ކޮވިޑް-19: އެންމެ ފަހުގެ

މާލޭގައި ތޮއްޖެހިގެން ދިރިއުޅޭ ބިދޭސީން އެހެން ތަންތަނަށް ބަދަލުކުރުމުގެ މަސައްކަތް ފަށައިފިއެވެ.

މިކަމާއި ގުޅޭ ތަފްސީލް ހިއްސާކޮށް ސިޓީ ކައުންސިލުން ބުނެފައިވަނީ ކޮވިޑް-19 އާއި ގުޅިގެން ދިމާވެދާނެ ނުރައްކާތެރި ޙާލަތަކުން ރައްކާތެރިކަން ހޯދައިދިނުމުގެ ފިޔަވަޅެއްގެ ގޮތުން، މާލޭގައި ތޮއްޖެހިގެން ދިރިއުޅޭބިދޭސީން އެހެން ތަންތަނަށް ބަދަލުކުރުމުގެ މަސައްކަތް ފަށައިފައިވާކަމަށެވެ.

މާލޭ ސިޓީ ކައުންސިލާ، މޯލްޑިވްސް އިމިގްރޭޝަންއާއި، ހައުސިންގް ޑިވެލޮޕްމަންޓް ކޯޕަރޭޝަނާއި، މިނިސްޓްރީ އޮފް އިކޮނޮމިކް ޑިވެލޮޕްމަންޓާއި، މޯލްޑިވްސް ނެޝަނަލް ޑިފެންސް ފޯސްއާއި، މޯލްޑިވްސް ޕޮލިސް ސަރވިސް ގުޅިގެން ފެށި މި މަސައްކަތުގެ ދަށުން އާދިއްތަ ދުވަހުގެ ހެނދުނު 200 ބިދޭސީން އެހެން ތަނަކަށް ބަދަލުކޮށްފައިވާކަމަށް ސިޓީ ކައުންސިލުން ވަނީ ބުނެފައެވެ.

ކޮވިޑް-19 އަށް ފަރުވާ ހޯދަވަމުންގެންދެވި އިނގިރޭސި ވިލާތުގެ ބޮޑު ވަޒިރު ބޯރިސް ޖޯންސަން ހޮސްޕިޓަލުން ދޫކޮށްލައިފި އެވެ.

އިނގިރޭސި ބޮޑުވަޒީރު ބޮރިސް ޖޯންސަން ކޮވިޑް-19 އަށް ޕޮޒިޓިވްވި މާރޗްމަހުގެ 26 ވަނަ ދުވަހުއެވެ. އަދި ޖެހިގެން އައި ދުވަހު އެކަން އަމިއްލަފުޅަށް އިޢުލާނުކުރެއްވުމަށް ފަހު ޑައުނިންގް ސްޓްރީޓްގެ އެޕާޓްމެންޓެއްގައި އަމިއްލަފުޅަށް އެކަހެރިވެވަޑައިގެން ފަރުވާ ހޯއްދަވަން ފެއްޓެވި އެވެ.

އެ މަނިކުފާނު އައިސީޔޫގައި އެޑްމިޓް ކުރެވުނީ ނޭވާލުމުގެ މައްސަލައެއް ކުރިމަތިވުމުންނެވެ. ނަމަވެސް ފަހުން ވަނީ އައިސީޔޫންވެސް ދޫކޮށްލާފަ އެވެ.

ދުނިޔޭގައި ހަލުވިކަމާއެކު މިހާރު ފެތުރެމުންދާ ކޮވިޑް-19 ވައިރަސް، ރާއްޖޭގައި ފެތުރުނަ ނުދިނުމަށް އަޅާ ފިޔަވަޅުތަކާއި ގުޅިގެން ލޯކަލް ކައުންސިލްތަކުގެ އިންތިޚާބު ފަސްކުރަން ޖެހިފައިވާތީ، އެ މައްސަލައާ ގުޅިގެން ރައްޔިތުންގެ މަޖިލީހަށް ހުށަހަޅާފައިވާ ޚާއްޞަ ދެ ބިލަށް ބަހުޘްކުރުމަށް ހޯމަ ދުވަހު ބޭއްވުމަށް ހަމަޖެހިފައިވާ ޖަލްސާ ފަސްކޮށްފިއެވެ.

ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާއަށް ބަހުޘްކުރުމަށް އެޖެންޑާ ކޮށްފައިވަނީ، ސަރުކާރުކާރުގެ ފަރާތުން ތުޅާދޫ ދާއިރާގެ މެންބަރު ހިސާން ހުސައިން ހުށަހަޅުއްވާފައިވާ، "ލޯކަލް ކައުންސިލްތަކުގެ އިންތިޚާބުގެ ޚާއްޞަ ބިލު 2020" ބިލާއި، ހެންވޭރު ހުޅަނގު ދާއިރާގެ މެންބަރު ޙަސަން ލަޠީފް ހުށަހަޅުއްވާފައިވާ، "ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުން ކަށަވަރުކުރުމުގެ ޚާއްޞަ ބިލު 2020" އެވެ. ނަމަވެސް މަޖިލީހުގެ އިދާރާއިން ވަނީ އެ ޖަލްސާ ބާއްވާ ދުވަސް ފަސްކުރަން ނިންމާފައިވާ ކަމަށް މެމްބަރުންނަށް އަންގަވާފައެވެ. އަދި މިހާތަނަށް ފަސްކޮށްފައިވާ ސަބަބު އަދި އަލުން ބާއްވާނެ ތާރީހެއް ވެސް ހާމަކޮށްފައެއް ނުވެއެވެ.

އާދިއްތަ ދުވަހު މެލޭޝިޔާގައި ކޮވިޑް-19 އަށް އިތުރު 153 މީހަކު ޕޮޒިޓިވްވެ، ބަލި ޖެހުނު މީހުންގެ އަދަދު 4،683 އަރައިފިއެވެ.

ބަލީގައި މިހާތަނަށް ވަނީ 76 މީހަކު މަރުވެފައެވެ.

ކޮވިޑް-19 ގެ އެންމެ ފަހުގެ މައުލޫމާތު ދިނުމަށް ބޭއްވި ޕްރެސްކޮންފަރެންސް ގައި ޑައިރެކްޓަރ ޖެނެރަލް އޮފް ހެލްތް ޑރ. ނޫރް ހިޝާމް އަބްދުﷲ ވިދާޅުވީ، ބަލި ޖެހުނު 113 މީހުން ބަލިިން ފަސޭހަވެ ހޮސްޕިޓަލުން ގެއަށް ދޫކޮށްލާފައިވާ ކަމަށެވެ. އެއާއި އެކު 2108 މީހުން ވަނީ ބަލިން ރަނގަޅުވެފައެވެ.

އޮމާނުން މިއަދު 53 މީހަކު ނޮވެލް ކޮރޯނާވައިރަސް(ކޮވިޑް-19) ޕޮޒިޓިވްވެއްޖެއެވެ.

އަވަށްޓެރި ސްރީލަންކާގައި ކޮވިޑް-19 އަށް ޕޮޒިޓިވްވި މީހުންގެ ޢަދަދު 200 އަށް އަރައިފިއެވެ.

ފިލިޕީންސްއިން މިއަދު އެކަނިވެސް 50 މީހުން ކޮވިޑް-19 ޖެހިގެން މަރުވެއްޖެއެވެ.

ދައުލަތާއި ޢާންމު ފަރުދުން ކޮވިޑް-19 އާ ގުޅިގެން ޢަމަލު ކުރަންޖެހޭގޮތުގެ ގައިޑްލައިނެއް ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރުސީއެމް) އިން އެކުލަވާލައިފިއެވެ.

ފާއިތުވެދިޔަ 24 ގަޑިއިރު ކުވޭތުން އިތުރު 80 މީހަކަށް ކޮވިޑް-19 ޖެހިގެން ރިޕޯޓުކޮށްފިއެވެ.

އަފްޣާނިސްތާނުގެ ރިޔާސީ ގަނޑުވަރުގައި މަސައްކަތްކުރާ 20 މުވައްޒަފަކު ކޮވިޑް-19 އަށް ޕޮޒިޓިވްވެއްޖެ އެވެ.

އިގިރޭސިވިލާތުގެ ބޮޑުވަޒީރު ބޯރިސް ޖޯންސަން އައިސީޔޫގައި ކޮވިޑް-19 އަށް ފަރުވާ ހޯއްދަވަމުން ގެންދެވިއިރު ހިތްވަރު ދިނުމުގެ ގޮތުން ލޯބިވެރިޔާ ކެރީ ސައިމަންޑްސް ކޮންމެ ދުވަހަކުވެސް އެމަނިކުފާނަށް ސިޓީތަކާއި ދަރިފުޅުގެ ސްކޭން ފޮނުއްވަމުން ގެންދެވިކަމަށް ރިޕޯޓުތައް ބުނެފިއެވެ.

ކޮރޯނާވައިރަސް (ކޮވިޑް-19) އަށް ޕޮޒިޓިވްވެފައިވާ ލިވަޕޫލްގެ ކުރީގެ ފޯވާޑް އަދި އެޓީމުގެ ކުރީގެ ކޯޗު ސާ ކެނީ ޑަލްގްލިޝް ހޮސްޕިޓަލުން ދޫކޮށްލައިފި އެވެ.

އުމުރުން 69 އަހަރުގެ ޑަލްގްލިޝް ބުދަ ދުވަހު ހޮސްޕިޓަލުގައި އެޑްމިޓްކުރީ އިންފެކްޝަނެއް ވެގެން އިތުރު ފަރުވާ ދިނުމަށެވެ. އަދި ހޮސްޕިޓަލްގައި އެޑްމިޓްކުރުމަށްފަހު ހެދި ޓެސްޓްތަކުން އޭނާ ކޮވިޑް-19 އަށް ޕޮޒިޓިވްވެފައިވާކަން ވަނީ ހާމަވެފައެވެ.

ޑަލްގްލިޝްގެ އާއިލާއިން ބުނީ އޭނާ ކޮވިޑް-19 އަށް ޕޮޒިޓިވްވި ނަމަވެސް، އަދި މިހާތަނަށް އޭނާގެ ހަށިގަނޑުން އެއްވެސް އަލާމާތެއް ފެނިފައިނުވާ ކަމަށާއި، އޭނާގެ ހާލު ރަނގަޅު ކަމަށެވެ. ޑަލްގްލިޝް ހޮސްޕިޓަލުން ދޫކޮށްލުމުން، މިހާރު ހުރީ ސެލްފް-އައިސޮލޭޝަނުގައެވެ.

އެމެރިކާގެ މަތިންދާ ބޯޓު އުފުލާ މަނަވަރު، ތިއޮޑޯ ރޫޒްވެލްޓުގައި މަސައްކަތްކުރާ 550 ސިފައިން ކޮވިޑް-19 އަށް ޕޮޒިޓިވް ވެއްޖެ އެވެ.

މުސާރަ ކުޑަކުރަން އެއްބަސްވި ލީޑްސް ޔުނައިޓެޑްގެ ކުޅުންތެރިންނަށް އަލުން ސީޒަން ފެށުމުން ބޯނަހެއް ދޭން އެ ކްލަބުން ނިންމާފައިވާ ކަމަށް ރިޕޯޓުތައް ބުނެފި އެވެ.

ލީޑްސް އަކީ ކުޅުންތެރިންގެ މުސާރަ ކުޑަކުރަން އެއްބަސްވުމަކަށް އައި އިނގިރޭސި ފުރަތަމަ ކްލަބެވެ. ލީޑްސް މި ވަގުތު އޮތީ އިނގިރޭސި ދެވަނަ ޑިވިޝަނުގެ އެއްވަނައިގަ އެވެ.

މިހާރު ހަލުވިކަމާއެކު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން ދިމާވާނެ މާލީ ދަތިތަކުން އަރައިގަތުމަށް، ލީޑްސްގެ ކުޅުންތެރިންގެ އިތުރުން ކްލަބުގެ ކޯޗު މާސެލޯ ބިއެލްސާ އާއި އެހެނިހެން ބައެއް މުވައްޒަފުން ވެސް ވަނީ މި މުއްދަތުގައި މުސާރައިން ދެބައި ކުޅަ އެއް ބައި ކުޑަކޮށްފައެވެ.

ޗައިނާގައި ކޮވިޑް-19 ޖެހޭ މީހުންގެ ނިޞްބަތް ކޮންޓްރޯލްވުމަށްފަހު، އަނެއްކާ ވެސް ޕޮޒިޓިވްވާ މީހުންގެ ޢަދަދު އިތުރުވަމުން އަންނަ ކަމަށް އެޤައުމުގެ ކަމާބެހޭ އިދާރާތަކުން ހާމަކޮށްފިއެވެ.

ސަރުކާރު ބަންދުކޮށްފައިވީ ނަމަވެސް ޓްރާންސްޕޯޓް އޮތޯރިޓީން ދެމުން އަންނަ ބައެއް ޚިދުމަތްތައް ދިނުމަށް އެ އޮތޯރިޓީން ނިންމައިފިއެވެ.

ސަރުކާރު ބަންދުނަމަވެސް އެކްސްޕެޓް އޮންލައިން ސިސްޓަމުންދޭ ބައެއް ޚިދުމަތްތައް ދެމުންދާނެ ކަމަށް މިނިސްޓްރީ އޮފް އިކޮނޮމިކް ޑިވެލެޕްމަންޓުން ބުނެފިއެވެ.

ޕާކިސްތާނުން ކޮވިޑް-19 ރޯގާގައި މަރުވީ މީހުންގެ ޢަދަދު 86 އަށް އަރައިފިއެވެ.

ބޮލީވުޑްގެ ފިލްމީތަރި، ވަރުން ދަވަންގެ ގާތް އަދި ކުޑައިރުގެ ރަޙުމަތްތެރިއެއް ކަމަށްވާ ޒޯއާ މޮރާނީ ކޮވިޑް-19 އަށް ޕޮޒިޓިވް ވުމުން, ވަރުން އެކަމާ ކަންބޮޑުވުން ފާޅުކޮށްފިއެވެ.

ކޮވިޑް-19 ރޯގާއާ ގުޅިގެން އިޢުލާނުކޮށްފައިވާ ޢާންމު ޞިއްޙަތުގެ ކުއްލި ނުރައްކަލުގެ ޙާލަތުގައި ދައުލަތުގެ އިދާރާތައް ބަންދުކޮށްފައި ހުންނަ މުއްދަތުގައި، ދިވެހިރާއްޖޭގެ ސުޕްރީމް ކޯޓުގެ މަސައްކަތްތައް ކުރިއަށްދާނެގޮތުގެ އުޞޫލު އާދިއްތަ ދުވަހު ޢާންމުކޮށްފިއެވެ.

އިނގިރޭސި ޕްރިމިއާ ލީގުގައި ވާދަކުރަމުން އަންނަ ޝެފީލް ޔުނައިޓެޑުން މުސާރައާ އެކު ބައެއް މުވައްޒަފުންނަށް ޗުއްޓީ ދޭން ނިންމައިފި އެވެ.

އެ ކްލަބުން މިގޮތަށް ނިންމާފައި މި ވަނީ ކޮރޯނާވައިރަސް (ކޮވިޑް-19) ގެ ސަބަބުން ދިމާވާ މާލީ ގޮންޖެހުންތަކުން އަރައިގަތުމަށް ބައެއް ކްލަބުތަކުގެ މުވައްޒަފުން ނޯޕޭ ލީވްއަށް ފޮނުވާލުމާއި މުސާރައިން ބައެއް އުނިކުރަން ނިންމާފައިވާ ދަނޑިވަޅެއްގަ އެވެ.

އެކަމަކު ޝެފީލްޑް ޔުނައިޓެޑުން ވަނީ ކޮވިޑް-19 އާ ގުޅިގެން ވަޒީފާއަށް ދިޔުމަށް އުނދަގޫވާ މުވައްޒަފުންނަށް މުސާރައާ އެކު ޗުއްޓީ ދިނުމަށް ނިންމާފައެވެ.

ދިވެހިރާއްޖެ ނިޞްބަތްވާ ދެކުނު އޭޝިޔާ ބައްރުގެ ޤައުމުތަކުގެ ތެރެއިން މިހާރު އެންމެ ނުރައްކާތެރި ފައްތަރެއްގައި އޮތީ އިންޑިއާއެވެ. އިންޑިއާއިން މިއަދު އެކަނި، 58 މީހުން ވައިރަސްއަށް ޕޮޒިޓިވްވެ، އެކަކު ވަނީ މަރުވެފައެވެ. މިއާއެކު، އިންޑިއާގައި ވައިރަސްޖެހުނު މީހުންގެ ޖުމުލަ އަދަދަކީ، 8,504 އެވެ. އަދި މަރުވީ މީހުންގެ ޖުމުލަ އަދަދަކީ، 289އެވެ. މިހާރުވެސް އެޤައުމުގައި 7,243މީހުން ވަނީ ކޮވިޑް-19 އަށް ފަރުވާ ހޯދަމުންނެވެ. އަދި ފަރުވާދީގެން، 972 މީހަކު ވަނީ ރަނގަޅު ކުރެވިފައެވެ.

ދެކުނު އޭޝިޔާގެ ޤައުމުތަކުގެ ތެރެއިން ދެވަނަޔަށް އެންމެ ގިނަައިން ވައިރަސްއަށް މީހުން ޕޮޒިޓިވްވެފައިވަނީ ޕާކިސްތާނުންނެވެ. ޕާކިސްތާނުން މިހާތަނަށް އައިއިރު، 5,038 މީހުން ވައިރަސްއަށް ޕޮޒިޓިވްވެފައިވާއިރު، މީގެތެރެއިން، 86 މީހުން ވަނީ މަރުވެފައެވެ. ޕާކިސްތާނުން މިއަދު އެކަނިވެސް 27 މީހުން ވައިރަސްއަަށް ޕޮޒިޓިވްވެފައިވެއެވެ. މިހާރުވެސް އެޤައުމުގައި 3,926 މީހަކަށް ފަރިވާދެމުންދާއިރު، މީގެތެރެއިން 37 މީހެއްގެ ޙާލަތު ވަރަށް ސީރިއަސްކަމަށް ޚަބަރު ލިބެއެވެ.

އެހެން ޤައުމުތަކުގެ ތަފުޞީލު :

އަފްޣާނިސްތާން: 555 ޕޮޒިޓިވް ކޭސް/ 18 މަރު

ބަންގްލަދޭޝް: 48 ކޭސް/ 30 މަރު

ސްރީލަންކާ: 199 ކޭސް/ 7 މަރު

ދިވެހިރާއްޖެ: 20 ކޭސް

ނޭޕާލް: 12 ކޭސް

ބޫޓާން: 05 ކޭސް

ދުނިޔޭގެ އެކި ޤައުމުތަކުން މިއަދުގެ މިހާތަނަށް 1,166 މީހުން ވައިރަސްއަށް ޕޮޒިޓިވްވެ، 73 މީހުން މަރުވެއްޖެއެވެ.

ޞައްޙަ މަސްދަރުތަކުން ލިބޭ ޑޭޓާތަކައް ބަލާއިރު، އެންމެ ގިނަ މީހުން މިއަދުގެ މިހާތަނަށް ޕޮޒިޓިވްވެފައިވަނީ، މެކްސިކޯއިންނެވެ. މެކްސިކޯއިން މިއަދު ވަނީ 375 ވައިރަސްއަށް ޕޮޒިޓިވްވެ 44 މީހުން މަރުވެފައެވެ.

ދެވަނަޔަށް އެންމެ ގިނަ މީހުން ޕޮޒިޓިވްވެފައިވަނީ އެމެރިކާއިންނެވެ. އެމެރިކާއިން މިއަދުގެ މިހާތަނަަށް 236 މީހުން ވައިރަސްއަށް ޕޮޒިޓިވްވެ 3 މީހުން ވަނީ މަރުވެފައެވެ.

ތިންވަނައަށް އެންމެ ގިނަ މީހުން މިއަދު ޕޮޒިޓިވްވެފައިވަނީ ހަންގޭރީންނެވެ. ހަންގޭރީން 100 މީހުން ޕޮޒިޓިވްވެ، 14 މީހުން މިއަދު ވަނީ މަރުވެފައެވެ.

މީގެއިތުރުން ޗައިނާއިން، 99 މީހުން، އިންޑިއާއިން 58 މީހުން، ދެކުނު ކޮރެއާއިން 32 މީހުން، ތައިލޭންޑުން 33 މީހުން، ޕާކިސްތާނުން 27 މީހުން، ލިތުއޭނިއާއިން 27 މީހުން ޕޮޒިޓިވްވެފައިވެއެވެ.

ދުނިޔޭގެ 215 ޤައުމަކަށް/ޓެރިޓަރީސްއެއްގައި ކޮވިޑް-19 ފެތުރިފައިވާއިރު، މިހާރު 1,780,907 މީހުން ވަނީ ވައިރަސްއަށް ޕޮޒިޓިވްވެފައެވެ.

އެކްޓިވް ކޭސްތަކައް ބަލާއިރު، މިހާރު ދުނިޔޭގެ އެކިކަންލޮޅުތަކުގައި 1,267,558 މީހުންނަށް އަދިވެސް ދަނީ ފަރުވާ ދެމުންނެވެ. މީގެ ތެރެއިން، 50,626 މީހުންގެ ޙާލަތު ވަރަށް ސީރިއަސްކަމަަށް ޚަބަރު ލިބެއެވެ. މިއީ، ފަރުވާ ހޯދަމުންދާ މީހުންގެ %4 އެވެ.

މިހާރުވެސް އެންމެ ނުރައްކާތެރި ޙާލުގައި އޮތީ އެމެރިކާއެވެ. އެމެރިކާއިން މިއަދު އެކަނިވެސް 236 މީހުން ވައިރަސްއަށް ޕޮޒިޓިވްވެ 3 މީހުން މިހާތަނަށް އައިއިރު ވަނީ މަރުވެފައެވެ.

ބިރުވެރިކަމާއި، ހިިތްނުތަނަވަސްކަން މުޅި މާޙައުލުގައި ވަނީ ފެތުރިފައެވެ. އެމެރިކާގައި ކޮވިޑް-19 ގެ ބިރުވެރިކަން އެންމެ ނުރައްކާ ފައްތަރެއްގައި އޮތް ނިއުޔޯކްގެ ބްރޮންޒް ޖެކް ޑި ވެއިލަރ ހޮސްޕިޓަލުގެ އެމަރޖެންސީ ޑިޕާޓުމަންޓުގެ އެތެރެއިން ފެންނަނީ މަރުގެ ބިރުވެރިކަމެވެ. ވާރޑުތައް ފުރެމުންދަނީ އިންތިހާ ބިރުވެރިކަމުގައި ފުރާނަ އަތް މައްޗަށް ލައިގެން ތިބި ބަލި މީހުންނާއި، ޙާލު ބޮޑުވެ، އަލުން ލޯބިވާ މީހުންނާއި ބައްދަލުވާނެ ކަމުގެ އުއްމީދު ފަނޑުވެފައިވާ ބަލި މީހުންނާއެކުއެވެ.

މިނިސްޓަރ އޮފް ފޮރިން އެފެއަރޒް ޢަބްދުﷲ ޝާހިދު، ޔޫއޭއީގެ ފޮރިން މިނިސްޓަރ ޝައިޚް ޢަބްދުﷲ ބިން ޒައިދް އަލްނަޙްޔާން އާ ފޯނުން ގުޅުއްވައި، ދުނިޔެއަށް ކުރިމަތިވެފައިވާ ކޮވިޑް-19ގެ ބަލިމަޑުކަމާ ބެހޭ ގޮތުން މަޝްވަރާކުރައްވައިފިއެވެ.

ކޮވިޑް-19 ބަލި ހުރިކަން ނުވަތަ ނޫންކަން 15 މިނެޓު ނުވަނީސް ދެނެގަނެވޭނެ ޓެސްޓެއް ހަދަން އެމެރިކާއިން ހުއްދަ ދީފިއެވެ.

އިންޑިއާގެ ތުއްތު ދެކުދިން ފުލުސް އޮފީހަށް ގޮސް ކޮވިޑް-19 ގެ ކަންތަކައް އެހީވެއްޖެއެވެ. އިންޑިއާގެ މަދްޔަޕްރަދޭޝްގެ އަވަށެއް ކަމަށްވާ ކެޑްލީއަށް ނިސްބަތްވާ ކޭސަރު އަދި ޔޫވްރާޖް މިވަނީ ކޮވިޑް-19 ފެތުރެމުންދާތީވެ އެ ދެކުދިންގެ "ޕޮކެޓް މަނީ" ހިފައިގެން ފުލުސް އޮފީހަށް ގޮސްފައެވެ. އަދި މި ފައިސާ އަކީ އެކުދިންގެ ބައްޕަ ގުލާބްސިންގ މި ދެކުދިންނަށް ދެމުންދިޔަ ފައިސާ އެވެ.

އެރިޔަދޫ ކަރަންޓީން ފެސިލިޓީ ގައި ކަރަންޓީނު ކުރެވިފައިވާ ދިވެއްސަކު ކޮވިޑް-19 އަށް ޕޮޒިޓިވްވެއްޖެއެވެ. ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން ބުނީ، މިމީހާއަކީ ފިލިޕީންސް އިން އެނބުރި އައި މީހެއްކަމަށެވެ. މިއީ، މިހާތަނަށް މި ބައްޔަށް ޕޮޒިޓިވްވި 5 ވަނަ ދިވެހި މީހާކަމަށްވެސް އެޗްޕީއޭއިން ބުނެއެވެ.

ކޮވިޑް-19 އިން ރައްކާތެރިވުމަށް ގައުމުތަކުން އަޅަމުންދާ ފިޔަވަޅުތައް މާ އަވަހަށް ނިމުކަކަށް ގެންނާތީ އެކަމުގެ ސަބަބުން ވައިރަސް ކޮންޓްރޯލް ނުކުރެވި އިތުރަށް ފެތުރިދާނެކަމަށް ބުނެ އެކަމުގެ އިންޒާރު ގައުމުތަކަށް ދުނިޔޭގެ ސިއްހަތު ޖަމިއްޔާ ޑަބްލިޔުއެޗްއޯއިން ދީފި އެވެ.

ކޮވިޑް-19 ރާއްޖޭގައި އާއްމުންގެ ތެރެއަށް ފެތުރިފައި ވޭތޯ ނުވަތަ ނޫންތޯ ބެލުމަށް ކުރާ ސަރވޭގައި ރާއްޖޭގެ އާބާދީގެ ތެރެއިން 500 ސާމްޕަލް ނަގާނެކަމަށް ނެޝަނަލަ އިމަޖެންސީ އޮޕަރޭޝަންސް ސެންޓަރު (އެންއީއޯސީ) އިން ބުނެފި އެވެ.

ކޮވިޑް-19 ޖެހިގެން ފްރާންސް ގައި މަރުވި މީހުންގެ އަދަދު 13،000 ށް ވުރެ މައްޗަށް އަރައިފި އެވެ.

އެގައުމުގައި ހުކުރު ދުވަހު 987 މީހުން ވައިރަސް ޖެހިގެން މަރުވެފައިވާއިރު މީގެތެރެއިން ގިނަ މީހުންނަކީ ނާރސިންގ ހޯމެއްގައި ތިބި ބައެއްކަމަށް އެގައުމުން ބުނެއެވެ. މީގެތެރެއިން ބައެއް މީހުން އައިސީޔޫގައި ތިބިއިރު މުޅި ފްރާންސްގައި ވައިރަސް ފެތުރޭ މިންވަރު ކުޑަކުރެވިފައިވަނީ ކުޑަ އިންސައްތައަކަށެވެ. ފްރާންސްގައި ވައިރަސް ޖެހިފައިވާ މީހުންގެ އަދަދު ވަނީ 124،869 މީހުންނަށް އަރާފަ އެވެ. ނަމަވެސް އެގައުމުގެ ސިއްހަތާއި ބެހޭ މިނިސްޓްރީން އަދި ސީދާ އަދަދުތަކެއް ހާމަނުކުރާކަމަށް ރޮއިޓަރސް އިން ބުނެއެވެ. އެއީ ހޮސްޕިޓަލްތަކާއި ނަރސިންގ ހޯމްތަކުގައި ތިބި މީހުންގެ އަދަދުތައް އަދި އެއްކޮށް ނުލިބޭތީކަމަށް ރޮއިޓަރސް އިން ބުނެއެވެ.

ދުނިޔޭގައި ހަލުވި ކަމާއެކު މިހާރު ފެތުރެމުންދާ ކޮވިޑް-19 އެންމެ ހަލުވި މިނުގައި ފެތުރެމުންދާ އެމެރިކާގައި ވައިރަސް ޖެހުނު މީހުންގެ އަދަދު ބައި މިލިއަނަށް ވުރެ މައްޗަށް އަރައިފި އެވެ.

މުޅި ދުނިޔޭގައި ވައިރަސް ޖެހުނު މީހުންގެ އަދަދު 1.7 މިލިއަނަށް އަރާއިރު އެމެރިކާގައި 500،399 ( ފަސް ލައްކަ ތިންސަތޭކަ ނުވަދިހަ ނުވަ )މީހުންނަށް ވައިރަސް ޖެހިފައިވާކަމަށް ޖޯންސް ހޮޕްކިންސް އިން ބުނެއެވެ. އެމެރިކާގައި 18,693 މީހުން މިވައިރަސް ޖެހިގެން މަރުވެފައިވާކަމަށްވެސް އެވެބްސައިޓުން ވަނީ ހާމަކޮށްފަ އެވެ. މީގެއިތުރުން ހުކުރު ދުވަހަކީ އެމެރިކާގައި އެންމެ ގިނަ އަދަދެއްގެ މީހުން މިހާތަނަށް އާއިރު ވައިރަސް ޖެހިގެން މަރުވި ދުވަހެވެ. އެއީ 1,953 މީހުންނެވެ. އެމެރިކާގައި ވައިރަސް ޖެހިގެން ރަނގަޅު ކުރެވިފައިވަނީ 28,837 މީހުންނެވެ.

އެމެރިކާއަށް ބަލާލާއިރު އެންމެ ހަލުވިމިނުގައި ވައިރަސް ފެތުރެމުންދަނީ ނިއުޔޯކް ސިޓީގަ އެވެ. އަދި އެންމެ ގިނަ އަދަދަކަށް މީހުން މަރުވަމުން އަންނަނީވެސް ނިއުޔޯކު ސިޓީންނެވެ. އެގޮތުން ނިއު ޔޯކް ސިޓީން އެކަނި 5,820 މީހުން ވަނީ ވައިރަސް ޖެހިގެން މަރުވެފަ އެވެ. އަދި އެސިޓީގައި ވައިރަސް ޖެހިފައިވާ މީހުންގެ އަދަދު ދުނިޔޭގައި ހަލުވިމިނުގައި ވައިރަސް ފެތުރެމުންދާ ގައުމުތަކަށްވުރެ ގިނަ އެވެ. ނިއުޔޯކް ސިޓީން އެކަނި ވައިރަސް ޖެހިފައިވާ މީހުންގެ އަދަދު 174,481 އަށް އަރައެވެ. ދުނިޔޭގައި ދެވަނަ އަށް އެންމެ ގިނަ މީހުންނަށް ވައިރަސް ޖެހިފައިވާ ސްޕެއިންގައި ވައިރަސް ޖެހިގެން މިހާތަނަށް ރިޕޯޓްކޮށްފައިވަނީ 158,273 މީހުންނަށެވެ.

ހަލުވިކަމާއެކު މިހާރު ފެތުރެމުންދާ ކޮވިޑް-19 އެންމެ ބާރަށް ފެތުރެމުންދާ އެއް ތަނަކީ އެމެރިކާގެ ނިއު ޔޯކް ސިޓީއެވެ. އެގޮތުން ނިއު ޔޯކުން އަލަށް 6684 މީހުންނަށް ވައިރަސް ޖެހިފައިވާއިރު 651 މީހަކު ވަނީ މަރުވެފައެވެ. ނިއު ޔޯކުން އެކަނި ވައިރަސްޖެހިފައިވާ މީހުންގެ އަދަދު ލައްކައަކަށް އަރައެވެ. މިއީ މިވަގުތު ދުނިޔޭގައި އެންމެ ހަލުވިމިނުގައި ވައިރަސް ފެތުރެމުންދާ ސިޓީ އެވެ.

ކޮވިޑް-19 ދުނިޔޭގައި ހަލުވިކަމާއެކު ފެތުރެމުންދާ އެއް ގައުމުކަމަށްވާ އިޓަލީ ލޮކްޑައުންކޮށްފައި އޮތް މުއްދަތު މެއި މަހުގެ 3 ވަނަ ދުވަހާ ހަމައަށް ދިގު ދައްމާލާފައިވާކަމަށް އެގައުމުގެ ބޮޑު ވަޒީރު ވިދާޅުވެއްޖެ އެވެ. ހުކުރު ދުވަހު ގައުމުގެ ރައްޔިތުންނާ މުޚާތަބުކުރައްވާ ވާހަކަދައްކަވަމުން ބޮޑު ވަޒީރު ވިދާޅުވީ ވައިރަސް ފެތުރުން ކޮންޓްރޯލްކުރުމަށްޓަކައި އުނދަގޫ އެނިންމުން ނިންމަވާފައިވާކަމަށެވެ. މިވައިރަސް ޖެހިގެން މިހާތަނަށް އެންމެ ގިނަ މީހުން މަރުވެގެން ރިޕޯޓްކުރަމުން އަންނަނީ އިޓަލީންނެވެ. އެގައުމުން މަރުވި މީހުންގެ އަދަދު 18000 ށް ވުރެ މައްޗެވެ.

ދާހިލީ ހަނގުރާމައިން ސުންނާފަތިވެފައިވާ ޔަމަނުން ފުރަތަމަ ފަހަރަށް ކޮވިޑް-19 ގެ ކޭސްއެއް ރިޕޯޓްކޮށްފިއެވެ.

ޔަމަނުގެ ސަރުކާރުން ބުނީ، ކޮވިޑް-19 ޖެހިފައިވަނީ އިރުމަތީ ހަދްރަމައުތު ޕްރޮވިންސްގެ މީހަކަށް ކަމަށެވެ. ކޮވިޑް-19 އާ ދެކޮޅަށް މަސައްކަތް ކުރުމަށް އެކުލަވާލާފައިވާ ކޮމިޓީން ބުނީ، ޕޮޒިޓިވްވި މީހާގެ ހާލު ރަނގަޅު ކަމަށާއި، އެ މީހާއަށް ބޭނުންވާ ފަރުވާދެމުންދާ ކަމަށެވެ. އަދި އެމީހާއާ ގުޅުން ހުރި މީހުން ޓްރޭސްކޮށް އެ މީހުން އެކަހެރި ކޮށްފައިވާ ކަމަށް ޔަމަނުގެ ސަރުކާރުން ވަނީ ހާމަކޮށްފައެވެ.

ކޮވިޑް-19 ޖެހިގެން މަރުވި މީހުންގެ އަދަދު ލައްކައަކަށް ވުރެ އިތުރުވެއްޖެއެވެ.

ހުކުރު ދުވަހުގެ ރޭ 10:30 ގެ ނިޔަލަށް ކޮވިޑް-19 ޖެހިގެން 101،496 މީހުން މަރުވެފައިވާކަމަށް ތަފާސްހިސާބުތަކުން ދައްކައެވެ. މި ބަލި ޖެހުނު މީހުންގެ އަދަދު 1،673،848 އަށް އަރާއިރު، ރަނގަޅުވި މީހުންގެ އަދަދަކީ 372،027 އެވެ.

މި ބަލި ދުނިޔޭގެ 215 ސަރަހައްދަކުން ފެނިފައިވާއިރު މިހާތަނަށް މި ބަލީގެ އެންމެ ގިނަ ކޭސް ފެނިފައިވަނީ އެމެެރިކާއިންނެވެ. އެމެރިކާގައި 488،959 މީހުންނަށް މި ބަލި ޖެހިފައިވާއިރު 17،995 މީހުން ބަލީގައި މަރުވެފައިވެއެވެ. އަދި މި ބަލި ޖެހުނު 27،482 މީހުން ވަނީ ބަލިން ފަސޭހަވެފައެވެ.

ކޮވިޑް-19 ފެތުރުން ކޮންޓްރޯލްކުރުމަށް ތުރުކީގައި 48 ގަޑިއިރު ކާފިއު ހިންގުމަށް އެގައުމުން ނިންމައިފި އެވެ. އެގައުމުގެ އިންޓީރިއާ މިނިސްޓަރ ވިދާޅުވީ 2 ދުވަހުގެ މުއްދަތަށް 31 ސިޓީގައި ކާފިއު ހިންގާނެކަމަށެވެ. މިސިޓީތަކުގެ ތެރޭގައި އިސްތަންބޫލް އާއި އަންކާރާ ހިމެނެ އެވެ.

ކޮރޯނާވައިރަސް (ކޮވިޑް-19) ގެ ސަބަބުން ދިމާވާނެ މާލީ ދަތިތަކުން އަރައިގަތުމަށް، ކުޅުންތެރިންގެ މުސާރަ ކުޑަކުރަން އިނގިރޭސި ޕްރިމިއާ ލީގުގައި ވާދަކުރަމުން އަންނަ ވެސްޓް ހޭމް ޔުނައިޓެޑުން ނިންމައިފި އެވެ.

ކުޅުންތެރިންގެ މުސާރަ ކުޑަކުރަން ވެސްޓް ހޭމުން ނިންމިއިރު، އެޓީމަކީ ޕްރިމިއާ ލީގުން ކުޅުންތެރިންގެ މުސާރަ ކުޑަކުރި ދެވަނަ ޓީމެވެ. މީގެ ކުރިން ސައުތެމްޓަނުން ވަނީ ކުޅުންތެރިންގެ އިތުރަށް އެޓީމުގެ ކޯޗާއި އޮފިޝަލުންގެ އިތުރުން ބޯޑް މެމްބަރުންގެވެސް މުސާރަވެސް ކުޑަކޮށްފައެވެ.

ލިވަޕޫލްގެ ކުރީގެ ފޯވާޑް އަދި އެޓީމުގެ ކުރީގެ ކޯޗު ސާ ކެނީ ޑަލްގިޝް ކޮރޯނާވައިރަސް (ކޮވިޑް-19) އަށް ޕޮޒިޓިވްވެއްޖެ އެވެ.

ޑަލްގިޝް ކޮވިޑް-19 އަށް ޕޮޒިޓިވްވިކަން އޭނާގެ އާއިލާއިން ވަނީ ކަށަވަރުކޮށްދީފައެވެ. ރިޕޯޓުތައް ބުނާ ގޮތުން އޭނާ ވަނީ މިދިޔަ ބުދަ ދުވަހު ހޮސްޕިޓަލްގައި އެޑްމިޓްކޮށްފައެވެ.