އިނގިރޭސި ޕްރިމިއާ ލީގަށް ޗެލްސީން އެކުލަވާލި 25 ކުޅުންތެރިންގެ ސްކޮޑުގައި މިދިޔަ އަހަރު ފުޓްބޯޅައިން ރިޓަޔާކުރި އުމުރުން 38 އަހަރުގެ ގޯލްކީޕަރު ޕީޓާ ޗެކް ހިމަނައިފިއެވެ.

ޗެލްސީގައި 11 އަހަރު ހޭދަކުރުމަށްފަހު ޗެކް ރިޓަޔާކުރީ އާސެނަލަށް ކުޅުމަށްފަހުއެވެ. އޭނާ މިހާރު ހުރީ ޗެލްސީގެ ޓެކްނިކަލް ޕާފޯމަންސް އެޑްވައިޒަރުގެ މަގާމުގައެވެ. އެގޮތުން މި ފަހަރުގެ ޓްރާންސްފާ ބާޒާރުގައި ޗެލްސީން ބޭނުންވި ކުޅުންތެރިން ހޯދުމުގައި ޗެކްގެ ދައުރު ބޮޑެވެ. އެގޮތުން ރެނެސްއަށް ކުޅެމުން އައި ސެނެގާލުގެ ގޯލްކީޕަރު އެޑޮއާޑް މެންޑީގެ ސޮއިވެސް ޗެލްސީން ހޯދިއިރު، އެ ޓްރާންސްފާގައި ޗެކް ވަނީ މުހިންމު ދައުރެއް އަދާކޮށްފައެވެ.

ޗެލްސީގެ ޕްރިމިއާ ލީގު ސްކޮޑުގައި އެ ޓީމުގެ ލެޖެންޑް ޗެކްގެ ނަން ހިމެނީ އެ ޓީމުގެ ގޯލްކީޕަރުންނަށް ދިމާވެފައިވާ މައްސަލަތަކުގެ ސަބަބުންނެވެ. ޗެލްސީގައި މި ވަގުތު ތިބީ ދުނިޔޭގެ އެންމެ އަގުބޮޑު ގޯލްކީޕަރުގެ ގޮތުގައި ގެނައި ސްޕެއިނުގެ ކެޕާ އަރިއްޒަބަލާގާ އާއި، އާޖެންޓީނާގެ ގޯލްކީޕަރު ވިލީ ކަބަލޭރޯ އަދި މި ފަހަރު ގެނައި މެންޑީއެވެ. މީގެ ތެރެއިން މެންޑީއަށް ދާދި ފަހުން އަނިޔާއެއް ލިބުނުއިރު، ކެޕާގެ ކުޅުން ދަށްވުމާ ގުޅިގެން ގިނަ ބައެއްގެ ފާޑުކިޔުން އޭނާއަށް ވަނީ އަމާޒުވެފައެވެ.

ރިޕޯޓުތައް ބުނާ ގޮތުން ޗެލްސީން އެ ޓީމުގެ ޕްރިމިއާ ލީގުގެ ސްކޮޑުގައި ޗެކް ހިމެނީ ކޮވިޑް-19ގެ ސަބަބުން ކީޕަރުންތަކަކަށް ނުކުޅެވޭ ހާލަތެއް އަތުވެއްޖެނަމަ އޭނާ ލައްވާ ކުޅުވުމަށެވެ.

ޕްރޮފެޝަނަލް ކުޅުންތެރިއެއްގެ ގޮތުގައި މީގެ ކުރިން 20 އަހަރު ހޭދަކުރި ޗެކް ވަނީ ޗެލްސީއާއެކު ގިނަ ކާމިޔާބީތަކެއް ހޯދާފައެވެ. އެގޮތުން އޭނާ ވަނީ ޗެލްސީއާއެކު ޕްރިމިއާ ލީގާއި، އެފްއޭ ކަޕް ހަތަރު ފަހަރު އަދި ޔުއެފާ ޗެމްޕިއަންސް ލީގު އެއް ފަހަރު ކާމިޔާބުކޮށްފައެވެ.