އަންނަ ސީޒަނުގައި 22 ޓީމު ހިމަނަން ފްރެންޗު ލީގު ދެކޮޅު
ފްރެންޗު ލީގުގައި ރެލިގޭޝަނަށް އަމަލު ނުކުރަން ކޯޓަކުން ވަނީ އަމުރުކޮށްފައި
ފްރެންޗު ލީގުގައި ޓުލޫސް އާއި އަމިއެންސް ބައްދަލުކުރި މެޗުގެ ތެރެއިން
އަންނަ ސީޒަނުގެ ފްރެންޗު ލީގުގައި 20 ޓީމު ހިމަނަން ލީގުގެ ބޯޑުން ވޯޓު ދީފިއެވެ.
ސެޕްޓެމްބަރު މަހުގެ ކުރިން މީހުން އެއްވެ އުޅެ ކުރިއަށް ގެންދާ އެއްވެސް ހަރަކާތެއް ނުބޭއްވޭނެ ކަމަށް ފްރާންސް ސަރުކާރުން ނިންމުމާއެކު މި ސީޒަނުގެ ފްރެންޗު ލީގު ކެންސަލް ކުރީ އޭޕްރީލް މަހުގެ 30 ވަނަ ދުވަހުއެވެ.
ފްރެންޗު ލީގު ކެންސަލް ކޮށް، ޕީއެސްޖީއަށް ވަނީ ޗެމްޕިއަންކަން ދީފައެވެ. ލީގު ކެންސަލް ކުރުމާއެކު ތާވަލުގެ ފުލުގައި އޮތް ދެ ޓީމު ކަމަށްވާ އަމިއެންސް އާއި ޓުލޫސް ވަނީ ދެވަނަ ޑިވިޝަނަށް ރެލިގޭޓް ވެފައެވެ.
އެހެންކަމުން ރެލިގޭޝަނާ ދެކޮޅަށް އަމިއެންސް އާއި ޓުލޫސްއިން ވަނީ ކޯޓަށް މައްސަލަ ހުށަހަޅާފައެވެ. އެ މައްސަލައިގައި ފްރާންސްގެ އެންމެ މަތީ އެޑްމިނިސްޓްރޭޓިވް ކޯޓުން ވަނީ ރެލިގޭޝަން އުސޫލަށް އަމަލުކުރުމުގައި ދެވަނަ ވިސްނުމަކަށް ދިއުމަށް އަމުރުކޮށްފައެވެ. އެ ގޮތުން ފްރެންޗު ލީގުގައި ރެލިގޭޝަނަށް އަމަލުނުކުރަން ކޯޓުން ވަނީ އަންގާފައެވެ.
ކޯޓުގެ މި އެންގުމާއެކު އަންނަ ސީޒަނުގައި ފްރެންޗު ލީގުން 22 ޓީމު ފެނުމުގެ ފުރުސަތު ބޮޑެވި ނަމަވެސް، ފްރެންޗު ލީގުގެ ބޯޑުން ވޯޓު ދިނީ އަންނަ ސީޒަނުގެ ލީގުގައި 20 ޓީމު ހިމަނާށެވެ. އެކަމަކު މި ނިންމުން ފައިނަލް ކުރާނީ އަންނަ އަންގާރަ ދުވަހު އޮންނަ ފްރެންޗު ލީގުގެ ޖެނެރަލް އެސެމްބްލީގައެވެ.
ފްރެންޗު ލީގު ކެންސަލް ކުރީ އަންނަ ސީޒަނުގެ ޔޫރަޕް މުބާރާތްތަކަށް ކޮލިފައިވާ ޓީމުތައް ކަނަޑައެޅުމަށް ފަހު އެވެ. އެގޮތުން ފްރެންޗު ލީގުން ޔުއެފާ ޗެމްޕިއަންސް ލީގަށް ކޮލިފައިވީ އެއްވަނައިގައި އޮތް ޕީއެސްޖީ އާއި ދެވަނައިގައި އޮތް މާސޭ އަދި ތިންވަނައިގައި ރެނެސްއެވެ. އަދި ޔުއެފާ ޔޫރޮޕާ ލީގަށް ކޮލިފައިވީ ހަތަރުވަނައިގައި އޮތް ލިލްއާއި ފަސްވަނައިގައި އޮތް ރެއިމްސް އަދި ހަވަނައިގައި އޮތް ނީސްއެވެ.
އެހެންކަމުން މިއީ 1997 ވަނަ އަހަރަށް ފަހު ޔޫރަޕުގެ މުބާރާތަކުން ތާވަލުގެ ހަތްވަނައިގައި އޮތް ލިޔޯނަށް ފުރުސަތު ގެއްލުނު ފުރަތަމަ ފަހަރެވެ. މި ސީޒަނުގެ ފްރެންޗު ލީގު ކެންސަލް ކުރިއިރު، ފްރެންޗު ލީގަކީ ޔޫރަޕުގެ ގަދަ ފަސް ލީގުގެ ތެރެއިން ކެންސަލް ކުރި ހަމައެކަނި ލީގެވެ.
