ފަހަތުން އަރާ މެންޗެސްޓާ ޔުނައިޓެޑް ބަލިކޮށް، ޔުއެފާ ޔޫރޮޕާ ލީގުގެ ފައިނަލަށް ސެވިއްޔާ ދަތުރުކޮށްފިއެވެ.

ޔޫރޮޕާ ލީގުގެ މެޗުތައް ޖަރުމަންގައި ކުރިއަށްދާއިރު، ފައިނަލްގެ ފުރަތަމަ ޖާގަ ސެވިއްޔާ ހޯދީ އާދީއްތަ ދުވަހުގެރޭ ކުޅުނު ސެމީފައިނަލް ފުރަތަމަ މެޗުގައި ޔުނައިޓެޑް އަތުން 2-1 ން މޮޅުވެގެންނެވެ.

ޔޫރޮޕާ ލީގުގެ ޗެމްޕިއަންކަން ސެވިއްޔާއިން މިހާތަނަށް ފަސް ފަހަރު ހޯދާފައިވާއިރު، އެޓީމުން އެންމެ ފަހުން ފައިނަލްގައި ވާދަކޮށްފައިވަނީ 2015-2016 ވަނަ އަހަރުގެ ސީޒަނުގައެވެ.

އާދީއްތަ ދުވަހުގެރޭ ކުޅުނު މެޗުގެ ކުރީކޮޅު ޔުނައިޓެޑުން ރަނގަޅު ކުޅުމެއް ދެއްކިއިރު، މެޗު ފަށައިގެން ވަރަށް ކުރީކޮޅު އެޓީމުން ވަނީ ލީޑު ނަގާފައެވެ. ޔުނައިޓެޑްގެ މާކަސް ރަޝްފޯޑަށް އޭރިއާ ތެރެއިން ކުރި ފައުލަކަށް ޕެނަލްޓީއެއް ދިންއިރު، މެޗުގެ ނުވަވަނަ މިނެޓުގައި ބްރޫނޯ ފެނާންޑޭޒް ވަނީ މި ޕެނަލްޓީ ކާމިޔާބުކޮށް ޔުނައިޓެޑަށް ލީޑު ނަގާދީފައެވެ. މިއީ މި ސީޒަނުގައި ޔުނައިޓެޑަށް ލިބުނު 22 ވަނަ ޕެނަލްޓީއެވެ.

ޔުނައިޓެޑުން މެޗުގެ ކުރީކޮޅު ލީޑު ނެގި ނަމަވެސް، ސެވިއްޔާއިން ވަނީ ކުޅުން ރަނގަޅުކޮށް މެޗުގެ 26 ވަނަ މިނެޓުގައި ނަތީޖާ އެއްވަރުކޮށްފައެވެ. ސާޖިއޯ ރެގީލޯން ހުރަސްކޮށްދިން ބޯޅައަކުން މި ލަނޑު އެޓީމަށް ކާމިޔާބުކޮށްދިނީ ސޫސޯއެވެ.

މެޗުގެ ދެވަނަ ހާފު ފަށައިގެން ޔުނައިޓެޑުން ގާތްގާތުގައި ގިނަ ހަމަލާތަކެއް އުފެއްދި ނަމަވެސް، ސެވިއްޔާގެ ގޯލްކީޕަރު ޔަސީން ބޫނޫ ވަނީ މޮޅު ކުޅުމެއް ދައްކާ އެ ހަމަލާތަށް ހުށިޔާރުކަމާއެކު ދިފާއުކޮށްފައެވެ. މި މެޗުގައި ސެވިއްޔާއިން ލީޑު ނެގީ 78 ވަނަ މިނެޓުގައެވެ. ހެސުސް ނަވާސް ތަނަވަސްކޮށްދިން ފުރުސަތަކުން މި ލަނޑު ސެވިއްޔާއަށް ކާމިޔާބުކޮށްދިނީ ލޫކް ޑި ޔޮންއެވެ.

މި މޮޅާއެކު ހުލެން ލޮޕެޓެގީގެ އިރުޝާދުގެ ދަށުން ކުޅެމުން އަންނަ ސެވިއްޔާއިން ވަނީ މެޗަކުން ބަލިނުވެ 20 މެޗު ހަމަކޮށްފައެވެ.

ޔޫރޮޕާ ލީގުގެ ފައިނަލަށް ސެވިއްޔާ ދަތުރުކުރިއިރު، ފައިނަލްގައި އެޓީމު ބައްދަލުކުރަން ޖެހޭނީ އިންޓަ މިލާނާއި ޝަޚްތަރު ޑޮނެސްކް ބައްދަލުކޮށް މޮޅުވާ ޓީމަކާއެވެ.