މި އަހަރު އަރިދަފުސް ރޯގާ އެންމެ ބޮޑަށް ފެތުރުނީ އޮކްޓޫބަރު މަހު

މިއަހަރުގެ ފާއިތުވި 6 މަސް ދުވަހާ އަޅާބަލާއިރު މި އަހަރުގެ އޮކްޓޫބަރު މަހު އަރިދަފުސް ރޯގާ ޖެހިގެން ރިޕޯޓުކޮށްފައިވާ މިންވަރު އިތުރު ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

ރޯގާގެ ގޮތުގައި ފެތުރެމުންދާ ބަލިތަކުގެ ހާލަތާއި ގުޅިގެން އެޗްޕީއޭއިން އެހެން އަހަރުތަކާ އަޅާބަލާއިރު، މިހާތަނަށް ރިޕޯޓްކުރި އަރިދަފުސް ރޯގާ ކޭސްތަކުގެ އަދަދު މަދު ނަމަވެސް، މި އަހަރުގެ ފާއިތުވި 6 މަސްދުވަހާ އަޅާބަލާއިރު މި އަހަރުގެ އޮކްޓޫބަރު މަހު މި އަދަދު މައްޗަށް ގޮސްފައިވާ ކަމަށެވެ. އެގޮތުން ސެޕްޓެމްބަރު މަހު 3154 ކޭސް ރިޕޯޓުކުރިއިރު، އޮކްޓޫބަރު މި އަދަދު ވަނީ 5782 އަށް އިތުރުވެފައެވެ.

Advertisement

އަރިދަފުސް ރޯގާއިން ރައްކާތެރިވުމުގެ ފިޔަވަޅުތައް އަބަދުވެސް އެޅުމަކީ މުހިއްމުކަމެއްކަން ފާހަގަކޮށް އެޗްޕީއޭއިން ބުނީ އަރިދަފުސް ރޯގާ ޖެހިއްޖެ ނަމަ ކެއްސާ، ކިބިހި އަޅާއިރު އަގަމަތީގައާއި ނޭފަތުގައި ކުޑަރުމާލެއް ނުވަތަ ޓިޝޫއެއް ފަދަ އެއްޗެއް އެޅުން ޖެހޭ ކަމަށާއި، ބޭނުންކޮށްފައިވާ ޓިޝޫފަދަ ތަކެތި ހާމައަށް އެއްލާނުލުމަށް އެދިފައިވެއެވެ.

އެގޮތުން އާއްމު ސާފުތާހިރު ކަމަށް، ޚާއްސަކޮށް ސައިބޯނިލައިގެން އަތްދޮވުންފަދަ ކަންކަމަށް ސަމާލުކަންދޭން ޖެހޭ ކަމަށެވެ. އަދި ރޯގާޖެހި ކެއްސާނަމަ، މީހުން އެއްވެ އުޅޭ ތަންތަނަށް ނުދިއުމާއި، ރޯގާޖެހިފައިވާނަމަ ކުޑަކުދިންނާ ދުރުހެލިވެ އުޅުމަށް ވަނީ އިލްތިމާސްކޮށްފައެވެ.

މީގެ އިތުރުން އެޗްޕީއޭއިން ވަނީ ދުންފަތުގެ ދުމުން ކުޑަކުދިން ރައްކާތެރިކުރުމަށް ގޭތެރޭގައި ދުންފަތުގެ އިސްތިއުމާލު ނުކުރުމަށް އެދިފައިވެއެވެ. ބަލި ޖެހުމުން، ނުރައްކާ ވުމުގެ ފުރުސަތު ބޮޑު މީހުން އިންފުލުއެންޒާއިން ރައްކާތެރިވުމަށް ވެކްސިންޖެހުން މުހިންމު ކަމަށާއި، މި ފަރާތްތައްރޯގާ ޖެހި ހުން އަންނަ ނަމަ ޑޮކްޓަރެއްގެ ލަފާ ހޯދަން ޖެހޭ ކަމަށް އެޗްޕީއޭއިން ބުނެއެވެ.

ބަލިވެގެން ޑޮކްޓަރަށް ދައްކާއިރު ބަލިމީހާއާ އެކު ވީހާވެސް މަދު މީހުން ހޮސްޕިޓަލަށް ދިއުމާއި، ބަލިމީހުންނަށް ޒިޔާރަތް ކުރުމަށް ކުޑަކުދިންނާއި އުމުރުން ދުވަސްވީ މީހުންނާއި މާބަނޑުމީހުން ނުދިއުމާއި ކޮންމެހެން ހޮސްޕިޓަލަށް ދާންނުޖެހޭ ހާލަތްތަކުގައި މެނުވީ ހޮސްޕިޓަލަށް ނުދިއުމަށް އެޗްޕީއޭއިން ވަނީ އިލްތިމާސްކޮށްފައެވެ.