އިނގިރޭސި ޕްރިމިއާ ލީގުގައި ހޮނިހިރު ދުވަހުގެރޭ ކުޅުނު މެޗުން ބްރައިޓަން އަތުން ފަހު ވަގުތު އާސެނަލް ބަލިވެއްޖެއެވެ.

ބްރައިޓަންގެ ދަނޑުގައި ކުޅުނު މެޗުން އާސެނަލް ބަލިވީ 2-1 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި އާސެނަލްގެ ގޯލްކީޕަރު ބާންޑް ލެނޯއަށް ލިބުނު އަނިޔާއަކާ ގުޅިގެން ވަނީ ބަދަލުކޮށްފައެވެ. ލެނޯއަށް އަނިޔާވީ ބޯޅަ ހިފަން އުޅުމުގެ ތެރޭ ބްރައިޓަންގެ ނީލް މޯޕޭގެ ޗެލެންޖަކުން، ފައި ބިންމަތީ އެޅުނު ގޮތަކުންނެވެ. ލެނޯގެ ކަނާތު ކަކުލަށް އަނިޔާވިއިރު، އޭނާ ގިނަ ދުވަސްތަކެއް ވަންދެން ކުޅުމާ ދުރުގައި ހުންނަން ޖެހޭނެ ކަމަށް ރިޕޯޓުތައް ބުނެއެވެ.

ހޮނިހިރު ދުވަހުގެރޭ ކުޅުނު މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، ދެވަނަ ހާފުގައި އެންމެ ފުރަތަމަ ލަނޑު ޖަހާ ލީޑު ނެގީ އާސެނަލުންނެވެ. މެޗުގެ 68 ވަނަ މިނެޓުގައި އާސެނަލަށް ލީޑު ނަގައިދިނީ ނިކްލަސް ޕެޕޭއެވެ.

އެކަމަކު އޭގެ ހަތް މިނެޓު ފަހުން ބްރައިޓަނުން ވަނީ ނަތީޖާ އެއްވަރުކޮށްފައެވެ. މި ލަނޑު އެޓީމަށް ކާމިޔޔާބުކޮށްދިނީ ލެވިސް ޑަންކްއެވެ. މި މެޗުން ބްރައިޓަން މޮޅުވީ އިތުރު ވަގުތުގެ ފަސްވަނަ މިނެޓުގައި މޯޕޭ ކާމިޔާބުކޮށްދިން ލަނޑުންނެވެ.

މި ނަތީޖާއާއެކު 40 ޕޮއިންޓާއެކު ތާވަލުގެ ނުވަވަނައިގައި އޮތް އާސެނަލަށް ގަދަ ހަތަރަކަށް ވަނުމުގެ ފުރުސަތު މިހާރު ވަނީ ހަނިވެފައެވެ. މިވަގުތު ހަތަރު ވަނައިގައި އޮތީ އާސެނަލަށް ވުރެ އެއް މެޗު މަދުން ކުޅެގެން 48 ޕޮއިންޓާއެކު ޗެލްސީއެވެ. އަނެއްކޮޅުން މި މޮޅާއެކު ބްރައިޓަން ވަނީ 32 ޕޮއިންޓާއެކު ތާވަލުގެ 15 ވަނައަށް ޖެހިލާފައެވެ.