ސްޕެނިޝް ލީގު ނިމުމުގެ ކުރިން ސަޕޯޓަރުންނަށް ދަނޑު ހުޅުވާލެވޭނެ ކަމަށް އުންމީދު ކުރައްވާ ކަމަށް ލަލީގާގެ ރައީސް ހާވިއޭ ޓެބާސް ވިދާޅުވެއްޖެއެވެ.

ކޮރޯނާވައިރަސް (ކޮވިޑް-19)އާ ގުޅިގެން މެދުކަނޑާލި ސްޕެނިޝް ލީގުގެ ކުޅުން ބުރާސްފަތި ދުވަހުގެރޭ ފަށާފައިވާއިރު، މެޗުތައް ކުޅެނީ ދަނޑަށް ސަޕޯޓަރުން ނުވައްދައެވެ.

މީގެ ކުރިން މި ސީޒަނުގެ އިޓާލިއަން ލީގު ނިމުމުގެ ކުރިން ސަޕޯޓަރުންނަށް ދަނޑު ހުޅުވާލެވޭނެ ކަމަށް އުންމީދު ކުރައްވާ ކަމަށް އިޓާލިއަން ފުޓްބޯލް ފެޑެރޭޝަންގެ ރައީސް ގެބްރިއަލީ ގްރަވީނާ ވެސް ވަނީ ވިދާޅުވެފައެވެ.

ދާދި ފަހުން ލަލީގާގެ ރައީސް ހާވިއޭ ޓެބާސް ވިދާޅުވީ ލީގު ނިމުމުގެ ކުރިން ދަނޑުތައް ސަޕޯޓަރުންނަށް ހުޅުވާލެވޭނެ ކަމަށް އުންމީދު ކުރައްވާ ކަމަށާއި، އެކަމަކު މި ހާލަތުގައި މުޅި ދަނޑު އެއްކޮށް ހުޅުވާ ނުލާނެ ކަމަށެވެ. އެގޮތުން ދަނޑުތަކަށް ސަޕޯޓަރުން ވައްދާއިރު، ހާއްސަ އުސޫލެއް ކަނޑައަޅައި، ކޮންމެ މެޗަކަށް 10-15 އިންސައްތައާ ދެމެދުގެ އަދަދަކަށް ސަޕޯޓަރުން ވެއްދޭނެ ކަމަށް ވެސް ވިދާޅުވިއެވެ.

އެކަމަކު މީގެ ކުރިން މި ސީޒަނުގެ ސްޕެނިޝް ލީގު މެޗުތައް ބަލަން ސަޕޯޓަރުން ދަނޑަށް ވެއްދުން ނާދިރު ކަމަށް ސްޕެއިންގެ ނެޝަނަލް ސްޕޯޓްސް ކައުންސިލްގެ ރައީސް އިރެނޭ ލޮހާނޯ ވަނީ ވިދާޅުވެފައެވެ. ލޮހާނޯ ވިދާޅުވީ މި ދަނޑިވަޅުގައި އެންމެ މުހިންމީ އާންމު ރައްޔިތުންނާއި ކުޅުންތެރިންގެ ސިއްހަތު ކަމަށާއި، ފުޓްބޯޅަ މެޗުތައް އަލުން ފަށާއިރު ކަނޑައަޅާފައިވާ އުސޫލުތަކަށް ފުރިހަމަ އަށް ތަބާވާން ޖެހޭނެ ކަމަށެވެ. އަދި މި ސީޒަނުގެ ސްޕެނިޝް ލީގު މެޗުތައް ބަލަން ސަޕޯޓަރުން ދަނޑަށް ވެއްދުމަކީ ބޮޑު ރިސްކެއް ކަމަށާއި، އެކަން އެގޮތަށް ނުކުރާނެ ކަމަށްވެސް ވިދާޅުވިއެވެ.

ސްޕެނޝް ލީގު އަލުން ފެށިއިރު، މީގެ ކުރިން ވަނީ ސްޕެއިންގެ ފުރަތަމަ ޑިވިޝަނާއި ދެވަނަ ޑިވިޝަނުގެ ހުރިހާ ކުޅުންތެރިން ކޮވިޑް-19ށް ޓެސްޓު ކޮށްފައެވެ. ލީގުގެ ކުޅުން އަލުން ފަށައިގެން ކުރިއަށް ދާއިރު، ތާވަލުގެ އެއްވަނައިގައި އޮތް ބާސެލޯނާ އާއި ދެވަނައިގައި އޮތް ރެއާލް މެޑްރިޑާއި ދެމެދު އޮތީ ދެ ޕޮއިންޓުގެ ފަރަގެކެވެ. ބާސާއަށް 27 މެޗުން 58 ޕޮއިންޓު ލިބިފައިވާއިރު، ރެއާލަށް ވަނީ 27 މެޗުން 56 ޕޮއިންޓު ލިބިފައެވެ.