ބަލިމަޑުކަމާއެކުވެސް ކަސްޓަމަރުންނަށް އެންމެ ފުރިހަމަ ޚިދުމަތް ފޯރުކޮށްދިނުމަށް ގިނަ މަސައްކަތްތަކެއް!

ފާއިތުވި އަހަރު ބޭންކް އޮފް މޯލްޑިވްސް އިން އެބޭންކުގެ ކަސްޓަމަރުންނަށް ފޯރުކޮށްދޭ ޚިދުމަތްތައް ފުޅާކުރުމުގެ ގިނަ މަޝްރޫއުތަކަކާއި މުޖުތަމައުއަށް ފައިދާކުރާނެ ގިނަ މަޝްރޫއުތަކެއް ރާއްޖޭގެ އެކި ކަންކޮޅުތަކުގައި ކުރިއަށް ގެންގޮސްފައިވެއެވެ.

ބީއެމްއެލްގެ ސަސްޓައިނަބިލިޓީ ރިޕޯޓް އާންމުކޮށްފައިވާއިރު، ރިޕޯޓްގައިވާ ގޮތުން އެކުންފުނިން ވަނީ 2020 ވަނަ އަހަރު ކޯޕަރޭޓް ސޯޝަލް ރެސްޕޮންސިބިލިޓީގެ ގޮތުގައި ރާއްޖޭގެ އެކި ކަންކޮޅުތަކުގެ ޖަމިއްޔާތަކާއި އާންމު ފަރުދުންނަށް އެހީތެރިކަން ފޯރުކޮށްދީ، 100ށް ވުރެ ގިނަ ރަށަށް އެހީތެރިކަން ފޯރުކޮށްދީފައެވެ. އެގޮތުން ކޮވިޑް-19 ބަލިމަޑުކަމާ އެކު ކަސްޓަމަރުންނަށް ހިދުމަތްފޯރުކޮށްދިނުމުގައި ބީއެމްއެލް އިން ދެމިއޮތް އިރު، މިދަނޑިވަޅުގައި ކަސްޓަމަރުންނަށް ބޭނުންވާނެ ހިދުމަތްތައް ފަސޭހަކަމާ އެކު ފޯރުކޮށްދިނުމަށް މަސައްކަތްކޮށްފައިވާނެ ކަމަށް އެކުންފުނިން ބުނެއެވެ.

ބޭންކުން ކަސްޓަމަރުންނަށް ފޯރުކޮށްދޭ ބޭންކިން ހިދުމަތްތަކަށް ހެޔޮ ބަދަލުތަކެއް ފާއިތުވި އަހަރު ބީއެމްއެލް އިން ވަނީ ގެނަސްފައެވެ. އެގޮތުން އެބޭންކުން ފޯރުކޮށްދޭ ޕަރސަނަލް ލޯން އަދި ފައިނޭންސިންގ ހިދުމަތްތަކަށް ހެޔޮ ބަދަލުތަކެއް ގެނެސްފައިވާއިރު، ބޭންކުން ވަނީ ބީއެމްއެލް އިސްލާމިކް ގްރީން ފައިނޭންސިންގ އަދި އެޑިއުކޭޝަން ފައިނޭންސިންގ އޮޕްޝަންސް ތައާރަފްކޮށްފައެވެ. އަދި ތިމާވެށީގެ މަޝްރޫއުތަކަށް ހާއްސަ ގްރީން ލޯންގެ އިތުރުން އަންސެކުއަރޑް ވަރކިން ފައިނޭންސް ފެސިލިޓީއެއް ބޭންކުން ވަނީ ތައާރަފްކޮށްފައެވެ.

މީގެ އިތުރުން ކޮވިޑް-19 އާ އެކު ކުންފުނިތަކާއި އިދާރާތަކުން ދެމުން އައި ހިދުމަތްތައް އޮންލައިން އަދި ޑިޖިޓަލް ވަސީލަތްތައް ބޭނުންކޮށްގެން ފޯރުކޮށްދިނުމުގެ މަސައްކަތް ފާއިތުވި އަހަރު ގިނަ ކުންފުނިތަކަކުން ކޮށްފައިވާއިރު، ބީއެމްއެލް އިންވެސް ވަނީ އެކުންފުނީގެ ގިނަ ހިދުމަތްތައް ފަސޭހައިން ލިބޭނެ ގޮތަށް ހިދުމަތްތައް ޑިޖިޓަލައިޒްކުރުމުގެ މަސައްކަތްތައް ކުރިއަށް ގެންގޮސްފައެވެ. އެގޮތުން އިންޓަނެޓް ބޭންކިންގެ ހިދުމަތަށް އޮންލައިންކޮށް ރެޖިސްޓަރ ކުރެވޭނެ މަގު ފަހިކޮށްދިނުމުގެ އިތުރުން ބޭންކުގެ ކަސްޓަމަރުންގެ ޑެބިޓް، ކްރެޑިޓް، އަދި ޕްރިޕެއިޑް ކާޑުތަކުގެ ޕިން އޮންލައިންކޮށް ބަދަލުކުރެވޭނެ އިންތިޒާމްތައް ބޭންކުން ވަނީ ފޯރުކޮށްދީފައެވެ.

ބީއެމްއެލް އިން ވަނީ އިންޓަނެޓް މެދުވެރިކޮށް ލޯކަލް ބޭންކް ޓްރާންސްފަރ އާއި މީރާއަށް ފައިސާ ދެއްކުމާއި ޕޭރޯލް އެޕްލިކޭޝަންގެ އިތުރުން ޓީޓީ އެޕްލިކޭޝަން އޮންލައިންކޮށް ހުށަހެޅޭގޮތަށް ހަމަޖައްސާފައެވެ.

ކޮވިޑް-19ގެ ސަބަބުން ބޭންކުގެ ކަސްޓަމަރުންނަށް ދިމާވި ގޮންޖެހުންތަކުން އަރައިގަތުމަށް އެހީތެރިވުމުގެ ގޮތުން ބީއެމްއެލް އިން ވަނީ ވަކިވަކި ފަރުދުންނަށާއި ވިޔަފާރިތަކަށް ހާއްސަކޮށް ތަފާތު ހިދުމަތްތައް ފާއިތުވި އަހަރު ފޯރުކޮށްދީފައެވެ. ބަލިމަޑުކަމުގެ ސަބަބުން ލޯނުތައް އަނބުރާދެއްކުމަށް ދަތިވި ފަރާތްތަކަށް މޮރޮޓޯރިއަމްތައް ތައާރަފުކޮށް، ލޯނުތައް އަނބުރާ ދައްކަންޖެހޭ މުއްދަތު އެކުންފުނިން އިތުރުކޮށްދީފައިވެއެވެ. އަދި ކިޔަވާކުދިން ނަގާފައިވާ ލޯނުތަަކަށްވެސް ލުއިގޮތްތަކެއް ވަނީ ހަމަޖައްސައިދީފައެވެ. މީގެއިތުރުން ކުންފުނިތަކަށް ކުރިމަތިވި މާލީ ގޮންޖެހުންތަކުން އަރައިގަތުމަށް އެހީތެރިވުމަށް ސަރުކާރާ ގުޅިގެން ރިކަވަރީ ސްކީމް ތައާރަފްކޮށްފައިވާއިރު، ފަތުރުވެރިކަމުގެ ސިނާއަތަށް ހާއްސަކޮށް ކުރުމުއްދަތުގެ ފައިނޭންސިން ފެސިލިޓީއެއްގެ އިތުރުން ކްރެޑިޓް ކާޑް ޕޭމެންޓް ޕްލޭނެއް ވެސް ވަނީ ތައާރަފްކޮށްފައެވެ.

ރާއްޖެއިން ބޭރުގައި ދިރިއުޅޭ ދިވެހިންނަށް އެހީތެރިވުމުގެ ގޮތުން އެއްފަހަރާ ނެގޭ ފައިސާގެ އަދަދު، ވަކި މުއްދަތަކަށް އިތުރުކޮށްދިނުމާއި ދިވެހި ރުފިޔާ އެކައުންޓްތަކުން ފައިސާ ޓްރާންސްކުރުމަށް ނަގާ ފީ ވަނީ ކުޑަކޮށްދީފައެވެ. އަދި އަމިއްލަ ފަރާތްތަކާއި ވިޔަފާރިތަކަށް ދުވާލެއްގެ މައްޗަށް އޭޓިމްއިން ޑިޕޮސިޓްކުރެވޭ ފައިސާގެ އަދަދު ވަނީ އިތުރުކޮށްދީފައެވެ.

ހުއްޓުމެއްނެެތި ބީއެމްއެލްގެ ހިދުމަތްތައް ހުރިހާ ކަސްޓަމަރުންނަށް ފޯރުކޮށްދިނުމުގެ ހިދުމަތް ބީއެމްއެލްއިން ކުރިއަށް ގެންގޮސްފައިވާއިރު، ފާއިތުވި އަހަރު ބީއެމްއެލް އިން ވަނީ ކަސްޓަމަރުންނަށް ބޭނުންވާ ހިދުމަތްތައް އޮންލައިން ކޮށް ފޯރުކޮށްދިނުމުގެ މަސައްކަތް ކޮށްފައެވެ. މީގެއިތުރުން އިޖްތިމާއީ ގިނަ މަޝްރޫއުތަކާއި ތިމާވެށީގެ މަޝްރޫއުތައް ވެސް ފާއިތުވި އަހަރު އެ ބެންކްއިން ކުރިއަށް ގެންގޮސްފައިވެއެވެ.

ފާއިތުވި އަހަރު ބީއެމްއެލްގެ ހިދުމަތްތައް ވަނީ އިތުރަށް ފުޅާކޮށްފައެވެ. އެގޮތުން ރާއްޖޭގެ 20 އަތޮޅެއްގައި ބީއެމްއެލްގެ 35 ބްރާންޗް މިހާރު ވަނީ ހުޅުވާފައެވެ. އަދި 185 ރަށެއްގައި 66 ސެލްފް ސަރވިސް ސެންޓަރާއި 127 އޭޓީއެމް އާއި 200ށް ވުރެ ގިނަ ކޭޝް އެޖެންޓުން ދަނީ އޮޕަރޭޓްކުރަމުންނެވެ.