ރައީސް ޔާމީން ދައުރުގައި ހުޅުމާލެ ދެވަނަ ފިޔަވަހީގައި އެޅި ހިޔާ ފްލެޓުތަކުގެ ދާއިމީ ލިސްޓު ނެރެ ނިމުމުން "ކޮބާހޭ މަގޭ ފްލެޓު" ކިޔައި އިދިކޮޅުން ވާހަކަތަކެއް ދެއްކިޔަސް ފެލްޓުތަކަށް ވީގޮތް ނޭނގޭ ދިވެހި ރައްޔިތަކު ނޫޅޭކަމަށާއި، އެ ފްލެޓުތަކަށް ވީ ގޮތް އެންމެނަށްވެސް ވަރަށް ސާފުކޮށް އެނގޭކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ކުރިއަށް އޮތް ލޯކަލް ކައުންސިލް އިންތިހާބަށް އެމްޑީޕީގެ ޓިކެޓުގައި ހުޅުމާލެ ދާއިރާއަށް ވާދަކުރައްވާ ކެންޑިޑޭޓް ރިޒްނާ ޒަރީރުގެ ކެމްޕޭން ޖަގަހަ ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުން ރައީސް ނަޝީދު ވިދާޅުވީ މި ސަރުކާރުން ވެރިކަމާ ހަވާލުވެ ފްލެޓް ކޮމިޓީ ހަދައިގެން ބެލި ބެލުމުން ވަރަށް ގިނަ ކަންތައްތައް ހާމަވެފައިވާ ކަމަށެވެ. އެގޮތުން 2018 ވަނަ އަހަރު މާލޭގެ ގެތަކުގެ ތަފްތަރުގައި 1900އެއްހާ މީހުން ރަޖިސްޓްރީކޮށް އެއްވެސް ވަރަކަށް ދިރިއުޅުމުގެ ހާލަތަކަށް ވެސް ބެލުމެއް ނެތި އެމީހުންނަށް ފްލެޓު ލިބޭ ކަމުގެ ލިޔުންތައް ދޫކޮށްފައިވާ ކަމަށެވެ. އަދި ސިވިލް ސަރވިސް ކެޓެގަރީން ވެސް ދިރިއުޅުމުގެ ހާލަތަށް ނުބަލާ 1000 ފްލެޓު ދޫކޮށްފައިވާ ކަމަށް ވިދާޅުވިއެވެ. ރައީސް ނަޝީދު ވިދާޅުވީ "މަގޭ ފްލެޓަށް" ވީ ގޮތަކީ އެއީ ކަމަށެވެ.
އެމަނިކުފާނު ވިދާޅުވީ މި ސަރުކާރުން ވެރިކަމާ ހަވާލުވެ ފްލެޓު ކޮމިޓީއެއް އެކުަލަވާލައި ފްލެޓު ލިބޭނެކަމަށް ބެލެވޭމީހުންގެ ލިސްޓެއްހަދާ އާންމު ކުރީ ވަރަށް ރަނގަޅަށް ބަލާފައި ކަމަށެވެ. އެގޮތުން އެންމެންގެ ދިރިއުޅުމުގެ ހާލަތުވެސް ބަލާފައިވާނެކަމަށް ވިދާޅުވިއެވެ. އަދި މިހާރުވެސް ރައްޔިތުންގެ މަޖިލީހާއި ހައުސިން މިނިސްޓްރީން ގުޅިގެން އެކަންކަން ބަލައި އެ ލިސްޓު އިތުރަށް ފުރިހަމަކުރުމަށް މަސައްކަތްކުރަމުން އަންނަ ކަމަށް ވިދާޅުވިއެވެ. ލަސްތަކެއްނުވެ ފްލެޓުގެ މައްސަލަ ހައްލުވެ އެކަން ނިމޭނެކަމަށްވެސް އެމަނިކުފާނު ވިދާޅުވިއެވެ.
2018 ވަނަ އަހަރު އޭރުގައި އެ ތިއްބެވި ބޭފުޅުން ހިންގެވި ޖަރީމާއަކީ 1974 މީހުން މާލޭގެ އެކި ގޭގޭގައާއި ދަފްތަރުގައި ޖެއްސީ. ޖައްސާފަ ދިރިއުޅުމުގެ ހާލަތަށް ނުބަލާ އޭގެ ތެރެއިން އެތައް ބަޔަކަށް ފްލެޓު ދިނީ. އެއީ ކޮބާ މަގޭ ފްލެޓަށް ވީގޮތް. އަޅުގަނޑުމެން ސަރުކާރާ ހަވާލުވުމަށް ފަހުގައި ރައީސް އިބްރާހިމް މުހައްމަދު ސޯލިހު ފްލެޓު ކޮމިޓީ އުފައްދަވައި ބެއްލެވި ބެއްލެވުމުގައި މާބޮޑަށް ފާހަގަވެފައި އޮތް އެއް ހަގީގަތަކީ ސިވިލް ސަރވިސް ކެޓެގަރީއަށް ކަނޑައަޅާފައި އޮތް ތަނުގައި 1000 މީހުންނަށް ފްލެޓު ދީފައި އެބައޮތް އަނެއްކާ ވެސް ދިރިއުޅުމުގެ ހާލަތަށް ނުބަލާ. އެއީ މަގޭ ފްލެޓަށް ވީގޮތަކީ.ރައީސް ނަޝީދު
ރައީސް ނަޝީދު ވިދާޅުވީ ރައީސް ޔާމީންގެ ވެރިކަމުގައި ކޮށްފައިވާ ބައެއް ކަންކަމުގެ ސަބަބުން ހުޅުމާލެއިން ދެ މިލިއަން އަކަފޫޓުގެ ބިން އެކިއެކި ކޮންޓްރެކްޓުތަކުގައި ތާށިވެ އެތަންތަން ނުހެދި އެބައޮތް ކަމަށެވެ. އޭގެ ސަބަބުން ހުޅުމާލެއިން ބޯހިޔާވަހިކަމަށް ހިންގަން ހުރި މަޝްރޫތަކަށް ވަރަށް ބޮޑަށް ބުރޫއަރާފައިވާ ކަމަށްވެސް ވިދާޅުވިއެވެ. ރައީސް ނަޝީދު ވިދާޅުވީ މާލެ ސިޓީ ކައުންސިލްގެ އެންމެ ބޮޑު ޒިންމާއަކީ އެ ތާށިން ހުޅުމާލެ މިނިވަން ކުރުން ކަމަށެވެ. އެކަމަށްޓަކާ އެގޮތަށް ހަދާފައި ހުރި ކޮންޓެރްކްޓްތަކާއި އެމްއޯޔޫތައް ބާތިލްކުރަން ޖެހޭކަމަށާއި، އެ ނޫން ގޮތަކަށް ހުޅުމާލޭގެ ބިންތައް މިނިވަން ނުވާނެ ކަމަށް ވިދާޅުވިއެވެ. އެއަށް ފަހު އެކަން ވާނެ އެހެން ބަޔަކާ ހަވާލުކޮށް މަޝްރޫތައް ކުރިއަށް ގެންދަން ޖެހޭނެ ކަމަށްވެސް ވިދާޅުވިއެވެ.
ރައީސް ޔާމީންގެ ދައުރުގައި އަޅާފައިވާ 7،000 ފްލެޓަށް އެއަށް ވުރެ ގިނަ މީހުންނަށް ފެލްޓު ލިބޭކަމުގެ ލިޔުން ދޫކޮށްފައިވާ ކަމަށް މި ސަރުކާރުން އުފެއްދި ފްލެޓު ކޮމިޓީން ވަނީ ބުނެފައެވެ. ދާދި ފަހުން ކޮމިޓީން ފްލެޓު ލިބޭ މީހުންގެ ދާއިމީ ލިސްޓެއް އާންމުކުރުމާއެކު ފްލެޓު ނުލިބިގެން ގިނަ ބައެއްގެ ޝަކުވާތައް ފެންމަތިވެފައިވާއިރު، އިދިކޮޅު ކޯލިޝަނުން އަންނަނީ ފްލެޓު ހޯދަން ކަމަށް ބުނެ މާލެ ތެރޭގައި އެއްވެ މުޒާހަރާވެސް ކުރަމުންނެވެ.
