޖޮއިންޓް އެކްޝަން" ހިންގުމަށް ވެސް ދެ ބޭފުޅުން އެއްބަސްވެވަޑައިގަންނަވާ ކަމަށް އޭނާ ވިދާޅުވި އެވެ.

އިސްރާއީލުން ޣައްޒާގައި ދެމުންދާ ހަމަލާތަކާއި ގުޅިގެން ޣައްޒާގައި އެމެރިކާގެ އެހީގައި ހިންގާ އައްރަންތިސީ ހޮސްޕިޓަލް ހުސްކުރަން އަންގައިފި ކަމަށް އަލްޖަޒީރާއިން ބުނެފިއެވެ.

އިސްރާއީލުން ދަނީ ޣައްޒާއަށް އުތުރާއި ދެކުނުން ބޮމުގެ ހަމަލާތައް ދެމުންނެވެ. ދެކުނުގެ ސަރަހައްދަކީ މީހުން ހުސްކުރަން ރައްކާތެރި ތަނަކަށް ވާނެ ކަމަށް ބެލެވިފައިވީ ނަމަވެސް، އެ ސަރަހައްދަކީވެސް ވަރަށް ބޮޑަށް އާޓިލަރީގެ ހަމަލާތައް ދޭ ތަނެކެވެ.

މިއީ ހޮސްޕިޓަލްތަކާއި ހުރިހާ ސިއްހީ މަރުކަޒުތަކާ ދެކޮޅަށް ކުރާ ބޮޑު ހަނގުރާމައެއް، އައްޝިފާ ހޮސްޕިޓަލަށް ވަންނަ މައި މަގުތަކަށް ބޮން އަޅައިފި، އެންމެ ފަހު ގަޑިއިރުގެ ތެރޭގައި ކެންސަރު ބަލީގެ ކުދިންނަށް ހާއްސަ އަލް ރަންތިސީ ސްޕެޝަލައިޒްޑް ހޮސްޕިޓަލް ވަގުތުން ހުސްކުރުމަށް އިސްރާއީލުގެ އަސްކަރިއްޔާއިން މިހާރު އެވަނީ އަންގާފައި، އަލްޖަޒީރާގެ ނޫސްވެރިޔާ ރިޕޯޓްކޮށްފައިވެއެވެ.

އަލް ރަންތިސީ ހޮސްޕިޓަލް ހުސްކުރަން އެންގިއިރު ، އެތަނުގައި 1000 ށް ވުރެ ގިނަ މީހުން ތިބި މި ދަނޑިވަޅުގައި މިއީ ވަރަށް އުނދަގޫ ކަމެއްކަމަށް އެ ނޫސްވެރިޔާ ބުނެފައިވެއެވެ.

"މިވަގުތު ނިކުންނާށޭ" ބުނެ ފޯނުތަކަށް އަންނަނީ މެސެޖެކެވެ. ވައިގެ ހަމަލާތަކުގެ ސަބަބުން ކުރިމަތިވަމުންދާ ޓެރަރިޒަމާއި ހިތާމަތަކާއެކުވެސް އިސްރާއީލުން ދަނީ ޣައްޒާގެ ކޮންމެ ތަނެއްގައިވެސް ހަމަލާދެމުންނެވެ.

އިސްރާއީލުން ހިފާފައިވާ ހުޅަނގު އައްސޭރީގެ ތުލްކަރެމް ރެފިއުޖީ ކޭމްޕްގެ އަމާޒަކަށް އިޒްރޭލުގެ ޑްރޯން ހަމަލާއެއް ދީފައިވާ ކަމަށް އަލްޖަޒީރާ އަރަބިކް އިން ބުނެފި އެވެ.

ފަލަސްތީނުގެ ހުޅަނގު އުތުރު ފަރާތުގައި ހިނގި މި ހާދިސާގައި އެއްވެސް މީހަކަށް ގެއްލުމެއް ލިބުނު ކަމުގެ މައުލޫމާތެއް އަދި ލިބިފައެއް ނުވެއެވެ.

މީގެ ކުރިން، ރަމަاللهއިން ރިޕޯޓްކުރާ އަލްޖަޒީރާގެ ނޫސްވެރިޔާ ޒީން ބަސަރަވީ، ތުލްކަރޭމްގައި އިސްރާއީލުން ހިންގަމުންދާ ރެއިޑްގެ ވާހަކަ ރިޕޯޓްކޮށްފައިވާއިރު، މަދުވެގެން 25 އާމަރޑް ވެހިކަލާއި، ހަތިޔާރު އެޅި ގިނަ ޢަދަދެއްގެ ސިފައިން އެ ސަރަޙައްދުގައި ހަރަކާތްތެރިވާތަން ފެނިފައިވާކަމަށް ވަނީ ބުނެފައެވެ.

މިދިޔަ އޮކްޓޯބަރ މަހުގެ 7 ވަނަދުވަހު ހަމާސް އިން އިސްރާއީލަށް ދިން ހަމަލާތަކުގައި މަރުވި ފްރާންސްގެ ރައްޔިތުންގެ އަދަދު 40 އަށް އަރާފައިވާ ކަމަށް ފްރާންސްގެ ބޮޑުވަޒީރު އެލިޒަބެތު ބޯން ވިދާޅުވެއްޖެ އެވެ.

ފްރާންސް އިންޓަ ރޭޑިއޯއަށް ދިން އިންޓަވިއުއެއްގައި ބޯން ވިދާޅުވީ ފްރާންސްގެ އަށް ރައްޔިތަކު އަދިވެސް ގެއްލިފައިވާ ކަމަށާއި ބައެއް މީހުން ޣައްޒާގައި ބަންދުކޮށްފައި ތިބި ކަމަށް ބެލެވޭ ކަމަށެވެ.

ޣައްޒާއަށް ނިއުކްލިއާ ބޮމެއް ވައްޓާލުމަކީ އިސްރާއީލު ސަރުކާރުން ވިސްނަމުންދާ "އެއް އޮޕްޝަން" ކަމަށް ބުނި ކަނާތު ފިޔައިގެ ވަޒީރު އަމީޗާއީ އެލިޔާހޫ ކެބިނެޓުން މުއްދަތެއް ނެތް ގޮތަށް ސަސްޕެންޑް ކުރައްވައިފިއެވެ.

ބޮޑުވަޒީރު ނަތަންޔާހޫގެ އޮފީހުން ބުނީ އެލިއާހޫގެ ވާހަކަތަކަކީ ހަގީގަތާ ޚިލާފު ވާހަކަތަކެއް ކަމަށެވެ.

ނަތަންޔާހޫ އޭނާ ސަސްޕެންޑް ކުރި ނަމަވެސް މިހާރުވެސް ނަތަންޔާހޫގެ ކެބިނެޓުން އެގައުމު ހިންގަމުން ދަނީ ހަނގުރާމައިގެ ޖަރީމާތައް ހިންގުމަށް ސަޕޯޓްކުރާ ކެބިނެޓެއްގެ ދަށުން ކަމުން އެ ވަޒީރު އެކަހެރި ކުރުމުގެ މާބޮޑު މާނައެއް ނެތްކަމަށް މަސްރަހު ދިރާސާ ކުރާ ފަރާތްތަކުން ބުނެއެވެ.

ހަނގުރާމަ ހުއްޓާލުމަށް ފަލަސްތީނުގެ ރައީސް މަޙްމޫދު އައްބާސް އެދިވަޑައިގެންނެވި ނަމަވެސް، ޔަހޫދީ އިސްރާއީލުގެ ބޮޑު ވަޒީރު، ނަތަންޔާހޫ ވަނީ ހަމަލާތައް ހުއްޓާނުލައި ކުރިއަށް ގެންދާނެ ކަމަށް ވިދާޅުވެފަ އެވެ.

އެގޮތުން ނަތަންޔާހޫ ވިދާޅުވީ ހަމާސް އިން ގެންދިޔަ އިސްރާއީލުގެ ރަހީނުން ދޫކުރަންދެން ހަނގުރާމަ ކުރިއަށްގެންދާނެ ކަމަށެވެ.

އައްބާސް މިހެން އެދިވަޑައިގަތީ އެމެރިކާގެ ޚާރިޖީ ވަޒީރު އެންޓޯނީ ބްލިންކެންއާ ބައްދަލުކުރައްވައި ދެއްކެވި ވާހަކައިގަ އެވެ. އެގޮތުން ރައީސް އައްބާސް ވަނީ ފަލަސްތީނު އޮތޯރިޓީއަށް ޣައްޒާގެ ވެރިކަމަށް އެނބުރި ދެވޭނީ އިސްރާއީލާއި ފަލަސްތީނުގެ މައްސަލައަށް "ފުރިހަމަ ސިޔާސީ ހައްލެއް" ހޯދައިގެން ކަމަށް ވިދާޅުވެފަ އެވެ.

ހަނގުރާމަ ހުއްޓާލުމަށް ފަލަސްތީނުގެ ރައީސް މަޙްމޫދު އައްބާސް އެދިވަޑައިގެންނެވި ނަމަވެސް، ޔަހޫދީ އިސްރާއީލުގެ ބޮޑު ވަޒީރު، ނަތަންޔާހޫ ވަނީ ހަމަލާތައް ހުއްޓާނުލައި ކުރިއަށް ގެންދާނެ ކަމަށް ވިދާޅުވެފަ އެވެ.

އެގޮތުން ނަތަންޔާހޫ ވިދާޅުވީ ހަމާސް އިން ގެންދިޔަ އިސްރާއީލުގެ ރަހީނުން ދޫކުރަންދެން ހަނގުރާމަ ކުރިއަށްގެންދާނެ ކަމަށެވެ.

އައްބާސް މިހެން އެދިވަޑައިގަތީ އެމެރިކާގެ ޚާރިޖީ ވަޒީރު އެންޓޯނީ ބްލިންކެންއާ ބައްދަލުކުރައްވައި ދެއްކެވި ވާހަކައިގަ އެވެ. އެގޮތުން ރައީސް އައްބާސް ވަނީ ފަލަސްތީނު އޮތޯރިޓީއަށް ޣައްޒާގެ ވެރިކަމަށް އެނބުރި ދެވޭނީ އިސްރާއީލާއި ފަލަސްތީނުގެ މައްސަލައަށް "ފުރިހަމަ ސިޔާސީ ހައްލެއް" ހޯދައިގެން ކަމަށް ވިދާޅުވެފަ އެވެ.

ފާއިތުވެ ދިޔަ ދުވަސްތަކުގައި އެމެރިކާގެ 300 އަށް ވުރެ ގިނަ އާއިލާގެ މީހުން ވަނީ ޣައްޒާ ދޫކޮށް ގޮސްފައި ކަމަށް އެމެރިކާ އިން ބުނެފިއެވެ. ވައިޓް ހައުސްގެ ޑެޕިއުޓީ ނޭޝަނަލް ސެކިއުރިޓީ އެޑްވައިސަރ ޖޯން ފައިނަރ އާދިއްތަ ދުވަހު ސީބީއެސް ފޭސް ދަ ނޭޝަން އަށް ވިދާޅުވީ ޣައްޒާގައި ތިބި އެމެރިކާ މީހުން އަނބުރާ ޤައުމަށް ގެނައުމަށް މަޝްވަރާކުރަމުންދާ ކަމަށެވެ. އަދިވެސް އިތުރު އެމެރިކާ މީހުން ޣައްޒާގައި ތާށިވެފައިވާ ކަމަށް އެމެރިކާ އިން ވަނީ ބުނެފައެެވެ.

އިސްރާއީލުގެ އެކި ހިސާބުތަކުގައި ހަމާސްގެ ބެލުމުގެ ދަށުގައި ތިބި އަސީރުން ދޫކޮށްލުމަށް ގޮވާލާ އަޑުއުފުލުންތައް އަންނަނީ ކުރިޔަށްގެންދަމުންނެވެ. އެގޮތުން އިސްރާއީލުގެ ބޮޑުވަޒީރުގެ ގެ ހުންނަ ސަރަހައްދުގައިވެސް މުޒާހަރާކުރަމުން ދެއެވެ.

އެއްބަޔަކު ގޮވާލަމުން އަންނަނީ އިސްރާއީލުގެ ޖަލުތަކުގައި ތިބި ފަލަސްތީނުގެ ރައްޔިތުން ދޫކޮށްލުމަށެވެ. އެއީ ހަމާސް އިން އަސީރުން މިނިވަންކުރުމަށް ކޮށްފައިވާ ޝަރުތެވެ. އަނެއް ބަޔަކު ބުނަމުން އަންނަނީ އަސީރުން އެނބުރި އަންނަންދެން އިސްރާއީލުގެ ޖަލުތަކުގައި ތިބި އެއްވެސް ފަލަސްތީނުގެ ރައްޔިތެއް މިނިވަންނުކުރުމަށާއި، ހަމަލާތައް ދިނުން ހުއްޓާނުލަމަށެވެ.

ހަމާސް އިން ބުނެފައިވާ ގޮތުގައި އެމީހުންގެ ބެލުމުގެ ދަށުގައި އަސީރުންގެ ތެރެއިން 60 މީހަކު ވަނީ އިސްރާއީލުން ދިން ހަމަލާތަކުގައި މަރުވެފައެވެ.

އެއްވުންތަކުގައި ނަތަންޔާހޫ އިސްތިއުފާ ދިނުމަށްވެސް އަންނަނީ ގޮވާލަމުންނެވެ. އަދި އަސީރުންގެ މައްސަލައިގައި ޒިންމާވާންޖެހޭނީ ނަތަންޔާހޫކަމަށް އަންނަނީ ބުނަމުންނެވެ.

އިސްރާއީލުން ޣައްޒާގައި ހުންނަ އަޒްހަރު ޔުނިވަސިޓީއަށް ބޮން އަޅާފައިވަނީ ހޮނިހިރު ދުވަހުގެ ހެނދުނެވެ.