އޮގަސްޓް މަހުގެ ތެރޭގައި ގައުމީ ފުޓްބޯޅަ ޓީމުގެ ހުރިހާ ކުޅުންތެރިން އެކުގައި ތަމްރީނުތަކަށް ނުކުންނާާނެ ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ބުނެފިއެވެ.

ކޮރޯނާވައިރަސް (ކޮވިޑް-19) ގެ ސަބަބުން ފަސްކުރި 2022 ވަނަ އަހަރުގެ ފީފާ ވޯލްޑް ކަޕާއި 2023 އަހަރުގެ އޭޝިއަން ކަޕްގެ ޖޮއިންޓް ކޮލިފައިންގެ މެޗުތައް އަންނަ އޮކްޓޫބަރު މަހު ފަށަން އޭއެފްސީން މިހާރު ވަނީ ނިންމާފައެވެ. ކޮލިފައިންގެ މެދުތެރެއިން ރާއްޖޭން ވަނީ ގައުމީ ޓީމުގެ ކޯޗިން ސްޓާފުންނަށް ބަދަލު ގެނެސްފައެވެ. އެގޮތުން ކޯޗަކަށް ނެދަލެންޑްސްގެ މާޓިން ކޫޕްމަން ހަމަޖެއްސިއިރު، އެސިސްޓަންޓުންގެ ގޮތުގައި މަސައްކަތްކުރާނީ މަޝްހޫރު ކޯޗު ގޫސް ހިޑިންކްގެ ކޮއްކޮ ރެނޭ ހިޑިންކާއި ރާއްޖޭގެ އެންމެ ކާމިޔާބު އެއް ކޯޗު އަލީ ސުޒޭނެވެ.

އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވީ މި މަހު ކުޅުންތެރިން ގޭގައި ތިބެ ފިޓްނަސްއަށް މަސައްކަތް ކުރާއިރު، އަންނަ ޖުލައި މަހުގެ ތެރޭގައި ހަ ކުޅުންތެރިންގެ ގްރޫޕް ތަކުގައި ނިއު ނޯމަލްގެ ގައިޑްލައިނާ އެއްގޮތަށް ފަރިތަކުރުންތައް ފެށިގެންދާނެ ކަމަށެވެ. މިހާރު މިދާގޮތަށް އިތުރު ގޯހެއްނެތި ކުރިއަށްދާނަމަ، އޮގަސްޓް މަހުގެ ތެރޭގައި ގައުމީ ޓީމުގެ ހުރިހާ ކުޅުންތެރިން އެކުގައި ތަމްރީނު ހެދޭނެ ކަމަށާއި، އެފްއޭއެމްގެ ޓާގެޓަކީ އަދިވެސް އޭޝިއަން ކަޕަށް ކޮލިފައިވުން ކަމަށް ވުމާއެކު، ހާއްސަ ސަމާލުކަމެއް ގައުމީ ޓީމަށް ދޭނެ ކަމަށް ބައްސާމް ވިދާޅުވިއެވެ.

ކޮލިފައިންގެ މެޗުތައް ފެށުމަށް ތައްޔާރުވަމުންދާއިރު، ގައުމީ ޓީމު ކޭމްޕް ކުރުމަށް ދެ ގޮތަކަށް ވިސްނަމުންދާ ކަމަށް ބައްސާމް ވިދާޅުވި އެވެ. އެއް ގޮތަކީ ޖުލައި މަހުގެ ތެރޭގައި ރާއްޖޭގެ ރަށެއްގައި ގައުމީ ޓީމު ކޭމްޕް ކުރުމަށް ވިސްނާ ކަމަށާއި، ނޫނީ ފަރިތަކުރުންތައް މާލޭގައި ކުރިއަށް ގެންދިޔުމަށް ފަހު، ފެންވަރު ރަނގަޅު ކޭމްޕަކަށް ރާއްޖެއިން ބޭރަށް ދާނެ ކަމަށް ބައްސާމް ވިދާޅުވި އެވެ. އޮކްޓޯބަރުގެ ކުރިން ގައުމީ ޓީމުގެ ކޭމްޕް ބޭއްވުމަށް ނިންމާފައިވާއިރު، ކޯޗު ބޭނުންވަނީ ސައުދީ އަރަބިއްޔާ ނުވަތަ ގަތަރުގައި ކޭމްޕް ކުރުމަށް ކަމަށްވެސް ބައްސާމް ވިދާޅުވިއެވެ.

ކޮވިޑް-19ގެ ސަބަބުން ފަސްކުރި ކޮލިފައިން މެޗުތައް އޮކްޓޯބަރު މަހާއި ނޮވެމްބަރު މަހަށް ތާވަލު ކޮށްފައއިވާއިރު، ރާއްޖެ އާއި ޗައިނާގެ މެޗު މިހާރު ވަނީ އޮކްޓޯބަރު މަހުގެ އަށްވަނަ ދުވަހަށް ތާވަލު ކޮށްފައެވެ. އެކަމަކު މި މެޗު ކުޅޭނެ ދަނޑެއް ނިންމާފައެއް ނުވެއެވެ. މީގެ ކުރިން މި މެޗު ވަނީ ތައިލެންޑުގައި ކުޅުމަށް ވެސް ތާވަލުކޮށްފައެވެ.

މީގެ އިތުރުން ރާއްޖެ އާއި ސީރިއާ ކުޅޭ މެޗު އޮކްޓޯބަރު މަހުގެ 13 ވަނަ ދުވަހަށް މާލޭގައި ކުޅުމަށް ތާވަލު ކޮށްފައިވާއިރު، ރަށުން ބޭރުގައި ފިލިޕީންސް އާ ދެކޮޅަށް ރާއްޖެ ކުޅޭ މެޗު ވަނީ ނޮވެމްބަރު މަހުގެ 17 ވަނަ ދުވަހަށް ތާވަލުކޮށްފައެވެ.

އޭޝިއާ ސަރަހައްދުން ހަތަރު ގައުމެއް 2022 ވަނަ އަހަރުގެ ފީފާ ވޯލްޑް ކަޕަށް ކޮލިފައިވާއިރު، ކޮލިފައިންގައި ރާއްޖެ އޮތީ ހަތަރު މެޗުން ހަ ޕޮއިންޓާއެކު ގްރޫޕުގެ ހަތަރުވަނައިގައެވެ. ގްރޫޕުގެ އެއްވަނައިގައި އޮތީ ފަސް މެޗުން 15 ޕޮއިންޓާއެކު ސީރިއާއެވެ. ޗައިނާ ހަތަރު މެޗުން ހަތް ޕޮއިންޓާއެކު ދެވަނައިގައި އޮތްއިރު، ތިންވަނައިގައި އޮތީ ފަސް މެޗުން ހަތް ޕޮއިންޓު ހޯދާފައިވާ ފިލިޕީންސެވެ. ރާއްޖޭގެ ފަހަތުން ފަސްވަނައިގައި އޮތީ ފަސް މެޗު ކުޅެ ޕޮއިންޓެއް ލިބިފައިނުވާ ގުއާމެވެ.