ޓީމު ތައްޔާރުކުރަން އަދި ވަގުތު ނަގާނެ: އާތީ

ދިރާގު ދިވެހި ޕްރިމިއާ ލީގު ފެށިއިރު، ޓީމު އެއްކޮށް ތައްޔާރުކުރަން އަދި ވަގުތު ނަގާނެ ކަމަށް ކުލަބު ވެލެންސިއާގެ ކޯޗު މުޙައްމަދު އާތިފް (އާތީ) ބުނެފިއެވެ.

އެއް އަހަރުގެ މެދުކެނޑުމަކަށްފަހު ވެލެންސިއާ ފުރަތަމަ ޑިވިޝަނަށް ކޮލިފައިވެފައިވާއިރު، އައު ސީޒަނަށް ސްކޮޑު ވަރުގަދަ ކުރުމަށް ވެލެންސިއާއިން ވަނީ ތަޖުރިބާކާރު ގިނަ ކުޅުންތެރިންތަކެއް އެ ޓީމަށް ގެނެސްފައެވެ. އޭގެ ތެރޭގައި ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގު (ދަގަނޑޭ) އާއި، ފޯވާޑް އަލީ ފާސިރު (ސެންޓޭ) އަދި ގައުމީ ފުޓްބޯޅަ ޓީމުގެ ކެޕްޓަން އަކުރަމް އަބްދުލް ޣަނީ (އަކޫ) ހިމެނެއެވެ.

ލީގުގައި ހޯމަ ދުވަހުގެރޭ ވެލެންސިއާއިން ކުލަބު ގްރީން ސްޓްރީޓްސްއާ ދެކޮޅަށް ނުކުތުމުގެ ކުރިން ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި އާތީ ބުނީ އައު ސީޒަނަށް ތައްޔާރުވުމަށް ވެލެންސިއާއިން ފަރިތަކުރުންތައް ފެށީ ވަރަށް އާދައިގެ ޓީމަކާ އެކުގައި ކަމަށާއި، ހެޔޮވަރުގެ ސްކޮޑެއް ލިބުނީ މެޗާ ކުރިމަތިލަން 10 ވަރަކަށް ދުވަހަށް ވެފައި ވަނިކޮށެވެ. އެގޮތުން މެނޭޖުމަންޓުގެ އެހީތެރިކަމާއެކު މިހާރު ވެލެންސިއާގައި އޮތީ ލީގުގައި ވާދަކުރެވޭ ފެންވަރުގެ ސްކޮޑެއް ކަމަށާއި، އެކަމަކު ލީގުގެ ފުރަތަމަ މެޗާ ކުރިމަތިލާއިރު ޓީމު އެއްކޮށް ތައްޔާރުކުރަން އަދި ވަގުތު ނަގާނެ ކަމަށްވެސް ބުޏްނެވެ.

އާތީ ބުނީ ސްކޮޑެއް އެއްކޮށް އެކުލަވާލަން 15 ވަރަކަށް ދުވަސް ނަގާނެ ކަމަށާއި، އެކަމަކު ގްރީން ސްޓްރީޓްސް މެޗަށް ޓީމު އޮތީ ފުރިހަމައަށް ތައްޔާރަށް ކަމަށެވެ. އަދި މި މެޗުން މޮޅެއް ހޯދޭނެ ކަމުގެ ވަރަށް ބޮޑު ޔަގީންކަމެއް އެބައޮތް ކަމަށްވެސް އާތީ ބުންޏެވެ.

ވެލެންސިއާއާ ދެކޮޅަށް ނުކުންނަ ގްރީން ސްޓްރީޓްސްއިން އައު ސީޒަނަށް ސްކޮޑަށް ގިނަ ބަދަލުތަކެއް ގެނައިރު، އެ ޓީމުގެ ކޯޗު އަލީ ނިސްތާރު މުޙައްމަދާއެކު މީގެ ކުރިން މަސައްކަތްކޮށްފައިވާ ގިނަ ކުޅުންތެރިންތަކެއް ވަނީ އެ ޓީމާ ގުޅިފައެވެ. އެގޮތުން ޒުވާން ކުޅުންތެރިން ކަމަށްވާ ހަސަން ނަޒީމް ގާސިމް (ޗޯޓު) އާއި، މުޙައްމަދު ޖައިލަމް (އޮގީ) އާއި، އަޙްމަދު ނާހިލް އިބްރާހީމާއި، މުހައްމަދު ކަރަމް އަދި އިބްރާހިމް ހަސީބު ވަނީ ގްރީން ސްޓްރީޓްސްއާ ގުޅިފައެވެ. އަދި ބިދޭސީ ކުޅުންތެރިން ކަމަށްވާ މިސްރުގެ މިޑްފީލްޑަރު ޚަލީލް ޖަމާލުގެ އިތުރުން ޕާކިސްތާނުގެ ގޯލްކީޕަރު ހަނީފް ސާގިބްވެސް ހިމެނެއެވެ.

ވެލެންސިއާ މެޗުގެ ކުރިން ނިސްތާރު ބުނީ ވެލެންސިއާ އަކީ ލީގުގައި އޮތް ވަރުގަދަ ޓީމެއް ކަމަށާއި، އެކަމަކު އެ ޓީމުގެ އަމާޒަކީ ބޮޑެތި ޓީމުތައް އަތުން ނަތީޖާ ނެރުން ކަމަށެވެ. އަދި ފުރަތަމަ މެޗަށް ނުކުންނައިރު ޓީމުގެ ދެ ތިން ކުއްޖަކު އަނިޔާގައި އެބަތިބި ކަމަށާއި، އެކަމަކު މުޅި ޖުމްލަކޮށް ޓީމުގެ ފިޓްނަސް ރަނގަޅު ކަމަށްވެސް ބުންޏެވެ.

ދިރާގު ދިވެހި ޕްރިމިއާ ލީގުގައި ގްރީން ސްޓްރީޓްސް އާއި ވެލެންސިއާ ބައްދަލުކުރާ މެޗު ފަށާނީ ހޯމަ ދުވަހުގެރޭ 21:00 ގައެވެ.