ހަވަނަ ބުރުގައި ކުރިއަށް ގެންދިޔަ ޓެސްޓުތަކުން އިނގިރޭސި ޕްރިމިއާ ލީގުން އެއްވެސް ކުޅުންތެރިއަކު ކޮރޯނާވައިރަސް (ކޮވިޑް-19) ށް ޕޮޒިޓިވް ނުވާކަން ހާމަކޮށްފި އެވެ.

މިހާތަނަށް ޕްރިމިއާ ލީގުގެ ކުޅުންތެރިންނާއި އޮފިޝަލުން ކޮވިޑް-19ށް ޓެސްޓު ކުރުމަށް ހަ ބުރެއް ކުރިއަށް ގެންގޮސްފައިވާއިރު، ޖުމްލަ 6،274 ޓެސްޓު ވަނީ ކޮށްފައެވެ. އެއީ ފުރަތަމަ ބުރުގައި 748 މީހުންނާއި، ދެވަނަ ބުރުގައި 996 މީހުންނާއި، ތިންވަނަ ބުރުގައި 1،008 މީހުންނާއި، ހަތަރުވަނަ ބުރުގައި 1،130 މީހުންނާއި، ފަސްވަނަ ބުރުގައި 1،197 މީހުންގެ އިތުރުން ހަވަނަ ބުރުގައި 1،195 މީހުންނެވެ.

ހަވަނަ ބުރުގައި ހެދި ޓެސްޓު ތަކުން ޕޮޒިޓިވް ކޭސް އެއް ފެނިފައިނުވާއިރު، ހަތަރުވަނަ ބުރުގެ ޓެސްޓިންގައި ވެސް އެއްވެސް މީހަކު ވައިރަހަށް ޕޮޒިޓިވް ވެފައެއް ނުވެއެވެ. އެކަމަކު މީގެ ކުރިން ޖުމްލަ 13 މީހަކު ވަނީ ޕްރިމިއާ ލީގުން ކޮވިޑް-19ށް ޕޮޒިޓިވް ވެފައެވެ.

މީގެ ކުރިން ފުރަތަމަ ބުރުން ވަޓްފޯޑުގެ ޑިފެންޑަރު އޭޑްރިއަން ޕަރިއަޕާ އާއި އެ ކްލަބުގެ ދެ އޮފިޝަލަކު ވަނީ ޕޮޒިޓިވް ވެފައެވެ. އަދި ބާންލީގެ އެސިސްޓަންޓް ކޯޗު އިއަން ވޯން ވެސް ވަނީ ކޮވިޑް-19ށް ޕޮޒިޓިވް ވެފައެވެ. އަދި ދެވަނަ ބުރުން ބޯންމަތުގެ ގޯލްކީޕަރު އާރޮން ރާމްސްޑޭލް ވެސް ވަނީ ވައިރަހަށް ޕޮޒިޓިވް ވެފައެވެ. އެކަމަކު ރާމްސްޑޭލް މިހާރު ވަނީ ވައިރަހުން ސަލާމަތް ވެފައެވެ. އަދިި ފަސްވަނަ ބުރުން ޕޮޒިޓިވް އެންމެ ކޭސް އެއް ފެނުންއިރު، އެ ކޭސް ނިސްބަތްވަނީ ޓޮޓެންހަމް ހޮޓްސްޕާ އަށް ކަމަށް އެކްލަބުން ވަނީ ހާމަކޮށްފައެވެ.

ޖުމްލަ 13 މީހަކު މިހާތަނަށް ކޮވިޑް-19ށް ޕޮޒިޓިވްވި ނަމަވެސް، މީގެ ކުރިން ޕްރިމިއާ ލީގުގެ ކްލަބުތަކުން ވަނީ ކުޅުންތެރިން ކޮންޓެކްޓް ވެވޭ ގޮތަށް ފަރިތަކުރަން ފާސްކޮށްފައެވެ. އަދި މިދިޔަ ހަފުތާގައި ވަނީ ކްލަބުތަކުން އެކުވެރިކަމުގެ މެޗުތައް ކުޅުމުގެ ހުއްދަ ވެސް ދީފައެވެ.

ޕްރިމިއާ ލީގު އަލުން ފެށުމަށް ތާވަލުކޮށްފައިވަނީ މިމަހުގެ 17 ވަނަ ދުވަހު އެވެ.