ޖަރުމަން ލީގުގައި ޖަރުމަން ނޫން އެހެން ގައުމަކަށް ނިސްބަތްވާ ކުޅުންތެރިޔަކު އެއް ސީޒަނެއްގައި އެންމެ ގިނަ ލަނޑު ޖަހައިގެން ޕިއޭ-އެމެރިކް އޮބަމަޔަން ހަދާފައިވާ ރެކޯޑް ބަޔާން މިއުނިކްގެ ފޯވާޑް ރޮބަޓް ލެވަންޑޯސްކީ މުގުރާލައިފިއެވެ.

ޖަރުމަން ލީގުގެ ޗެމްޕިއަންކަން ކަށަވަރުކޮށްފައިވާ ބަޔާން ހޮނިހިރު ދުވަހުގެރޭ ކުޅުނު މެޗުން ވަނީ ފްރެއިބާގް އަތުން 3-1 ން މޮޅުވެފައެވެ.

ބަޔާންގެ ދަނޑުގައި ކުޅުނު މި މެޗުގައި ފެނިގެންދިޔަ ހަތަރު ލަނޑުވެސް ކާމިޔާބުކޮށްފައިވަނީ ފުރަތަމަ ހާފުގައެވެ. އެގޮތުން މެޗު ފަށައިގެން 15 ވަނަ މިނެޓުގައި ބަޔާނުން ވަނީ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ޖޯޝުއާ ކިމިޗެވެ.

މެޗުގެ 24 ވަނަ މިނެޓުގައި ލެވަންޑޯސްކީ ބަޔާނަށް ލީޑު ފުޅާކޮށްދިން ނަމަވެސް، 33 ވަނަ މިނެޓުގައި ލޫކަސް ހޯލާ ވަނީ ފްރެއިބާގަށް ނަތީޖާ އެއްވަރުކޮށްދީފައެވެ. އެކަމަކު އޭގެ ހަތަރު މިނެޓު ފަހުން ލެވަންޑޯސްކީ ވަނީ ބަޔާނަށް އަލުން ލީޑު ފުޅާކޮށްދީފައެވެ.

މި މެޗުގައި ޖެހި ދެ ލަނޑާއެކު ލެވަންޑޯސްކީ ވަނީ ލީގުގައި 33 ލަނޑު ހަމަކޮށް، ލީގު ތާރީޚުގައި އެ އަދަދަށް ލަނޑު ޖެހި ޖަރުމަން ނޫން އެހެން ގައުމަކަށް ނިސްބަތްވާ ކުޅުންތެރިޔާގެ ރެކޯޑް މުގުރާލާފައެވެ. މީގެ ކުރިން އެ ރެކޯޑް އޮތީ 2016-2017 ގެ ސީޒަނުގައި 31 ލަނޑު ޖެހި އޭރު ބޮރޫޝިއާ ޑޯޓްމަންޑުގެ ފޯވާޑް އޮބަމަޔަން އަތުގައެވެ.

މި މޮޅާއެކު ޖެހިޖެހިގެން އަށް ފަހަރު ލީގު ޗެމްޕިއަންކަން ހޯދާފައިވާ ބަޔާން ތާވަލުގެ އެއްވަނައިގައި އޮތީ 33 މެޗުން 79 ޕޮއިންޓާއެކުއެވެ. ލީގުގައި ހޮނިހިރު ދުވަހުގެރޭ އާރުބީ ލެއިޕްޒީގުގެ މައްޗަށް 2-0 އިން ކުރިހޯދާ، ޑޯޓްމަންޑް ވަނީ ލީގުގެ ދެވަނަ މަގާމު ކަށަވަރުކޮށްފައެވެ. ޑޯޓްމަންޑެ މިހާރު ދެވަނައިގައި އޮތީ 33 މެޗުން 69 ޕޮއިންޓާއެކުއެވެ.