ސައުދީން އެންމެ ގިނަ މީހުން ކޮވިޑް-19 އަށް ޕޮޒިޓިވްވީ މައްކާގައި

ސައުދީޢަރަބިއްޔާގެ އިސް މަސްއޫލުވެރިންނާއި ޙަވާލާދީ ބޭރުގެ މީޑިއާތަކުން ރިޕޯޓުކުރާ ގޮތުގައި ފާއިތުވެދިޔަ 24 ގަޑިއިރު އެކަނިވެސް ސައުދީ އަރަބިއްޔާއިން 1147 މީހުން ނޮވެލް ކޮރޯނާވައިރަސްއަށް ޕޮޒިޓިވްވިއެވެ.

ސައުދީ ޢަރަބިއްޔާގެ ޞިއްޙަތާއި ބެހޭ ވުޒާރާގެ ތަރުޖަމާނު ޑރ. މުޙައްމަދު ޢަބްދުލް ޢަލީއާއި ޙާވާލާދީ ރިޕޯޓުކޮށްފައިވާ ގޮތުގައި ފާއިތުވީ 24 ގަޑިއިރުގެ ތެރޭގައި 1147 މީހުން ކޮވިޑް-19 އަށް ޕޮޒިޓިވްވެ އެޤައުމުގައި ވައިރަސްއަށް ޕޮޒިޓިވްވީ މީހުންގެ ޢަދަދުވަނީ 11631 އަށް އަރާފައެވެ. ތަރުޖަމާނު ވިދާޅުވެފައިވާގޮތުގައި ފާއިތުވެދިޔަ ދުވަސްތަކުގައި އެޤައުމުން ވައިރަސްއަށް ޕޮޒިޓިވްވާމީހުންގެ އަދަދު ގިނައީ އެޤައުމުން ވައިރަސްއަށް ޓެސްތްކުރާ ޞަރަޙައްދުތައް ގިނަވުމުގެ ސަބަބުންނެވެ. ގާތްގަނޑަކަށް މިހާރު ރިޕޯޓުކުރެވޭ މީހުންގެ %76 އަކީ ފީލްޑްތަކުން ރިޕޯޓުކުރާ ކޭސްތަކެއް ކަމަށް އަންގާރަ ދުވަހު ބޭއްވި ޕްރެސް ކޮންފަރެންސްގައި ތަރުޖަމާނު ވިދާޅުވެފައިވެއެވެ.

އޭނާ ވިދާޅުވީ އެޤައުމުގެ އެކި ޞަރަޙައްދުތަކުގައި މީހުން ކޮވިޑް-19 އަށް ތަހުލީލުކުރުމަށް ބޭނުންވާ ސާމްޕަލްތައް ނެގުމަށް 150 ޞިއްޙީ ޚިދުމަތްތެރިންގެ ޓީމުތައް ޙަރަކާތްތެރިވަމުންދާކަމަށެވެ. އަދި މިޓީމުތަކުގެ މަސައްކަތްތަކުން މިހާތަނަށް 50000 މީހުން ޓެސްޓުކުރެވިފައިވާކަމަށްވެސް ތަރުޖަމާނު ވިދާޅުވެފައިވެއެވެ.

ސައުދީޢަރަބިއްޔާގައި ފާއިތުވެދިޔަ 24 ގަޑިއިރު 5 މީހުން ކޮވިޑް-19ގައި މަރުވެ، އެޤައުމުގައި މަރުވީ މީހުންގެ ޢަދަދު ވަނީ 109 އަށް އަރާފައެވެ. މިހާރުވެސް އެޤައުމުގައި 9882 މީހުންނަށް ފަރުވާދެމުން އެބަދެއެވެ. އަދި ފަރުވާ ދީގެން 1640 މީހުން ވަނީ ރަނގަޅުކޮށްފައެވެ.

ސައުދީން އެންމެ ގިނަ ކޭސްތައް ރިކޯޑުކުރެވިފައިވަނީ މައްކާގައެވެ. އެއީ 305 މީހުންނެވެ. ދެން އެންމެ ގިނައިން ކޭސް ރިކޯޑުކުރެވިފައިވަނީ މަދީނާއާއި ޖިއްދާއާއި ވެރިރަށް ރިޔާދުންނެވެ.

ކޭސްތަކުގެ ތަފުޞީލު:

މަދީނާ(299)

ޖިއްދާ(171)

ރިޔާދު(148)

ޙުފޫފް(138)

ޠާއިފް(27)

ޖުބައިލް(12)

ޠާބޫކް(10)

ޚުލައިސް(08)

ބުރައިދާ(06)

ދަމާމް(05)

އަލް-މަޚްވާ(03)

އުނައިޒާ(02)

އަލް-ޙަދާ(02)

ދަޙްރާން(02)

އަރާރް(02)

މަހާޔީލް(01)

އަލް-ޖޫފް(01)

ޤުންފޫދާ(01)

ޤުރައްޔާތު(01)

ސަބްތު އަލް-އަލައްޔާ(01)

އަލް-ޤުރާއީ(01)

ބަހާ(01)

ސައުދީޢަރަބިއްޔާގެ ޞިއްޙަތާބެހޭ ވަޒީރު، ޑރ.ތައުފީޤް އަލް-ރާބިޔާ ދާދި ފަހުން ވަނީ ހަފުތާތަކެއްގެ ތެރޭގައި އެޤައުމުގައި ކޮވިޑް-19 ޖެހޭ މީހުންގެ ޢަދަދު 200000 އަށް އަރާނެކަމަށް އަންދާޒާ ކުރައްވާފައެވެ. އެންމެ ދަށް ޢަދަދެއްގެ ގޮތުގައި އަންދާޒާ ކުރެއްވި 10000އަށް ވުރެ ގިނައިން މީހުން މިހާރު ވަނީ ވައިރަސްއަށް ޕޮޒިޓިވްވެފައެވެ. އެމަނިކުފާނު މިފަދައިން އަންދާޒާ ކުރައްވާފައިވަނީ ސައިންސްވެރިންނާއި، ބޭރުގެ މުފައްކިރުންނާއި، ކަމާއި ގުޅުންހުރި ދިރާސާތަކައް ރިޢާޔަތްކުރެއްވުމަށް ފަހުގައެވެ.

ކޮވިޑް-19 އިން ރައްކާތެރިވުމުގެ ގޮތުން ސައުދީ ސަރުކާރުން ވަނީ އެއްގަމާއި، ކަނޑާއި، ވައިގެ ބޯޑަރުތައް ބަންދުކޮށް މައި ސިޓީތައް އެއްކޮށް ލޮކްޑައުންކޮށްފައެވެ. އަދި ލޮކްޑައުން ނުކުރާ ސިޓީތަކުގައި ވަނީ ޚާއްޞަ ޙާލަތުގެ ކާފިއުގެ ޢަމުރު އިޢުލާނުކޮށްފައެވެ.