ތެޔޮ ބޯޓު އަޑިއަށް ދިޔަ ހާދިސާ ރައީސް އޮފީހުން ގެންދަނީ ބަލަމުން: މަބްރޫކް
ބޯޓުގައި އަލިފާން ރޯވިއިރު އޭގައި 60،000 ލީޓަރުގެ ޑީސެލް ބަރުކޮށްފައި ހުރި
މަބްރޫކް
ތެޔޮ ބަރުކޮށްގެން ދަތުރުކުރަމުން ދިޔަ ބޯޓެއްގައި ރޯވެ އަޑިއަށް ދިޔަ ހާދިސާ، ރައީސް އޮފީހުން މިހާރު ބަލަމުން ގެންދާކަމަށް، ރައީސް އޮފީހުގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވެއްޖެއެވެ.
މާލޭން ފުރައިގެން ލ. އަތޮޅަށް ދަތުރުކުރަމުން ދިޔަ ބޯޓުގައި އަލިފާން ރޯވިއިރު އެ ބޯޓުގައި 60،000 (ފަސްދޮޅަސް ހާސް) ލީޓަރުގެ ޑީސެލް ހުރިކަމަށް އެމްއެންޑީއެފުން ބުނެއެވެ.
މި ހާދިސާއާއި ގުޅިގެން މަބްރޫކް ވިދާޅުވީ، ބޯޓު އަޑިއަށް ދިޔުމުގެ ސަބަބުން ތިމާވެއްޓަށް ލިބިދާނެ ގެއްލުން ކުޑަކުރުމަށް އެމްއެންޑީއެފް އަދި އީޕީއޭއިން މިހާރު މަސައްކަތް ކުރަމުންދާކަމަށެވެ. އަދި ރައީސް އޮފީހުން ކަމާބެހޭ ފަރާތްތަކާއި ގުޅިގެން، މިކަމަށް އެއްބާރުލުން ދެމުން ގެންދާކަމަށް މަބްރޫކް ވިދާޅުވިއެވެ.
ހޮނިހިރު ދުވަހު ހަވީރު ހިނގި މި ހާދިސާގައި، އަލިފާން ރޯވި ބޯޓު އަޑިއަށް ދިޔައީ އަލިފާން ނިއްވުމުގެ މަސައްކަތް އެމްއެންޑީއެފުން ކުރަމުން ދަނިކޮށެވެ. އެކަމަކު ބޯޓު އަޑިއަށް ދިޔަ ސަރަހައްދަށް ތެޔޮ ލީކުވެފައިވާކަން އަދި ފާހަގަކުރެވިފައި ނުވާކަމަށް އެމްއެންޑީއެފުން ބުނެފައިވެއެވެ.
އަލިފާން ރޯވި ބޯޓުން 4 މީހަކު ދަތުރު ކޮށްފައިވެއެވެ. އެހެން ނަމަވެސް ހާދިސާ ހިނގުމުން، އެ ހަތަރު މީހުން، ސަރަހައްދުން ދަތުރުކުރަމުން ދިޔަ އެހެން އުޅަނދެއްގައި ވަނީ މާލެ ގެނެސްފައެވެ.
