ކޮވިޑް-19: އެންމެ ފަހުގެ

ރަޝިޔާގައި ކިޔަވަމުންދާ 3 ކުއްޖަކު ރާއްޖެއިން ދަތުރުކޮށްފައިވާކަމަށާއި މިކުދިންގެ ފަރާތުން ބަލީގެ އަލާމާތް ފެންނާތީ ރަޝިޔާގެ ކަމާބެހޭ ފަރާތްތަކުން ވަނީ އެމީހުން އިތުރު 5 ދުވަހަށް ކަރަންޓީނުކޮށްފައިކަމަށް ކޮވިޑް-19 ގެ ތަރުޖަމާނު މަބްރޫކް ވިދާޅުވި އެވެ.

އެކުދިންގެ ހާލު ރަނގަޅުކަމަށާއި ފޮރިން މިނިސްޓްރީ އާއި ޖަރމަނުގައި ހުންނަ އެމްބަސީން މިކުދިންގެ ހާލު އަންނަނީ ބަލަމުންކަމަށް މަބްރޫކް ވިދާޅުވި އެވެ.

މޮނިޓަރިންގެ ހާލަތުގައި މިވަގުތު އޮތީ ދެ ރަށެއް. އެއީ ޝެވަލް ބްލޭންކް އާއި ޕެރަޑައިސް އައިލެންޑް ރިސޯޓް.

ޝެވަލް ބްލޭންކް މޮނިޓަރ ކުރަމުންދަނީ ބިދޭސީއެއްގެ ގައިން ބަލީގެ އަލާމާތެއް ފެނުމުން ، ޕެރަޑައިސް އައިލެންޑް ރިސޯޓް މޮނިޓަރ ކުރަމުންދަނީ 8 ދިވެހިންނާއި 2 ބިދޭސީން ބަލީގެ އަލާމާތްތައް ހުރިކަމަށް ބެލެވޭތީ

17 ވަނަ ދުވަހު ބަންގްލަދޭޝްގައި ތިބި 5 ދިވެއްސަކު ކުއާލަލަންޕޫރް މަގުން ރާއްޖެ އައިސްފައިވޭ. މިމީހުންނަށް ވަނީ ހޯމް އައިސޮލޭޝަންގައި ތިބުމަށް އެންގިފައި

9 މީހެއް މެލޭޝިޔާ މަގުން ރާއްޖެ އައިސްފައިވާތީ އެޗްއައިއެޗް ކަރަންޓީނު ފެސިލިޓީގައި ވަނީ ބޭތިއްބިފައި

18 ވަނަ ދުވަހު ސްޕެއިން އިން އައި ފަރާތެއް ވެލިދު އަށް ގެންގޮސްފައިވޭ އަލާމާތްތައް ފެންނާތީ

ކުއާލަލަންޕޫރުން ރާއްޖެއައި 30 މީހުން ވަނީ ފަން އައިލެންޑްގައި ކަރަންޓީނުކޮށްފައި

މެލޭޝިޔާއިން ސްރީލަންކާ މަގުން ރާއްޖެ އައި 12 މީހެއް ވަނީ ފަންއައިލެންޑްގައި

އިނގިރޭސިވިލާތުން އައި 2 މީހެއްގެ ގައިން ބަލީގެ އަލާމާތްތައް ފެންނާތީ ވަނީ ވެލިދޫ އައިސޮލޭޝަންގައި

19 ވަނަ ދުވަހު 5 މީހެއް އިނގިރޭސިވިލާތުން އައިސް އެޗްއައިއެޗްގެ ކަރަންޓީނު ފެސިލިޓީގައި ބޭތިއްބިފައިވޭ. އަދި މެލޭޝިޔާ މަގުން އައި 10 މީހަކުވެސް ވަނީ ކަރަންޓީނު ފެސިލިޓީގައި ބޭއްވިފައި

ރިއު ހޮޓެލް ސ.ހިތަދޫ ، ހިންނަވަރު، ފައިނު ، އުކުޅަސް ، މާލެއިން ނެގުނު ސާމްޕަލް އަދި ވިލިމާލެއިން ނެގުނު ސާމްޕަލް ތަކުގެ ނަތީޖާ ނެގެޓިވް

ވިލިވަރުގައި 25 މީހެއް

އެޗްއައިއެޗް ގައި 75 މީހެއް

ފަރުކޮޅުފުށީގައި މީހަކު ނެތް

ޑީއެޗް 11 ގައި އެޑްމިޓްކޮށްފައި 2 މީހެއް

ވެލިދޫ އައިސޮލޭޝަންގައި 16 މީހެއް

ފަން އައިލެންޑްގައި ކަރަންޓީނުކޮށްފައި 51 މީހެއް

517 ސާމްޕަލް

13 ޕޮޒިޓިވް

502 ނެގެޓިވް

15 ނަތީޖާ ނުލިބޭ

ކޮވިޑް-19 ފެތުރޭތީ ލޮކްޑައުންކޮށްފައި އޮތް އިޓަލީގެ ލޮކްޑައުންގެ މުއްދަތު އިތުރުކުރުމަށް ނިންމާފައިވާކަމަށް އެގައުމުގެ ބޮޑު ވަޒީރު ވިދާޅުވެއްޖެ އެވެ. ކުރިން އޮތީ މިމަހުގެ 25 ވަނަ ދުވަހާ ހަމައަށް ފިހާރަތަށް ބަންދުކުރުމަށް އަދި އޭޕްރީލް މަހުގެ 3 ވަނަ ދުވަހާ ހަމައަށް ކޮންމެހެން ބޭރަށް ނިކުންނަންޖެހިގެން ނޫނީ ބޭރަށް ނުނިކުމެވޭގޮތަށެވެ. ނަމަވެސް އިޓަލީގައި އަދިވެސް ހަލުވި މިނުގައި ވައިރަސް ފެތުރެމުންދާތީ ލޮކްޑައުންގެ މުއްދަތު ވަނީ އިތުރުކޮށްފަ އެވެ. އެގޮތުން ޔުނުވަރސިޓީތަކާއި ސްކޫލްތައް ބަންދުކޮށްފައި އޮތްއޮތުން ދިގުދައްމަން ޖެހޭނެކަމަށް އެގައުމުގެ ބޮޑު ވަޒީރު ވަނީ ވިދާޅުވެފަ އެވެ. އިޓަލީގައި އިއްޔެ އެކަނިވެސް މަރުވި މީހުންގެ އަދަދު 400 ށް ވުރެ މައްޗެވެ.

ކުރިޔަށް އޮތް ދެ ހަފްތާތެރޭގައި ގަލްފް ގައުމުތަކުގައި މަސައްކަތްކުރަމުންދާ އިންޑިޔާގެ 26،000 މީހުން އެގައުމަށް އެނބުރި އަންނާނެކަމަށް އިންޑިޔާއިން ހާމަކޮށްފި އެވެ.

ދުވާލަކު 20 ށް ވުރެ ގިނަ ފްލައިޓް ގަލްފު ގައުމުތަށްކަމަށްވާ ޔުނައިޓެޑް އެރަބް އެމިރޭޓްސް، ކުވައިތު އަދި ގަތަރު ފަދަ ގައުމުތަކުން އިންޑިޔާއަށް އާދެއެވެ. ބުދަ ދުވަހު އިންޑިޔާގެ ހޯމް އެފެއަރޒުން އަންގާފައިވަނީ ގަލްފުގެ ގައުމުތަކުން އަންނަ އެގައުމުތަކުގައި ޓްރާންސިޓްކޮށްފައި އަންނަ ކޮންމެ މީހަކު 14 ދުވަސްވަންދެން ކަރަންޓީނުގައި އެމީހެއްގެ ގޭގައި ނުވަތަ ސަރުކާރުން ދައްކާތަނެއްގައި ތިބެންޖެހޭނެކަމަށެވެ.

އިންޑިޔާއަށް އެނބުރި އަންނަ ގިނަ މީހުންނަކީ އެކިއެކި މަޝްރޫޢުތަކުގައި ގަލްފްގެ ގައުމުތަކުގައި މަސައްކަތްކުރަމުންދާ މީހުންނެވެ. އަނބުރާ އަންނަ ފަރާތްތަކުގެ ތެރެއިން ބަލީގެ އަލާމާތެއް ނުފެންނަ މީހެއްނަމަ ގޭގައި ސެލްފް އައިސޮލޭޝަންގައި ތިބެންޖެހޭނެ އެވެ. މުމްބާއީ ނޫން އެހެން ސަރަހައްދެއް ނަމަ އެމީހަކު ދިރިއުޅޭ ހިސާބަކަށް ދިޔުމަށް އާންމު ދަތުރުފަތުރުގެ އެއްވެސް ނިޒާމެއްގެ ބޭނުމެއް ކޮށްގެންނުވާނެކަމަށް އިންޑިޔާއިން ވަނީ އަންގާފަ އެވެ.

އަންނަ ފަރާތްތަކުގެ ތެރެއިން ބަލީގެ އަލާމާތް ފެންނަނަމަ އެމީހަކު ސަރުކާރުން ހަމަޖައްސާފައިވާ ކަރަންޓީނު ފެސިލިޓީއެއްގައި ހުންނަންޖެހޭނެކަމަށް މުނިސިޕަލް ގަވަރމަންޓް އޮފީހުން ވަނީ ބުނެފަ އެވެ. ސަރުކާރުގެ ކަރަންޓީނު ފެސިލިޓީތަކުގައި 700 މީހުންގެ ޖާގަ ހުރެއެވެ. މުމްބާއީން މިހާތަނަށް އާއިރު މިވައިރަސް ޖެހިފައިވާ 45 މީހުން ވަނީ ފެނިފަ އެވެ. އަދި މުޅި އިންޑިޔާއިން މިހާތަނަށް 174 މީހުންނަށް ވައިރަސް ޖެހިފައިވާއިރު 3 މީހަކު ވަނީ މަރުވެފަ އެވެ.

ފީފާ ކްލަބު ވޯލްޑް ކަޕް ފަސްކުރަން ފީފާއިން ނިންމައިފި އެވެ.

އަންނަ އަހަރު ޔޫރޯ އާއި ކޮޕަ އެމެރިކާ ކުރިއަށްދާނެތީ، ބުދަ ދުވަހު ޓެލެކޮންފަރެންސް މެދުވެރިކޮށް ބޭއްވި ފީފާ ކައުންސިލް ބައްދަލުވުމުގައި ވަނީ ކްލަބު ވޯލްޑް ކަޕް ފަސްކުރަން ނިންމާފައެވެ. ދެން ކްލަބު ވޯލްޑް ކަޕް ބާއްވާނެ ތާރީޚެއް ފަހުން ކަނޑައެޅުމަށްވެސް ވަނީ ނިންމާފައެވެ.

ކޮވިޑް-19 ޖެހިގެން ފުރަތަމަ މީހާ ރަޝިޔާއިން މަރުވެފައިވާކަމަށް އެގައުމުން ބުނެފި އެވެ. މަރުވެފައިވަނީ 79 އަހަރުގެ އަންހެނެއްކަމަށާއި އެމީހާ ހޮސްޕިޓަލްގައި އެޑްމިޓްކޮށްފައިވަނީ މަރޗްމަހުގެ 13 ވަނަ ދުވަހު ކަމަށް ރަޝިޔާއިން ބުނެއެވެ. ރަޝިޔާގައި މިހާތަނަށް 147 މީހަކަށް މިވައިރަސް ޖެހިފައިވެ އެވެ.

ކޮވިޑް-19 އާއި ގުޅިގެން ސިއްޙީ ކުއްލިނުރައްކަލުގެ ޙާލަތު އިޢުލާންކޮށްފައިވުމާއި ގުޅިގެން، ޙާލަތު ރަނގަޅުވަންދެން، ފެމިލީ ކޯޓުން ޚިދުމަތް ހޯދާ ފަރާތްތަކާއި ކޯޓުގެ މުވައްޒަފުންގެ ރައްކާތެރިކަމަށްޓަކައި ކޯޓުން ބޭރުގައާއި ނުރަސްމީގަޑީގައި ކުރާ ކާވެނިތައް ކޮށްދިނުމުގެ ޚިދުމަތް ވަގުތީ ގޮތުން މެދުކަނޑާލުމަށް ނިންމާފައިވާކަމަށް އެކޯޓުން ބުނެފި އެވެ.

ކޮވިޑް-19 މިހާތަނަށް އާއިރު ސްރީލަންކާގެ 53 މީހެއްގެ ގައިން ފެނިފައިވާކަމަށް އެގައުމުން ބުނެފި އެވެ. މީގެތެރޭގައި ޖެނުއަރީ މަހު އެގައުމުގައި ތިއްބާ ވައިރަސްގެ އަސަރު ފެނުނު ޗައިނާގެ ޓޫރިސްޓުންވެސް ހިމެނެއެވެ.

މިވަގުތު ސްރީލަންކާގެ ހޮސްޕިޓަލްތަކުގައި އޮބްޒަރވޭޝަން ގައި 243 މީހުން ތިބިކަމަށް އެގައުމުގެ ސަރުކާރުން ބުނެއެވެ. އިއްޔެގައި އޮބްޒަރވޭޝަންގައި ތިބީ 212 މީހުންނެވެ. އޮބްޒަރވޭޝަންގައި ތިބި ގިނަ މީހުންގެ ގައިން ވައިރަސްގެ އަސަރު ނުފެންނާތީ ދޫކޮށްލަމުންދާކަމަށްވެސް އެގައުމުން ބުނެއެވެ. މިހާތަނަށް އާއިރު އެގައުމުން ވައިރަސް ފެނުނު އެންމެންވެސް ތިބީ އެކަމަށް ޚާއްސަކޮށް ކޮލަމްބޯގައި ހުންނަ ހޮސްޕިޓަލްގަ އެވެ. ސްރީލަންކާއިންވަނީ ހޯމަ ދުވަހުން ފެށިގެން ޗުއްޓީ ދުވަސްތަކެއްގެ ގޮތުގައި ހަމަޖައްސާފަ އެވެ. އެއީ ވައިރަސް ފެތުރުން ކޮންޓްރޯލްކުރުމަށް އާންމުން ގޭގައި ބޭތިއްބުމުގެ ގޮތުންނެވެ. ބުދަ ދުވަހު އެގައުމުން ވަނީ ހަލުވި މިނުގައި ވައިރަސް ފެތުރޭ ހިސާބުތަކުގައި ކާފިއު އިއުލާންކޮށްފަ އެވެ. އަދި މަސާޖް ޕާލާރތަކާއި ކަސީނޯ ތަކާއި ނައިޓް ކްލަބްތައް ވަނީ ބަންދުކޮށްފަ އެވެ.

އިނގިރޭސިވިލާތުގައި ކޮވިޑް-19 ފެތުރެމުންދާތީ އެކަން ކޮންޓްރޯލް ކުރުމުގެ ގޮތުން ސްކޫލްތައް ބަންދުކުރާނެކަމަށް އެގައުމުގެ ސަރުކާރުން ބުނެފި އެވެ.

ކޮވިޑް-19 ހަލުވިކަމާއެކު އިނގިރޭސިވިލާތުގައި ފެތުރެމުންދާތީ އެގައުމުގެ މީހުން އަންނަނީ ސުޕަރމާކެޓްތަކުން ގިނަ އަދަދެއްގެ އެއްޗެހި ގަންނަމުންނެވެ. އެއާއެކު ޕައުންޑުގެ ވެލިޔު ވަނީ ފާއިތުވި ތިރީސް އަހަރު ދަށަށްނުދާ މިންވަރަށް ދަށަށްގޮސްފަ އެވެ.

އިނގިރޭސިވިލާތުގައި ކޮވިޑް-19 ފެތުރޭ މިންވަރާ އަޅާބަލާއިރު ފެތުރުން ކޮންޓްރޯލް ކުރުމަށްޓަކައި އަަޅާ ފިޔަވަޅުތަކުގެ ސްޕީޑް ލަސްކަމަށް ބުނެ އެގައުމުގެ ގިނަ ރައްޔިތުންގެ ފާޑުކިޔުންތައް ވަނީ ބޮޑުވަޒީރު ބޮރިސް ޖޯންސަންގެ ސަރުކާރަށް އަމާޒުވެފަ އެވެ. ވަކިން ޚާއްސަކޮށް ޔޫރަޕްގެ އެހެން ގައުމުތައް ކަމަށްވާ ސްޕެއިން، އިޓަލީ އަދި ފްރާންސް ފަދަ ގައުމުތަކުން މުހިންމު ފިޔަވަޅުތަކެއް އަޅާފައިވާއިރު އިނގިރޭސިވިލާތުގެ ސަރުކާރުން އެފަދަ އެއްވެސް ފިޔަވަޅެއް އަޅާފައިނުވާތީ ވަނީ ފާޑުކިޔުންތައް އަމާޒުވެފަ އެވެ.

ކޮވިޑް-19 ޖެހިފައިވާ ފުރަތަމަ މީހާ ފިޖީން ފެނިފައިވާކަމަށް އެގައުމުގެ ބޮޑުވަޒީރު ވިދާޅުވެއްޖެ އެވެ. މިއާއެކު ޕެސިފިކް އައިލެންޑް ނޭޝަންގައި ވަނީ ކަންބޮޑުވުންތައް އިތުރުވެފަ އެވެ. ފިޖީން ވައިރަސް ޖެހިފައިވާ މީހަކު ފެނިފައިވާ ކަމަށް ބުނެފައިވާއިރު ޕެސިފިކް އައިލެންޑްގައި ހިމެނޭ ސަމާއޯއިން ބުނެފައިވަނީ އެގައުމުން ވައިރަސް އަށް ޝައްކުކުރެވޭ މީހަކު ފެނިފައިވާކަމަށެވެ. އަދި އެހެން ރަށްތަކުންވެސް ޝައްކުކުރެވިގެން ރިޕޯޓްކޮށްފައިވާކަމަށް ސީއެންއެން އިން ބުނެއެވެ. ކޮވިޑް-19 ފެތުރުން ކޮންޓްރޯލް ކުރުމަށްޓަކައި ޕެސިފިކް އައިލެންޑުންވަނީ ފިޔަވަޅުތަކެއް އަޅާފައެވެ. އެގޮތުން އެސަރަހައްދަށް އެތެރެވާ އެންމެންވެސް މެޑިކަލް ޓެސްޓެއް ހަދާގޮތަށް ވަނީ ހަމަޖައްސާފަ އެވެ. ޕެސިފިކް އައިލެންޑުން މިވައިރަސް ފެނުމާއެކު މިރަށްތަކަށް ވަންނަން އޮންނަ މައި ގޭޓް ނިއު ޒިލެންޑުން އެކަމަށް މިހާރަށް ވުރެ ބޮޑަށް ވިސްނަން ވަނީ ޖެހިފަ އެވެ.

ކޮވިޑް-19 ފެތުރުން ކޮންޓްރޯލް ކުރުމަށްޓަކައި ދުނިޔޭގެ ސިއްހަތު ޖަމިއްޔާ ޑަބްލިޔުއެޗްއޯއިން ވަނީ "ސޭފް ހޭންޑް ޗެލެންޖް" ގެ ނަމުގައި ޗެލެންޖެއް ފަށާފަ އެވެ. ޑަބްލިޔުއެޗްގެ ޑިރެކްޓަރ ޖެނެރަލް ޓެޑްރޯސް ވަނީ އަންގާރަ ދުވަހު އަތްދޮންނަ ގޮތް ކިޔައިދެއްވަމުން މަންޒަރާއެކު ވީޑިއޯކުރައްވާ ޓްވީޓެއްކުރައްވާފަ އެވެ. އެއާއެކު ޓެޑްރޯސްވަނީ ދުނިޔޭގެ އެކި ގައުމުތަކުގައި ތިބި ސެލެބްރިޓީންނަށް ޗެލެންކުރައްވާ އެޗެލެންޖްގައި ބައިވެރިވުމަށް ދައުވަތުދީފަ އެވެ. މީގެތެރެއިން އެއް ސެލްބްރިޓީއަކީ ބޮލީވީޑްގެ މަޝްހޫރު އެކްޓްރެސް އަދި ހޮލީވުޑުންވެސް ފެނިގެންގޮސްފައިވާ ދީޕިކާ ޕަދުކޯން އެވެ. ދީޕިކާ ވަނީ ޓެޑްރޯސްގެ ޗެލެންޖް ގަބޫލުކޮށް އަތްދޮންނަ ވީޑިއޯއެއް ޓްވީޓް ކޮށްފަ އެވެ. އަދި މި ޓްވީޓްގައި ދީޕިކާ ވަނީ ކޮވިޑް-19 އިން ރައްކާތެރިވުމަށް ސާފުތާހިރު ކަމަކީ މުހިންމުކަމެއް ކަމަށާއި މިކަމުން ސަލާމަތްވާނީ އެންމެން ގުޅިގެން މަސައްކަތްކޮށްގެން ކަމަށް ބުނެފަ އެވެ.

އެއާއެކު ދީޕިކާ މިވަނީ ޗެލެންޖްގައި ބައިވެރިވުމަށް ރޮޖަރ ފެޑްރާ، ކްރިސްޓިއާނޯ ރޮނާލްޑޯ އަދި ވިރާތު ކޯލީއަށް ދައުވަތުދީފަ އެވެ. މިޗެލެންޖްގައި އެކިއެކި ސެލެބްރިޓީން އަންނަނީ ބައިވެރިވަމުންނެވެ.

ސައުތުކޮރެއާއިން ކޮވިޑް-19 ފެތުރޭ މިންވަރު މަދުވުމަށްފަހު އަނެއްކާވެސް ވައިރަސް ޖެހޭ މީހުންގެ އަދަދު އިތުރުވާން ފަށައިފި އެވެ. ފާއިތުވި ހަތަރު ދުވަހު ސައުތުކޮރެއާގައި ވައިރަސް ޖެހޭ މީހުންގެ އަދަދު އުޅުނީ 100 ށް ވުރެ ދަށުންނެވެ. ނަމަވެސް އިއްޔެ އެގައުމުން ވަނީ 152 މީހުންނަށް ވައިރަސް ޖެހިގެން ރިޕޯޓްކޮށްފަ އެވެ. އެއާއެކު އެގައުމުން ވައިރަސް ޖެހިފައިވާ މީހުންގެ އަދަދު ވަނީ 8,565 އަށް އަރާފަ އެވެ. އަލަށް ވައިރަސް ފެނުނު މީހުންގެ ތެރެއިން 97 މީހުންނަކީ ޑެއިގޫގެ ނާސިންގ ހޯމް އަކުން ފެނުނު މީހުންނެވެ. އަލަށް ވައިރަސް ބާރު ސްޕީޑެއްގައި ފެތުރެން ފަށާފައިމިވަނީ ޑެއިގޫގެ ނާސިންގ ހޯމްތައް ބަލާ ސްކްރީންކުރުމުގެ ކަންކަން ކުރުމަށް ތައްޔާރުވެފައި ވަނިކޮށެވެ.

ކޮވިޑް-19 ފެތުރުން ކޮންޓްރޯލްކުރުމަށްޓަކައި ތައިލެންޑަށް އެތެރެވާ ހުރިހާ އެންމެންވެސް ހެލްތު ސެޓްފިކެޓް ހުށަހަޅަންޖެހޭގޮތަށް އެގައުމުން ހަމަޖައްސައިފި އެވެ. މިގޮތަށް އަމަލުކުރަން ފަށާފައިވަނީ ބުދަ ދުވަހުގެ ރެއިން ފެށިގެންނެވެ. ތައިލެންޑުން ބުނާގޮތުން އެއަރލައިންތަކުން ދަތުރުކުރާ މީހުން ކުރިން ދަތުރުކޮށްފައި ހުރި ތަންތަން ބަލަންޖެހޭނެކަމަށާއި އޭގެތެރޭގައި މިވައިރަސް ހަލުވިމިނުގައި ފެތުރޭ އެއްވެސް ގައުމަކަށް އެމީހަކު ގޮސްފައިވޭތޯ ޗެކްކުރަންޖެހޭނެ ކަަމަށެވެ. އެއާއެކު 72 ގަޑިއިރު ތެރޭގައި އެމީހަކީ ކޮވިޑް-19 ގެ އަލާމާތެއް ނެތްމީހެއްކަން އަންގާ ހެލްތު ސެޓްފިކެޓް ހުށަހަޅަންޖެހޭނެ ކަމަށެވެ. އަދި އެމީހެއްގެ މެޑިކަލް އިންޝިއުރަންސް އެއްލައްކަ ޑޮލަރާ ހަމައަށް ހުންނަން ޖެހޭނެކަމަށްވެސް ތައިލެންޑުން ވަނީ ބުނެފަ އެވެ.

ކޮވިޑް-19 އެންމެ ފުރަތަމަ ފެނުނު ޗައިނާގެ ވުހާންއިން އިއްޔެ އެއްވެސް މީހަކަށް މިވައިރަސް ޖެހިފައިނުވާކަމަށް ޗައިނާއިން ބުނެފި އެވެ.

ޗައިނާގެ ޑެއިލީ ނިއުސް ޕޭޕަރ އަށް ދިން އިންޓަރވިއުއެއްގައި ޗައިނާގެ ހެލްތު އޮތޯރިޓީގެ ސީނިއަރ އެޑްވައިޒަރ ލީ ލަންޖުއަން ވިދާޅުވީ ވުހާންއިން އެންމެފަހުން ވައިރަސް ޖެހިގެން މީހަކު ރިޕޯޓްކުރި ދުވަހުންފެށިގެން މީހަކަށް ވައިރަސް ނުޖެހި ޖެހިޖެހިގެން 14 ދުވަސް ހޭދަވެއްޖެނަމަ ވުހާން ލޮކްޑައުންކޮށްފައި އޮތްއޮތުން ނިމުމަކަށް ގެންނާނެ ކަމަށެވެ. ވައިރަސް ފެނުނު ވުހާންގައި ހަލުވިކަމާއެކު ވައިރަސް ފެތެރެމުންދިޔުމުން އެކަން ކޮންޓްރޯލްކުރުމަށް ވުހާން ލޮކްޑައުން ކޮށްފައިވަނީ ޖެނުއަރީ މަހުގެ 23 ވަނަ ދުވަހު އެވެ. އަނެއްކޮޅުން މިދިޔަ ޑިސެމްބަރ މަހުގެ ފަހުކޮޅު ޗައިނާއިން ފެނުނު މިވައިރަސް ޗައިނާގެ ތެރޭގެ އެއްވެސް މީހެއްގެ ގައިން ނުފެންނަ ފުރަތަމަ ދުވަހަކީ އިއްޔެ އެވެ.

ޗައިނާގައި ވައިރަސް ފެތުރޭމިންވަރު ކޮންޓްރޯލްކުރެވެމުންދާ ވަރަކަށް މަޑުމަޑުން އަންނަނީ ޗައިނާ ހަމައަކަށްއެޅި އާންމު ދިިރިއުޅުމަކަށް ބަދަލުވަމުންނެވެ. އެގޮތުން ހޫބޭ ޕްރޮވިންސަށް އެހެން ޕްރޮވިންސްތަކުން ނުވަދެވޭގޮތަށް އޮތްއޮތުމަށް މިހާރު ވަނީ ލުއިތަކެއް ދީފައެވެ. އެހެން ޕްރޮވިންސްތަކުން މިހާރު ހޫބޭ ޕްރޮވިންސަށް ވަދެވޭއިރު އަދިވެސް މީހުންނަށް ވަދެވެނީ ޚާއްސަ ސްކްރީންތަކެއް ކުރުމަށްފަހު ބަލީގެ އަލާމާތެއް ނެތްކަން ޔަގީންކުރުމަށްފަހު އެވެ.

ޗައިނާގެ އެތެރެއިން އެއްވެސް މީހެއްގެ ގައިން ވައިރަސްގެ އަސަރު ނުފެނުނުނަމަވެސް ޗައިނާއަށް އެތެރެވާ މީހުންގެ ގައިން އަދިވެސް އަންނަނީ ވައިރަސް ފެންނަމުންނެވެ. އެގޮތުން އިއްޔެ ޗައިނާއަށް އައި މީހުންގެ ތެރެއިން 21 މީހެއްގެ ގައިން ވައިރަސް ފެނިފައިވާއިރު މިމީހުންނަކީ އިނގިރޭސިވިލާތާއި ސްޕެއިންއިން އައި މީހުންނެވެ. ޗައިނާއަށް އެތެރެވާ މީހުންގެ ގައިން ވައިރަސް ފެންނާތީ ބެއިޖިންގ ގައި ހުންނަ އިންޓަރނޭޝަނަލް އެެއަރޕޯޓް ގައި ވަނީ ފިޔަވަޅުތައް ވަރުގަދަކޮށްފަ އެވެ.

ޗައިނާގައި މިހާތަނަށް އާއިރު މިވައިރަސް 80,928 މީހުންނަށް ޖެހިފައިވެ އެވެ. އަދި މިވައިރަސް ޖެހިގެން ޗައިނާއިން 3,245 މީހުންވަނީ މަރުވެފަ އެވެ.

ކޮރޯނާވައިރަސް (ކޮވިޑް-19) އާ ދެކޮޅަށް ކުރާ މަސައްކަތަށް އެހީވުމަށް ޖަރުމަން ގައުމީ ފުޓްބޯޅަ ޓީމުގެ ކުޅުންތެރިން 2.5 މިލިއަން ޔޫރޯ ހަދިޔާކޮށްފައިވާ ކަމަށް ރިޕޯޓުތައް ބުނެފި އެވެ.

ސިއްހީ ކުއްލި ނުރައްކަލުގެ ޙާލަތުގައި ފުލުހުން ހިންގާ ތަހުޤީޤާ ގުޅިގެން ފުލުހުން އަމަލުކުރާނެ ގޮތުގެ އުސޫލެއް އެކުލަވާލައި މިއަދުން ފެށިގެން އަމަލު ކުރަމުންދާނެ، ފުލުހުންގެ މައްސަލަ ހުށައެޅުމުގެ ބަދަލުގައި އޮންލައިންކޮށް މައްސަލަ ހުށައަޅާ ގޮތަށް މިއަދު ހަމަޖެހިގެންދާނެ ، އަދި ބަޔާން ނެގުމުގައިވެސް އޮންލައިންކޮށް ހުށައަޅާ ފޯމް މިވަގުތަށް ބަޔާނެއްގެ ގޮތުގައި ބޭނުންކުރާނެ. - އެސިސްޓެންޓް ކޮމިޝަނަރ އޮފް ޕޮލިސް ރިޔާޒް

އެސިސްޓެންޓް ކޮމިޝަނަރ އޮފް ޕޮލިސް އަބްދުﷲ ފައިރޫޝް:

- ފުލުހުންގެ އަދަދު އަތޮޅު ތެރޭގައި އިތުރު ކުރުން

- ރަށްރަށުގައި މައިޒާންތައް ފަދަ ތަންތަން ބެލެހެއްޓުން

- ބަނދަރުތަކާއި ލަފާ ފުރާ ތަންތަން ބެލެހެއްޓުން

ފައިރޫޝް ވިދާޅުވީ، އެހީތެރިކަމުގެ ނަމުގައި ނާޖާއިޒު ފައިދާ ނަގަމުންދާކަން ފާހަގަވެފައިވާކަމަށް އަދި އެކަމަށް ސަމާލުވުމަށް އެދިވަޑައިގެންނެވެ.

ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި އެސިސްޓެންޓް ކޮމިޝަނަރ އޮފް ޕޮލިސް އިސްމާއިލް ނަވީން ވިދާޅުވީ،

- ކަރަންޓީން ފެސިލިޓީތަކާއި އައިސޮލޭޝަން ފެސިލިޓީތަކުގެ ސެކިއުރިޓީ ބަލަހައްޓަމުންދާކަމަށް

- ރެޕިޑް ރެސްޕޮންސް ޓީމްތަކުގައި މަސައްކަތް ކުރަމުންދޭ

- އަމުރުތަކާ ޚިލާފުވާ ފަރާތްތަކާމެދު ފިޔަވަޅުއެޅުން

- ކޮންމެހެން ޒަރޫރީ ބޭނުމެއް ނެތި މަގުތަކުގައި އުޅޭ މީހުން ހޭލުންތެރި ކުރުވުން

ކޮވިޑް-19 ޖެހިގެން ޕާކިސްތާނުގައި ދެ މީހަކު މަރުވެފައިވާ ކަމަށް އެ ގައުމުގެ ހެލްތް މިނިސްޓްރީން ބުނެފިއެވެ. މިއީ މި ބަލި ޖެހިގެން އެ ގައުމުގައި މަރުވި ފުރަތަމަ ދެ މީހުންނެވެ.

ޕާކިސްތާނުގެ ހެލްތް މިނިސްޓަރ ތައިމޫރް ޙާން ޖަގްރާ ވިދާޅުވީ، މަރުވި މީހުންގެ ތެރެއިން ފުރަތަމަ މީހާއަކީ ދާދި ފަހުން ސައުދިއަރަބިޔާއިން ޕާކިސްތާނަށް ދިޔަ މީހެއް ކަމަށެވެ.

ދެވަނަ މީހާއަކީ ޕެޝާވަރް ލޭޑީ ރީޑިން ހޮސްޕިޓަލުގައި ފަރުވާދެމުން ދަނިކޮށް މަރުވި ހުޅަނގު އުތުރު ކައިބަރް ޕަކްތުންކުވާ ޕްރޮވިންސްގެ ހަންކް އަވަށަށް ނިސްބަތްވާ އުމުރުން 36 އަހަރުގެ ފިރިހެނެއް ކަމަށް އޭނާ ވިދާޅުވިއެވެ. އެ ދެމީހުންގެ ކޮންޓެކްޓް ޓްރޭސިންގެ މަސައްކަތް ކުރަމުންދާ ކަމަށް ޕާކިސްތަނުގެ ސަރުކާރުން ވަނީ ހާމަކޮށްފައެވެ.

މާލެ ސަރަހައްދު ހުއްޓުމަކަށް ގެނެސް، މާލެ ލޮކްޑައުން ނުވަތަ ބަންދުކުރާ ވާހަކަތައް ސަރުކާރުން ދޮގުކޮށްފިއެވެ.

ބުދަ ދުވަހުގެރޭ ދަރުބާރުގޭގައި ގާއިމްކޮށްފައިވާ ނެޝަނަލް އެމެޖެންސީ ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ކޮވިޑް-19ގެ ޓާސްކް ފޯހުގެ ތަރުޖަމާނު މަބްރޫކް އަޒީޒު ވިދާޅުވީ މާލެ ''ލޮކްޑައުން'' ކުރަން އުޅޭ ކަމަށް ދެކެވޭ ވާހަކައަކީ ދޮގެއް ކަމަށެވެ.

ކޮވިޑް-19 އާ ގުޅިގެން ނިއުޒިލޭންޑް ހުއްޓުމަކަށް ގެނެސް، އެއްކޮށް ''ބަންދު'' ކުރަން އުޅެވޭ ކަމަށް ދެކެވޭ ވާހަކަ އެ ގައުމުގެ ބޮޑު ވަޒީރު ޖަސިންޑާ އާޑަން ދޮގުކުރައްވައިފި އެވެ.

ރޮޓޮރޫރަ ސިޓީގައި ނޫސްވެރިންނާ ވާހަކަ ދައްކަވަމުން ބޮޑު ވަޒީރު ޖަސިންޑާ ވަނީ ސަރުކާރުގެ ކަމާއިބެހޭ އިދާރާތަކުން ފޯރުކޮށްދެމުންދާ މައުލޫމާތުތަކަށް އެކަނި ބަރޯސާވުމަށް ނިއުޒިލޭންޑް ހުރިހާ ރައްޔިތުންނަށް އިލްތިމާސް ކުރައްވާފަ އެވެ. ޖަސިންޑާ ވިދާޅުވީ، އޮޅުން އޮޅޭ ފަދަ މައުލޫމާތު ފެތުރުމުގެ ސަބަބުން އެތައް ބަޔަކު ހާސްކަމެއްގެ ތެރެއަށް ވެއްޓޭނެ ކަމަށެވެ.

ރަޝިޔާގައި މިވަގުތު ދިރިއުޅެމުންދާ ދިވެހި ރައްޔިތުން އެގައުމުގެ ސަރުކާރުގެ ނިންމުންތަކާއި އެންގުންތަކަށް ސަމާލުވުމަށް ފޮރިން މިނިސްޓްރީން އިލްތިމާސްކޮށްފިއެވެ.

ފޮރިން މިނިސްޓްރީން ބުނީ ކޮވިޑް-19 ހަލުވިކަމާއެކު ފެތުރެމުން އަންނާތީ، ރަޝިޔާގެ ސަރުކާރުން ވަނީ 18 މާރިޗު 2020 ން ފެށިގެން 1 މޭ 2020 އާ ހަމައަށް، ބޭރު ގައުމުތަކުގެ ޑިޕްލޮމަޓިކް އަދި ކޮންސިއުލާ އޮފީސްތަކުގައި މަސައްކަތްކުރާ ފަރާތްތަކަށް ފިޔަވައި، އެހެން ބިދޭސީންނަށް އެގައުމަށް އެތެރެވުން ވަގުތީގޮތުން މަނާކޮށްފައިވާ ކަމަށެވެ.

މި ދުވަސްތަކުގެ ތެރޭގައި ރަޝިޔާއަށް ދަތުރުކުރަން ގަސްދުކުރާ ދިވެހިން މިކަމަށް ސަމާލުވުމަށް އެދޭ ކަމަށާއި، އަދި މި ފިޔަވަޅުތަކަށް ބަދަލުއައުން އެކަށީގެންވުމާއެކު، ދަތުރުކުރުމުގެ ކުރިން މައުލޫމާތު ސާފުކުރުމަށް ފޮރިން މިނިސްޓްރީން ވަނީ އެދިފައެވެ.

މީގެ އިތުރުން މިދަނޑިވަޅުގައި ކޮންމެހެން ކުރަންޖެހޭ ދަތުރުތައް ފިޔަވައި، އެހެން ދަތުރުތައް ނުކުރުމަށާއި، ރަޝިޔާގައި މި ވަގުތު ދިރިއުޅެމުންދާ ދިވެހި ރައްޔިތުން އެގައުމުގެ ސަރުކާރުގެ ނިންމުންތަކާއި އެންގުންތަކަށް ސަމާލުވުމަށް ވެސް ފޮރިން މިނިސްޓްރީން ވަނީ އިލްތިމާސްކޮށްފައެވެ.

ފޮރިން މިނިސްޓްރީން ބުނީ ރާއްޖޭން ބޭރަށް ދަތުރުކުރާ ދިވެހި ރައްޔިތުންނާއި ރާއްޖޭން ބޭރުގައި ދިރިއުޅޭ ރައްޔިތުން، މިނިސްޓްރީގައާއި އެންމެ ކައިރީގައި ހުންނަ ރާއްޖޭގެ ޑިޕްލޮމެޓިކް މިޝަނެއްގައި ރެޖިސްޓަރ ކުރުމަށްވެސް އިލްތިމާސްކުރާ ކަމަށެވެ.

ފޮރިން މިނިސްޓްރީން ރާއްޖޭން ބޭރަށް ދަތުރުކުރާ ދިވެހިން ޓްރެވަލް އިންޝުއަރެންސް ހޯދުމަކީވެސް، ޚާއްޞަކޮށް މި ދުވަސްވަރު ވަރަށް ބޭނުންތެރި ކަމެއްކަމަށެވެ.

ޔޫރަޕިއަން ޔޫނިއަން (އީ.ޔޫ.)ގެ ގައުމުތަކަށް ދަތުރުކުރާއިރު ދިވެހިން ސަމާލުވުމަށް ފޮރިން މިނިސްޓްރީން އިލްތިމާސްކޮށްފިއެވެ.

ފޮރިން މިނިސްޓްރީން ބުނީ މުޅި ދުނިޔޭގައި ކޯވިޑް-19 ހަލުވިކަމާއެކު ފެތުރެމުން އަންނާތީ ދަތުރުފަތުރުކުރުމުގެ ބައެއް ފިޔަވަޅުތައް ޔޫރަޕިއަން ޔޫނިއަން (އީ.ޔޫ.)ގެ ކައުންސިލުން އެޅުމަށް ނިންމާފައިވާ ކަމަށެވެ.

އެގޮތުން 17 މާރޗް 2020 ގައި އީ.ޔޫ. ކައުންސިލުން ނިންމާފައިވާ ކަންތައްތަކުގެ ތެރޭގައި، އީ.ޔޫ.ގެ "އެކްސްޓަރނަލް ބޯޑަރސް" 30 ދުވަހަށް ބަންދުކުރުން ހިމެނޭ ކަމަށެވެ. މިނިންމުމުގައި އީ.ޔޫ.ގެ ގައުމުތަކަށް ނިސްބަތްވާ މީހުންނާއި ދިގުމުއްދަތަށް އީ.ޔޫ.ގެ ގައުމުތަކުގައި ދިރިއުޅޭ ފަރާތްތައް އިސްތިސްނާވާނެކަމަށް ވަނީ ބަޔާންކޮށްފައެވެ.

އެހެންކަމުން އީ.ޔޫ.ގެ ގައުމުތަކަށް ދަތުރުކުރާނަމަ މިކަންކަމަށް ސަމާލުވުމަށާއި، މިފިޔަވަޅުތަކަށް ބަދަލުއައުން އެކަށީގެންވުމާއެކު، ދަތުރުކުރުމުގެ ކުރިން މައުލޫމާތު ސާފުކުރެއްވުމަށް ވެސް ފޮރިން މިނިސްޓްރީން ވަނީ އިލްތިމާސްކޮށްފައެވެ.

މީގެ އިތުރުން، ފޮރިން މިނިސްޓްރީން ބުނީ މިދަނޑިވަޅުގައި ކޮންމެހެން ކުރަންޖެހޭ ދަތުރުތައް ފިޔަވައި، އެހެން ދަތުރުތައް ނުކުރެއްވުމަށް އިލްތިމާސްކުރާ ކަމަށެވެ. އަދި ޔޫރަޕުގެ އެކި ގައުމުތަކުގައި މި ވަގުތު ދިރިއުޅެމުންދާ ދިވެހި ރައްޔިތުން އެގައުމުތަކުގެ ސަރުކާރުތަކުގެ ނިންމުންތަކާއި އެންގެވުންތަކަށް ސަމާލުވުމަށް އެދޭ ކަމަށެވެ.

ރާއްޖޭން ބޭރަށް ދަތުރުކުރާ ދިވެހި ރައްޔިތުންނާއި ރާއްޖޭން ބޭރުގައި ދިރިއުޅޭ ދިވެހި ރައްޔިތުން، މި މިނިސްޓްރީގައާއި އެންމެ ކައިރީގައި ހުންނަ ރާއްޖޭގެ ޑިޕްލޮމެޓިކް މިޝަންގައި ރެޖިސްޓަރ ކުރުމަށްވެސް އެމިނިސްޓްރީން ވަނީ އިލްތިމާސްކޮށްފައެވެ. އަދި ފޮރިން މިނިސްޓްރީން ބުނީ ރާއްޖޭން ބޭރަށް ދަތުރުކުރާ ދިވެހިން ޓްރެވަލް އިންޝުއަރެންސް ހޯދުމަކީވެސް، ޚާއްޞަކޮށް މި ދުވަސްވަރު ވަރަށް ބޭނުންތެރި ކަމެއްކަމަށެވެ.

ޔޫރަޕްގެ ގައުމުތަކުގައި ހަލުހިމިނެއްގައި ކޮވިޑް-19 ފެތުރެމުންދާއިރު އިޓަލީން ބުދަ ދުވަހު އެކަނި ވެސް 475 މީހުން މަރުވެއްޖެއެވެ.

އަލްޖަޒީރާގައި ރިޕޯޓުކޮށްފައިވާ ގޮތުގައި އިޓަލީން ކޮވިޑް-19އަށް ޕޮޒިޓިވްފައިވާ މީހުންގެ އަދަދު އިތުރުވަމުންދާ ކަމަށާއި، ކޮންޓުރޯލުން ނެއްޓިފައިވާ ކަމަށެވެ. އަދި މިމަހުގެ 18 ވީ ބުދަ އެކަނި ވެސް އެގައުމުން މިވައިރަސް ޖެހުނު މީހުންގެ ތެރެއިން 475 މީހުން މަރުވެފައިވާ ކަމަށެވެ.

ޔޫރަޕްގެ ގައުމުތަކުގައި ހަލުހިމިނެއްގައި ކޮވިޑް-19 ފެތުރެމުންދާއިރު މިހާތަނަށް 50 ސިޓީއަކުން މިވައިރަސް ވަނީ ފެނިފައެވެ. ފްރާންސް ވެސް މިހާރު ވަނީ ލޮކްޑައުން ކޮށްފައެވެ.

އެންމެފަހުގެ ތަފާސްހިސާބުތައް ދައްކާ ގޮތުން މުޅި ދުނިޔޭގެ 219،083 މީހުން ވައިރަސްއަށް ޕޮޒިޓިވްވެފައިވާއިރު، 85673 މީހުން ވަނީ ރަނގަޅުވެފައެވެ. އަދި 8961 މީހަކު ވަނީ މަރުވެފައެވެ.

ކޮވިޑް-19އިން ރައްކާތެރިވުމަށް މެލޭޝިޔާއިން އެގައުމާއި ސިންގަޕޫރާ ދެމެދު އޮންނަ ބޯޑަރު ބަންދުކޮށްފިއެވެ.

ރިޕޯޓުތައް ބުނާ ގޮތުން މެލޭޝިޔާއާ ސިންގަޕޫރު ދެމެދު އޮންނަ ބޯޑަރު ބަންދުކުރީ 14 ދުވަހަށެވެ.

މެލޭޝިޔާގައި މިހާތަނަށް 700 އަށްވުރެ ގިނަ މީހުން މިބައްޔަށް ޕޮޒިޓިވްވެފައިވާއިރު، މިމަހުގެ 18 ވަނަ ދުވަހުން ފެށިގެން 31އާ ހަމައަށް ބޭރުގެ ގައުމުތަކުން އެގައުމަށް މީހުން ދިއުން ވަނީ މަނާކޮށްފައެވެ. އަދި މެލޭޝިޔާގެ ރައްޔިތުން ގައުމުން ބޭރަށް ދިޔުން ވެސް ވަނީ މަނާކޮށްފައެވެ.

މެލޭޝިޔާއާ ސިންގަޕޫރު ދެމެދު އޮންނަ ބޯޑަރު ބަންދުކުރުމަށް ނިންމުމާއި ގުޅިގެން ދެގައުމުގެ ބައެއް ރައްޔިތުން ވަނީ ކަންބޮޑުވުންފާޅުކޮށްފައެވެ. އެއީ ސިންގަޕޫރަކީ މެލޭޝިޔާގެ މަސައްކަތްތެރިންނާއި ކާނާއަށް ވަރަށް ބޮޑަށް ބަރޯސާވެފައިވާ ގައުމެއްކަމަށްވާތީއެވެ. އަދި ނިންމުމާއެކު ދެގައުމަށް ވެސް ދަތިއުދަނގޫތައް ކުރިމަތިވާނެވާނެ ރިޕޯޓުތަކުން ބުނެއެވެ.

ނަމަވެސް ސިންގަޕޫރުގައި އެގައުމަށް ބޭނުންވާ ވަރަށް ކާނާ ރައްކާކުރެވިފައިވާ ކަމަށާއި، ދަތިތައް ކުރިމަތިނުވާނެ ކަމަށް އެގައުމުގެ ޓްރޭޑް މިނިސްޓްރީން ވަނީ ކޮށްފައެވެ.

މުޅި ދުނިޔޭގައި މިހާތަނަށް ދެލައްކައަށްވުރެ ގިނަ މީހުން ކޮވިޑް-19 އަށް ވަނީ ޕޮޒިޓިވްވެފައެވެ.

ކޮވިޑް-19 ހަލުވިކަމާއެކު ފެތުރެމުން އަންނާތީ، ސްރީލަންކާގެ ސަރުކާރުން އަޅަމުންގެންދާ ފިޔަވަޅުތައް އިތުރަށް ހަރުދަނާކުރުމުގެ ގޮތުން، ބުރާސްފަތި ދުވަސް (މާދަމާ) ގެ ފަތިހު، ސްރީލަންކާ ގަޑިން 04:00 އިން ފެށިގެން ހުރިހާ ކެޓެގަރީ އެއްގެ ވިސާ ދޫ ކުރުން ވަނީ ވަގުތީގޮތުން ހުއްޓާލާފައެވެ.

މީގެ އިތުރުން އެއްވެސް ކެޓެގަރީއެއްގެ ވިސާ (އިލެކްޓްރޯނިކް ޓްރެވަލް އޯތޮރައިޒޭޝަން މެދުވެރިކޮށް ލިބިފައިވާ ވިސާ، ސްރީލަންކާގެ ރެޒިޑެންޓް ވިސާ، އެންޓްރީ ވިސާ، ލޭންޑިންގް އެންޑޯސްމެންޓް އަދި މަލްޓިޕްލް އެންޓްރީ ވިސާ) ލިބިފައި ހުއްޓަސް، މިހާތަނަށް މިއިން އެއްވެސް ވިސާއެއް ބޭނުންކޮށްގެން ސްރިލަންކާއަށް ދަތުރު ކޮށްފައިނުވާނަމަ، މި ވިސާތައްވެސް ބުރާސްފަތި ދުވަސް (މާދަމާ) ގެ ފަތިހު ސްރީލަންކާ ގަޑިން 04:00 އިން 25 މާރިޗު 2020 ގެ ރޭގަނޑު ސްރީލަންކާ ގަޑިން 11:59 އާ ހަމައަށް ވަނީ ސަސްޕެންޑް ކޮށްފައެވެ. އަދި އެއްވެސް ހާލަތެއްގައި ފަތުރުވެރިންނާއި ބިދޭސިން މި މުއްދަތުގެ ތެރޭގައި ސްރީލަންކާއަށް ދަތުރު ނުކުރެވޭނެއެވެ.

ފޮރިން މިނިސްޓްރީން ބުނީ ރާއްޖޭން ބޭރަށް ދަތުރުކުރާ ދިވެހި ރައްޔިތުންނާއި ރާއްޖޭން ބޭރުގައި ދިރިއުޅޭ ދިވެހި ރައްޔިތުން، މިނިސްޓްރީގައާއި އެންމެ ކައިރީގައި ހުންނަ ރާއްޖޭގެ ޑިޕްލޮމެޓިކް މިޝަންގައި ރެޖިސްޓަރ ކުރުމަށް އިލްތިމާސްކުރާ ކަމަށެވެ. އެގޮތުން، ސްރީލަންކާއަށް ދަތުރުކުރާ ދިވެހި ރައްޔިތުންނާއި ސްރީލަންކާގައި ދިރިއުޅޭ ދިވެހި ރައްޔިތުން އެޤައުމުގައި ހުންނަ ދިވެހިރާއްޖޭގެ ހައި ކޮމިޝަންގައި ރެޖިސްޓަރ ކުރުމަށް ފޮރިން މިނިސްޓްރީން ވަނީ އެދިފައެވެ.