ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ރާއްޖޭގެ ކޮންމެ ރަށަކަށް ބޯޅަ ހަދިޔާކުރަން ނިންމައި، އެ މަސައްކަތް ފަށައިފިއެވެ.

އެފްއޭއެމްގެ ޖެނަރަލް ސެކްޓަރީ ހުސައިން ޖަވާޒް (ޖަވާ) ވިދާޅުވީ އެ އިދާރާއިން ރާއްޖޭގެ ކޮންމެ ރަށަކަށް 10 ބޯޅަ ހަދިޔާކުރުމަށް ނިންމާފައިވާ ކަމަށާއި. މި ބޯޅަތަކަކީ މިއަހަރު ބޭއްވުމަށް ނިންމި މިނިވަން ޗެމްޕިއަންޝިޕްް ފުޓްބޯޅަ މުބާރާތަށް އެފްއޭއެމް އާއި ކުޅިވަރާއި ބެހޭ ވުޒާރާއިން ގެނައި ބޯޅަތަކެއް ކަމަށެވެ.

އެކަމަކު މިހާރުގެ ހާލަތާއެކު މުބާރާތް ބޭއްވޭނެ ގޮތެއް ނެތުމުން ކުޅިވަރާ ބެހޭ ވަޒީރު އަޙްމަދު މަޙްލޫފްގެވެސް މަޝްވަރާއާއެކު އެފްއޭއެމުން ނިންމީ ކޮންމެ ރަށަކަށް ހަމަހަމަ އުސޫލަކުން ބޯޅަތައް ހަދިޔާ ކުރުމަށް ކަމަށާއި، އެ އުސޫލުގެ ދަށުން ބޯޅަ ހަދިޔާކުރާނީ އެކި ދާއިރާތަކުގެ މަޖިލިސް މެންބަރު މެދުވެރިކޮށް ކަމަށް ޖަވާ ވިދާޅުވިއެވެ.

އަންނަ ހަފުތާގެ ތެރޭގައ ހުރިހާ ދާއިރާއަކަށް ބޯޅަ ހަދިޔާ ކުރުމަށް ނިންމާފައިވާއިރު، މިހާތަނަށް 25 ދާއިރާއެއްގެ މެންބަރުނަށް ބޯޅަ ހަދިޔާކުރެވިފައިވާ ކަމަށް އެފްއޭއެމުން ބުނެއެވެ.

ކުޅިވަރުގެ ދާއިރާ ތަރައްގީކޮށް މުޅިރާއްޖެ ހިމެނޭ ގޮތަށް ފުޓްބޯޅަ މުބާރާތްތައް ކުޅުމަށް އެފްއޭއެމުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން 2023-2024 ވަނަ އަހަރުގެ ދިވެހި ޕްރިމިއާ ލީގު 16 ޓީމާއެކު ހޯމް އެންޑް އަވޭ އުސޫލުން މުޅި ރާއްޖޭގައި ކުޅުމަށް އެފްއޭއެމުން ނިންމާފައިވާއިރު، މި މުބާރާތަށް ހާއްސަކޮށް އޭއެފްސީގެ މިންގަނޑަށް ފެތޭ 20 ފުޓްބޯޅަ ދަނޑު ރާއްޖޭގެ އެކި ކަންކޮޅުތަކުގައި އެޅުމުގެ މަސައްކަތް ކުރުމަށްވެސް އެފްއޭއެމުން މިހާރު ވަނީ ތައްޔާރުވެފައެވެ.

އަދި ރައީސް ޞާލިޙުގެ ރިޔާސީ ވައުދުފުޅުގެ ތެރޭގައި ރާއްޖޭގެ 100 ރަށެއްގައި ފެންވަރު ރަނގަޅު ފުޓްބޯޅަ ދަނޑު އެޅުން ހިމެނޭއިރު، ސަރުކާރުން މިހާރު ދަނީ ގިނަ ރަށްތަކެއްގައި ބޮޑު ފުޓްބޯޅަ ދަނޑުތައް އަޅަމުންނެވެ.