އިންޑިއާއިން ބައި ލައްކައަށް ވުރެ ގިނަ މީހުން ކޮވިޑް-19 އަށް ޕޮޒިޓިވްވެއްޖެ

މުޅި ދުނިޔޭގައި މިހާރު ހަލުވިކަމާއެކު ފެތުރެމުންދާ ނޮވެލް ކޮރޯނާވައިރަސް (ކޮވިޑް-19) އަށް އިންޑިއާގައި ބައިލައްކައަށް ވުރެ ގިނަ މީހުން ޕޮޒިޓިވްވެއްޖެއެވެ.

އިންޑިއާގެ ޞިއްޙަތާބެހޭ އިސް މަސްއޫލުވެެރިންނާއި ޙަވާލާދީ އިންޑިއާގެ ނޫސްތަކުން ޚަބަރު ފަތުރާގޮތުގައި، ބުދަ ދުވަހު އެކަނިވެސް އެޤައުމުން 2,940 މީހުން ވައިރަސްއަށް ޕޮޒިޓިވްވިއެވެ. މިއާއެކު އިންޑިއާގައި ވައިރަސްއަށް ޕޮޒިޓިވްވީ މީހުންގެ ޢަދަދުވަނީ 52,340ށް އަރާފައެވެ. އަދި ބުދަ ދުވަހު ފަރުވާ ދެމުންދިޔަ 75 މީހަކު ޙާލު ދެރަވެ މަރުވުމާއި ގުޅިގެން މަރުވީ މީހުންގެ ޢަދަދު 1,768 އަރާފައިވާކަމަށް އިންޑިއާގެ ނޫސްތަކުން ރިޕޯޓުކުރެއެވެ. އަދި ފަރުވާދީގެން 14,911 މީހުން ރަނގަޅުކުރެވިފައިވާއިރު، އަދިވެސް 35,661 މީހުން ފަރުވާ ހޯދަމުން އަންނަ ކަމަށް ރިޕޯޓުތައް ބުނެއެވެ.

އިންޑިއާގައި ހަލުވިކަމާއެކު ވައިރަސް ފެތުރެމުންދާތީ، އެ ޤައުމުގެ ބޮޑުވަޒީރު ނަރެންދްރަ މޯދީ ވަނީ ކޮވިޑް-19 ޓާސްކްފޯރސްއާއެކު އަންގާރަ ދުވަހު މަޝްވަރާ ބައްދަލުވުމެއް ބާއްވާފައެވެ. މި ބައްދަލުވުމުގައި މައިގަނޑުގޮތެއްގައި މަޝްވަރާ ކުރައްވާފައިވަނީ ކޮވިޑް-19 އިން ދިފާޢުވުމަށް ވެކްސިންއެއް އުފެއްދުމަށާއި، ފަރުވާއް ހޯދުމަށް އިންޑިއާއިން ކުރަމުންދާ މަސައްކަތްތަކުގައި ލިބިފައިވާ ކުރިއެރުމައި ބެހޭ ގޮތުންނެވެ. ވަކިން ޚާއްޞަކޮށް ވައިރަސްއަށް ޓެސްޓުކުރުމާއި، މީހުން ޑައިގްނޯސްކުރުމުގައި ފަރުވާތެރިވާންވީ ގޮތާއި، ވައިރަސްގެ ނުރައްކާ ބޮޑު ސްޓޭޓްތަކާއި ޔޫނިއަން ޓެރިޓަރީސްތަކުގައި ވައިރަސް ފެތުރުން ހުއްޓުވުމަށް ކުރެވިދާނެކަންތައްތަކާއި ބެހޭ ގޮތުން މަޝްވަރާ ކުރެއްވިއެވެ.

އިންޑިއާއިން މިހާރު ދަނީ ކޮވިޑް-19 އިން ދިފާޢުވާ 30 ވެކްސިންއެއް އުފެއްދުމުގެ މަސައްކަތް ކުރަމުންނެވެ. ވެކްސިން އުފެއްދުމުގެ މަރުޙަލާތަކައް ބަލާއިރު، އޭގެތެރެއިން ބައެއް ވެކްސިން އަޖުމަބެެލުމުގެ މަސައްކަތްވެސް ވަނީ ފަށާފައެވެ،

އިންޑިއާއިން ވަނީ ވައިރަސްއަށް އިން ރައްކާތެރިވުމަށް ޚާއްޞާ ފިވަޅުތަކެއް އަޅަމުންނެވެ. އެގޮތުން މުޅި ޤައުމު ފުރަބަންދުކޮށް، ޚާއްޞަ ޙާަލަތްތަކުގައި ނޫނީ އެއް ސްޓޭޓުން އަނެއް ސްޓޭތަށް ދަތުރުކުރުން ވަނީ މަނާކޮށްފައެެވެ. އަދި ވައިރަސްގެ ނުރައްކާ ބޮޑު ޞަރަހައްދުތަކުގައި ކަފިއުގެ ހަރުކަށި ޢަމުރު ތަންފީޒުކޮށް އެ ޞަރަޙައްދުތައް ބެލެހެއްޓުމުގައި މަދަނީ ފުލުހުންނާއި، ސަލާމަތީ ބާރުތަކުން ދަނީ ޙަރަކަތްތެރިވަމުންނެވެ. އަދި މީހުން ދިރިއުޅޭ ޞަރަޙައްދުތަކާއި، މަގުތައް ދަނީ "ޑިސްއިންފެކްޓް" ކުރަމުންނެވެ. އެހެންނަމަވެސް ވައިރަސްގެ ނުރައްނާ ކުޑަ އަވަށްތަކުގައި ދޫދެމުންދާކަމަށް ޚަަބަރު ލިބެއެވެ.

އިންޑިއާ ފުރަބަންދު ކުރުމާއި ގުޅިގެން އިޤުތިޞާދީ ގިނަ ޙަރަކާތްތައް ހުއްޓި، ވިޔަފާރި ބޮޑެތި ގެއްލުންތަކާއި ވަނީ ކުރިމަތިލާންޖެހިފައެެވެ. އަދި މައި ސިނާޢަތްތަކުގެ ޙަރަކާތްތައް ހުއްޓުމުގެ ސަބަބުން ބައެއް ތަކެތި ލިބުމުގައި ވަނީ ދަތިތަކާއި ކުރިމަތިވެފައެވެ. ދަތުރުފަތުރުގެ ނިޒާމު ހުއްޓި އެސިނާޢަތައް ގެއްލުން ލިބެމުންދާއިރު ގިނަ ބައެއްގެ ވަޒީފާތައް ދަނީ ގެއްލެމުންނެވެ. އަދި ދަނޑުވެރިކަމުން ނަފާ ހޯދައިގެންނާއި ދިރިއުޅުމުގެ ޒަރޫރީ ބޭނުންތައް ފުއްދަމުން އައި އެޤައުމުގެ ފަޤީރު އާބާދީ ދަނީ ބަނޑަށް ޖެހެމުންނެވެ.

ކޮވިޑް-19 ގެ ޙާލަތާއި ގުޅިގެން އިންޑިއާ ސަރުކާރުގެ ވެލްފެއަރ ފަންޑުގެ ތެރެއިން ޙާލުގައި ޖެހެެމުންދަ މީހުންނަށް މާލީއެހީއާއި ކާބޯތަކެތީގެ އެހީ ދަނީ ދެމުންނެވެ. އެހެންނަމަވެސް ފަޤީރު އާބަދީ ބޮޑުކަމުން އެއެންމެނާއި ހަމަޔަށް މި އެހީ ފޯރުވައި ދިނުމުގައި އިންޑިއާ ސަރުކާރުވަނީ ނުކުޅެދިފައެވެ. ބޮޑު ވަޒީރު ނަރެންދްރަ މޯދީ ވަނީ މިފަދަ ފަރާތްތަކައް އެހީތެރިވުމަށް ޚާއްޞަކޮށް "ޕްރައިމް މިނިސްޓަރ ކެއަރ ފަންޑް" ގެ ނަމުގައި ފަންޑެއް ޤާއިމުކުރައްވާފައެވެ. އެޤައުމުގެ މުއްސަނދި މަހުޖަނުންނާއި، ވިޔަފާރިވެރިންނާއި، ފަަންނާނުންގެ އިތުރުން ވަކި ވަކި ފަރުދުންވެސް މި ފަންޑަށް އެހީތެރިވަމުންދާކަމަށް އިންޑިއާގެ ނޫސް ރިޕޯޓުތަކުން ބުނެއެވެ.

އިންޑިއާގެ މުއްސަދިންނާއި ފިލްމީ ތަރިން އެމީހުންގެ ބައެއް އިމާރާތްތައް ކަރަންޓިނާއި އައިސޮލޭޝަނުގެ ޚިދުމަތް ދިނުމަށް ސަރުކާރަށް ދެމުންދާއިރު، ކުރީ ސަފުގައި ޙަަރަކާތްތެރިވާ ޑޮކްޓަރުންނާއި ނަރުހުންނާއި، ޞީއްހީ ޚިދުމަތްތެރިންގެ ސަލާމަތާއި ރައްކާތެރިކަމަށް ބޭނުންކުރާނެ އާލާތްތައްވެސް ގިނަ ފަރާތްތަކުން ހަދިޔާކުރަމުން އަންނަ ކަމަށް ޚަަބަރު ލިބެއެވެ. ހަމަ އެހެންމެ އިންޑިއާއާއި ގުޅުން ގާތް އެކުވެރި ދައުލަތްތަކުވެސް މި ދަނޑިވަޅުގައި އިންޑިއާއަށް ދީލަތި އެހީތެރިކަން ފޯރުކޮށްދެމުންދާކަން ފާހަގަކުރެވެއެވެ.