މިހާރު ދުނިޔޭގައި ހަލުވިކަމާއެކު ފެތުރެމުން އަންނަ ނޮވެލް ކޮރޯނާވައިރަސް (ކޮވިޑް-19) ޖެހިގެން އެމެރިކާއިން މިއަދު އެކަނިވެސް ދެހާހަށްވުރެ ގިނަ މީހުން މަރުވެއްޖެއެވެ.

އެންމެ ފަހުގެ ޑޭޓާތަކުން ދައްކާގޮތުގައި މިއަދު އެކަނިވެސް އެމެރިކާއިން 2612 މީހުން މަރުވިއެވެ. މިއާއެކު ކޮވިޑް-19 ޖެހިގެން އެމެރިކާގައި މަރުވީ މީހުންގެ އަދަދު ވަނީ 45128 އަށް އަރާފައެވެ. އެމެރިކާގެ ނޫސްތަކުން ރިޕޯޓުކުރާ ގޮތުންނަމަ، މިއަދު އެކަނިވެސް އެޤައުމުން 23133 މީހުން ކޮވިޑް-19 އަށް ޕޮޒިޓިވްވިއެވެ. މިއާއެކު އެޤައުމުގައި ކޮވިޑް-19 އަށް ޕޮޒިޓިވްވި މީހުންގެ އަދަދު ވަނީ 815892 އަށް އަރާފައެވެ.

މިހާރުވެސް އެޤައުމުގައި 688146 މީހުންނަށް ފަރުވާދެމުންދާއިރު، 14016 މީހުންގެ ޙާލަތު ވަރަށް ސީރިއަސްކަމަށް ރިޕޯޓުތައް ބުނެއެވެ. އެހެންނަމަވެސް މިހާނަތަށް އައިއިރު ފަރުވާދީގެން އެޤައުމުން 82634 މީހުން ވަނީ ރަނގަޅުކޮށްފައެވެ.

އެޤައުމުގެ 50 ސްޓޭޓަށްވެސް މިހާރު ވައިރަސް ފެތުރިފައިވާއިރު، އެންމެ ނުރައްކާތެރި މިންވަރަކަށް ވައިރަސް ފެތުރެމުންދަނީ ނިއުޔޯކުގައެވެ. ނިއުޔޯކުގައި 256555 މީހުންނަށް މި ބަލި ޖެހި 4461 މީހުން ވަނީ މަރުވެފައެވެ. ދެވަނަޔަށް އެންމެ ގިނައިން މީހުން ޕޮޒިޓިވްވި ނިއުޖަރޒީން 92387 މީހުން ވައިރަސްއަށް ޕޮޒިޓިވްވެ، 3581 މީހުން ވަނީ މަރުވެފައެވެ. ތިންވަނަޔަށް އެންމެ ގިނަ މީހުން ޕޮޒިޓިވްވީ މަޝަސުޝެޓްސްގައެވެ. އެސްޓޭޓުން 41199 މީހުން ޕޮޒިޓިވްވެފައިވާއިރު، 1556 މީހުން ވަނީ މަރުވެފައެވެ.

ދުނިޔޭގެ 220 ޤައުމު/ޓެރިޓަރީސްއަކަށް ކޮވިޑް-19 ފެތުރިފައިވާއިރު، އެންމެ ނުރައްކާ މިންވަރަށް މިވައިރަސް ފެތުރެމުން ދަނީ އެމެރިކާގައެވެ. އެމެރިކާގައި ވައިރަސް ހިފެހެއްޓުމެއްނެތި ފެތުރެމުންދާތީ އެޤައުމުގެ ސަރުކާރުން ދަނީ ސަލާމަތާއި ރައްކާތެރިކަމުގެ ފިޔަވަޅު އަޅަމުންނެވެ. އެހެންނަމަވެސް އެއްފަހަރާ ގިނަ ބަޔަކު ބައްޔަށް ޕޮޒިޓިވްވަމުން ދާތީ އެޤައުމުގެ ސަރުކާރަށް ވަނީ ފަރުވާދިނުމަށް ބޮޑެތި ގޮންޖެހުންތަކާއި ކުރިމަތިވެފައެވެ. ވަކިން ޚާއްޞަކޮށް ކަރަންޓީންކުރާނެ ތަންތަން ނެތުމުން ވަނީ ގޮތްހުސްވެފައެވެ. އެމެރިކާއިން ވެސް ދަނީ ކޮވިޑް-19 އަށް ވެކްސިންއެއް އުފެއްދުމުގެ މަސައްކަތްކުރަމުންނެވެ.