އަލުން އިޓާލިއަން ލީގު ފެށުމުގެ ކުރިން ހުރިހާ ކުޅުންތެރިން ޓެސްޓު ކުރަނީ

ދުނިޔޭގައި ހަލުވިކަމާއިއެކު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން މެދުކަނޑާލައިފައިވާ އިޓާލިއަން ލީގުގެ ކުޅުން ފެށުމުގެ ކުރިން, މެއި މަހު ހުރިހާ ކުޅުންތެރިން ކޮވިޑް-19 އަށް ޓެސްޓު ކުރުމަށް ނިންމައިފިއެވެ.

ކޮވިޑް-19 ގެ ސަބަބުން އިޓާލިއަން ލީގުގެ ކުޅުން މާޗު މަހުގެ ނުވަވަނަ ދުވަހުން ފެށިގެން ވަނީ މެދުކަނޑާލައިފައެވެ. އަދި މިހާތަނަށް އިޓާލިއަން ލީގުގެ ކުޅުން ފަށާނެ ވަކި ތާރީޚެއް އިއުލާން ކޮށްފައިނުވާއިރު، އިޓަލީގެ ފުޓްބޯޅަ ފެޑަރޭޝަނުން އަންނަނީ މެޗުތައް ކުރިޔަށް ގެންދާނީ ސަޕޯޓަރުން ވައްދައިގެންތޯ އަދި ނޫންތޯއާ މެދު ކްލަބުތަކާއި މަޝްވަރާ ކުރަމުންނެވެ.

އިޓަލީގެ ފުޓްބޯޅަ ފެޑަރޭޝަނުގެ ރައީސް ގެބްރިއަލީ ގްރަވީނާ ވިދާޅުވީ އިޓާލިއަން ލީގުގެ ކުޅުން ފެށުމަށް ހާލަތު ތަން ދިންހާ އަވަހަށް ކުޅުން ފަށާނެ ކަމަށާއި، އިޓާލިއަން ލީގުގެ ޝެޑިއުލަށް ގެންނަން ޖެހޭ ބަދަލުތަކާއި ގުޅިގެން ކްލަބުތަކާއެކު މަޝްވަރާ ކުރުމަށް ނިންމައިފައިވާ ކަމަށެވެ. ގެބްރިއަލީ އިތުރަށް ވިދާޅުވީ ލީގުގެ ކުޅުން ފެށުމަށް ވަމުންދާން ޖެހޭ ތައްޔާރީތައް އިޓަލީގެ ފުޓްބޯޅަ ފެޑަރޭޝަނުން ވަމުން އަންނަ ކަމަށާއި، އެކަމަކު ލީގުގެ ކުޅުން ފަށާނީ އިޓާލިއަން ލީގުގައި ކުޅޭ ހުރިހާ ކުޅުންތެރިން ކޮވިޑް-19 އަށް ޓެސްޓު ކުރުމަށްފަހު ކަމަށެވެ.

ގެބްރިއަލީ އިތުރަށް ވިދާޅުވީ އިޓާލިއަން ލީގު ނިންމާނެ ތާރީޚެއް އަދި ކަނޑައަޅާފައި ނުވާ ކަމަށާއި، ބެލެވޭ ގޮތުގައި އިޓާލިއަން ލީގުގެ މެޗުތައް އަންނަ ހޫނު މޫސުމުގައި ކުރިޔަށްދާނެ ކަމަށެވެ.

އިޓާލިއަން ލީގުގެ މެޗުތައް މުއްދަތެއް ނެތްގޮތަށް ފަސްކޮށްފައިވާއިރު، އިޓަލީގެ ސަރުކާރުން ވަނީ މެއި މަހުގެ 3 ގެ ނިޔަލަށް އެއްވެސް ކުޅިވަރު ހަރަކާތެއް އިޓަލީގައި ބޭއްވުން މަނާ ކޮށްފައެވެ.

އިޓަލީން މިހާތަނަށް ކޮވިޑް-19 އަށް 156,00 އަށްވުރެ ގިނަ މީހުން ކޮވިޑް-19 އަށް ޕޮޒިޓިވްވެފައިވާއިރު، މިބަލީގައި އެގައުމުން 19،800 އަށްވުރެ ގިނަ މީހުން ވަނީ މަރުވެފައެވެ