މިނިސްޓަރ ޝައިނީ އަށް މަސްވެރިއެއްގެ ހޫނު ބަސްތަކެއް
26 އެޕްރީލު 2017 | ބުދަ 23:59މަސްވެރިންގެ ޝަކުވާއަކީ ބެޔަސް ނުބެޔަސް ދޭންބުނި ފައިސާ ލިބެނީ ކިހިނެއްތޯ
އއ.ރަސްދޫ ބަނދަރުމަތީގައި މަސްވެރިއަކު ހިތްހަމަ ނުޖެހި މިނިސްޓަރ ޝައިނީއާ ވާހަކަ ދައްކަނީ
ފޯމު ފުރާ ފުރާ ކަރުދާސް ހުސްވެއްޖެ ކަމަށް ބުނެ ރަސްދޫ މަސްވެރިޔަކު ހޫނު ކޮށް މިނިސްޓަރ ޝައިނީއަށް ހިތް ހަމަ ނުޖެހުން ފާޅު ކުރާ ވީޑިއޯއެއް ސޯޝަލް މީޑިއާގައި އާއްމު ވެއްޖެއެވެ.
ރަސްދޫ ބަނދަރުމަތީގައި ހިނގި މި ހާދިސާގައި މަސްވެރިޔާ ޝަކުވާ ކުރަމުންދާ ކަމަށް ފެންނަނީ މަސްވެރިންނަށް ބެޔަސް ނުބެޔަސް ސަރުކާރުން ދޭން ވައުދުވި ދިހަ ހާސް ރުފިޔާގެ މައްސަލައިގައެވެ.
ފޯމު ފުރާފުރާ ކަރުދާސް ހުސްވި އިރު އެބުނާ ފައިސާ ލިބުނީ ކޮން ބަޔަކަށްތޯ ހިތްހަމަ ނުޖެހިފައި ހުރި މަސްވެރިޔާ މިނިސްޓަރ ޝައިނީ އަށް ދަންނަވައެވެ.
ވަރަށް ހިތްހަމަ ނުޖެހި ހޫނުކޮށް ދެކެވެމުން ދިޔަ ވާހަކަތަކުގެ ތެރޭގައި ތިޔަ ބުނާ ލާރިއެއް ކިތައް ބައިމީހުން ނަގަމުންދޭތޯ މަސްވެރިޔާ މިނިސްޓަރ ޝައިނީ އަރިހުން އަހަމުން ދެއެވެ.
"ކިތައް ދޯނި؟ ކިތައް މީހުން؟ ކިތައް ސަތޭކަ ދޯނި ދިވެހި ރާއްޖޭގައި މަހައް ފުރާ އެބަ؟" މަސްވެރިޔާ ބުނަމުން ދިޔައެވެ.
މަސްވެރިޔާގެ ސުވާލަށް ސީދާ ޖަވާބެއް ދެއްވުމުގެ ބަދަލުގައި، ހާސްވެފައި ހުންނެވި، މިނިސްޓަރ ޝައިނީ، އޭނާ ގާތު އައްސަވަނީ މަހަކު ކިހާވަރެއްގެ އާމްދަނީ އެއް ލިބޭތޯއެވެ.
"މަހަކު ކިހާވަރެއް ލިބޭ އާމްދަނީއަށް؟ ރީއްޗަށް ބުނާނި ރީއްޗަށް ބުނާނި". މަސްވެރިއާ އަށް ޝަހާދު އިނގިލިން އިޝާރާތް ކުރައްވަމުން މިނިސްޓަރ އެއްސެވިއެވެ.
މަސްވެރިޔާ ބުނީ މަހަކު ލިބެނީ އެކި ވަރު ކަމަށެވެ.
އެވްރެޖް ކޮށްލީމަ ލިބެނީ ކިހާވަރެއްތޯ ޝައިނީ އައްސަވައެވެ.
އޭގެ ޖަވާބުގައި މަސްވެރިޔާ، އަށް ހާސް ދިހަ ހާސް ލިބޭ ކަމަށް ބުނެ ވާހަކަ ދައްކަމުން ދަނިކޮށް މިނިސްޓަރ ޝައިނީ ކަލޭ ދޮގު ހަދައިފިއްޔާ އޭ ބުނާ ހިސާބުން ވީޑިއޯ ނިމުމާއެކު އިތުރަށް ކަންވީ ގޮތެއް ސާފެއް ނުވިއެވެ.
Your browser doesn't support video. Please download the file: video/mp4
މިނިސްޓަރ ޝައިނީ ބުދަ ދުވަހު މެންދުރު ކުރިން ރަސްދޫ އަށް ވަޑައިގެން އެރަށު ފަޅުގައި އޮތް ކަންނެލި އޮޑިއަކަށް އެރުއްވުމުންވެސް ކަންނެލީގެ އަގު ދައްވެފައިވާ މައްސަލައިގައި ބައެއް މީހުން ވަނީ ވަރަށް ހިތް ހަމަ ނުޖެހި މިނިސްޓަރ ޝައިނީއަށް އަމާޒު ކޮށް ޝަކުވާ ކޮށްފައެވެ.
Your browser doesn't support video. Please download the file: video/mp4
މި ހިނގައިދިޔަ ކަންކަމުގެ ފަހުން ޝައިނީ ކުރެއްވި ޓުވީޓެއްގައި ވިދާޅުވެފައިވަނީ، ވަރުބަލި ދަތުރަކަށް ފަހު މަސްވެރިން ލެފުމުން ބައްދަލުވާ ވަގުތަކީ އަޅައިގަންނަ ކަންތައްތަކެއް ހިނގާނެ ވަގުތެއް ކަމަށާއި އެހެންނަމަވެސް އެއީ ބިނާ ކުރަނިވި ބައްދަލުވުމެއް ކަމަށެވެ.
އެ ޓުވީޓަށް ރައްދުދީ ބައެއް އާއްމުން ސޯޝަލް މީޑިއާގައި ބުނެފައިވަނީ، މިއީ ބިނާކުރެނިވި ބައްދަލުވެއް ނޫން ކަމަށާއި މަސްވެރިން ތިބީ ސަރުކާރުގެ ސިޔާސަތުތަކުގެ ސަބަބުން ފޫހިވެ ހިތްހަމަ ނުޖެހިފައި ކަމުގައެވެ.
