ރަޝިޔާ ޔޫކްރެއިންގެ ހަނގުރާމަ

ޔޫރަަޕްގެ އޭވިއޭޝަން ރެގިއުލޭޓަރ އިން ވަނީ ވޯނިންގ ޒޯން ދެގުނަ ބޮޑުކޮށްފައެވެ. އެ އިދާރާއިން ބުނެފައިވަނީ މެދު ރާސްތާގެ މިސައިލްތައް ފޮނުވަމުންދާ ކަމަށެވެ.

ޔޫރަޕިއަން އޭވިއޭޝަން ސޭފްޓީ އެޖެންސީން ބުނެފައިވަނީ ނުރައްކާ އޮތް މިންވަރަށް ބަލައި އެއަރލައިންތަކާއި އޮޕަރޭޓަރުންނަށް އެކަން އަންގާފައިވާ ކަމަށާއި، ޔޫކްރެއިން ބޯޑަރާއި ރަޝިއާ ބޯޑަރުގެ 100 ނޯޓިކަލް މޭލާއި 200 ނޯޓިކަލް މޭލު ކައިރިން ދަތުރު ނުކުރުމަށް އަންގާ ކަމަށެވެ.

ޔޫކްރޭންގައި ތާށިވި ދަރިވަރަކު ހަންގޭރީގެ ބޯޑަރު ހުރަށްކޮށް އެގައުމަށް ދެވުމުން ކީވްގައި ތިބި ދިވެހި ދަރިވަރުން ދުއާގައި ޝާމްލްކުރުމަށް އެދިފައިވޭ. އަދި އެންމެންވެސް ތިބީ ސަލާމަތުން ކަމަށް ވަނީ ބުނެފައި.

ޔޫކްރެއިންގެ ރައީސް ވޮލޮޑިމިރް ޒެލެންސްކީގެ އިތުރުން އިސްވެރިން މަގާމުން ދުރުކުރުމަށްފަހު ސުލްހައިގެ މަޝްވަރާއަށް އައުމަށް ރަޝިޔާއިން ގޮވާލައިފިއެވެ.

ރަޝިޔާގެ ރައީސް ވްލަޑްމިއަރ ޕުޓިން ވިދާޅުވީ މިވަގުތު ޔޫކްރެއިންގައި ތިބި އިސްވެރިން މަގާމުން ދުރުކުރުމަށްފަހު، ސުލްހައިގެ މަޝްވަރާއަށް އައުމަށް ދައުވަތުދޭ ކަމަށެވެ.

މޮސްކޯއިން މަސައްކަތްކުރަނީ ޔޫކްރެއިންގެ ސަރުކާރު ވައްޓާލުމަށް ކަމަށް ނޭޓޯއިން ބުނެފިއެވެ.

ނޭޓޯއިން ވަނީ ޑިފެންސް ޕްލޭން އެކްޓްވޭޓް ކުރާނެކަމަށެވެ.

ކޭޝް އަށް އޮތް ޑިމާންޑް ބޮޑުވުމާއެކު ރަޝިޔާގެ ސެންޓްރަލް ބޭންކުން އޭޓީއެމްތަކަށް ފައިސާ ސަޕްލައިކުރާ މިންވަރު އިތުރުކޮށްފިއެވެ.

ސެންޓްރަލް ބޭންކުން ނެރުނު ބަޔާނުގައި ބުނެފައިވަނީ ހުރިހާ ޓްރާންސްސެކްޝަންތައް ހެދޭނެކަމަށެވެ.

ރަޝިޔާއިން މަސްރަހު ގޯސްކުރަމުންދާއިރު، ބަލަން ނުތިބޭނެ ކަމަށް ނޭޓޯއިން ބުނެފިއެވެ. އަދި ޔޫރަޕްގެ އިރުމައްޗަށް ނޭޓޯގެ އިތުރު ސިފައިން ފޮނުވަން ނިންމާފައިވާ ކަމަށެވެ.

އިނގިރޭސިވިލާތުން ރަޝިޔާގެ ރައީސް ވްލަޑްމިއަރ ޕުޓިން އާއި ރަޝިޔާގެ ފޮރިން މިނިސްޓަރ ސަރޖިއޯ ލަވްރޮފް އާ ދެކޮޅަށް ދަތިކުރުމުގެ ފިޔަވަޅު އެޅުމަށް ނިންމައިފިއެވެ.

އިނގިރޭސިވިލާތުގެ ބޮޑުވަޒީރު ބޮރިސް ޖޯންސަން އެގޮތަށް ނިންމަވާފައިވާކަން ވަނީ ހާމަކޮށްފައެވެ. ބޮރިސް މިނިންމެވުން ނިންމަވާފައިވަނީ ނޭޓޯގެ ލީޑަރުންނާއެކު ކުރެއްވި މަޝްވަރާތަކަށްފަހުއެވެ.

އިނގިރޭސިވިލާތުން ވަނީ ރަޝިޔާއާ ދެކޮޅަށް އަޅާނެ ދަތިކުރުމުގެ ފިޔަވަޅުތައް އިއްޔެ އިއުލާންކޮށްފައެވެ.

ޔޫކްރެއިންއަށް ރަޝިޔާގެ އަސްކަރިއްޔާއިން އަރައި ފަށާފައިވާ ހަނގުރާމައާ ދެކޮޅަށް ރަޝިޔާގެ އާއްމު ރައްޔިތުން ދަނީ އެގައުމުގައި މުޒާހަރާ ކުރަމުންނެވެ. އަދި މުޒާހަރާތައް ފުޅާކުރަމުންދާއިރު، މިހާތަނަށް 1700ށް ވުރެ ގިނަ މީހުން ހައްޔަރުކޮށްފައިވާ ކަމަށް ރިޕޯޓުތަކުން ބުނެފައިވެއެވެ.

މިހަނގުރާމައިގެ ސަބަބުން ޔޫކްރެއިންގެ 5 މިލިއަނަށްވުރެ ގިނަ މީހުން އެގައުމުން ދޫކޮށް ދާން ޖެހޭނެ ކަމަށް ޔޫއެންއިން ލަފާކޮށްފިއެވެ. އަދި ހަނގުރާމަ ނުހުއްޓި ކުރިއަށްދާނަމަ މިއަދަދު ދެގުނަ އިތުރުވާނެ ކަމަށް ބުނެފައިވެއެވެ. ޔޫއެންގެ ސީނިއަރ އޮފިޝަލެއް ވިދާޅުވީ މިހަނގުރާމާގައި ކުޑަކުދިން ހިމާޔަތް ކުރަން ޖެހޭ ކަަމަށެވެ.

ރަޝިޔާއިން ޔޫކްރެއިންއަށް އަރައި ހިންގަމުންދާ ހަނގުރާމައާ ގުޅޭ ގޮތުން ކުރިއަށް ގެންދާ ނޫސްވެރިންގެ ބައްދަލުވުން ފަށައިގެން ކުރިއަށް ދާއިރު، ނޭޓޯއިން ބުނެފައިވަނީ މުޅި ޔޫރަޕްގެ ސަރަހައްދުގެ މިނިވަންކަމާއި، މަސްލަހަތު ރަޝިޔާއިން ނަގާލާފައިވާ ކަމަށެވެ. އަދި މަސައްކަތް ކުރަމުންދަނީ އިތުރަށް މަސްރަހު ގޯސްވުމަށް ކަމަށް ވެސް ނޭޓޯއިން ބުނެއެވެ.

ކީވްގެ ޓްރެއިން ސްޓޭޝަންސްއަށް ބަޑި ޖަހައިފިއެވެ. ރިޕޯޓުތައް ބުނާ ގޮތުން ބަޑި ޖަހާފައިވަނީ ގިނަ ބަޔަކު ސިޓީ ދޫކޮށް ދިއުމަށް އެސަރަހައްދަށް ޖަމާވެފައިވަނިކޮށްށެވެ.

ރަޝިޔާ ކިބައިން ގައުމު ސަލާމަތްކުރުމަށް ބޭނުންވާ ޔޫކްރެއިންގެ 18،000 ރައްޔިތުންނަށް ހަތިޔާރު ދީފިއެވެ.

އަނެއްކޮޅުން ޔޫކްރެއިންގެ ވެރިރަށް ކިޔެވް ދިފާއުކުރުމަށް ޔޫކްރެއިންގެ އަަސްކަރީ ފައުޖުތައް ބަނީ މިހާރު ރުކުރުވާލާފައެވެ.

ރިޕޯޓުތައް ބުނާ ގޮތުން ރަޝިޔާއިން ވަނީ ފޭސްބުކް އަށް ވަނުން ލިމިޓްކޮށްފައެވެ. އެއީ ފޭސްބުކްގެ ސަބަބުން ރަޝިޔާގެ ސެންސާޝިޕަށް ބުރޫއަރީއެވެ. ހަމަލާތަކާއި ގުޅިގެން ސައިބާ އެޓޭކްތައް އަންނަމުންދާއިރު، ގިނަ ވެބްސައިޓްތަކެއް ޑައުން ވެފައިވާ ކަމަށް ވެސް ރިޕޯޓުތަކުން ބުނެއެވެ.

އެމެރިކާގެ އަސްކަރީ އޮފިޝަލުންނާއި ހަވާލާދީ ރިޕޯޓުތައް ބުނާ ގޮތުން މިހާރު ރަޝިޔާ ވަނީ ބިރުވެރިކަމެއްގެ ތެރެއަށް ވެއްޓިފައެވެ. އެހެންކަމުން ހަމަލާތައް ހުއްޓާލާ މަޝްވަރާގެ މޭޒަށް ދިއުން ބުއްދިވެރި ގޮތެއް ކަމަށް އޮފިޝަލް ވިދާޅުވިއެވެ.

ޔޫކްރެއިންއަށް އަރައި ހަނގުރާމަ ފަށާފައިވާއިރު، އެކަމާއި ދެކޮޅަށް ރަޝިޔާގެ ރައްޔިތުން އެގައުމުގައި ދަނީ މުޒާހަރާ ކުރަމުންނެވެ.

ޔޫރަޕްގެ ގައުމުތަކުގައި ކުރިއަށް ގެންދާ ޔޫރޯ ވޮޝަން 2022ގައި ރަޝިޔާއިން ބައިވެރިނުކުރަން ނިންމައިފިއެވެ. ބޭރުގެ މީޑިއާތަކުގައި ރިޕޯޓު ކޮށްފައިވާ ގޮތުގައި އީބީޔޫއިން މިހާރު އެ ނިންމުންތައް ނިންމާ އެކަން އަންގާފައިވާ ކަމަށެވެ.

މިއީ ޔޫރަޕްގެ ގައުމުތަކުގައި ކުރިއަށް ގެންދާ ލަވަ ކިޔުމުގެ މުބާރާތެކެވެ. މިއަހަރުގެ މި މުބާރާތުގައި 40 ގައުމަކުން ބައިވެރިވެއެވެ.

ޑެލްޓާ އެއަރލައިނުން ރަޝިޔާގެ އެއިރޯފްލޮޓް އާއެކު ހަދާފައިވާ ޕާޓްނަރޝިޕް އެއްބަސްވުން ނިމުމަކަށް ގެނެސްފައިވާކަމަށް އެއަރލައިނުން ބުނެފިއެވެ.

ޑެލްޓާއިން ވަނީ ރަޝިޔާގެ ނޭޝަނަލް އެއަރލައިނުގެ ބައެއް ފްލައިޓްތަކަށް ބުކިންގ ހައްދާފައެވެ. ޑެލްޓާއިން ބުނީ ހަދާފައިވާ އެއްބަސްވުންތައް މިހާރުން މިހާރަށް ނިމުމަކަށް ގެންނަ ކަމަށެވެ.

އެއިރޯފްލޮޓް ސްކަޓީމް އެލައަންސް އާއެކު ޕާޓްނަރޝިޕް ހަދާފައިވަނީ 2004 ވަނަ އަހަރުއެވެ. 19 ބައިނަލްއަގްވާމީ އެއަރލައިނަކާއެކު ވަނީ ޕާޓްނަރޝިޕް ހަދާފައެވެ. ޑެލްޓާ އަކީ އޭގެ މެމްބަރެކެވެ.

ރަޝިޔާގެ އަސްކަރީ ފައުޖުތައް ހުއްޓުވުމަށް ޔޫކްރެއިންގެ ރައްޔިތުން މަގުތަކަށް ނިކުމެ ތިބި މަންޒަރު ފެންނަ ވީޑިއޯ އެއް ވަނީ އާންމުކޮށްފައެވެ.

ރަޝިޔާއިން ހަމަލާދީ ބާރު ފޯރުވަމުން ދިޔަ ނަމަވެސް ޔޫކްރެއިންގައި ހުންނަވާނެ ކަމަށް އެގައުމުގެ ރައީސް ވޮލޮޑިމިރް ޒެލެންސްކީ ވިދާޅުވެއްޖެއެވެ.

ހުކުރު ދުވަހު ނުރަސްމީ ހެދުމުގައި ހުންނަވައި އާއްމު ކުރެއްވި ވީޑިއޯގައި ޒެލެންސްކީ ވިދާޅުވީ ސައްހަ ހަމަލާތައް ދިން ނަމަވެސް ގައުމުގައި ހުންނަވާނެ ކަމަށެވެ.

ރަޝިޔާ ބަހުގެ ސޯޝަލް މީޑިޔާ ޕްލެޓް ފޯމްތަކުގައި "ނޯ ޓު ވަރ" ހޭޝްޓެގް ޓްރެންޑްވާން ފަށައިފިއެވެ.

ރަޝިޔާގެ ގިނަ ބަޔަކު ހޭޝްޓެގް ބޭނުންކުރަމުންދާއިރު އޭގެތެރޭގައި ރަޝިޔާގެ ސެލެބްރިޓީންވެސް ހިމެނެއެވެ. އިންސްޓަރގްރާމްގައި މިހާތަނަށް 208،000 ޕޯސްޓްގައި އެ ހޭޝްޓެގް ބޭނުންކޮށްފައިވެއެވެ.

ފިންލެންޑާއި ސްވިޑެން އިން ނޭޓޯގެ ދިފާއުގައި އެހީތެރިކަން ފޯރުކޮށްދޭނަމަ އެކަމުގެ އަގު އަދާކުރަން ޖެހޭނެކަމަށް ބުނެ ރަޝިޔާއިން އިންޒާރުދީފިއެވެ.

ކައުންސިލް އޮފް ޔޫރަޕްއިން ސަސްޕެންޑް ކޮށްފައިވާ ކަމަށް އިޓަލީގެ ފޮރިން މިނިސްޓަރު ވިދާޅުވެއްޖެއެވެ.

ކައުންސިލް އޮފް ޔޫރަޕް އަކީ ދެވަނަ ބޮޑު ހަނގުރާމައިގެ ފަހުން މުޅި ޔޫރަޕްގެ އިންސާނީ ހައްގުތައް ރައްކާތެރި ކުރުމަށް އުފައްދާފައިވާ ކައުންސިލެވެ. މިއީ ޔޫރަޕިއަން ޔޫނިއަންއާ ވަކިން އޮންނަ ކައުންސިލެކެވެ.

ކައުންސިލް އޮފް ޔޫރަޕްއިން ސަސްޕެންޑް ކޮށްފައިވާ މައްސަލާގައި އިތުރަށް އިޓަލީގެ ފޮރިން މިނިސްޓަރު ވިދާޅުވެފައިވަނީ މި ނިންމުމަކީ ރަޝިޔާގެ އަސްކަރީ ބާރުން ޔޫކްރެއިންއަށް އަރައި ހަމަލާތައް ދެމުންދާއިރު، މި ވަގުތު އެޅޭނެ އެންމެ ރަނގަޅު ފިޔަވަޅު ކަމަށެވެ. އަދި މިއީ އެއްވެސް ހާލެއްގައި ބަލައިގަނެވޭނެ ކަމެއް ނޫން ކަމަށާއި، ރަޝިޔާއިން އެ ކުރަނީ ބައިނަލްއަގުވާމީ ގާނޫނާއި ހިލާފު އަމަލުތަކެއް ކަމަށެވެ.

ރަޝިޔާއިން މިހާތަނަށް 200 މިސައިލް ހަމަލާ ޔޫކްރެއިން އަށް އަމާޒުކޮށް ފޮނުވާލާފައިވާކަމަށް އެމެރިކާގެ ސީނިއަރ ޑިފެންސް އޮފިޝަލަކު ވިދާޅުވެއްޖެއެވެ.

އޭގެތެރޭގައި ބެލެސްޓިކް މިސައިލް އާއި ކްރޫޒް މިސައިލް ހިމެނެއެވެ.

އދ ގެ ރެފިޔުޖީ އެޖެންސީން ބުނާ ގޮތުގައި ޔޫކްރެއިންގެ ލައްކައަކަށްވުރެ ގިނަ މީހުން ވަނީ ރެފިޔުޖީންގެ ގޮތުގައި ކައިރި ގައުމުތަކަށް ގޮސްފައެވެ. އެތައް ހާސް ބަޔަކު ވަނީ ޔޫކްރެއިންއާ ކައިރީގައި އޮންނަ ޔޫރަޕްގެ ގައުމުތަކަށް ހިޖުރަކޮށްފައެވެ.

ޔޫކްރެއިންގެ ހުޅަނގުގައި އޮންނަ ސިޓީއެއްކަމުގައިވާ ލިވިވްގައި ކާފިއު އިއުލާންކޮށްފިއެވެ.

ކާފިއު ހިންގާނީ ރޭގަނޑު 10ން ހެނދުނު 6ށެވެ.

ކިޔެވް އަށް އެރުމަށް މަސައްކަތްކުރަމުންދާ ރަޝިޔާގެ އަސްކަރީ ފައުޖުތައް އޮތީ ކިޔެވް އާ 50 ކިލޯމީޓަރު ދުރުގައި ކަމަށް އިނގިރޭސިވިލާތުގެ ޑިފެންސް މިނިސްޓްރީން ބުނެފިއެވެ.

ޔޫކްރެއިންގައި ބާކީތިބި ދިވެހިން ރައްކާތެރިކަމާއެކު ހަންގޭރީއަށް ގެންދިޔުމާ ގުޅޭ ގޮތުން އެޤައުމުގެ ޚާރިޖީ ވަޒީރު ޕީޓަރ ޒިހާޓޯއާއި ފޮރިން މިނިސްޓަރ ޢަބްދުﷲ ޝާހިދު މަޝްވަރާކުރައްވައިފިއެވެ.

އިވަނޯ-ފްރެންކިވްސްކް ގައި ތިބި 15 ދިވެހިން މިވަގުތު ތިބީ ޔޫކްރެއިންއާ ހަންގޭރީ ބޯޑަރާއި ކައިރީގައި އޮންނަ އަޒޯރާޑްގައި ހުންނަ ހަންގޭރީ ކޮންސިއުލޭޓްގައި.

- އިވަނޯ-ފްރެންކިވްސްކް ގައި ތިބި 15 ދިވެހިން މިވަގުތު ތިބީ ޔޫކްރެއިންއާ ހަންގޭރީ ބޯޑަރާއި ކައިރީގައި އޮންނަ އަޒޯރާޑްގައި ހުންނަ ހަންގޭރީ ކޮންސިއުލޭޓްގައި. އެބޭފުޅުންނަށް ބޯޑަރު ހުރަސްކޮށް، ހަންގޭރީގެ ވެރިރަށް ބުޑަޕެސްޓަށް ދަތުރުކުރުމުގެ އިންތިޒާމް، ހަންގޭރީ ސަރުކާރާއި ގުޅިގެން ދިވެހި ސަރުކާރުން ވަނީ ހަމަޖައްސާފައި.

- ފޮރިން މިނިސްޓަރ ޝާހިދު ވަނީ ހަންގޭރީގެ ޚާރިޖީ ވަޒީރާ މީގެ ކުޑަ ވަގުތުކޮޅެއް ކުރިން ގުޅުއްވައި، ޔޫކްރެއިންގައި ތިބި ދިވެހިން ރައްކާތެރިކަމާއެކު ހަންގޭރީއަށް ގެންދިޔުމާ ގުޅޭ ގޮތުން މަޝްވަރާކުރައްވާފައި. ހަންގޭރީގެ ފުރިހަމަ އެއްބާރުލުން ދިވެހިންނަށް ލިބޭނެކަމުގެ ޔަޤީންކަން އެޤައުމުން ދިން.

- ބުޑަޕެސްޓަށް ދިޔުމަށްފަހު 2 ދުވަހުގެ ތެރޭގައި ދިވެހިން ރާއްޖެ އަންނާނެ

- އިވަނޯ-ފްރެންކިވްސްކްގައި ކިޔަވަން ތިބި ދަރިވަރުންނަށް ކުރިން ނުފުރުނީ އެ ދަރިވަރުންގެ ކްލާސްތައް އޮންލައިން ކްލާސްތަކަށް ޔުނިވަރސިޓީއިން ބަދަލުކުރިތަނާ މާ ގިނަ އިރުތަކެއް ނުވެ އެގައުމުގެ ވައިގެ ސަރަހައްދު ބަންދުވުމާ ގުޅިގެން.

- ހަރްކީވްގައި ބާކީ ތިބި 8 ދިވެހިން، ޔޫކްރެއިންގެ ހުޅަނގަށް ގެންދިޔުމަށް ދަނީ މަސައްކަތްކުރަމުން. އެހެންނަމަވެސް އެއީ ވަރަށް ދުރު ހިސާބެއްކަމުން، އަދި ހާލަތު އޮތް ގޮތުން އެކަމުގައި ދަތިތަކެއް އެބަހުރި. ރައްކާތެރިކަމާއެކު ހަރްކީވްގައި ތިބި ދިވެހިން ގެންދިޔުމަށްވެސް މި ދަނީ މަސައްކަތްކުރަމުން.

- ހަރްކީވްގައި ބާކީ ތިބި 8 މީހުންގެ ތެރެއިން 5 ދަރިވަރުންނަކީ އަމިއްލަ އެކި ސަބަބުތަކާ ހުރެ ކުރިން ނުފުރުނު ދަރިވަރުން (ވިސާ އައު ކުރުން ފަދަ ކަންކަން). ބާކީ ތިބި 3 މީހުންގެ އާއިލާ ޔޫކްރެއިންގައި ތިބިކަން ބަރލިންގައި ހުންނަ ދިވެހި އެމްބަސީއަށް އަންގާފައިވަނީ އިއްޔެ.

- ނިޕްރޯގައި ހުރި ދަރިވަރުވެސް ހަންގޭރީ ބޯޑަރު ސަރަހައްދަށް ގެނައުމަށް ދަނީ މަސައްކަތްކުރަމުން.

- ފޮރިން މިނިސްޓްރީއިން ދަނީ ދަރިވަރުން ރައްކާތެރި ހިސާބުތަކަށް ގެންދިޔުމަށް އެ ސަރަހައްދުގެ އެކި ގައުމުތަކާއެކު ކެނޑިނޭޅި މަސައްކަތް ކުރަމުން.

ޔޫކްރެއިންގެ ވެރިރަށް ކިޔެވް ދިފާއުކުރުމަށް އަސްކަރިއްޔާއިން މިހާރު ކިޔެވް ތެރެއަށް ވަދެފައިވާކަމަށް ޔޫކްރެއިންގެ އިންޓީރިއަރ މިނިސްޓްރީން ބުނެފިއެވެ.

ހުކުރު ދުވަހު ރަޝިޔާގެ އަސްކަރިއްޔާއިން މަސައްކަތްކުރަމުން އަންނަނީ ކިޔެވް ހިފުމަށެވެ. އެއާއެކު ކިޔެވް ދިފާއުކުރުމުގެ މަސައްކަތްތައް ކުރަމުންދާއިރު މިހާރު ޑިފެންސިވް ފޭސްއަށް ބަދަލުވެފައިވާކަމަށް ކިޔެވްގެ މޭޔަރ ވަނީ ވިދާޅުވެފައެވެ. އަދި ސަރުކާރުން އަންނަނީ ކިޔެވް ދިފާއުކުރުމަށް ކުރެވެން ހުރި ހުރިހާ މަސައްކަތެއް ކުރުމަށް ރައްޔިތުންގެ ކިބައިން އެދެމުންނެވެ.

ޔޫކްރެއިންގެ ވެރިކަން ފުރޮޅާލުމަށް ޔޫކްރެއިންގެ އަސްކަރިއްޔާއަށް ރަޝިޔާގެ ރައީސް ވްލަޑްމިއަރ ޕުޓިން ގޮވާލައްވައިފިއެވެ.

ރަޝިޔާގެ ސެކިޔުރިޓީ ކައުންސިލާއި ބައްދަލުކުރައްވާ ވާހަކަދައްކަވަމުން ޕުޓިން ވަނީ އަސްކަރިއްޔާއިން ވެރިކަމުގެ ބާރުތައް އަތުލުމަށް އެދިވަޑައިގަންނަވާފައެވެ. އަދި އޭރުން އެއްބަސްވުމަކާ ހަމައަށް އައުމަށް ފަސޭހަވާނެކަމަށްވެސް ޕުޓިން ވިދާޅުވިއެވެ.

ޔޫރަަޕްގެ 27 ގައުމަކާއި ފޯނުން ގުޅުއްވި އިރުވެސް ނޭޓޯގެ ވާހަކަ ދެއްކުމުން އެކަމާއި އެއްވެސް އެއްޗެއް ނުބުނާ ކަމަށާއި، އެމީހުން ތިބީ ބިރުން ކަމަށް ޔޫކްރެއިންގެ ރައީސް ޒެލެންސްކީ ވަނީ ވިދަޅުވެފައެވެ.

ރަޝިއާގެ ސިފައިން ކީވްއަށް ހަމަލާދޭން ފަށާފައިވާ އިރު އެމީހުންނާއި ދެކޮޅަށް ހަނގުރާމަކުުރުމަށް ކީވްގައި ތިބި 18 އަހަރާއި 60 އަހަރާއި ދެމެދުގެ މީހުންނަށް ބަޑި ދީ އެމީހުން ރަށުން ބޭރަށް ދިއުން މަނާކޮށްފިއެވެ.

ޔޫކްރޭންގެ ޑިފެންސް މިނިސްޓަރ ވިދާޅުވީ ރަޝިއާގެ ފައުޖުތަކާއި ކުރިމަތިލާން އިތުރު ބަޔަކު އަންނާނެ ކަމަށެވެ. މީގެ ތެރޭގައި ފަހުގެ ހަތިޔާރު ލިބޭނެކަމަށް ވެސް ވަނީ ބުނެފައެވެ.

އެމެރިކާގެ އިންޓެލިޖެންސް އޮފިސަރުން ބުނެފައިވަނީ ރަޝިާގެ އަތްދަށަށް ޔޫކްރޭންގެ ވެރިރަށް ދާން ނަގާނެކަމަށް ބެލެވެނީ 1-4 ދުވަހުގެ ތެރޭގައެވެ.

ރަޝިއާގެ ސިފައިން މިހާރު ތިބީ ކީވް އާއި 20 ވަރަކަށް މޭލު ދުރުގައެވެ.

ރަޝިއާ އާއި ދެކޮޅަށް ޔޫކޭ އިން އަޅާ ފިޔަވަޅުތައް ހާމަކުރެއްވީ ބޮޑުވަޒީރު ބޮރިސް ޖޯންސަންއެވެ. ޔޫކޭއިން ފިޔަވަޅުތައް އަމާޒުކޮށްފައިވަނީ ބޭންކުތަކާއި، ރައީސް ޕުޓިންގެ އަރިސް ބޭފުޅުންނާއި، ރަޝިއާގެ މުއްސަނދިންނަށް ކަމަށެވެ.