އެމެރިކާއިން ސްރީލަންކާއަށް 4.8 މިލިއަން ޑޮލަރުގެ އެހީއެއް ދޭން ނިންމައިފި

ކޮވިޑް-19 ރޯގާއާއި ގުޅިގެން ސްރީލަންކާއަށް ކުރިމަތިވެފައިވާ ގޮންޖެހުންތަކުން އަރައިގަތުމަށް އެޤައުމުގެ ސަރުކާރުން ކުރަމުންދާ މަސައްކަތްތަކަށް އެހީތެރިވެދިނުމުގެ ގޮތުން އެމެރިކާއިން 4.5 މިލިއަން އެމެރިކާ ޑޮލަރު ހިލޭ އެހީގެ ގޮތުގައި ދޭން ނިންމައިފިއެވެ.

މިކަން އިޢުލާނުކޮށްފައިވަނީ ސްރީލަންކާގެ ވެރިރަށް ކޮލޮމްބޯގައި ހުންނަ އެމެރިކާގެ އެމްބަސީން ނެރުނު ބަޔާނެއްގައެވެ. މިއާއެކު ކޮވިޑް-19 ސްރީލަންކާއިން ފެނުނު ފަހުން އެމެރިކާއިން ދިން އެހީގެ ޢަދަދު ވަނީ 5.8 މިލިއަނަށް އަރާފައެވެ.

އެހީގެ ތަފުޞީލު ބަޔާންކޮށް އެމްބަސީން ނެރުނު ބަޔާނުގައި އެމެރިކާގެ ސަފީރު އަލައިނާ ޓިޕްލީޒް ވިދާޅުވީ ސްރީލަންކާގެ މިނިވަންކަމާއި ސިޔާދަތު ދެމެހެއްޓުމަށް ކުރަމުންދާ މަސައްކަތައް އެމެރިކާއިން އަބަދުވެސް އެހީތެރިވަމުން އަންނަކަމަށާއި، ފާއިތުވެދިޔަ 20 އަހަރު ދުވަހުގެ ތެރޭގައި އެމެރިކާއިން ދިން އެހީގެ ޢަދަދު އެއް ބިލިއަން އެމެރިކާ ޑޮލަރަށް އަރާކަމަށެވެ. މީގެތެރޭގައި ޞިއްޙީ އެހީގެގޮތުގައި ދިން 26 މިލިއަން ޑޮލަރުވެސް ހިމެނޭކަމަށެވެ.

ކޮވިޑް-19 ގެ ޙާލަތާއި ގުޅިގެން މިހާރު ދޭން ނިންމި އެހީގެ ތަފުޞީލު ހާމަކުރައްވަ ޓިޕްލީޒް ވިދާޅުވީ، އެހީ ސްރީލަންކާއަށް ފޯރުކޮށްދޭނީ "ޔުނައިޓް ސްޓޭޓްސް އޭޖެންސީ ފޮރ އިންޓަރނޭޝަނަލް ޑެވެލޮޕްމެންޓް"(ޔުސެއިޑް) ގެ ދަށުން ކަމަށެވެ. މީގެ ތެރެއިން ދެމިލިއަން ޑޮލަރު ބޭނުންކުރާނީ ކޮވިޑް-19ގެ އަސަރު އެންމެ ބޮޑަށް ކުރި އާބާދީތަކައް އިޖުތިމާޢީ ރައްކާތެރިކަން ފޯރުކޮށްދީ، އިޖުތިމާޢީ ޚިދުމަތްތައް ހަރުދަނާ ކުރުމަށްކަމަށެވެ. އަދި އަނެއް ދެ މިލިއަން ޑޮލަރު ބޭނުންކުރާނީ ކުދި އަދި މެދުފަންތީގެ ވިޔަފާރިތައް ތަަރައްޤީކުރުމަށާއި، ވިޔަފާރީގެ ޙަރަކާތްތަކުގައި އަންހެނުންގެ ބައިވެރިވުން އިތުރުކުރުމަށްކަމަށެވެ. އަދި ބާކީ 590،000 ޑޮލަރު ބޭނުންކުރާނީ ކޮވިޑް-19 ގެ ނޭދެވޭ އަސަރުކޮށް ނާޒުކު ޙާލަތްތައް ތަޙައްމަލުކުރަން ޖެހިފައިވާ މީހުންނަށް އިންސާނީ އެހީތެރިކަން ފޯރުކޮށްދިނުމަށް ކަމަށް ބަޔާނުގައި ވެއެވެ.

އަދި އެޕްރީލްމަހުގެ ނުވަވަނަ ދުވަހު އެމެރިކާއިން ސްރީލަންކާއަށް ދިން 1.3 މިލިއަން ޑޮލަރުގެ އެހީ ބޭނުން ކުރަމުންދަނީ ސްރީލަންކާ ސަރުކާރުން ކޮވިޑް-19 ޖެހިފައިވާ މީހުން ހޯދުމަށް ކުރިޔަށްގެންދާ ކޮމިއުނިޓީ ސަރވައިލެންސް ޕްރޮގުރާމު ހަރުދަނާކުރުމަށާއި، އިތުރު ލެބޯރެޓަރީތައް ޤާއިމުކުރުމަށާއި، ކޮވިޑް-19 ރައްކާތެރިވުމަށާއި، ވައިރަސް ފެތުރުން ހުއްޓުވުމަށް ސްރީލަންކާ ސަރުކާރުން ކުރަމުންދާ ފަންނީ މަސައްކަތްތަކަށް ކަމަށެވެ.

ކޮވިޑް-19 ގެ ބަލިމަޑުކަމުން އަރައިގަތުމަށް ދުނިޔޭގެ އެކި ޤައުމުތަކުން ކުރަމުންދާ މަސައްކަތްތަކުގައި އެހީތެރިވުމަށް އެމެރިކާއިން މިހާތަނަށް ވަނީ 775 ،މިލިއަން ރުފިޔާ ހޭދަކޮށްފައެެވެ. މިއީ، ކޮވިޑް-19 އާއި ގުޅިގެން ކުރިމަތިވާ ކުއްލީ ޞިއްޙީ އެހީއާއި، އިންސާނީ އެހީގެ އިތުރުން ވައިރަސްއާއި ގުޅިގެން ޤައުމުތަކަށް ކުރިމަތިވާ އިޤުތިޞާދީ ދަތިތަކުން އަރައިގަތުމަށް އެމެރިކާއިން ދިން ހިލޭ އެހީއެވެ. މީގެ އިތުރުންވެސް ކޮވިޑް-19 އާއި ގުޅުވައިގެން ދުނިޔޭގެ ފެންވަރުގައި ބައިނަލްއަޤުވާމީ ކަމާއި ގުޅުން ހުރި އިދާރާތަކާއި، ޖަމްޢިއްޔާ ޖަމާޢަތްތަކުން ކުރަމުންދާ މަސައްކަތުގައި އެމެރިކާއިން އަންނަނީ މާލީ އަދި ފަންނީ އެހީ ފޯރުކޮށްދެމުންނެވެ.

އެމެރިކާއަކީ މުޅި ދުނިޔެއިންވެސް ކޮވިޑް-19ގެ ނުރައްކާ އެންމެ ބޮޑަށް ކުރިމަތިވެފައިވާ ޤައުމެވެ. އަދި އެންމެ ގިނަ ޢަދަދއްގެ މީހުން މަރުވީވެސް، ޕޮޒިޓިވްވީވެސް އެޤައުމުންނެވެ. އެޤައުމުން މިހާތަނަށް 1,263,197 މީހުން ވައިރަސްއަށް ޕޮޒިޓިވްވެ، 74,807 މީހުން ވަނީ މަރުވެފައެވެ.

ސްރީލަންކާއަށް ބަލާއިރު، އެޤައުމުން މިހާތަނަށް 797 މީހުން ޕޮޒިޓިވްވެ، 07 މީހުން ވަނީ މަރުވެފައެވެ.