ރަޝިޔާ ޔޫކްރެއިންގެ ހަނގުރާމަ

- ޔޫކްރެއިންގައި ބާކީ ތިބި ދަރިވަރުން ރައްކާތެރި ހިސާބުތަކަށް ގެންދިޔުމަށް އެސަރަހައްދުގެ އެހެން ޤައުމުތަކުގެ ސަރުކާރާއެކު ފޮރިން މިނިސްޓްރީ އިން ދަނީ މަޝްވަރާކުރަމުން.

- ދަރިވަރުން ރައްކާތެރި ހިސާބުތަކަށް ގެންދިޔުމަށް ރަހުމަތްތެރި އެހެން ބައެއް ޤައުމުތަކާއެކުވެސް ދަނީ މަޝްވަރާކުރެވެމުން

- ހުރިހާ ދަރިވަރުންގެ ހާލުވެސް ރަނގަޅު.

- ޔޫކްރެއިންގައި ތިބި ދަރިވަރުންގެ އިތުރުން އެސަރަހައްދުގެ އެހެން ގައުމުތަކުގައި ތިބި ދަރިވަރުންގެ ހާލަތުވެސް ފޮރިން މިނިސްޓްރީއިން ދަނީ ބަލަމުން.

ރަޝިޔާއިން މިހާރު ދެމުންގެންދާ ހަމަލާތަކަކީ ޔޫރަޕްގައި ހަނގުރާމަ ކުރުންކަމަށާއި މިކަމާމެދު ހުޅަނގުން މިހާރުން މިހާރަށްވެސް ފިޔަވަޅު އަޅަންޖެހޭކަމަށް ޔޫކްރެއިން ރައީސްގެ އެޑްވައިޒަރ ވިދާޅުވެއްޖެއެވެ.

ރަޝިޔާގެ ފައުޖުތަކުން އުތުރާއި ދެކުނާއި އިރުމަތިން ހަމަލާތައް ދެމުންދާކަމަށް ވިދާޅުވިއެވެ. އަދި ޔޫކްރެއިންގެ އެންމެ ބޮޑު މަގްސަދަކީ ޔޫކްރެއިން ދިފާއުކޮށް ރައްޔިތުން ދިފާއުކުރުންކަމަށް ވިދާޅުވިއެވެ. ނަމަވެސް އެކަން ކުރުމަށް ޔޫކްރެއިންއަށް އިތުރު އެހީ ބޭނުންވާކަމަށް ވިދާޅުވިއެވެ. އެއީ އަަސްކަރީ ގޮތުންނާއި، ފައިސާގެ ގޮތުންކަމަށް ވިދާޅުވިއެވެ. އަދި ރަޝިޔާއާ ދެކޮޅަށް ދަތިކުރުމުގެ ފިޔަވަޅުތައް އަޅަންޖެހޭކަމަށް ވިދާޅުވިއެވެ.

ރަޝިޔާގެ އަސްކަރީ ފައުޖުތަކުން މަސައްކަތްކުރަމުން އަންނަނީ ޔޫކްރެއިންގެ ވެރިރަށް ކިޔެވް ގެ ތެރެއަށް ވަދެގަތުމަށްކަމަށް ޔޫކްރެއިންގެ ބޯޑަރ އޮފިޝަލަކު ވިދާޅުވެއްޖެއެވެ.

އަލްޖަޒީރާއިން ރިޕޯޓްކުރާ ގޮތުގައި ރަޝިޔާއިން އަންނަނީ ގްރެޑް ރޮކެޓް ސިސްޓަމް ބޭނުންކޮށްގެން ހަމަލާތައް ދެމުންނެވެ. އަދި ކިޔެވްގެ ކައިރީގައި އޮންނަ އަސްކަރީ އެއަރޕޯޓަކަށްވެސް ރަޝިޔާގެ ހެލިކޮޕްޓަރުތަކުން ހަަމަލާދީފައިވާކަމަށް އަލްޖަޒީރާއިން ވަނީ ރިޕޯޓްކޮށްފައެވެ.

ޔޫކްރެއިންގެ މަޝްރަހު ބަދަލުވަމުންދަނީ ވަރަށް އަވަހަށް ކަމަށާއި އަވަށްޓެރި ގައުމުތަކުން ޔޫކްރެއިންގެ ރެފިޔުޖީންނަށް އެހީތެރިވުމަށް އދ ގެ ރެފިޔުޖީންނާ ބެހޭ ކޮމިޝަނަރ އެދިވަޑައިގަންނަވައިފިއެވެ.

އދގެ ރެފިޔުޖީންނާ ބެހޭ އެޖެންސީން މިހާރުވެސް ޔޫކްރެއިންއާ ގުޅިގެން މަސައްކަތްކުރަމުން އަންނަކަމަށް ކޮމިޝަނަރ ވިދާޅުވިއެވެ. އަދި އިންސާނީ އެހީތެރިކަން ފޯރުކޮށްދޭނެކަމަށް ވިދާޅުވިއެވެ.

ނޭޓޯގެ ސިފައިންގެ އެއްވެސް މީހަކު ޔޫކްރެއިންގައި ހަރަކާތްތެރިވަމުން ނުދާކަމަށާއި އަދި ކުރިޔަށް އޮތްތަނުގައިވެސް ފޮނުވުމުގެ ވިސްނުމެއް ނުގެންގުޅޭކަމަށް ނޭޓޯއިން ބުނެފިއެވެ.

ނަމަވެސް އިރުމަތީ ސަރަހައްދުގައި ނޭޓޯގެ ސަރަހައްދުގެ ތެރޭގައި ނޭޓޯގެ އަސްކަރީ ފައުޖުތައް އިތުރުކުރާނެކަމަށް ނޭޓޯއިން ބުނެއެވެ.

ޔޫކްރެއިންގެ ވެރިރަށް ކިޔެވް އޮންނަ ސަރަހައްދުގައި ހަރަކާތްތެރިވަމުންދިޔަ ރަޝިޔާ އަސްކަރިއްޔާގެ ތިން ހެލިކޮޕްޓަރު ވައްޓާލާފައިވާކަމަށް ޔޫކްރެއިންގެ އިންޓީރިއާ މިނިސްޓްރީން ބުނެފިއެވެ.

މީގެކުރިން ރަޝިޔާގެ 6 ބޯޓެއް ވައްޓާލާފައިވާކަމަށްވެސް ޔޫކްރެއިން އިން ބުނެފައެވެ. ނަމަވެސް ރަޝިޔާގެ އަސްކަރިއްޔާއިން ވަނީ އެރިޕޯޓް ދޮގުކޮށްފައެވެ.

ޔޫކްރެއިންގައި ހިނގަމުންދާ ކަންތައްތަކާއި ގުޅިގެން ލިތުއޭނިޔާގެ ރައީސް އެގައުމުގައި ކުއްލި ނުރައްކަލުގެ ހާލަތު އިއުލާންކުރައްވައިފިއެވެ.

ރޮއިޓަރސް އިން ރިޕޯޓްކޮށްފައިވާ ގޮތުގައި އެގައުމުން ވަނީ ބޯޑަރު ސަރަހައްދު ދިފާއުކުރުމުގެ ގޮތުން އަސްކަރިއްޔާ ފައުޖުތައް ފޮނުވުމަށް ނިންމާފައެވެ. އަދި ޔޫކްރެއިންއަށް ވެދެވެން އޮތް ހުރިހާ އެއްބާރުލުމެއް ދޭނެކަމަށް އެގައުމުން ވަނީ ބުނެފައެވެ.

ރަޝިޔާއިން ޔޫކްރެއިންއާ ދެކޮޅަށް ދެމުންދާ ހަމަލާތައް ކުށްވެރިކުރެއްވުމަށް ދެކޮޅު ހަދާ ހުރިހާ ފަރާތްތަކުންވެސް ސުލްހައަށް އިސްކަން ދިނުމަށް ޗައިނާއިން ގޮވާލައިފިއެވެ.

ޗައިނާގެ ފޮރިން މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ފޮރިން މިނިސްޓްރީގެ ސްޕޯކްސްޕާސަން ވަނީ އެމެރިކާއިން މަސްރަހު ހޫނުކުރަމުންދާކަމަށް ވިދާޅުވެފައެވެ. އަދި ޔޫރަޕްގެ ދަތިކުރުމުގެ ފިޔަވަޅުތަކުގެ ސަބަބުން ލިބޭ ގެއްލުންތައް ފޫބެއްދުމަށް ޗައިނާއިން ރަޝިޔާއަތުން ގޮދަން އިމްޕޯޓްކުރާނެ ކަމަށް ވިދާޅުވިއެވެ.

ރަޝިޔާގެ ރައީސް ވްލަޑްމިއަރ ޕުޓިންގެ އެންމެ ބޮޑު ވާދަވެރިޔާ އަދި އިދިކޮޅު ލީޑަރ އެލެކްސީ ނަވަލްނީ ރަޝިޔާއިން މިހާރު ޔޫކްރެއިންގައި ދެމުންދާ ހަމަލާތަކާއި ގުޅޭގޮތުން ކޯޓުގައި ބޭއްވި އަޑުއެހުމެއްގައި ވާހަކަދައްކަވައިފިއެވެ.

ނަވަލްނީ ތުހުމަތުކުރެއްވީ މިއީ ރަޝިޔާ ސަރުކާރުން ކުރަމުންދާ ކަންކަން ފޮރުވާ ރަޝިޔާ ރައްޔިތުންގެ ވިސްނުން އެހެން ދިމާލަށް އަނބުރާލުމަށް ކުރަމުންގެންދާ ކަމެއްގެ ގޮތުގައެވެ. ނަވްލީން ވިދާޅުވީ މިހަނގުރާމައާ ދެކޮޅު ކަމަށެވެ.

ރަޝިޔާއިން ޔޫކްރެއިން އަށް ދެމުންދާ ހަމަލާތައް އަމާޒުކުރަނީ ހަމައެކަނި އިރުމަތީ ސަރަހައްދަށް ނޫންކަމަށާއި މުޅި ޔޫކްރެއިން އަށް ކަމަށް ޔޫކްރެއިންގެ ފޮރިން މިނިސްޓަރ ވިދާޅުވެއްޖެއެވެ.

ހަމަލާތައް ދެމުން އަންނަނީ އެކި ދިމަދިމާލުންކަމަށްވެސް މިނިސްޓަރ ވިދާޅުވިއެވެ.

ޔޫކްރެއިންގައި މިހާރު ރަޝިޔާއިން ހިންގަމުންދާ ކަންކަމަކީ އަސްކަރީ ޚާއްސަ އޮޕަރޭޝަނެއްކަމަށް ވިދާޅުވެ މިކަމުގެ އިތުރު ތަފްސީލުދެއްވުމަށް ކްރެމްލިންގެ ސްޕޯކްސްމަން ދެކޮޅު ހައްދަވައިފިއެވެ.

ނޫސްވެރިއަކު ކުރެއްވި ސުވާލަށް ޖަވާބު ދެއްވަމުން ވިދާޅުވީ މި އޮޕަރޭޝަންގައި ކުރިޔަށްދާ އަސްކަރީ، ޓެކްނޮލޮޖީ އަދި އެހެން ކަންކަމާއި ގުޅޭ ތަފްސީލެއް ނުދެވޭނެކަމަށެވެ.

ޔޫކްރެއިންގެ ވެރިރަށް ކިޔެވްގައި ހުންނަ ޑިފެންސް އިންޓެލިޖެންސް ހެޑްކުއަރޓާސް މަތިން ދުންތަކެއް އަރާ މަންޒަރު ފެނިފައިވާކަމަށް މަންޒަރު ދުށް މީހަކާއި ހަވާލާދީ ރޮއިޓަރސް އިން ރިޕޯޓްކޮށްފިއެވެ.

ޔޫކްރެއިން ބުނެފައިވަނީ އެގައުމުގެ އަސްކަރީ ބައެއް ތަންތަނަށް ރަޝިޔާއިން މިސައިލް ހަމަލާތައް އަމާޒުކޮށްފައިވާކަމަށެވެ.

ރަޝިޔާއިން ޔޫކްރެއިންއަށް ހަމަލާދިނުމަށް ނިންމި މައިގަނޑު ސަބަބަކީ ނޭޓޯގެ ގައުމުތަކުން ރަޝިޔާ ރުޅިއެރުވުންކަމަށް އިރާނުގެ ފޮރިން މިނިސްޓަރ ހުސައިން އާމިރުއަބްދުﷲހިއަން ވިދާޅުވެއްޖެއެވެ.

ނަމަވެސް މައްސަލައަށް ހައްލެއް އަންނާނީ ހަނގުރާމަކޮށްގެން ނޫންކަމަށާއި ސިޔާސީ އަދި ޑިޕްލޮމެޓިކް ހައްލެއް ގެންނަންޖެހޭކަމަށް ވިދާޅުވިއެވެ. މީގެއިތުރުން ކިޔެވްގައި ތިބި އިރާނުގެ ރައްޔިތުން ނެރޭނެ ގޮތްތަކާއި ގުޅޭގޮތުން މަޝްވަރާކުރެއްވިކަމަށްވެސް ވިދާޅުވިއެވެ.

ޔޫކްރެއިން ރައީސް ވޮލޮޑިމިރް ޒެލެންސްކީ ގަތަރުގެ އަމީރު ޝެއިޚް ތަމީމު ބިން ހަމަދު އަލް ޘާނީ އާ ފޯނުން ގުޅުއްވާ މަޝްރަހާ ގުޅޭގޮތުން އެންމެ ފަހުގެ މައުލޫމާތު ދެއްވައިފިއެވެ.

ޝެއިޚް ތަމީމު ވަނީ ހުރިހާ ފަރާތްތަކުންވެސް މައްސަލަ ޑިޕްލޮމެޓިކް ގޮތަކަށް ހައްލުކުރުމަށް އެދިވަޑައިގަންނަވާފައެވެ. އަދި ރައްޔިތުން ސަލާމަތްކުރުމަށް އެދިވަޑައިގެންނެވިއެވެ.

ޔޫކްރެއިންއަށް ރަޝިޔާއިން ދެމުންދާ ހަމަލާތަކުގައި ތަންތަނަށާއި މީހުންނަށް އެކިވަރުގެ އަނިޔާތައް އަންނަނީ ލިބެމުންނެވެ. އަދި މިހަމަލާތަކުގައި ބައެއް މީހުން މަރުވެފައިވާކަމަށް ޔޫކްރެއިންގެ ސަރުކާރުން ބުނެފައިވެއެވެ.

ރަޝިޔާއިން ޔޫކްރެއިން އަށް ހަމަލާދޭން ފެށުމާއެކު އެކަމާއި ގުޅޭގޮތުން މަޝްވަރާކުރުމަށްޓަކައި ނޭޓޯގެ ލީޑަރުން ވީޑިއޯ މެދުވެރިކޮށް ހުކުރު ދުވަހު ބައްދަލުވުމެއް ބޭއްވުމަށް ހަމަޖެހިއްޖެއެވެ.

ރަޝިޔާއިން މިހާރު ޔޫކްރެއިން އަށް ދެމުންދާ ހަމަލާތަކުގައި ޔޫކްރެއިންގެ 40 މީހުން މަރުވެފައިވާކަމަށް ޔޫކްރެއިންގެ ރައީސްއަށް ލަފާދޭ މުޝީރު ވިދާޅުވެއްޖެއެވެ.

އެތައް ބަޔަކު ޒަޚަމްވެފައިވާކަމަށްވެސް ވިދާޅުވިއެވެ. ނަމަވެސް މިއީ އާންމުންކަމެއް ނުވަތަ އަސްކަރީ ފަރާތްތައް ކަމެއް ވިދާޅެއްނުވެއެވެ.

ރަޝިޔާއިން ޔޫކްރެއިން އާ ދެކޮޅަށް މިހާރު ހިންގަމުންދާ އަސްކަރީ އޮޕަރޭޝަންގެ ސަބަބުން ޔޫރަޕް ބައްރަށް ބޮޑު ކާރިސާއަކާ ކުރިމަތިވެފައިވާކަމަށް އިނގިރޭސިވިލާތުގެ ބޮޑުވަޒީރު ބޮރިސް ޖޯންސަން ވިދާޅުވެއްޖެއެވެ.

ބޮރިސް ކުރެއްވި ޓްވީޓެއްގައި ވިދާޅުވީ މިކަމާއި ގުޅިގެން އިނގިރޭސި ރައްޔިތުންނާ މުޚާތަބުކުރައްވާނެކަމަށެވެ. އަދި ޖީ7 ގެ ގައުމުތަކުގެ ލީޑަރުންނާއި ވާހަކަދައްކަވާފައިވާކަމަށާއި ނޭޓޯގެ ލީޑަރުންގެ ކުއްލި އަވަސް ބައްދަލުވުމެއް ބޭއްވުމަށް ގޮވާލައްވާކަމަށް ވިދާޅުވިއެވެ.

ޔޫކްރެއިންގެ އޮފިޝަލުންނާ ހަވާލާދީ ބީބީސީން ރިޕޯޓްކޮށްފައިވާ ގޮތުގައި ޚާރްކީވް އަށް ވަނީ ރަޝިޔާގެ ޓޭންކްތައް ވަދެފައެވެ.

މިއީ ދެވަނަ ބޮޑު ހަނގުރާމައަށްފަހު ޔޫރަޕަށް ކުރިމަތިވި އެންމެ އަނދަރި ވަގުތުތައް ކަމަށް އީޔޫގެ ފޮރިން ޕޮލިސީ ޗީފް ޖޯސެފް ބޮރެލް ވިދާޅުވެއްޖެއެވެ.

ދުނިޔޭގެ ނިޔުކުލިއަރ ބޮޑު ބާރަކުން އަވަށްޓެރި ގައުމަކަށް އަރައިގަނެފައިވާއިރު މިއީ ބައިނަލްއަގްވާމީ ގާނޫނުތަކާއި ޚިލާފަށްކުރާ ކަމެއްކަމަށެވެ.

އަދި އީޔޫއިން ރަޝިޔާ އާ ދެކޮޅަށް ވަރުގަދަ ފިޔަވަޅުތަކެއް އަޅަމުން ގެންދާނެކަމަށް ވިދާޅުވިއެވެ.

ޔޫކްރެއިން އިން އަންނަ ރެފިޔުޖީން ބަލައިގަންނަން ތައްޔާރުކަމަށް ފިންލެންޑްގެ ބޮޑުވަޒީރު ވިދާޅުވެއްޖެއެވެ.

ފިންލެންޑުން ވަނީ ރަޝިޔާއިން ޔޫކްރެއިން އަށް ދެމުންދާ ހަމަލާތައް ކުށްވެރިކޮށްފައެވެ. އަދި ޔޫކްރެއިންގެ ރައްޔިތުންނާއެކުވާކަން ހާމަކޮށްފައެވެ.

ރަޝިޔާއިން ޔޫކްރެއިން އާ ދެކޮޅަށް ފަށާފައިވާ އަސްކަރީ އޮޕަރޭޝަނާއި ގުޅިގެން ދިފާއުގައި ހަނގުރާމަ ކުރަން ބޭނުންވާ ކޮންމެ މީހަކަށްވެސް އަސްކަރީ ހަތިޔާރު ދޭނެކަމަށް ޔޫކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވެއްޖެއެވެ.

ޔޫކްރެއިން އާއި ރަޝިޔާ އާ ދެމެދު ގާއިމުކޮށްފައިވާ ޑިޕްލޮމެޓިކް ގުޅުން ކަނޑާލާފައިވާކަމަށް ޔޫކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވެއްޖެއެވެ.

ޒެލެންސްކީ މިހެން ވިދާޅުވީ ނޫސްވެރިންނާ ބައްދަލުކުރައްވާ ވާހަކަފުޅު ދައްކަވަމުންނެވެ.

ރަޝިޔާއިން ޔޫކްރެއިން އަށް ހަމަލާދިނުމަކީ ހައިރާންވާ ކަމެއް ނޫންކަމަށް ކޮންސަލްޓެންސީ ފާމެއް ކަމުގައިވާ ރަސްމުސެން ގްލޯބަލް ގެ ޗީފް ސްޓްރެޓެޖީ އޮފިސަރ ފެބްރިސް ވިދާޅުވެއްޖެއެވެ.

އަލްޖަޒީރާ އާ ވާހަކަދައްކަވަމުން ފެބްރިސް ވިދާޅުވީ ޕުޓިން ބޭނުންފުޅުވަނީ ރަޝިޔާގެ ރަސްކަމުގެ ދަރުބާރު އަލުން ބިނާކުރަން ކަމަށެވެ. މީގެއިތުރުން ދަތިކުރުމުގެ ފިޔަވަޅުތަކަކުން ރަޝީޔާ ނުހުއްޓުވޭނެކަމަށާއި ނޭޓޯގެ އަސްކަރީ ފައުޖުތައް ޔޫކްރެއިން އަށް ނާރާނެކަމުގެ ޔަގީންކަން ޕުޓިން އަށް އޮންނަކަމަށް ވިދާޅުވިއެވެ. އެހެންކަމުން ޕުޓިން ކޮންމެ ކަމެއް ކުރެއްވިޔަސް އެކަން ހުއްޓުވޭނެ މާބޮޑު ގޮތްތަކެއް ނޯންނާނެކަމަށް ވިދާޅުވިއެވެ.

ރަޝިޔާއިން ޔޫކްރެއިންގައި ކުރިޔަށްގެންދާ އަސްކަރީ އޮޕަރޭޝަން ފެށުމުގެ ކުރިން ރަޝިޔާގެ ރައީސް ވްލަޑްމިއަރ ޕުޓިން ދެއްވި މެސެޖް ރަޝިޔާގެ ސްޓޭޓް ޓީވީން ދުރަށްދައްކައިފިއެވެ.

މީގެ ދެ ދުވަސްކުރިން ޕުޓިން ޔޫކްރެއިނުން ވަކިވެގަނެފައިވާ ޑޮނެޓްސްކް ޕީޕަލްސް ރިޕަބްލިކާއި ލުހަންސްކް ޕީޕަލްސް ރިޕަބްލިކަކީ ވަކި މިނިވަން ދެ ދައުލަތެއްގެ ގޮތުގައި ބަލައިގަނެ އެ ދެ ސަރަަހައްދާއެކު ސިޔާސީ ގުޅުން ގާއިމުކުރައްވާފައެވެ.

ޕުޓިން ވިދާޅުވީ ރަޝިޔާގެ މިއަސްކަރީ އޮޕަރޭޝަނަކީ އެސަރަހައްދުގައި އަސްކަރީ ބާރު ކަނޑުވާލާއި ޔޫކްރެއިން އިން ނާޒީންގެ ނުފޫޒު ކަނޑުވާލުމަށް ކުރައްވާކަމެއްކަމަށެވެ.

ޔޫކްރެއިން ގެ ވަކި ތަންތަނަކަށް އަމާޒުކޮށްގެން ކުރިޔަށްގެންދާ މި އޮޕަރޭޝަނަކީ ދެމުންދާ އިންޒާރުތަކަށް ރައްދުދިނުމުގެ ގޮތުން އަމިއްލަ ދިފާއުގައި ކުރައްވާކަމެއް ކަމަށް ޕުޓިން ވިދާޅުވިއެވެ. އެއްވެސް ގައުމަކަށް އަރައިގަނެ އަމިއްލަގޮތްތައް ފެތުރުމުގެ ވިސްނުމެއް އަދި ޕްލޭނެއްވެސް ނެތްކަމަށް ވިދާޅުވިއެވެ.

އަދި މިއަސްކަރީ ހަމަލާތަކަކީ ޑޮންބާސްގެ ރައްޔިތުން ހިމާޔަތްކުރުމަށް ކުރިޔަށް ގެންދާ ހަމަލާތަކެއްކަމަށް ވިދާޅުވިއެވެ. މިއީ އެސަރަހައްދުގައި ހަރަކާތްތެރިވާ މީހުންނާ ދެކޮޅަށް ޔޫކްރެއިން ހިންގާ ލާއިންސާނީ އަމަލުތައް ހުއްޓުވުމަށް ކުރާކަމެއްކަމަށް ޕުޓިން ވިދާޅުވިއެވެ.

ޕުޓިން އިތުރަށް ވިދާޅުވީ ރަޝިޔާގެ ސަލާމަތާއި، ރަޝިޔާގެ ރައްޔިތުންގެ ސަލާމަތަށް ނުރައްކާވާ ގޮތަށް ހިންގާ ކޮންމެ އަމަލަކާދެކޮޅަށް ރަޝިޔާއިން ތެދުވެ ވަރުގަދަ ރައްދެއް ދޭނެކަމަށެވެ. އަދި އެފަދަ އަމަލެއް ހިންގާ ބަޔަކަށް ދުވަހަކުވެސް ތަޖުރިބާކުރަން ޖެހިފައިނުވާ ކަންތައްތަކެއް ތަޖުރިބާ ކުރަންޖެހޭނެކަމަށް ވިދާޅުވިއެވެ.

ޔޫކްރެއިން އިން ތުރުކީއަށް ކަނޑައަޅުއްވާފައިހުންނަވާ ސަފީރު ރަޝިޔާގެ އަސްކަރީ ބޯޓުތަކަށް ނާދެވޭގޮތަށް ބްލެކްސީ ބަންދުކޮށްދިނުމަށް ތުރުކީ ސަރުކާރުގައި އެދިވަޑައިގަނެފިއެވެ.

ސަފީރު ވަނީ ވައިގެ މަގުވެސް ބަންދުކޮށްދިނުމަށް އެދިވަޑައިގަންނަވާފައެވެ.

ތުރުކީ އަކީ ރަޝިޔާ އާއި ޔޫކްރެއިން އާވެސް ކަނޑުމަގުން ބޯޑަރު ހިއްސާކުރާ ގައުމެކެވެ. އަދި ދެ ގައުމާވެސް ތުރުކީން ބާއްވަމުން އަންނަ ގުޅުން ރަނގަޅެވެ. އެހެންކަމުން މިކަމުގައި ވަކި ގޮތެއް ނިންމުމަށް ތުރުކީއަށް ދަތިތަކާ ކުރިމަތިވާނެއެވެ. އަނެއްކޮޅުން ސަފީރު ވަނީ ރަޝިޔާއާއި ދެކޮޅަށް ތުރުކީން ދަތިކުރުމުގެ ފިޔަވަޅުތައް އެޅުމަށްވެސް އެދިވަޑައިގަންނަވާފައެވެ. އަދި މިމައްސަލައިގައި ޔޫކްރެއިން އަށް ތުރުކީގެ އެހީ ތެރިކަން ބޭނުންވާކަމަށްވެސް ވިދާޅުވިއެވެ.

ޔޫކްރެއިންގެ އަސްކަރިއްޔާއިން ބުނެފައިވަނީ ރަޝިޔާގެ ފައުޖުތަކުގައި ތިބި ސިފައިންގެ ތެރެއިން 50 ސިފައިން މަރާލާފައިވާކަމަށެވެ. އަދި ހަނގުރާމަމަތީ ބޭނުންކުރާ 6 މަތިންދާބޯޓުވެސް ވައްޓާލާފައިވާކަމަށެވެ.

ރަޝިޔާއިން ޔޫކްރެއިންއާ ދެކޮޅަށް މިހާރު ކުރިޔަށްގެންދާ އަސްކަރީ އޮޕަރޭޝަނާއި ދެކޮޅު ހަދާ ހަނގުރާމައާ ދެކޮޅު ހަދާކަން ދެއްކުމުގެ ގޮތުން ރަޝިޔާގެ ސިޓީތަކުގައި މުޒާހަރާތައް ކުރިޔަށް ގެންދިޔުމަށް ރަޝިޔާ ސަރުކާރާ އިދިކޮޅު އެކްޓިވިސްޓަކު ގޮވާލައިފިއެވެ. އޭނާގެ ފޭސްބުކް ޕޯސްޓެއްގައި ބުނެފައިވަނީ މިކަމުން އަރައިގަތުމަށް އެތައް އަހަރުތަކެއް ނަގާނެކަމަށެވެ. އެތައް ޖީލަކަށް މިކަމުގެ ގެއްލުންވާނެކަމަށް ބުނެފައިވެއެވެ.

ފެންނަމުންދަނީ އެތައް އަހަރަކަށް ދެމިގެންދާނެ ކެކުޅުންތަކަކާއި މީހުން މަރުވާތަންކަމަށް ބުނެފައިވެއެވެ.

ރަޝިޔާއިން މިހާރު ޔޫކްރެއިން އަށް ދެމުންދާ ހަމަލާތަކުގައި ބެލަރޫސްގެ ސިފައިން ބައިވެރިނުވާކަމަށް އެގައުމުގެ ރައީސް އަލެކްސެންޑަރ ލުކަޝެންކޯ ވިދާޅުވެއްޖެއެވެ.

އެގައުމުގެ ސްޓޭޓް ނިއުސް އެޖެންސީ ރިޕޯޓްކޮށްފައިވާ ގޮތުގައި ރަޝިޔާގެ އަސްކަރިއްޔާއިން ކުރިޔަށްގެންދާ އޮޕަރޭޝަންގައި ބެލަރޫސްއިން ބައިވެރިނުވާކަމަށް އެގައުމުގެ ރައީސް ވަނީ ވިދާޅުވެފައެވެ.

އަލެކްސެންޑަރ އަކީ ޕުޓިން އާ ގާތްގުޅުމެއް ބާއްވަމުން ގެންދަވާ ބޭފުޅެކެވެ.

ރަޝިޔާއިން ޔޫކްރެއިން އަށް ހަމަލާދޭން ފެށުމާއެކު ޔޫރަޕްގެ ހިއްސާގެ ބާޒާރަށް ލޮޅުންތަކެއް އަރައިފިއެވެ.

އެގޮތުން ހިއްސާގެ ބާޒާރުގައި ފްރެންޗް ގެ ސީއޭސީ އިންޑެކްސް 4 އިންސައްތަ ވަނީ ދަށަށްގޮސްފައެވެ. އަދި ޖަރމަނީގެ ޑެކްސް އިންޑެކްސް 4 އިންސައްތަ ދަށަށްގޮސްފައިވެއެވެ.

އޭޝިޔާގެ ހިއްސާގެ ބާޒާރަށްވެސް ވަނީ ލޮޅުންތަކެއް އަރާފައެވެ. ހޮންގކޮންގ ގެ ހެންގް ސެންގް އިންޑެކްސް 3 އިންސައްތަ ދަށަށްގޮސްފައިވާއިރު ކޮރެއާގެ ކޮސްޕީ ވަނީ 2.6 އިންސައްތަ ދަށަށްގޮސްފައެވެ.

ރަޝިޔާއިން ޔޫކްރެއިންގައި މިހާރު ކުރިޔަށްގެންދާ އަސްކަރީ އޮޕަރޭޝަން މިހާރުން މިހާރަށް ހުއްޓާލުމަށް ފްރާންސްގެ ރައީސް އިމެނުއަލް މެކްރޮން ގޮވާލައްވައިފިއެވެ.

މެކްރޮން ކުރެއްވި ޓްވީޓެއްގައި ވިދާޅުވީ ޔޫކްރެއިން އަށް ރަޝިޔާއިން ދެމުންދާ ހަމަލާތައް ކުށްވެރިކުރާކަމަށެވެ. އަދި ފްރާންސް ވަނީ ޔޫކްރެއިން އާއި ޔޫކްރެއިންގެ ރައްޔިތުންނާ އެކުގައި ކަމަށްވެސް މެކްރޮން ވިދާޅުވިއެވެ.

މެކްރޮން ވަނީ ޔޫކްރެއިންގެ ރައީސް ވޮލޮޑިމިރް ޒެލެންސްކީ އާ ފޯނުން ގުޅުއްވާ ފްރާންސަށް ޔޫކްރެއިންއަށް އެހީތެރިވެދޭނެ ގޮތްތަކާއި ގުޅޭގޮތުން މަޝްވަރާކުރައްވާފައެވެ.

ޒެލެންސްކީ ވަނީ މިމައްސަލައިގައި ޔޫރަޕުން އެކައްޗެއް ކިޔުމަށް އެދިވަޑައިގަންނަވާފައެވެ.

ރަޝިޔާއިން ޔޫކްރެއިންގައި ހަނގުރާމަ އިއުލާންކޮށްފައިވާއިރު، ޔޫކްރެއިންގެ އަސްކަރީ ބާރުދަށް ކޮށްލުމަށް ރަޝިޔާއިން ދަނީ ގިނަ އުކުޅުތައް ބޭނުން ކުރަމުންނެވެ. އެގޮތުން އެއްގަމު މަގުންނާއި ވައިގެ މަގުން އެކި ސަރަހައްދުތަކަށް ދަނީ ހަމަލާ ދެމުންނެވެ. އަދި ރަޝިޔާގެ ސިފައިން ހަނގުރާމަ މަތީ ހުރިހާ ވަސީލަތެއް ބޭނުން ކުރާ ކަމަށް މަސްރަހު ދިރާސާ ކުރާ ފަރާތްތަކުން ދަނީ ބުނަމުންނެވެ.

ރަޝިޔާއިން ޔޫކްރެއިން އަށް ދެމުންދާ ހަމަލާތަކަކީ އާންމު ރައްޔިތުންނަށް އަމާޒުކޮށްގެން ދޭ ހަމަލާތަކެއް ނޫންކަމަށް ރަޝިޔާގެ ޑިފެންސް މިނިސްޓްރީން ބުނެފިއެވެ.

ރަޝިޔާގެ ޑިފެންސް މިނިސްޓްރީން ބުނީ އާންމު ރައްޔިތުންނަށް އެއްވެސް ނުރައްކަލެއް ނެތްކަމަށެވެ.

ޔޫކްރެއިން އިން ކުރިން ބުނެފައިވަނީ ރަޝިޔާއިން ދެމުންދާ ހަމަލާތަކުގައި އަށް މީހަކު މަރުވެ ނުވަ މީހަކު ޒަޚަމްވެފައިވާކަމަށެވެ.

ރަޝިޔާ ސިފައިން ވަނީ މިނިވަން ގައުމަކަށް އަރާފައިކަމަށާއި މިއީ އެއްގޮތަކަށްވެސް ބަލައިގަނެވޭނެ ކަމެއް ނޫންކަމަށް ޔޫރަޕިއަން ކޮމިޝަންގެ ރައީސް ވިދާޅުވެއްޖެއެވެ.

އަދި މިއަދު ފަހުގެ ވަގުތެއްގައި ރަޝިޔާ އާ ދެކޮޅަށް ޓާގެޓްކޮށްގެން އަޅާ ދަތިކުރުމުގެ ފިޔަވަޅުތައް ހާމަކުރާނެކަމަށް ވިދާޅުވިއެވެ.

ޕުޓިން ހަމަލާދިނުމުން ހަމަލާއަށް ބިރުން ޔޫކްރެއިންގެ އަސްކަރިއްޔާ ނުފިލާކަމަށް ޔޫކްރެއިންގެ ފޮރިން މިނިސްޓަރ ވިދާޅުވެއްޖެއެވެ. ފޮރިން މިނިސްޓަރ އެހެން ގައުމުތަކުގައި ދިރިއުޅެމުން އަންނަ ޔޫކްރެއިންގެ ރައްޔިތުންނަށް މެސެޖެއްދެއްވާ ކުރެއްވީ ޓްވީޓެއްގައި ވިދާޅުވީ އަސްކަރިއްޔާ އާއި ހުރިހާ އެންމެން ރަޝިޔާ އާއި ދެކޮޅަށް މަސައްކަތްކުރަމުން އަންނަ ކަމަށާއި ޔޫކްރެއިން އަށް މިކަމުން ކާމިޔާބު ލިބޭނެކަމަށެވެ.

އަދި އެހެން ގައުމުތަކުގައި ތިބި ރައްޔިތުން ޕުޓިންގެ މިހަމަލާތަކުގެ ހަގީގަތް އެގައުމުތަކަށް ހާމަކޮށްދީ ސަރުކާރުތަކުން ވަގުތުން ވަގުތަށް ފިޔަވަޅު އެޅުމަށް ގޮވާލުމަށް ވަނީ އެދިވަޑައިގަންނަވާފައެވެ.

ބުރާސްފަތި ދުވަހު ރަޝިޔާއިން ޔޫކްރެއިން އަށް ހަމަލާދޭން ފެށުމާއެކު ކިޔެވް ގައި ދިރިއުޅޭ ރައްޔިތުން އެސިޓީ ދޫކޮށްދާން ފަށައިފިއެވެ. ސީއެންއެންއިން ރިޕޯޓްކޮށްފައިވާ ގޮތުގައި ހެނދުނު ބާރުގަދަ ގޮވުންތައް ގޮވި ސަރަހައްދާ ދުރަށް ހުޅަނގު ސަރަހައްދަށް ދިޔުމަށް އަންނަނީ މަސައްކަތްކުރަމުންނެވެ. އެކަމުގެ ސަބަބުން ކިޔެވްގެ މަގުތަކުގައި ޓްރެފިކް ވަނީ ވަރަށް ބޮޑަށް ބާރުވެފައެވެ. ބާރުގަދަ ގޮވުންތަކުގެ އަޑުތައް އިވިފައިވަނީ އިތުމަތީ ސަރަހައްދުންނެވެ.

ގޮވުންތަކުގެ އަޑުވަނީ ޔޫކްރެއިންގެ ޚާރްކީވް އާއި އޮޑެސާ ސަރަހައްދުންވެސް އިވިފައިކަމަށް ސީއެންއެން އިން ވަނީ ރިޕޯޓްކޮށްފައެވެ.

ރަޝިޔާއިން ދެމުންދާ ހަމަލާތަކުގައި ހަތް މީހަކު މަރުވެފައިވާ ކަމަށް ރިޕޯޓުތަކުން ބުނެފިއެވެ. އޮފިޝަލުން ވިދާޅުވާ ގޮތުގައި ގިނަ ބަޔަކު ވަނީ ޒަހަމްވެފައެވެ. ނަމަވެސް ބައެއް އާއްމުން ދަނީ ހިމާޔަތް ހޯދުމަށް އެކި ސަރަހައްދުތަކަށް ދަތުރުކުރަމުންނެވެ. އަދި ބިމު އަޑީގައި ހުންނަ މެޓްރޯ ސްޓޭޝަންތަކަށް ވެސް ގިނަ ބަޔަކު ޖަމާވަމުންދާ ކަމަށް އޮފިޝަލުން ވިދާޅުވެއެވެ.

ޔޫކްރެއިންގެ ކީވް އެއާޕޯޓު ކައިރިއަށް ހަމަލާ ދީފިއެވެ. ރިޕޯޓުތައް ބުނާ ގޮތުން ހަމަލާ ދިނުމާއި ގުޅިގެން މިހާރު ވަނީ ފްލައިޓްތައް ކެންސަލްކޮށްފައެވެ. ހަމަލާތައް ވަރުގަދަ ކުރަމުންދާތީ، އާއްމުން ދަނީ ހުޅަނގުފަރާތަށް ދަތުރު ކުރަމުންނެވެ. އެއީ ހަމަލާތައް ދެމުންދަނީ އިރުމަތިން ކަމަށްވާތީ ކަމަށް ރިޕޯޓުތަކުން ބުނެއެވެ. އަދި މިހާރު މަގުތައް ވަރަށް ބޮޑަށް ޓްރެފިކް ވެފައިވާ ކަމަށް އޮފިޝަލުން ވިދާޅުވެއެވެ.