ގައުމީ ސްކޮޑުން ދާދު, އިއްބެ އަދި ސައްޓު ބާކީކޮށްފި

ގައުމީ ފުޓްބޯޅަ ޓީމުގެ ފަރިތަކުރުންތައް އަލުން ފަށަން އެކުލަވާލި ސްކޮޑުން ނާއިޒު ހަސަން (ދާދު) އާއި އިބްރާހިމް ވަހީދު ހަސަން (އިއްބެ) އަދި އިޝާން އިބްރާހިމް (ސައްޓު) ބާކީކޮށްފިއެވެ.

ކޮރޯނާވައިރަސް (ކޮވިޑް-19) ގެ ސަބަބުން ފަސްކުރި 2022 ވަނަ އަހަރުގެ ފީފާ ވޯލްޑް ކަޕާއި 2023 އަހަރުގެ އޭޝިއަން ކަޕްގެ ޖޮއިންޓް ކޮލިފައިންގ މެޗުތައް އަންނަ އޮކްޓޫބަރު މަހު ފަށަން އޭއެފްސީން މިހާރު ވަނީ ނިންމާފައެވެ. ކޮވިޑް-19 އާ ގުޅިގެން ގައުމީ ޓީމުގެ ފަރިތަކުރުންތައް ވެސް މެދުކަނޑާލިއިރު، މި މަހު ކުޅުންތެރިން ގޭގައި ތިބެ ފިޓްނަސްއަށް މަސައްކަތް ކުރަން ކޯޗު ވަނީ އަންގާފައެވެ. އަދި އަންނަ ޖުލައި މަހުގެ ތެރޭގައި ހަ ކުޅުންތެރިންގެ ގްރޫޕް ތަކުގައި ނިއު ނޯމަލްގެ ގައިޑްލައިނާ އެއްގޮތަށް ފަރިތަކުރުންތައް ފެށިގެންދާނެ ކަމަށާއި، އޮގަސްޓް މަހުގެ ތެރޭގައި ގައުމީ ޓީމުގެ ހުރިހާ ކުޅުންތެރިން އެކުގައި ތަމްރީނު ހެދޭނެ ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ދާދި ފަހުން ވަނީ ވިދާޅުވެފައެވެ.

ގައުމީ ފުޓްބޯޅަ ޓީމުގެ ފަރިތަކުރުންތައް އަލުން ފަށަން 25 ކުޅުންތެރިންގެ ސްކޮޑެއް އެކުލަވާލިއިރު، މީގެ ކުރިން އައީ 31 ކުޅުންތެރިންގެ ސްކޮޑަކާއެކު ތަމްރީނު ކުރަމުންނެވެ. ސްކޮޑުން ބާކީކުރި ކުޅުންތެރިންގެ ތެރެއިން ފާހަގަކޮށްލެވެނީ މާޒިޔާ ސްޕޯޓްސް އެންޑް ރެކްރިއޭޝަނުގެ ދެ ކުޅުންތެރިން ކަމަށްވާ ނާއިޒު ހަސަން (ދާދު) އާއި އިބްރާހިމް ވަހީދު ހަސަން (އިއްބެ) އަދި ޓީސީ ސްޕޯޓްސް ކްލަބުގެ ފޯވާޑް އިޝާން އިބްރާހިމް (ސައްޓު) އެވެ.

ގައުމީ ސްކޮޑުން ދާދު އާއި އިއްބެ ބާކީކުރިއިރު، މިދިޔަ ސީޒަނުގެ ފަހު ކޮޅުގައި އެ ދެ ކުޅުންތެރިންނަށް އަނިޔާގެ ސަބަބުން ގިނަ މެޗުތަކެއް ވަނީ ގެއްލިފައެވެ. ދިގު އިންތިޒާރަކަށް ފަހު މިދިޔަ ސީޒަނުގައި މޮޅު ކުޅުމެއް ދެއްކި ސައްޓުއަށް 31 ކުޅުންތެރިންގެ ސްކޮޑުން ޖާގަ ލިބުނު ނަމަވެސް، ކުޅުންތެރިންނާ އެފްއޭއެމުން ހިއްސާ ކުރި ސްކޮޑުގައި އޭނާ ހިމަނާފައެއް ނުވެއެވެ.

ސްކޮޑުގައި ނުހިމެނޭ އިތުރު ކުޅުންތެރިންނަކީ އަނިޔާގެ ސަބަބުން ކުޅުމާ ދުރުގައި ހުރި އަސަދުﷲ އަބްދުﷲ އާއި މުހައްމަދު ނާއިމް އާއި މުހައްމަދު ޖައިލަމް (އޮގީ) އަދި ހައިޝަމް ހަސަން އެވެ. އަދި ކުރިން ގައުމީ ޓީމުން ފުރުސަތު ހޯދަމުން އައި މާޒިޔާގެ މުޖުތާޒް މުހައްމަދު (މުޖޭ) ވެސް މި ފަހަރުގެ ސްކޮޑުގައި ހިމަނާފައެއް ނުވެއެވެ.

ސްކޮޑުން ޖާގަ ހޯދި ކުޅުންތެރިންގެ ތެރޭގައި ދެވަނަ ޑިވިޝަނުގެ މޮޅު ކުޅުންތެރިޔާގެ މަގާމު ހޯދައި ފަހުން މާޒިޔާ އަށް ބަދަލުވި އާދަމް ނިޒާމް (ކިތުނާ) އާއި ޓީސީއަށް ދާދި ފަހުން ބަދަލުވި އަލީ ޝާމިސް (ތޮއްޕޭ) ފާހަގަކޮށްލެވެއެވެ.

ވޯލްޑް ކަޕާއި އޭޝިއަން ކަޕްގެ ޖޮއިންޓް ކޮލިފައިންގ މެޗުތައް އަންނަ އޮކްޓޫބަރު މަހު ފަށަން ތާވަލުކޮށްފައިވާއިރު، ގައުމީ ޓީމުގެ ކޯޗު ނެދަލެންޑްސްގެ މާޓިން ކޫޕްމަންގެ އިރުޝާދުގެ ދަށުން މިދިޔަ ފެބްރުއަރީ މަހާއި މާޗު މަހުގެ ކުރީކޮޅުގައި ވަނީ ގައުމީ ޓީމުގެ ފަރިތަކުރުންތަކެއް ކުރިއަށް ގެންގޮސްފައެވެ.

ގައުމީ ފުޓްބޯޅަ ޓީމުގެ 25 ކުޅުންތެރިންގެ ސްކޮޑު:

މާޒިޔާ:ސަމޫހު އަލީ (ސަމުއްޓެ)، މުހައްމަދު އިރުފާން (އިރޭ)، އިބްރާހިމް މަހުދީ (ފޭދޫ އިއްބެ)، އިބްރާހިމް އައިސަމް، ހަމްޒާ މުހައްމަދު (ހަމްޕު)، ހުސެން ޝަރީފް (ހުސެން)، ހުސައިން ނިހާން (ނިހާޓް)، އާދަމް ނިޒާމް (ކިތުނާ)

ޓީސީ:އަލީ އަޝްފާގު (ދަގަނޑޭ)، އަކުރަމް އަބްދުލް ގަނީ (އަކޫ)، އަހުމަދު ރިލްވާން (ބެން)، އިސްމާއިލް އީސަ (މެސީ)، އަލީ ޝާމިސް (ތޮއްޕޭ)

އީގަލްސް:އަހުމަދު ނޫމާން (ހެލްމެޓް)، އިމްރާން ނަޝީދު (އިންމަ)، އަހުމަދު ރިޒްވާން (ރިޒޭ)، ހުސެއިން ސިފާއު (ކުރޯ)، ހަސަން ރާއިފް އަހުމަދު (ހަންނަ)، އަލީ ފާސިރު (ސެންޓޭ)، ހަސަން ނަޒީމް (ޗޯޓު)

ގްރީން ސްޓްރީޓްސް:މުހައްމަދު އާރިފް (ބަކާ)، އަބްދުﷲ ޔާމީން (ޔާން)، މުހައްމަދު އުމެއިރު، މުހައްމަދު ޝަފީއު (ޗެކް)