ސައުދީން މިއަދު އެކަނިވެސް އެއްހާހަށްވުރެ ގިނަ މީހުން ކޮވިޑް-19 އަށް ޕޮޒިޓިވްވި

ސައުދީޢަރަބިއްޔާއިން ފާއިތުވެދިޔަ 24 ގަޑީއިރުގެ ތެރޭގައި އެއްހާހަށްވުރެ ގިނަ މީހުން ނޮވެލް ކޮރޯނާވައިރަސް (ކޮވިޑް-19) އަށް ޕޮޒިޓިވްވެއްޖެއެވެ.

އެޤައުމުގެ ޞިއްޙަތާބެހޭ ވުޒާރާގެ ތަރުޖަމާނާއި ޙަވަލާދީ ގަލްފުގެ މީޑިއާތަކުން ރިޕޯޓުކުރާގޮތުގައި، އެޤައުމުން ހޮނިހިރު އެކަނިވެސް 1،326 ޕޮޒިޓިވް ކޭސް ރިޕޯޓުކުރެވުނެވެ. މިއާއެކު އެޤައުމުގައި ކޮވިޑް-19 އަށް ޕޮޒިޓިވްވީ މީހުންގެ ޢަދަދު ވަނީ 25،459 އަށް އަރާފައެވެ. ތަރުޖަމާނު ވިދާޅުވެފައިވާ ގޮތުގައި ހޮނިހިރު ދުވަހު ދުވަހު ހަތް މީހުން މަރުވިއެވެ. މިއާއެކު އެޤައުމުން ކޮވިޑް-19 ޖެހި މަރުވީ މީހުންގެ ޢަދަދު ވަނީ 176 އަށް އަރާފައެވެ.

ސައުދީޢަރަބިއްޔާގައި ފާއިތުވެ ދިޔަ ތިން ދުވަހު ކޮވިޑް-19 އަށް ޕޮޒިޓިވްވާ މީހުންގެ ޢަދަދު ގިނަވީނަމަވެސް، އެޤައުމުން ފަރުވާދީގެން ރަނގަޅުވަމުން އަންނަ މީހުންގެ ނިޞްބަތް ގިނަ ކަމަށާއި، މަރުވާ މީހުންގެ އަދަދުވެސް މަދުވެފައިވާކަމަށް އެޤައުމުގެ ޞިއްޙަތާބެހޭ ވުޒާރާއާއި ޙަވާލާދީ ޤަލްފުގެ މީޑީއާތަކުން ރިޕޯޓުކޮށްފައިވެއެވެ. ވައިރަސް ޖެހުނު މީހުންގެ ތެރެއިން މަރުވެފައިވަނީ އެންމެ %1 މީހުންނެވެ. ފަރުވާދީގެން ރަނގަޅުވީ މީހުންގެ ޢަދަދަކީ 3،765 އެވެ. އެއީ %15 އެވެ.

ސައުދީން މިހާރު ފަށާފައިވާ "ފީލްޑް ޓެސްޓިންގ" ޕްރޮގުރާމުގެ ދަށުން 1،800 ޞަރަޙައްދަކަށް ޒިޔާރަތްކޮށް ގިނަ ޢަދަދެއްގެ މީހުން އެއްފަހަރާ ޓެސްޓްކޮށްފައިވެއެވެ. މިއީ ފަހަކަށް އައިސް ކޮވިޑް-19 އަށް ގިނަ މީހުން ޕޮޒިޓިވްވިކަން ރިޕޯޓުކުރެވޭ މައިގަނޑު އެއްސަބަބެވެ.

ސައުދީގައި ކޮވިޑް-19ށް ޕޮޒިޓިވްވި މީހުންގެ ތެރޭގައި ބިދޭސީ މަސައްކަތްތެރިން ހިމެނޭތީ އެޤައުމުގެ ސަރުކާރުން ޚާއްޞަ އަހަމިއްޔަތުކަމެއް ދީގެން ބިދޭސީ މަސައްކަތްތެރިން ދިރިއުޅޭ މަރުކަޒުތަކައް ޓީމުތައް ގޮސް ޓެސްޓުކުރަމުންދެއެވެ. އެގޮތުން މިހާތަނަށް 170،000 ބިދޭސީ މަސައްކަތްތެރިން ކޮވިޑް-19 އަށް ޓެސްޓުކުރެވިފައިވާކަމަށް ސައުދީގެ ޞިއްޙަތާބެހޭ ވުޒާރާއިން ބުނެއެވެ.

ސައުދީގައި ބިދޭސީ މަސައްކަތްތެރިން ދިރިއުޅޭ މަރުކަޒުތަކުގައި ތޮތްޖެހިފައިވާތީއާއި، އަދި ބިދޭސީ މަސައްކަތްތެރިންގެ ތެރޭގައި ކޮވިޑް-19 ފެތުރެމުންދާތީ އެޤައުުގެ ސަރުކާރުން ވަނީ ބިދޭސީ މަސައްކަތްތެރިން ދިރިއުޅޭނެ ތަންތަން ހަމަޖައްސައިދެމުންނެވެ. މިހާތަނަށް އާއިރު 170،000 ކޮޓަރި ހިމެނޭ ގޮތައް 2000 އިމާރާތެއް ވަނީ ހަމަޖައްސައިދީފައެވެ. އެޤައުމުގެ ސަރުކާރުން ބުނާގޮތުގައި މިއީ، 350،000 މީހުންގެ ޖާގައެވެ.