ކޮވިޑް-19: އެންމެ ފަހުގެ

ރާއްޖޭގައި ކޮވިޑް-19 ފެތުރެމުންދިއުމާއި ގުޅިގެން އިސްލާމިކް މިނިސްޓްރީން އެޅި ފިޔަވަޅުތަކުގެ ތެރޭގައި، މިއަދުން ފެށިގެން މިމަހުގެ 28 ގެ ނިޔަލަށް މާލެ ޞަރަޙައްދާއި ރިސޯޓުތަކުގެ މިސްކިތްތަކުގައި ޖަމާޢާތުގައި ނަމާދުކުރުން ވަނީ ހުއްޓާލާފައެވެ. އަދި ޖަމާއަތައް މިސްކިތައް ނުދެވޭ ޙާލަތްތަކުގައި ގޮވާ ބަންގީގެ އިބާރާތް ވަނީ އާންމުކޮށްފައެވެ.

ރާއްޖޭ ޓީވީން މިހާރު ކުރިޔަށްގެންދާ "ކޮވިޑް-19:ސްޕެޝަލް ކަވަރޭޖް" ގައި ވާހަކަފުޅު ދައްކަވަމުން އެމްޕީއެލްގެ ސީއީއޯ ޝާހިދު އަލީ ވިދާޅުވީ ޑަބްލިއުއެޗްއޯއާއި، އެޗްޕީއޭއިން އަމަލުކުރަމުންދާ ޕްރޮޓޮކޯލްތަކާއި އުޞޫލްތައް ތަންފީޒުކޮށް، ކޮވިޑް-19 އާއި ގުޅިގެން ކުރިމަތިވެދާނެ ކޮންމެ ޙާލަތަކައް އެމްޕީއެލް ތައްޔާރުވެފައިވާކަމަށެވެ.

މާރޗް 28 ވާ ހޮނިހިރު ދުވަހުގެ ނިޔަލަށް ހުކުރު ނަމާދު ނުކުރަން ނިންމިކަން އިއުލާންކުރައްވާފައިވަނީ ދާދި ދެންމެއަކު ބޭއްވި ޕްރެސް ކޮންފަރެންސްގައި އިސްލާމިކް އެފެއަރޒް މިނިސްޓަރެވެ.

މާލެ ސަރަހައްދުގެ ހުރިހާ މިސްކިތްތަކާއި ރިސޯޓުތަކުގައި، ޖަމާއަތުގައި ނަމާދުކުރުން މެދުކަނޑާލަން އިސްލާމިކް މިނިސްޓްރީން އަންގައިފިއެވެ.

ފަރަންސޭސި ވިލާތުގެ އިސް މަސްއޫލުވެރިންނާއި ޙަވާލާދީ ބޭރުގެ މީޑިއާތަކުން ރިޕޯޓުކުރާގޮތުގައި، މިއަދު އެކަނިވެސް އެޤައުމުން 27 މީހުން ކޮވިޑް-19 ޖެހިގެން މަރުވިއެވެ. މިއާއެކު އެޤައުމުގައި މަރުވީ މީހުންގެ އަދަދު ވަނީ 175 އަށް އަރާފައެވެ. އެޤައުމުން މިއަދު އެކަނިވެސް 1097 ވައިރަސްއަށް ޕޮޒިޓިވްވެފައިވާއިރު، މިހާރު ވައިރަސް ޖެހުނު މީހުންގެ ޖުމުލު އަދަދަކީ7,730އެވެ.

މާރޗް މަހުގެ 20 ވަނަ ދުވަހުން ފެށިގެން އޮން-އެރައިވަލް ވިސާއާއި، އެކި ބޭނުންތަކައް ކުރު މުއްދަތަކައް އެޤައުމަށް އެތެރެވާން ދޫކުރާ ވިސާ ދޫކުރުން ވަގުތީ ގޮތުން ހުއްޓާލަން ނިންމައިފިއެވެ.

އެޤައުުގެ ޚާރިއްޖިއްޔާއިން ބުނެފައިވަނީ، މިމަހުގެ 20 ވަނަ ދުވަހުން ފެށިގެން 30 ދުވަހުގެ މުއްދަތަކަށް ވިސާ ދޫކުރުން ހުއްޓާލަން ސަރުކާރުން ނިންމާފައިވާކަމަށެވެ.

އިންޑޮނޭޝިޔާ ސަރުކާރުން ވަނީ ދުނިޔޭގެ އެކި ޤައުމުތަކުގައި ތިބި އެޤައުމުގެ ރައްޔިތުން އަނބުރާ ޤައުމަށް ވީ އެންމެ އަވަހަކަށް އައުމަށް އިލްތިމާސްކޮށްފައެވެ.

އިންޑޮނޭޝިޔާގައި ފާއިތުވި 24 ގަޑިއިރުގެތެރޭގައި 38 މީހުން ވައިރަސްއަށް ޕޮޒިޓިވްވެ ދެމީހުން ވަނީ މަރުވެފައެވެ. އަދި އެޤައުމުގައި ވައިރަސް ފެތުރެންފެށިފަހުން މިހާތަނަށް 172 މީހުން ވައިރަށްއަށް ޕޮޒިޓިވްްވެެ، 7 މީހުން ވަނީ މަރުވެފައެވެ.

ހަލުވިކަމާއެކު ދުނިޔޭގެ އެކި ކަންކޮޅުތަކުގައި ފެތުރެމުންދާ ކޮވިޑް-19 އަށް ސްރީލަންކާއިން ޕޮޒިޓިވްވި މީހުންގެ އަދަދު 43 އަށް އަރައިފިއެވެ. ލަންކާގެ ނެޝަނަލް އޮޕަރޭޝަން ސެންޓަރ ފޮރ ޕްރިވެންޝަން އިން ހާމަކޮށްފައިވާ ގޮތުން އަންގާރަ ދުވަހު ޕޮޒިޓިވްވި 10 މީހުންނާއެކު ލަންކާގައި ކޮވިޑް-19 ޖެހުނު މީހުން އަދަދު ވަނީ 44 އަށް އަރާފައެވެ.

އަންގާރަ ދުވަހު ނޫސްވެރިންނަށް މައުލޫމާތު ދެއްވަމުން ލަންކާގެ ޑައިރެކްޓަރ ޖެނެރަލް އޮފް ހެލްތު ޑރ. އަނިލް ޖަޔަސިންހަ ވިދާޅުވީ، އަލަށް ރިޕޯޓު ކުރެވުނު ކޭސްތަކުގެ ތެރެއިން 6 މީހުންގެތެރޭގައި، ޓުއަރ ގައިޑެއްގެ ގޮތުގައި މަސައްކަތްކުރާ މީހަކާއި، ޖަރުމަނުން އައި ލަންކާ މީހަކާ، އިނގިރޭސިވިލާތުން އައި ލަންކާ މީހެއްގެ އިތުރުން ކެލަނިޔާ މީހަކާ، މަރަވިލަ ސަރަހައްދުގެ މީހަކުގެ އިތުރުން ދާދި ފަހުން ގަތަރުން އައި މީހަކު ހިމެނޭ ކަމަށެވެ.

ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) ގައި މަސައްކަތްކުރާ ދެ މުވައްޒަފަކު، ކޮވިޑް-19 އަށް ޕޮޒިޓިވްވެފައިވާ ކަމަށް އެ ޖަމިއްޔާއިން ހާމަކޮށްފިއެވެ.

ކޮވިޑް-19 އާ ދެކޮޅަށް ދުނިޔޭގެ އެކި ގައުމުތަކުން ކުރަމުން އަންނަ ހަނގުރާމައިގައި އިސް ދައުރެއް އަދާކުރާ، ޑަބްލިޔުއެޗްއޯއިން ވަނީ މިކަން ކަށަވަރުކޮށްދީފައެވެ. ނޫސްވެރިންނަށް މައުލޫމާތު ދެއްވަމުން އެ ޖަމިއްޔާގެ ތަރުޖަމާނު ކްރިސްޓިއަން ލިންޑްމަޔަރ ވިދާޅުވީ، އޮފީސް ދޫކޮށް ގެއަށް ދިޔަ ފަހުން ބަލީގެ އަލާމާތްތައް ފެނި، ޓެސްޓުކުރުމުން ވައިރަސްއަށް ޕޮޒިޓިވްވެފައިވާ ކަމަށެވެ.

މިއީ މި ވައިރަސް ނައްތާލުމަށް ޑަބްލިޔުއެޗްއޯއިން ކުރާ މަސައްކަތުގައި ސީދާ ބައިވެރިވެފައިވާ ދެ ފަރާތްކަން މިހާތަނަށް އަދި ކަށަވަރުވެފައެއް ނުވެއެވެ. ނަމަވެސް، ވައިރަސް އެހެން ބަޔަކަށް ޓްރާންސްމިޓް ވެދާނެ ކަމުގެ ބިރު އޮތުމާއެކު، އަޅަންޖެހޭ ހުރިހާ ފިޔަވަޅެއް އަޅަމުން އަންނަ ކަމަށް ލިންޑްމަޔަރ ވަނީ ވިދާޅުވެފައެވެ.

ޕާކިސްތާނުގެ އިސް މަސްއޫލުވެރިންނާއި ޙަވަލާދީ ބޭރުގެ މީޑިއާތަކުން ރިޕޯޓުކުރާގޮތުގައި އިއްޔެ ފެނުނު އިތުރު 63 ކޭސްއާއެކު މިހާރު އެޤައުމުގައި ވައިރަސް ޖެހުނު މީހުންގެ އަދަދު ވަނީ 247 އަށް އަރާފައެވެ.

މި ވައިރަސްގައި ޕާކިސްތާނުން އެއްވެސް މީހަކު މަރުވެފައެއް ނުވެއެވެ.

އިޓަލީގެ ސިވިލް ޕްރޮޓެކްޝަން އޭޖެންސީން ބުނީ، ފާއިތުވެދިޔަ 24 ގަޑިއިރު އެޤައުމުގައި 3,526 އަލަށް ވައިރަސްއަށް ޕޮޒިޓިވްވެ، 345 މީހުން ވައިރަސްގައި މަރުވެފައިވާކަމަށެވެ. މިއީ ކުރީ ދުވަހާއ އަޅާ ބަލާއިރު 16% އިތުރު އަދަދެއްކަމަށްވެސް އެއޭޖެންސީން ބުނެއެވެ.

އިޓަލީއަކީ ވިލާތުގެ ޤައުމުތަކުގެ ތެރެއިން ވައިރަސްގެ ނުރައްކާ އެންމެ ބޮޑު ޤައުމެވެ. މިހާތަނަށް އައިއިރު އެޤައުމުން 31,506 މީހުން މި ވައިރަސްއަށް ޕޮޒިޓިވްވެ، 2,503 މީހުން ވަނީ މަރުވެފައެވެ.

ކޮވިޑް-19 ގެ ނުރައްކަލަށް ޤަތަރުގައި ކާބޯތަކެތީގެ ވިޔަފާރިތަކާއި، ފާރަމަސޫޓިކަލް ވިޔަފާރި ނޫން އެހެން ހުރިހާ ވިޔަފާރިތައް ބަންދުކޮށްފިއެވެ. ޤަތަރުގެ "ހައި ކޮމިޓީ ފޮރ ކްރައިސިސް މެނޭޖްމެންޓް" އިން ބުނެފައިވަނީ، މިފަދަ ނިންމުމެއް ނިންމީ ވައިރަސް ހަލުވިމިނެއްގައި ފެތުރެމުންދާތީ އާންމުންގެ ސަލާމަތާއި ރައްކަލަކަށް ކަމަށެވެ.

މީގެ އިތުރުން ޤަތަރުންވަނީ، އެޤައުމުގެ ސިނާޢީ ޞަރަޙައްދުތައްވެސް 14 ދުވަހުގެ މުއްދަތަކަށް ބަންދުކޮށްފައެވެ.

އެހެން ބައްރުގެ ޤައުމުތަކުގެ މީހުންނަށް ވިލާތު ޞަރަޙައްދަށް ނޭރޭ ގޮތައް ދަތުރުފަތުރުގެ ސަމާލެއް ނެރުމަށް ވިލާތު އިއްތިހާދުން ތައްޔާރުވެއްޖެއެވެ. މިކަން މިޑިއާއަށް ހާމަކުރައްވަމުން ޖަރމަން ޗާންސެލަރ އެންގެލާ މަރކެލް ވިދާޅުވީ، 30 ދުވަހުގެ މުއްދަތަކަށް، އެހެން ބައްރުތަކުގެ މީހުންނަށް ވިލާތުގެ ޤައުމުތަކަށް ނޭރޭގޮތައް ކަނޑައަޅަން މެންބަރު ޤައުމުތަކުން އެއްބަސްވެފައިވާކަމަށާއި، މިކަން ވަރަށް އަވަހަށް އިޢުލާނުކުރާނެކަމަށެވެ.

ވިލާތު އިއްތިހާދުން އާންމުކުރާ ދަތުރުފަތުރުގެ އިންޒާރުން އިނގިރޭސިވިލާތާއި، އީއެފްޓީއޭ ޤައުމުތައް އިސްތިޘްނާވާނެއެވެ.

އެމެރިކާގެ ދިފާއީ ވުޒާރާ ޕެންޓެގަންއިން ބުނެފައިވަނީ ފަސް މިލިއަން ރެސްޕިރޭޓަރީ މާސްކު ލިބޭނެ އިންތިޒާމު ހަމަޖައްސަމުންދާކަމަށާއި، މި ވަގުތުން މިވަގުތައް 1 މިލިއަން މާސްކް ބަހަން ނިންމާފައިވާކަމަށެވެމީގެ އިތުރުން ވައިރަސްއިން ރައްކާތެރިވުމަށް ބޭނުންވާ އާލާތްތައް ވެސް ލިބޭނެ އިންތިޒާމު ހަމަޖައްސާނެކަމަށް ބުނެފައިވެއެވެ.

މީގެ އިތުރުން ދިފާޢީ ވުޒާރާގެ ލެބޯރެޓަރީން ޢާންމު ރައްޔިތުން ޓެސްޓުކުރުމުގެ ފުރުޞަތު ހުޅުވާލާނެކަމަށާއި، ހަމައެއާއެކު 2،000 ވެންޓިލޭޓަރު ވައިރަސްއަށް ފަރުވާދޭ މަރުކަޒުތަކަށް ހަދިޔާ ކުރާނެކަމަށް ދިފާއީ ވަޒީރު މާރްކ އެސްޕަރ ވަނީ ވިދާޅުވެފައެވެ.

ބްރެޒިލްގެ ރައީސް ޚެއިރް ބޮލްސޮނާރީ ވަނީ އެޤައުމުން ވައިރަސްގައި މީހަކު މަރުވިކަން ކަށަވަރުކޮށްދެއްވާފައެވެ. ބްރެޒިލްއިން މީހަކު މަރުވުމާއި ގުޅިގެން، ވައިރަސް އެންމެ ނުރައްކާމިންވަރަށް ފެތުރެމުންދާ އެޤައުމުގެ ސައޮ ޕޯލޯ ސިޓީއާއި ރިއޯ ޑެ ޖެނީރިއޯ ސިޓީގައި ވަނީ އާންމު ކުއްލި ނުރައްކާލުގެ ޙަލަތު އިޢުލާންކޮށްފައެވެ.

އެޤައުމުން މިހާތަނަށް 340 މީހުން ވަނީ ވައިރަސްއަށް ޕޮޒިޓިވްވެފައެވެ.

ބޮލީވިއާގެ ވަގުތީ ރައީސް ޝޯނައިން އެނޭޒްގެ އޮފީހުން އާންމުކޮށްފައިވާ ބަޔާނެއްގައި ބުނެފައިވަނީ މާދަމާއި ފެށިގެން އެޤައުމުގެ ރައްޔިތުން ފިޔަވައި އެހެން ބަޔަކަށް އެޤައުމުގެ އެއްގަމާއި ވައިގެ ބޯޑަރުތައްކުން އެޤައުމަށް އެތެރެ ނުވެވޭނެކަމަށެވެ. އަދި ހުކުރު ދުވަހުން ފެށިގެން އެތެރޭގެ އުދުހުންތަކާއި، ބައިނަލްއަޤުވާމީ އުދުހުންތައްވެސް ހުއްޓާލާނެކަމަށެވެ. ބޯޑަރުތަކާއި، އުދުހުންތައް ހުއްޓާލިނަމަވެސް އެޤައުމަށް ބޭނުންވާ ކާބޯތަކެއްޗާއި އެހެނިހެން ޒަރޫރޫތަކެތި ޤައުމަށް އެތެރެ ކުރެވޭނެ އިންތިޒާމު ސަރުކާރުން ހަމަޖައްސާނެކަމަށް ބަޔާނުގައިވެއެވެ. އަދި އާއްމު ރައްޔިތުން ވަޒީފާ އަދާކުރާ ގަޑިތައް ކުރުކޮށް، ވިޔަފާރި ހުޅުވާފައި ހުންނަ ގަޑިތަކައްވެސް ވަނީ ބޮޑެތި ބަދަލުތަކެއް ގެނެސްފައެވެ.

ސަރުކާރުން ގެނައި މި ބަދަލުތައް ތަންފީޒުކުރާނީ 31 މާރޗުގެ ނިޔަލަށް ކަމަށް ބަޔާނުގައިވެއެވެ.

ގެމްބިއާއިން ފުރަތަަމަ ފަހަރަށް ކޮވިޑް-19އަށް މީހަކު ޕޮޒިޓިވްވެއްޖެއެވެ. އެޤައުމުގެ ހެލްތު މިނިސްޓްރީން ބުނީ ވައިރަސްއަށް ޕޮޒިޓިވްވެފައިވަނީ އުމުރުން 20 އަހަރުގެ އެޤައުމުގެ އަންހެނެއް ކަމަށެވެ. އޭނާއަކީ އަމިއްލަ ބޭނުމަކަށް ދާދި ފަހުން އިނގިރޭސިވިލާތައް ދަތުރުކުރުމަށްފަހު އެނބުރި އައި މީހެއްކަމަށްވެސް އެމިނިސްޓްރީން ބުނެފައިވެއެވެ.

ކޮވިޑް-19 ގެ ސަބަބުން މެކްސިކޯގެ ސުޕްރީމް ކޯޓުގެ މަސައްކަތްތައް އެއް މަހަށް މަޑުޖައްސާލައިފިއެވެ.

އަންގާރަ ދުވަހު އެ ޤައުމުގެ ސުޕްރީމް ކޯޓުން ނެރުނު ބަޔާނަކާ ޙަވާލާދީ ބޭރުގެ މީޑިއާތަކުން ރިޕޯޓުކުރާ ގޮތުން، މާރޗު 18 ވީ އަންގާރަ ދުވަހުން ފެށިގެން އަންނަ އޭޕްރީލް މަހުގެ 19 އަށް ކޯޓުގެ މަސައްކަތްތައް މަޑުޖައްސާލުމަށް ވަނީ ނިންމާފައެވެ.

އަދި އެގޮތަށް ނިންމާފައިވަނީ އެ ޤައުމުގައި މި ވައިރަސް އިތުރަށް ފެތުރުނަ ނުދިނުމަށްޓަކައި ކަމަށްވެސް ރިޕޯޓްތައް ބުނެއެވެ.

މެކްސިކޯއިން ވައިރަސްއަށް ޕޮޒިޓިވްވި މީހުންގެ އަދަދު 80 އަށްވުރެ އިތުރުވެފައިވާއިރު، އޭގެ ތެރޭގައި ފާއިތުވި 24 ގަޑިއިރު ޕޮޒިޓިވްވި 29 މީހުން ހިމެނެއެވެ.

އެ ޤައުމުން މިހާތަނަށް ވައިރަސްގެ ސަބަބުން މީހަކު މަރުވެފައެއް ނުވެއެވެ. ނަމަވެސް ވައިރަސް ފެތުރިދާނެ ކަމުގެ ބިރަށްޓަކައި ބައެއް ފިިޔަވަޅުތައް ދަނީ އަޅަމުންނެވެ.

އިޓަލީގެ ޔުވެންޓަސްގެ ޑިފެންޑަރ ބްލެއިޒް މަޓުއިޑީ ކޮރޯނާވައިރަސް (ކޮވިޑް-19) އަށް ޕޮޒިޓިވްވެއްޖެއެވެ.

މަޓުއިޑީ ކޮރޯނާވައިރަސް (ކޮވިޑް-19) އަށް ޕޮޒިޓިވްވިކަން ޔުވެންޓަސްއިން ވަނީ ކަށަވަރުކޮށްދީފައެވެ. ޔުވެންޓަސްއިން ނެރުނު ބަޔާނުގައި ބުނީ މަޓުއިޑީ ކޮރޯނާވައިރަސް (ކޮވިޑް-19) އަށް ޕޮޒިޓިވްވެފައިވާ ކަމަށާއި އޭނާގެ ފަރުވާގެކަންކަަން ވަރަށް ގާތުން ބަލަމުން އަންނަ ކަމަށެވެ. މީގެ އިތުރުން ޔުވެންޓަސްއިން ބުނީ އެޓީމުގެ ޑިފެންޑަރު ޑެނިއެލް ރުގާނީ ކޮރޯނާވައިރަސް (ކޮވިޑް-19) އަށް ޕޮޒިޓިވްވުމުން މަޓުއިޑީ 11 މާޗުން ފެށިގެން ހުރީ އައިސޮލޭޝަނުގައި ކަމަށެވެ. އަދި މިވަގުތު މަޓުއިޑީގެ ހާލު ގޯސް ނޫން ކަމަށްވެސް ޔުވެންޓަސްއިން ބުނެއެވެ.

ކޮވިޑް-19 އާ ގުޅިގެން އެމެރިކާގައި ޖަނާޒާތައް ލައިވް-ސްޓްރީމް ކުރުމަށް ނިންމައިފިއެވެ.

ސެންޓަރ ފޮރ ޑިޒީޒް ކޮންޓްރޯލް އެންޑް ޕްރިވެންޝަން (ސީޑީސީ) އާ ޙަވާލާދީ ބީބީސީގައި ރިޕޯޓްކޮށްފައިވާ ގޮތުން ސީޑީސީން ވަނީ ވީހާވެސް މަދު މީހުން ޖަނާޒާތަކަށް ދިއުމަށް އިލްތިމާސްކޮށް، ޖަނާޒާތައް ލައިވްސްޓްރީމް ކުރުމަށް އަންގާފައެވެ.

އަދި އެގޮތަށް އަމަލުކުރަން ނިންމާފައިވަނީ ސޯޝަލް ޑިސްޓެންސިންގއަށް މީހުން އަހުލުވެރިކޮށް، ގިނަ މީހުން އެއްތަނަކަށް އެއްވެ އުޅުން މަނާ ކުރުމުގެ ޤަސްތުގައިކަމަށް ސީޑީސީން ބުނެއެވެ.

އެގޮތުން ސީޑީސީގެ އެޕިޑޮމޮލޮޖިސްޓް ޑރ ޑޭވިޑް ބަރނާންޑަސްއާ ޙަވާލާދީ ބީބީސީގައި ރިޕޯޓްކޮށްފައިވާ ގޮތުން އާއިލާގެ އެންމެ ގާތް މީހުން ފިޔަވައި އިތުރު މީހުން ޖަނާޒާ އޮންނަ ތަނަށް ދިއުން މި ދަނޑިވަޅުގައި ބުއްދިވެރިއެއް ނޫނެވެ.

ޚާއްސަކޮށް، އުމުރުން ދުވަސްވީ މީހެއްނަމަ ގިނަ މީހުން އެއްވެ އުޅޭ ތަންތަނަށް ނުދިއުމަށް އެފަރާތްތަކުން ވަނީ އިލްތިމާސްކޮށްފައެވެ.

ވިޔަފާރިތަކަށް ނަގާފައިވާ ލޯނުތަކުގެ ފައިސާނެގުން ހަމަދުވަހަށް މަޑުޖައްސާލުމަށް ލަންކާގެ މާލީ އިދާރާތަކަށާއި ބޭންކުތަކަށް އެގައުމުގެ ރައީސް ގޮތަބަޔަ ރާޖަޕަކްސަ އަމުރުކުރައްވައިފި

ކޮރޯނާވައިރަސް (ކޮވިޑް-19) އިން އަމިއްލަ ގައުމު ދިފާއުކުރުމަށް ލިވަޕޫލްގެ ފޯވާޑް ސަޑިއޯ މާނޭ ދީލަތި އެހީއެއް ދީފިއެވެ.

މާނޭ ވަނީ އަމިއްލަ ގައުމު ކަމަށްވާ ސެނެގާލްގައި މިހާރު ފެތުރެމުންދާ ކޮރޯނާވައިރަސް (ކޮވިޑް-19) އާ ހަނގުރާމަކުރުމަށް އެ ގައުމުން ކަނޑައަޅާފައިވާ ގައުމީ ކޮމިޓީއަށް 45،000 ޔޫރޯ ހަދިޔާކޮށްފައެވެ. އޭގެ އިތުރަށް އޭނާ ވަނީ ސޯޝަލް މީޑިއާގައި އާންމުކުރި ވީޑިއޯއަކުން އެ ގައުމުގެ ރައްޔިތުންނަށް ހިތްވަރުދީ ހާއްސަ މެސެޖެއްވެސ ދީފައެވެ. އެގޮތުން މިދިޔަ އަހަރު އެފްރިކާގެ އެންމެ މޮޅު ކުޅުންތެރިޔާގެ މަގާމު ހޯދި މާނޭ ބުނީ މި ހާލަތުން އަރައިގަތުމަށް ހުރިހާ އެންމެން އެކުވެ މަސައްކަތް ކުރަން ޖެހޭ ކަމަށެވެ. އަދި މި ވައިރަހުން ސަލާމަތްވުމަށް އިދާރާތަކުން ދޭ އިރުޝާދާއި އެއްގޮތައް އަމަލުކުރުމަށް އޭނާ ވަނީ ނަސޭހަތްތެރި ވެފައެވެ.

ކޯވިޑް-19 އިން ރައްކައުތެރިވުމުގެ ގޮތުން އަޅާ ފިޔަވަޅެއްގެ ގޮތުން މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީލްގެ) މުވައްޒަފުންގެ ތެރެއިން އުމުރުން ދުވަސްވީ މީހުނަށް، މުސާރަ އާއި އިނާޔަތްތައް ލިބޭގޮތަށް ޗުއްޓީއެއް ދިނުމަށް ނިންމައިފިއެވެ.

އެމްއޭސީއެލް އިން ބުނީ އެކުންފުނީގެ މުވައްޒިފުންގެ ތެރެއިން އުމުރުން 55 އަހަރުން މަތީގެ މުވައްޒަފުންނާއި، ރޯގާގެ އަލާމާތްތައް ފެނިފައިވާ މުވައްޒަފުންނަށް މުސާރަ އާއި އިނާޔަތްތައް ލިބޭގޮތަށް ޗުއްޓީއެއް ދިނުމަށް ނިންމާފައިވާކަމަށެވެ.

ކޮވިޑް-19 އަށް ޕޮޒިޓިވްވެ، ހޮސްޕިޓަލުގައި ފަރުވާދެމުންދިޔަ މީހަކު އިންޑިއާ އިން މަރުވެއްޖެ އެވެ. މިއާއެކު މި ބަލީގައި އިންޑިއާއިން މަރުވި މީހުންގެ އަދަދު ވަނީ 3 އަށް އަރާފަ އެވެ.

މުމްބާއީ ހޮސްޕިޓަލެއްގައި ފަރުވާދެމުންގެންދިޔަ މި މީހާއަކީ، 64 އަހަރުގެ ފިރިހެނެއްކަމަށް އެ ޤައުމުގެ މީޑިއާތަކުން ރިޕޯޓްކުރެ އެވެ.

އެއްވެސް ފަރާތެއްގެ ޒާތީ މައުލޫމާތު ހާމަކުރުމަކީ ވަރަށް ބޮޑު ކުށެއް ކަމަށް ޑރ.ނަޒްލާ ރަފީގް ވިދާޅުވެއްޖެއެވެ.

މިރޭގެ ނޫސްވެރިންގެ ބައްދަލުވުމުގައި ޑރ ވިދާޅުވީ އެއްވެސް ޒާތީ ސިއްހީ މައުލޫމާތުތައް ހާމަވާ ލިޔުންތަކެއް ސޯޝަލް މީޑިއާގައި ދައުރުވަމުން ކަން ފާހަގަކުރެވުނު ކަމަށެވެ. އަދި އެފަދަ މައުލޫމާތެއް ލިބުނު ނަމަވެސް އިތުރަށް 'ފޯރވަރޑް' ނުކުރުމަށް އިލްތިމާސްކުރެއްވިއެވެ.

ކޮވިޑް-19 އަށް ޝައްކުކުރެވޭ ދިވެހި ފިރިހެނެއް ގޭގައި މަޑުކުރުމަށް އަންގާފައިވަނިކޮށް އެކަމަށް އެއްބާރުލުން ނުދީ އަންގާފައިވާގޮތަށް އަމަލުކޮށްފައިނުވާ މައްސަލައާއި ގުޅިގެން މައުލޫމާތު ދެއްވަމުން މަބްރޫކް ވިދާޅުވީ އެމީހާއަކީ މީގެ ދެ ދުވަސް ކުރިން ސައުތުކޮރެއާއިން އައި މީހެއް ކަމަށެވެ. މަބްރޫކް ވިދާޅުވީ އެމީހާގެ ގައިން ބަލީގެ އަލާމާތްތަކެއް ހުރިކަމަށް ރިޕޯޓު ކުރެވުނީ ހޯމަ ދުވަހުކަމަށެވެ. އަދި ޓީމެއް ދަންދެން ހޯމް އައިސޮލޭޝަންގައި މަޑުކުރުމަށް އެންގުނު ކަމަށެވެ. އަދި އޭނާ ފަރުކޮޅު ފުއްޓަށް ގެންދިއުމުގެ މަސައްކަތް ކުރުމަށް އެންގުނު ކަމަށެވެ. އަދި އޭނާ ބަލާ ދިޔައިރު ގުޅޭނެ ގޮތެއް ނުވި ކަމަށާއި އޭނާގެ ގެ ހުރީ ތަޅުލާފައިކަމަށެވެ. އަދި ޓީމުން ކުރި މަސައްކަތުން އާއިލާގެ މީހަކަށް ގުޅުނު ކަމަށާއި އޭނާ ގޭގައި އެވަގުތު ނެތް ކަމަށް އާއިލާއިން ވާހަކަދެއްކި މީހާ މައުލޫމާތު ދިން ކަމަށެވެ. މިކަމާއި ގުޅިގެން އެޗްޕީއޭ އިން ފުލުހުންނަށް ރިޕޯޓު ކުރި ކަމަށް މަބްރޫކް ވިދާޅުވިއެވެ. މަބްރޫކް ވިދާޅުވި މިކަމާއި ގުޅިގެން ވަރަށް 'އެކްސްޓެންސިވް' ކޮންޓެކްޓް ޓްރޭސިންގެ މަސައްކަތްތައް ކުރެވެމުންދާކަމަށެވެ.

އެމީހާ މިހާރު ވަނީ ފަރުކޮޅުފުއްޓަށް ގެންދެވިފައި.

ކޮވިޑް-19ގެ ކިރިޔާ އަލާމާތެއް ހުރި ނަމަވެސް ޓެސްޓު ކުރެވޭނެ ކަމަށް މަބްރޫކް ވިދާޅުވިއެވެ. މަބްރޫކް ވިދާޅުވީ މިހާރު ކޮވިޑް-19 އިން އަރައިގަތުމުގެ ގޮތުން އަޅާފައިވާ ފިޔަވަޅުތައް ވަނީ ހަރުދަނާ ކުރެވިފައި ކަމަށެވެ. އެގޮތުން ސަރވެރިލެންސް ސާމްޕްލިންގް އާއި ކިރިޔާ އަލާމާތެއް ހުރި ނަމަވެސް ޓެސްޓު ކުރެވޭނެ ކަމަށެވެ.

މިގޮތަށް ބަލީގެ އަލާމާތްތައް ހުރެގެން ޓެސްޓުކުރުމުގެ މަސައްކަތް ކުރެވެމުންދާ ކޭސްތައް:

ކޮވިޑް-19 އާއި ގުޅިގެން ސަރުކާރުން އެކުލަވާލާފައިވާ ޓާސްކްފޯސްގެ ތަރުޖަމާން މަބްރޫކް އަޒީޒް ވިދާޅުވީ ބަންގްލަދޭޝް ފިޔަވާ ޓްރެވެލް ރެސްޓްރިކްޝަންތައް ނެރެފައިވާ ގައުމުތަކުން ފާއިތުވި 14 ދުވަހު މަޑުކުރުމަށްފަހު ރާއްޖެ ދަތުރުކުރާ ދިވެހިން ހޯމް ކަރަންޓީނުގެ ބަދަލުގައި ކަރަންޓީނު ފެސިލިޓީއަކަށް ފޮނުވޭނެ ކަމަށެވެ. އަދި ބައްޔަށް ޝައްކުކުރެވޭ އަލާމާތެއް ހުރި ނަމަ އައިސޮލޭޝަން ފެސިލިޓީއަކަށް ފޮނުވޭނެ ކަމަށެވެ.

ޓްރެވެލް ރެސްޓްރިކްޝަންސް ނެރެފައިވާ ގައުމުތަކަކީ:

ރައްޔިތުންނަށް ކޮންމެހެން ދޭންޖެހޭ ހިދުމަތްތައް މެދުނުކެނޑި ދިނުމަށް ބޭނުންވާ އެންމެ މަދު އަދަދެއްގެ މުވައްޒަފުން މަސައްކަތަށް ނެރެގެން ހިދުމަތްދެވޭނެގޮތަށް ސަރުކާރުން ނިންމުމާ ގުޅިގެން، މާރިޗް 18 ވަނަ ދުވަހުން ފެށިގެން ތިރީގައި ބަޔާންކޮށްފައިވާގޮތަށް ކަސްޓަމްސްގެ މަސައްކަތު ގަޑިތަކަށް ބަދަލު ގެނެސްފައިވާކަމަށް ކަސްޓަމުން ބުނެފި އެވެ

އެއަރކާގޯ ޑޮކިއުމެންޓޭޝަން އަދި އެއަރކާގޯ އެގްޒަމިނޭޝަން:

ހެނދުނު 06:00 ން މެންދަމު 01:30 ށް

ހަފްތާގެ ހުރިހާ ދުވަހަކު

ސީކާގޯ ޑޮކިއުމެންޓޭޝަން އަދި ސީކާގޯ އެގްޒަމިނޭޝަން:

ހެނދުނު 08:00 ން ރޭގަނޑު 20:00 ށް

ހުކުރު ދުވަސް ބަންދު

ހުޅުމާލެ ސީކާގޯ އެގްޒަމިނޭޝަން:

ހެނދުނު 08:00 ން ރޭގަނޑު 20:00 ށް

ހުކުރު ދުވަސް ބަންދު

ދިވެހިރާއްޖޭގައި ކޮވިޑް-19 ފެތުރުން ކޮންޓްރޯލްކުރުމަށް ދިވެހި ސަރުކާރުން ކުރާ މަސައްކަތްތަކަށް އިތުރު އެހީ އެއްގެ ގޮތުންނާއި މަސައްކަތުގެ މާހައުލުގައި މި މިނިސްޓްރީގެ މުވައްޒަފުންގެ ސަލާމަތާއި ރައްކާތެރިކަން ކަށަވަރު ކުރުމަށް އަޅާ ފިޔަވަޅުތަކުގެ ތެރެއިން 18 މާރިޗް ވާ ބުދަ ދުވަހުން ފެށިގެން މިނިސްޓްރީގެ ކައުންޓަރަށް ހުށަހަޅަން ޖެހޭ ލިޔުންތައް އީމެއިލުން ހުށަހެޅުމަށް ހަޔަރ އެޑިޔުކޭޝަން މިނިސްޓްރީން އެދެފި އެވެ.

އެގޮތުން އީމެއިލް ކުރާނީ މިނިސްޓްރީގެ އީމެއިލް އެޑްރެސް admin@mohe.gov.mv އަށް ކަމަށް އެމިނިސްޓްރީން ބުނެއެވެ.

ދުނިޔޭގައި ހަލުވި ކަމާއިއެކު މިހާރު ފެތުރެމުންދާ ކޮވިޑް-19 އިން ރައްކާތެރި ވުމުގެ ގޮތުން 18 މާރިޗް ވާ ބުދަ ދުވަހުން ފެށިގެން، މިނިސްޓްރީގެ ރިސެޕްޝަނުން ސިޓީއާއި، ބިލް ފަދަ ތަކެތި ބަލައިގަތުން ހުއްޓާލެވޭނެ ކަމަށް އެޑިޔުކޭޝަން މިނިސްޓްރީން ބުނެފި އެވެ.

އެގޮތުން ޖެމްސް ބޭނުން ނުކުރާ އިދާރާތަކާއި އާންމު ފަރާތްތަކުން މި މިނިސްޓްރީއަށް ފޮނުވާ ލިޔެކިއުންތަކާއި ކާޑު ފަދަ ތަކެތި ބަލައި ގަންނާނީ މިނިސްޓްރީގެadmin@moe.gov.mvމެއިލް މެދުވެރިކޮށް ކަމުގައި މިނިސްޓްރީން ބުނެއެވެ. އަދި މިނިސްޓްރީއިން އެއްވެސް މައުލޫމާތެއް ސާފު ކުރައްވަން ބޭނުންފުޅުވާނަމަ މި މިނިސްޓްރީގެ އޮޕަރޭޓަރ ނަންބަރު3323262އަށް ގުޅުމަށް މިނިސްޓްރީން އެދެއެވެ.

ރާއްޖޭގައި އިޢުލާން ކޮށްފައިވާ އާންމު ސިއްޙަތުގެ ކުއްލި ނުރައްކަލުގެ ހާލަތު އުވާލަންދެން މިނިސްޓްރީއަށް ތަކެތި ބަލައި ގަންނާނީ އީމެއިލް މެދުވެރިކޮށް ކަމަށް މިނިސްޓްރީން ބުނެއެވެ. އަދި މިއީ މިނިސްޓްރީގެ މުވައްޒަފުންނާއި އާންމު ރައްޔިތުންގެ ރައްކާތެރި ކަމަށްޓަކައި އެޅި ފިޔަވަޅެއްކަމަށް މިނިސްޓްރީން ބުނެއެވެ.

ޓްރީ ޓޮޕް ހޮސްޕިޓަލުން ފްލޫ ކްލިނިކެއް ތަޢާރަފްކޮށްފިއެވެ.

ޓްރީ ޓޮޕުން ވަނީ ކޮވިޑް-19 އާއި ގުޅިގެން ޓްރީ ޓޮޕް ހޮސްޕިޓަލަށް ޒިޔާރަތް ކުރާ ހުރިހާ ފަރާތަކަށް ސްކްރީނިންގް ޕޮލިސީއެއްވެސް ފަށައިފައެވެ. އަދި މި ސްކްރީނިންގައި ހުން ހުންނަ ނުވަތަ ރޯގާގެ އަލާމާތްތައް ހުންނަ ފަރާތްތަށް ޑޮކްޓަރަށް ދެއްކުމަށް ފްލޫ ކްލިނިކަށް ވަކިން ޙާއްސަ ކުރެވިފައިވާ ސަރަހައްދަކަށް ވަކި ދޮރަކުން ގެންގޮސްދެވޭނެ ކަމަށެވެ. މި ބަދަލުގެ ސަބަބުން ބަލިމީހުންގެ ސަލާމަތާއި ރައްކާތެރިކަން އިތުރަށް ވަރުގަދަކޮށް ބަލިފެތުރުމުގެ ފުރުސަތު ކުޑަ ކުރެވޭނެ ކަމަށް ޓްރީޓޮޕުން ބުންޏެވެ.

ޓްރީޓޮޕުން ބުނީ ފްލޫ ކްލިނިކުން ބަލި މީހުންގެ އަލާމާތްތަށް އިތުރަށް ތަޙްލީލްކޮށް އެކަށީގެންވާ ފަރުވާ ދެވޭނެކަމަށެވެ. އެގޮތުން އާންމު ފްލޫތަކުގެ ވެކްސިނޭށަން ބޭނުންވާ ފަރާތްތަކަށް ވެކްސިން ރިކޮމެންޑް ކުރެވޭނެކަމަށެވެ. އަދި ފްލޫ ވެކްސިނޭށަން އަކީ ދާއިމަށް ފަރުވާ ބޭނުންވާ ބަލި މީހުންނަށާއި ހުރިހާ އުމުރު ފުރައެއްގެ މީހުންވެސް ރޯގާޖެހިގެން ބަލިވުމުން ދުރުކޮށްދިނުމަށް އެހީވެދޭ ވެކްސިންއެއް ކަމަށް ވެސް ފްލޫ ކްލިނިކުން ބެލުމަށް ފަހު ބަލިމީހާ އިމަޖެންސީއަށް ނުވަތަ ފަރުވާއާއި ގުޅޭ ޑިޕާޓްމަންޓަކަށް ގެންގޮސްދެވޭނެ ކަމަށް ވެސް އެ ހޮސްޕިޓަލުން ބުންޏެވެ.

ޓްރީ ޓޮޕް އިން ބުނީ ފްލޫ ކްލިނިކް ހުޅުވިފައި ހުންނާނީ ހުކުރު ދުވަސް ފިޔަވައި ހުރިހާ ދުވަހަކު ހެނދުނު 0900 އިން ހަވީރު 1830 އަށް ކަމަށެވެ. އަދި ކަމާ ގުޅޭ ގޮތުން އިތުރު މަޢުލޫމާތު ހޯދުމަށް 3351610 އަށް ގުޅުމަށް ވެސް އިލްތިމާސްކޮށްފައިވެއެވެ.

ދިވެހިރާއްޖޭގެ ހުރިހާ ސަރަހައްދެއްގައި ޢާންމު ޞިއްހަތުގެ ކުއްލި ނުރައްކަލުގެ ޙާލަތު އިޢުލާނުކުރުމާ ގުޅިގެން، ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު 2020 އާ ގުޅޭ ޝަކުވާ އަންގާރަ ދުވަހުން ފެށިގެން ބަލައިގަތުމަށް ހަމަޖެހިފައިވަނީ އީމެއިލްގެ ޒަރީޢާއިން ކަމުގައި އިލެކްޝަންސް ކޮމިޝަން (އީސީ) ން ބުނެފި އެވެ.

އެގޮތުން އިންތިޚާބާ ގުޅިގެން ޝަކުވާ ހުށަހަޅަން ބޭނުންވާ ފަރާތްތަކުން ޝަކުވާ ހުށަހަޅާނީ ކޮމިޝަންގެ ރަސްމީ އީމެއިލް އެޑްރެސް ކަމަށްވާ،info@elections.gov.mvއަށް ކަމަށް އީސީން ބުނެއެވެ.

ކޮވިޑް-19 ގެ ބަލިމަޑުކަމާއި ގުޅިގެން 18 މާރިޗު ވާ ބުދަ ދުވަހުން ފެށިގެން ޓްރާންސްޕޯޓު އޮތޯރިޓީން ދެމުން ގެންދާ ޚިދުމަތްތަށް ދިނުން މެދުކަނޑާލާނެ ކަމަށް އެއޮތޯރިޓީން ބުނެފި އެވެ. ނަމަވެސް ޕޯޓް ޑިއުސް، ލައިޓް ޑިއުސް އަދި އެންކަރޭޖް ފީ ބަލައިގަތުމުގެ ޚިދުމަތް ފޯރުކޮށް ދެވޭނެކަމަށް އެއޮތޯރިޓީން ބުނެއެވެ.

ކޮވިޑް-19 އަށް ޝައްކުކުރެވޭ ދިވެހި ފިރިހެނަކު ބަލަންޖެހޭ ކަންކަން ބަލައި ޓެސްޓް ކުރުމަށްޓަކައި ފަރުކޮޅުފުއްޓަށް އައިސޮލޭޝަން ފެސިލިޓީއަށް ގެންދިޔުމަށް ގޭގައި މަޑުކުރުމަށް އަންގާފައިވަނިކޮށް އެކަމަށް އެއްބާރުލުންނުދިން އަންގާފައިވާ ގޮތަށް އަމަލުކޮށްފައިނުވާތީ އޭނާގެ މައްސަލަ ފުލުހުންނަށް ހުށަހަޅާފައިވާކަމަށް ފުލުހުން ބުނެފި އެވެ. ފުލުހުން ބުނީ ފުލުހުން ވިލިމާލެ އަށް ގޮސް އެމީހާ ފުލުހުންގެ ބެލުމުގެ ދަށަށް ގެނެސް އެޗްޕީއޭ އަށް މެންދުރު ގެ ވަގުތެއްގައި ހަވާލުކޮށްފައިވާ ކަމަށެވެ. އަދި މިމައްސަލަ ފުލުހުން ތަހުގީގުކުރަމުންދާ ކަމަށް ފުލުހުން ބުނެއެވެ.