މަދޫރީ ގެ ފުރަތަމަ ލަވަ "ކޭންޑްލް" ރިލީޒް ކޮށްފި

ފިލްމީ ދުނިޔޭގައި ފަނޑުވުމެއް ނެތި އަދިވެސް ފިޔަޖަހަމުން އަންނަ ބޮލީވުޑްގެ ތަރި މަދޫރީ ޑިކްސިޓް އެކަނި ކިޔާފައިވާ ފުރަތަމަ ލަވަ "ކޭންޑްލް" ރިލީޒްކޮށްފި އެވެ.

މި ލަވަ ރިލީޒްކޮށްފައި ވަނީ ހޮނިހިރު ދުވަހުގައި މަދޫރީގެ ފޭސްބުކް އާއި އިންސްޓަގްރާމް އެކައުންޓް މެދުވެރިކޮށެވެ. މި ލަވައިގެ ވީޑިއޯ މަދޫރީ ޙާއްސަ ކޮށްފައި ވަނީ ކޮވިޑް 19 ގައި އިސް ސަފުގައި މަސައްކަތްކުރާ މަސައްކަތްތެރިންގެ އަގުވަޒަން ކުރުމަށެވެ. މި ވީޑިއޯގައި ދުނިޔޭގެ އެކި ހިސާބުތަކުގައި ލޮކްޑައުންވެގެން ތިބެ އިސް ސަފުގައި މަސައްކަތްކުރާ ފަރާތްތަކުގެ ވީޑިއޯ ހިމަނާފައިވެއެވެ. އަދި މި ލަވަ ނިންމާލާފައި ވަނީ ކޮވިޑް 19 ގައި މަސައްކަތް ކުރަމުންދާ ހުރިހާ ފަރާތްތަކަށް ޝުކުރު އަދާކޮށް ޙާއްސަ މެސެޖެއް ދެމުންނެވެ.

މަދޫރީ ފިޔަޖަހަމުން އައީ ހަމައެކަނި ފިލްމީ ދުނިޔެ ޒީނަތްތެރިކުރުމުގެ ގޮތުން އެ އުދަރެހަކު އެކަންޏެއް ނޫނެވެ. އޭނާގެ ނެށުމުގެ ހުނަރަކީ މިއަދަށްވެސް އެންމެ މުނާސަބު އަދި އެ ނެށުންތައް މިއަދުގެ ޒުވާނުންވެސް ކޮޕީކޮށްގެން އެކިއެކި ހަފުލާތައް ފަޅުފިލުވަމުންދާ ނެށުން ތަކެކެވެ. ޚާއްސަކޮށް އޭނާގެ އޭކްދޯތީން ޗާރް އެވެ.

ބައެއް ރިޔަލިޓީ ޝޯތަކުންނާއި ނެށުމުގެ ހުނަރު ދައްކުވައިދޭ ޝޯވތަކުގައި ފަނޑިޔާރެއްގެ ގޮތުން އޭނާ މިހާރުވެސް ހަރަކާތްތެރިވަމުން ދެއެވެ. އެގޮތުން ޑާންސް ދިވާނޭގައި ވެސް މަދޫރީ އަންނަނީ ޖަޖެއްގެ ގޮތުގައި ހަރަކާތްތެރި ވަމުންނެވެ.

ފިލްމީ މަސައްކަތްތަކަށް ބަލާއިރު މަދޫރީ އެންމެ ފަހުން ފެނިގެންގޮސްފައި ވަނީ ކަރަން ޖޯހަރްގެ ކަލަންކް އިންނެވެ. މި ފިލްމުގައި މަދޫރީ ފެނިގެން ދިޔައީ ސޮނާކްޝީ ސިންހާ، އާލިއާ ބަޓް، ވަރުން ދާވަން އަދިތިޔާ ރޯއި ކަޕޫރް އަދި ސަންޖޭ ދަތް އާއި އެކުގައެވެ.