ހަތަރުވަނަ ބުރުގެ ޓެސްޓިންގައި ޕްރިމިއާ ލީގުގެ އެއްވެސް މީހަކު ޕޮޒިޓިވެއް ނުވޭ

ހަތަރުވަނަ ބުރުގައި ކުރިއަށް ގެންދިޔަ ޓެސްޓުތަކުން އިނގިރޭސި ޕްރިމިއާ ލީގުން އެއްވެސް ކުޅުންތެރިއަކު ކޮރޯނާވައިރަސް (ކޮވިޑް-19) ށް ޕޮޒިޓިވް ނުވާކަން ހާމަކޮށްފި އެވެ.

މިހާތަނަށް ޕްރިމިއާ ލީގުގެ ކުޅުންތެރިންނާއި އޮފިޝަލުން ކޮވިޑް-19ށް ޓެސްޓު ކުރުމަށް ހަތަރު ބުރެއް ކުރިއަށް ގެންގޮސްފައިވާއިރު، ޖުމްލަ 3،882 މީހަކު ވަނީ ޓެސްޓު ކޮށްފައެވެ. އެއީ ފުރަތަމަ ބުރުގައި 748 މީހުންނާއި، ދެވަނަ ބުރުގައި 996 މީހުންނާއި، ތިންވަނަ ބުރުގައި 1،008 މީހުންގެ އިތުރުން ހަތަރުވަނަ ބުރުގައި 1،130 މީހުންނެވެ.

ހަތަރުވަނަ ބުރުގައި އެއްވެސް މީހަކު ކޮވިޑް-19ށް ޕޮޒިޓިވް ނުވި ނަމަވެސް، މީގެ ކުރިން ޖުމްލަ 12 މީހަކު ވަނީ ވައިރަހަށް ޕޮޒިޓިވް ވެފައެވެ.

މީގެ ކުރިން ފުރަތަމަ ބުރުން ވަޓްފޯޑުގެ ޑިފެންޑަރު އޭޑްރިއަން ޕަރިއަޕާ އާއި އެ ކްލަބުގެ ދެ އޮފިޝަލަކު ވަނީ ޕޮޒިޓިވް ވެފައެވެ. އަދި ބާންލީގެ އެސިސްޓަންޓް ކޯޗު އިއަން ވޯން ވެސް ވަނީ ކޮވިޑް-19ށް ޕޮޒިޓިވް ވެފައެވެ. އަދި ދެވަނަ ބުރުން ބޯންމަތުގެ ގޯލްކީޕަރު އާރޮން ރާމްސްޑޭލް ވެސް ވަނީ ވައިރަހަށް ޕޮޒިޓިވް ވެފައެވެ. އެކަމަކު ރާމްސްޑޭލް މިހާރު ވަނީ ވައިރަހުން ސަލާމަތް ވެފައެވެ.

ޖުމްލަ 12 މީހަކު މިހާތަނަށް ކޮވިޑް-19ށް ޕޮޒިޓިވްވި ނަމަވެސް، މިދިޔަ ހަފުތާގައި ޕްރިމިއާ ލީގުގެ ކްލަބުތަކުން ވަނީ ކުޅުންތެރިން ކޮންޓެކްޓް ވެވޭ ގޮތަށް ފަރިތަކުރަން ފާސްކޮށްފައެވެ. އަދި ޖޫން މަހުގެ 17 ވަނަ ދުވަހު ޕްރިމިއާ ލީގު އަލުން ފެށުމަށް ކްލަބުތަކުން ވަނީ ނިންމާފައެވެ.