ކޮވިޑް-19 އާ ދެކޮޅަށް ދިވެހި ސަރުކާރުން ކުރަމުންދާ މަސައްކަތާއި އިޤްތިޞާދު އަލުން ކޮޅަށް ޖެހުމަށް ދިވެހި ސަރުކާރުން ކުރަމުންދާ މަސައްކަތަށް ތައުރީފު ހައްގު ކަމަށް ޔޫއެންޑީޕީގެ ރެޒިޑެންޓް ރެޕްރެޒެންޓޭޓިވް އަކީކޯ ފޫޖީ ވިދާޅުވެއްޖެއެވެ.
އަކީކޯ ފޫޖީ މިހެން ވިދާޅުވީ ޔުނައިޓެޑް ނޭޝަންސް ޑިވެލޮޕްމަންޓް ޕްރޮގްރާމް (ޔޫއެންޑީޕީ) އިން ރާއްޖެއަށް ޕަރސަނަލް ޕްރޮޓެކްޓިވް އިކުއިޕްމެންޓްސް (ޕީޕީއީ) ހަދިޔާ ކުރުމަށް މިނިސްޓްރީ އޮފް ފޮރިން އެފެއަރޒްގައި އާދިއްތަ ދުވަހު ބޭއްވި ރަސްމިއްޔާތެއްގައި ވާހަކަފުޅު ދައްކަވަމުންނެވެ.
އަކީކޯގެ ވާހަކަފުޅުގައި ރާއްޖޭގައި ފަތުރުވެރިކަން އަލުން ހުޅުވާލެވިގެންދާއިރު، ބަލި ފެތުރުން ކޮންޓްރޯލް ކުރުމަށް ޕީޕީއީ މުހިއްމު ދައުރެއް އަދާކުރާނެ ކަމަށް ވިދާޅުވިއެވެ. އަދި މުސްތަގުބަލުގައި ވެސް އެކި ގޮތްގޮތުން ރާއްޖެއަށް އެހީތެރިކަން ފޯރު ކޮށްދިނުމުގައި ދެމިހުންނަން މަސައްކަތް ކުރައްވާނެ ކަމަށް ވިދާޅުވިއެވެ.
މި ރަސްމިއްޔާތުގައި އަކީކޯ ފޫޖީގެ އިތުރުން ރާއްޖޭގައި ހުންނަވާ އދ. ގެ ރެޒިޑެންޓް ކޯޑިނޭޓަރ ކެތަރިން ހެސްވޯލް ވެސް ވަނީ ވާހަކަފުޅު ދައްކަވާފައެވެ. ކެތަރިންގެ ވާހަކަފުޅުގައި އދ. އިން ރާއްޖެއަށް ތަފާތު އެކިއެކި ދާއިރާތަކުން ފޯރުކޮށްދީފައިވާ އެހީތަކުގެ މައްޗަށް އަލިއަޅުވާލެއްވިއެވެ.
