އިންޑޮނޭސިޔާގައި ދުވާލެއްގެ މައްޗަށް ކޭސްތައް ރިޕޯޓް ކުރެވޭ އަދަދު 3000ށް ވުރެ މައްޗަށް

އިންޑޮނޭޝިޔާގައި ކޮވިޑް -19ގެ ކޭސްތައް ދުވާލެއްގެ މައްޗަށް ރިޕޯޓް ކުރެވޭ އަދަދު 3000ށްވުރެ މައްޗަށް އަރައިފިއެވެ.

ރިޕޯޓްތައް ބުނާ ގޮތުން މިއީ މިހާ ގިނަ ކޭސްތަކެއް ރިޕޯޓް ކުރެވެމުންދާތާ ވިދި ވިދިގެން ހަވަނަ ދުވަހެެވެ.

އެ ގައުމުގެ ހެލްތް މިނިސްޓްރީން މައުލޫމާތު ދޭ ގޮތުގައި އާދިއްތަ ދުވަހު ވެސް ވަނީ 3636 ކޭސް އެއް ވަނީ ރިޕޯޓް ކުރެވިފައެވެ. އަދި މަރުވި މީހުންގެ އަދަދު ވަނީ 73ށް އަރާފައެވެ.

މިހާތަނަށް އިންޑޮނޭޝިޔާ އިން ވަނީ ޖުމްލަ 218،382 މީހުން ކޮވިޑް-19 އަށް ޕޮޒިޓިވް ވެފައެވެ. ކޮވިޑް-19 ގެ ޖެހިގެން މިހާތަނަށް މަރުވި މީހުންގެ ޖުމްލަ އަދަދަކީ 8723 އެވެ.

ވެރި ރަށް ޖަކާޓާގައި ވައިރަސް ކޮންޓްރޯލް ކުރުމުގެ ގޮތުން ސަރުކާރާއި އަމިއްލަ އޮފީސްތަކުގެ ގިނަ އަދަދެއްގެ މުވައްޒަފުން ގޭގައި ތިބެ މަސައްކަތް ކުރާ ގޮތަށް ވަނީ ނިންމާފައެވެ.

މާރުކޭޓް އަދި ޝޮޕިންގ ސެންޓަރުތަކަށް ވަދެވޭނީ ތަނުގެ ޖާގައިގެ ދެބައިކުޅަ އެއްބައި މީހުންނަށް ކަމަށާއި ޝޮޕިން ސެންޓަރުތަކުގައި ހުންނަ ރެސްޓޯރެންޓް ތަކުން ދެވޭނީ ޓޭކްއަވޭ ގެ ޚިދުމަތް އެކަނި ކަމަށް ޖަކާޓާގެ ގަވަރުނަރު އަނިއެސް ބަސްވެޑަން ވަނީ ވިދާޅުވެފައެވެ.

މި ފިޔަވަޅުތައް ދެ ހަފްތާ އަށް އަޅާފައިވީނަމަވެސް ވައިރަސް ފެތުރުން ކޮންޓްރޯލް ނުވާނަމަ މުއްދަތު އިތުރު ކުރަން ޖެހިދާނެ ކަމަށް ގަވަރުނަރު ވަނީ ވިދާޅުވެފައެވެ.

އާދިއްތަ ދުވަހާއި ހަމައަށް ވެރިރަށް ޖަކާޓާގައި 54،220 ކޭސްއެއް ރިޕޯޓް ކުރެވިފައިވާއިރު 1391 މީހަކު މަރުވެފައެވެ. ބަސްވެޑަން ވިދާޅުވެފައިވަނީ އައިސޮލޭޓް ވާން މަޖުބޫރުވާ އުސޫލެއް އެކުލަވާލުމުގެ މަސައްކަތް ސަރުކާރުން ކުރަމުންދާ ކަމަށެވެ.

މި އުސޫލުގެ ދަށުން ހޯމަ ދުވަހުން ފެށިގެން ޕޮޒިޓިވްވާ މީހުން ސަރުކާރުގެ ފެސިލިޓީސްތަކާއި ހޮޓެލްތަކުލުގައި އައިސޮލޭޓް ކުރެވޭނެ އިންތިޒާމް ހަމަޖެހިގެންދާނެ ކަމަށެވެ.

އައިސޮލޭޓްވާން ދެކޮޅު ހަދާ ފަރާތްތަކާއި މެދު ކަމާއި ބެހޭ ފަރާތްތަކުން ފިޔަވަޅު އަޅާނެ ކަމަށް އޭނާ ވިދާޅުވިއެވެ.