އޯގަސްޓު 1ގައި ސްރީލަންކާ އެއަރޕޯޓު ފަތުުރުވެރިންނަށް ހުޅުވާލަން ލަފާ އަރުވައިފި
27 މެއި 2020 | ބުދަ 17:48އެއަރޕޯޓު ހުޅުވަން ލަފާ އެރުވީ ކޮވިޑް-19ގެ ހާލަތު ރަނގަޅުވަމުން ދާތީ
ސްރީލަންކާގެ ރައީސް ގޮތަބަޔަ ރާޖަޕަކްސަ: ކޮވިޑް-19ގެ ޙާލަތުން އަރައިގަތުމަށް ހަރުދަނާ މަސައްކަތްތަކެއް ދަނީ ކުރައްވަމުން
އަންނަ އޯގަސްޓު މަހުގެ އެއްވަނަ ދުވަހު ސްރީލަންކާގެ އެއަރޕޯޓުތައް ބައިނަލްއަޤުވާމީ ފަތުުރުވެރިންނަށް ހުޅުވާލުމަށް ކޮވިޑް-19 ޓާސްކްފޯހުން އެޤައުމުގެ ރައީސަށް ލަފާ އަރުވައިފި އެވެ.
ސްރީލަންކާގެ ރައީސް އޮފީހުގެ މީޑިއާއާއި ޙަވާލާދީ އެޤައުމުގެ މީޑިއާތަކުން ރިޕޯޓުކުރާ ގޮތުގައި، ޓާސްކްފޯހުން އެއަރޕޯޓު ހުޅުވަން ރައީސަށް ހުށަހަޅާފައި ވަނީ ކޮވިޑް-19 ގެ ޙާލަތު ރަނގަޅުވަމުންދާ ކަމަށް ބުނެ އެވެ.
ޚަބަރު ލިބިފައިވާ ގޮތުގައި މިފަދައިން ހުށަހަޅާފައިވަނީ ރައީސް ގޮތަބަޔަ ރާޖަޕަކްސެއާއެކު ޓާސްކް ފޯސް ކޮމިޓީގެ އިސް ބޭފުޅުންނާއެކު އިއްޔެ ބޭއްވި ބައްދަލުވުމެއްގަ އެވެ. މިބައްދަލުވުމުގައި ކޮމިޓީގެ ބޭފުޅުން ވިދާޅުވެފައިވަނީ، އެޕްރީލް މަހުގެ 31 ވަނަ ދުވަހުން ފެށިގެން މުޖުތަމަޢު ތެރެއިން ކޮވިޑް-19ގެ އާ އެއްވެސް ކޭސްއެއް ފެނިފައި ނުވާ ކަމަށެވެ. މި ބައްދަލުވުމުގައި ކޮވިޑް-19ގެ ބަލިމަޑުކަމާއި ގުޅިގެން އެޤައުމުގެ ފަތުރުވެރިކަމުގެ ސިނާޢަތައް ކޮށްފައިވާ ނޭދެވޭ އަސަރުތަކުން އަރައގަތުމަށް ކުރެވިދާނެ ކަންތައްތަކާއި ބެހޭ ގޮތުން މަޝްވަރާ ކުރައްވާފައި ވެއެވެ.
މި ބައްދަލުވުމުގައި ރައީސް ގޮތަބަޔަ ރާޖަޕަކްސަ ވަނީ ޤައުމު ފަތުރުވެރިންނަށް ހުޅުވާލުމުގެ ކުރިން، ލަންކާއާއި ބޭރުގެ ކަމާއި ގުޅުން ހުރި މާހިރުން އެކަށާއަޅާފައިވާ ޞިއްޙީ މިންގަޑުތަކާއި އިރުޝާދުތައް ތަންފީޒުކުރުމުގެ މުހިންމު ކަމުގެ މައްޗަށް އަލިއަޅުވާލައްވާ ވާހަކަފުޅު ދައްކަވާފަ އެވެ. އެގޮތުން ފަތުުރުވެރިންނަށް ޤައުމު ހުޅުވާލުމުގެ ގޮތުން، ފަތުރުވެރިކަމަށް ޚާއްޞަ އިސްތިރާޖީ ޕްލޭނެއް އެކުލަވާލާ ފުރިހަމަޔަށް ތައްޔާރު ވުމަށް ރައީސް އިރުޝާދު ދެއްވާފައި ވެއެވެ.
އަންގާރަ ދުވަހު މަޝްވަރާއަށް ފަހު ވަނީ ފިޔަވަހި ތަކަކަށް ބަހާލައިގެން ފަތުރުވެރިކަމުގެ ވިޔަފާރިތައް ހުޅުވަން ނިންމާފަ އެވެ. އެގޮތުން، ފުރަތަަމަ ފިޔަވަހީގައި ޓުއަރިޒަމް ޑިވެލޮޕްމަންޓް އޮތޯރިޓީގައި ރަޖިސްޓްރީކޮށްފައިވާ ހޮޓާތަކާއި ރެސްޓޯރެންޓްތައް ހުޅުވާލުމަށް ވަނީ ނިންމާފަ އެވެ. މިތަންތަން ހުޅުވި ނަމަވެސް ކެއުން ބުއިމުގެ އިންތިޒާމުތައް ހަމަޖައްސަން ހަމަޖެހިފައިވަނީ ހޮޓަލުގެ ތެރޭގަ އެވެ. އަދި މިތަންތަން ހުޅުވާލުމަށް ފަހު، ކަންތައް ވާ ގޮތް ބެލުމަށް ފަހު އަސްކަރިއްޔާއާއި ޕަބްލިކް ހެލްތު އޮފިސަރުންގެ އެހީތެރިކަމާއެކު ފަތުުރުވެރިކަމުގެ އެހެން ވިޔަފާރިތައް ހުޅުވާލަން ވެސް ވަނީ ނިންމާފަ އެވެ.
ރައީސް ރާޖަޕަކްސަ ވަނީ ފަތުރުވެރިކަމުގެ ސިނާޢާތް ހުޅުވާލުމުގެ ކުރިން ފަތުރުވެރިންގެ އިތުބާރު ހޯދުމުގެ ގޮތުން، ޓުއަރިސްޓް ފުލުހުންގ ޚިދުމަތް ތަޢާރަފުކޮށް، ފަތުރުވެރިންގެ މެދުގައި މަޤުބޫލު މަންޒިލްތަކުގައި ފުލުހުންގެ ޕޯސްޓުތައް ޤާއިމު ކުރުމަށް ޓާސްކްފޯހަށް ލަފާ ދެއްވާފަ އެވެ. އަަދި މި ޕޯސްޓުތަކަށް ފުލުން ޢައްޔަނު ކުރާ އިރު ބޭރު ޤައުމުތަކުގެ ބަސްތަކައް ފަރިތަ ފުލުހުން އެތަންތަނަށް ލުމަށްވެސް އިރުޝާދު ދެއްވާފަ އެވެ. އަދި ފަތުރުވެރިކަން އިޝްތިހާރު ކުރުމަށް ޙަރަކާތްތަކެއް ހިންގުމަށް ވެސް ޚިޔާލުފުޅު އެރުވި އެވެ.
އަންގާރަ ދުވަހު ރައީސް ގޮތަބަޔަ ރާޖަޕަކްސަ ރިޔާސަތު ބެލެހެއްޓެވި މި ބައްދަލުވުމުގައި ހެލްތު މިނިސްޓަރާއި، ޓުއަރިޒަމް އަދި ސިވިލްއޭވިއޭޝަން މިނިސްޓަރު ބައިވެރި ވަޑައިގެން ކޮވިޑް-19 ގެ މި ޙާލަތުގައި އަމަލު ކުރަމުންދާ ގޮތާއި، ކުރިޔަށް ރާއްވަވާފައިވާ ޕްލޭން ޙިއްސާ ކުރައްވައި ކަމާއި ގުޅުން ހުރި މުހިންމު މަޝްވަރާތައް ރައީސަށް އަރުވާފައިވާކަމަށް ސްރީލަންކާގެ ނޫސްތަކުގައި ރިޕޯޓު ކޮށްފައި ވެއެވެ.
