ޣައްޒާ ހިފުމަށް އިސްރާއީލުން ދެމުންދާ ހަމަލާތައް

ހަމާސްގެ ކޮމާންޑަރު ސެންޓަރު އައް ޝިފާ ހޮސްޕިޓަލުގައި ހުރިކަމަށް ބުނެ އައް ޝިފާ ހޮސްޕިޓަލުގައި އިސްރާއީލު އަސްކަރިއްޔާއިން ކުރިޔަށްގެންދާ އޮޕަރޭޝަން އެގޮތުގައި ކުރިޔަށްގެންދާނެކަމަށް އިސްރާއީލު އަސްކަރިއްޔާއިން ބުނެފިއެވެ.

އައް ޝިފާ ހޮސްޕިޓަލުގައި ހަމާސްގެ ހަނގުރާމަވެރިން ތިބިކަމަށާއި އެތަނުގެ ހަމާސްގެ ޓަނަލުތައް ހުންނަކަމަށް އިސްރާއީލު އަސްކަރިއްޔާއިން އަންނަނީ ބުނަމުންނެވެ.

ނަމަވެސް މިހާތަނަށް އެމީހުން ދައްކަމުން އަންނަ އެއްވެސް ވާހަކައެއްގެ ހެއްކެއް ދެއްކިފައެއްނުވެއެވެ.

ޖެނިން ރެފިޔުޖީ ކޭމްޕުގައި ހުންނަ އިބުނު ސިނާ ހޮސްޕިޓަލު ހުސްކުރުމަށް އިސްރާއީލު ސިފައިން އަންގައިފިއެވެ.

އިސްރާއީލުން ވަނީ ދެ ޕެރެމެޑިކްސް ހައްޔަރުކޮށްފައެވެ. އިސްރާއީލު ސިފައިން ވަނީ މިހޮސްޕިޓަލު ވަށާލާފައެވެ. އަދު އެމްބިޔުލަންސްތައް ބަލާފައިވާއިރު ލައުޑް ސްޕީކަރުން އަންނަނީ ހޮސްޕިޓަލު ހުސްކުރުމަށް ގޮވާލަމުންނެވެ.

- އައް ޝިފާ ހޮސްޕިޓަލުގައި އިސްރާއީލުން ހިންގަމުން އަންނަ ރެއިޑް އަދިވެސް ކުރިޔަށްދާއިރު ހޮސްޕިޓަލުގެ ހާލަތު ވަނީ ވަރަށް ބޮޑަށް ގޯސްވެފައިކަމަށް އެހޮސްޕިޓަލުން ބުނޭ

- ޣައްޒާގެ ޓެލެކޮމިޔުނިކޭޝަން ފަރމުން ބުނެފައިވަނީ ތެޔޮ ނެތުމުގެ ސަބަބުން ޣައްޒާއަށް މުވާސަލާތީ ޚިދުމަތްދެން ނުދެވޭނެކަމަށް

- ޣައްޒާގައި އުތުރުގައި ހުންނަ އިންޑޮނޭޝިއަން ހޮސްޕިޓަލުން ދެން އިތުރަށް ޚިދުމަތް ނުދެވޭނެކަމަށް އެހޮސްޕިޓަލުން ބުނެފި

- ހަނގުރާމައިން ނަސްރު ލިބޭނެކަމުގެ ޔަގީންކަން އެބައޮތްކަމަށް ހަމާސްގެ ވެރިޔާ އިސްމާއީލު ހަނިއްޔާ ބުނެފި

- ހުޅަނގު އައްސޭރީގައި ހުންނަ ޖެނިން ރެފިޔުޖީ ކޭމްޕުގައި އިސްރާއީލުން އަނެއްކާވެސް ރެއިޑް ކުރިޔަށް ގެންގޮސްފި

- އައް ޝިފާ ހޮސްޕިޓަލާއި ކައިރީގައި ހުރި އިމާރާތަކުން ހަމާސްގެ އަތްދަށުގައި ހުރި އަސީރަކު މަރުވެފައި އޮއްވާ ފެނިފައިވަކަމަށް އިސްރާއީލުން ބުނެފި

- މުވާސަލާތީ ޚިދުމަތް ޣައްޒާގައި އެއްކޮށް މެދުކެނޑިފައިވުމުން ޣައްޒާއަށް އިންސާނީ އެހީ ފޯރުކޮށްދިނުމަކީ މިހާރު ވަރަށް ނާދިރު ކަމެއްކަމަށް އދ ރެފިޔުޖީންނާ ބެހޭ ފަލަސްތީނު ގޮފިން ބުނެފި

- އައް ޝިފާ ހޮސްޕިޓަލުގެ ތެރޭގައި މަރުވެފައި ވަޅުލެވޭނެ ގޮތެއްނެތް އެތައް ހަށިތަކެއް އިސްރާއީލުން ގެންގޮސްފައިވާކަމަށް ފަލަސްތީނުގެ ހެލްތު މިނިސްޓްރީން ބުނެފި

އިސްރާއީލުން އަނެއްކާވެސް ޖަބާލިޔާ ރެފިޔުޖީ ކޭމްޕަށް ބޮން އަޅަން ފަށާފައިވާކަމަށް އަލްޖަޒީރާއިން ރިޕޯޓްކޮށްފިއެވެ.

ޣައްޒާގެ އުތުރުގައި އޮންނަ މި ރެފިޔުޖީ ކޭމްޕަކީ އިސްރާއީލުގެ ހަމަލާތައް ކޮންމެ ދުވަހަކުހެން އަމާޒުކުރަމުން އަންނަ ކޭމްޕެކެވެ. މިހަމަލާތަކުގައި އެތައް ބަޔެއްގެ ފުރާނަ ގެއްލިފައިވާކަމަށާއި އިމާރާތްތަކުގެ ދަށުގައިވާ މީހުން ސަލާމަތްކުރުމުގެ މަސައްކަތްކުރަމުން އަންނަ އަލް ޖަޒީރާއިން ބުނެއެވެ.

ޣައްޒާއިން ތެޔޮ ހުސްވެ މުވާސަލާތީ ގުޅުން އެއްކޮށް މެދުކެނޑިފައިވާތީ ބައިނަލްއަގްވާމީ މުޖުތަމައުން ކަންބޮޑުވުން ފާޅުކުރަން ފަށައިފިއެވެ.

އެގޮތުން މީޑިޔާ ރައިޓް ގްރޫޕު ތަކުން ޣައްޒާގެ ތެރޭގައި ވާނުވާ ނޭންގޭތީ އާއި ނޫސްވެރިންނަށް ރައްކާތެރިކަން ކަށަވަރުކޮށްދީފައިނުވާތީ އެކަމުގެ ކަންބޮޑުވުން ވަނީ ފާޅުކޮށްފައެވެ. އަދި ވީއެންމެ އަވަހަކަށް ޣައްޒާއަށް ތެޔޮ އެތެރެކުރުމަށް ވަނީ އެދިފައެވެ.

ޚާން ޔޫނުސްގެ އިރުމައްޗަށް ދިން އިސްރާއީލުން ވައިގެ މަގުން ދިން ހަމަލާތަކުގައި 10 މީހުން ޝަހީދުކޮށްލާފައިވާކަމަށް އަލްޖަޒީރާއިން ބުނެފިއެވެ.

ޝަހީދުވި މީހުންގެ ތެރޭގައި ކުޑަ އަންހެންކުއްޖަކާއި ތުއްތުކުއްޖެއްވެސް ހިމެނެއެވެ.

އިސްރާއީލުން ޣައްޒާ ހިފުމަށް ކުރަމުންދާ ހަނގުރާމައިގައި ހަމާސް އަށް ނަސްރު ލިބޭނެކަމުގެ ޔަގީންކަން އެބައޮތްކަމަށް ހަމާސްގެ ވެރިޔާ އިސްމާއީލު ހަނިއްޔާ ބުނެފިއެވެ.

ހަނިއްޔާ ބުނީ އިސްރާއީލުން ބޭނުންވަނީ ހަނގުރާމަ ދިގުދަންމަން ކަމަށްވާނަމަ އެކަމަށްވެސް ތައްޔާރުކަމަށާއި އެކަމުގެ ގާބިލުކަން އެބަހުރިކަމަށެވެ. ހަނިއްޔާ ބުނީ ފަލަސްތީނުގެ ރައްޔިތުން އިސްރާއީލުގެ ޕްލޭންތައް ނާކާމިޔާބުކޮށްލާފައިވާކަމަށެވެ.

އިސްރާއީލަށް ޣައްޒާގައި ހާސިލުކުރަން ބޭނުންވާ އެއްވެސް ކަމެއް ހާސިލުނުވާކަމަށާއި އަސީރުންވެސް މިނިވަންކޮށްގެން ނުގެންދެވޭކަމަށް ހަނިއްޔާ ބުންޏެވެ.

ހަމާސްގެ އަތްދަށުގައި ހުރި އަސީރެއް އައްޝިފާ ހޮސްޕިޓަލާއި ކައިރީގައި ހުރި އިމާރާތެއްގައި މަރުވެފައި އޮއްވާ ފެނިފައިވާކަމަށް އިސްރާއީލުން ބުނެފިއެވެ.

އިސްރާއީލު އަސްކަރިއްޔާގެ ސްޕޯކްސްމަން ބުނީ މަރުވެފައި އޮއްވާ ފެނުނީ އުމުރުން 60ގެ އަހަރުތައް ގުނަމުންދާ އަންހެނެއްކަމަށެވެ. އެމީހާ މަރުވީ ކިހިނެއްކަމެއް އިސްރާއީލުން ބުނެއެވެ.

އޮކްޓޯބަރ މަހުގެ 7 ވަނަ ދުވަހުގެ ފަހުން މިހާތަނަށް އިސްރާއީލުން ފަލަސްތީނުގެ 2760 ރައްޔިތުން ހައްޔަރުކޮށްފައިވާކަމަށް ފަލަސްތީނިއަން ޕްރިޒަނަރސް ސޮސައިޓީން ބުނެފިއެވެ.

މީގެތެރޭގައި ހިމެނެނީ އެމީހުންގެ ގެތަކުގައި ތިއްބާ ގޮސް ހައްޔަރުކުރި މީހުންނާއި، ޗެކް ޕޮއިންޓްތަކުން ހައްޔަރުކުރި މީހުންނާއި ހައްޔަރުވާން މަޖުބޫރުކޮށްގެން ހައްޔަރުކޮށްފައިވާ މީހުންނެވެ.

އިސްރާއީލުގެ ބޮޑުވަޒީރު ބެންޔަމިން ނަތަންޔާހޫ އިސްތިއުފާ ދިނުމަށް އިދިކޮޅު ލީޑަރު ޔައިރު ލަޕިޑު ގޮވާލައިފިއެވެ.

މިއީ ހަނގުރާމަ ފެށި ފަހުން އިސްރާއީލުގެ އިދިކޮޅު މީހަކު މިހާ ފާޅުކަން ބޮޑުގޮތެއްގައި ނަތަންޔާހޫ އިސްތިއުފާ ދިނުމަށް ގޮވާލި ފުރަތަމަ ފަހަރެވެ.

ލަޕިޑު ބުނީ އިސްރާއީލު ސަރުކާރު ނުހިނގާކަމަށާއި ނަތަންޔާހޫ އަށް ބޮޑުވަޒީރުކަމުގައި ނުހުރެވޭނެކަމަށެވެ.

އިސްރާއީލުން އައް ޝިފާ ހޮސްޕިޓަލަށް ވަދެގަނެ ހިންގަމުންދާ ޖަރީމާތަކުގައި އެ ހޮސްޕިޓަލުގެ ދެ އިންޖިނިއަރުން ހައްޔަރުކޮށްފައިވާކަމަށް ފަލަސްތީނުގެ ހެލްތު މިނިސްޓްރީން ބުނެފިއެވެ.

ދެ މީހުންވެސް ހައްޔަރުކޮށްފައިވަނީ ހޮސްޕިޓަލުގައި ތިއްބައެވެ.

އަލްޖަޒީރާއިން ރިޕޯޓްކޮށްފައިވާ ގޮތުގައި އިސްރާއީލު އަސްކަރިއްޔާގެ އަމާޒު މިހާރު ހުރީ ޣައްޒާގެ ދެކުނަށެވެ.

އެގޮތުން ޣައްޒާގެ ދެކުނުގައި އޮންނަ ޚާން ޔޫނުސް އަށް އަމާޒުކޮށް އިސްރާއީލުން ގިނަ ހަމަލާތަކެއް ދެމުްނ އަންނަކަމަށް ވަނީ ބުނެފައެވެ. އިސްރާއީލުން އަންނަނީ ޣައްޒާގެ ދެކުނަށް އިތުރަށް ވަނުމަށް މަސައްކަތްކުރަމުންނެވެ.

ޣައްޒާގެ އުތުރުގައި އުޅޭ ގިނަ އަދަދެއްގެ ރައްޔިތުން ވަނީ ދެކުނަށް ބަދަލުވެފައެވެ. އަދި އިސްރާއީލުން ބުނެފައިވާ ގޮތުގައި ޣައްޒާގެ ދެކުނަކީ ރައްކާތެރި ސަރަހައްދެވެ.

އދ ގެ ސަލާމަތީ މަޖިލީހުގައި އިސްރާއީލުން ޣައްޒާއަށް ދެމުންދާ ހަމަލާތައް މެދުކަނޑާލާ އިންސާނީ އެހީތެރިކަން ފޯރުކޮށްދިނުމަށް ފާސްކޮށްފިއެވެ.

15 މެމްބަރު ގައުމު ހިމެނޭ ސަލާމަތީ މަޖިލީހުގެ 12 ގައުމުން ގަރާރާއި އެއްކޮޅަށް ވޯޓުދިން އިރު އެއްވެސް ގައުމަކުން އެކަމާ ދެކޮޅަށް ވޯޓެއް ނުދެއެވެ. އެއްވެސް ކޮޅަކަށް ވޯޓު ނުދެނީ އެމެރިކާ، އިނގިރޭސިވިލާތް އަދި ރަޝިޔާއެވެ.

ރޮއިޓަރސް އިން އެންމެ ފަހުން ކުރިޔަށްގެންދިޔަ ޕޯލުން ދައްކާގޮތުގައި އެމެރިކާގެ 68 އިންސައްތަ މީހުން ބޭނުންވަނީ އިސްރާއީލުން ފަލަސްތީނަށް ދެމުންދާ ހަމަލާތައް ހުއްޓާލާ މަޝްވަރާއަށް ދިޔުމަށެވެ.

32 އިންސައްތަ މީހުން ގަބޫލުކުރަނީ އެމެރިކާއިން އިސްރާއީލަށް މި ހަނގުރާމައިގައި އެހީތެރިވާން ޖެހޭނެކަމަށެވެ. އޮކްޓޯބަރ 12ން 13ށް ކުރިޔަށް ގެންދިޔަ ޕޯލުން ދެއްކީ އެމެރިކާއިން އިސްރާއީލަށް އެހީތެރިވާންޖެހޭކަމަށް 41 އިންސައްތަ މީހުންނެވެ.

4 އިންސައްތަ މީހުން ގަބޫލުކުރާގޮތުގައި އެމެރިކާއިން ފަލަސްތީނަށް އެހީތެރިވާންޖެހޭނެއެވެ. އަދި 15 އިންސައްތަ މީހުން ގަބޫލުކުރާ ގޮތުގައި އެމެރިކާއިން މިހަނގުރާމައިގައި ބައިވެރިވާކަށް ނުޖެހެއެވެ.

އިސްރާއީލުން ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ގަތުލު އާންމު ހުއްޓާލުމަށް އިސްރާއީލަށް ސްޕެއިންގެ ބޮޑުވަޒީރު ގޮވާލައްވައިފިއެވެ.

ފަލަސްތީނަކީ ދައުލަތެއްކަމަށް ސްޕެއިން ގަޔާއި ޔޫރަޕްގައިވެސް ބަލައިގަތުމަށް މަސައްކަތްކުރާނެކަމަށް ބޮޑުވަޒީރު ވިދާޅުވިއެވެ.

ފާއިތުވި 24 ގަޑިއިރުތެރޭގައި އިސްރާއީލު ސިފައިންގެ 2 މީހަކު މަރާލާފައިވާކަމަށާއި އެއްގަމު މަގުން ކުރަމުންދާ ހަނގުރާމައިގައި މަރުވި އިސްރާއީލު ސިފައިންގެ އަދަދު 51ށް އަރާފައިވާކަމަށް އިސްރާއީލުން ބުނެފިއެވެ.

އިސްރާއީލުގެ ހަނގުރާމަވެރިން މިހާރު މަސައްކަތް ކުރަނީ ޣައްޒާގެ ދެކުނުގެ ސަރަހައްދާ ދިމާލަށް ދާންކަމަށް އަލްޖަޒީރާއިން ރިޕޯޓްކޮށްފިއެވެ.

ޣައްޒާގެ ދެކުނުގެ ޚާން ޔުނިސްއިން ރިޕޯޓްކުރާ އަލްޖަޒީރާގެ ތާރިގު އަބޫ އަޒްޒޫމް ވިދާޅުވީ ހަމަލާތައް ދެމުންދާތީ އިސްރާއީލުގެ އަސްކަރިއްޔާގެ ސަމާލުކަން މިހާރު ވަނީ "ދެކުނުގެ ސަރަހައްދުތަކަށް" އަމާޒުވެފައި ކަމަށެވެ.

އަބޫ އަޒްޒޫމް ވިދާޅުވީ ފާއިތުވި ދެ ގަޑިއިރުގެ ތެރޭގައި ޚާން ޔުނިސް ސިޓީގައި މީހުން ދިރިއުޅޭ ތިން ގެއަކަށް ބޮން އަޅާފައިވާ ކަމަށެވެ.

ޣައްޒާގެ އިރުމަތީ ސަރަހައްދުގައި އިސްރާއީލު ގެ ހަނގުރާމަ ވެރިންނާއި ފަލަސްތީނުގެ ހަނގުރާމަވެރިންނާ ދެމެދު ކުރިމަތިލުންތައް ހިނގަމުންދާއިރު، އިސްރާއީލު ސިފައިން މަސައްކަތް ކުރަމުން ދަނީ ޣައްޒާގެ ދެކުނުގެ ސަރަހައްދަށް ދިއުމަށް ކަމަށް އޭނާ ވިދާޅުވި އެވެ.

ހޮސްޕިޓަލްތަކަށް ބޭނުންވާ ސާމާނާއި ޣައްޒާގެ މީހުންނަށް އެހީތެރިވުމަށް ހާއްސަ އެހީތަކެއް ހިފައިގެން ގަތަރުގެ ދެ މަތިންދާބޯޓެއް މިސްރުގެ އެލް އަރީޝްއަށް ދަތުރުކުރަމުންދާ ކަމަށް ގަތަރުގެ ފޮރިން މިނިސްޓްރީން އެކްސްގައި ބުނެފި އެވެ.

ޤަތަރުން އެހީގެ ތަކެތި ހިފައިގެން މިސުރުގެ ބޯޑަރު ސަރަޙައްދަށް ދިޔަނަމަވެސް އެތަކެތި ޣައްޒާއަށް ވެއްދޭނީ އިސްރާއީލްގެ ޓެރެރިސްޓް ހަނގުރާމަވެރިންގެ ހުއްދަ ލިބިގެންނެވެ.

ރަފާހް ބޯޑަރު ކައިރީގައި އިސްރާއީލް ހަނގުރާމަވެރިން ހިންގާ އޮޕަރޭޝަނެއްގެ ސަބަބުން ޣައްޒާއަށް އެހީ ފޯރުކޮށްދިނުމަށް ހުރަސްތަކެއް ކުރިމަތިވެއްޖެ އެވެ.

މިސްރުގެ ޚާރިޖީ ވުޒާރާގެ ތަރުޖަމާނު ވިދާޅުވީ އިސްރާއީލުން "ބޯޑަރުގެ އަނެއް ފަރާތުގައި" ހިންގާ އަމަލުތަކުގެ ސަބަބުން ޣައްޒާއަށް ބޭނުންވާ އިންސާނީ އެހީ ދިނުން ލަސްވަމުންދާ ކަމަށެވެ.

"ރަފާ ކްރޮސިން އޮތީ ހުޅުވިފައި، ހަމަނުޖެހުންތައް ފެށުނީއްސުރެ އެއްވެސް މަރުހަލާއެއްގައި ބަންދުކޮށްފައެއް ނުވޭ. އެހެންނަމަވެސް އިސްރާއީލްގެ ހަނގުރާމަވެރިންގެ އަމަލުތަކުގެ ސަބަބުން އެހީ ފޯރުކޮށްދިނުމަށް އަބަދުވެސް ދަނީ ހުރަސްތައް ކުރިމަތިވަމުން، އެކްސްގައި އޭނާ ކުރެއްވި ޕޯސްޓެއްގައި ވިދާޅުވެފައިވެ އެވެ.

ޖަބާލިއާ ރެފިޔުޖީ ކޭމްޕަށް އިސްރާއީލުން މިރޭ ވައިގެ މަގުން ދިން ހަމަލާތަކުގައި 31 މީހެއްގެ ހަށިގަނޑު އިމާރާތްތަކުގެ ދަށުން ނަގާފައިވާކަމަށް ފަލަސްތީނިއަން ސްޓޭޓް ނިއުސް އެޖެންސީ ވަފާއިން ބުނެފިއެވެ.

މިހަމަލާތައް އަމާޒުކޮށްފައިވަނީ އެ ރެފިޔުޖީ ކޭމްޕްގެ 12 ގެއަކަށެވެ. ޖަބާލިއާ ރެފިޔުޖީ ކޭމްޕަކީ އިސްރާއީލުން އެންމެ ވަރުގަދައަށް ހަމަލާތައް އަމާޒުކުރަމުން އަންނަ އެއްތަނެވެ.

އަސީރުން މިނިވަންކުރުމުގެ ކަންކަމުގައި ގަތަރުން އަންނަނީ މަސައްކަތްކުރަމުން ކަމަށާއި ނަމަވެސް އިސްރާއީލުން އަންނަނީ އެކަން ލަސްކުރަމުންކަމަށް ހަމާސް އިން ބުނެފިއެވެ.

ހަމާސްގެ ބައްސާމް ބްރިގޭޑުގެ ސްޕޯކްސްޕާސަން އަބޫ އުބައިދާ ބުނީ ވާހަކަތައް ދެކެވެމުންދަނީ އިސްރާއީލު ޖަލުތަކުގައި ތިބި 200 ފަލަސްތީނު ކުޑަކުދިންނާއި 75 އަންހެނުން މިނިވަންކުރުމަށެވެ. އޭގެ ބަދަލެއްގެ ގޮތުން އަސީރުންގެ 50 އާއި 70 އާ ދެމެދު މީހުން މިނިވަންކުރާނެއެވެ.

ނަމަވެސް އިސްރާއީލުން އެދިފައިވަނީ 100 އަސީރުން ދޫކޮށްލުމަށްކަމަށާއި އެކަމުގެ ބަދަލެއްގެ ގޮތުގައި 5 ދުވަހަށް ހަމަލާ ދިނުން މެދުކަނޑާލުމަށް ހަމާސް އިން އެދުނުކަމަށެވެ.

ނަމަވެސް އެކަމަށް އިސްރާއީލުން އެއްބަސްނުވެ ހަމަލާތައް ދެމުންދާއިރު ހަމައެކަނި ގެއްލެނީ ފަލަސްތީނުގެ ރައްޔިތުންގެ މީހުންގެ ފުރާނަ ނޫންކަމަށާއި އަސީރުންގެ ފުރާނަވެސް ގެއްލެމުންދާކަމަށް ވަނީ ބުނެފައެވެ. އެގޮތުން ހަމާސްގެ އަތްދަށުގައި ހުރި އަންހެނެއް އިސްރާއީލުގެ ހަމަލާތަކުގައި މަރުވެފައިވާކަމަށް އަބޫ އުބައިދާ ބުނެފައިވެއެވެ.

ޚަލީލު ސަހަރު ކައިރީގައި އޮންނަ ގަވަރުނަރޭޓްގެ ޔައްޓާ ސިޓީއަށް އިސްރާއީލް ސިފައިން ހަތިޔާރާއެކު ވަންނަ މަންޒަރު އަލްޖަޒީރާގެ ނޫސްވެރިންނަށް ފެނިއްޖެއެވެ.

އަލްޖަޒީރާ އަރަބިކް އިން އެކްސްގައި އާންމުކޮށްފައިވާ ވީޑިއޯއަކުން ފެންނަ ގޮތުގައި އިސްރާއީލު ސިފައިން ހިފާފައިވާ ހުޅަނގު އައްސޭރީގެ ޚަލީލު ސަރަހަރުގެ ގަވަރުނަރޭޓްގެ ޔައްޓާ ސިޓީއަށް ވަދެއެވެ.

ހަތިޔާރު އެޅި ސިފައިންގެ ކައިރީގައި އިޒްރޭލުގެ ދިދަ ޖަހާފައިވާ އާމާޑް ވެހިކަލެއް ވެސް ވީޑިއޯއިން ފެނެ އެވެ.

އިސްރާއީލުން ހިފާފައިވާ ހުޅަނގު އައްސޭރީގައި އިސްރާއީލުން ހިންގަމުންދާ ޙަމަލާތަކުގައި މަހެއްހާ ދުވަހުގެ ތެރޭގައި ފަލަސްޠީނުގެ 185 މީހުން ޝަހީދުވެ، 2500 މީހުން ޒަޚަމްވެފައިވާކަމަށް ފަލަސްޠީނުގެ ކަމާބެހޭ ފަރާތްތަކުން ބުނެއެވެ.

ޣައްޒާ ހިފުމަށް އިސްރާއީލުން މެދުނުކެނޑި ދެމުންދާ ހަމަލާތަކުގައި އިސްރާއީލާއި ލުބުނާން ގުޅޭ ބޯޑަރު ސަރަހައްދުގައި ހަމަލާ ބަދަލުކުރުންތައް އަންނަނީ ވަރުގަދަވަމުންނެވެ.

އެގޮތުން ހިޒްބުﷲ އިން ދިން ހަމަލާތަކުގައި އިސްރާއީލު ސިފައިންގެ ހަތް މީހަކަށް އެކިވަރުގެ އަނިޔާ ލިބިފައިވާކަމަށް އިސްރާއީލު އަސްކަރިއްޔާއިން ވަނީ ބުނެފައެވެ. އިސްރާއީލު އަސްކަރިއްޔާއިން ނެރުނު ބަޔާނުގައި ބުނެފައިވަނީ ހަތް މީހަކަށް އަނިޔާވެފައިވާކަމަށެވެ.

އަދި ފާއިތުވި ގަޑިއިރު ތެރޭގައި ލުބުނާނާ ވީ ދިމާލުން 15 ހަމަލާއެއް އިސްރާއީލަށް އަމާޒުކޮށްފައިވެއެވެ.

ޖަބާލިއާ ރެފިޔުޖީ ކޭމްޕަށް އަމާޒުކޮށް އިސްރާއީލުން ދިން ހަމަލާތަކުގައި މަދުވެގެން 15 މީހުން ޝަހީދުވެފައިވާކަމަށް އަލްޖަޒީރާއިން ބުނެފިއެވެ.

ޖަބާލިއާ ރެފިޔުޖީ ކޭމްޕަކީ ޣައްޒާގައި އެންމެ ބައިބޯ ސަރަހައްދެވެ. މީގެކުރިންވެސް ޖަބާލިއާ ރެފިޔުޖީ ކޭމްޕަށް އަމާޒުކޮށް އިސްރާއީލުން ވަނީ ވަރުގަދަ ހަމަލާތަކެއް ދީފައެވެ.

ޣައްޒާގެ އުތުރުގައި ހުރި ހޮސްޕިޓަލުތަކަށް އަމާޒުކޮށް އިސްރާއީލުން ހަމަލާތައް ދެމުން ގެންދާއިރު މިހާރު ޚިދުމަތް ދެމުންދާ ހަމައެކަނި ހޮސްޕިޓަލަކީ އަލް އަހުލީ ހޮސްޕިޓަލުކަމަށް އެ ހޮސްޕިޓަލުން ބުނެފިއެވެ.

އެހޮސްޕިޓަލުން ބުނީ އެހެން ހޮސްޕިޓަލުތަކުން ޚިދުމަތްދެމުންނުދާތީ އެހޮސްޕިޓަލަށް ގިނަ އަދަދެއްގެ ބަލި މީހުން މިހާރު އަންނަމުންދާކަމަށެވެ.

އިސްރާއީލުން ޚާން ޔޫނުސް، ރަފާހް އަދި ޣައްޒާގެ މެދުތެރެއަށް ދޭ ހަމަލާތައް ވަރުގަދަކޮށްފި ކަމަށް އަލްޖަޒީރާއިން ރިޕޯޓްކޮށްފިއެވެ.

އަލްޖަޒީރާގެ ނޫސްވެރިން ބުނީ ޚާން ޔުނިސްގެ އިރުމަތީ ފަރާތުގައި ހުރި މީހުން ދިރިއުޅޭ އިމާރާތަކަށް އަމާޒުކޮށް ހަމަލާތަކެއްދީ އެ އިމާރާތް ބިމާ ހަމަކޮށްލާފައިވާ ކަމަށެވެ.

އަދި އެ ހަމަލާގައި ތިން މީހަކު މަރުވެފައިވާ ކަމަށް ރިޕޯޓުތައް ބުނެއެވެ. މަރުވި މީހުންގެ ތެރެއިން އެކަކު އޮތީ ވަރަށް ބޮޑަށް ކުދިކުދިވެފައި، އޭނާގެ ހަށިގަނޑު ގެންދިޔައީ ސީދާ މޯޗަރީއަށް ޕްލާސްޓިކް ކޮތަޅެއްގެ ތެރޭގައި ކަމަށް މަންޒަރުދުށް މީހުންނާއި ހަވާލާދީ އަލްޖަޒީރާއިން ބުނެއެވެ.

މި ހަމަލާ ދީފައި ވަނީ އެ ސަރަހައްދުގައި ދެ ގަޑިއިރެއްހާއިރު ހަމަލާތައް މަޑުޖެހިފައި އޮތުމަށްފަހު އެވެ. ނަމަވެސް މިއަދު ހެނދުނާއި ރޭގެ ދަންވަރުގެ ވަގުތެއްގައި ރަފާހް، ޚާން ޔޫނުސް އަދި ޣައްޒާގެ މެދުތެރެއަށް ތަކުރާރުކޮށް އެކި ވައިގެ ހަމަލާތަކާއި ވަރުގަދަ ބޮމުގެ ހަމަލާތައް ދީފައިވެއެވެ.

ހަމާސް ޖަމާއަތުން ޣައްޒާގައި ބަންދުކޮށްފައި ތިބި އިސްރާއީލާއި އެެހެނިހެން ޤައުމުތަކުގެ އަސީރުން ދޫކޮށްލުމަށް ގޮވާލައި އިސްރާއީލުގެ ތެލްއަވީވްގައި ރޭ އެތައް ހާސް ބަޔަކު އެއްވެއްޖެ އެވެ.

އިހުތިޖާޖު ކުރި މީހުންގެ ތެރޭގައި ގައިދީންގެ ރަހުމަތްތެރިންނާއި އާއިލާގެ މީހުން ވެސް ހިމެނެ އެވެ.

ޣައްޒާ ތަޅާ ސުންނާފަތި ކުރުމުގެ ބަދަލުގައި އަސީރުން މިނިވަން ކުރުމަށް ހަރުދަނާ ފިޔަވަޅުތަކެއް އެޅުމަށް މުޒާހަރާގެ ބައިވެރިން އިސްރާއީލްގެ ބޮޑުވަޒީރަށާއި، އަސްކަރިއްޔާއަށް ވަނީ ގޮވާފާ ކަމަށް އިސްރާއީލުގެ ނޫހެއް ކަމަށްވާ ހާރެޓްޒް އިން ބުނެފައިވެ އެވެ.

މިދިޔަ އޮކްޓޯބަރު މަހުގެ ހަތް ވަނަ ދުވަހު ހަމާސް އިން އިސްރާއީލުގެ ދެކުނުގެ ސަރަހައްދަށް ދިން ކުއްލި ހަމަލާގައި 240 އަށް ވުރެ ގިނަ މީހުން ވަގަށް ނަގާފައިވާ ކަމަށް އިސްރާއީލުގެ ކަމާބެހޭ ފަރާތްތަކުން ބުނެ އެވެ.

އަލްޖަޒީރާގެ ނޫސްވެރިން ބުނީ ދެކުނުގެ ހޮސްޕިޓަލްތަކުގެ ހާލަތު ވަރަށް ގޯސްވެއްޖެ ކަމަށާއި، އަލްނަޖަރު ހޮސްޕިޓަލުން މިހާރުވެސް ތެޔޮ ހުސްވަމުން ދާކަމަށެވެ.

ހޮސްޕިޓަލުގެ ބައެއް ޑިޕާޓްމަންޓްތަކުގައި މަސައްކަތް ކުރަމުން އަންނަ ސެކަންޑަރީ ޖަނަރޭޓަރުތަކާއި ސޯލާ ޕެނަލްތަކުގެ ހާލަތު ވަރަށް ގޯސް ކަމަށް އެ ނޫސްވެރިން ބުނެއެވެ.

އިސްރާއިލްގެ ހަނގުރާމަވެރިން ދެކުނުގައި ދެމުންދާ ބޮމުގެ ހަމަލާތަކުން ލިބޭ ގެއްލުންތަކުން އަރައިގަނެވޭނެ މެޑިކަލް ވަސީލަތްތައް އެމީހުންގެ ކިބައިގައި ނެތް ކަމަށް އަލްޖަޒީރާގެ ނޫސްވެރިން މައުލޫމާތު ދެއެވެ.

އައް ޝިފާ ހޮސްޕިޓަލުގައި ތިބި ޑޮކްޓަރުންނާއި މުވާސަލާތުނުކުރެވޭކަމަށް ޑޮކްޓަރސް ވިތައުޑް ބޯޑާސް އިން ބުނެފިއެވެ. އަދި ހޮސްޕިޓަލުގައި ތިބި އަލްޖަޒީރާ ނޫސްވެރިންނާ މުވާސަލާތުނުކުރެވޭކަމަށް އަލް ޖަޒީރާއިން ވަނީ ބުނެފައެވެ.

ހަމާސްގެ އަތްދަށުގައި ތިބި އަސީރުން މިނިވަންކުރުމާއި ގުޅޭ ދެ ހުށަހެޅުމަކާއި ގުޅޭ މަޝްވަރާތައް ހަމާސް އާއި އިސްރާއީލާ ދެމެދު ހިނގަމުންދާކަމަށް ނިއު ޔޯކް ޓައިމްސް އިން ބުނެފިއެވެ.

އޭގެން އެއް ހުށަހެޅުމުގައި މަދު އަދަދަކަށް އަސީރުން މިނިވަންކުރުމަށް ހުށަހަޅާއިރު އަނެއް ހުށަހަޅުމުގައި 100 އާ ގާތްކުރާ އަދަދަކަށް އަސީރުން މިނިވަންކުރުމަށް ވަނީ ހުށަހަޅާފައެވެ.

ފުރަތަމަ ހުށަހެޅުމުގެ ދަށުން ހަމާސްއިން މިނިވަންކުރާނީ 10 އާއި 20 އާ ދެމެދު އަދަދެއްގެ އަސީރުންނެވެ. އޭގެ ތެރޭގައި ހިމެނެނީ އިސްރާއީލުގެ އަންހެނުންނާއި ކުޑަކުދިންނާއި ބޭރުގެ ގައުމުތަކުގެ ރައްޔިތުންނެވެ. އެމެރިކާ ރައްޔިތުންވެސް ހިމެނޭގޮތުންނެވެ. އޭގެ ބަދަލެއްގެ ގޮތުން ހަނގުރާމަ މެދުކަނޑާލާނެއެވެ.

އަދި އެއާ އެއްގޮތަށް ކަންކަން ކުރިޔަށްދާނަމަ 100 އާ ގާތްކުރާ އަދަކަށް އަސީރުން މިނިވަންކުރާނެއެވެ. އޭގެ ބަދަލެއްގެ ގޮތުން ޣައްޒާއަށް އިންސާނީ އެހީ ތެޔޮ ހިމެނޭހެން އެތެރެކުރުމާއި، އިސްރާއީލުގެ ޖަލުތަކުގައި ތިބި އަންހެނުންނާއި ކުޑަކުދިން މިނިވަންކުރަން ޖެހޭނެއެވެ.

ނަމަވެސް މިކަމަށް އިސްރާއީލުން އެއްބަސްވާނެކަމެއް އަދި ޔަގީނެއް ނޫނެވެ.

އިސްރާއީލުން އެތައް ހަމަލާތަކެއް އަމާޒުކުރަމުން އަންނަ އައްޝިފާ ހޮސްޕިޓަލުން ކަރަންޓް ކަނޑައިގެންގޮސްފައިވާކަމަށް މީޑިޔާ ރިޕޯޓްތައް ބުނެފިއެވެ.

އެތަނުގައި އެތައް ސަތޭކަ ބަލި މީހުންނެއް އަންނަނީ ފަރުވާ ހޯދަމުންނެވެ.

އަލް ގުދުސް ހޮސްޕިޓަލަށް ބޭނުންވާ ތެލާއި ބޭސް ނުލިބޭތީ ކުރިޔަށް އޮތް ތިން ގަޑިއިރު ތެރޭގައި އެ ހޮސްޕިޓަލުގެ ހުއްޓުމަކަށް އަންނާނެކަމަށް ފަލަސްތީން ރެޑް ކްރެސެންޓުން ބުނެފިއެވެ.

މިހާރުވެސް 500 ބަލި މީހުން އެތަނުގައި އެބަތިއްބެވެ.

ހޮސްޕިޓަލުގެ ތެރޭގައި ގިނަ އަދަދެއްގެ އާންމު ރައްޔިތުން އަންނަނީ ބޯހިޔާވަހިކަން ހޯދަމުންނެވެ.

އިސްރާއީލުން ޣައްޒާއަށް ދެމުންދާ ހަމަލާތަކުގައި މެދުކެނޑުމެއްނެތި ހޮސްޕިޓަލުތަކަށް އަމާޒުކޮށް ހަމަލާތައް ދެމުންދާތީ އެކަން ހުއްޓުވައި ދިނުމަށް ޣައްޒާގެ ސިއްހީ މަސައްކަތްތެރިން ބައިނަލްއަގްވާމީ މުޖުތަމައުއަށް ގޮވާލައިފިއެވެ.

ޣައްޒާ މެޑިކް ވޮއިސްގެ ކޯ ފައުންޑަރ ތަންޔާ ވިދާޅުވީ ޣައްޒާގައި މަސައްކަތްކުރަމުން އަންނަ ސިއްހީ މަސައްކަތްތެރިންނަށް ރައްކާތެރިކަން ކަށަވަރުވާންޖެހޭކަމަށެވެ. އެމީހުންގެ މަސައްކަތްކުރުމުގައި ދެމިތިބީތީވެ އެމީހުންގެ ފުރާނަ ގެއްލިގެން ނުވާނެކަމަށާއި މިކަމަށް އެހީވެދީ ރައްކާތެރިކަމާއެކު މަސައްކަތްކުރެވޭނެ ގޮތެއް ހޯދައިދިނުމަށް އެދިފައިވެއެވެ.

ތަކުރާރުކޮށް އިސްރާއީލުން އަންނަނީ ޣައްޒާގެ މައި ހޮސްޕިޓަލު އައް ޝިފާ ހޮސްޕިޓަލަށް އަމާޒުކޮށް ހަމަލާދެމުންނެވެ. އެތާންގައި އެތައް ސަތޭކަ ބަލި މީހުންނެއް ތިބިއިރު އެމީހުން ދޫކޮށްލާފައިނުދާނެކަމަށް އެތަނުގައި މަސައްކަތްކުރާ ސިއްހީ މަސައްކަތްތެރިން ބުނެއެވެ. ނަމަވެސް ބައެއް މީހުން މިއަދު ވަނީ ދެކުނަށް ބަދަލުވެފައެވެ.

އިސްރާއީލުން ވަރުގަދަ ހަމަލާތަކެއް އަމާޒުކުރަމުން އަންނަ އަލް ޝާތީ ރެފިޔުޖީ ކޭމްޕުން ހަމާސްގެ އިސް ބަޔަކު ހައްޔަރުކޮށްފައިވާކަމަށް އިސްރާއީލު އަސްކަރިއްޔާއިން ބުނެފިއެވެ. ނަމަވެސް އެއީ ކޮން ބައެއްކަމެއް ހާމައެއްނުކުރެއެވެ. އަދި ފާއިތުވި ދުވަސްތަކުގައި ދިން ހަމަލާތަކުގައި އެ ރެފިޔުޖީ ކޭމްޕުން 150 ހަމާސްގެ ހަނގުރާމަވެރިން ޝަހީދުކޮށްލާފައިވާކަމަށްވެސް ބުނެފައިވެއެވެ.

ނަމަވެސް އަލް ޖަޒީރާ އާ ވާހަކަދައްކަވަމުން އިސްލާމިކް ޖިހާދުގެ ސްޕޯކްސްޕާސަން ބުނެފައިވަނީ ޣައްޒާގައި އިސްރާއީލަށް އަސްކަރީ ގޮތުން ކުރިއެރުންތަކެއް ހޯދިފައިނުވާކަމަށެވެ.

ޣައްޒާއަށް އިސްރާއީލުން ދެމުންދާ ހަމަލާތަކާއި އެއްގަމު މަގުން ޣައްޒާ ހިފުމަށް އިސްރާއީލުން ކުރަމުންދާ މަސައްކަތުގެ އެއް ޓަރގެޓަކީ ޣައްޒާގައި ހުންނަ ހަމާސްގެ ސިޔާސީ ވެރިޔާ ޔަހުޔާ ސިންވާރެވެ.

އިސްރާއީލުގެ ބޮޑުވަޒީރު ވަނީ ސިންވާރު ގެ ފުރާނަ ދުއްވާލުމަކީ މި ހަމަލާތަކުގެ އެއް މަގްސަދުކަމަށެވެ. އަދި އިސްރާއީލު އަސްކަރިއްޔާއިން ވަނީ ސިންވާރު ހުރި ތަނެއް ބުނެފިނަމަ ހަމަލާތައް އަވަހަށް ހުއްޓާލާނެކަމަށްވެސް ބުނެފައެވެ.

އިސްރާއީލު އަސްކަރިއްޔާއިން މީގެކުރިން ބުނެފައިވާ ގޮތުގައި ސިންވާރު ހުރިތަން ކަމުގައިވާ ޣައްޒާ ސިޓީ ވަނީ ވަށާލެވިފައެވެ.

އިސްރާއީލުން ތަކުރާރުކޮށް އައް ޝިފާ ހޮސްޕިޓަލަށް އަމާޒުކޮށް ހަމަލާދެމުން އަންނައިރު އެތަނުގައި މަސައްކަތްކުރާ މެޑިކަލް ސްޓާފުން އެންމެ ފަހުވަގުތާ ހަމައަށްވެސް ދެމިތިބޭނެކަމަށް އެހޮސްޕިޓަލުގެ ޑިރެކްޓަރ މުހައްމަދު އަބޫ ސަލްމިޔާ ވިދާޅުވެއްޖެއެވެ.

މިއީ ހޮސްޕިޓަލާ ދެކޮޅަށް އިސްރާއީލުން ކުރާ ހަނގުރާމައެއްކަމަށާއި މިއީ މީގެކުރިން ދުވަހަކުވެސް ހަނގުރާމައެއްގައި ހިނގާފައިވާކަމެއް ނޫންކަމަށް އޭނާ ވިދާޅުވިއެވެ.

އިސްރާއީލުން އަންނަނީ މެދުކެނޑުމެއްނެތި ޣައްޒާގެ ހޮސްޕިޓަލުތަކަށް އަމާޒުކޮށް ހަމަލާދެމުންނެވެ.

އިސްރާއީލުން ތުހުމަތުކުރަމުން އަންނަނީ އައް ޝިފާ ހޮސްޕިޓަލުގެ އަޑީގައި ހަމާސްގެ ހެޑް ކުއަރޓަރ ހިންގަމުން އަންނަކަމަށެވެ. އެކަން އައްޝިފާ ހޮސްޕިޓަލުން އެތައް ފަހަރަކު ދޮގުކޮށްފައިވާއިރު ހަމާސް އިން ވަނީ ބައިނަލްއަގްވާމީ މުޖުތަމައަށް ޣައްޒާގެ ހޮސްޕިޓަލުތައް ހަމާސްގެ ހަނގުރާމަވެރިން ބޭނުންކުރަމުންދޭތޯ ބެލުމަށް ދައުވަތު ދީފައެވެ.

ޣައްޒާގެ ހެލްތު މިނިސްޓްރީގެ ސްޕޯކްސްޕާސަން އަޝްރަފް އަލް ގުދުރާ ވިދާޅުވީ އިސްރާއީލުން އައް ޝިފާ ހޮސްޕިޓަލުގެ މައި ގޭޓަށް ހަމަލާދީފައިވާކަމަށެވެ.

ރަފަހް ބޯޑަރު ހުރަސްކޮށް ހުކުރު ދުވަހު އެއްވެސް މީހަކު މިސްރަށް ގޮސްފައިނުވާކަމަށް މިސްރުގެ ސަލާމަތީ ފަރާތްތަކާއި ފަލަސްތީނުގެ އޮފިޝަލުން ބުނެފިއެވެ.

އެއްވެސް މީހަކަށް ޣައްޒާއިން ބޭރު ނުވެވިފައިވަނީ ބޭރުވުމުގެ ކުރިން ނަގަންޖެހޭ ހުއްދަ އެޕްރޫވް ނުވެ އޮތުމުންނެވެ. އެކަން ނުވެފައިވާ ސަބަބު ސާފެއް ނޫނެވެ.

ނޮވެމްބަރ މަހުގެ 1 ވަނަ ދުވަހުން ފެށިގެން މީހުންނަށް ޣައްޒާއިން ބޭރުވުމުގެ ފުރުސަތު ފަހިވެފައިވާއިރު ދެ މިހަފްތާ ތެރޭގައިވެސް ދެ ފަހަރެއްގެ މަތިން އެކަން ހުއްޓިފައިވެއެވެ.

އިސްރާއީލުން ޣައްޒާގެ އުތުރުގެ ކޮންޓްރޯލު ހޯދަމުން އަންނައިރު އެސަރަހައްދުގައި އުޅޭ ލައްކައަކަށްވުރެ ގިނަ މީހުން ފައިމަގުން ދެކުނަށް މިއަދު ބަދަލުވެފައިވާނެކަމަށް ބެލެވޭ ކަމަށް ރިޕޯޓްތައް ބުނެއެވެ.

އިސްރާއީލުން ބުނެފައިވަނީ ދެކުނަށް ދާ މައި މަގަކީ އަމާން މަގަކަށް ވާނެކަމަށެވެ. ނަމަވެސް ދެކުނަށް ދިޔަ ބައެއް މީހުންނަށް އިސްރާއީލުން ހަމަލާދީފައިވާއިރު ބައެއް މީހުން ވަނީ ޒަޚަމްވެފައެވެ. އަދި އަނެއް ބަޔެއްގެ ފުރާނަ ގެއްލިފައިވާއިރު އެއްވެސް އެމްބިޔުލަންސަކަށް އެ މަގަށް ނޭރެއެވެ.

އެއްބަޔަކު ދެކުނަށް ބަދަލުވިއިރު އަދިވެސް އެތައް ހާސް ބަޔަކު ޣައްޒާގެ އުތުރާއި މެދު ތެރޭގައި ވަނީ ތާށިވެފައެވެ.