ރެއާލް ވަޔަޑޮލިޑް ބަލިކޮށް ސްޕެނިޝް ލީގުގެ ތިންވަނައަށް އެތުލެޓިކޯ މެޑްރިޑް ޖެހިލައިފިއެވެ.

ލީގުގައި ހޮނިހިރު ދުވަހުގެރޭ ކުޅުނު މެޗުން ވަޔަޑޮލިޑް އަތުން އެތުލެޓިކޯ މޮޅުވީ 1-0 ގެ ނަތީޖާއަކުންނެވެ.

މި މެޗަކީ އެތުލެޓިކޯގެ ގޯލްކީޕަރު ޔަން އޮބްލަކް ބައިކޮޅަށް ލަނޑެއް ނުވައްދާ ހަމަކުރި 101 ވަނަ މެޗެވެ. މީގެ ކުރިން ލީގުގައި އޮސަސޫނާ އަތުން 5-0 ން އެތުލެޓިކޯ މޮޅުވި މެޗުގައި އޮބްލަކް ވަނީ ބައިކޮޅަށް ލަނޑެއް ނުވައްދާ 100 މެޗު ހަމަކޮށް ރެކޯޑް ހަދާފައެވެ.

ސްޕެނިޝް ލީގުގެ ތާރީޚުގައި ބައިކޮޅަށް ލަނޑެއް ނުވައްދާ އެންމެ އަވަހަށް 100 މެޗު ހަމަކުރި ގޯލްކީޕަރުގެ ރެކޯޑް އޮބްލަކް ހަދާފައިވަނީ 183 މެޗުންނެވެ. ކުރިންވެސް އެ ރެކޯޑް އޮންނަނީ އެތުލެޓިކޯއަށް ކުޅުނު ގޯލްކީޕަރެއް އަތުގައެވެ. އެތުލެޓިކޯގެ ކުރީގެ ގޯލްކީޕަރު މިގްއިލް ރެއިނާ ބައިކޮޅަށް ލަނޑެއް ނުވައްދާ 100 މެޗު ހަމަކުރީ 222 މެޗުންނެވެ.

އެތުލެޓިކޯގެ ދަނޑުގައި ހޮނިހިރު ދުވަހުގެރޭ ކުޅުނު މެޗުގައި އެޓީމުގެ ފަރާތުން ރަނގަޅު ކުޅުމެއް ފެނިގެންދިޔައިރު، މި މެޗުގައި އެތުލެޓިކޯގެ ޔާއޯ ފެލިކްސް އާއި، އަލްވާރޯ މޮރާޓާ އަދި ކިރަން ޓްރިޕިއާއަށް ވަނީ ލަނޑު ޖަހަން ރަނގަޅު ފުރުސަތުތަކެއް ލިބި ބޭކާރުވެފައެވެ. މެޗުގައި އެތުލެޓިކޯއިން ޖެހި ހަމައެކަނި ލަނޑު މެޗުގެ 81 ވަނަ މިނެޓުގައި ޑިއޭގޯ ކޮސްޓާ ނަގައިދިން ހުރަހަކުން ކާމިޔާބުކުރީ ވިޓޯލޯއެވެ.

މި މޮޅާއެކު އެތުލެޓިކޯ ތާވަލުގެ ތިންވަނައަށް ޖެހިލީ ކުޅުނު 30 މެޗުން 52 ޕޮއިންޓާއެކުއެވެ. ހަތަރުވަނައަށް ވެއްޓުނު ސެވިއްޔާއަށްވެސް 30 މެޗުން 52 ޕޮއިންޓު ލިބިފައިވާއިރު، އެތުލެޓިކޯއަށް ކުރިލިބެނީ ފައިދާ ލަނޑުންނެވެ.