ޔުއެފާ ނޭޝަންސް ލީގުގައި އަންގާރަ ދުވަހުގެރޭ ޔޫކްރޭން އަތުން ސްޕެއިން ބަލިވިއިރު، ޖަރުމަނާއި ސްވިޒަލެންޑް ބައްދަލުކުރި މެޗު އެއްވަރުވެއްޖެއެވެ.

ލީގު އޭ ގްރޫޕް ހަތަރެއްގައި ހިމެނޭ ސްޕެއިން ބަލިވީ ގައުމުން ބޭރުގައި ޔޫކްރޭން އަތުން 1-0 ންނެވެ. މިއީ ޔޫކްރޭނުން އެ ގައުމުގައި ތާރީޚުގައިވެސް ސްޕެއިން ބަލިކުރި ފުރަތަމަ ފަހަރެވެ.

އަދި މިއީ ދެ އަހަރު ތެރޭ ފުރަތަމަ ފަހަރަށް ސްޕެއިނަށް ލިބުނު ނާކާމިޔާބީއެވެ. މި މެޗުގެ ކުރިން ސްޕެއިން އެންމެ ފަހުން ބަލިވީ ނޭޝަންސް ލީގުގައި މީގެ ދެ އަހަރު ކުރިން ރަށުން ބޭރުގައި ކްރޮއޭޝިއާ އަތުންނެވެ. އެ މެޗުން ސްޕެއިން ބަލިވީ 3-2 ންނެވެ.

އަންގާރަ ދުވަހުގެރޭ ޔޫކްރޭނުގައި ކުޅުނު މެޗު ސްޕެއިނުން ޑޮމިނޭޓުކޮށްގެން ކުޅުނުއިރު، އެ ޓީމުން ވަނީ މި މެޗުގައި ގިނަ ހަމަލާތަކެއް އުފައްދާފައެވެ. އެގޮތުން ފުރަތަމަ ހާފުގައި ފޯވާޑް ރޮޑްރިގޯ މޮރޭނޯ އާއި ޒުވާން ފޯވާޑް އަންސޫ ފަޓީ ނުރައްކާތެރި ހަމަލާތަކެއް އުފެއްދި ނަމަވެސް، އެ ދެ ހަމަލާވެސް ޔޫކްރޭނުގެ ގޯލްކީޕަރު ޖިއޯޖީ ބުޝްޗާން ވަނީ ދިފާއުކޮށްފައެވެ.

ސްޕެއިނުން މެޗުގައި އުފެއްދި ގިނަ ހަމަލާތަކެއް ޔޫކްރޭނުން ދިފާއުކުރިއިރު، އެ ޓީމުން މެޗުގައި ލީޑު ނަގާފައިވަނީ 76 ވަނަ މިނެޓުގައެވެ. މި ލަނޑު ޔޫކްރޭނަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ވިކްޓޯ ސިގާންކޯވްއެވެ.

މީގެ އިތުރުން އަންގާރަ ދުވަހުގެރޭ ޖަރުމަނާއި ސްވިޒަލެންޑް އެއްވަރުވީ 3-3 ންނެވެ.

ޖަރުމަނުގައި ކުޅުނު މި މެޗުގެ ކުރީކޮޅު ސްވިޒަލެންޑުން ވަނީ ލީޑު ނަގާފައެވެ. މެޗުގެ ފަސްވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ މާރިއޯ ގަވްރާނޮވިޗެވެ. އަދި މެޗުގެ 26 ވަނަ މިނެޓުގައި ރެމޯ ފްރެއޮލާ ވަނީ ސްވިޒަލެންޑަށް ލީޑު ފުޅާކޮށްދީފައެވެ. އެކަމަކު އޭގެ ދެ މިނެޓު ފަހުން ޓިމޯ ވާނާ ވަނީ ލަނޑެއް ޖަހާ ޖަރުމަނަށް އުންމީދު އާކޮށްދީފައެވެ.

ދެވަނަ ހާފުގައި ޖަރުމަނުން ރަނގަޅު ކުޅުމެއް ދެއްކިއިރު، މި ހާފު ފަށައިގެން 10 ވަނަ މިނެޓުގައި އެ ގައުމުން ވަނީ ނަތީޖާ އެއްވަރުކޮށްފައެވެ. މި ލަނޑު ޖެހީ ޒުވާން ތަރި ކައި ހަވާޓްޒްއެވެ. އެކަމަކު އޭގެ ދެ މިނެޓު ފަހުން ސްވިޒަލެންޑުން ވަނީ އަލުން މެޗުގައި ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ފުރަތަމަ ލަނޑުވެސް ޖެހި ގަވްރާނޮވިޗެވެ.

މި މެޗުން ޖަރުމަން ސަލަމަތްވީ މެޗުގެ 60 ވަނަ މިނެޓުގަައި ސާޖް ގްނަބްރީ ޖެހި ލަނޑުންނެވެ. ސްވިޒަލެންޑުން މެޗު ނިންމާލީ އެއް ކުޅުންތެރިއަކު މަދުކޮށެވެ. އެއީ އިތުރު ވަގުތުގައި ދެވަަނަ ރީނދޫ ކާޑާއެކު ފަބިއަން ޝެއާއަށް ރަތް ކާޑު ދެއްކުމުންނެވެ.

މި ނަތީޖާތަކާއެކު ލީގު އޭ ގްރޫޕް ހަތަރެއްގެ އެއްވަނައިގައި ސްޕެއިން އޮތީ ހަތަރު މެޗުން ހަތް ޕޮއިންޓާއެކުއެވެ. ދެވަނައިގައި އޮތް ޖަރުމަނާއި ތިންވަނައިގައި އޮތް ޔޫކްރޭނަށް ހަތަރު މެޗުން ލިބިފައިވަނީ ހަ ޕޮއިންޓެވެ. އަދި ފުލުގައި އޮތް ސްވިޒަލެންޑަށް ހަތަރު މެޗުން ލިބިފައިވަނީ ދެ ޕޮއިންޓެވެ.