ނޮވަކް ޖޮކޮވިޗް ކޮރޯނާވައިރަހަށް ޕޮޒިޓިވް ވެއްޖެ

ދުނިޔޭގެ ޓެނިސް ރޭންކިންގެ އެއްވަނައިގައި އޮތް ސާބިއާގެ ނޮވަކް ޖޮކޮވިޗް ކޮރޯނާވައިރަސް (ކޮވިޑް-19) ށް ޕޮޒިޓިވް ވެއްޖެއެވެ.

އަންގާރަ ދުވަހުގެ ވަގުތެއްގައި ޖޮކޮވިޗް ވަނީ އޭނާ އާއި އޭނާގެ އަންހެނުން ކޮވިޑް-19ށް ޕޮޒިޓިވްވިކަން ހާމަކޮށްފައެވެ.

ޖޮކޮވިޗް ކޮވިޑް-19ށް ޕޮޒިޓިވް ވިއިރު، ދާދި ފަހުން އޭނާ ވަނީ ކްރޮއޭޝިއާގައި ޗެރިޓީ އިވެންޓެއް ބާއްވާފައެވެ. މި އިވެންޓުގެ ތެރެއިން ބަލްގޭރިއާގެ ޓެނިސް ކުޅުންތެރިޔާ ގްރިގޯރް ޑިމިޓްރޯވް ކޮވިޑް-19ށް ޕޮޒިޓިވް ވުމާއެކު ވަނީ، މި އިވެންޓުގެ ފައިނަލް މެޗު ކެންސަލް ކޮށްފައެވެ.

ޖޮކޮވިޗް އާއި އޭނާގެ އަންހެނުން ކޮވިޑް-19ށް ޕޮޒިޓިވް ވިކަން ހާމަވީ އިވެންޓު ކެންސަލް ކުރުމަށްފަހު އެނބުރި ސާބިއާއަށް ދިޔަ ފަހުންނެވެ. ޖޮކިވިޗް ވަނީ އޭނާ އާއި އޭނާގެ އަންހެނުން ކޮވިޑް-19ށް ޕޮޒިޓިވްވި ނަމަވެސް، އޭނާގެ ދަރިން ވައިރަހަށް ޕޮޒިޓިވް ނުވާކަން ހާމަކޮށްފައެވެ.

ސާބިއާގެ ނޮވަކް ޖޮކޮވިޗް ކޮވިޑް-19ށް ޕޮޒިޓިވް ވިއިރު، ކޮވިޑް-19 އާ ގުޅިގެން ބައެއް ޓެނިސް މުބާރާތްތައް ވަނީ ފަސްކޮށްފައެވެ. އެގޮތުން ޔޫއެސް އޯޕަން ޓެނިސް މުބާރާތް މިހާރު އޮގަސްޓް މަހުގެ 31ން ސެޕްޓެމްބަރު މަހުގެ 13ށް ތާވަލުކޮށްފައިވާއިރު، ފްރެންޗް އޯޕަން ޓެނިސް މުބާރާތް ވަނީ ސެޕްޓެމްބަރު މަހުގެ 20ން އޮކްޓޯބަރު މަހުގެ 4ށް ފަސްކޮށްފައެވެ. އަދި މި އަހަރުގެ ވިމްބަލްޑަން ޓެނިސް މުބާރާތް މިހާރު ވަނީ ކެންސަލް ކޮށްފައެވެ.

މީގެ ތެރެއިން ޔޫއެސް އޯޕަންގައި ކުޅެން ގިނަ ޓެނިސް ކުޅުންތެރިން ދެކޮޅު ހަދަމުން އަންނައިރު، ޖޮކޮވިޗް ވަނީ އެ މުބާރާތުގައި ކުޅުމާ މެދު ވަކި ގޮތެއް އަދި ނުނިންމާ ކަމަށް ބުނެފައެވެ.