"ޕްރިމިއާ ލީގު ފަށަންވާނީ ހުރިހާ ކުޅުންތެރިން ޓެސްޓު ކުރުމަށްފަހު"

އިނގިރޭސި ޕްރިމިއާ ލީގު ފަށަންވާނީ ކުޅުންތެރިން ކޮރޯނާވައިރަސް (ކޮވިޑް-19) އަށް ޓެސްޓު ކުރުމަށްފަހު ކަމަށް ލީގު މެނޭޖާސް އެސޯސިއޭޝަނުގެ ޗީފް އެގްޒެކެޓިވް ރިޗާޑް ބެވަން ވިދާޅުވެއްޖެ އެވެ.

ދުނިޔޭގައި މިހާރު ހަލުވިކަމާއިއެކު ފެތުރެމުން އަންނަ ކޮވިޑް-19 ގެ ސަބަބުން އިނގިރޭސި ޕްރިމިއާ ލީގު ވަނީ މުއްދަތެއް ނެތް ގޮތަށް ފަސްކޮށްފައެވެ.

ބީބީސީ ސްޕޯޓްސްއަށް ދިން އިންޓަވިއުއެއްގައި ރިޗާޑް ވިދާޅުވީ އިނގިރޭސި ޕްރިމިއާ ލީގު އަލުން ފަށަން ޖެހޭނީ ކުޅުންތެރިންގެ ސިއްހީ ހާލަތު ޔަގީން ކުރުމަށް ފަހު ކަމަށާއި އެގޮތުން ކުޅުން އަލުން ފަށާއިރު ހުރިހާ ކުޅުންތެރިން ކޮވިޑް-19 އަށް ޓެސްޓު ކުރަން ޖެހޭނެ ކަމަށެވެ.

މީގެ އިތުރުން ރިޗާޑް ވިދާޅުވީ ކުޅުންތެރިންގެ ސިއްހީ ހާލަތަކީ މިވަގުތު އެންމެ މުހިންމު ކަން ކަމަށާއި، އަލުން ލީގު ފަށާނަމަ އެންމެ މަދުވެގެން ކުޅުންތެރިންނަށް ތިން ހަފްތާ ފަރިތަކުރުމަށް ފުރުސަތު ދޭން ޖެހޭނެ ކަމަށެވެ. އަދި ފަރިތަކުރުންތައް ކުރިޔަށް ގެންދިޔުމުގެ ކުރިން ކޮންމެ ކުޅުންތެރިޔަކު ވެސް ކޮވިޑް-19 އަށް ޓެސްޓުކޮށްފައި ހުރުން މުހިންމު ކަމަށްވެސް ވިދާޅުވި އެވެ.

ކޮވިޑް-19 އާ ގުޅިގެން މުއްދަތެއް ނެތް ގޮތަށް ޕްރިމިއާ ލީގުގެ ކުޅުން މެދުކަނޑާލާފައިވާއިރު، ސީޒަން ނުފެށި ދިގުލައިގެންދާނަމަ ޕްރިމިއާ ލީގު ކްލަބުތަކަށް ބޮޑު ގެއްލުމެއްވާން ކަމަށް ރިޕޯޓުތައް ބުނެއެވެ. އެގޮތުން ޕްރިމިއާ ލީގުގެ މި ސީޒަން ނުނިންމެއްޖެނަމަ، ކްލަބުތަކަށް މާލީ ގޮތުން 1 ބިލިއަން ޔޫރޯއަށް ވުރެ ބޮޑު ގެއްލުމެއްވާނެ ކަމަށް ވަނީ ރިޕޯޓުކޮށްފައެވެ.

ޕްރިމިއާ ލީގުން މިހާތަނަށް ކޮވިޑް-19 އަށް ޕޮޒިޓިވްވެފައިވަނީ އާސެނަލްގެ ކޯޗު މިކޭލް އާޓެޓާ އާއި، އެސްޓަން ވިލާގެ ގޯލްކީޕަރު ޕެޕޭ ރެއިނާ އަދި ޗެލްސީގެ ފޯވާޑް ކަލުމް ހަޑްސަން-އޮޑޯއި އެވެ. މީގެ ތެރެއިން ކަލުމް ހަޑްސަން-އޮޑޯއި މިހާރު ވަނީ ވައިރަހުން ސަލާމަތްވެފައެވެ.