ސައުތެމްޓަންގެ ކޯޗު ހޭޒަންހަޓްލްގެ އެއްބަސްވުން އާކޮށްފި

ސައުތެމްޓަންގެ ކޯޗު އޮސްޓްރިއާގެ ރަލްފް ހޭޒަންހަޓްލްގެ އެއްބަސްވުން އާކޮށްފި އެވެ.

އުމުރުން 52 އަހަރުގެ ހޭޒަންހަޓްލްގެ އެއްބަސްވުން އާކޮށްފައިވަނީ އިތުރު ހަތަރު އަހަރަށެވެ. އެހެންކަމުން 2024 ގެ ނިޔަލަށް އޭނާ ސައުތެމްޓަންގައި މަޑުކުރާނެ އެވެ.

2018 ވަނަ އަހަރުގެ ޑިސެންބަރު މަހު ސައުތެމްޓަންގެ ކޯޗުގެ މަގާމާ ހޭޒަންހަޓްލް ހަވާލުވިއިރު، އެ ޓީމު އޮތީ ރެލިގޭޝަން ޒޯނުގައެވެ. އޭނާ ޓީމާ ހަވާލުވި ފުރަތަމަ ސީޒަނުގައި ވެސް ވަނީ ރަނގަޅު މަސައްކަތްތަކެއް ކޮށްފައެވެ. 2018 ވަނަ އަހަރު ސައުތެމްޓަނާ ހަވާލުވުމުގެ ކުރިން އޭނާ އެންމެ ފުރަތަމަ ވިދާލީ ޖަރުމަންގެ އާރުބީ ލެއިޕްޒީގުންނެވެ.

ސައުތެމްޓަންގެ އެއްބަސްވުން އާކުރުމަށްފަހު ހޭޒަންހަޓްލް ބުނީ އެއްބަސްވުން އާކުރަން ނިންމި ނިންމުމަކީ ވަރަށް ފަސޭހަ ނިންމުމެއް ކަމަށެވެ. މިހާތަނަށް ކްލަބުގެ ކުޅުންތެރިންނާއި އޮފިޝަލުންނާއެކު ވަރަށް ގާތް ގުޅުމެއް ބަދަހިވެފައިވާ ކަމަށާއި، ދެން ވެސް ބޭނުންވަނީ ސައުތެމްޓަނުގައި ހުރެ ރަނގަޅު މަސައްކަތްތަކެއް ކުރުން ކަމަށް ވަނީ ބުނެފައެވެ.

ސައުތެމްޓަންގެ ކޯޗު ހޭޒަންހަޓްލްގެ އިތުރުން އެސިސްޓަންޓް ކޯޗު ރިޗާޑް ވެސް ވަނީ އެއްބަސްވުން އާކޮށްފައެވެ.

ކޮރޯނާވައިރަސް (ކޮވިޑް-19) އާ ގުޅިގެން އިނގިރޭސި ޕްރިމިއާ ލީގު މެދުކަނޑާލާފައިވާއިރު، ލީގުގައި ސައުތެމްޓަން އޮތީ 14 ވަނައިގައެވެ. އެޓީމަށް ކުޅުނު 29 މެޗުން ލިބިފައިވަނީ 34 ޕޮއިންޓެވެ.

ޕްރިމިއާ ލީގު ޖޫން މަހުގެ 17 ވަނަ ދުވަހު އަލުން ފެށުމަށް މިހާރު ކްލަބުތަކުން ވަނީ އެއްބަސްވެފައެވެ.