ޕޯޗުގަލްގެ ކޯޗު ސަންޓޯސްގެ އެއްބަސްވުން އާކޮށްފި

ޕޯޗުގަލްގެ ކޯޗު ފެނާންޑޯ ސަންޓޯސްގެ އެއްބަސްވުން އިތުރު ހަތަރު އަހަރަށް އާކޮށްފިއެވެ.

މީގެ ކުރިން ސަންޓޯސް ހަދާފައިވާ އެއްބަސްވުން ހަމަވަން އޮތީ މިއަހަރުގެ ޔޫރޯ ފުޓްބޯޅަ މުބާރާތަށްފަހުއެވެ. އެކަމަކު ކޮރޯނާވައިރަސް (ކޮވިޑް-19) އާ ގުޅިގެން މިއަހަރުގެ ޔޫރޯ ވަނީ އަންނަ އަހަރުގެ ހޫނު މޫސުމަށް ފަސްކޮށްފައެވެ.

އަންގާރަ ދުވަހު ޕޯޗުގީސް ފުޓްބޯލް ފެޑެރޭޝަނުން ވަނީ ސަންޓޯސްގެ އެއްބަސްވުން އާކުރިކަން ހާމަކޮށްފައެވެ. އެ ފެޑެރޭޝަނުން ނެރުނު ބަޔާނެއްގައި ބުނީ ސަންޓޯސްގެ އެއްބަސްވުން އިތުރު ހަތަރު އަހަރަށް މިހާރު އާކޮށްފައިވާ ކަމަށެވެ. އެހެންކަމުން 2024 ވަނަ އަހަރުގެ ޔޫރޯގެ ނިޔަލަށް ސަންޓޯސް ޕޯޗުގަލްގެ ކޯޗެއްގެ ގޮތުގައި މަޑުކުރާނެއެވެ.

2014 ވަނަ އަހަރުގެ ފީފާ ވޯލްޑް ކަޕަށްފަހު ޕޯޗުގަލްއާ ހަވާލުވި ސަންޓޯސް ވަނީ ޕޯޗުގަލްއަށް ބޮޑެތި ކާމިޔާބީތަކެއް ހޯދައިދީފައެވެ. އެގޮތުން ސަންޓޯސްގެ އިރުޝާދުގެ ދަށުން ޕޯޗުގަލްއިން ވަނީ 2016 ވަނަ އަހަރުގެ ޔޫރޯގެ އިތުރުން މިދިޔަ އަހަރު މުޅިން އަލަށް ބޭއްވި ޔުއެފާ ނޭޝަން ލީގުގެ ޗެމްޕިއަންކަން ހޯދާފައެވެ. އެކަމަކު 2018 ވަނަ އަހަރުގެ ވޯލްޑް ކަޕްގެ ގަދަ 16 އާ ހިސާބުން ޕޯޗުގަލް ވަނީ ކަޓާފައެވެ.

އެއްބަސްވުން އާކުރުމަށްފަހު ސަންޓޯސް ބުނީ ޕޯޗުގަލްގައި މަސައްކަތް ކުރުމަކީ އޭނާއަށް ލިބޭ ބޮޑު ޝަރަފެއް ކަމަށެވެ. އަދި ބުނީ ހުރިހާ މުބާރާތެއް ކާމިޔާބުނުކުރެވުނު ނަމަވެސް، ގިނަ ކާމިޔާބީތަކެއް ހޯދަން އަބަދުވެސް މަސައްކަތް ކުރާނެ ކަމަށެވެ. ޕޯޗުގީސް ފުޓްބޯލް ފެޑެރޭޝަނުގެ ރައީސް ފެނާންޑޯ ގޯމޭސް ވިދާޅުވީ ސަންޓޯސްގެ އެއްބަސްވުން އާކުރަން ނިންމި ނިންމުމަކީ ފަސޭހަ ނިންމުމެއް ކަމަށާއި، އޭނާ އާއެކު ޕޯޗުގަލްގެ ގައުމީ ޓީމަށް ގިނަ ކާމިޔާބީތަކެއް ހޯދޭނެ ކަމަށެވެ.

2024 ވަނަ އަހަރުގެ ނިޔަލަށް ޕޯޗުގަލްގެ އެއްބަސްވުން ސަންޓޯސް އާކުރުމުން، 2022 ވަނަ އަހަރުގެ ފީފާ ވޯލްޑް ކަޕާއި 2024 ވަނަ އަހަރުގެ ޔޫރޯ ޗެމްޕިއަންޝިޕްގައިވެސް ޕޯޗުގަލްއަށް އިރުޝާދުދޭނީ އޭނާއެވެ.